ئەڤرۆ نیوز ، مەحمود نھێلی
ھەڤال موحەمەد شەریف رێڤەبەرێ ناحیا چەمانکێ بۆ ئەڤرۆ نیوز خویاکر، کو ئەڤرۆ ل دەمژمێر 10 بۆ 11 بەری نیڤرۆ چەندین فرۆکەیێن تورکیا بوردومانا ئاقارێ گوندێ کانی مازێ یێ سەر ب ناحیا چەمانکی کریە و گۆت: ( دڤێ بوردومانێ دا کو بو ماوێ ئێک دمژمێریا بەردەوام بوو ئاقارێ گوندی ناڤبری ب دژواری ھاتیە بوردومانکرن و زیانێن مالی یێن زور گەھاندینە دەرامەت و ئاقارێ وەلاتیان)
ناڤبری ئاشکراکر ژ بەر کو نھا ژ وەلاتی ل وی گوندی نین و یێ چولە سوپاس بۆ خودێ چ زیانێن گیانی نەبووینە.

ئەڤرۆ نيوز:
سیاسەتمەدار و ئەندامێ بەرێ یێ پەرلەمانێ عیراقێ راگەھاند، پێدڤیە حکومەتا ھەرێمێ و ئالیێن سیاسی بۆ ئەنجامدانا ریفراندۆمێ دەست ب دانوستاندنان ل گەل وەلاتێن دەڤەرێ بکەن و گۆت:( پێدڤیە ھەرێم ب ھووری ل گەل عیراقێ دانوستاندنان بکەت و پشتەڤانیا نەتەوێن ئێکگرتی و وەلاتێن زلھێز بدەستڤە بینیت داکو چاڤدێرییا پرۆسێ بکەن).
مەحموود ئوسمانی ئاماژە ب وێ چەندێ ژی کرریە کو ریفراندۆم کارەکێ نەتەوەیە و دبێژیت:(پێدڤیە ھەموو ئالی کار بۆ بکەن و ل دەستپێکێ پەرلەمانی کارا بکەن و قانوونەکێ دەربێخن و ل گەل حوکمەتێ پێدڤیێن کۆمسیۆنێ دابین بکەن و لژنەکا دانوستاندنان پێکبینن و دەست ب بزاڤێن رژد بکەت بۆ ئەنجامدانا ریفراندۆمێ).

ئه‌ڤرۆ نيوز:

بەرپرسەکێ حوکمەتا ھەرێما کوردستانێ ئاشکراکر، ھەر پەنابەرەکێ ھەرێما کوردستانێ ژ دەرڤە ڤەگەڕیێت، دێ موچەکێ ھەیڤانە بۆ ھێتە مەزاختن بۆ دەمێ سالەکێ، ھەروەسا دیارکر، نوکە چوونا خەلکی ب ڕێیێن نەقانوونی گەلەک یا بەر ب کێمبوونێ ڤە چووی و ھەمبەرکرن ل گەل ھەیڤێن بۆری، نوکە وەلاتی کێمتر دچنە دەرڤە.
نەزھەت حسێن، ڕێڤەبەرێ کۆچ و رەڤەندا کوردی ل ھەرێما کوردستانێ بۆ ڕۆژناما ئەڤرۆ گۆت” حوکمەتا ھەرێما کوردستانێ ھەموو بزاڤان دکەت بۆ کێمکرنا دیاردەیا کۆچکرنا وەلاتیان و ب چو شێوەیەکی ژی ل گەل ڤەگەراندنا پەنابەرێن کوردستانێ نینە ب شێوەیەکێ ب زۆری، بەلێ ھەکە ب شێوەیەکێ ئارەزوومەندانە بیت، ئەڤە ھەرێما کوردستانێ دێ پێشوازیێ ل خەلکێ خوە دکەت، پشتی دەستپێکرنا پێلەکا کۆچکرنێ ئەڤە دەمەکە کۆچکرنا وەلاتیێن ھەرێما کوردستانێ بۆ وەلاتێن بیانی یا بەر ب کێمبوونێ ڤە چووی و چوونا وەلاتیان وەکی بەرێ نەمایە، دشێم بێژم گەلەک کێمتر ژ ھەیڤێن بۆری خەلک دچیتە دەرڤە، ژلایێ ئابووری ڤە حوکمەتێ ل گەل ڕێکخراوێن بیانی و نەتەوێن ئێکگرتی پلان ھەیە بۆ ھەڤکاریا پەنابەران، ب تایبەتی ئەوێن دھێنە ڤەگەڕاندن”.
نەزھەتی گۆت ژی” حوکمەتا عیراقێ پاسەپۆرتێن وەختی ل سەر بالیۆزخانێن خوە ل وەلاتێن ئورۆپا بەلاڤکرینە و ھەر وەلاتیەکێ پەنابەر بخوازیت ڤەگەڕیت، دێ پێشوازی لێ ھێتەکرن، ئەم ژی وەکو حوکمەتا ھەرێمێ ب ڕێیا ڕێڤەبەریا گشتی یا کۆچ و کۆچبەران، د ھەڤکارین بۆ ڤەگەڕاندنا وەلاتیان ب شێوەیەکێ ئارەزوومەندانە کو ب حەزا وان ب خوەبیت، ئەم ل گەل چەند ڕێکخراوەکێن بیانی ڕێککەفتینە کو ھەر پەنابەرەکێ ڤەگەڕیتە ھەرێما کوردستانێ، موچەیەکێ ھەیڤانە بۆ بھێتە مەزاختن ژلایێ ڕێکخراوێن بیانی ڤە و بۆ دەمێ سالەکێ، ئەڤی پڕۆژەی سەرگرتیە و ھەر پەنابەرەکێ ڤەگەڕیای، دێ موچێ سالەکێ وەرگریت، ھەموو ھەیڤا موچێ وی دێ ھێتە مەزاختن ھەتا 12 ھەیڤ تمام دبن، بەلێ یا دیار نینە کا موچێ وان پەنابەران دێ چەند بیت، چونکی ھێشتا دەست ب بەلاڤکرنێ نەھاتیەکرن و چاڤەڕێ دکەین ل دەمەکێ نێزیک موچێ پەنابەران بھێتە مەزاختن، ھەروەسا پڕۆژەیەکی دی یێ ھاتیە بەرھەڤکرن بۆ پەیداکرنا دەلیڤا کاری، چونکی پتریا وەلاتیێن چووینە دەرڤە کارێن خوە یێن ژدەستداین و پێدڤیە کارەک بۆ بھێتە دیتن، ھەتا بشێن ژیانا خوە دەربازبکەن، ئەڤ پڕۆژە ژی بەردەوام کار تێدا دھێتەکرن و ئێدی پەنابەرێن ڤەگەڕیای ژ دەرڤە بێ کار نامینن”.