ئەڤرۆ:

سیاسەتمەدار و ئەندامێ بەرێ یێ جڤاتا نوونەرێن عیراقێ، مەسعود حەیدەر، ل دۆر ھێرشێن مووشەکی یێن بەری دو شەڤان ل سەر دەڤەرا کەسک ل بەغدا گۆت” بەردەوامبوونا وان ھێرشان دسەلمینن کو ل عیراقێ تشتەک نینە ب ناڤێ دەولەت”.

مەسعود حەیدەر گۆت ژی” عیراق ب ھەموو دەزگەھێن خوە یێن ئاسایشێ و بەرگریێ، ب ھەموو حزب و سەرکردێن خوەڤە نەشێت رێ ل بەر ئەنجامدانا وان ھێرشان بگری تکو ژ لایێ میلیشیێن ژ دەرڤەی قانوونێ دژی دەڤەرا کەسک ل بەغدا دھێنە ئەنجامدان”.

دیارکر ژی” ئەڤ ھێرشێن مووشەکی یێن بەردەوام، نەبوونا دەولەتێ ل عیراقێ ب شێوەکێ دیار یا سەلماندی”.

ئەو پەرلەمانتارێ بەرێ پرسیار دکەت و دبێژیت” ئایا چ ھێزەک ل پشت ئەنجامدانا ڤان ھێرشایە کو ژ ھەموو دەستھەلات و حزبان ل عیراقێ و دەولەتا عیراقێ ب خوە ژی ب ھێزترە؟”.

ئەڤرۆ:

سەرۆکێ حوکمەتا ھەرێما کوردستانێ ھوشداریا وێ چەندا دا کو نوونەراتیێن دبلۆماسی ل عیراقێ یێن ل بەردەم گەفەکا مەزن دا ودەمێ وێ چەندێ یێ ھاتی ئێمناھیا وان بھێتە پاراستن، چونکە ئەو بۆ روو ب رووبوونا تیرۆرێ و ئاڤەدانکرنا عیراقێ یێن ھاتین.

مەسرور بارزانی، سەرۆکێ حوکمەتا ھەرێما کوردستانێ، د تویتەکی دا ئەو ھێرشا مووشەکی ل سەر بالیۆزخانا ئەمریکی ل بەغدا  شەرمزارکر.

سەرۆکێ حوکمەتا ھەرێمێ د پەیاما خوەدا ئاماژە ب وێ چەندێ کر کو گەفەکا مەزن ل سەر نوونەراتیێن دبلۆماسی ل عیراقێ یا ھەی، ل دەمەکی دا ئەو بۆ روو ب رووبوونا تیرۆرێ و ئاڤەداکرنا عیراقێ یێن ھاتین.

مەسرور بارزانی داخواز ژ حوکمەتا فیدرالی یا عیراقێ کر گاڤین پێدڤی بۆ پاراستنا نوونەراتیێن دبلۆماسی ب ھاڤێژیت و ب ئێکجاری دووماھیێ ب وان ھێرشان بینیت.

دھێتە زانین، ل شەڤا ٢٢ ڤێ ھەیڤێ میلیشیان ھێرشەکا مووشەکی دژی بالیۆزخانا ئەمریکی ل بەغدا ئەنجامدا، ئەو ھێرشە ژی پشتی وێ چەندێ ھات کو ل ھەولێرێ ھێرشەکا ھەڤشێوێ وێ ھاتە ئەنجامدان کو قوربانی ھەبوون، گرۆپەکێ میلیشیا یکو خوە ب شوینگرێن قاسم سلێمانی دانایە و سەر ب ئیرانێ ڤەیە، ھەر د شەڤا وێ ھێرشێ دا بەرپرسیارەتیا خوە ژ وێ کریارا تیرۆرستی راگەھاند.

ژلایێ خوەڤە، نید برایس، پەیڤدارێ وەزارەتا دەرڤە یا ئەمریکی د کۆنگرەکێ رۆژنامەڤانی دا ل واشنتۆن راگەھاند” ئەم ھەست ب تۆرەبوونەکا مەزن دەربارەی ھێرشا ل ل سەر ھەولێرێ دکەین و ل دەمەکێ گونجای ب ھەماھەنگی ل گەل ھەڤپشکێن مە ل عیراقێ و ھەڤپەیمانیا نێڤدەولەتی، دێ بەرسڤا وێ ھێرشێ دەین”.

برایس گۆت ژی” ھێشتا یێ کار دکەین بۆ وێ چەندێ بزانین کێ ئەو ھێرشە ئەنجامدایە، بەلێ مە پێشتر دووپاتی کریە کو ئیران بەرپرسە ژ کریارێن وان گرۆپێن کو ھێرشان دکەنە سەر ئەمریکیان”.

ئەڤرۆ:

ژێدەرێن میدیایی ل رۆژئاڤایێ کوردستانێ دیار دکەن کو چەند رۆژن روسیا بنگەھێ خوە یێ سەربازی ل عەین عیسا و ھەروەسا دو بنگەھێن دی ژی ل قامشلۆ چۆل کریە و ھێزێن خوە ل دەڤەرێن دی یێن سووریێ بجە کرینە و ئەو یەک بوویە جھێ دلگرانیا وەلاتیێن رۆژئاڤایێ کوردستانێ.

ژێدەرێن میدیایی یێن رۆژئاڤایێ کوردستانێ دیار دکەن کو روسیا بنگەھێ سەربازی یێ عەین عیسا چۆل کریە و ھەروەسا ل باژێرێ قامشلۆ ژی روسیا دو بنگەھێن خوە یێ سەربازی چۆل کرینە و ھێزێن خوە ل دەڤەرێن دی یێن سووریێ بجە دکەت، ھەتا نھا بەرپرسێن سەربازی یێن روسیا ل دۆر ھندێ چو داخۆیانیێن فەرمی بەلاڤ نەکرینە و بەرپرسەکێ ھێزێن سووریا دیموکرات ژی بۆ ئاژانسا فرات دیار کریە کو ئەو نزانن کا روسیا دڤێت ھێزێن نوو ل وان بنگەھان بجە بکەت یان ژی دێ ھەر وەسا مینن، لێ رەنگە ئەو یەک ژ بەر ناکۆکیێن نوو یێن د ناڤبەرا روسیا و ئەمریکا دا بن.

ئاژانسا سپوتینگ یا روسی ژی بەری دو رۆژان دیار کربوو کو داعش ل چەندین دەڤەرێن جودا جودا ل سووریێ ب ھێز بوویە و روسیا ژی بزاڤا ھندێ دکەت کو رێگریێ ل ب ھێزبوونا داعشێ بگریت و نەھێلیت کو داعش وەکو سالێن بۆری ھندەک دەڤەرێن گرنگ و ستراتیژی ل سووریێ کۆنترۆل بکەت و ژ بەر ھندێ ژی دبیت روسیا ھندەک ھێزێن خوە ل باکورێ سووریێ ببەتە دەڤەرێن دی یێن سووریێ.

چاڤدێرێن سیاسی ژی دیار دکەن کو ناکۆکیێن نوو د ناڤبەرا ئەمریکا و روسیا دا ل دۆر پاشەرۆژا سووریێ ھەنە و ھەروەسا نھا روسیا دەست ب بزاڤەکا مەزن کریە دا کو کورد و شام دەست ب گەرەکا دی یا دانوستاندنان بکەن و پرسێن د ناڤبەرا خوە دا چارەسەر بکەن، چونکو روسیا دڤێت ئاستەنگیان ل ھەمبەر ستراتیژیا نوو یا ئەمریکا ل سووریێ و رۆژئاڤایێ کوردستانێ دروست بکەت، روسیا نەڤێت ئەمریکا ھاریکاریا کوردان بکەت و حەفتیا بۆری ژی سیرگێی لاڤرۆڤ وەزیرێ دەرڤە یێ روسیا راگەھاند کو ھاریکاریێن ئەمریکا بۆ ھێزێن سووریا دیموکرات گەلەک زێدە بووینە و پشتی کو جۆ بایدن وەکو سەرۆکێ ئەمریکا دەست ب کار کری ئەمریکا پتر ھاریکاریا ھێزێن سووریا دیموکرات دکەت و ئەمریکا دڤێت ئاخا سووریێ پارچە بکەت، ھەکە تشەک وەسا ھەبیت ئەو یەک دێ بیتە ئەگەرێ ھندێ کو ئالۆزیێن نوو ل سووریێ دروست ببن و دڤێت ئەمریکا کار بۆ چارەسەریا سیاسی ل سووریێ بکەت.

ئەو یەک د دەمەکێ دایە کو بەری نھا مەزلوم عەبدی فەرماندارێ گشتی یێ ھێزێن سووریا دیموکرات راگەھاند کو وان دڤێت پەیوەندیێن خوە ل گەل ئەمریکا و روسیا باشتر لێ بکەن، چونکو ھەڤسەنگیەکا ھێزێ ل سووریێ دروست بوویە و ژ بەر ھندێ ژی دھێتە خواستن کو کورد پەیوەندیێن خوە ل گەل ھەر دو وەلاتان باشتر لێ بکەن.

فەرماندارێ گشتی یێ ھێزێن سووریا دیموکرات ھەروەسا راگەھاند کو ئەو وەکو ھێزێن سووریا دیموکرات نھا ل گەل ئەمریکا پێکڤە ل سەر بەرنامەکێ ھەڤپشک کار دکەن و ئەمریکا ژی دڤێت داعش و گرۆپێن دی یێن تیرۆرستی ل سووریێ نەمینن و د چارچۆڤێ شەرێ ل دژی داعشێ دا ژی ئەمریکا بریار دایە کو پتر ھاریکاریا کوردان و ھێزێن سووریا دیموکرات بکەت، ژ بەر ھندێ ژی دبیت ئەمریکا ھندەک بنگەھێن نوو یێن سەربازی ژی ل رۆژئاڤایێ کوردستانێ و باکورێ سووریێ ئاڤا بکەت.

دھۆک، لەزگین جوقی

ھەر رۆژەکا بجھئێنانا رێککەفتنا ھەرێمێ و بەغدا بۆ ئاسایێکرنا رەوشا شنگالێ گیروببیت، مەترسیەکا مەزنتر ل سەر وی باژێری پەیدا دبیت

فەرماندەکی فەرماندەیا شنگال ب سەر ھێزێن پێشمەرگەی کوردستانی راگەھاند، پێشمەرگێ کوردستانێ ل مەزارگەھێ شەرفەدەین د ئامادەباشیێ دایە بۆ ھەر پێشھاتەکا نەچاڤەریکری ل شنگالێ رووبدەت و دێ خەلکێ خوە کەن پارێزن.

میرزا خەلەف،  فەرماندە ل فەرماندەیا شنگالێ یا پێشمەرگەی گۆت” لڤینێن داعشێ  بووینە جھێ مەترسیێ ل سەر شنگالێ و دەشتا نەینەوا کو چەکدارێن داعشێ لڤینێ دکەن د ناڤبەرا رۆژئاڤایێ کوردستانێ و شنگالێ دا ئەڤە ژی پشتی وێ چەندی پەیدابوویە کو ھێزەکا زۆر یا حەشدا شەعبی ھاتیە شنگالێ وسستبوونەک د سنورێ شنگالێ دگەل رۆژئاڤایێ کوردستانێ دا چیبوویە وھەر رۆژەکا بجھئێنانا رێککەفتنا ھەرێمێ و بەغدا بۆ ئاسایێکرنا رەوشا شنگالێ گیروبیت، مەترسیەکا مەزنتر ل سەر شنگالێ پەیدا دبیت”.

گۆت ژی” خەلکێ شنگالێ چاڤەرێنە رێککەفتنا شنگالێ بھێتە بجھئینان وپێشمەرگە ڤەگەریتە شنگالێ تاکو پاراستنا خەلکێ شنگال بھێتە کرن و ژ رەوشا خراب رزگارببن چونکو بێ پێشمەرگەی چو جاران رەوشا شنگالێ باش نابیت”.

خودێدا حسێن، موختاری گوندێ (وەردیە) ل قەزا شنگالێ دیارکر” رەوشا شنگالێ یا باش نینە و ترس بۆ وەلاتیێن ڤەگەریاینە شنگالێ چیبوویە”.

خویاکر” چەند گرۆپێن ب سەر حەشدا شەعبی ڤە ل شنگالێ  گەلەک ترس بۆ خەلکێ ڤەگەریاین شنگالێ دروستکریە و تشتەکێ ژ چارەنڤیسێ خوە نوزانن و ھەر جھەکێ حەشد ھاتە تێدا چوول ناکەت”.

گۆت ژی” باشترە خەلکێ شنگالێ بیژنە گرۆپێن نەشەرعی، شنگال چوول بکەن،  چونکو ب ھەبوونا وان گرۆپان دناڤ  شنگالێ دا مەترسی ھەیە تورکیا بھێتە شنگالێ وئەڤە چەند جاران تورکیا گەفێن ھێرشکرنێ ل سەر شنگالێ دکەت وئەڤە بوویە جھێ ترسەکا مەزن بۆ خەلکێ ڤەگەریایە شنگالێ”.