ئەڤرۆ نیوز:
بڕیاردەرێ لیژنا ئاسایش و بەرگریێ ل جڤاتا نوونەرێن عیراقێ دیارکر، بۆ دەمێ ھەیڤەکێ یە ھێزەکا تایبەت یا حەشد شەعبی ھاتیە نێزیک کەرکووکێ و چەک و گران ل گەل خوە ئینایە، دیارکر کو ھەبوونا ھێزەکا ب ڤێ شێوەی مەترسیە ل سەر کەرکووکێ و ھەردەمێ ھەرێما کوردستانێ ڕیفڕامدۆمێ ئەنجام بدەت، حەشد شەعبی دێ ئالۆزیان ل دەڤەرێ پەیدابکەت.
شاخەوان عەبدولا، بڕیاردەرێ لیژنا ئاسایش و بەرگریێ ل جڤاتا نوونەران ژ فراکسیۆنا پارتی بۆ رۆژناما ئەڤرۆ گۆت” ئەڤە ھەیڤەکە حەشد شەعبی چەک و تەقەمەنیان دگەل ھێزا زێدە ڤەدکێشیت بۆ نێزیکی باژێڕێ کەرکووکێ و ل ناحیا تازە ھاتینە بجھکرن، کاروانێ ئێکێ چەک و تەقەمەنی و سەربازێن حەشد شەعبی ل دەستپێکا ھەیڤا بۆری ھاتینە کەرکووکێ حەفت ترۆمبێلێن تژی چەک بووینە، ھەروەیا ب درێژیا ھەیڤا بۆری حەشد شەعبی ھژمارا چەکدارێن خوە زێدەکریە و چەک و تەقەمەنی ئینایە دەڤەرێ، کو چەکێ گران ژی وەک تانک و تۆپ تێدابووینە”.
گوت ژی” ڤێ ھێزا حەشد شەعبی پەیوەندی ب سەربازگەھەکا بەرێ یا میلیشیێن شیعان کریە ل سنورێ ناحیا تازە، ژبەرکو سەربازگەھەک ل ناحیا تازە و سەربازگەھەک ل ناحیا بەشیر ھەنە و تایبەتن ب میلیشیێن شیعی ڤە، کۆمکرنا ھێزێ ل دەوروبەرێ کەرکووکێ دو بەھانە ئیناینە، ئێک ھەبوونا گەفان ل سەر شیعێن دەڤەرێ، یا دویێ دێ ھێرشی سەر ناحیا بەشیر کەن و ژ داعشێ پاقژ کەن”.
شاخەوانی گۆت ژی” ئەڤ بەھانەیێن میلیشیێن شیعی چو بەھایێ خوە نینە، چونکی پێشمەرگە ل دەوروبەرێ ناحیا تازە ھەیە و داعش دوورخستیە ژ دەڤەرێ، ھەکە بۆ کۆنتڕۆلکرنا ناحیا بەشیرە، ھێزا بەرێ یێ میلیشیێن شیعی و پێشمەرگە دشێن کۆنتڕۆلبکەن، ب دیتنا من حوکمەتا عیراقێ دخوازیت ئاریشا ل دەڤەرێ پەیدا بکەت، ب تایبەتی پشتی ھەرێما کوردستانێ بەحسێ پرسا ڕیفڕامدۆمێ کری، ھەردەمێ ڕیفڕامدۆم ژلایێ ھەرێما کوردستانێ ڤە بھێتەکرن، حوکمەتا عیراقێ ب ڕێیا حەشد شەعبی دێ ئالۆزیان پەیداکەت و مەترسی ل سەر باژێڕێ کەرکووکێ ھەیە، ھەر ھێزەکا بھێتە دەڤەرێ و خەلکێ کەرکووکێ نەبیت، مەترسیە ل سەر پارێزگەھا کەرکووکێ، ئەڤ ھێزا حەشد شەعبی کو پتری 30 ترۆمبێلێن تژی چەک و تەقەمەنی بووینە و ب دەھان سەربازێن میلیشیێن شیعە پێکھاتیە ژ بەغدا ھاتینە و چو پەیوەندی ب کەرکووکێ ڤە نینە”.

ئەڤرۆ:

نوونەرێ حوکمەتا ھەرێما کوردستانێ ل ئێکەتیا ئورۆپی راگەھاند، ئەو بۆچوونا یا شاشە کو چاڤەڕێی خەلک و وەلاتێن بیانی بکەت ھەتاکو بۆمە دەولەتێ رابگەھینن.
دلاوەر ئاژگەیی زێدەتر گوت” گەلەک جاران مە گوە ل بۆچوونێن فەرمی یێن ئێکەتیا ئورۆپی و ھندەک وەلاتێن تێدا ئەندام ل دۆر پرسا سەربخوەیا کوردستانێ دبیت، ئەو دبێژن عیراق نوکە ب ئێکگرتی بمینیت، ئەڤ بۆچوونە ژی ژ وێ پرنسیبا دبلوماسی یا نێڤدەولەتی دھێت کو نابیت وەلاتێن سەربخوە ل گەل پارچەبوونا وەلاتەکێ دی یێ سەربخوە بن، لەوما ل دەمێ داخویانیێن فەرمی دڤێت بێژین ئەم ل گەل عیراقێ ئێکگرتی داینە، ئانکو ئەو نابێژن ئەم دژی سەربخوەیا کوردستانێ نە و نابێژن ژی ئەم یێن دگەلدا، لەوما پێدڤیە شرۆڤەکرنێن شاش بۆ ڤان داخۆیانییان نەھێنە کرن”.
ئاژگەیی سەبارەت ڤێ چەندێ نموونەک ئینا و گوت” دەمێ وەزیرێ دەرڤەیێ بەرێ یێ بریتانیا سەرەدانا فەرمی بۆ ھەولێرێ ئەنجامدای، د بەرسڤا رۆژنامەڤانان دا ھەمان بابەت دوبارەکر، بەلێ وەکو نەمای وەزیر، د گۆتارەکێ دا ئاماژە ب سەربخوەیا باشوورێ کوردستانێ کر و ب چارەیەکا گونجای ژی ھژمارت بۆ دەڤەرێ”.
نوونەرێ حوکمەتا ھەرێما کوردستانێ ل ئێکەتیا ئورۆپی راگەھاند ژی” وەکو وەلاتێن دی، دشێین ئاماژێ ب پارچەکرنا یۆگسلافیا و دامەزراندنا وەلاتێن بەلکان بکەین، ئێکەتیا ئورۆپی و ئەمریکا و جڤاکێ نێڤدەولەتی ھەتا دەمژمێرێن دووماھیێ ژی دژی پارچەبوونا یۆگسلافیا و دامەزراندنا دەولەتا کرواتیا بوون، بەلێ ل دووماھیێ و پشتی راگەھاندنا وی دەولەتێ، ھەموویان دانپێدان پێکر”.
خویاکر ژی” ئەو وەلات ڕەفتارێ ل گەل دۆرھێلی (دیفاکتۆ) دکەن، لەوما نابیت گەلێ کوردستانێ چاڤەڕێ وێ چەندێ بکەت کو گەلەک وەلات راشکاوانە پشتەڤانیێ ل سەربخوەیا کوردستانێ بکەن و وەکو پرنسیب ھەردەم دانپێدان پشتی راگەھاندنا دەولەتێ دھێت، نەکو بەری راگەھاندنا وێ، گەلێن ئورۆپا وەکو پرنسیب پشتەڤانیێ ل مافێ چارەنڤیسێ مللەتان دکەن و دژ نینن و گەلەک ب راشکاوانە دبێژن کو بریاردەرێ ئێکێ د ڤێ پرسێ دا خەلکێ کوردستانێ ب خوەیە”.
ناڤبری رەخنە ل بۆچوونەکا ل کوردستانێ ھەی گرت و گوت” مخابن ل کوردستانێ بۆچوونەک یا ھەی کو بۆ خەلکی یا ھاتیە رۆھنکرن کو وەلاتێن بیانی بھێن و دەولەتێ بۆمە رابگەھینن کو ئەڤە بۆچوونەکا شاشە”.
ل دۆر بۆچوونا سیاسەتمەدارێن ئورۆپا ل دۆر دەمێ گونجای بۆ راگەھاندنا دەولەتێ، گوت” ب بۆچوونا پتریا وان ب تایبەتی ل پەرلەمانێ ئورۆپا و ناڤەندێن ستراتیژی، نوکە دەم یێ گونجایە بۆ راگەھاندنا سەربخوەییێ ژبەر ڤان خالان، ھەرێما کوردستانێ نوکە ھێزەکا لەشکری و سەربخوە یا بەرگریێ یا ھەی کو ب دیدەڤانیا ھەموو جیھانێ، شەڕێ داعشێ دکەت بێ زڤرین بۆ ناڤەندێ (بەغدا) ، دیسا نوکە ھەرێما کوردستانێ خودان ئابوورەکێ سەربخوەیە و گەلەک ژ بەغدا ب ھێزترە و ھەکە گرفتا ھاتنا خوارا بھایێ پەترۆلێ نەبایە، ئەڤرۆ دا بێ کێشە پەترۆلا خوە فرۆشیت کو ل سەر نەخشێ وزێ ل جیھانێ پەترۆلا کوردستانێ یا بەرنیاسە،دیسا د ڤێ ڕەوشا نوکە دا ھەی، وەلاتێن جیران نەشێن دژایەتی پرۆژێ سەربخوەیا کوردستانێ بکەن بتایبەتی ژ روویێ لەشکری ڤە، نەخشێ سیاسیێ دەڤەرێ ب گشتی یێ د گوھۆرینێ دا و ژروویێ پراکتیکی ڤە عیراق و سووریا یێن بووینە چەندین پارچە، دیسا وەلاتێن نوو ل دەمێ ھەبوونا شەڕی و ناکۆکیان و سەقامگێریا سیاسی ل ھەموو قۆناغەکێ دھێنە دروستکرن و ئەڤ قۆناغا نوکە یا کوردستانێ ژلایێ دوستان ڤە ب قۆناغا دەلیڤا دیرۆکی ددەنە زانین کو ھەتا 100 سالێن دی پێشھاتێن ب ڤی شێوەی ناھێنە بەردەست، کو بێگومان ئەڤێ چەندێ پێدڤی ب ئێکرێزیا خەلکێ کوردستانێ یا ھەی.

ئەڤرۆ نیۆز، قائید میرۆ:
ھژمارەک دەزگەھێن راگەھاندنێ بەلافکریە ئەڤرۆ ل میحوەرێ مەخموور ھژمارەک گوندێن بن کۆنتڕۆلا داعش ژلایێ حەشدا وەتەنی و پێشمەرگەی ھاتینە ئازادکرن.
ئەحمەد ئەنوەر، پەیڤدارێ میحوەرێ مەخموور ب ئەڤرۆ نیۆز راگەھاند” کو راستە ئەڤرۆ شەڕۆ پێکدادان ل میحوەرێ مەخموور چێبوویە دناڤبەرا داعش و ھێزێن ئەمنی، بەلێ چو گوند نەھاتینە ئازادکرن.
ئەنوەری گۆتژی” شاشیەک د پلانا ئازادکرنا ئەڤان گونداندا ھەبوو، میحوەرێ مەخموور سبە دێ بفەرمی داخویانیەکێ لدۆر ڤێ چەندێ بدەت.

ئەڤرۆ نیوز، زنار تۆڤی:
ژ ئەنجامێ وان شەر و ئالۆزیێن دناڤبەرا پەکەکێ و لەشکەرێن تورک دەڕکەفتین ل چەندین باژێر و باژێرکێن کوردستانا باکوور د ماوێ چەندین مەهادانە،ڤێ چەندێ رەوشا ب هزاران کوردێن باکوور ئێخستیە د مەترسیێ دا،د ئەنجامێ ئوپەراسیونێن سەربازی یێن دەولەتا تورک بۆ سەر باژێرێن کوردان هەتانوکە 259 وەلاتیێن مەدەنی هاتینە کوشتن کو گەلەک ژ وان زارۆک و پیرن،لێ هەتانوکەژی ئەڤ ئوپەراسیونە د بەردەوامن و هەتانوکە چەندین کەسێن بریندار ژی هەنە لێ دەولەتا تورک رێکێ نادەت ئەو بریندار ب چنە نەخۆشخانەیان ژبەر قەدەغەیا هاتنوچوونێ ل گەلەک دەڤەرێن کوردستانا باکوور.