ئەڤرۆ نیوز:
ئەندامەکێ لژنا ئاسایش و بەرگریێ ل جڤاتا نوونەرێن عیراقێ دیار کر کو پرۆژە قانوونا خزمەتا لەشکریا ب زۆری ھەکەر ژ لایێ پەرلەمانێ عیراقێ ڤە بھێتە پەسەندکرن، ھەرێما کوردستانێ ژی دێ ڤەگریت، بڕیاردەرێ لژنا ناڤبری ژی رەت دکەت ئەو قانوونە ھەرێمێ ڤەگریت و دبێژیت: ئەو قانوونە ھەرێمێ ڤەناگریت، چونکو ھەرێما کوردستانێ پاسەوانێن ھەرێمێ یێن ھەین.
ئەسکەندەر وەتوت، ئەندامەکێ لژنا ئاسایش و بەرگریێ ل جڤاتا نوونەرێن عیراقێ ئاشکرا کر، حوکمەتا عیراقێ د چەند رۆژێن بھێن دا دێ دەنگی ل سەر پرۆژە قانوونا لەشکریا ب زۆری دەت و ھنێریتە جڤاتا نوونەران، دا کو دانوستاندن ل سەر بھێتە کرن و بھێتە پەسەندکرن و بۆ خەندان گۆت :”پتریا پەرلەمانتاران د گەل وێ پرۆژە قانوونێ نە و دێ ل سەر رێککەڤن، لەو ئەز پێشبینی دکەم بھێتە پەسەندکرن”.
وەتوت خویا ژی کر، ھەکەر ئەو پرۆژە قانوونە ھاتە پەسەندکرن، ھەموو تاکێن گەلێن عیراقێ ب ھەرێما کوردستانێ ژی ڤە دێ ڤەگریت و گۆت: “ھەتا نوکە نەھاتینە دیار کرن، کانێ ئەو قانوونە دێ چ ژییان ڤەگریت”.
د ڤی واری دا، شاخەوان عەبدوللا، بڕیاردەرێ لژنا ئاسایش و بەرگریێ ل جڤاتا نوونەرێن عیراقێ ل سەر فراکسیۆنا پارتی ئاماژە ب وێ چەندێ کر کو ئەو پرۆژە قانوونە د گەل دەستوورێ عیراقێ یا ھەڤدژە و ھەرێما کوردستانێ ناگریت، چونکو ھەرێمێ پاسەوانێن ھەرێما کوردستانێ یێن ھەین و گۆت: “ل دووڤ ماددەکێ دەستوورێ ھەردەمی یێ عیراقێ، ھەرێما کوردستانێ مافێ ھەی، بۆ بەرەڤانیکرن ژ خوە ھێزەکا سەربازی دروست بکەت، نوکە ژی ھێزا پێشمەرگەی و پاسەوانێن ھەرێمێ یێن ھەین، لەو قانوونا لەشکریا ب زۆری ب چ رەنگان ھەرێما کوردستانێ ڤەناگریت”.

ئەڤرۆ نيوز:
رێڤەبەرێ پەیوەندیان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ ئاشکرا کر کو ھژمارەکا مەزن ژ وان کوردێن د ناڤ تیرۆرستێن داعش دا ھاتینە کوشتن و ھژمارەکا دی یا وان کوردان ھاتینە ھەرێما کوردستانێ خوە رادەست کریە.
ل دووڤ ئامارەکێ، 90% ژ وان کوردێن د ناڤ تیرۆرستێن داعش دا ژ لایێ تیرۆرستێن ناڤبری ب خوەڤە ھاتینە کوشتن کو ل دەستپێکا ھێرێشن تیرۆرستێن داعش بۆ سەر ھێزێن پێشمەرگەی، پشکەک ژ وان ھێرشان ب چەکدارێن کورد د دانەکرن، چونکی وان چەکدارێن کورد پێزانینێن جوگرافی د دانە داعش.
ھەمان ئامار ئاشکرا کریە کو 50% ژ چەکدارێن کورد ژ لایێ داعش ڤە ھاتینە کوشتن و پشکەکا دی ژ وان چەکداران ژ لایێ سۆپایێ عیراقێ و میلیشیاتێن شیعان ڤە ھاتینە کوشتن.
مەریوان نەقشەبەندی، رێڤەبەرێ پەیوەندیان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ دیار کر کو پشکەکا مەزن ژ وان کوردێن چووینە د ناڤ تیرۆرستێن داعش دا و ب تۆمەتا خیانەتێ ب کۆم گولەباران کرینە و بۆ باسنیۆز گۆت: “ژبەر کو داعش چەکدارێن خوە یێن کورد د کوژیت نوکە چەکدارێن کورد د ناڤ رێزێن وان دا نەماینە”.