ئەڤرۆ نیوز:
جڤاتا وەزیرێن ھەرێما کوردستانێ ب رێیا دو لژنان مژوولی داتابێسکرنا ھژمارا فەرمانبەرێن ھەرێمێ یە و مەرەم ژێ کێمکرنا وانە، وەزیرەک ژی دیار دکەت، ھژمارا فەرمانبەرێن حوکمەتا ھەرێمێ گەلەک یا زێدەیە و ئەو رێکخستنە ژی بۆ بڕینا دو مووچەییێ و فەرمانبەرێن بندیوارە.
غازی سەعید، وەزیرێ کۆچ و کۆچبەران ل حوکمەتا ھەرێما کوردستانێ ڕاگەھاند، د کۆمبوونا بۆری یا جڤاتا وەزیران دا کو 11 بڕیار بۆ کێمکرنا مەزاختی و دەرمالان و زێدەکرنا داھاتان ھاتبوونە دەرخستن و بۆ SNN گۆت: “دو لژنە بۆ ھووربینی و رێکخستنا ھژمارا مووچەخۆرێن ھەرێمێ ھاتینە پێکئینان”.
ئاشکرا ژی کر، لژنەک بۆ ھووربینیکرنێ و میلاکاتێن ھەموو وەزارەتان و چەوانیا رێکخستنا وان میلاکاتان ھاتیە پێکئینان و رەنگە د دەمێ دو حەفتیێن بھێن دا کارێن خوە تمام بکەت، لژنا دویێ ژی یا تایبەتە ب ھووربینی و رێکخستنا لیستا فەرمانبەران و مووچەخۆرێن وەزارەتا کار و کاروبارێن جڤاکی ب تایبەت ژی مووچێ چاڤدێریا جڤاکی.
غازی سەعید دا زانین کو ئەو ھەردو لژنە دێ داتابەیسەکا ھوور ل سەر لیستا مووچێ فەرمانبەرێن حوکمەتا ھەرێما کوردستانێ بەرھەڤکەن، دا کو ھژمارا دروست یا مووچەخۆران دیار بیت و دو مووچەیی و ئەوێ دبێژنێ مووچێ بندیوار نەمینن و گۆت: “بەحسی کێمکرنا فەرمانبەرێن د پلا رێڤەبەرێن گشتی دا ل وەزارەتان ھاتیە کرن، ژ بەر کو ھژمارا وان یا زۆرە، لێ مووچێ چ فەرمانبەران ناھێتە بڕین”.
دەربارەی پێنگاڤا دویێ یا چاکسازیێن حوکمەتا ھەرێمێ غازی سەعید گۆت: “ھەتا نوکە پێنگاڤا دویێ یا چاکسازیێ نەھاتیە دیارکرن و نوکە حوکمەت چاڤەرێی ڕاپۆرتا وان لژنان دکەت”.
ل دووڤ پێزانینان، حوکمەتا ھەرێما کوردستانێ ملیۆنەک و 400 ھزار مووچەخۆر ھەنە و ھەمبەرکرن د گەل ستانداردێ فەرمانبەرێن جیھانێ ھژمارەکا گەلەک زۆرە.

ئەڤرۆ نیوز:
ب نێزیکبوونا 100 سالیا رێککەفتناما سایکس بیکۆ و ژناڤچوونا ڕێکخستیا تیرۆرستی یا داعشێ ل دەڤەرێ، ل گۆر گۆتنا پەیامێن مەزنە سەرکردێن کوردستانێ، ژڤانێ سەربخوەیا کوردستانێ یا نێزیک بووی، د.فەرسەت سوفی، ئەندامێ پەرلەمانێ کوردستانێ ژ فراکسیۆنا پارتی دیارکر کو بەرھەڤی یێن دھێنەکرن کو سەربخوەیا کوردستانێ بھێتە راگەھاندن، ئەڤە دێ ژ روویێ ب ھێزکرنا ژێرخانا ئابووری و رێکخستنا ناڤمالا کوردی بیت، دیسان ژ روویێ بنیاتێ سازیێن حوکمەتێ و پەیوەندیێن نێڤدەولەتی ل گەل وەلاتێن جیھانێ، نوکە دەمێ بەرھەڤیان بۆ ھەر دەمەکێ بھێتە خواستن سەربخوەیا کوردستانێ بھێـتە راگەھاندن و رێگری نەبن.
د.فەرسەت سوفی گوت ژی” بەرھەڤیا ئێکێ بۆ سەربخوەیا کوردستانێ ئەوبوو دەمێ سەرۆک مەسعود بارزانی د پەیامەکا خوەدا، داخواز ژ ھەموو لایەنان کری پێکڤە کۆمبن و کێشە و ئاریشە بھێنە چارەسەرکرن د سالا نوو دا و ئەڤە بەرھەڤی یە بۆ سەربخوەیا کوردستانێ و کێشە ب دووماھی بھێن، دووڤ دا بچینە راپرسینێ و دستوورێ ھەرێما کوردستانێ، دووڤ دا کێشێن گرێدای چاکسازیێ و دروستکرنا ھێزەکا نشتیمانی یا ب ھێز”.
ئیحسان ئامێدی، چاڤدێرێ سیاسی دیارکر کو کۆمەکا ھۆکارێن باش یێن ھەین کو دەولەتا کوردستانێ ل باشور و رۆژئاڤا بھێتە راگەھاندن، ھەرێما کوردستانێ کیانەکە نێزیکی سەربخوەیێ یە و رۆژئاڤا ژی پارچەکا مەزن ژێ ھاتیە رزگارکرن، ئەڤ کیانە شیایە پرەنسبێن دەولەتبوونێ ل دەڤ خوە پەیدا بکەت وەکو ھێزا لەشکری، ئابووری، جڤاکی، پەیوەندیێن نێڤدەولەتی و بزاڤێن دبلۆماسی، دڤێت سەرکردایەتیا سیاسی ب ھەموو بزاڤێن جەماوەری ڤە بریارا خوە بدەت و کاری بۆ بکەن و چو کاودان وەک ئەڤرۆ نەدھاریکارن دەولەتا کوردی بھێتە راگەھاندن”.
ل دۆر ھەلویستێ تورکیا، ئیحسان ئامێدی دبێژیت”وەلاتێن کوردستان دبن دەستێ واندا، حەز ناکەن کیانەکێ دی پەیدا ببیت ل دەڤەرێ، بەلێ ھندەک جاران ھندەک تشت پەیدا دبن و نە ب حەزا وان و دبیت روو ب روو بوونەکا راستەوخوە نەبیت و پتر پەیوەندیەکا جڤاکی و ئابووری یا باشتر ل گەل دا بھێتەکرن”.
ژلایێ خوەڤە مەلا مالک رەمەزان، گوت” دەمێ راگەھاندنا سەربەخوەیا کوردستانێ یێ ھاتی، چونکی پێشمەرگێ کوردستانێ ھێزا خوە نیشا ھەموو جیھانێ دا و تاکە ھێز بوویە بەرامبەر تیرۆرێ راوەستیای، دیسان مللەتێ کورد دلۆڤانیا خوە نیشا ھەموو جیھانێ دا و ھەتا دو ملیۆن ئاواران ل دەڤەرێ د ئەڤێ قەیرانێ دا حەواندن و ب خودانکرن و شیا پەیوەندیێن باش ل سەر ئاستێ نێڤدەولەتی دروست بکەت، سامانێ کوردستانێ وەکو پەترۆل و غاز فاکتەرێن ب ھێزن بۆ ب ھێزکرنا ژێرخانا ئابووری ل ھەرێمێ، سنۆرێن کوردستانێ ھەموو یێن ددەستێ پێشمەرگەی دا و دبینم دەم یێ ھاتی سەرکردایەتیا کوردستانی ب سەرۆکاتیا سەرۆک مەسعود بارزانی دەولەتا کوردستانێ رابگەھینن”.
د.عەبدولحەمید باڤی ئەندامێ بەرێ یێ پەرلەمانێ عیراقێ بۆچوونەکا جوداتر ھەبوو ل سەر بابەتی وگوت” دەم یێ ب سەرڤەچووی و پێدڤی بوو ژ مێژە کوردستان دەولەت با، بەلێ جھێ پرسێ یە کا ئایا مە خوە بەرھەڤ کریە بۆ دەولەتبوونێ، ھەکە راگەھاندنا وێ 20% یا گرنگ بیت، 80% پاراستنا دەولەتێ یا گرنگترە و دێ چاوان ھێتە پاراستن، چونکی دیرۆکا مللەتی کوردا دا مە گەلەک نموونێن تەحل دیتی نە، شێخ مەحمودێ حەفید و قازی محەمەد و ئوتۆنۆمی ل گەل بەغدا”.
د.حەمید ھێشتا گوت ژی” دڤێت بەرھەڤی بھێنەکرن و خەلک بەرگریێ ژێ بکەت، دڤێت مە لەشکرەکێ بھێز ھەبیت و داد پەروەریا جڤاکی ھەبیت و ھەموو ھەست پێ بکەن ئەڤە دەولەتا وانایە تێدا د پشکدارن”.
خویاکر ژی” چەندین ھۆکارێن باش یێن ھەین کو بەر ب دەولەتبوونێ ڤە یێن دچین، ئەوژی پەیوەندیێن سەرۆکێ ھەرێما کوردستانێ یێن نێڤدەولەتی، دیسا ھێزا پێشمەرگەی و سەرکەفتنێن ل سەر تیرۆرستان تۆمارکرین، بەلێ دڤێت چاکسازیێن سیاسی و ئیداری و دارایی بھێنەکرن دا بشێن دەولەتێ رابگەھینین.”

ئەڤرۆ نیوز:
خالا سنووری یا ئیبراھیم خەلیل کو بۆ دەمێ 22 رۆژانە ھاتیە گرتن، ئاریشە بۆ پرۆژێ بەرھەمئینانا کارەبێ ل کواشێ دروستکریە.
ئومێد محەمەد، رێڤەبەرێ گشتیێ کۆنترۆلا کارەبا حوکمەتا ھەرێما کوردستانێَ بۆ ئەڤرۆ ئاشکرا کر کو گرتنا دەرگەھێ سنووری یێ ئیبراھیم خەلیل ئاریشە بۆ وێستگەھێن بەرھەمئینانا کارەبا ھەرێما کوردستانێ دروست کریە، چونکی 80% گازوایلا بۆ وێستگەھێن بەرھەمئینانا کارەبا کوردستانێ دھێتە دابین کرن ژ تورکیا دھێت ژبەر ڤێ چەندێ گرتنا دەرگەھی بوویە ئەگەر کو پتر ئاریشە بۆ پرۆژێ کارەبا کواشێ ل دھۆکێ دروست ببیت و گۆت: “وێستگەھا کواشێ 100% پشت بەستنێ ب گازوایلێ دکەت بەروژڤاژی وێستگەھێن سلێمانی و ھەولێر کو پشکەکا کێم ژ یەکەیێن وان پشتبەستنێ ب گازوایلێ دکەن، چونکی غازا سروشتی بۆ دھێتە دابینکرن”.
ناڤھاتی دیار کر کو پشتی دووڤچوونان پتری 20 ملیۆن لترێن گازوایلێ بۆ پرۆژێ بەرھەمئینانا کارەبێ ل کواشێ ھاتینە دابینکرن و نوکە چار یەکە کار دکەن کو ھەر یەکەکێ شیانێن دابینکرنا 125 ھەتا 130 مێگاواتێن کارەبێ ھەیە و ھەکە رۆژانە چەند ملیۆن لترێن گازوایلێ بۆ دھۆک نەھێنە دابینکرن، دێ دھۆک تووشی قەیرانا بێ کارەبیێ بیت.
ویستگەھا کواشێ یا بەرھەمئینانا کارەبێ بۆ کارپێکرنا ھەر یەکەیەکا کارەبێ رۆژانە پێدڤی ب 850 ھزار لترێن گازوایلێ ھەیە.