ئەڤرۆ نیوز:
جەمال کوچەر ئەندامەکێ جڤاتا نونەرێن عیراقێ ل سەر لیستا ئێکگرتوو ئیسلامی راگەھاند، راستە مەھەلویستێ ب کۆم نەبوویە لێ مە ھەولیستێ تاک ھەبوویە و چەندین جاران مە بەحس کریە و بەریا چەند رۆژەکێن کێم ژی مە بەحسا ڕیفراندۆمێ کر، ھندەک ئەندامێن دی ل جڤاتا نونەرێن عیراقێ گۆت ددستوورێ عیراقێ دا ئەڤ چەندە نابیت.
جەمال کۆچەر ئەندامێ جڤاتا نونەرێن عیراقێ بۆ رۆژناما ئەڤرۆ گۆت” مە ھێشتا بابەتێ ڕیفرادۆمێ گەرم نەکریە ل بەغدا، پێدڤیە ل دەستپێکێ حوکمەتا ھەرێمێ بریار بدەت و ل دووڤ دا، خەلکێ ھەرێمێ بریارێ بدەن، پشتی حوکمەتا ھەرێمێ و خەلکێ ھەرێمێ، دێ ڕولێ مە ھێت وەکو نوونەرێن کورد ل بەغدا, ھەکە کۆمکرنا دەنگان بیت ل جڤاتا نونەران، دێ شێین کۆم کەین و مە شیانێن ھەین رێژا پێدڤی کۆم بکەین و ھەکە دانانا ھندەک مادێن قانوونی و دستووری بیت، دێ کارکەین بۆ دانانا وان, بەلێ مە نوکە چو ڕول نابن ھەتا سەرکردایەتیا کوردی بریارێ بدەت”.
جەمال کوچەری ھێشتا دیارکر “مە بناغە بۆ سەربخوەیێ ل بەغدا یێ دروست کری و مە بۆ سونا و شیعا یا دایە دیارکرن کۆ ل دووماھیێ چارە ھەر ئەڤەیە بۆ ھەوە و بۆ مە ژی، بەلێ مادەم مافێ مەیە پێدڤیە ئەم چاڤەڕێی چو وەڵاتان نەبین، چ پێ باش بیت، یان پێ باش نەبیت، بەلێ پشتی دەمەکی دێ ئەو رازی بن و دانپێدانێ پێکەن.
ناڤبری ئەو چەندە ژی دیارکر کو دەم ژ ڤی دەمی بۆ پرسا سەربخوەیێ گونجایتر نینە ژ بەر کو نھا نەخشێ کوردستانێ ل جھێن نێڤدەولەتی یێن لەشکری دھێتە خواندن و وەک دەولەت د پێگەھێن لەشکری یێن ئەمریکی و ئورۆپی دھێت خواندن، دەرفەت یا ھاتی و پێدڤیە ئەم ئێک دەنگ بین ل سەر ڤێ پرسێ و دبیت ژی ھندەک ھەبن نەڤێت کوردستان ببیتە دەولەت ل سەر دەستێ فڵانی و یان دێ فڵان بیت سەرۆکێ وێ، ئەڤ بۆچوونە ژی مەترسیەکا مەزنە و پێدڤیە ئەم ھندەک پرسان ژێک جودا بکەین و ھەموویان تێکھەلی ھەڤدو نەکەین.
جەمال کۆچەر: ھێشتا مە بابەتێ ڕیفراندۆمێ ل بەغدا گەرم نەکریە
نيشاندان
