ئه‌ڤرۆ نیوز، زنار:
ل هۆلا كونگرێس هاوس ل باژێرێ زیورغ یێ سویسرێ شڤێدى ئاهه‌نگا سالانه‌ یا به‌لاڤكرنا دیاریێن باشترینێن سالا 2015 بۆ باشترین یاریكه‌رێ ته‌پا پێ ل سه‌ر ئاستێ جیهانێ یێن كور و كچ و باشترین راهێنه‌رى و پێكهاتیى سالێ و زێده‌بارى خه‌لاتێ پوشكاش یێ جوانترین گۆل هاته‌ ئه‌نجامدان، كو سالانه‌ ئه‌ڤ ئاهه‌نگه‌ ژلایێ ئێكه‌تیا ته‌پا پێ یا جیهانێ فیفا و گوڤارا فرانس فوتبول یا فره‌نسى ڤه‌ دهێته‌ رێكخستن،د ڤێ ئاهه‌نگێ دا یاریكه‌رێ یانا به‌رشه‌لونه‌ و هه‌لبژارتیێ ئه‌رژه‌نتین لیونێل مێسى هاته‌ هه‌لبژارتن باشترین یاریكه‌ر و راهێنه‌رێ ئسپانى یێ یانا به‌رشه‌لونه‌ لویس ئێنریكى ب باشترین راهێنه‌ر هاته‌ ده‌ستنیشان كرن.
د هه‌ڤركیا ده‌ستڤه‌ ئینانا خه‌لاتێ ته‌پا زێرى هه‌رسێ یاریكه‌ران لیونێل مێسى و نیمار داسلێڤا ژ یانا به‌رشه‌لونه‌ ل گه‌ل ستێرا پرتوگالى و یانا ریال مه‌درید كرستیانو رونالدو به‌ربژاربون، پشتى ده‌نگدان ژلایێ راهێنه‌ر و كاپتنێن هه‌لبژارتیێن نشتیمانى ڤه‌ ل سه‌ر ڤى ناسناڤى هاتیه‌ كرن تێدا لیونێل مێسى شیا ڤى خه‌لاتى ده‌ستخوه‌ ڤه‌ بینت.
دبیته‌ جارا پێنجێ لیونێل میسى دشێت ڤى ناسناڤى ده‌ستخوه‌ ڤه‌ بینت به‌رى نوكه‌ ل سالێن 2009،2010،2011،2012، ده‌ستخوه‌ ئینابوو ل سالا بورى شیاى پێنج ناسناڤان ل گه‌ل یانا خوه‌ به‌رشه‌لونه‌ ده‌ستخوه‌ ڤه‌ بینت ئه‌و ژى ناسناڤێ قاره‌مانیا خول و كاسا ئسپانیا و قاره‌مانیا ئوروپا قاره‌مانێن خولان و كاسا سوپه‌را ئوروپى ل گه‌ل ناسناڤێ موندیالا جیهانێ یا یانا و ل سالا 2015 دا شیابوو 52 گۆلان توماربكه‌ت د 61 یاریان دا.
كرستیانو رونالدو ئه‌وێ ل رێزا دویێ هاتى ل ماوێ دو سالێن بورى شیاى ڤى ناسناڤى ده‌ستخوه‌ ڤه‌ بینت ل سالا 2015 شیابوو بیته‌ گۆلكه‌رێ سالا 2015 ب 57 گۆلان د 57 یاریان دا توماربكه‌ت دیسان گۆلكه‌رێ قاره‌مانیا ئوروپا قاره‌مانێن خولان ب ده‌ه گۆلان و یێ خولا ئسپانیا ب 48 گۆلان.
ژلایێ خوه‌ ڤه‌ نیمار داسلێڤا یاریكه‌رێ یانا به‌رشه‌لونه‌ شیابوو د 62 یاریان دا 49 گۆلان ل سالا2015 توماربكه‌ت و هه‌ر پێنج ناسناڤێن خول و كاسا ئسپانیا ل گه‌ل چامپیونس لیگ و سوپه‌را ئوروپى و موندیالا جیهانێ یا یانا ده‌ستخوه‌ ڤه‌ بینت.
د هه‌ڤركیێن ده‌ستنیشانكرنا باشترین راهێنه‌رێ سالا 2015 هه‌رسێ راهێنه‌ران یێ به‌رشه‌لونه‌ لویس ئێنریكێ و پێپ گۆاردیولا راهێنه‌رێ یانا بایرن میونخ و خورخێ سامپاولى راهێنه‌رێ هه‌لبژارتیێ چیلى به‌ربژاربون، پشتى ده‌نگدان ل سه‌ر ڤان هه‌رسێ راهێنه‌ران هاتیه‌ كرن تێدا یێ ئسپانى لویس ئێنریكێ شیا ناسناڤێ باشترین راهێنه‌ر ده‌ستخوه‌ ڤه‌ بینت ئه‌وێ شیاى ل وه‌رزێ بورى ل گه‌ل یانا خوه‌ به‌رشه‌لونه‌ پێنج ناسناڤان ده‌ستخوه‌ ڤه‌ بینت.
د ده‌ستنیشان كرنا خه‌لاتێ پوشكاش یێ جوانترین گۆل د سالا بورى دا گۆلێن یاریكه‌رێ یانا به‌رشه‌لونه‌ لیونێل مێسى ل سه‌ر ئه‌تله‌تیكو بلباو و گۆلا یاریكه‌رێ روما ئه‌لیسه‌ندرو فلورێنزى ل سه‌ر یانا به‌رشه‌لونه‌ و گۆلا یێ به‌رازیلى ویندال لیرا یاریكه‌رێ یانا ڤیلانوڤا یا به‌رازیلى به‌ربژاربون و سێ پیڤه‌ر هاتبوونه‌ دیاركرن بۆ ڤى خه‌لاتى ئه‌و ژى چاوانیا توماركرنا گۆلێ و زه‌حمه‌تیا گۆلێ و جوانیا گۆلێ پشتى ده‌نگدان ل سه‌ر هاتیه‌ كرن تێدا گۆلا یاریكه‌ر ویندال لیرا گه‌ل یانا ڤیلانوڤا هاته‌ هه‌لبژارتن جوانترین گۆلا سالا 2015.
باشترین پێكهاتیێ سالا 2015 ژى ژ ڤان یاریكه‌ران پێكهاتبوون ئه‌و ژى گۆلچى یێ ئه‌لمانى مانوێل نویه‌ر، هێلا به‌ره‌ڤانیێ پێكهاتى بون یاریكه‌ران سێرجیو راموس، مارسێلو ژ یانا ریال مه‌درید، تیاگو سلێڤا ژ پاریس سان جێرمان، دانى ئه‌لڤیس ژ به‌رشه‌لونه‌، هێلا ناڤین پێكهاتیه‌ ژ یاریكه‌ران لوكا مودرێچ ژ ریال مه‌درید و ئه‌نیستا ژ به‌رشه‌لونه‌ و پول بوگبا ژ یوڤانتوس، هێرشبه‌ر پێكهاتى بون ژ یاریكه‌ران لونێل مێسى و نیمار داسێلڤا ژ یانا به‌رشه‌لونه‌ و كرستیانو رونالدو ژ ریال مه‌درید.
د هه‌ڤركیا باشترین یاریكه‌را كچ ل سه‌ر ئاستێ جهانێ پێكهاتى بون ژ یاریكه‌ران كارلى لوید یاریكه‌را هه‌لبژارتیێ ئه‌مریكا و ئایا میامیا یاریكه‌را هه‌لبژارتیێ ژاپون و سیلیا ساسیتچ یاریكه‌را هه‌لبژارتیێ ئه‌لمانیا و پشتى ده‌نگدان هاتیه‌ كرن یاریكه‌را هه‌لبژارتیێ ئه‌مریكا كارلى لوید هاته‌ ده‌ستنیشانكرن باشترین یاریكه‌را كچ ل سه‌ر ئاستێ جیهانێ.
د هه‌لبژارتنا باشترین راهێنه‌را كچ پێكهاتى بون ژ جیل ئه‌لێكس راهێنه‌را هه‌لبژارتیێ ئه‌مریكا یێ كچان و مارك سامستون راهێنه‌را هه‌لبژارتیێ وێلز یێ كچان و ناریو ساساكى راهێنه‌را هه‌لبژارتیێ ژاپون یێ كچان پشتى ده‌نگدانا نهێنى هاتیه‌ كرن تێدا راهێنه‌را هه‌لبژارتیێ ئه‌مریكا جیل ئه‌لێكس هاته‌ هه‌لبژارتن باشترین راهێنه‌را كچ ل سه‌ر ئاستێ جیهانێ.