ئه‌ڤرۆ نيوز، نيوار محه‌مه‌د سه‌ليم:

رێڤه‌به‌ريا هاتنوچوونا پارێزگه‌ها هوشداريێ دده‌ته‌ شوفێران ل نه‌چنه‌ رێيێن درێژ و بۆ گرتنا وێنان ژى نه‌چنه‌ ناڤ به‌فرێ و دده‌ته‌ زانين كو هه‌تا نها 27 روودان رووداينه‌.

رائيدێ مافپه‌روه‌ر، ئازاد تاها، به‌رپرسێ راگه‌هاندنا رێڤه‌به‌ريا هاتنوچوونا پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز گۆت: “د ماوێ سه‌رێ سالێ دا و هه‌تا نها 27 روودانێن ته‌حسينێ (خليسين) چێبووينه‌ و هه‌موو ژى د سڤك بووينه‌”.

زێده‌تر گۆت: “د ڤان روودانان دا هنده‌ك بريندار يێن هه‌ين و برينێن وان د سڤكن و چو كه‌سه‌كى ژى گيانێ خوه‌ ژ ده‌ست نه‌دايه‌”.

به‌رپرسێ راگه‌هاندنا رێڤه‌به‌ريا هاتنوچوونا پارێزگه‌ها دهۆكێ داخواز ژ شوفێران كر ل رۆژێن هوسا يێن سه‌قايێ نه‌خۆش نه‌چنه‌ رێيێن دوور و گۆت: “هيڤى دكه‌ين وه‌لاتى وه‌كو سالێن بۆرى بۆ گرتنا وێنا ده‌رنه‌كه‌ڤنه‌ ناڤ به‌فرێ ژ به‌ر كو جادێن مه‌ د ته‌نگن و گه‌له‌ك روودان دروست دبن”.

رائيدێ مافپه‌روه‌ر، ئازاد تاها دا زانين ژى كو راديۆيا ترافيك ب ره‌نگه‌كێ به‌رده‌وام د خزمه‌تا شوفێران دايه‌ و رێنمايان ده‌ت ژ بوو پاراستنا گيانێ وه‌لاتيان.

ئه‌ڤرۆ نيوز، نيوار محه‌مه‌د سه‌ليم:

ژ ئه‌نجامێ كه‌فتنا پێله‌كا به‌فرێ ل سه‌ر هه‌رێما كوردستانێ و ب تايبه‌ت ژى ده‌ڤه‌را دهۆكێ چه‌ندين رێيێن سه‌ره‌كى يێن پارێزگه‌ها دهۆكێ هاتبوونه‌ گرتن، به‌لێ پشتى كارێ رێڤه‌به‌ريا سه‌خبێريا رێك و پرا ل پارێزگه‌ها دهۆكێ نوكه‌ ب تنێ رێيا سه‌ره‌كى يا چيايێ گاره‌يى و سه‌رزێرى يا گرتيه‌.

دێوالى حه‌مێ بريندار، رێڤه‌به‌رێ سه‌خبيريا رێك و پرا ل پارێزگه‌ها دهۆكێ، د داخۆيانيه‌كێ دا بۆ ئه‌ڤرۆ نيوز گۆت: “ژ ئه‌نجامێ كه‌فتنا وێ پێلا باران بارينێ گه‌له‌ك رێيێن سه‌ره‌كى يێن پارێزگه‌ها دهۆكێ هاتينه‌ گرتن، به‌لێ رێڤه‌به‌ريا مه‌ ب حه‌فت تيما شيان پتريا ڤان رێيان ڤه‌كه‌ن”.

زێده‌تر گۆت: “به‌رى كێمتر ژ نيڤ ده‌مژمێرێ رێيا گه‌ليێ زاخۆ هاتيه‌ ڤه‌كرن”، دا زانين ژى كو نوكه‌ رێيا سه‌ره‌كى يا دهۆك هه‌تا سه‌رسنگ و گه‌ليێ بالندا يا بێ كێشه‌يه‌ و ل لايێ دچيت بۆ به‌روارى بالا ژى هه‌تا نێزيك سه‌رزێرى يا هه‌ى، به‌لێ رێيا سه‌رزێرى نينه‌.

ئاماژه‌ ب وێ چه‌ندێ ژى كر كو ژ لايێ سيار و سينداران ژى هه‌تا رێ يا هه‌ى و هه‌تا دگه‌هيته‌ چيايێ گاره‌يى ژى، به‌لێ رێيا چيايێ گاره‌ى نينه‌ و گۆت: “ل وێرێ ژى ده‌ما شوفێر هاتنچوونێ دكه‌ن، دڤێت دهشيار بن ژ به‌ر كو جه‌مه‌د دروست دبيت و به‌رده‌وام به‌فر يا د باريت”.

ل دووماهيێ ژى گۆت: “ئه‌ڤه‌ د ماوێ سێ رۆژێن بۆرى دا، شه‌ش جاران ئه‌ڤ هه‌موو رێيێن سه‌ره‌كى يێن دهێنه‌ پارێزگه‌ها دهۆكێ هاتنه‌ ڤه‌كرن ژ لايێ تيمێن مه‌ ڤه‌”.