هه‌ولێر سولین سلێمان
چاڤدێره‌كێ سیاسی د دیداره‌كێدا بۆ رۆژناما (ئه‌ڤرۆ) رادگه‌هینیت، ئیراقا پشتی سالا ٢٠٠٣ و هه‌تا نوكه نه ئه‌و وه‌لاته یێ كو خه‌لكه‌كی خه‌ون ب ئازادیێ و سه‌ربه‌ستیێ و خوه‌شگوزه‌رانیێ پێڤه ددیت، به‌لكو به‌روڤاژی رۆژ بۆ رۆژێ به‌ر ب خراپتر چو و شه‌ڕێ تیرۆرێ و شه‌ڕێ تایفی و شه‌ڕێ میلیشیاتا سه‌رهلدا و خه‌لك تووشی نه‌هامه‌تێن مه‌زن كر زێده‌باری شه‌رێ سیاسی و گه‌نده‌لیێ.
به‌درخان زاویته‌یی، شرۆڤه‌كارێ سیاسی، گوت“ خوه‌نیشادانێن نوكه نه خوه‌نیشادانن و خورسكن به‌لكو سیاسی و حزبینه و بۆ مه‌ره‌مێن سیاسی دهێنه بكارئینان و نیشادانا هێزێ یه و ئیراق به‌ر چاره‌نڤیسه‌كێ نه‌دیار و خراب ڤه بریه”.
خویاكر “ چاره‌سه‌ریا ره‌وش و قه‌یرانێن ئیراقێ برێیا خوه‌نیشادانا نابیت به‌لكو یا فه‌ره ئالیێن سیاسی پێكڤه روینن و هه‌ڤدو قه‌بوول بكه‌ن و رێزێ ل ئه‌نجامێن هه‌لبژارتنان بگرن و لسه‌ر به‌رنامه‌كێ گشتگیر بۆ خزمه‌تكرن و ئاڤه‌دانكرنێ رێككه‌ڤن. هه‌روه‌سا دیاركر” هه‌تا نوكه ئه‌ڤ چه‌نده نه‌بویه و ئالیێن سیاسی د به‌رهه‌ڤ نینن پێكڤه روینن و دانپێدانێ ب ئه‌نجامێن هه‌لبژارتنان بكه‌ن به‌لكو به‌رده‌وام بزاڤێ دكه‌ن بۆ ژناڤبرنا هه‌ڤدوو”.
زێده‌تر گوت “ ل هه‌موو وه‌لاتان و ل گۆره‌ی قانوون و دستووری مافێ خوه‌نیشادانێ دایه خه‌لكه‌كی كو داخوازا مافێن خوه بكه‌ت و گازنده و كێشێن خوه بگه‌هینیته ده‌ستهه‌لاتێ، به‌لێ ل وه‌لاته‌كێ وه‌كو ئیراقێ كو هه‌تا نوكه كار ب قانوونێن رژێما به‌عس دهێنه كرن سه‌ره‌رای وێ چه‌ندێ كو دستووره‌ك هاتیه دانان و ئه‌رك و ماف تێدا هاتینه دیاركرن به‌لێ كار پێ ناهێته‌كرن و ده‌نگێ گه‌فا و شه‌ڕی ژ ده‌نگێ چاره‌سه‌ریێ و هه‌ڤدوو قبوولكرنَ بلندتره.
ئاماژه‌كر“ ئیراقێ دیرۆكه‌كا دوور و درێژ د كوده‌تایان دا هه‌یه و نوكه ژی هنده‌ك ئالیێن سیاسی بزاڤێن وان ئه‌ون كوده‌تایێ لسه‌ر ئالیێن دی بكه‌ن و دووباره ده‌ستهه‌لاته‌كا ناڤه‌ندی و له‌شكری بگرنه ده‌ست”.
ل دووماهیێ دیاركر” هه‌كه ئه‌ڤ ئالۆزیه بڤی ره‌نگی به‌رده‌وامبن دێ ئیراقێ به‌ر ب شه‌ڕه‌كێ خویناوی به‌ن”.
نيشاندان