ئەڤرۆ نیوز:
ئەڤرۆ رۆژا چوارشەمبی رێکەفتی ٢٠٢١/٢/٢٤ د.عەلی تەتەر پارێزگارێ دهۆکێ دچوارچووڤێ پرۆژێن دەڤەرداریێن زاخۆ و ئامێدیی یێن پێش وەخت رەزامەندیا حکۆمەتا هەرێما کوردستانێ هاتیەدان شەش پرۆژە ب کۆژمێ سێ ملیار و حەفسەد و حەفتێ هەشت ملیون دیناران رەوانەی جێ بەجێ کرنێ کرن بڤی رەنگێ ل خوارێ:
– پرۆژێ چێکرنا تۆرا ئاڤێ ل تاخێن”گۆلان، زێ،شەهیدان، بانک، کوکەریا” و چێکرنا ئاڤا گوندێ “بیرا رۆژهەلات” و چێکرنا تورا ئاڤێ یا تاخێ سیریا کەڤن ل سنورێ ناوچەداریا شێلادزێ.
-چێکرنا رێکێن ناڤخویی ل گوندێن مرێبکا و مێرستەک ل سنورێ دەڤەرداریا ئامێدیی.
– نویژەنکرنا رێکا گوندێ ئاڤ گەنی-لێڤو ب درێژاهیا ٥کم ل سنورێ دەڤەرداریا زاخۆ.
– بەرفرەهکرنا جادا سەرەکی یا دەروازە و رێکێن ناڤخویی ل سەنتەرێ ناوچەداریا سەرسنکێ.
-چێکرنا تۆرا ئاڤێ ل کۆمەلگەها بریفکا و ئاڤا سەرەکی یا گوندێ ئورە ل سنورێ ناوچەداریا کانی ماسێ.
– نویژەنکرنا ئاڤاهیەکێ حکۆمی بو رێڤەبەریا پاسپۆرتا دەڤەرداریا ئامێدیی دگەل خزمەتێن پێدڤی.
ب، سەرجان مەحمود:
سەرۆک کۆمارێ تورکیا راگەھاند کو دەمێ داعشێ ب ھەموو رەنگەکێ ھێرشی کۆبانێ کری وی دەمی رەوش گەلەک ئالۆز بوو، سەرۆکێ وی دەمی یێ ئەمریکا باراک ئۆباما داخواز ژ من کر کو ھاریکاریا کوردێن سووریێ بکەین، لێ من ئەو یەک رەت کر و پاشی ژی شەر دژوارتر لێ ھات و ب ھزاران وەلاتیێن کۆبانێ دەربازی تورکیا بوون و نھا ژی ل تورکیا دژین.
رەجەب تەیب ئەردۆگان سەرۆک کۆمارێ تورکیا ل زانکۆیا نەھێ ئیلۆنێ ل باژێرێ ئیزمیرێ د کۆنفرانسەکێ دا ل دۆر رەوشا پەنابەران ئاخڤتنەک پێشکێش کر و راگەھاند کو نھا ل تورکیا زێدەتر ژ چار ملیۆن پەنابەرێن سووریێ ھەنە و گۆت: (ل جیھانێ چو دەولەتەکێ وەکو تورکیا خوەدان ل پەنابەران دەرنەکەڤتیە و ئەم زێدەتر ژ چار ملیۆن پەنابەران ل وەلاتێ خوە خوەدان دکەین و وەک وەلاتیێن خوە خزمەتا وان دکەین لێ نە ئورۆپا و نە ژی وەلاتێن جیران دەریێن خوە بۆ پەنابەران ڤەنەکرن و ھەموو بارێ پەنابەران ئاڤێتنە سەر مە، لێ مە شیا ب سەرکەڤتی ھاریکاریا وان بکەین و برینێن وان سارێژ بکەین).
سەرۆک کۆمارێ تورکیا ھەروەسا د ئاخڤتنا خوە دا سەرنج راکێشا سەر ئاخڤتنا د ناڤبەرا خوە و باراک ئۆبامای دا کو د وی دەمی دا سەرۆکێ ئەمریکا بوو و دیار کر داعشێ ژ ھەموو ئالیان ڤە ھێرشی کۆبانێ دکر و شەرەکی دژوار ل وێرێ ھەبوو و گۆت: (د رەوشەکا وەسا دا بەرێز ئۆباما تەلەفۆنا من کر و ژ من خوا‌ست کو ھاریکاریا کوردان ل کۆبانێ بکەم لێ من ژی گۆتە وی ل کۆبانێ شەرەکی دژوار ھەیە و ئەم نەشێین دەستێوەردانێ بکەین و ھاریکاریێ بدەینە کوردان و من داخوازا ئۆباما رەت کر و د ئەنجام دا گەلەک کەس ھاتنە کوشتن و ب دەە ھزاران کەس ژی سنور دەرباز کرن و ھاتنە وەلاتێ مە و دەمێ ھاتن ژی ب ئەرێنی پێشوازی ل وان ھاتە کرن و ھەتا نھا ژی ب ھزاران کوردێن کۆبانێ ل وەلاتێ مە دژین).
د دووماھیا ئاخڤتنا خوە دا ژی ئەردۆگانێ سەرۆک کۆمارێ تورکیا راگەھاند کو سیاسەتا ئەمریکا ل ھەمبەر تورکیا نە زەلالە و ب ئاشکرا ھاریکاریا پەکەکێ و یەپەگێ دکەن و گۆت: (جەنەرالەکێ ئەمریکا دبێژیت ئەم ھاریکاریا یەپەگێ دکەین، ھەکە ئەمریکا ل گەل یەپەگێ کار بکەت ئەم دێ چاوا بینە ھەڤپەیمانێ وێ و پێکڤە ل گەل ئەمریکا کار کەین، نھا ل ھەموو جھەکێ شەرێ مە ل دژی دژی پەکەکێ و یەپەگێ بەردەوام دکەت و ئەم دەستان ژ تێکۆشینا ل دژی وان بەرنادەین، دیارە ئەمریکا ئارمانجێن جودا ھەنە، ھەکە ئەمریکا بڤێت پەیوەندیێن خوە ل گەل مە باش بکەت ئەم بەرھەڤین، ھەکە وان دڤێت بزانن کا ھەتا نھا مە ل باکورێ سووریێ چ کریە بێگومان یا مە کری دیارە و ژ ئەڤرۆ پێڤە ژی دێ خەباتا مە و شەرێ مە ل دژی تیرۆرستان ل باکورێ سووریێ بەردەوام بیت).
ل ئالیێ دی حەسەن جەمال نڤیسەر و رۆژنامەڤانێ ناڤدار یێ تورکیا ژی راگەھاند کو ھەکە وی دەمی تورکیا ھاریکاریا کوردێن سووریێ کربا دا نھا پەیوەندیێن تورکیا ل گەل کوردێن سووریێ گەلەک باش بیت، تورکیا شاشیەکا گەلەک مەزن کر ب جھێ کو ھاریکاریا کوردان بکەت ھاریکاریا گرۆپێن توندرەو کر و ژ بەر ھندێ ژی پەیوەندیێن تورکیا ل گەل ئەمریکا، ئورۆپا و گەلەک وەلاتێن دی یێن جیھانێ تێک چوون.
ئەڤرۆ، عەزیز ھەورامی
ئەندامەکا مەکتەبا سیاسی یا حزبا سوشیالیستا دیموکراتا کوردستانێ بۆ رۆژناما ئەڤرۆ راگەھاند، پەکەکە بوویە ئەگەرێ دروستکرنا کێشا و ئاژاوی بۆ حوکمەت و خەلکێ ھەرێما کوردستانێ و ھەر پەکەکێ شەرێ تورکیا ئینایە دناڤ ئاخا ھەرێمێ دا کو د ئەنجامدا ب سەدان گوند وێران بوون و ب سەدان وەلاتیێن سڤیل شەھید و بریندار بووینە.
تەنیا تاھر، ئەنداما مەکتەبا سیاسی یا حزبا سوشیالیستا دیموکراتا کوردستانێ ب سەرۆکایەتیا حەمەی حاجی مەحموود بۆ رۆژناما ئەڤرۆ گۆت” ل سەر ئاستێ نێڤدەولەتی پەکەکە یا د لیستا تیرۆرێ دا، پێدڤیە پەکەکە رەوشا ھەرێما کوردستانێ ل بەرچاڤ وەربگریت و نەبیتە جھێ ئێکلاکرنا سیاسەت و ئەجندایێن دەولەتێن دەوروبەر کو رۆژانە خەلکێ سڤیل ژ ئەگەرێ چالاکیێن پەکەکێ یێن دبنە قوربانیێن توپبارانکرنێن تورکی”.
تەنیا گۆت ژی” ئەوا پەکەکە دکەت، دۆستایەتی نینە بۆ حوکمەت و گەلێ باشوورێ کوردستانێ، ھەکە مەرەما راستەقینە یا پەکەکێ خەباتا رزگاریا نیشتمانی و نەتەوی یە، بلا پێگەیێن خوە و چالاکی و بارەگایێن خوە بۆ ناڤ ئاخا باکوورێ کوردستانێ ب ڤەگوھێزیت بۆ ناڤ ئاخا باکوورێ کوردستانێ، بەلێ پەکەکە دخوازیت خوە ب حوکمران بزانیت ل باشوورێ کوردستانێ، چەندین دەڤەر و گۆند کرینە بن دەستێ خوە”.
دیارکر ژی” خەلکێ باشوورێ کوردستانێ یێن بێزار بووین ژ وان درووشمێن زیق یێن پەکەکە بلند دکەت و بۆ وان دیار بوو کو ئارمانجێن پەکەکێ ب وی شێوەی نەبوو کو پرۆپاگندە بۆ دکر و سیاسەتەکا ھەرێمایەتی ل پشت وان ھەیە کو دانپێدانێ ب حوکمەتا ھەرێمێ نەکەن کو ئەڤ چەندە ژی جھێ قەبوولکرنێ نینە ل دەف خەلکێ ھەرێمێ و سەرکردایەتیا سیاسی ل ھەرێما کوردستانێ”.
ئەڤرۆ:
سیاسەتمەدار و ئەندامێ بەرێ یێ جڤاتا نوونەرێن عیراقێ، مەسعود حەیدەر، ل دۆر ھێرشێن مووشەکی یێن بەری دو شەڤان ل سەر دەڤەرا کەسک ل بەغدا گۆت” بەردەوامبوونا وان ھێرشان دسەلمینن کو ل عیراقێ تشتەک نینە ب ناڤێ دەولەت”.
مەسعود حەیدەر گۆت ژی” عیراق ب ھەموو دەزگەھێن خوە یێن ئاسایشێ و بەرگریێ، ب ھەموو حزب و سەرکردێن خوەڤە نەشێت رێ ل بەر ئەنجامدانا وان ھێرشان بگری تکو ژ لایێ میلیشیێن ژ دەرڤەی قانوونێ دژی دەڤەرا کەسک ل بەغدا دھێنە ئەنجامدان”.
دیارکر ژی” ئەڤ ھێرشێن مووشەکی یێن بەردەوام، نەبوونا دەولەتێ ل عیراقێ ب شێوەکێ دیار یا سەلماندی”.
ئەو پەرلەمانتارێ بەرێ پرسیار دکەت و دبێژیت” ئایا چ ھێزەک ل پشت ئەنجامدانا ڤان ھێرشایە کو ژ ھەموو دەستھەلات و حزبان ل عیراقێ و دەولەتا عیراقێ ب خوە ژی ب ھێزترە؟”.
ئەڤرۆ:
سەرۆکێ حوکمەتا ھەرێما کوردستانێ ھوشداریا وێ چەندا دا کو نوونەراتیێن دبلۆماسی ل عیراقێ یێن ل بەردەم گەفەکا مەزن دا ودەمێ وێ چەندێ یێ ھاتی ئێمناھیا وان بھێتە پاراستن، چونکە ئەو بۆ روو ب رووبوونا تیرۆرێ و ئاڤەدانکرنا عیراقێ یێن ھاتین.
مەسرور بارزانی، سەرۆکێ حوکمەتا ھەرێما کوردستانێ، د تویتەکی دا ئەو ھێرشا مووشەکی ل سەر بالیۆزخانا ئەمریکی ل بەغدا شەرمزارکر.
سەرۆکێ حوکمەتا ھەرێمێ د پەیاما خوەدا ئاماژە ب وێ چەندێ کر کو گەفەکا مەزن ل سەر نوونەراتیێن دبلۆماسی ل عیراقێ یا ھەی، ل دەمەکی دا ئەو بۆ روو ب رووبوونا تیرۆرێ و ئاڤەداکرنا عیراقێ یێن ھاتین.
مەسرور بارزانی داخواز ژ حوکمەتا فیدرالی یا عیراقێ کر گاڤین پێدڤی بۆ پاراستنا نوونەراتیێن دبلۆماسی ب ھاڤێژیت و ب ئێکجاری دووماھیێ ب وان ھێرشان بینیت.
دھێتە زانین، ل شەڤا ٢٢ ڤێ ھەیڤێ میلیشیان ھێرشەکا مووشەکی دژی بالیۆزخانا ئەمریکی ل بەغدا ئەنجامدا، ئەو ھێرشە ژی پشتی وێ چەندێ ھات کو ل ھەولێرێ ھێرشەکا ھەڤشێوێ وێ ھاتە ئەنجامدان کو قوربانی ھەبوون، گرۆپەکێ میلیشیا یکو خوە ب شوینگرێن قاسم سلێمانی دانایە و سەر ب ئیرانێ ڤەیە، ھەر د شەڤا وێ ھێرشێ دا بەرپرسیارەتیا خوە ژ وێ کریارا تیرۆرستی راگەھاند.
ژلایێ خوەڤە، نید برایس، پەیڤدارێ وەزارەتا دەرڤە یا ئەمریکی د کۆنگرەکێ رۆژنامەڤانی دا ل واشنتۆن راگەھاند” ئەم ھەست ب تۆرەبوونەکا مەزن دەربارەی ھێرشا ل ل سەر ھەولێرێ دکەین و ل دەمەکێ گونجای ب ھەماھەنگی ل گەل ھەڤپشکێن مە ل عیراقێ و ھەڤپەیمانیا نێڤدەولەتی، دێ بەرسڤا وێ ھێرشێ دەین”.
برایس گۆت ژی” ھێشتا یێ کار دکەین بۆ وێ چەندێ بزانین کێ ئەو ھێرشە ئەنجامدایە، بەلێ مە پێشتر دووپاتی کریە کو ئیران بەرپرسە ژ کریارێن وان گرۆپێن کو ھێرشان دکەنە سەر ئەمریکیان”.
ئەڤرۆ:
ژێدەرێن میدیایی ل رۆژئاڤایێ کوردستانێ دیار دکەن کو چەند رۆژن روسیا بنگەھێ خوە یێ سەربازی ل عەین عیسا و ھەروەسا دو بنگەھێن دی ژی ل قامشلۆ چۆل کریە و ھێزێن خوە ل دەڤەرێن دی یێن سووریێ بجە کرینە و ئەو یەک بوویە جھێ دلگرانیا وەلاتیێن رۆژئاڤایێ کوردستانێ.
ژێدەرێن میدیایی یێن رۆژئاڤایێ کوردستانێ دیار دکەن کو روسیا بنگەھێ سەربازی یێ عەین عیسا چۆل کریە و ھەروەسا ل باژێرێ قامشلۆ ژی روسیا دو بنگەھێن خوە یێ سەربازی چۆل کرینە و ھێزێن خوە ل دەڤەرێن دی یێن سووریێ بجە دکەت، ھەتا نھا بەرپرسێن سەربازی یێن روسیا ل دۆر ھندێ چو داخۆیانیێن فەرمی بەلاڤ نەکرینە و بەرپرسەکێ ھێزێن سووریا دیموکرات ژی بۆ ئاژانسا فرات دیار کریە کو ئەو نزانن کا روسیا دڤێت ھێزێن نوو ل وان بنگەھان بجە بکەت یان ژی دێ ھەر وەسا مینن، لێ رەنگە ئەو یەک ژ بەر ناکۆکیێن نوو یێن د ناڤبەرا روسیا و ئەمریکا دا بن.
ئاژانسا سپوتینگ یا روسی ژی بەری دو رۆژان دیار کربوو کو داعش ل چەندین دەڤەرێن جودا جودا ل سووریێ ب ھێز بوویە و روسیا ژی بزاڤا ھندێ دکەت کو رێگریێ ل ب ھێزبوونا داعشێ بگریت و نەھێلیت کو داعش وەکو سالێن بۆری ھندەک دەڤەرێن گرنگ و ستراتیژی ل سووریێ کۆنترۆل بکەت و ژ بەر ھندێ ژی دبیت روسیا ھندەک ھێزێن خوە ل باکورێ سووریێ ببەتە دەڤەرێن دی یێن سووریێ.
چاڤدێرێن سیاسی ژی دیار دکەن کو ناکۆکیێن نوو د ناڤبەرا ئەمریکا و روسیا دا ل دۆر پاشەرۆژا سووریێ ھەنە و ھەروەسا نھا روسیا دەست ب بزاڤەکا مەزن کریە دا کو کورد و شام دەست ب گەرەکا دی یا دانوستاندنان بکەن و پرسێن د ناڤبەرا خوە دا چارەسەر بکەن، چونکو روسیا دڤێت ئاستەنگیان ل ھەمبەر ستراتیژیا نوو یا ئەمریکا ل سووریێ و رۆژئاڤایێ کوردستانێ دروست بکەت، روسیا نەڤێت ئەمریکا ھاریکاریا کوردان بکەت و حەفتیا بۆری ژی سیرگێی لاڤرۆڤ وەزیرێ دەرڤە یێ روسیا راگەھاند کو ھاریکاریێن ئەمریکا بۆ ھێزێن سووریا دیموکرات گەلەک زێدە بووینە و پشتی کو جۆ بایدن وەکو سەرۆکێ ئەمریکا دەست ب کار کری ئەمریکا پتر ھاریکاریا ھێزێن سووریا دیموکرات دکەت و ئەمریکا دڤێت ئاخا سووریێ پارچە بکەت، ھەکە تشەک وەسا ھەبیت ئەو یەک دێ بیتە ئەگەرێ ھندێ کو ئالۆزیێن نوو ل سووریێ دروست ببن و دڤێت ئەمریکا کار بۆ چارەسەریا سیاسی ل سووریێ بکەت.
ئەو یەک د دەمەکێ دایە کو بەری نھا مەزلوم عەبدی فەرماندارێ گشتی یێ ھێزێن سووریا دیموکرات راگەھاند کو وان دڤێت پەیوەندیێن خوە ل گەل ئەمریکا و روسیا باشتر لێ بکەن، چونکو ھەڤسەنگیەکا ھێزێ ل سووریێ دروست بوویە و ژ بەر ھندێ ژی دھێتە خواستن کو کورد پەیوەندیێن خوە ل گەل ھەر دو وەلاتان باشتر لێ بکەن.
فەرماندارێ گشتی یێ ھێزێن سووریا دیموکرات ھەروەسا راگەھاند کو ئەو وەکو ھێزێن سووریا دیموکرات نھا ل گەل ئەمریکا پێکڤە ل سەر بەرنامەکێ ھەڤپشک کار دکەن و ئەمریکا ژی دڤێت داعش و گرۆپێن دی یێن تیرۆرستی ل سووریێ نەمینن و د چارچۆڤێ شەرێ ل دژی داعشێ دا ژی ئەمریکا بریار دایە کو پتر ھاریکاریا کوردان و ھێزێن سووریا دیموکرات بکەت، ژ بەر ھندێ ژی دبیت ئەمریکا ھندەک بنگەھێن نوو یێن سەربازی ژی ل رۆژئاڤایێ کوردستانێ و باکورێ سووریێ ئاڤا بکەت.
ئەڤرۆ ، زنار تۆڤی:
بسپۆرەکێ زانستێن سییاسی ل زانکۆیا سەلاحەدین ، د دیدارەکێ بۆ رۆژناما ئەڤرۆ راگەھاند، ئیران ل گەل ھەڤالبەندێن خوە یێن عیراقی یا ھەموو بزاڤان دکەت، مەزنترین فشاران ل سەر ھەرێما کوردستانێ دروست بکەت و ل سەر ئاستێ نافخوەیی لاواز بکەت کو ھەموو مەرەما ئیرانێ ئەوە پارتی لاواز بکەت، ئەڤە یا دیار و ئاشکرایە، چونکی ھەر ژ سالا ٢٠٢٠ ھەتا نوکە ب تەمامی بۆدجا ھەرێما کوردستانێ ژ ئالیێ عیراقێ ڤە ھاتیە برین، دیسان ئیران یا ھەموو بزاڤان دکەت حوکمەتا عیراقێ دەربارەی پرۆژە قانوونا بۆدجا سالا ٢٠٢١ رێککەفتنێ ل گەل ھەرێمێ نەکەت، ھەروەسا ئەو سیاسەتا پارتی ل کوردستانێ پەیرەو دکەت ب دلێ ئیرانێ نینە، ب تایبەتی ژی نێزیکبوونا ھەرێمێ ژ ئەمریکا، دیسان ئیران یا ھەموو بزاڤان دکەت، کو ئەمریکا ھەموو ھێزێن خوە ژ عیراقێ ڤەکێشیت، ھەر چەندە ڤەکێشانا ھێزێن ئەمریکی ل عیراقێ د بەرژەوەندیا کوردان و سووننەیان دا نینە، چونکی ب ڤەکێشانا وان ژ عیراقێ، دێ کێشێن مەزن دروست بن و دێ پرۆسا سیاسی ل عیراقێ تێکچیت و دێ میلیشیێن شیعی بنە پێگوھۆرێ لەشکرێ عیراقێ و ل وی دەمی دبیت چو تشت ب ناڤێ فیدرالیەتێ ژی نەمینیت.
د. نەوزاد ھێتوتی گۆت ژی” ئێک ژ وان فشارێن ئیران ل سەر ھەرێمێ دروست دکەت ئەوە کو دڤێت ھەرێم ئەجندایەکا ئیرانی پەیرەو بکەت، ئەڤە ژی کارەکێ ب زەحمەتە، ، ژبەرکو ھەرێمێ بەرنامە و ستراتیژیەتا خوە یا ھەی، ھەروەسا د نوکە دا شیعان ھەتا رادەکێ باوەری ب سیستەمێ فیدرالیەتێ و دستۆری نەمایە، وان دڤێت پتریا دەستھەلاتان ڤەگەریننە بەغدا و دەستھەلاتەکا مەرکەزی ل بەغدا دروست بکەن، چونکی نوکە شیعە ب ھێزن و دەستھەلاتا عیراقێ د دەستێ وان دایە”.
د. نەوزاد ھێشتا دبێژیت” ھەر ژ سالا ٢٠٠٨ ھەتا سالا ٢٠٢٠ ستراتیژیەتا شیعان ب پشتەڤانیا ئیرانێ ئەوە حوکمەتەکێ ل عیراقێ چێکەن، ئیران ل سەر یا زال بیت و ھەموو دەستھەلات ژی د دەستێ وێ و ھەڤالبەندێن وێ دا بن، ھەروەسا ئاسایی بوونا پەیوەندیێن ھەرێمێ ل گەل حوکمەتا کازمی د بەرژەوەندیا ئیرانێ دا نینە، ب تایبەتی ژی ئەو رێککەفتنا دناڤبەرا بەغدا و ھەرێمێ دا دەربارەی شنگالێ دا ھاتیە کرن، چونکی دەڤەرا شنگالێ ژ ئالیێ جیۆ سییاسی ڤە بۆ ئیرانێ یا گرنگە، یا ھەڤسنۆرە ل گەل وەلاتێ سووریێ، کو ریدۆرەکا گرنگە بۆ شیعان و دشێت ب رێیا شنگالێ، ھێز و تەقەمەنیان بگەھینیتە سووریێ، لەوما ئیرانێ ڤیایە فشاران ل سەر ھەرێمێ دروست بکەت، ھەروەسا د نوکە دا ئەم یێ بەر ب ھەلبژارتنێن پێشوەخت دچین و رەوشا میلیشیێن شیعان و ئیرانێ یێ باش نینە، دبیت د ھەلبژاتنان دا سەرکەفتنێ نە ئینن، لەوما ئیرانێ دڤێت دژایەتیێ دناڤبەرا کوردان وشیعان دا دروست بکەت، دێ فشاران ل سەر ھەرێمێ دروست کەت، بۆ رازیکرنا جادا شیعی، دیسان ھەموو ئەو گەندەلیێن ل عیراقێ ھاتینە کرن ژی، ئیران و ھەڤالبەندێن خوە د ئێخنە د ستوویێ کوردان دا”.
دیار کر ژی” ئیرانێ دڤێت ل سەر ئاستێ نافخوەیی ژی، پێگەھێ ھەرێمێ لاواز بکەت، و لبەرە ل گەل ئالیێن شیعی ھەتا ئەنجامدانا ھەلبژارتنان فشارەکا ئابووری یا مەزن ل سەر ھەرێمێ دروست بکەن، مەرەما ئیرانێ ژ ڤێ پلانێ ئەوە، کو خەلکێ ھەرێمێ ل دەمێ ئەنجامدانا ھەلبژارتنان دەنگێ خوە نەدەن پارتی ، ئیران بۆ خەلکی وەسا دیار دکەت، کو پارتی بەرپرسە ژ ڤێ رەوشێ و ئەو بوویە ئەگەر، کو ھەولێر و بەغدا نەگەھنە رێککەفتنێ”.
ئەو ژی گۆت” د نوکە دا پشکەکا مەزن ژ ئێکەتیا نیشتیمانیا کوردستانێ و ب تایبەتی ژی گرۆپێ ١٦ ئوکتۆبەرێ سیاسەتەکا عیراقی پەیرەو دکەن، لەوما دڤێت ئەم دلێ خوە ب ھندێ خوەش نەکەین کو بھایێ پەترۆلێ بلند بوویە، چونکی بھایێ وێ د دەستێ مە دا نینە و دبیت جارەکادی بھا داکەڤیت، لێ د قووناغا نوکە دا کورد دشێن ل ھەمبەری بەغدا خوە راگرنو یا گرنگە حوکمەتا ھەرێمێ چاکسازیان بکەت، چونکی ھەکە بھایێ پەترۆلێ داکەڤیتەڤە و بەغدا ژی جارەکا دی فشاران ل سەر ھەرێمێ دروست بکەت، ئەم بشێین خوە ل سەر پیێن خوە راگرین، لەوما یا گرنگە د ئالیێ ئابووری دا حوکمەت چاکسازیێن بنەرەتی بکەت، داکو ل قووناغێن بھێت ئەم خوە راگرین و نەکەڤینە ژێر فشارێن ئیرانێ و عیراقێ، دیسان دڤێت ھێزەکا نیشتیمانی بھێتە دروست کرن و ھەموو ھێزێن پێشمەرگەی ببنە ئێک ب پشتەڤانیا ھێزێن نێڤدەولەتی و ب تایبەتی ئەمریکا، داکو چو روودانێن دیتر یێن وەکو ١٦ ئوکتۆبەرێ ل کوردستانێ روو نەدەن”.
دھۆک، لەزگین جوقی
ھەر رۆژەکا بجھئێنانا رێککەفتنا ھەرێمێ و بەغدا بۆ ئاسایێکرنا رەوشا شنگالێ گیروببیت، مەترسیەکا مەزنتر ل سەر وی باژێری پەیدا دبیت
فەرماندەکی فەرماندەیا شنگال ب سەر ھێزێن پێشمەرگەی کوردستانی راگەھاند، پێشمەرگێ کوردستانێ ل مەزارگەھێ شەرفەدەین د ئامادەباشیێ دایە بۆ ھەر پێشھاتەکا نەچاڤەریکری ل شنگالێ رووبدەت و دێ خەلکێ خوە کەن پارێزن.
میرزا خەلەف، فەرماندە ل فەرماندەیا شنگالێ یا پێشمەرگەی گۆت” لڤینێن داعشێ بووینە جھێ مەترسیێ ل سەر شنگالێ و دەشتا نەینەوا کو چەکدارێن داعشێ لڤینێ دکەن د ناڤبەرا رۆژئاڤایێ کوردستانێ و شنگالێ دا ئەڤە ژی پشتی وێ چەندی پەیدابوویە کو ھێزەکا زۆر یا حەشدا شەعبی ھاتیە شنگالێ وسستبوونەک د سنورێ شنگالێ دگەل رۆژئاڤایێ کوردستانێ دا چیبوویە وھەر رۆژەکا بجھئێنانا رێککەفتنا ھەرێمێ و بەغدا بۆ ئاسایێکرنا رەوشا شنگالێ گیروبیت، مەترسیەکا مەزنتر ل سەر شنگالێ پەیدا دبیت”.
گۆت ژی” خەلکێ شنگالێ چاڤەرێنە رێککەفتنا شنگالێ بھێتە بجھئینان وپێشمەرگە ڤەگەریتە شنگالێ تاکو پاراستنا خەلکێ شنگال بھێتە کرن و ژ رەوشا خراب رزگارببن چونکو بێ پێشمەرگەی چو جاران رەوشا شنگالێ باش نابیت”.
خودێدا حسێن، موختاری گوندێ (وەردیە) ل قەزا شنگالێ دیارکر” رەوشا شنگالێ یا باش نینە و ترس بۆ وەلاتیێن ڤەگەریاینە شنگالێ چیبوویە”.
خویاکر” چەند گرۆپێن ب سەر حەشدا شەعبی ڤە ل شنگالێ گەلەک ترس بۆ خەلکێ ڤەگەریاین شنگالێ دروستکریە و تشتەکێ ژ چارەنڤیسێ خوە نوزانن و ھەر جھەکێ حەشد ھاتە تێدا چوول ناکەت”.
گۆت ژی” باشترە خەلکێ شنگالێ بیژنە گرۆپێن نەشەرعی، شنگال چوول بکەن، چونکو ب ھەبوونا وان گرۆپان دناڤ شنگالێ دا مەترسی ھەیە تورکیا بھێتە شنگالێ وئەڤە چەند جاران تورکیا گەفێن ھێرشکرنێ ل سەر شنگالێ دکەت وئەڤە بوویە جھێ ترسەکا مەزن بۆ خەلکێ ڤەگەریایە شنگالێ”.
نيشاندان