ئەڤرۆ نيوز:
ھژمارەکا شۆفێران ل دەرێ ئیبراھیم خەلیل ئاسێ بووینە، وەلاتێ تورکیا رێکێ نادەتە وان کو د رێیا وەلاتآ وان را دەرباز ببن، سەدەم ژی ڤەدگەرینن کو وەلاتێ تورکیا کێشە بۆ ڤیزێن وان دروست کریە.
ئێحسان حلمی نوونەرێ شۆفێران بۆ رۆژناما ئەڤرۆ دیار کر کو ئەو ب ریێن قانوونی ڤیزا تورکیا وەرگرتینە، شۆفێر ب بارێن خوە ڤە ھاتینە د ناڤ ھەرێمێ و عیراقێ دا پاشی خواست ب رێیا وەلاتێ وان دەربازی تورکیا بن، لێ نھا رێگری ل چوونا شۆفێرێن وان دھێتە کرن، کو ئەڤە ھەیاما چەند رۆژایە ل بەر سر و سەرمایێ ل سەر جادە و د ناڤ پانزینخانە و جھێن گشتی دا ئاکنجی بووینە.
ھەروەسا نوونەرێ شۆفێران گۆت “پشکەک ژ شۆفێرێن مە ب ریێا قۆنسلخانەیا تورکیا ل ھەولێرێ داخوازێ دکەن ھەماھەنگیا ڤەگەراندنا شۆفێرێن مە بکەن، چونکی وەلاتێ تورکیا پێشتر ئاگەھداریا شۆفێرێن مە نەکریە کو پشتی چوونا مافێ ڤەگەراندنێ نابیت”.

ئەڤرۆ نیوز:
ھژمارەک زێدە ژ دەزگەھێن راگەھاندنێن ئورۆپا، ئەمریکا و تورکیا بەحسێ پێشکەڤتنێن ل کوردستانێ کرینە و راپۆرتێن بەرفرەە ل سەر رەوشا داوی یا باکور، باشور و رۆژئاڤایێ کوردستانێ بەلاڤ کرینە و راگەھاندنە کو بارزانی دێ ھەتا نەورۆزێ مزگینیا دەولەتا سەربخوە دەتە کوردان.
رۆژناما ئیل مانیفیستۆ یا ئیتالیا د راپۆرتەکا خوە یا ل سەر رەوشا عیراقێ و ھەرێما کوردستانێ دا راگەھاندیە کو ھەر چەندە حوکمەتا عیراقێ فشارێن ئابووری خستینە سەر کوردان لێ حوکمەتا ھەرێما کوردستانێ بەرھەڤیێن خوە بۆ راگەھاندنا دەولەتەکا سەربخوە تەمام کرینە و پێشبینیا وێ یەکێ ژی کریە کو دێ ھەتا نەورۆزا ئەڤسالە بارزانی مزگینیا دەولەتا سەربخوە دەتە وەلاتیێن کوردستانێ.
رۆژناما ناڤھاتی د پشکەکا دی یا راپۆرتا خوە دا ژی سەرنج راکێشاندیە سەر بەرخوەدانا ھێزێن پێشمەرگە و شەرڤانێن رۆژئاڤا ل دژی داعشێ و ئاشکرا کریە کو کوردێن عیراقێ و سووریێ ل رۆژھەلاتا ناڤین وەک ستێرەکا گەش رۆژ ب رۆژێ رۆناھیێن خوە زێدەتر گەش دکەن و ئێدی رۆناھیا وان ژ ھەر جھەکی جیھانێ دھێتە دیتن.
ھەروەسا رۆژناما رادیکال یا تورکیا ژی ب راپۆرتا دەولەتا کوردی برێڤەیە دیار کریە کو مەسعود بارزانی سەرۆکێ ھەرێما کوردستانێ یێ رژدە د راگەھاندنا دەولەتا کوردی دا و ھژمارەک زێدە وەلات ژی پشتەڤانیێ ل ئاڤاکرنا دەولەتا کوردی دکەن و حوکمەتا تورکیا ژی بێدەنگە و وەسا خوەیا دکەت دێ حوکمەتا تورکیا ژی پشتەڤانیێ ل ئاڤاکرنا دەولەتا کوردی ل عیراقێ کەت.
رۆژناما فرانکورتیر یا ئەلمانی ژی ل سەر رۆژئاڤایێ کوردستانێ راپۆرتەکا بەرفرەە بەلاڤ کریە و د راپۆرتا خوە دا دیار دکەت کو ھەر چەندە نوونەرێ کوردان د کۆمبوونێن جنێڤێ دا پشکداریێ ناکەن ئانکۆ نە ھاتینە ڤەخواندن ژی لێ ژ بەر رۆلێ وان یێ د لاوازکرنا داعشێ و ئاڤاکرنا کانتۆنان دا، بێی وان چارەکی سیاسی نابیت و جە دایە ئاخڤتنا سالح موسلم کو گۆتبوو کۆمبوونەکا کو ئەو تێدا بەرھەڤ نەبن بریارێن وێ کۆمبوونێ ژی قەبوول ناکەن و ل سەر ئاخا خوە دا بجە ناکەن.
رۆژناما نیویورک تایمز ژی د نووچەکا خوە دا بەحسێ پلانێن ئازادکرنا جەرابلوسێ ل رۆژئاڤایێ کوردستانێ کریە و راگەھاندیە کو ئەمریکا بێی رەزامەندیا تورکیا بۆ ئازادکرنا باژێرکێ جەرابلوسێ ھاریکاریا ھێزێن کوردان ناکەت لێ د ھەمبەر دا روسیا ژی بەرھەڤیا خوە بۆ ھەڤکاریا کوردان د ئازادکرنا جەرابلوسێ، عەزازێ و مینبیجێ دا دیار کریە و ھێزێن کوردان نھا د بەرھەڤیا دەستپێکرنا ئۆپەراسیۆنەکا بەرفرەە دانە بۆ ئازادکرنا ھەرسێ باژێرکێن جەرابلوسێ، مینبیجێ و عەزازێ.
دیسان پاتریک کۆکبورن رۆژنامەڤانێ ناڤدار یێ بریتانی ژی د بەرنامەکێ رادیۆیا BBC دا راگەھاند کو د ناڤا ڤان شەش ھەیڤێن بھێت دا دێ نەخشێ عیراقێ و سووریێ گوھۆرینێن مەزن ب خوە ڤە بینن و کوردێن عیراقێ دێ دەولەتا سەربخوە راگەھینن و کوردێن رۆژئاڤا ژی ئاخا خوە ژ کانتۆنا جزیرێ ھەتا عەفرینێ دێ ب ھەڤدو را گرێ دەن و ئەو یەک ژی دھێتە واتەیا راگەھاندنا ھەرێمەکا وەک نیڤ دەولەتا سەربخوە و گۆت: (بەرێز بارزانی سەرۆکێ ھەرێما کوردستانێ گەلەک باش ئاشکرا کر کو ئەو دێ ریفراندومێ بۆ راگەھاندنا دەولەتا سەربخوە ساز کەن و بۆ وێ یەکێ دەستوریێ ژ کەسی ناخوازن، ب راستی ئەز ژی وەسا دبینم کو راگەھاندنا دەولەتا کوردی نە یا دوورە و وەسا باوەرم دێ پشکەکا مەزنا جیھانێ ژی پشتەڤانیێ ل دەولەتا کوردی کەن).
رۆژنامەڤانێ بریتانی ھەروەسا راگەھاند ژی مەزنبوونا ھێزا رۆژئاڤا و پلانا ئازادکرنا باژێرکێن جەرابلوسێ، مینبیجێ و عەزازێ خەونا تورکیا خراب کریە و بۆ ڤێ چەندێ ژی زۆلما ل باژێرێن باکورێ کوردستانێ گەلەک زێدە کریە و گۆت: (حوکمەتا تورکیا و سەرۆک کۆمار ئەردۆگان ئاڤاکرنا ھەرێمەکا ئۆتۆنۆم ئانکۆ ب ھەڤدو گرێدانا کانتۆنێن رۆژئاڤا بۆ خوە وەک مەترسی دبینن و وەسا باوەر دکەن کو ئاڤاکرنا ھەرێمەکا کوردی ل رۆژئاڤا دێ باندۆرێ ل کوردێن تورکیا ژی کەت و دێ کوردێن وان ژی داخوازا ھەرێما ئۆتۆنۆمی کەن).