ئەڤرۆ نیوز، زنار تۆڤی:
پشتی دابەزینا په‌ترۆلێ ب رەنگەکێ بەرچاڤ، ئەڤرۆ رۆژا شەمبی رێكه‌فتى 23ى كانوونا دويێ 2016ێ بۆھایێ په‌ترۆاێ بلندبوونەکا باش ب خۆ ڤەدیت، بۆھایێ ھەر بەرمیلەکێ گەھشتە 32 دۆلاران.
ل دووڤ دووماھیک گۆھرینێن بازارێ نەفتێ بۆھایێ ئێک بەرمیلێ نەفتا خاڤا برێنت بوویە 32.12 دۆلارا، هەروەسا بۆھایێ ئێک بەرمیلا نەفتا خاڤ ژی بلندبوویە بۆ 32.23 دۆلاران.
ئەڤرۆ نێوز، زنار تۆڤی:
رێڤەبەرێ بەرھنگاریا تۆندوتیژیا دژی ژنان ل ھەولێرێ دبێژیت،دناڤ کەمپێن تایبەت یێن ئاواران،چەندین سکالا ھاتینە تۆمارکرن،دبێژیت شوودانا کچان ب زۆری و تۆندوتیژیا خێزانی دناڤ کەمپان دا ھەیە.
مۆقەدەمێ مافپەرەر ژیلەمۆ عەبدۆلقادر رێڤەبەرێ بەرھنگاڕیا تۆندوتیژیا دژی ژنان ل ھەولێرێ دبێژیت،مە زۆربەیا کەمپان ھۆبە ھەنە،بتایبەتی د کەمپا کەورگوسک و بەحرکێ ئەڤ دیاردە ب رەنگەکێ بەرچاڤ ھەیە،ھەر چەندە رێکخراوێن نێڤدەولەتی ھەریکاریا مە دکەن ل بابەتێ تۆندوتیژیا د ژی ژنان دناڤ کەمپاندا.
ناڤھاتی دیاردکەت ژی، زۆر جار کێشێن تۆندوتیژیێ و ب زۆری شوودانا کچان دناڤ کەمپان دا ھەیە،بەلێ سکالا تۆمارناکەن و دناڤ خۆدا چارەدکەن، ئەم بەردەوام ب رێیا ھۆبێن خۆ و ڤەکۆلەرێن جڤاکی دناڤ کەمپاندا چاڤدێریا کارێن تۆندوتیژیێ دژی ژنان دکەین.
ئەڤرو نیوز، بارزان مزووری:
ل سالا 2014ێ 11 رۆژان به‌نداڤا مووسل كه‌فته ده‌ست چەکدارێن تیرورستێن، پاشان ژ لايێ پێشمەرگەیێن کوردستانێ ب ھەڤکاری د گەل فروکەیێن ھەڤپەیمانا دووبارە ھاتە کونترول کرن و کەفتە لبن کونترولا پێشمەرگەی.
وەزارەتا دەرڤە یا ئەمریکا راگەھاند، بەنداڤا مووسل بەر ب مەترسیێ ڤە دچیت ژ بەر دەرنەکەفتنا ئاڤا وێ نەدانانا چ ژێده‌رێ ئابووری وەکو کارگەھان یان چ ژێدەرێن دی یێن پروژێن ئاڤێ بو چ باژێرێن دی بەرەڤ مەترسیەکا مەزن دچیت بو سەر پارێزگەھا تکریت و مووسل و سامەرا ژیانا ملیونەھا کەسا د ئێخستیە مەترسیێ دا.
مالپەرێ بی بی سی دا دیار کریە کو دو ئەگەرێن سەرەکی پتر مەترسی خستیە سەر ژ وانا نەبونا چ ژێدەرێن دارایی ژبو نوێژەنکرن و بەرفرەکرنا بەنداڤێ و ئەگەرێ ململانێ دناڤبەرا حکومەتا بەغدا و حکومەتا ھەرێما کوردستانێ ،ژمارا کارمەندێن بەنداڤێ ژی بەرەڤ کێم بونێ چوینە ژبەر نەدانا موچێن وان یێن پێنج ھەیڤان .
ژ بوو مفا وه‌رگرتن ژ ئاڤێ و ب كارخستنا وێ د خزمه‌تا وه‌لاتيان دا، ل سالا 1984ێ به‌نداڤا مووسل هاتيه دروستكرن.
.
ئەڤرۆ نیوز، زنار تۆڤی:
رێکخراوا لێبۆرینا نێڤدەولەتی دیاردکەت کو ئوپەراسیۆنێن سەربازی ل دەڤەرێن باکوورێ کوردستانێ بووینە هوکارێ سەپاندنا ب زۆری و قەدەغەیا هاتنوچوونێ و نەبوونا ئاڤێ و خزمەتگۆزاریێن پزیشکی و گەهشتیە ئاستێ ب سزادانا کۆمەل یا مللەتێ کورد.
هەروەسا ئەو راپۆرتە بدرێژاهی بەحسێ باکوورێ کوردستانێ دکەت و دبێژیت:پشتی مە لێکۆلینەکا مەیدانی ئەنجامدای کو خەلکەکێ زۆر ب ئەگەرێ شەری و سەپاندن و ئازاردانێ و دەمارگیریێ و زیان ڤێ کەفتییە و کو ئەو خەلک هەمی کوردن و ئەڤ رێکخراوە هۆشداریێ ددەتە تورکیا.
هەروەسا دبێژیت،کارەکێ ب زەحمەتە چاڤدێرێن نێڤدەولەتی بشێن بچنە ناڤ باژێرا و هێرشێن تورکیا بۆ سەر باژێر و باژێرکێن کوردستانێ ئاشکرا بکەن،ددەمەکی دا 200 هزار کەس د مەترسیێ دانە هەتاکو سزادانا ب کۆمەل.
جۆن دالهۆزن رێڤەبەرێ بەرنامێ و ئورۆپا و ئاسیا ناڤەراست دیارکریە،برینا خزمەتگۆزاریێن ئاڤ و کارەبێ و مەترسیێن خوارنێ و خزمەتگۆزاریێن تەندروستی دناڤا ئاگری دا ئاماژەیەکە بۆ وێرانکرنا خەلکێ و ئەگەرێ هندێ هەیە کو هەکە زوو نەهێتە چارەکرن ب ئێکجاری دێ ژ دەست چیت.
ئەڤ رێکخراوە زێدەتر دبێژیت:هێزێن تورکیا چەکێن قۆرس و قەناسەیان بکاردئینن،ژبەر مەترسیا رەوشێ گەلەک ژ چاڤدێرێن نێڤدەولەتی بۆ وان جهان یێن هاتینە قەدەغەکرن.
جۆن دالهۆزنی ئەوژی گۆتیە،دڤێت دەسهەلاتا تورکی رێو شوێنێن پێدڤی و ئاسایشێ بەرامبەر مافێن مرۆڤی بکاربینیت.
ئه‌ڤرۆ نيوز:
مه‌سعود بازرانى، سه‌رۆكێ هه‌رێما كوردستانێ راگه‌هاند سه‌ربه‌خۆيا كوردستانێ ژ هه‌موو ده‌مان نێزيكتر بوويه. داخواز ژى ژ سه‌ركردێن جيهانێ كر كو دانپێدانێ ب شكه‌ستنا رێكه‌فتناما سايكس-بيكور دا بينن و هزر ل رێكه‌فتنه‌كا نوو بۆ رۆژهه‌لاتێ ناڤه‌رست بكه‌ن.
د هه‌ڤپه‌يڤينه‌كێ دا ل گه‌ل ميديا بريتانى، بارزانى سه‌ركردێن جيهانێ پال دده‌ت كو رێكه‌فتنه‌كا نوو بهێته كرن كو رێ بۆ دامه‌زراندنا ده‌وله‌تا كوردى خۆش بكه‌ت. سه‌رۆكێ هه‌رێما كوردستانێ يێ گه‌شبينه كو “كۆمه‌لگه‌ها نێڤده‌وله‌تى نێزيكه دێ هێته سه‌ر وێ باوه‌ريێ كو هه‌ردو ده‌وله‌تێن عيراق و سوريا نوكه ب ئێكگرتى نامينن”.
بارزانى ئاماژه ب وێ چه‌ندێ ژى كر كو سه‌ركردێن جيهانێ ژى يێن گه‌هشتينه وێ باوه‌ريێ كو سايكس-بيكۆ ب دووماهى هات چ ئه‌و بهێن و چ ژى نه‌بێژن، چ په‌سه‌ند بكه‌ن يان نه، راستيێن سه‌ر ئه‌ردێ ژيوارى ئه‌وێ چه‌ندێ د سه‌لمينن، به‌لێ يا ئاشكه‌رايه كو ديبلۆماتكار و كه‌سانێن موحافز و هه‌لسه‌نگاندنكار دێ د قووناغا دووماهيێ دا ئاشكه‌را كه‌ن”، به‌لێ وه‌كو بارزانى به‌حس دكه‌ت “.
بارزانى بۆ ميديا بريتانى هوشداريا وێ چه‌ندێ ژى دده‌ت “مانا نه‌خشێ ده‌ڤه‌رێ ب وى ره‌نگێ نوكه، ئه‌گه‌ره بۆ پارچه‌بوونا زێده‌تر و وێرانكرنا زێده‌تر يا ده‌ڤه‌رێ”. ده‌رباره‌ى سه‌ربه‌خۆيا كوردستانێ ژى بارزانى گۆت: “سه‌ربه‌خۆيا كوردستانێ كو بۆ چه‌ندين ده‌هايه هيڤى و ئومێدا كوردان بوويه و ب دژوارى ژ لايێ هه‌ڤسۆيێن خوه ل ده‌ڤه‌رێ دژايه‌تى لێ دهاته كرن، نوكه ژ هه‌موو ده‌مان نێزيكتره”.
ژ به‌ر هندێ ژى سه‌رۆكێ هه‌رێما كوردستانێ داخواز دكه‌ت “هێزێن هه‌رێمى و جيهانى كار بۆ گه‌هشتنا رێكه‌فتنه‌كا نوو بكه‌ن كو تێدا پێكهاتێن عيراق و سوريا ب پارێزن. چونكو پارچه‌بوون د وان كۆمه‌لگه‌هان دا لايه‌نێ جڤاكى و ئاينى و تايفه‌گه‌رى دا گرتيه”، وه‌كو بارزانى به‌حس ژى كرى، ئه‌ڤه پێگرى نه‌كرن ب رێكه‌فتناما سايكس-بيكۆ يه و گۆت: “چو لوژيك نينه، ئه‌زمونه‌كا خه‌له‌ت بهێته دوورباره كرن كو بۆ ماوێ 100 سالان دووباره ببيته‌ڤه و چو نه‌گه‌هيت”.
ده‌رباره‌ى پارچه‌بوونا عيراقێ ژى سه‌رۆك بارزانى د ڤێ ديدارێ دا دبێژيت: “نوكه عيراق نێزيكه دێ پارچه بيت، ئه‌م ژ وێ پارچه‌بوونێ د به‌رپرس نينين، هه‌ڤدژى وێ چه‌ندێ، وه‌كو كورد، مه گه‌له‌ك بزاڤ بۆ پاراستنا ئێكه‌تيا عيراقێ و پرۆسا ديموكراسى دان”.
بارزانى ئه‌و داخوازى ژى ب نه‌راست دانه زانين كو دبێژن پێدڤيه عيراق پرۆسه‌يا لێبۆرينا هه‌ڤشێوێ باشوورێ ئه‌فريقيا د وێ ئه‌زموونێ دا ب بوريت. پشتى سالا 2003ێ مه روو كريه به‌غدا و مه گه‌له‌ك بزاڤ كر كو ئاشتبوونا نشتيمانى ژ رێيا دستوورى ڤه. به‌لێ كێشه د وێ چه‌ندێ دايه كو عيراقێ كلتۆرێ پێكڤه‌ژيانێ نه‌مايه. ده‌مێ نه‌شێين پێكڤه بژين، باشتر وه‌سايه ل دووڤ هه‌لبژارتنێن دى دا بگه‌رين”.
ئەڤرۆ نیوز، زنار تۆڤی:
حەیدەر عەبادی سەرۆک وەزیرێن عێراقێ ل کۆربەندا ئابووریا جیھانی ل داڤۆس پانێلەک سەبارەت رەوشا عێراقێ و چەکدارێن تیرۆرستێن داعش ئەنجامدا و تێدا دیارکر،زۆربەیا خۆ کۆژان ژدەرڤەی عێراقێ ھاتینە و کریارێن تیڕۆرستی ل عێراقێ ئەنجام ددەن، ھەروەسا ئۆپەراسیۆنا کونترۆلکرنا روومادی ژی ل قۆناغێن دۆماھیێ دانە.
ناڤھاتی گۆت ژی،ل عێراقێ ھەمی کەس دژی داعش شەری دکەن،لێ رێژەیا چەکدارێن داعش و شیدەتا وان د زێدەبوونێ دایە ھەروەسا مەترسیا داعشێ ل سەر عێراقێ یا بەردەوامە و دیسا رێکخراوا داعش بوویە ئەگەرێ لاوازبوونا رەوشا دارایی و داھاتێ عێراقێ.
ئه‌ڤرۆ نيوز:
د په‌يامه‌كێ دا، كوليژا په‌روه‌ردا بنيات ئامێديێ راگه‌هانديه كو ئه‌و دێ ل دووڤ هنده‌ك مه‌رجێن ده‌ستنيشانكرى دێ قوتابيان وه‌رگريت.
ده‌قێ ئاگه‌هداريێ:
ئــــاگـــەھداری بو وان قوتابێن ژ پولا (٦) بدوماھی ھاتین و تا نھا ل چ زانکو و پەیمانگەھان نەھاتینە وەرگرتن:
ئاگەھداریا ھەمی قوتابێن دەروچیێن پولا (٦) ئامادەی دکەین کو ئەوێن بدوماھی ھاتین و تا نھا ل چ زانکو و پەیمانگەھێن ھەرێمێ نەھاتینە وەرگرتن کو دەرگەھێ کولیژا پەروەردا بنیات ئامێدیێ ھاتە ڤەکرن بو وان قوتابیان لدویڤ ڤان رێنمایان
*-قوتابی دەرچویێ ئاماەی بیت ھەردو تایێن(زانستی وێژەی)
*قوتابی دەرچویێن سالا خاندنێ (٢٠١٠-٢٠١١) و تا نوکە بی
* مەرجە ژیێ وی( ٤٥) سالا نەبوریت بیت
*قوتابی دێ ھەتا کێمتر (٣٥) نمرا ن ژکێمترین کو لدیف پلانا ناڤەندنا وەرگرتنا قوتابیان ھاتیە وەرگرتن ل ھەر پشکا زانستی دێ مافێ پێشکێشکرنێ ھەبیت
*ڤەگوھاستن ژ ئێڤاریان بو سپێێدەھیان ب چ رەنگان نابیت
*دەرمالە وپشکێن ناڤخوی نابن
* بو پاشئێخستنا ھەر سالەکا خاندنێ دێ ٣٠% کریا خاندنێ یا وێ سالێ دەت
* خاندنا ئێڤاران دێ ١٠٠% بو خەلکێ دەڤەرێ بیت
*ھەتا کو قوتابی ھەمو پارێ کریا خاندنێ نەدەت دەست ب خاندنێ ناکەت و دێ سوزنامەکێ ئیمزا کەت کو پارە ناھیتە ڤەگەراندن
*ھەمو پێتڤێن تومارکرنێ وەک زانکویێن ھەرێمێ دێ دگەل خو ئینیت بو کارێت بیتڤی
*دوماھیک ژڤا نبو پێشکێشکرنا ناڤان ٢٨/١/٢٠١٦ بیت ل کولژیا ناڤبری
*پشکا ئنگلیزی بەشێ وێژەی و زانستی نمرا گشتی (٤٧٧) بیت
* پشکا کومەلایەتی بەشێ وێژەی و زانستی(٤٤٣) بیت
ئەڤرۆ نیوز، زنار تۆڤی:
وەزارەتا بەڕگریا عێراقێ ددەتە دیارکرن کو ل ناڤەراستا ئەڤ سالە شەرێ ئازادکرنا باژێرێ مۆسل دێ دەستپێکەت.
خالد عوبێدی وەزیرێ بەرگریا عێراقێ د دیمانەیەکێ دا دەربارەی ئازادکرنا باژێرێ مۆسلێ دبێژیت: پرۆسا ئازادکرنا باژێرێ مۆسلێ ژ دەستێ داعش ژلایێ هێزێن عێراقی ڤە،بۆ ناڤەراستا ئەڤ سالە دێ دەستپکەت،لێ دەمێ ئۆپەراسیۆنێ نەهاتیە دیارکرن.
عوبێدی ئاماژە ب هندێ ژی دایە کو شەرێ ئازادکرنا مۆسل دێ گەلەکێ گران بیت و وەکی کونتڕۆلکرنا باژێرێ رۆمادی نابیت. هەروەسا ئەڤە پترە ژ سال و نیڤان ئەڤ باژێرە هاتیە داگیرکرن و هەتانوکە نەهاتیە کونتڕۆلکرن.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو دێ پێله‌كا به‌فر و بارانێ ب سه‌ر هه‌رێما كوردستانێ دا هێت و ژ ئه‌نجامێ ڤێ چه‌ندێ هه‌ر ژ رۆژا پێنجشه‌مبى 21ى كانوونا دويێ و هه‌تا رۆژا پێنجشه‌مبى 28ى كانوونا دويێ دێ يا به‌رده‌وام بيت و پلێن گه‌رمێ ژى دێ نزم بن.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه‌كريه، ئاماژه ب وێ چه‌ندێ كريه كو ئه‌سمانێ هه‌رێمێ هه‌تا رۆژا شه‌مبى دێ يێ نيڤ ئه‌ورى بيت و ل هنده‌ك ده‌ڤه‌ران بۆ ساهى و هنده‌ك ئه‌ورێن كێم هێته گوهۆڕين.
خۆيا ژى كر كو ل هه‌مان رێكه‌فت دێ گۆڕين ب سه‌ر كه‌شوهه‌وايێ هه‌رێمێ دا هێت و كه‌ڤيته به‌ر كارتێكرنا “قشارێن نزمێن ده‌ريا ناڤه‌راست و فشارێن نزمێن ده‌ريا سۆر ل گه‌ل هه‌وايه‌كێ گه‌له‌ك سار يێ جه‌مسه‌رى” كارتێكرنا ڤێ شه‌پۆلێ ژى دێ كارتێكرنێ ل سه‌ر هه‌موو ده‌ڤه‌رێن هه‌رێما كوردستانێ كه‌ت.
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ به‌حس ل وێ چه‌ندێ ژى كريه كو باران بارين دێ هه‌موو ده‌ڤه‌ران گريت و ل پتريا ده‌ڤه‌رێن چيايى و نێزيك چيايى دێ به‌فر باريت ل گه‌ل نزمبوونا پلێن گه‌رمێ بۆ بن سفرێ ل هنده‌ك ده‌ڤه‌ران.
ده‌رباره‌ى ناڤ باژێران ژى دايه زانين كو كارتێكرنا وى پارسته هه‌واى دهێته پێشبينيكرن ل سه‌نته‌رێ پارێزگه‌هێن دهۆك، سلێمانى و هه‌له‌بچه به‌فر ببياريت، “كارتێكرنا ڤێ شه‌پۆلێ ژى هه‌تا رۆژا پێنجشه‌مبى رێكه‌فتى 28ى كانوونا دويێ دێ يا به‌رده‌وام بيت”.
نيشاندان