سه‌رۆكێ هه‌رێما كوردستانێ، نێچیرڤان بارزانی، په‌یامه‌ك ل دۆر هه‌وا هه‌لبژارتنان به‌لاڤكر و داخواز كر هه‌وه‌كا مه‌ده‌نیانه‌ یا ئارام د ئاسته‌كێ بلند دا بهێته‌ ئه‌نجامدان و نه‌بیته‌ ئه‌گه‌رێ بێزاركرنا وه‌لاتیان و دوور بیت ژ هه‌ڤدو شكاندنێ و ناڤزراندنێ.

سه‌رۆكێ هه‌رێمێ داخواز ژ هه‌موو لایه‌ن و داموده‌زگه‌هێن ئیداری و ئه‌منی و مدیا و جڤاكی مه‌ده‌نی كر د هه‌ڤكارن بۆ سه‌ركه‌فتنا پرۆسا ب رێڤه‌چوونا هه‌وا هه‌لبژارتنان د چارچۆڤێ قانوونێ دا و ده‌لیڤا یه‌كسان و وه‌كهه‌ڤ بۆ هه‌موو لایه‌ن و به‌ربژاران بهێته‌ دان.

نێچیرڤان بارزانی داخواز ژی ژ هه‌موو حزب و لایه‌نان كر كو” پشتی هه‌لبژارتنان ئارمانجا مه‌ ئه‌وه‌ ل به‌غدا پێكڤه‌ كار بكه‌ین بۆ ب هێزكرنا دیموكراسیێ و ب ده‌ستڤه‌ئینان و پاراستنا مافێن دستووری یێن هه‌رێما كوردستانێ”.

گۆت ژی” ده‌نگدان ماف و ئه‌رك و به‌رپرسیاره‌تیه‌، دڤێت په‌یاما مه‌ هه‌موویان ئه‌و بیت كو وه‌لاتی وی مافی بكاربینن، ئه‌رك و به‌رپرسیاره‌تیێ هه‌لگرن و ب پشكداریا وان یا كارا د ده‌نگدانێ دا، ئه‌م هه‌ موو پیچكڤه‌ د گوهۆرین و بزاڤێن ئاڤه‌دانكرنا پاشه‌رۆژه‌كا باشتردا پشكدار بین.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، ل سالیادا 60 یا ده‌ستپێكرنا شۆره‌شا ئه‌یلوولا مه‌زن په‌یامه‌ك به‌لاڤكر و ئه‌ڤه‌ ژی ده‌قێ وێ یه‌…

ئه‌ڤرۆ ل سالیادا 60 یا ده‌ستپێكرنا شۆره‌شا ئه‌یلوولا مه‌زن ب رێبه‌ریا بارزانیێ نه‌مر، ب رێز و پێزانین ڤه‌ یادا وان هه‌موو پێشمه‌رگێن قه‌هره‌مان و خه‌باتكه‌رێن كوردستانێ دكه‌ین، كو ژ پێكهاتێن جودا یێن گه‌لێ كوردستانێ، پشكداری د وێ شۆره‌شا سه‌رانسه‌ری یا كوردستانێ دا كری، كو چه‌ندین ده‌ستكه‌فتێن نه‌ته‌وی و نیشتمانی ب ده‌ستڤه‌ئینان.

ساخكرنا بیرهاتنا شۆره‌شا ئه‌یلوولا مه‌زن، ساخكرنا دیرۆكا به‌رگریێ و خه‌بات و قوربانیدانێ و داكۆكیكرنا گه‌لێ كوردستانێ یه‌ ژ هه‌بوون و ناسناما خوه‌ یا نه‌ته‌وی و مافێن خوه‌ یێن ره‌وا. هه‌رچه‌نده‌ گه‌لێ كوردستانێ، به‌رده‌وام ل گه‌ل رێچاره‌یا ئاشتیانه‌ و دانوستاندنێ بوو بۆ بده‌ستڤه‌ئینانا مافێن خوه‌ یێن نه‌ته‌وی، به‌لێ ب ئیراده‌كا ب هێز ژی، به‌رگری ژ مافێن خوه‌ كریه‌، كو د ئه‌نجامدا ژ ئه‌گه‌رێ خۆراگریا خه‌لكێ كوردستانێ، ئێك ژ ده‌ستكه‌فتێن گرنگ یێن شۆره‌شا ئه‌یلوولێ، رێككه‌فتنا دیرۆكی یا 11 ئادارێ بوو، كو رژێما به‌عس نه‌چاربوو دانپێدانێ ب هنده‌ك ژ مافێن نه‌ته‌وی یێن گه‌لێ كوردستانێ بكه‌ت.

ئه‌ڤرۆ د ده‌مه‌كی دا بیرهاتنا شۆره‌شا ئه‌یلوولا مه‌زن ساخ دكه‌ین، پارتی  به‌رده‌وامه‌ ل رۆلێ خوه‌ یێ پێشه‌نگ د رێبه‌ریا گه‌لێ كوردستانێ دا و پاراستنا ده‌ستكه‌فت و مافێن دستووری یێن خه‌لكێ كوردستانێ، پارتی ب ده‌هان ساله‌، به‌رده‌وام پارێزه‌رێ راسته‌قینه‌یێ ده‌ستكه‌فت و مافێن خه‌لكێ كوردستانێ یه‌ و فاكته‌ره‌كێ ب هێ زیێ پشت راستیێ و ئارامیێ و ئاڤه‌دانكرنێ یه‌.

له‌وما د سه‌رده‌مێ ئه‌نجامدانا هه‌لبژارتنێن په‌رله‌مانێ ئیراقێ، د پشت راستین خه‌لكێ كوردستانێ باوه‌ریا ب هێز یا خوه‌ ب پارتی و په‌یاما وێ یا نه‌ته‌وی و نیشتمانی دووپات كه‌ت، تاكو درێژیێ ب كاروانێ رێبه‌ریا خه‌لكێ كوردستانێ بده‌ت، ل پیناڤی ب ده‌ستڤه‌ئینانا ده‌ستكه‌فتێن زێده‌تر و پاشه‌رۆژه‌كا گه‌ش و كوردستانه‌كا ب هێز دا.

ئه‌ڤرۆ:

نوونه‌رێ حوكمه‌تا هه‌رێما كوردستانێ ل ئێكه‌تیا ئه‌ورۆپا راگه‌هاند، به‌رپرسێ سیاسه‌تا ده‌رڤه‌ یا ئێكه‌تیا ئه‌ورۆپا سه‌ره‌دانا هه‌رێما كوردستانێ كریه‌ بۆ پشته‌ڤانیكرنێ ل هه‌رێما كوردستانێ و زانینا بۆچوونا سه‌رۆك بارزانی ل دۆر روودانان.

دلاوه‌ر ئاژگه‌یی، نوونه‌رێ حوكمه‌تا هه‌رێما كوردستانێ ل ئێكه‌تیا ئه‌ورۆپا گۆت” ئه‌ڤه‌ ئێكه‌مین سه‌ره‌دانا (جۆزیێف یۆرێل) به‌رپرسێ سیاسه‌تا ده‌رڤه‌ یا ئێكه‌تیا ئه‌ورۆپا وه‌رگرتی بۆ هه‌رێما كوردستانێ یه‌ كو پێشتر ژی سه‌رۆكێ په‌رله‌مانێ ئه‌ورۆپی بوو، نوكه‌ ژی پۆستێ خوه‌ یێ نووی ێ وه‌رگرتی ب نوونه‌راتیا 27 وه‌لاتێن ئه‌ندام د ئێكه‌تیا ئه‌ورۆپا دا، هه‌روه‌سا ئێكه‌تیا ئه‌ورۆپا ل ده‌ستپێكا دارشتن و نووكرن و ب هێزكرنا سیاسه‌تا خوه‌یه‌ ل جیهانێ و په‌یوه‌ندیه‌كا ب هێز ژی ل گه‌ل هه‌رێما كوردستانێ یا هه‌ی و زێده‌تر ژ ناڤ وه‌لاتێن ئه‌ندام د ئێكه‌تیا ئه‌ورۆپا دا، ل هه‌رێمێ هه‌بوون یا هه‌ی و په‌یوه‌ندیێن ب هێز ل گه‌ل هه‌رێما كوردستانێ یێن هه‌ین”.

گۆت ژی” سه‌ره‌دانا وی شاندێ بلند یێ ئێكه‌تیا ئه‌ورۆپا بۆ هه‌رێما كوردستانێ، بۆ پشته‌ڤانیا هه‌رێما كوردستانێ یه‌ ژ روویێ سیاسی ڤه‌ و سه‌ره‌دانێ ژی گرنگیه‌كا مه‌زن یا هه‌ی ژ روویێ ئابووری و سیاسی و ئه‌منی و ره‌وشا ده‌ڤه‌رێ و شاندێ ناڤبری دخوازیت بۆچوونا سه‌رۆك بارزانی بزانیت ل دۆر روودانان و هه‌ماهه‌نگیه‌كا زێده‌تر د ناڤبه‌را ئێكه‌تیا ئه‌ورۆپا و هه‌رێما كوردستانێ هه‌بیت”.

ئه‌ڤرۆ:

سه‌رۆكێ هه‌رێما كوردستانێ پشتی ب دووماهی هاتنا كۆمبوونا وی ل گه‌ل جۆزێف بۆرێل به‌رپرسێ سیاسه‌تا ده‌رڤه‌ یا ئێكه‌تیا ئه‌ورۆپا، د كۆنگره‌كێ رۆژنامه‌ڤانیێ هه‌ڤپشك دا، به‌حسێ ناڤه‌رۆكا كۆمبوونێ كر و ئاماژه‌ كر” مه‌ به‌حسێ به‌هنگاریا داعشێ و هه‌لبژارتنان كر”.

ژلایێ خوه‌ڤه‌ جۆزێف بۆرێل دیاركر كو هه‌رێما كوردستانێ و هێزا پێشمه‌رگه‌ی رۆلێ مه‌زن هه‌بوو د شكاندنا داعشێ دا، خویاكر ژی كو ئێكه‌تیا ئه‌ورۆپا دێ به‌رده‌وام بیت ل سه‌ر هاریكاریا هێزێن پێشمه‌رگه‌ی و هه‌رێما كوردستانێ د وی شه‌ری دا.

نێچیرڤان بارزانی د وی كۆنگرێ رۆژنامه‌ڤانی دا گۆت” سه‌ره‌دانا جۆزێف بۆرێل نیشانا هه‌ڤسۆزیا ئێكه‌تیا ئه‌ورۆپا یه‌ بۆ ئیراقێ و هه‌رێما كوردستانێ”.

گۆت ژی” مه‌ دانوستاندن ل سه‌ر چه‌ندین بابه‌تان كر ژ وان ژی ئاسایش و سه‌قامگیری و په‌یوه‌ندیێن ئێكه‌تیا ئه‌ورۆپا و ئیراقێ، په‌یوه‌ندیێن ئیراقێ و هه‌رێما كوردستانێ و كێشێن د ناڤبه‌را وان دا، شه‌رێ دژی داعشێ، هه‌لبژارتنێن داهاتی یێن ئیراقێ و گرنگیا پشكداریا تیمێن ئێكه‌تیا ئه‌ورۆپا د چاڤدێریا پرۆسا هه‌لبژارتنان دا، ره‌وشا ده‌ڤه‌رێ، پرسا كۆچكرنێ و چه‌ندین بابه‌تێن دی یێن جهێ گرنگیا هه‌ڤپشك”.

نێچیرڤان بارزانی دیاركر ژی” سوپاسیا وه‌لاتێن ئێكه‌تیا ئه‌ورۆپا دكه‌ین بۆ پشته‌ڤانیا وان بۆ ئیراقێ و هه‌رێما كوردستانێ د شه‌رێ دژی داعشێ دا، هه‌روه‌سا بۆ هاریكاریێن وان یێن مرۆڤایه‌تی، ئێكه‌تیا ئه‌ورۆپا ب رێیا به‌رنامێن پێشڤه‌برن ل سه‌ر چه‌ندین ئاستێن جودا ب شێوه‌كێ به‌رچاڤ بۆ پێشڤه‌برنا شیانێن مرۆڤایه‌تی هاریكاریا مه‌ كریه‌”.

سه‌رۆكێ هه‌رێما كوردستانێ ئاماژه‌كر” گوهۆرینێن سه‌قای كاریگه‌ری ل سه‌ر هه‌موو جیهانێ دا كریه‌ ئه‌م ژی ژ ده‌رڤه‌ی وێ كاریگه‌ریێ نینین، گوهۆرینا سه‌قای مه‌ترسیه‌ بۆ ئاسایش و پێشكه‌فتنا ئیراقێ، خوه‌شحالین كو سێ پارێزگه‌هێن هه‌رێما كوردستانێ یێن بووینه‌ ئه‌ندام د په‌یمانا پارێزگه‌رێن ئه‌ورۆپا دا ژئه‌گه‌رێ پشته‌ڤانیا ئێكه‌تیا ئه‌رۆپا پلانا خوه‌گونجاندنا سه‌قای و وزێ هاتیه‌ پێشڤه‌برن، هه‌روه‌سا هاندانا ئێكه‌تیا ئه‌ورۆپا دكه‌ین كو به‌رده‌وام بیت د پشته‌ڤانیكرنا بزاڤێن ئیراقێ و هه‌رێما كوردستانێ بۆ به‌رهنگاریا كاریگه‌ریێن تێكده‌رانه‌ یێن گوهۆرینا سه‌قای”.

خویاكر” داخواز ژی ژ ئێكه‌تیا ئه‌ورۆپی دكه‌ین بۆ ب هێزكرنا ده‌زگه‌هێن ده‌وله‌تێ و چاكسازیێ و به‌رقه‌ربوونا قانوونێ و حوكمرانیا دروست و تواناسازیا ژنان و لاوان و هاریكاری د بوارێن ئه‌كادیمی و زانكۆ و به‌ر ب پێشڤه‌برنا بوارێن كارگێری و دارایی و كاروبارێن دادوه‌ری دا پشته‌ڤانیا مه‌ بكه‌ت و دخوازین هاریكار بیت تاكو هه‌رێما كوردستانێ ژ هه‌موو روویه‌كی ڤه‌ ژ رێككه‌فتنێ ل گه‌ل ئیراقێ و ئێكه‌تیا ئه‌ورۆپا یا مفادار بیت”.

ل دووماهیێ گۆت” جاره‌كا دی پێگیریا خوه‌ ب پێشڤه‌برن و دیموكراسیێ و ئازادیا راده‌ربرینێ و رێزگرتن ل مافێن مرۆڤی و پێكڤه‌ژیانا ئاشتیانه‌ و ئازادیا ئایینی و پاراستنا پێكهاتان دووباره‌ دكه‌ین”.

ژلایێ خوه‌ڤه‌، جۆزێف بۆریل، به‌رپرسێ سیاسه‌تا ده‌رڤه‌ یا ئێكه‌تیا ئورۆپا د وی كرنگرێ رۆژنامه‌ڤانی یێ هه‌ڤپشك دا ل گه‌ل سه‌رۆكێ هه‌رێما كوردستانێ گۆت” ئه‌م ل ئێكه‌تیا ئه‌ورۆپا دێ د به‌رده‌وام بین ل پشته‌ڤانیكرن و كاركرنێ ل گه‌ل هه‌ڤپه‌یمانیا نێڤده‌وله‌تی بۆ به‌رهنگاریا تیرۆرێ”.

ناڤبری ستایشا هه‌رێما كوردستانێ كر بۆ بزاڤێن وێ د پێشوازیكرنێ ل ئاواره‌ و په‌نابه‌ران و گۆت” ئه‌و كاره‌كێ نایابه‌ و ئه‌ز یێ پێ مه‌نده‌هۆشم”.

په‌یامه‌كا دی یا به‌رپرسێ سیاسه‌تا ده‌رڤه‌ یا ئێكه‌تیا ئه‌ورۆپا د وی كۆنگرێ رۆژنامه‌ڤانی دا گرێدای ئازادیا رۆژنامه‌ڤانی، ئازادیا راده‌ربرینێ و مافێن مرۆڤی بوو و گۆت” ئه‌و بنه‌ما بۆ جڤاكه‌كێ دیموكراتی گه‌له‌ك د گرنگن و دێ بنه‌ به‌رێ بنیاتێ جڤاكه‌كێ ئازاد”.

ئه‌ڤرۆ:

به‌رپرسه‌كێ پارتی دیموكراتی كوردستان ل سنوورێ پارێزگه‌ها دهۆكێ، راگه‌هاند به‌رهه‌ڤیێن باش بۆ هه‌لبژارتنێن داهاتی یێن جڤاتا نوونه‌رێن ئیراقێ یێن هاتینه‌ كرن ودیاركر ب هه‌موو پێڤه‌ره‌ك ده‌نگ و كورسیێن پارتی د هه‌لبژارتنێن ڤێ جارێ یێن ئیراقێ دێ زێده‌ بن.

عومه‌ر ئۆره‌یی، به‌رپرسێ لقێ 18 یێ پارتی دیموكراتی كوردستان، گۆت” ل سنوورێ قه‌زا ئامێدیێ به‌رهه‌ڤیێن باش یێن هاتینه‌ كرن بۆ هه‌لبژارتنێن جڤاتا نوونه‌رێن ئیراقێ و به‌ربژارێن پارتی ب جه‌ماوه‌رێ سنوورێ ده‌ڤه‌را ئامێدیێ یێن هاتینه‌ نیاسین، بریاره‌ ژی ل رۆژێن داهاتی ده‌هان چالاكی بۆ هه‌وا هه‌لبژارتنان ل ده‌ڤه‌را ئامێدیێ بهێنه‌ ئه‌نجامدان”.

به‌رپرسێ لقێ 18 پتر رۆهنكر” ده‌نگێن پارتی د هه‌لبژارتنێن جڤاتا نوونه‌رێن ئیراقێ كو بریاره‌ ل هه‌یڤا داهاتی بهێنه‌ ئه‌نجامدان، دێ زێده‌ بن، ژ ئه‌نجامێ وێ چه‌ندێ ژی دێ دێ هژمارا كورسیێن پارتی ل جڤاتا نوونه‌رێن ئیراقێ بلند بن بۆ سه‌ر 25 كورسیان دا، ئه‌ز ب خوه‌ پێشبینیێ دكه‌م هژمارا كورسیێن پارتی ژ 25 كورسیان زێده‌تر لێ بهێن و ببنه‌ 28 كورسی”.

عومه‌ر ئوره‌یی ئاماژه‌ كر” چه‌ند پیڤه‌ره‌ك یێن هه‌ین بۆ زێده‌بوونا ده‌نگێن پارتی و په‌سه‌ندكرنا سیاسه‌تا پارتی ژلایێ خه‌لكێ كوردستانێ ڤه‌، پرۆژێن حوكمه‌تێ بۆ خزمه‌تكرنا وه‌لاتیان، هه‌روه‌سا ئه‌و داتا و پێزانینێن ل دۆر ئه‌ندام و لایه‌نگرێن پارتی هه‌ین، ئه‌و هه‌موو ئه‌نجامێن وێ راستیێ نه‌ كو پارتی دێ سه‌ركه‌ڤیت و ب هه‌موو پیڤه‌ره‌كێ پێشبینیا زێده‌بوونا ده‌نگ و كورسیێن پارتی دكه‌ین”.

ئه‌ڤرۆ:

سه‌رۆكێ هه‌رێما كوردستانێ دووپاتی ل گرنگیا دیالۆكی و لێكتێگه‌هشتن و بیر و بۆچوونێن هه‌ڤپشك و دیتنا رێچاره‌كێ بۆ كێشه‌ و ئالۆزیێن ده‌ڤه‌رێ ل سه‌ر بنه‌مایێ هه‌ڤدوو قه‌بوولكرنێ دكه‌ت.

نێچیرڤان بارزانی، سه‌رۆكێ هه‌رێما كوردستانێ پێشوازی ل شانده‌كێ پارتا گه‌لێ كۆماری یا توركی (جه‌هه‌په‌) ب سه‌رۆكایه‌تیا (ئۆغوز كائان سالیجی)، جێگرێ سه‌رۆكێ وێ پارتێ كر.

ب گۆره‌ی به‌یاننامه‌كا سه‌رۆكایه‌تیا هه‌رێما كوردستانێ، د دیداره‌كێ دا شاندێ پارتا ناڤبری به‌حسێ ئارمانج ژ سه‌ره‌دانا خوه‌ بۆ هه‌رێما كوردستانێ كر و دووپاتی ل وێ چه‌ندێ كر كو چاره‌سه‌ركرنا كێشه‌ و ئالۆزیێن ده‌ڤه‌رێ ب دیالۆكێ و لێكتێگه‌هشتنێ د ناڤبه‌را گه‌ل و پێكهاتان دبیت، بۆ ڤێ مه‌ره‌مێ ژی پارتا وان بجهئینانا روانگه‌هه‌كێ دووربین ل سه‌ر وی بنه‌مایی ده‌ستپێكریه‌ و هیڤی خواست په‌یوه‌ندیه‌كا باش و ل سه‌ر بنه‌مایێ به‌رژه‌وه‌ندیا گه‌لێن ده‌ڤه‌رێ ل گه‌ل هه‌رێما كوردستانێ و پێكهاتان ئاڤا بكه‌ین و پێكڤه‌ كاری بۆ چاره‌سه‌ركرنا كێشان و ئارامیێ و سه‌قامگیریێ ل ده‌ڤه‌رێ بكه‌ن، هه‌روه‌سا ئاماژه‌ ب گرنگیا رۆل و پێگه‌هێ هه‌رێما كوردستانێ كر”.

سه‌رۆكێ هه‌رێما كوردستانێ ژی دووپاتی ل گرنگیا دیالوك و لێكتێگه‌هشتن و بیر و بۆچوونێن هه‌ڤپشك و دیتنا رێچاره‌یا كێشه‌ و ئالۆزیێن ده‌ڤه‌رێ ل سه‌ر بنه‌مایێ هه‌ڤدو قه‌بوولكرنێ و نه‌هێلانا ئینكارێ كر و ئه‌ڤ سه‌ره‌دانه‌ ژی وه‌كو سیاسه‌ته‌كا نوو یا (جه‌هه‌پێ) هژمارت”.

نێچیرڤان بارزانی سوپاسیا حوكمه‌تا توركیا كر كو به‌رده‌وام ل ته‌نگاڤیان دا هاریكاریا خه‌لكێ كوردستانێ كریه‌ و ئاماژه‌ ب هاریكاریا توركیا ل ده‌مێ ئۆپه‌راسیۆنێن ئه‌نفالان ل سالا 1988 كر كو ده‌رگه‌هێن خوه‌ بۆ خه‌لكێ كوردستانێ ڤه‌كرن و هاریكاریا وان كری. ل دۆر رۆل و پێگه‌هێ هه‌رێما كوردستانێ ژی، سه‌رۆكێ هه‌رێمێ دووپات كر كو وه‌كو به‌رده‌وام ب فاكته‌رێ ئارامیێ و سه‌قامگیریێ دێ مینیت.

ئه‌ڤرۆ:

پێكهاتێن ده‌شتا نه‌ینه‌وا پشته‌ڤانیا خوه‌ بۆ به‌ربژارێن پارتی دیموكراتی كوردستان دووپات دكه‌ن و به‌حس ل وێ چه‌ندێ دكه‌ن كو پارتی دیموكراتی كوردستان تاكه‌ حزبه‌ بشێت بێ جوداهی به‌رگریێ ل هه‌موو پێكهاتان بكه‌ت، له‌وما دخوازن پارتی ل به‌غدا نوونه‌راتیا وان بكه‌ت.

غه‌زوان داودی، ئه‌ندامێ به‌رێ یێ جڤاتا پارێزگه‌ها نه‌ینه‌وا و نوونه‌رێ شه‌به‌كا، گۆت” پشتی ب بیانوویێن جودا به‌ربژارێ شه‌به‌ك ل ده‌شتا نه‌ینه‌وا هاتیه‌ دوورخستن، پتریا كوردێن شه‌به‌ك كو نێزیكی 45 هزار ده‌نگده‌رن بریار دایه‌ ده‌نگ ب پارتی دیموكراتی كوردستان بده‌ن و لایه‌نگرێن پارتی نه‌، چونكه‌ كوردێن شه‌به‌ك دو مه‌زه‌بن، سوننه‌ و شیعه‌، ئه‌وێن سوننه‌ هه‌موو سه‌ر ب پارتی نه‌ و ئه‌وێن شیعه‌ ژی پشكه‌كا وان سه‌ر ب پارتی نه‌، له‌وما دخوازین هه‌موو كوردێن شه‌به‌ك ده‌نگ ب پارتی بده‌ن، چونكه‌ پارتی تاكه‌ حزبه‌ داكۆكیێ ل مافێن هه‌موو پێكهاتان دكه‌ت و پشته‌ڤانیا وان دكه‌ت و دخوازیت ببیته‌ نوونه‌را وان ل به‌غدا”.

وه‌حیده‌ یاقو هۆرمز، نوونه‌را مه‌سیحیان ل خۆلا به‌رێ یا په‌رله‌مانێ كوردستانێ، دبێژیت” بۆ كۆتا مه‌سیحیان ل ده‌شتا نه‌ینه‌وا هژماره‌كا به‌ربژار یێن هه‌ین، به‌لێ كاری دكه‌ین و داخواز ژی ژ مه‌سیحیان دكه‌ین ده‌نگ ب وی به‌ربژارێ بده‌ن یێن نێزیكی پارتی، یان ژی ده‌نگ ب به‌ربژارێن پارتی بده‌ن، چونكه‌ تنێ پارتی د خه‌ما پێكهاتان دایه‌ و كاری بۆ ب ده‌ستڤه‌ئینانا مافی|َن پێكهاتان دكه‌ت، به‌لگه‌ ژی نوكه‌ خه‌لكێ ده‌شتا نه‌ینه‌وا ل هه‌رێما كوردستانێ ئاواره‌نه‌ و خزمه‌تا گه‌له‌ك باش بۆ وان ل هه‌رێما كوردستانێ دهێته‌ كرن”.

ژلایێ خوه‌ڤه‌، شێخ عومه‌ر، نوونه‌رێ به‌رێ یێ كوردێن ئێزدی ل جڤاتا پارێزگه‌ها نه‌ینه‌وا، گۆت” ل سنوورێ بازنێ دو پتریا كوردێن ئێزدی ل گه‌ل پارتی دیموكراتی كوردستان دانه‌ و پشته‌ڤانیێ ل پارتی دكه‌ن، ب تایبه‌ت به‌ربژارێ پارتی شێروان دوبه‌ردانی، چونكه‌ پتریا خه‌لكێ ده‌ڤه‌رێ پشته‌ڤانیێ ل به‌ربژارێن پارتی دكه‌ن، له‌وما پارتی دێ پتریا ده‌نگێن ده‌ڤه‌رێ ب ده‌ستڤه‌ئینیت”.

پتر رۆهنكر” كوردێن ئێزدی ل باشیكێ پشته‌ڤانیێ ل به‌ربژارێن پارتی ل بازنێ دو دكه‌ن و كاری بۆ سه‌رخستنا وان دكه‌ن، چونكه‌ دزانن پارتی خزمه‌تا پێكهاتان دكه‌ت و به‌رده‌وام ده‌رگه‌هێ كوردستانێ بۆ هه‌موو پێكهاتان بێ جوداهی یێ ڤه‌كریه‌” .

ئه‌ڤرۆ:

نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپی راگه‌هاند، ئه‌ڤرۆ سێشه‌مبی 7/9/2021، شانده‌كێ بلند یێ ئێكه‌تیا ئورۆپی ب سه‌رۆكایه‌تیا (جۆزیف بۆرێل) به‌رپرسێ سیاسه‌تا ده‌رڤه‌ و ئاسایشا ئێكه‌تیا ئورۆپی سه‌ره‌دانا هه‌ولێرێ كه‌ت و ل گه‌ل به‌رپرسێن بلند یێن هه‌رێما كوردستانێ كۆمبیت.

د. دلاوه‌ر خالد ئاژگه‌یی، نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپی، ل دۆر ئارمانج سه‌ره‌دانا شاندێ بلند یێ ئێكه‌تیا ئورۆپی، گۆت” جۆزێف بۆرێل به‌رپرسێ سیاسه‌تا ده‌رڤه‌ و ئاسایشا ئێكه‌تیا ئورۆپی ل گه‌ل شانده‌كێ بلند یێ ئێكه‌تیا ئورۆپی ئه‌ڤرۆ دێ سه‌ره‌دانا هه‌رێما كوردستانێ كه‌ن” زێده‌تر گۆت” بۆرێل خودان بلندترین پۆستێ ئێكه‌تیا ئورۆپایه‌ و نوونه‌راتیا هه‌ر 27 وه‌لاتێن ئه‌ندام د ئێكه‌تیا ئورۆپی دا دكه‌ت، سه‌ره‌دانا وی دێ بۆ ئیراقێ و هه‌رێما كوردستانێ بیت و دێ ل گه‌ل سه‌ركردایه‌تیا سیاسی یا هه‌رێما كوردستانێ كۆمبیت”.

نوونه‌رێ حوكمه‌تا هه‌رێمێ ل ئێكه‌تیا ئورۆپی ئاماژه‌ كر كو ئێكه‌تیا ئورۆپی ب گرنگی دنێریته‌ په‌یوه‌ندیێن خوه‌ ل گه‌ل هه‌رێما كوردستانێ، بێگومان ئه‌ڤ سه‌ره‌دانه‌ ژی د چارچۆڤێ ب هێزكرنا په‌یوه‌ندیێن د ناڤبه‌را هه‌ردولا دهێت، ل ده‌مێ شه‌رێ داعشێ ژی ئێكه‌تیا ئورۆپی و وه‌لاتێن ئه‌ندام تێدا هاریكارێن هه‌رێما كوردستانێ بوون ژ روویێ چه‌ك و ته‌قه‌مه‌نیێ و دابینكرنا فرۆكان و هنارتنا شیره‌تكارێن له‌شكری بۆ هه‌رێما كوردستانێ”.

سه‌باره‌ت گرنگیا سه‌ره‌دانا وی شاندێ بلند یێ ئێكه‌تیا ئورۆپی بۆ هه‌رێما كوردستانێ، د. دلاوه‌ر خالد ئاژگه‌یی، نوونه‌رێ حوكمه‌تا هه‌رێمێ ل ئێكه‌تیا ئورۆپی راگه‌هاند” هه‌لبژارتنێن پێشوه‌خت ل ئیراقێ یێن ل پێش كو بریاره‌ ل 10/10/2021 بهێنه‌ ئه‌نجامدان و ئه‌و روودانێن ل ده‌ڤه‌رێ روو دده‌ن و ئه‌و سه‌ره‌دانێن كو به‌رپرسێن وه‌لاتێن ئورۆپی بۆ هه‌رێما كوردستانێ ئه‌نجام دده‌ن، ئاماژه‌یه‌ بۆ رۆلێ گرنگ یێ هه‌رێمێ وه‌كو ناڤه‌نده‌كا گرنگ یا ئه‌منی و سیاسی ل ده‌ڤه‌رێ، له‌وما هه‌ر بریار و پێشهاته‌ك ل ده‌ڤه‌رێ ببیت، بێی دانوستاندن ل گه‌ل به‌رپرسێن هه‌رێما كوردستانێ یا سه‌ركه‌فتی نابیت”.

ناڤبری گۆت ژی” ئه‌و سه‌ره‌دانه‌ دێ بیته‌ پشته‌ڤانیه‌كا گرنگ یا ئێكه‌تیا ئورۆپی بۆ هه‌رێما كوردستانێ، هه‌روه‌سا هه‌رێما كوردستانێ ژی د نوكه‌ دا ل سه‌ر ئاسته‌كێ نێڤده‌وله‌تی یێ گه‌له‌گ بلند دانوستاندن دگه‌لدا دهێته‌ كرن، ئه‌ڤه‌ ژی پشته‌ڤانیه‌كا دیبلۆماسی و سیاسی یه‌ بۆ هه‌رێما كوردستانێ”.

دیدار، هۆشه‌نگ تاجر:

جێگرێ سه‌رۆكێ گشتی یێ پارتا سوسیالیست یا كوردستانێ ل باكور دیار دكه‌ت كو پارتا كۆماریا گه‌ل د هه‌لبژارتنێن سالا ٢٠١٩ دا ب ده‌نگێ كوردان شیا سه‌ركه‌فتنه‌كا مه‌زن تۆمار بكه‌ت، نها هه‌لوه‌ستێ جه‌هه‌پێ ل هه‌مبه‌ر كوردان هاتیه‌ گوهۆرین و خوه‌ نێزیكی كوردان دكه‌ن، ئه‌و یه‌ك ژی هه‌م بۆ هه‌رێما كوردستانێ و هه‌م ژی بۆ پرسا كوردی ل باكور گه‌له‌ك گرنگه‌.

بایرام بۆزیه‌ل جێگرێ سه‌رۆكێ گشتی یێ پارتا سوسیالیست یا كوردستانێ ل باكور PSK د دیداره‌كا تایبه‌ت دا ل گه‌ل رۆژناما ئه‌ڤرۆ دیار كر كو به‌ری نها هه‌لوه‌ستێ جه‌هه‌پێ ل هه‌مبه‌ر كوردان گه‌له‌ك توند بوو، دڤێت ژبیر نه‌كه‌ین كو جه‌هه‌په‌ پارتا كه‌مال ئه‌تاتوركی یه‌ و به‌ری نها وان گه‌له‌ك كارێن خراب ل دژی گه‌لێ كورد ل توركیا كرینه‌، لێ پشتی كو كه‌مال كچلدار ئوگلۆ وه‌كو سه‌رۆكێ جه‌هه‌پێ ده‌ست ب كار كری پێنگاڤ ب پێنگاڤ دڤێت هه‌لوه‌ست و سیاسه‌تا خوه‌ ل هه‌مبه‌ر كوردان بگوهۆرن، چونكو ئه‌و ژی باش دزانن هه‌ر هێزه‌كێ‌ بڤێت ل توركیا ببیته‌ ده‌ستهه‌لاتدار و سیاسه‌تێ بكه‌ت دێ پێدڤی ده‌نگێن كوردان بیت و گۆت: (د هه‌لبژارتنێن باژێرڤانیان یێ سالا ٢٠١٩ ل توركیا دا جه‌هه‌پێ شیا ب ده‌نگێن كوردان باژێرڤانیێن هه‌ری مه‌زن و گرنگ ژ ده‌ستێ ئاكپارتیێ ده‌رخینیت، بۆ هه‌ر كه‌سه‌كێ ژی ئاشكرایه‌ كو ل باژێرێن وه‌كو ئسته‌نبۆل و ئه‌نقه‌ره‌ جه‌هه‌په‌ ب ده‌نگێ كوردان سه‌ركه‌فت و ئه‌و یه‌ك ژی سه‌ركه‌فتنه‌كا دیرۆكی بوو، ئێدی ژ وێ رۆژێ هه‌تا نها پێنگاڤ ب پێنگاڤ جه‌هه‌پێ دڤێت پتر خوه‌ نێزیكی كوردان بكه‌ت).

ناڤهاتی ئه‌و یه‌ك ژی دیار كر كو سه‌ره‌دانا شاندێ جه‌هه‌پێ بۆ هه‌رێما كوردستانێ و هه‌ڤدیتنا وان یا ل گه‌ل سه‌رۆك بارزانی ژی نیشا دده‌ت كو جه‌هه‌پێ هه‌ست ب سه‌نگ و پێگه‌هێ كوردان كریه‌ و ئێدی ئه‌و ژی باش دزانن بێی كوردان سه‌ركه‌فتی نابن و گۆت: ( ئه‌ز سه‌ره‌دانا شاندێ جه‌هه‌پێ بۆ هه‌رێما كوردستانێ گه‌له‌ك گرنگ دبینم چونكو ئه‌و یه‌ك نیشا دده‌ت كو ئێدی ل توركیا بێی كوردان كه‌س نه‌شێت بهێته‌ سه‌ر ده‌ستهه‌لاتێ، ئانكۆ ئێدی بهایێ كوردان زێده‌تر لێ هاتیه‌، به‌ری نها گه‌له‌ك جاران دگۆتن كورد سیاسه‌تێ نزانن و سڤكاتی ب كوردان دكرن لێ نها به‌رێ خوه‌ دده‌نه‌ كوردان و خوه‌ نێزیكی كوردان دكه‌ن، ئه‌و یه‌ك ژی هه‌م بۆ هه‌رێما كوردستانێ گه‌له‌ك گرنگه‌ و هه‌م ژی بۆ چاره‌سه‌ركرنا پرسا كوردی ل توركیا ژی گرنگیه‌كا خوه‌ یا دیرۆكی هه‌یه‌).

جێگرێ سه‌رۆكێ گشتی یێ پارتا سوسیالیست یا كوردستان ل باكور ئه‌و یه‌ك ژی دیار كر كو سالا ٢٠٢٣ ل توركیا دێ هه‌لبژارتنێن سه‌رۆكاتیێ و یێ په‌رله‌مانی هێنه‌ كرن، لێ دبیت زووتر ژی هه‌لبژارتن برێڤه‌ بچن، ژ به‌ر هندێ هه‌ر ژ نها ڤه‌ گه‌له‌ك هێز به‌رهه‌ڤیێن خوه‌ دكه‌ن، هه‌ڤپه‌یمانا ملله‌ت یا ب سه‌رۆكاتیا جه‌هه‌پێ دڤێت ڤێجارێ ئاكپارتیێ ژ ده‌ستهه‌لاتێ دوور بكه‌ت، ئاكپارتی د ماوه‌یێ چه‌ند سالێن بۆری دا توركیا تووشی گه‌له‌ك قه‌یرانان كریه‌ و پێگه‌هێ خوه‌ یێ جاران د ناڤ جڤاكێ توركیا دا نه‌مایه‌، ئه‌و یه‌ك ژی بۆ هه‌ڤپه‌یمانا ملله‌ت ب تایبه‌تی ژی بۆ جه‌هه‌پێ ده‌لیڤه‌كا گه‌له‌ك گرنگه‌ دا بشێت بهێته‌ سه‌ر ده‌ستهه‌لاتێ و گۆت: (جه‌هه‌پێ دڤێت وه‌كو سالا ٢٠١٩ جاره‌كا دی ب پشته‌ڤانیا كوردان بهێته‌ سه‌ر ده‌ستهه‌لاتێ و ئاكپارتیێ ژی ژ ده‌ستهه‌لاتێ دوور بكه‌ت، ژ به‌ر هندێ ژی شاندێ جه‌هه‌پێ سه‌ره‌دانا هه‌رێما كوردستانێ كر و ئه‌و په‌یامه‌ دا كوردان كو وان دڤێت په‌یوه‌ندیێن خوه‌ ل گه‌ل كوردان باش بكه‌ن، بێگومان باشبوونا په‌یوه‌ندیێن كوردان ل گه‌ل جه‌هه‌پێ و هه‌ر هێزه‌كا دی ل توركیا بۆ كوردان ژی گه‌له‌ك باشه‌ و د خزمه‌تا چاره‌سه‌ركرنا پرسا كوردی دایه‌).

بایرام بۆزیه‌ل د پشكه‌كا دی یا ئاخڤتنا خوه‌ دا ئاماژه‌ ب هندێ ژی كر كو به‌رپرسێن ئاكپارتیێ ژ سه‌ره‌دانا شاندێ جه‌هه‌پێ بۆ هه‌رێما كوردستانێ دلگرانن، چونكو ئه‌و ژی باش دزانن ب پشته‌ڤانیا كوردان جه‌هه‌پێ دشێت ئاكپارتیێ تووشی ئاریشان بكه‌ت، ژ به‌ر هندێ ژی ره‌نگه‌ ئاكپارتیێ ژی هه‌لوه‌ستێ خوه‌ ل هه‌مبه‌ر كوردان بگوهۆریت ئانكۆ هه‌ڤڕكیه‌كا نوو د ناڤبه‌را وان دا دروست ببیت كو ئه‌و یه‌ك ژی بۆ كوردان ل هه‌رێما كوردستانێ و باكورێ كوردستانێ دێ گه‌له‌ك باش بیت و گۆت: (ئێدی ل رۆژهه‌لاتا ناڤین و توركیا كورد بوونه‌ خوه‌دان پێگه‌هه‌ك مه‌زن، بێی كوردان وه‌كو جاران كه‌س نه‌شێت سیاسه‌تێ بكه‌ت، ژ به‌ر هندێ ژی دڤێت كورد ژی بزانن كا دێ ب چ ره‌نگه‌كێ سه‌ره‌ده‌ریێ ل گه‌ل گوهۆرینێن نها ل ده‌ڤه‌رێ و توركیا كه‌ن).

ناڤهاتی د دووماهیا ئاخڤتنا خوه‌ دا ئه‌و یه‌ك ژی نه‌ڤه‌شارت كو هه‌ر هێزه‌ك بۆ به‌رژه‌وه‌ندیێن خوه‌ سیاسه‌تێ دكه‌ت، نها جه‌هه‌په‌ ژێ پێدڤی كوردانه‌ و دڤێت ب پشته‌ڤانی و ده‌نگێن كوردان ئاكپارتیێ ژ ده‌ستهه‌لاتێ دوور بكه‌ت، دڤێت كورد ژی شاره‌زا بن و بزانن كا دێ چاوا و ب چ ره‌نگه‌كێ سه‌ره‌ده‌ریێ ل گه‌ل ره‌وشا نوو ل ده‌ڤه‌رێ و توركیا كه‌ن، چونكو به‌ری نها كوردان گه‌له‌ك ده‌لیڤێن گرنگ ژ ده‌ست داینه‌ و دڤێت ڤێجارێ هه‌موو هێزێن كوردی وانان ژ روودانێن دیرۆكێ وه‌ربگرن و پێكڤه‌ بۆ به‌رژه‌وه‌ندیێن نه‌ته‌وه‌یی كار بكه‌ن.

ئه‌ڤرۆ:

په‌یڤدارێ پارتی و ئه‌ندامێ مه‌كته‌با سیاسی، مه‌حموود محه‌مه‌د، د خرڤه‌بوونه‌كێ دا ل دۆر گرنگیا راگه‌هاندنێ بۆ هه‌لبژارتنان، گۆتاره‌ك پێشكێش كر و ل پشكه‌كا ئاخڤتنێن خوه‌ دا راگه‌هاند، ئه‌م دژی ده‌مارگێریا نه‌ته‌وی نه‌ و مه‌ باوه‌ری ب پێكڤه‌ژیانێ یا هه‌ی، دشێین ژی نوونه‌راتیا هه‌موو ئیراقێ بكه‌ین نه‌كو ب تنێ كوردستانێ، ئارمانجا مه‌ ژی چاكسازی و به‌ر ب پێشڤه‌برنا جڤاكی یه‌.

مه‌حموود محه‌مه‌د، په‌یڤدار و ئه‌ندامێ مه‌كته‌با سیاسی یا پارتی دیموكراتی كوردستان، ئاماژه‌ ب وێ چه‌ندێ كر، مه‌ وه‌كو پارتی به‌ربژار دناڤ پتریا پێكهاتێن نه‌ته‌وی یێن جودا وه‌كو ئه‌ره‌ب، توركمان، كلدوئاشووری و نه‌ته‌وێن دی یێن جودا یێن هه‌ین، هه‌روه‌سا دناڤ ئاین و مه‌زه‌بێن جودا ژی مه‌ به‌ربژار یێن هه‌ین موسلمان، مه‌سیحی، ئێزدی، كاكه‌یی، سوننه‌ و شیعه‌ ژی.

دیاركر ژی كو دناڤ سه‌ركردایه‌تیا پارتا مه‌ دا ژی پێكهاته‌ و نه‌ته‌وێن جودا و فره‌ئاینێن جودا یێن هه‌ین، ئه‌ڤ چه‌نده‌ ژی بۆ بنه‌مایێن پارتی و باوه‌ریا وێ ب پێكڤه‌ژیانێ زڤراند.

په‌یڤدارێ پارتی گۆت ژی” پارتی باوه‌ری ب هزر و بۆچوونێن جودا یا هه‌ی، ئارمانجا مه‌ چاكسازی و پێشكه‌فتن و خزمه‌تكرنا خه‌لكی یه‌، ل پیناڤی به‌ر ب پێشڤه‌برنا جڤاكێ مه‌، ئه‌م نه‌كو تنێ هه‌رێما كوردستانێ، به‌لكو دشێین هه‌موو ئیراقێ ژی ب رێڤه‌ببه‌ین، له‌وما مه‌ به‌ربژار ل پتریا پارێزگه‌هان یێن هه‌ین”.

مه‌حموود محه‌مه‌د رۆهنكر ژی” هیچ ده‌مه‌كی شه‌رێ مه‌ ل گه‌ل ئه‌ره‌با نه‌بوو وه‌كو نه‌ته‌وه‌، ئه‌م دژی ده‌مارگێریێ و ته‌عه‌سوبا نه‌ته‌وی نه‌، به‌لكو كێشا مه‌ ل گه‌ل حوكمرانیان بوو، له‌وما ئه‌م داخوازا حوكمه‌ته‌كێ دكه‌ین كو باوه‌ری ب بنه‌مایێن دیموكراسیه‌تێ هه‌بیت ل پیناڤی خوه‌شگوزه‌رانیا هه‌موو نه‌ته‌وه‌ و پێكهاتێن جودا، نه‌كو مافێن وه‌لاتیان ل هه‌موو ئیراقێ بهێنه‌ پێشێلكرن و داهات ژی ببیته‌ چه‌كه‌ك ل هه‌مبه‌ر سینگێ هه‌ڤدوو بهێته‌ بكارئینان”.

هه‌روه‌سا گۆت” ئه‌م یێن دناڤ جڤاكێ خوه‌ دا و دزانین چاوان چاره‌سه‌ریا كێشێن خوه‌ بكه‌ین، له‌وما هه‌رده‌م ده‌رگه‌هێ دانوستاندنێ یێ ڤه‌كری بوو هه‌تاكو ل ده‌مێ خه‌باتا چه‌كداری ژی دا ده‌رگه‌هێ دانوستاندنێ نه‌هاتبوو داخستن، به‌لێ مخابن حوكمرانیێن ئیراقێ د وه‌سا نینن و ل شوینا چاره‌سه‌ریا كێشان، زێده‌تر لێ دكه‌ن، له‌وما ژی د نوكه‌ دا كێشه‌ ژ هه‌موو روویه‌كی ڤه‌ یێن كوورتر بووین، چونكی یێن كه‌فتینه‌ سه‌ر كێشه‌ و ئه‌زموونێن بۆری ژی دا”.

په‌یڤدارێ پارتی ل دووماهیا ئاخڤتنێن خوه‌ دا گۆت” بریار ئه‌وه‌ ل 11 ئه‌یلوولێ ب فه‌رمی ده‌ست ب هه‌وا هه‌لبژارتنان بكه‌ین”.

ژلایێ خوه‌ڤه‌، هه‌وار محه‌مه‌د، به‌رپرسێ هۆبا قانوونی ل ده‌زگه‌هێ هه‌لبژارتن یێ پارتی دیموكراتی كوردستان گۆت” ده‌ستپێكا هه‌وا هه‌لبژارتنان دێ ل هه‌ولێرێ بیت ب رێكخستنا كه‌رنه‌ڤاله‌كێ جه‌ماوه‌ری و ل لقێن دی یێن پارتی دێ ب هه‌مان شێوه‌ ده‌ستپێكه‌ت”.

گۆت ژی” پارتی گرنگیه‌كا تایبه‌ت ب ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ دده‌ت و دو نڤیسینگه‌هێن هه‌وا هه‌لبژارتنان ل كه‌ركووكێ یێن ڤه‌كرین و بریاره‌ ل نه‌ینه‌وا نڤیسینگه‌هه‌ك بهێته‌ ڤه‌كرن ودێ نڤیسینگه‌هێن زێده‌تر ژی هێنه‌ ڤه‌كرن”.

بۆ هه‌لبژارتنێن داهاتی یێن جڤاتا نوونه‌رێن ئیراقێ كو بریاره‌ ل 10/10/2021 بهێنه‌ ئه‌نجامدان، پارتی ل پارێزگه‌هێن هه‌ولێر، سلێمانیێ، دهۆك، هه‌له‌بجه‌، كه‌ركووك، نه‌ینه‌وا، سه‌لاحه‌دین، ئه‌نبار، نه‌جه‌ف كه‌ربه‌لا، واست و دیالا به‌ربژار یێن هه‌ین.