ئه‌ڤرۆ نيوز:
رێڤەبەرێ پەروەردا قەزا تلکێفێ بۆ ئەڤرۆ دیار کر کو وان کیماسیا د مامۆستایێن بسپۆر وەکو: بابەتێ ئینگلیزی، کیمیا و عەرەبیێ دا یا ھەی و ب زەحمەت دھێنە پەیداکرن، ئەڤێ چەندێ ژی گەلەک ئاستەنگ بۆ پەروەردێ دروستکرینە، دیسا سەرەرای ڕاگرتنا مۆلەتا بێ مووچە ژی بەردەوام مامۆستا یێ دەوامێ دھێلن و قەستا ژ دەرڤەی وەلاتی دکەن و گۆت: “ھەتا نوکە دۆرێن 230 مامۆستا ژ بەر نەپێگیریکرن ب دەوامێ یێن ھاتینە لادان”.
عەلی عیدۆ عەلۆ، رێڤەبەرێ پەروەردا قەزا تلکێفێ ئاشکرا کر، ھەتا نوکە ھندەک قوتابخانان کێماسیا مامۆستایان یا ھەی، ئەو بەردەوام بزاڤێ دکەن پەیدا بکەن، لێ یا ب زەحمەتە، ب تایبەتی مامۆستایێن بابەتێن کیمیا، عربی و ئینگلیزی و گۆت: “گەلەک ئارێشە بۆ مە دروستبووینە، ب تایبەت ل قوتابخانێن ئامادەیی، چونکو پشتی وەرزی ئێکێ نەبوونا مامۆستایێن بسپۆر بوۆ مە یا بوویە ئارێشەکا مەزن، ژ بەر کو گەلەک مامۆستا چووینە دەرڤەی وەلاتی، ھەرچەندە نوکە ب چ رەنگان ئەم مۆلەتا بێ مووچە نادەینە مامۆستایان، لێ دەوامێ دھێلن و دچن”.
ناڤھاتی خویا ژی کر کو پارێزگەھا نەینەوا قوتابخانێن شەش رێزی ل دەڤەرێ ئاڤادکرن، لێ نوکە ھژمارا قوتابیان یا زێدەبووی و تێرا ناکەن، ھەروەسا رێکخراوێن نێڤدەولەتی ژی چو پووتە ب دەڤەرا تلکێفێ نەدایە و چو قوتابخانە دروست نەکرینە و گۆت: “رێڤەبەریا گشتی یا پەرەردێ ل پارێزگەھا دھۆکێ ھندەک قوتابخانێن دەڤەرێ نووژەنکرینە، لێ ئەڤێ ژی ئارێشە چارە نەکریە و نوکە پتریا گوندێن دەڤەرێ پێدڤی ب ئاڤاکرنا قوتابخانێن نوو ھەنە”.
رێڤەبەرێ پەروەردا تلکێفێ ئاماژە ب وێ چەندێ ژی کر، ھەتا نوکە ل سنوورێ پەروەردا تلکێفێ 230 مامۆستا ژ بەر نەپێگیریکرن ب دەوامێ یێن ھاتینە لادان و گۆت: “چوونا ماموستایان بۆ دەرڤەی وەلاتی یا بوویە ئاریشەکا مەزن بۆ پەروەردا مە و کێماسیا نەبوونا مامۆستایان ل قوتابخانێن مە دروست بوویە، لەو ئەم نەچارین ب رێیا وانەبیژان پر بکەین”.

ئەڤرۆ نيوز:

ئەندامەکێ سەرکردایەتیا پارتی دیموکراتی کوردستان راگەھاند، ھەر ئێک ژ مەسعود بارزانی و نەوشێروان مستەفا دشێن ڕەوشا نوکە یا ھەرێما کوردستانێ ئاسایی بکەن.
نەزھەت حالی ئەندامێ سەرکردایەتیا پارتی و ڕێڤەبەرێ ئاژانسا پاراستن و زانیاری – پاراستن د نڤیسینەکێ دا ل بەرپەرێ خوە ل فیسبووکی دبێژیت” سەرۆک مەسعود بارزانی کو ئەرکێ ڕێبەراتیا بزاڤا ڕزگاریخوازا کوردستانا باشوور ل سەر مللێ وی یە و نەوشێروان مستەفا کو خەباتکارەکێ بەرنیاسێ بزاڤا شورەشگێری یا کوردستانێ یە، ئەو دو کەسایەتی یە، دو کاراکتەرێن سیاسی نە کو دشێن ڕەوشێ گەلەک ب ساناھی ئاسایی بکەن، پێکڤە ژی دشێن وەکو سەردەمێ سەرھلدانا سالا 1991 ێ، ل گەل ھەموو لایەنێن کوردستانی د ئێک بەرەیێ نیشتمانی دا کۆمببن بۆ شادبوون و گەھاندنا گەلێ کوردستانێ ب دەولەتا سەربخوە”.
نەزھەت حالی زێدەتر دبێژیت” ھەڤڕکیا نوکە یا پارتی دیموکراتی کوردستان و بزاڤا گۆڕان ژ ڕوویێ قەبارەی ڤە، ناھێتە بەراوردکرن ب زیانێن گیانی و مادی یێن ھەڤڕکیا پارتی و ئێکەتیێ، یان (جەلالی و مەلایی) ل سالێن شێستان ژ چەرخێ بۆری” ل گەل وێ چەندێ ژی” بەرژەوەندیێن نیشتمانی وەکر کو ھەردو لایەن داگێڕانێ بۆ ھەڤدو بکەن و ڕێکبکەڤن”.
ئاماژە ب وێ چەندێ ژی کر” بەردەوامی دان ب وێ سەنگەر بەندیا توند و زیاندارا نوکە د ناڤبەرا لایەنێن سیاسی یێن کوردستانی دا، زیانا وێ یا نەتەوی گەلەک مەزنترە ژ وێ یا ل دەمێن بۆری ڕوودای”.
خویاکر ژی” ھێرشێن نە بەرپرسیارانە و مەترسیدار یێن لایەنێن سیاسی د راگەھاندنێن خوەدا دژی ھەڤدو، سەقایەکێ سایکلۆژیێ گەلەک خراب و مەترسیدار یا دروستکری و مخابن باوەریا نیشتمانی ب پرسا نەتەوی ژی یا لاواز کری”.
گوت ژی” ب دیتنا من، نوکە ھەموو دەرگەە نەھاتینە گرتن، نابیت ھێلا سور د ناڤبەرا ئاشتیا نەتەوی و نیشتمانی دا ھەبیت، بەلکو پێدڤیە وەکو کورد ھێلا سور ل دەوروبەرێن ئێکڕێزیا بەرەیێن ناڤخوەیی دا بکێشین، بۆ وێ چەندێ ڕێ نەھێتە دان چو کەس و لایەنەک ژ وی چارچۆڤەی دا دەربکەڤیت و چو دەستەکێ بیانی ژی ناڤمالا کوردی دوبارە تێک نەدات”.