ئەڤرۆ نیوز:
ل دووڤ نڤیسارەکا جڤاتا وەزیرێن ھەرێما کوردستانێ، بڕیار ھاتیە دان کریا کارەبا نشتیمانی ب رەنگەکێ بەرچاڤ بھێتە زێدەکرن و بڕیار ژی ل ھەیڤا ئێک یا ئەڤ سالە دێ ھێتە ب جھئینان.
ل دووڤ نڤیسارەکا جڤاتا وەزیرێن ھەرێما کوردستانێ یا ھژمار 1393 کو ئیمزا نێچیرڤان بارزانی، سەرۆک وەزیرێن ھەرێما کوردستانێ ل سەرە و تێدا ھاتیە: “دڤێت وەزارەتێن پەیوەندیدار ڤێ بڕیارێ ب جھبینن و ھەردو وەزارەتێن کارەبێ و سامانێن سروشتی ژی رێنمایێن پێدڤی بۆ بڕیارێ دەربێخن”.
ئاشکرا ژی کریە، ئەڤ بڕیارە ب تنێ بۆ پرۆژێن پیشەسازی یێن دەستوورداینە و ل رۆژا 1/1/2016 دێ ھێتە ب جھئینان.
نووترين نووچه
- سەرۆك بارزانی و مەزلۆم عەبدی دوپاتیێ ل ئێكڕێزی و ئێكگرتنا كوردان دكەن
- نوونەرا حوكمەتا هەرێمێ ل واشنتۆن دێ پشكداریێ د رێوڕەسمێ دەستبكاربوونا ترەمپی دا كەت
- ئاسۆ كەریم: سەرۆك بارزانی فاكتەرێ سەرەكیێ ئێكبوونا گەلێ كوردە
- سەرۆكێ هەرێمێ و شاندەكێ ئەمریكا دوپاتیێ ل چارەسەركرنا كێشەیێن هەولێرێ و بەغدایێ ب گۆرەی دستووری دكەن
- سەرۆكاتییا هەرێما كوردستانێ پێشوازی ل ئاگربەستا غەزە كر
- سەرۆك بارزانی جەژنا قەولتاسی ل كاكەییان پیرۆز دكەت
- ئەمریكا دەستخوەشیێ ل سەرۆك بارزانی دكەت بۆ هنارتنا نوونەرێ خوە یێ تایبەت بۆ سووریێ
- شاندێ دانوستاندكارێ پارتی ل گەل بەرەیێ گەل كۆمبوو
- پێدڤییە بەغدا شایستەیێن دارایی یێن هەرێما كوردستانێ بهنێریت
- مەسرور بارزانی و فالح فەیاز دوپاتی ل گرنگییا هەماهەنگییا ئەمنی د ناڤبەرا هەرێمێ و ئیراقێ دا كر
سه‌ره‌كى نووترين نووچه
ئەڤێ مەترسیێ ل کەرکووک سەرھلدا
ئەڤرۆ نیوز:
بەرپرسێ لقا پارتی دیموکراتی کوردستان ل باژێڕێ کەرکووکێ ئاشکراکر، پەیوەندیێن د ناڤبەرا پارتی و دکتۆر نەجمەدین کەریمی باشتربووینە و پارێزگەری چەندین جارا سەرەدانا بارەگایێ پارتی و سەرۆک بارزانی کریە، خویاکر ژی، لایەنێن سیاسی یێن کوردی ل کەرکووکێ دلگرانن ژ کێمیا رێژەیا کوردان ئەوێن چووینە ناڤەندێن دەنگدەران و دبێژیت، دێ مەترسی ل سەر رێژەیا دەنگێن کوردان د ھەلبژارتنێن داھاتی ھەبیت.
مەحەمەد کەمال، بەرپرسێ لقێ سێ یێ پارتی دیموکراتی کوردستان ل کەرکووکێ بۆ رۆژناما ئەڤرۆ گۆت” پشتی کۆمسیۆنا بلند یا سەربخوەیا ھەلبژارتنان ل عیراقێ پڕۆژێ بایۆمیتری راگەھاندی و ناڤەندێن تۆمارا دەنگدەران ل پارێزگەھان ڤەکری، ل پارێزگەھا کەرکووکێ ژی ناڤەندێن تۆمارێ ھاتینە ڤەکرن و پێدڤیە وەلاتی بۆ تۆمارکرنا ناڤێن خوە و یێن ژیێ وان گەھشتیە ھەژدە سالیێ سەرەدانا ناڤەندێن بایۆمیتری بکەن، مخابن وەلاتیێن کورد ل پارێزگەھا کەرکووکێ وەکو پێدڤی سەرەدانا بنگەھێن تۆمارا دەنگدەران ناکەن و گۆرەی ئامارا ھاتیە کۆمکرن، رێژیا سەرەدانا وەلاتیێن کورد تنێ 9%ێ بوویە، ئەڤە ژی بێگومان دێ کاریگەری ل سەر ھژمارا دەنگدەرێن کورد ل پارێزگەھا کەرکووکێ ھەبیت و ھەکە ب ڤی ڕەنگی بیت، د ھەلبژارتنێن داھاتی دا، کورد رێژەیەکا پێدڤیا دەنگدان بدەستڤە نائینن و ل گۆرەی پێشبینیێن مە وەکو لایەنێن سیاسی یێن کەرکووکێ، قەیرانا دارایی و ھندەک پرسێن ڕۆژانە ئەگەرن وەلاتیێن کورد دخەمساربن د پرسا سەرەدانا تۆمارا دەنگدەران، لایەنێن سیاسی گەھشتنە رێککەفتنێ ب ڕێیا دەزگەھێن حزبی و راگەھاندنێ کار ل سەر ھاندانا وەلاتیان بھێتەکرن و ب ڕێیا بریکارێن ئاھێن خوارنێ وەلاتی بھێنە ھشیارکرن کو بچنە ناڤەندێن تۆمارا دەنگدەران”.
ل دۆر پەیوەندیێن د ناڤبەرا پارتی و ئێکەتیێ دا ل کەرکووکێ، مەحەمەد کەمالی گۆت” نوکە پەیوەندیێن ھەموو لایەنێن کوردی ل باژێڕێ کەرکووکێ دباشن، بەری نوکە ئالۆزی د ناڤبەرا پارتی و دکتۆر نەجمەدین کەریم پارێزگەرێ کەرکووکێ دا ھەبوو، بەلێ خوەشبەختانە نوکە پەیوەندیێن مە ل گەل نەجمەدین کەریمی دباشن و چەندین جاران سەرەدانا مەکریە وەکو حزب و بەری چەند رۆژان ژی سەرەدانا سەرۆک بارزانی کربوو، بێگومان ئەڤ سەرەدانە دێ کاریگەری و کارڤەدانێن ئەرینی بۆ ھەبن، تنێ پەیوەندیێن پارێزگەری ل گەل قایمقامێ کەرکووکێ دباش نینن کو قایمقام ژ پشکا پارتی یە و ھیڤیدارین ئەو ئالۆزیا د ناڤبەرا واندا نەمینیت و بەر ب چارەسەرکرنێ ڤە بچیت د بەرژەوەندیا خەلکێ پارێزگەھا کەرکووکێ دا، ب کورتی ئەو ئاریشێن بەری نوکە مە وەکی پارتی ل گەل دکتۆر نەجمەدین کەریم ھەین، نەماینە.
ھێزێن پێشمەرگەی و حەشدا نیشتیمانیا سونی بەر ب مووسلێ ڤە دچن
ئەڤرۆ نیوز:
سەرکردێ ھێزێن پێشمەرگەی ل میحوەرێ مەخمور راگەھاند، ھێزێن پێشمەرگەی ل دەڤەر و گوندێن سەر ب قەزا مەخمورێ ڤە پێشڤەچونێن مەزن تۆمارکرینە و دەست ب ھێرشکرنا لسەر بنگەھێ داعشێ کرینە.
سەرکردێ ھێزێن پێشمەرگەی عەلی نەجات بۆ مالپەرێ پارتی راگەھاند، ھێزێن پێشمەرگەی ھێرشەکا بەرفرەە کریە سەر ھندەک گوندێن دەوروبەرێن قەزا مەخمور، ھەروەسا دوپاتکر ھێزێن پێشمەرگەی ھندەک دەڤەرێت ستراتیجی و گوندێن گرنگ یێن ژێر دەستێ داعشێ رزگار کرن ژوان گوندێ کودیلە کو دکەڤیتە دووراتیا 17 کیلومەتران ل رۆژئاڤایا مەخمور ئەو گوند خالا خوەراگریا چەکدارێن داعشێ بوو نھا ددەستێن پێشمەرگەی دایە.
ژئالیەکێ دیڤە عەبدوللا عوسمان بەرپرسێ راگەھاندنا حەشدا ھوزێن عەرەبێن سونی ل نەینەوا راگەھاند، چەکدارێن ھێزا حەشدا نشتیمانیا ھۆزێن عەرەب ب ھەڤکاری و پشتەڤانیا فەوجا ئێک یا سەرب لیوا 91 یا فرقا 16 ژ ھێزێن پێشمەرگەێ ھەرێما کوردستانێ د ھێرشەکێ دا بۆ سەر گوندێ کودیلە کو ژ سێ میحوران ڤە ھێرشەکا بەرفرەە کرنە سەر بنگەھێت تیرۆستێن داعشێ شیان گوندێ کودیلە رزگار بکەن و زەرەر و زیانەکا مەزن ب چەکدارێن داعشێ گەھاندن.
عەبدولا عوسمانی ھەروەسا گۆت: ھژمارەکا گەلەک یا خەلکێ گوندێ ناڤبری گەھشتینە ھێزێن پێشمەرگەی و حەشدا نشتیمانیا سونی و پشتەڤانیەکا باش بۆ رزگارکرنا گوندێ وان کرن، ھەڤدەم ئەو چەندە ئاشکراکر، کو سەرکردێن ھێزین پێشمەرگەی و حەشدا نیشتیمانیا ھوزێن عەرەب رێککەفتن ل گەل خەلکێ مووسلێ کرینە بەرب ژێریا مووسلێ ڤە بچن و ھەموو گوند و دەڤەرێن وان ژ دەستێن داعشێ رزگار بکەن.
راگەھاندنا جیھانی چاوان بەحسێ سەربەخۆیا کوردستانێ ل سەر دەستێ بارزانی دکەت؟
ئەڤرۆ نیوز:
ھژمارەک زێدە ژ دەزگەھێن راگەھاندنێن ئورۆپا، ئەمریکا و تورکیا بەحسێ پێشکەڤتنێن ل کوردستانێ کرینە و راپۆرتێن بەرفرەە ل سەر رەوشا داوی یا باکور، باشور و رۆژئاڤایێ کوردستانێ بەلاڤ کرینە و راگەھاندنە کو بارزانی دێ ھەتا نەورۆزێ مزگینیا دەولەتا سەربخوە دەتە کوردان.
رۆژناما ئیل مانیفیستۆ یا ئیتالیا د راپۆرتەکا خوە یا ل سەر رەوشا عیراقێ و ھەرێما کوردستانێ دا راگەھاندیە کو ھەر چەندە حوکمەتا عیراقێ فشارێن ئابووری خستینە سەر کوردان لێ حوکمەتا ھەرێما کوردستانێ بەرھەڤیێن خوە بۆ راگەھاندنا دەولەتەکا سەربخوە تەمام کرینە و پێشبینیا وێ یەکێ ژی کریە کو دێ ھەتا نەورۆزا ئەڤسالە بارزانی مزگینیا دەولەتا سەربخوە دەتە وەلاتیێن کوردستانێ.
رۆژناما ناڤھاتی د پشکەکا دی یا راپۆرتا خوە دا ژی سەرنج راکێشاندیە سەر بەرخوەدانا ھێزێن پێشمەرگە و شەرڤانێن رۆژئاڤا ل دژی داعشێ و ئاشکرا کریە کو کوردێن عیراقێ و سووریێ ل رۆژھەلاتا ناڤین وەک ستێرەکا گەش رۆژ ب رۆژێ رۆناھیێن خوە زێدەتر گەش دکەن و ئێدی رۆناھیا وان ژ ھەر جھەکی جیھانێ دھێتە دیتن.
ھەروەسا رۆژناما رادیکال یا تورکیا ژی ب راپۆرتا دەولەتا کوردی برێڤەیە دیار کریە کو مەسعود بارزانی سەرۆکێ ھەرێما کوردستانێ یێ رژدە د راگەھاندنا دەولەتا کوردی دا و ھژمارەک زێدە وەلات ژی پشتەڤانیێ ل ئاڤاکرنا دەولەتا کوردی دکەن و حوکمەتا تورکیا ژی بێدەنگە و وەسا خوەیا دکەت دێ حوکمەتا تورکیا ژی پشتەڤانیێ ل ئاڤاکرنا دەولەتا کوردی ل عیراقێ کەت.
رۆژناما فرانکورتیر یا ئەلمانی ژی ل سەر رۆژئاڤایێ کوردستانێ راپۆرتەکا بەرفرەە بەلاڤ کریە و د راپۆرتا خوە دا دیار دکەت کو ھەر چەندە نوونەرێ کوردان د کۆمبوونێن جنێڤێ دا پشکداریێ ناکەن ئانکۆ نە ھاتینە ڤەخواندن ژی لێ ژ بەر رۆلێ وان یێ د لاوازکرنا داعشێ و ئاڤاکرنا کانتۆنان دا، بێی وان چارەکی سیاسی نابیت و جە دایە ئاخڤتنا سالح موسلم کو گۆتبوو کۆمبوونەکا کو ئەو تێدا بەرھەڤ نەبن بریارێن وێ کۆمبوونێ ژی قەبوول ناکەن و ل سەر ئاخا خوە دا بجە ناکەن.
رۆژناما نیویورک تایمز ژی د نووچەکا خوە دا بەحسێ پلانێن ئازادکرنا جەرابلوسێ ل رۆژئاڤایێ کوردستانێ کریە و راگەھاندیە کو ئەمریکا بێی رەزامەندیا تورکیا بۆ ئازادکرنا باژێرکێ جەرابلوسێ ھاریکاریا ھێزێن کوردان ناکەت لێ د ھەمبەر دا روسیا ژی بەرھەڤیا خوە بۆ ھەڤکاریا کوردان د ئازادکرنا جەرابلوسێ، عەزازێ و مینبیجێ دا دیار کریە و ھێزێن کوردان نھا د بەرھەڤیا دەستپێکرنا ئۆپەراسیۆنەکا بەرفرەە دانە بۆ ئازادکرنا ھەرسێ باژێرکێن جەرابلوسێ، مینبیجێ و عەزازێ.
دیسان پاتریک کۆکبورن رۆژنامەڤانێ ناڤدار یێ بریتانی ژی د بەرنامەکێ رادیۆیا BBC دا راگەھاند کو د ناڤا ڤان شەش ھەیڤێن بھێت دا دێ نەخشێ عیراقێ و سووریێ گوھۆرینێن مەزن ب خوە ڤە بینن و کوردێن عیراقێ دێ دەولەتا سەربخوە راگەھینن و کوردێن رۆژئاڤا ژی ئاخا خوە ژ کانتۆنا جزیرێ ھەتا عەفرینێ دێ ب ھەڤدو را گرێ دەن و ئەو یەک ژی دھێتە واتەیا راگەھاندنا ھەرێمەکا وەک نیڤ دەولەتا سەربخوە و گۆت: (بەرێز بارزانی سەرۆکێ ھەرێما کوردستانێ گەلەک باش ئاشکرا کر کو ئەو دێ ریفراندومێ بۆ راگەھاندنا دەولەتا سەربخوە ساز کەن و بۆ وێ یەکێ دەستوریێ ژ کەسی ناخوازن، ب راستی ئەز ژی وەسا دبینم کو راگەھاندنا دەولەتا کوردی نە یا دوورە و وەسا باوەرم دێ پشکەکا مەزنا جیھانێ ژی پشتەڤانیێ ل دەولەتا کوردی کەن).
رۆژنامەڤانێ بریتانی ھەروەسا راگەھاند ژی مەزنبوونا ھێزا رۆژئاڤا و پلانا ئازادکرنا باژێرکێن جەرابلوسێ، مینبیجێ و عەزازێ خەونا تورکیا خراب کریە و بۆ ڤێ چەندێ ژی زۆلما ل باژێرێن باکورێ کوردستانێ گەلەک زێدە کریە و گۆت: (حوکمەتا تورکیا و سەرۆک کۆمار ئەردۆگان ئاڤاکرنا ھەرێمەکا ئۆتۆنۆم ئانکۆ ب ھەڤدو گرێدانا کانتۆنێن رۆژئاڤا بۆ خوە وەک مەترسی دبینن و وەسا باوەر دکەن کو ئاڤاکرنا ھەرێمەکا کوردی ل رۆژئاڤا دێ باندۆرێ ل کوردێن تورکیا ژی کەت و دێ کوردێن وان ژی داخوازا ھەرێما ئۆتۆنۆمی کەن).
گوتگوتكێن برنا 80 مليار دولاران ره‌ت دكه‌ت
ئه‌ڤرۆ نيوز:
کریستۆڤەر هێل بالیۆزێ بەرێ يێ ئەمریکا ل عیراقێ دياركر كو وى چ داخویانى دەربارێ وێ يه‌كێ نه‌داينه كو وى راگەهاندبیت بەرپرسێن هەرێمێ ٨٠ ملیار دۆلار برنە دەرڤەی وەلاتى.
چه‌ند رۆژه‌كن چه‌ند كه‌نالێن راگه‌هاندنێ ئاماژه ب وێ يه‌كێ دكه‌ن كو کریستۆڤەر هێل، باليوزێ به‌رێ يێ ئه‌مريكا ل عيراقێ گوتيه كو كومپانيێن حزبێن هه‌رێمێ 80 مليار دولارێن وان ل به‌نكێن ده‌رڤه نه.
هه‌لگرتنا مووچێ فه‌رمانبه‌ران یا وه‌ختى یه
ئه‌ڤرۆ نیوز:
سه‌فین دزه‌یى په‌یڤدارێ حوكمه‌تا هه‌رێما كوردستانێ ئاماژه ب وێ یه‌كێ كر دیاركرنا رێژا پارێ هه‌لگرتنا مووچێ فه‌رمانبه‌ران هێشتا نه‌هاتیه دیاركرن، به‌لكو دێ لژنه‌یه‌ك بۆ هێته پێكئینان.
سه‌فین دزه‌یى دیاركر هه‌موو ئه‌و بڕیارێن حوكمه‌تا هه‌رێما كوردستانێ ل دۆر پلانا دابه‌شكرنا مووچان دوهى داین پێدڤی ب رێنمایێن نوو نه و گۆت” حه‌فتیا بهێت رێژا هه‌لگرتنا مووچێ فه‌رمانبه‌ران ل دووڤ پلاوه‌زیفێ دێ هێته دیاركرن”.
حوكمه‌تا هه‌رێما كوردستانێ دوهى چه‌ند بڕیاره‌ك سه‌باره‌ت چاوانیا ره‌فتاركرنێ ل گه‌ل قه‌یرانا نوكه یا دارایى ده‌رێخستن كو ل دووڤ داهاتى دێ مووچه هه‌یڤانه هێته دان و ب رێژا 15 هه‌تا 75% ل دووڤ پلێن وه‌زیفى مووچه هێته هه‌لگرتن هه‌تا قه‌یران چاره دبیت، نێچیرڤان بارزانى سه‌رۆكێ حوكمه‌تێ دیاركر كو ئه‌وان ئه‌و بریاره ژ نه‌چارى داینه، به‌لێ یا ده‌مكى یه، هه‌رێمێ دڤێت ب سه‌ركه‌فتیانه ڤێ قه‌یرانێ ده‌رباز بكه‌ت.
دانوستاندنێن جنێڤ 3 ل دۆر سوریا هاتنه راگرتن
ئه‌ڤرۆ نیوز:
دانوستاندنێن جنێڤی 3 بۆ ئاشتیێ بۆ سوریا ل دووڤ بریارا نه‌ته‌وێن ئێكگرتی هاتنه راگرتن.
دانوستاندن هه‌تا 25 ڤێ مه‌هێ ب شێوه‌كێ ده‌مكی هاتنه راگرتن، پشتی د حه‌فتییا ئێكێ دا چ پێشڤه‌چوون تێدا نه‌هاتییه كرن.
نوونه‌رێ نه‌ته‌وێن ئێكگرتی بۆ سوریا دی مستورا ئه‌ڤرۆ راگه‌هاند بوو ئه‌ڤ دانوستاندنه داوی چانسه بۆ چاره‌سه‌رییا سیاسی بۆ سوریا.
یانا دھۆکێ پارە دانە یاریکەرێن خوە
ئەڤرۆ نیوز:
پشتی بوراندنا زێدەتر شەش ھەیڤان یاریکەرێن یانا دھۆک ھەڤبەستێن خوە ل گەل یانا دھۆک ئیمزاکرین و ھەتا نوکە چو یاریکەران ھەڤبەستێن خوە ب دروستی نە وەرگرت بوون، ئەڤرۆ کارگێریا یانا دھۆک بەشەک ژ قستێ ھەڤبەستێن یاریکەرێن خوە دایێ یێن وەرزێ ٢٠١٥-٢٠١٦ کو وەسا ھاتە چاڤەرێکرن کو دێ بەشەکێ باش ژ ھەڤبەستا وان یا ئێکێ دەنێ لێ پشتی یاریکەران ئەڤرۆ بەر ب یانێ ڤە چوون چارێکەک ژ قستێ ئێکێ دایێ کو کارگێریا یانێ وەسا بۆ یاریکەران دیارکر بوو ماوەکێ درێژە ئەو کاردکەن ھەتا شیان ئەڤی کوژمی ب دەستخوڤە بینن.
ھەژی گوتنێ یە نێزیکی دو سالانە یانا دھۆک د رەوشەکا لاواز یا قەیرانا دارایی دا بوریت .
ئه‌ڤ ساله ل دهۆكێ زێده‌ترى 100 كه‌سان بووينه قوربانى روودانێن هه‌تنوچوونێ
ئەڤرۆ نیوز ، مللەت جەمال:
د ماوێ ھەیڤا بوری دا لسەرانسەری پارێزگەھا دھۆکێ 10 کەسان ب ردوودانێن ھاتن و چوونێ گیانێ خوە ژدەست دایە و 94 كه‌س ژى بريندار بووينه.
لدور ڤێ ئامارێ رائیدێ مافپەروەر ئازادا تاھا رێڤەبەرێ راگەھاندنا ھاتن و چوونا دھۆکێ بو ئەڤرۆ نیوز گوت: ژ 1 ھەیڤا ئێک ھەتا 2 ھەیڤا شوباتێ لسەرانسەری پارێزگەھا دھۆکێ 114 روودان پەیدابووینە و ڤەرێژا ڤان روودانان 94 کەس بریندار بووینە و 10 کەسان گیانێ خوە ژدەست دایە.
زێدەتر رائیدی گوت: زوربەیا ڤان روودانان ب ئەگەرێ لەزکرنێ و ژدەستدانا کونترولا ترومبێلێ بووینە لێ مە وەک ھاتن و چوونا دھۆکێ ل جھێ روودان لێ د زور مە رادار زورکرینە.
كه‌تيبا ئه‌ندازێ ئامارا شه‌رێ داعش راگه‌هاند
ئه‌ڤرۆ نيوز، ئومێد وه‌لاتى:
فه‌رمانده‌يا هێزا پشته‌ڤانيا 1 يا له‌شكرێ كوردستانێ راگه‌هاند كو ژ ده‌سپێكا شه‌رێ داعش و هه‌تا دووماهيا سالا 2015ێ 11 هزار و 489 پارچێن بۆمبێن چاندی و ترۆمبێلێن مینرێژکری و پشکنینا خانیان و تۆنێل و پارچێن تەقەمەنیێ هاتيه كرن.
ليوا مه‌حمود كاكه‌ى به‌رپرسێ كه‌تيبا ئه‌ندازى يا سه‌ر ب فه‌رماندا هێزا پشته‌ڤانى 1 يا له‌شكرێ كوردستانێ د كۆنگره‌كێ رۆژنامه‌ڤانى دا راگه‌هاند كو تیمێن ئەندازێ یێن سەر ب فەرماندا ھێزێن پشتەڤانیا 1 یا لەشکرێ کوردستانێ ئامارا ژناڤبرن مین و تەقەمەنیێن شەرێ داعش راگەھاند.
ليوا مه‌حمود گۆت: “ژ رێکەفتی 6ی ئەیارا 2014 و ھەتا 31ی کانوونا ئێکێ 2014ێ چار ھزار و 943 بۆمبێن چاندی و 45 بەرمیلێن T.N.T یێن 100 لیتری و 21 بەرمیلێن 200 لیتری یێن T.N.T و 261 پارچێن تەقەمەنیان، دیسا 31 ترۆمبێلێن تانک و زریپۆش ھاتینە ژناڤبرن، دیسا پشکنینا رێ و ئەردی ب درێژاھیا 35کم ژ بۆمبێن چاندی ھاتیە کرن ل گەل پشکنینان 74 خانیان”.
زێده‌تر گۆت: “ژ 1ی کانوونا دویێ 2015 ھەتا 31ی کانوونا ئێکێ 2015ێ ژی پێنج ھزار و 522 بۆمبێن چاندی و 464 پارچێن تەقەمەنیان و 50 ترۆمبێل و ئالیات ھاتینە پەقاندن و ژناڤبرن”. خۆيا ژى كر كو پشکنینا ئەردی و جادا ژى ب درێژاھیا 66کم ھاتیە کرن ل گەل پشکنینا 32 خانیان هاتيه كرن.
دەربارەی تۆنێلان ژی دا زانین کو ل رۆژئاڤایێ کەرکووک دو تۆنێلێن ب درێژاھیا 10 مەتران ھاتینە ژناڤبرن و ل شنگال ژی پێنج تۆنێلێن 10 و 100 و 500 مەتری ھاتینە ژناڤبرن.
دەربارەی ژناڤبرنا مادێن کیماوی ژی به‌رپرسێ كه‌تيبا ئه‌ندازى يا سه‌ر ب فه‌رماندا هێزا پشته‌ڤانى 1 گۆت: “تیمێن مە ل ڤی ماوەی شیاینە 10 بۆمبێن کیماوی ژناڤ ببەن”.
دەربارەی سەرجەمێ گشتی ژی دا زانین کو ھەر ژ رێکەفتی 6ی ئەیارا 2014ێ ھەتا 31ی کانوونا ئێکێ یا 2015ێ 10 ھزار و 465 بۆمبێن چاندی ل ھەر ئێک ژ رۆژئاڤایێ کەرکووک و مەخمۆر و گۆێر و خازر و بەعشیقە و ناوەران و تلسقۆف و سکرێ مووسل و زومار و کەسەکێ و رەبیعە و شنگال ھاتینە راکرن کو رێژا ژ ھەموویان زێدەتر ل مەخمۆر و شنگال بوویە.
ديسا ژ ھەیڤا نیسانا 2014ێ و ھەتا دووماھیا 2015ێ 10 ھزار و 465 بۆمبێن چاندی کو دکەتە نێزیکی 120 تەن و 500 کیلۆیێن T.N.T ژ پێکھاتێ ئەمۆنیۆم و نیتران یێن کارێ ناڤخۆی هاتينه ژناڤبرن ل گه‌ا ژناڤبرنا 725 پارچێن تەقەمەنیان و پشکنینا 82 ترۆمبێلان و پاقژکرنا 101کم رێ و 200 خانیان ل گەل ژناڤبرنا 10 تۆنێلان ب درێژاھیا 10 ھەتا 50 مەتران و گۆت: “سەرجەمێ ھەموو وان بۆمبێن چاندی و ترۆمبێلێن مینرێژکری و پشکنینا خانیان و تۆنێل و پارچێن تەقەمەنیێ دکەتە 11 ھزار و 489 پارچان.
نيشاندان
WP Facebook Auto Publish Powered By : XYZScripts.com