ئەڤرۆ نیوز، زنار تۆڤی:
شیرەتکارێ سەرۆک بارزانی بۆ کاروبارێن سیایی محەمەد جۆمعە د فێسبۆکێ دا ئەڤ نووچە بەلاڤکریە و تێدا دیارکریە،کو ناتۆیێ داخواز ژ سەرۆکێ ھەرێمێ مەسعود بارزانی کریە کو پێشمەرگە ببیتە بەشەک ژ ھێزا ناتۆیێ،ئەو ڤێ چەندێ ب پێنگاڤەکا مەزن دبینیت و وەسا دیاردکەت کو ئێدی پێشمەرگە دێ بیتە بەشەک ژ ھێزێن مەزن یێن جیھانی،گۆتیەژی ئەڤ دەسکەفتە ھەمی ب سایا سیاسەتا حەکیمانە یا سەڕۆک بارزانی بدەستڤە ھاتینە.

ئەڤرۆ نیوز، نەوزاد زادە ھلۆری:
ل سەر داخوازیا وەزارەتا دەرڤەیا ئیرانێ مەسعود بارزانی ناڤەراستا ھەیڤا پێنج یا ئەڤ سالە دێ سەرەدانا تەھرانا پایتەختا کومارا ئیسلامی یا ئیرانێ کەت.
ژێدەرەکێ بەرپرس ل بالیوزخانەیا کومارا ئیسلامی یا ئیرانێ ل بەغدا بو خەندان گۆت: (سەرەدانا بارزانی لسەر داخوازیا وەزارەتا دەرڤەیا ئێرانێ یە و بارزانی دێ پرسا دەڤەرێ و شەرێ داعشێ و شەرێ ئازادکرنا موسل و پرسا راکێشانا بوریا پەترولێ دناڤبەرا ھەرێم و ئیرانێ ل گەل مەزنە بەرپرسێن ئیرانێ گەنگەشە کەت).
ب ئاخفتنا ئەوی ژێدەری : بارزانی د سەرەدانا خودا دێ چاڤ ب ھەر ئێک ژ حەسەن روحانی سەروک کومارێ ئیرانێ ، و عەلی لاریجانی سەروکێ پەرلەمانی ، و محەمەد جەواد زەریف وەزیرێ دەرڤەیێ ئیرانێ و ئیرەج مەسجدی بەرپرسێ دوسەیەیا عیراقێ ل سوپایێ پاسداران کەڤیت.
ل بارا ئەگەرا دیدارا بارزانی و قاسم سلێمانی ئەوی ژێدەری ئاماژە ب وێ یەکێ کر کو ئەگەر ل دەما سەرەدانا بارزانی دا بو ئیرانێ قاسم سلێمانی ل نافخوەیا ئیرانێ بیت دێ چاڤ ب بارزانی کەڤیت و پرسا عیراق و شەرێ ئازادکرنا موسل گەنگەشە کەت.
بەرپرسێ بالیوزخانەیا ئیرانێ بارزانی ب دوستێ دێرین و وەفادارێ ئیرانێ ناڤبر و راگەھاند: (بەرپرسێن ئیرانێ رێزەکا تایبەت بو بارزانی و تالەبانی ھەیە ژبەرڤێ د ئاستەکێ بلند دا دێ پێشوازیێ ل بارزانی ھێتەکرن).
دوماھی سەرەدانا بارزانی بو تەھرانێ دزڤریت بو ئوکتوبەرا سالا 2011 کو ل گەل بەرپرسێن بلندێن وی وەلاتی ژ وان عەلی خامنەیی رێبەرێ شورشا کومارا ئیسلامی یا ئیرانێ کۆمببوو.

ئەڤرۆ نیوز:
قائیمقامێ قەزا شنگال بۆ رۆژناما ئەڤرۆ دیار کر کو ژ بەر خەمساریا حوکمەتا عیراقێ بۆ پشت گوە ھاڤیتنا گۆرێن ب کۆم ل دەڤەرا شنگالێ و پووتە نەدانا حوکمەتا ناڤھاتی ب جینوسایدناساندنا کوردێن ئێزدی، ئیدارا شنگال ل سەر داخوازا وەلاتیێن دەڤەرێ دێ ب فەرمی داخوازەکێ ئاراستەی بان کی مۆن، سکرتێرێ گشتی یێ نەتەوەیێن ئیکگرتی کەن.
مەحما خەلیل، قائیمقامێ قەزا شنگال دیار کر کو ھەتا نوکە بەغدا چو بۆ شنگال نەکریە ژ بەر ڤێ چەندێ ئیدارا قائیمقامیا شنگال ل دووڤ داخوازیا وەلاتیێن دەڤەرا شنگال دێ ب فەرمی داخوازێ ژ بان کی مۆن سکرتێرێ گشتی یێ نەتەوەیێن ئیکگرتی کەن، مایتێکرنێ د ڤی بابەتی دا بکەن و فشارێ بێخنە سەر بەغدا دا کو ببیتە ئەندام د دادگەھا لاھای دا بەلگەیان کۆم بکەن بۆ جینۆسایدناساندنا کوردێن ئێزدی و گۆت: “د ھاتە چاڤەرێکرن ل ناڤەراستا ڤێ ھەیڤێ دەست ب ڤەکرنا گۆرێن ب کۆم ل شنگالێ بھێتەکرن، بەلێ ھەتا نوکە چو دیارنینە”.
ناڤبری ئاماژە دا وێ چەندێ کو 24 گۆرێن ب کۆم ل شنگال ھەنە ژ بەر ڤێ چەندێ ئەو داخواز دکەن بھێنە دیکیۆمێنکرن و ڤەکرن و د رێورەسمەکی دا ل گۆرستانەکا تایبەت بھێنە ڤەشارتن و گۆت: “ھەموو بزاڤان دێ کەین کو بان کی مۆن ل سەر جینۆسایدناساندنا کوردێن ئێزدی کار بکەت، چونکی ھەتا نوکە ئێک شاندێ بەغدا سەرەدانا شنگالێ نەکریە”.