ئه‌ڤرۆ، هۆشه‌نگ تاجر:

چاڤدێره‌كێ سیاسی یێ رۆژهه‌لاتێ كوردستانێ دیار دكه‌ت كو فره‌نسا د ئاستێ نێڤده‌وله‌تی و رۆژهه‌لاتا ناڤین دا خوه‌دان پێگه‌هه‌ك گه‌له‌ك ب هێزه‌ و پێگه‌هێ بهێز یێ فره‌نسا بێگومان بۆ هه‌رێما كوردستانێ ژی گه‌له‌ك باشه‌ و دڤێت هه‌رێما كوردستانێ مفای ژ پێگه‌هێ بهێز یێ فره‌نسا وه‌ربگریت، چونكو هه‌رێما كوردستانێ پێدڤی ب پشته‌ڤانیا نێڤده‌وله‌تی یه‌.

سه‌عید ئه‌مینی چاڤدێرێ سیاسی یێ رۆژهه‌لاتێ كوردستانێ بۆ ئه‌ڤرۆ دیار كر كو فره‌نسا ئێكه‌ ژ وه‌لاتێن هه‌ری بهێز یێ جیهانێ و بێگومان پێگه‌هێ بهێز یێ فره‌نسا هه‌رده‌م بۆ هه‌ڤپه‌یمانێن وێ ژی باش بوویه‌، ده‌مه‌كه‌ فره‌نسا ده‌ست ب بزاڤه‌كا مه‌زن كریه‌ دا پێگه‌هێ خوه‌ ل رۆژهه‌لاتا ناڤین بهێزتر بكه‌ت، ب تایبه‌تی ژی پشتی كو بریتانیا خوه‌ ژ ئێكه‌تیا ئورۆپا ڤه‌كێشای فره‌نسا دڤێت جهێ بریتانیا ل رۆژهه‌لاتا ناڤین بگریت و ژ به‌ر هندێ ژی نها فره‌نسا پتر ژ هه‌ر ده‌مه‌كێ گرنگیێ دده‌ته‌ ئیراقێ و هه‌رێما كوردستانێ و گۆت: (هاتنا سه‌رۆك كۆمارێ فره‌نسا بۆ هه‌رێما كوردستانێ گه‌له‌ك گرنگه‌ و هه‌كه‌ كورد شاره‌زا بن دشێن مفایه‌كا باش ژێ وه‌ربگرین، ئانكۆ ب هاتنا ماكرۆنی و گرنگیا كو نها فره‌نسا دده‌ته‌ هه‌رێما كوردستانێ، هه‌رێما كوردستانێ ژی دێ بیته‌ خوه‌دان پێگه‌هه‌ك بهێز، كورد ژی دڤێت بزانن كا دێ چاوا شێن ب رێیا فره‌نسا پێگه‌هێ خوه‌ پتر بهێز بكه‌ن).

ناڤهاتی ئه‌و یه‌ك ژی راگه‌هاند كو مه‌ترسیێن مه‌زن ل سه‌ر هه‌رێما كوردستانێ هه‌نه‌، چونكو دڤێت ژبیر نه‌كه‌ین چار ده‌وله‌تێن داگیركه‌رێن كوردستانێ هه‌رده‌م بزاڤا هندێ دكه‌ن كو هه‌رێما كوردستانێ ژناڤ بچیت، چونكو هه‌رێما كوردستانێ بۆ هه‌موو كوردان بوویه‌ جهێ هێڤیه‌كا مه‌زن و هه‌ر روودانه‌ك ل هه‌رێما كوردستانێ روو بده‌ت كارتێكرنا خوه‌ ل پارچێن دی یێن كوردستانێ دكه‌ت، ژ به‌ر هندێ ژی داگیركه‌رێن كوردستانێ ژ سه‌ره‌دانا ماكرۆنی یا بۆ هه‌ولێرێ دلگرانن و گۆت: (ده‌مه‌كه‌ په‌یوه‌ندیێن هه‌رێما كوردستانێ و فره‌نسا گه‌له‌ك د باشن، پشتی ریفراندۆما هه‌رێما كوردستانێ وه‌لاتێن ده‌ڤه‌رێ ده‌ست ب بزاڤه‌كا مه‌زن كرن دا قه‌وارێ سیاسی یێ هه‌رێما كوردستانێ ژناڤ ببه‌ن، لێ فره‌نسا شیا دۆرپێچا سیاسی یا ل سه‌ر هه‌رێما كوردستانێ راكه‌ت و هاریكاریا فره‌نسا بۆ ئه‌گه‌رێ هندێ كو جاره‌كا دی كورد بشێن پێگه‌هێ خوه‌ بهێز بكه‌ن).

چاڤدێرێ سیاسی یێ رۆژهه‌لاتێ كوردستانێ ئاماژه‌ ب هندێ ژی كر كو نها فشارێن گه‌له‌ك زێده‌ ل سه‌ر ئه‌مریكا هه‌نه‌ دا كو هه‌موو هێزێن خوه‌ ژ ئیراقێ و هه‌رێما كوردستانێ ڤه‌كێشیت، هه‌كه‌ هات و ئه‌مریكا ده‌ست ب كاره‌كێ وه‌سا كر فره‌نسا دشێت جهێ ئه‌مریكا بگریت و ئه‌و یه‌ك بۆ هه‌رێما كوردستانێ ژی دێ گه‌له‌ك یا باش بیت، ره‌نگه‌ هاتنا ماكرۆنی ئه‌و په‌یامه‌ ژی د گه‌ل دا بیت كو ئه‌م كوردان ب تنێ ناهێلین و دێ پشته‌ڤانیا مه‌ بۆ كوردان یا به‌رده‌وام بیت و گۆت: (هه‌ر چاوا بیت فره‌نسا ژی بۆ به‌رژه‌وه‌ندیێن خوه‌ كار دكه‌ت و دیاره‌ كو فره‌نسا گه‌له‌ك به‌رژه‌وه‌ندی د گه‌ل هه‌رێما كوردستانێ دا هه‌نه‌ و دڤێت هه‌رێما كوردستانێ ژی بشێت مفایێ‌ ژ پێگه‌هێ بهێز یێ فره‌نسا وه‌ربگریت، د ره‌وشا نها یا ئالۆز یا ل رۆژهه‌لاتا ناڤین دا گرنگه‌ هه‌رێما كوردستانێ په‌یوه‌ندیێن خوه‌ ل گه‌ل هه‌موو وه‌لاتێن جیهانێ باش بكه‌ت، چونكو پێدڤیا هه‌رێما كوردستانێ ب پشته‌ڤانیا نێڤده‌وله‌تی هه‌یه‌).

چاڤدێرێ سیاسی د دووماهیا ئاخڤتنا خوه‌ دا ئه‌و یه‌ك ژی دیار كر كو ئیران و توركیا ژ سه‌ره‌دانا ماكرۆنی یا بۆ هه‌رێما كوردستانێ دلگرانن و دوهی ل ده‌زگه‌هێن راگه‌هاندنا توركیا و ئیرانێ دا به‌حسێ ماكرۆنی هاته‌ كرن، ئه‌و یه‌ك ژی نیشا دده‌ت كو سه‌ره‌دانا ماكرۆنی بۆ هه‌رێما كوردستانێ گه‌له‌ك گرنگه‌.

ئه‌ڤرۆ:

به‌رپرسێ ده‌زگه‌هێ هه‌لبژارتن یێ پارتی، خسرۆ گۆران، راگه‌هاند، پارتی یا به‌رهه‌ڤه‌ بۆ هه‌لبژارتنان و رێژا كورسیێن وێ ژی ل پتریا ده‌ڤه‌ران دێ زێده‌بیت.

خسرۆ گۆران دیاركر” ئه‌م د پشت راستین دێ پارتی سه‌ركه‌فتنه‌كا مه‌زن د هه‌لبژارتنان دا بده‌ستڤه‌ئینیت، چونكی خه‌لكێ كوردستانێ باوه‌ریه‌كا تمام ب پارتی یا هه‌ی، مه‌ وه‌كو پارتی به‌ربژار یێ هه‌ی ل كه‌ربه‌لا كو پصارێزگه‌هه‌كا شیعه‌ نشینه‌، هه‌روه‌سا مه‌ به‌ربژار ل رومادی و فه‌لوجه‌ ژی یێن هه‌ین كو ده‌ڤه‌رێن سوننه‌ نشینن، مه‌ به‌ربژار ل هه‌موو جهه‌كی یێن هه‌ین، چونكی خه‌لكێ ئیراقێ باوه‌ری ب پارتی یا هه‌ی، پارتی حزبه‌كا ئیراقی و كوردستانی یه‌، ل كوردستانێ ژی هه‌موو خه‌لك خه‌لك دزانن كو پارتی گره‌نتیا ئارامیێ و ئاڤه‌دانیا كوردستانێ یه‌”.

ئاماژه‌كر ژی” ده‌نگده‌رێ پارتی ل سنوورێ ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ ب شێوه‌كێ گه‌رمتر ژ جاران دێ ده‌نگێ خوه‌ ده‌ن و مه‌ ل مه‌ندلی هه‌تا شنگالێ به‌ربژارێن خوه‌ یێن هه‌ین و پارتی دێ كورسیێن هه‌موو ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ بده‌ستڤه‌ ئینیت”.

سه‌باره‌ت ره‌وشا هه‌لبژارتنان ل كه‌ركووكێ، گۆت” راسته‌ ل كه‌ركووكێ وه‌كو پارتی باره‌گایێن مه‌ نه‌هاتینه‌ ڤه‌كرن، به‌لێ مه‌ ئۆفیس بۆ به‌ربژارێن خوه‌ یێن لێ ڤه‌كرین و به‌ربژارێن مه‌ هه‌وا هه‌لبژارتنان دكه‌ن و چالاكیێن خوه‌ ب رێڤه‌ دبه‌ن، هه‌روه‌سا به‌ربژارێن مه‌ ژی ل دووڤ دستووری وقانوونێ د ئازادن ل هه‌ر جهه‌كی هه‌وا هه‌لبژارتنان بكه‌ن و هه‌تا نوكه‌ هیچ رێگریه‌ك ل وان نه‌هاتیه‌ كرن”.

سه‌باره‌ت هه‌بوونا به‌ربژارێن ب سه‌ر  pkk ڤه‌ ل شنگالێ مل ب ملێ حه‌شدا شه‌عبی ڤه‌، خسرۆی دیاركر” ل هیچ خوله‌كا جڤاتا نوونه‌ران، به‌ربژارێن pkk ده‌رنه‌چووینه‌ بۆ جڤاتا نوونه‌ران، بۆ ڤێجارێ ژی pkk ده‌نگێن وه‌سا نائینیت كو به‌ربژارێ وان ده‌ربچیت وبچیته‌ جڤاتا نوونه‌رێن ئیراقێ”.

ئه‌ڤرۆ، زنار تۆڤی:

سه‌رۆكێ‌ په‌یمانگه‌ها ڤه‌كۆلینێن ئه‌مریكی – كوردی، راگه‌هاند، پرسا كوردی د دیرۆكا هه‌ڤچه‌رخ دا هه‌رده‌م پرسه‌كا نه‌ته‌وی و نیشتیمانی بوویه‌، نه‌كو پرسه‌كا ئایینی، ئه‌ڤه‌ ژی به‌رۆڤاژی ئه‌فغانستانێ‌ یه‌، چونكی پرسا ئه‌فغانستانێ‌ هه‌رده‌م ره‌هه‌نده‌كێ‌ ئایینی هه‌بوویه‌، هه‌روه‌سا ل كوردستانێ‌ كه‌لتۆرێ‌ فره‌ ره‌نگی و پێكڤه‌ ژیان و ئێكدۆ قه‌بوولكرن و ره و ریشالێن دیرۆكی هه‌نه‌، ئه‌ڤه‌ ژی به‌رۆڤاژی ئه‌فغانستانی یه‌، چونكی تالیبان یا هه‌موو بزاڤان دكه‌ت، ئایدولۆژیا خوه‌ ل سه‌ر هه‌موو خه‌لكێ‌ ئه‌فغانستانێ‌ ب سه‌پینیت، دیسان هه‌رێما كوردستانێ‌ وه‌كو ئه‌كته‌ره‌كێ‌ ناڤده‌وله‌تی ل دووڤ دستوورێ‌ ئیراقێ‌ یێ‌ سالا  2005 ێ هه‌رێمه‌كا قانوونی و دستوووری رێز لێ‌ هاتیه‌ گرتن و هاتیه‌ قه‌بوولكرن ژ ئالییێ‌ جڤاكێ‌ ناڤده‌وله‌تی ڤه‌، ئه‌ڤه‌ ژی به‌رۆڤاژی ئه‌فغانستانێ‌ یه‌، چونكی هه‌تا نوكه‌ یا رۆهن نینه‌، كا دێ‌ جڤاكێ‌ ناڤده‌وله‌تی بزاڤا (تالیبان) قه‌بوول كه‌ت یان نه‌؟.

كارۆخ خۆشناو، سه‌رۆكێ‌ په‌یمانگه‌ها ڤه‌كۆلینێن ئه‌مریكی – كوردی بۆ رۆژناما (ئه‌ڤرۆ) گۆت” نوكه‌ هه‌رێما كوردستانێ‌ هژماره‌كا گرنگه‌ د هه‌ڤكێشێن رۆژهه‌لاتا ناڤین دا، ژ به‌ر كو پێشمه‌رگه‌ شیایه‌ ژ پێش هه‌موو جیهانێ‌ ڤه‌ ئه‌فسانه‌یا داعشێ‌ تێك بشكێنیت، لێ‌ تالیبان ل ئه‌فغانستانێ‌ هاریكاریا هێزێن ئیسلامی یێن رادیكالی، وه‌كو قاعیده‌ دكه‌ت، هه‌روه‌سا هه‌رێما كوردستانێ‌ خودانا خه‌باته‌كا ” 100 ” سالیه‌، كو ئه‌و ژی خه‌باتا رزگاریخوازا نه‌ته‌وی و نیشتیمانی بوویه‌، ئه‌ڤه‌ به‌رۆڤاژی ئه‌فغانستانێ‌ یه‌، د پێنجی سالێن بۆری دا، ئه‌فغانستان بوویه‌ مه‌یدانا شه‌ر و ململانا هێزێن ناڤخوه‌یی و ناڤده‌وله‌تی، هه‌روه‌سا هێزێن سیاسی یێن هه‌رێما كوردستانێ‌، هه‌كه‌ ل سه‌ر پرسێن لاوه‌كی بۆچوونێن جۆدا هه‌بن ژی، لێ‌ ل سه‌ر پرسێن نه‌ته‌وی و نیشتیمانی ئێك ده‌نگن و ئێك هه‌لویستن، ئه‌ڤ راستیه‌ د پرسا ریفراندۆما سه‌ربه‌خوه‌یی دا هاته‌ سه‌لماندن، ده‌مێ‌ خه‌لكێ‌ هه‌رێما كوردستانێ‌ ب هه‌موو پێكهاتێن خوه‌ڤه‌، ب رێژا  92.7  یا ده‌نگان ب به‌لێ‌ دای بۆ پرسا سه‌ربه‌خوه‌یا كوردستانێ‌، ئه‌ڤه‌ ژی به‌رۆڤاژی پرسا ئه‌فغانستانێ‌ یه‌”.

سه‌رۆكێ‌ په‌یمانگه‌ها ڤه‌كۆلینێن ئه‌مریكی – كوردی ئه‌و ژی گۆت” جڤاكێ‌ كوردستانێ‌ هه‌كه‌ د ئاستێ‌ پێشكه‌فتنا جڤاكێ‌ رۆژئاڤا دا نه‌بیت ژی، لێ‌ د ئاسته‌كێ‌ ناڤنجی دایه‌، به‌لێ‌ یا رۆهن و ئاشكرایه‌، كو جڤاكێ‌ ئه‌فغانستانێ‌ ل دووڤ ئامار و داتایان، نه‌خوانده‌واری و پاشكه‌فتن و هه‌ژاری گه‌له‌ك دناڤدا هه‌یه‌، هه‌روه‌سا ده‌مێ‌ قه‌وارێ‌ هه‌رێما كوردستانێ‌ بكه‌ڤیته‌ به‌ر مه‌ترسیه‌كێ‌، خه‌لكێ‌ كوردستانێ‌ ب هه‌موو ده‌نگ و ره‌نگێن جوداڤه‌ چووینه‌ د ئێك چه‌په‌رێ‌ به‌رگریكرنێ‌ دا، بۆ ڤێ‌ راستیێ‌ ژی ل ده‌مێ‌ شه‌رێ‌ داعشێ، نه‌ ب تنێ‌ خه‌لكێ‌ هه‌رێما كوردستانێ‌، به‌لكو یێن هه‌ر چار پارچێن كوردستانێ‌ ل دژی تیرۆرستێن داعشێ به‌رگری ژ ئاخا كوردستانێ‌ كریه‌، لێ‌ ئه‌ڤ چه‌نده‌ ل ئه‌فغانستانێ‌ نینه‌ و جڤاكێ‌ وێ‌ ب ره‌نگه‌كێ‌ كوور دابه‌ش بوویه‌”.

كارۆخ خۆشناو هێشتا دبێژیت” ل سه‌ر نه‌خشێ‌ وزه‌یا جیهانی، هه‌رێما كوردستانێ‌ پێگه‌هه‌كێ‌ گرنگ و ده‌وله‌مه‌ند هه‌یه‌، لێ‌ ئه‌فغانستان ژ روویێ‌ به‌رهه‌مئینانا تلیاكی و حه‌شیشێ‌ و هێرۆینێ‌ رۆله‌كێ‌ خراب دگێریت و ب ره‌نگه‌كێ‌ ب رێژا 70% به‌رهه‌مئینانا مادێن هشبه‌ر ل سه‌ر ئاستێ‌ جیهانێ‌ ل ئه‌فغانستانێ‌ دهێته‌ به‌رهه‌مئینان، ژ ئالیێ‌ جیۆپۆله‌تیك ڤه‌ كوردستان وه‌كو دلێ‌ رۆژهه‌لاتا ناڤینه‌، له‌وما چو جاران ئه‌مریكا و هه‌ڤپه‌یمان ده‌ستان ژ كوردان به‌رناده‌ن، ژ به‌ر كو بۆچوونه‌كا لۆژیكی هه‌یه‌ دبێژیت: ” هه‌ر زلهێزه‌كا جیهانی بشێت هه‌ژموونا خوه‌ ب سه‌ر كوردستانێ‌ دا زال بكه‌ت، دێ‌ ب ساناهی شێت هه‌ژموونا خوه‌ ل سه‌ر هه‌موو رۆژهه‌لاتا ناڤین دا زال كه‌ت، هه‌روه‌سا هه‌رێما كوردستانێ‌ پشتی بریارا 688  یا جڤاتا ئاسایشا ناڤده‌وله‌تی ره‌هه‌نده‌كێ‌ ناڤده‌وله‌تی وه‌رگرتیه‌، پرسا كوردی ژ پرسه‌كا ناڤخوه‌یی بوویه‌ پرسه‌كا ناڤده‌وله‌تی، له‌وما چو جاران كوردستان نابیته‌ ئه‌فغانستان.

ئه‌ڤرۆ:

فه‌رمانده‌كێ هێزا پێشمه‌رگێ كوردستانێ راگه‌هاند، شیانێن لۆجستی یێن پێشمه‌رگه‌ی ل سالا 2014 و ل ده‌ستپێكا هێرشێن داعشێ، چو جاران ب شیانێن له‌شكرێ شكه‌ستی یێ ئه‌فغانستانێ ناهێنه‌ هه‌مبه‌ركرن، كو چه‌ك زۆر پێشكه‌فتی پێ هاتیه‌ دان.

عه‌مید روكن (زانیار خوشناو) ئێك ژ فه‌رماندێن یه‌كه‌یێن 70 یێن هێزێن پێشمه‌رگێ كوردستانێ گۆت” دیرۆكا میلیشیێن تالیبان، دیرۆكه‌كا تیرۆرا هزری و توندره‌ویێ بوو، به‌لێ هێزا پێشمه‌رگێ كوردستانێ ب درێژیا دیرۆكێ، خه‌بات و شۆره‌ش بۆ ملله‌ته‌كێ سته‌م لێكری كریه‌ و ب ده‌هان هزار شه‌هید داینه‌ تاكو كوردستان ئازادكری و هێزا پێشمه‌رگێ كوردستانێ گه‌له‌ك جوداهی هه‌یه‌ ل گه‌ل چه‌كدارێن تالیبان و بێویژدانیه‌ هێزا پێشمه‌رگه‌ی ب له‌شكرێ شكه‌ستی یێ ئه‌فغانستانی، یان چه‌كدارێن تالیبان بهێته‌ هه‌مبه‌ركرن”.

گۆت ژی” ده‌مێ شۆره‌شێ ده‌ستپێكری، هێزا پێشمه‌رگێ كوردستانێ ب چه‌كی ژه‌نگار ده‌ست پێكر، به‌لێ ئه‌ڤ ره‌وشا نوكه‌ یا تالیبان په‌یوه‌ندی ب وێ سیناریۆیێ ڤه‌ هه‌یه‌ كو ئه‌مریكا و وه‌لاتێن دی ل پشت وێ سیناریۆیێ نه‌، ل دووماهیێ ژی له‌شكرێ ئه‌فغانی چه‌كێ باش و ب هێز بۆ چه‌كدارێن تالیبان بجه هێلا، هه‌روه‌سا ئه‌و هاریكاری و پشته‌ڤانیا لۆجستی یا ئه‌مریكا بۆ له‌شكرێ ئه‌فغانی پێشكێشكری، نوكه‌ هه‌موو بۆ چه‌كدارێن تالیبان یێ مای، هه‌تاكو ئه‌مریكا ژبلی چه‌كێ گران، هه‌لیكوپته‌رێن شه‌ری ژی بۆ له‌شكرێ ئه‌فغانی بجه هێلابوون و چه‌كدارێن تالیبان ده‌ست ب سه‌ر وان ژی دا گرتیه‌”.

وی فه‌رماندێ یه‌كه‌یێن 70 یێ پێشمه‌رگه‌ی ئه‌وژی به‌رچاڤكر” راسته‌ پێشمه‌رگه‌ی شه‌رێ مه‌زنترین رێكخراوا تیرۆرستی كریه‌، هه‌رچه‌نده‌ پشكه‌ك ژ چه‌كێن هنده‌ك ژوان وه‌لاتێن دناڤ شه‌رێ داعشێ دا راده‌ستی پێشمه‌رگه‌ی كرین، چه‌كێ مودێرن نه‌بوو، به‌لێ چه‌كدارێن تالیبان هژماره‌كا مه‌زن یا هه‌لیكۆپته‌رێن شه‌ری و چه‌كێ گران و ترۆمبێلێن له‌شكری یێن گۆلله‌ نه‌بر بۆ ماینه‌”.

زێده‌تر گۆت” له‌شكرێ ئیراقی هیچ ده‌مه‌كی بێی پێشمه‌رگه‌ی نه‌شیایه‌ شه‌رێ داعشێ بكه‌ت، هه‌رچه‌نده‌ ده‌وله‌تێن زلهێز چه‌ك بۆ شه‌رێ داعشێ دهنارت، به‌لێ حوكمه‌تا ئیراقێ رێژه‌كا كێم ژ وی چه‌كی راده‌ستی پێشمه‌رگه‌ی دكر، هه‌رچه‌نده‌ پێشمه‌رگه‌ی ب چه‌كێن خوه‌ شه‌ر دكر، له‌وما نابیت هێزا پێشمه‌رگه‌ی ب چه‌كدارێن تالیبان بهێته‌ هه‌مبه‌ركرن، چونكی پێشمه‌رگه‌ هێزه‌كا شه‌ركه‌ر وگیانفیدایه‌، هیچ تشته‌ك هندی رۆحی شرینتر نینه‌ و گه‌نجێ كورد رۆحا خوه‌ بۆ ڤێ ئاخا پیرۆز دبه‌خشیت، ب راستی ژی بێویژدانیه‌ ل فه‌یسبووكی ئاخڤتن دژی هێزا پێشمه‌رگه‌ی بهێنه‌ گۆتن، یان ژی ل گه‌ل چه‌كدارێن تالیبان یان له‌شكرێ شكه‌ستی یێ ئه‌فغانستانێ بهێته‌ هه‌مبه‌ركرن، له‌وما ده‌مێ وێ چه‌ندێ هاتیه‌ هێزا پێشمه‌رگه‌ی بهێته‌ رێكخستن و به‌رێخودانه‌ك ل ژیانا وان بهێته‌ كرن بۆ وێ چه‌ندێ پێشمه‌رگه‌ وه‌كو هێزه‌كا قه‌هره‌مان ژیانا وی خوه‌ش بیت و بشێت ب دل و گیان كوردستانێ بپارێزیت”.

هه‌ولێر، قائید میرۆ

فراكسیۆنا پارتی دیموكراتی كوردستان ل په‌رله‌مانێ كوردستانێ دێ سه‌ره‌دانا هه‌موو ده‌ڤه‌رێن هه‌رێما كوردستانێ كه‌ت و په‌رله‌مانتاره‌كا فراكسیۆنا پارتی ژی ئاشكراكر، هه‌موو گازنده‌ و ئاریشێن وه‌لاتیان هاتینه‌ كۆمكرن ژلایێ شاندێ فراكسیۆنا پارتی و بۆ لایه‌نێن په‌یوه‌ندیدار و حوكمه‌تێ دێ هێنه‌ بلندكرن، هه‌روه‌سا دبێژیت، ل ده‌ستپێكا هه‌یڤا داهاتی دێ كۆمبوونێن په‌رله‌مانی هێنه‌ ده‌ستپێكرن و هژماره‌كا پڕۆژه‌ قانوون هاتینه‌ به‌رهه‌ڤكرن.

خه‌دیجه‌ عومه‌ر، ئه‌نداما لژنا قانوونی ل په‌رله‌مانێ كوردستانێ ژ فراكسیۆنا پارتی بۆ رۆژناما (ئه‌ڤرۆ) گۆت” پشتی هه‌یڤه‌ك بهێنڤه‌دانا په‌رله‌مانی هاتیه‌ راگه‌هاندن، فراكسیۆنا پارتی ده‌ست ب سه‌ره‌دانا ده‌ڤه‌رێن هه‌رێما كوردستانێ كریه‌ و هه‌تا نوكه‌ ژی ئه‌و سه‌ره‌دان د به‌رده‌وامن، ل حه‌فتیا بۆری شاندێ فراكسیۆنا پارتی سه‌ره‌دانا هه‌موو ده‌ڤه‌رێن پارێزگه‌ها دهۆكێ كریه‌ و د ڤێ حه‌فتیێ دا دێ سه‌ره‌دانا ده‌ڤه‌رێن سۆران و چۆمان و باله‌كایه‌تی كه‌ت، مه‌ره‌م ژ سه‌ره‌دانێن شاندێ پارتی ئه‌وه‌ ژنێزیك ڤه‌ ئاگه‌هداری ره‌وشا وه‌لاتیێن هه‌رێما كوردستانێ بیت و گله‌ و گازندێن وه‌لاتیان دێ هێنه‌ وه‌رگرتن، هه‌روه‌سا مه‌ ئاسته‌نگ و ئاریشێن هه‌موو ده‌ڤه‌ران كۆم كرینه‌ و سه‌ره‌دانا ده‌زگه‌هێن حوكمه‌تێ ژی كریه‌، تاكو بزانین چو تشته‌ك یێ پێدڤیه‌ بهێته‌كرن بۆ وه‌لاتیان و چو ئاریشه‌ هه‌نه‌ د رێیا ده‌زگه‌هێن حوكمه‌تێ دا، بێگومان ئه‌و ئاریشه‌ و گازندێن هاتینه‌ كۆمكرن دێ بنه‌ دو پشك، ئه‌وێن گرێدایی حوكمه‌تێ دێ ژلایێ فراكسیۆنا پارتی وه‌كو راپۆرت بۆ حوكمه‌تێ هێنه‌ بلندكرن، حوكمه‌ت ژی ب گۆره‌ی شیانێن خوه‌ كار بۆ چاره‌سه‌ركرنا وان بكه‌ت، هنده‌ك ئاریشه‌ و گازنده‌ ژی هه‌نه‌ دناڤا كۆمبوونێن په‌رله‌مانی و پڕۆژه‌ قانوونێن دهێنه‌ په‌رله‌مانی دێ كار تێدا هێته‌كرن و به‌رچاف هێنه‌ وه‌رگرتن”.

خه‌دیجه‌ عومه‌ر ئاماژه‌كر” ل ده‌ستپێكا هه‌یڤا داهاتی كۆمبوونێن په‌رله‌مانی دێ ده‌ست پێكه‌ن و وه‌رزێ دانانا قانوونایه‌، له‌وڕا هژماره‌كا پڕۆژه‌ قانوون به‌رده‌ستێ په‌رله‌مانێ كوردستانێ نه‌، ژوان قانوونا كه‌سێن به‌رزه‌ و قانوونا گه‌شتوگوزارێ و قانوونا پاراستنا ئاڤێ، بێگومان خواندنا ئێكێ بۆ هاتیه‌كرن و ئه‌و پڕۆژه‌ قانوونێن به‌رده‌ست پشتی ده‌ستپێكرنا كۆمبوونێن په‌رله‌مانی دێ كار بۆ په‌سه‌ندكرنا وان هێته‌ كرن، بێگومان هه‌موو پڕۆژه‌ قانوونێن د پلانا وه‌رزێ داهاتیێ په‌رله‌مانی دا گرێدای ژیانا وه‌لاتیانن یان ژی ب شێوه‌یه‌كی نه‌ گرنگیا خوه‌ بۆ قۆناغا نوكه‌ یا هه‌رێما كوردستانێ هه‌یه‌، له‌وڕا په‌سه‌ندكرنا وان پڕۆژه‌ قانوونان دێ مفایه‌كێ مه‌زن هه‌بیت و كاریگه‌ری لسه‌ر وان بیاڤ و كه‌رتێن جودا هه‌بیت یێن قانوون بۆ دهێنه‌ ده‌ركرن”.

دهۆك، له‌زگین  جوقی

وه‌كیلێ‌ میرێ‌ ئێزدیان دیاركركو ره‌ڤاندن وبێ‌ سه‌روشینكرنا وه‌لاتیێن شنگالێ جهێ‌ دلگرانیێ‌ یه‌ وگه‌له‌ك جاران حاله‌تێن ره‌ڤاندن وبێ‌ سه‌روشینكرنا وه‌لاتیان ل شنگالێ چیبوویه‌ و حوكمه‌تا ئیراقێ  خۆ بێده‌نگ دكه‌ت”.

جه‌هوه‌ر عه‌لی به‌گ، وه‌كیلێ‌ میرێ‌ ئێزدیان بۆ كاروبارێن په‌یوه‌ندیان گۆت”ره‌ڤاندن وبێ‌ سه‌روشینكرنا وه‌لاتیان بوویه‌ دیارده‌كا مه‌ترسیدار دناڤ شنگالێ‌ دا ژبه‌ر ڤێ‌ چه‌ندێ ئاوارێن شنگالێ نه‌شیاینه‌ بزڤرنه‌ سه‌ر جهێن خوه‌ چونكو خه‌لكێ‌ شنگالێ باوه‌ری نینه‌ ڤه‌گه‌رنه‌ بن ده‌ستهه‌لاتا گرۆپێن نه‌شه‌رعی دا، ژ به‌ر كو دزانن دهێنه‌ ره‌ڤاندن وبێ‌ سه‌روشینكرن وهه‌ر كه‌سێ‌ هاتیه‌ به‌رزه‌كرن ل شنگالێ كه‌س تشته‌كێ‌ ژ چاره‌نڤیسێ‌ وێ‌ نزانیت”.

وه‌كیلێ‌ میرێ‌ ئێزدیان زێده‌تر گۆت” حوكمه‌تا ئیراقێ یا خه‌مساره‌ د كه‌یسا شنگالێ دا و ئه‌م هیڤدارین رێككه‌فتنا دناڤبه‌را حوكمه‌تا هه‌رێما كوردستانێ‌ و ئیراقێ  دا بكه‌ڤیته‌ دواری بجهئێنانێ‌ دا چونكو دێ‌ ته‌ناهیێ ل شنگالێ دابین كه‌ت وهه‌كه‌ ئه‌و رێكه‌فتن بجه نه‌هێت، ئاوارێن شنگالێ ناڤه‌گه‌رنه‌ بن ده‌ستهه‌لاتا گرۆپێن نه‌شه‌رعی دا”.

جه‌هوه‌ر عه‌لی به‌گ، خویاكر ژی” گه‌له‌ك حاله‌تێن ره‌ڤاندنێ‌ و بێ‌ سه‌روشینكرنا خه‌لكێ‌ دناڤ شنگالێ دا په‌یدا بووینه‌ و ئه‌ڤ كاره‌ هه‌موو دبن ده‌ستهه‌لاتا گرۆپێن نه‌شه‌رعی دا دهێته‌ كرن وحوكمه‌تا ئیراقێ  ده‌ستهه‌لات ل شنگالێ نینه‌ ویا خه‌مساره‌ دكه‌یسا شنگالێ دا”.

ناڤهاتی ئه‌وژی دیاركر” خه‌لكی باوه‌ری نه‌مایه‌ بزڤرنه‌ شنگالێ و ژبه‌ر ره‌ڤاندن وبێ‌ سه‌روشینكرنا وه‌لاتیان، ترس بۆ خه‌لكی دروست بوویه‌ ژبه‌ر حاله‌تێن به‌رزه‌كرنا وه‌لاتیان”.

ژلایێ خوه‌ ڤه‌، مه‌حما خه‌لیل، قایمقامێ‌ قه‌زا شنگال گۆت” ل رۆژا 21/8/2021ێ‌ ، دو وه‌لاتیێن خه‌لكێ‌ شنگالێ ب ناڤێ‌( برجس خه‌لیل) و ( جه‌میل خدر) ل چیایێ‌ شنگالێ هاتینه‌ بێ‌ سه‌روشینكرن  وهه‌تا نوكه‌ ژی چاره‌نڤیسی وان یێ دیار نینه‌ كو چیایێ‌ شنگالێ د بن ده‌ستهه‌لاتا گرۆپێن نه‌شه‌رعی دایه‌ وئه‌و هه‌ردو وه‌لاتی خه‌لكێ‌ (وه‌ردیێ‌) نه‌ بۆ كاره‌كێ‌ خوه‌ د چیایێ‌ شنگالێ را چووینه‌، به‌لێ‌ هاتینه‌ بێ‌ سه‌روشینكرن و ئه‌م وان گرۆپێن نه‌شه‌رعی سوچبار دكه‌ین”.

قایمقامێ‌ قه‌زا شنگالێ گۆت ژی”  به‌رده‌وام وه‌لاتیێن شنگالێ د بنه‌ قوربانیێن ده‌ستهه‌لاتا گرۆپێن نه‌شه‌رعی وئه‌ڤه‌ حه‌فت ساله‌ خه‌لكێ‌ شنگالێ قوربانیێ دده‌ن وهێشتا شنگال ئارام نه‌بوویه‌”.

مه‌حما خه‌لیل ئاماژه‌كر كو گه‌له‌ك جاران مه‌ داخواز كریه‌ رێككه‌فتنا د ناڤبه‌را حوكمه‌تا هه‌رێما كوردستانێ‌ و ئیراقێ  دا بۆ ئاساییكرنا ره‌وشا شنگالێ بهێته‌ بجهئینان داكو خه‌لكێ‌ شنگالێ ژڤان تاوانیێن ره‌ڤاندنێ‌ و بێ‌ سه‌روشینكرنێ‌ قورتال ببن”.

سلێمان خه‌لیل، برایێ‌ ئێك ژوان كه‌سێن هاتینه‌ بێ‌ سه‌روشینكرن، گۆت” برایه‌كێ من وێ‌ ب ناڤێ‌ ( برجس خه‌لیل ) دگه‌ل مرۆڤه‌كی مه‌ ب ناڤێ‌( جه‌میل خدر) ژ گۆندی (وه‌ردیه‌) چوویه‌ (سه‌رشتی) به‌لێ دناڤ لوفێن چیایێ‌ شنگالێ دا هاتیه‌ بێ‌ سه‌روشینكرن ومه‌ هیچ ئاریشه‌ك  دگه‌ل كه‌سه‌كێ‌ نینه‌ و هه‌تا نوكه‌ ئه‌م چاره‌نڤیسێ‌ وێ‌ نزانین وداخواز دكه‌ین چاره‌نڤیسێ‌ وان بهێته‌ ئاشكراكرن”.

ئه‌ڤرۆ:

هه‌ر كه‌سه‌كێ نه‌ ئۆمێدیێ وهه‌مبه‌ركرنا نه‌ دجهێ خوه‌ دا دناڤ خه‌لكی دا به‌لاڤ بكه‌ت، دیاره‌ هێشتا نه‌شیایه‌ ل ئیراده‌ و خوراگریا ملله‌تێ خوه‌ بگه‌هیت

سه‌رۆك مه‌سعود بارزانی، په‌یامه‌ك  دۆر روودانێن ئه‌فغانستانێ و هه‌مبه‌ركرنا وان روودانان ژلایێ هنده‌ك كه‌س و ده‌زگه‌هێن راگه‌هاندنێ ڤه‌ ل گه‌ل هه‌رێما كورد كوردستانێ به‌لاڤكر.

د په‌یاما سه‌رۆك بارزانی دا هاتیه‌” ل ڤێرێ ئه‌ز دخوازم خه‌لكێ كوردستانێ پشت راست بكه‌م كو ره‌وشا كوردستانێ جوداهیه‌كا مه‌زن ل گه‌ل هه‌موو جهێن دی یا هه‌ی، مه‌ پێشمه‌رگێ قه‌هره‌مان و ب هێز یێ هه‌ی و ژ هه‌موویێ ژی گرنگتر ئه‌م ملله‌ته‌كێ خودان ئیراده‌ و دۆزین”.

سه‌رۆك بارزانی د وێ په‌یامێ دا دبێژیت ژی” پشتی روودانێن ئه‌فغانستانێ ده‌مێ چه‌ند رۆژایه‌ هه‌وه‌كا سیاسی و میدیایی ب ئاراستا دروستكرنا نه‌ ئۆمێدیێ دناڤ خه‌لكێ كوردستانێ دا و كار بۆ هه‌مبه‌ركرنێ د ناڤبه‌را هه‌رێما كوردستانێ و ئه‌فغانستانێ دا دكه‌ن، ل ڤێرێ پێدڤیه‌ هه‌موو لایه‌ك باش بزانیت كو هه‌ر ملله‌ته‌ك هه‌كه‌ پشت به‌ستنێ ل سه‌ر خوه‌ و شیانێن خوه‌ نه‌كه‌ت، دێ به‌رده‌وام ل بن گه‌ف و ژ ناڤچوونێ بیت، پشته‌ڤانیا خه‌لكی ژی وی ده‌می بهایێ خوه‌ دێ هه‌بیت و كاریگه‌ر بیت كو مه‌ ئیراده‌ هه‌بیت “.

د پشكه‌كا دی یا په‌یاما سه‌رۆك بارزانی دا ئاماژه‌ ب وێ چه‌ندێ هاتیه‌ كرن” جوداهیه‌كا مه‌زن د ناڤبه‌را ئه‌فغانستانێ و كوردستانێ دا یا هه‌ی، جوداهیه‌كا مه‌زن ژی د ناڤبه‌را پێشمه‌رگه‌ی و له‌شكرێ ئه‌فغانستانێ یا یا هه‌ی، پێشمه‌رگه‌ بیردانكا دیرۆك و خوین و رۆندگێن گه‌لێ كوردستانێ یه‌ ، خودان ب سه‌دان داستانێ دیرۆكی و قه‌هره‌مانیێ یه‌، نموونێن وان داستانێن كۆرێ و شكاندنا ئه‌فسانا داعشێ و داستانێن پردێ و سحێلا كو پیلانێن نه‌یارێن كوردستانێ ئه‌وبوون ئیرادا گه‌لێ كوردستانێ بشكێنن، به‌لێ پێشمه‌رگه‌ی و گه‌لێ كوردستانێ ب خوراگری و ئیراده‌كا پیلایی پیلانێن نه‌یار و دوژمنان هه‌لوه‌شاندن”.

ده‌قێ په‌یاما سه‌رۆك بارزانی…

پشتی رودانێن ئه‌فغانستانێ ده‌مێ چه‌ند رۆژایه‌ هه‌وا سیاسی و میدیایی ب ئاراسته‌یا دروستكرنا بێ ئۆمێدیێ دناڤ خه‌لكێ كوردستانێ دا كار بۆ هه‌مبه‌ركرنێ د ناڤبه‌را هه‌رێما كوردستانێ و ئه‌فغانستانێ دكه‌ن، ل ڤێرێ پێدڤیه‌ هه‌موو لایه‌ك باش بزانیت كو هه‌ر ملله‌ته‌ك هه‌كه‌ پشت به‌ستنێ ل سه‌ر خوه‌ و شیانێن خوه‌ نه‌كه‌ت، به‌رده‌وام دێ ل بن گه‌ف و ژ ناڤچوونێ بیت، پشته‌ڤانیا خه‌لكی ژی وی ده‌می بهایێ خوه‌ دێ هه‌بیت و كاریگه‌ر بیت كو مه‌ ئیراده‌ هه‌بیت.

جوداهیه‌كا مه‌زن د ناڤبه‌را ئه‌فغانستانێ و كوردستانێ دا یا هه‌ی، جوداهیه‌كا مه‌زن ژی د ناڤبه‌را پێشمه‌رگه‌ی و له‌شكرێ ئه‌فغانستانێ دا یا هه‌ی، پێشمه‌رگه‌ بیردانكا دیرۆك و خوین و رۆندگێن گه‌لێ كوردستانێ یه‌، خودان ب سه‌دان داستانێن دیرۆكی و قه‌هره‌مانیێ یه‌، نموونێن وان داستانێن كۆرێ و شكاندنا ئه‌فسانا داعشێ و داستانێن پردێ و سحێلا كو پیلانێن نه‌یارێن كوردستانێ ئه‌وبوون ئیرادا گه‌لێ كوردستانێ بشكێنن، به‌لێ پێشمه‌رگه‌ی و گه‌لێ كوردستانێ ب خوراگری و ئیراده‌كا پیلایی پیلانێن نه‌یار و دوژمنان هه‌لوه‌شاندن.

ل ڤێرێ دخوازم خه‌لكێ كوردستانێ ژ وێ چه‌ندێ پشت راست بكه‌م كو ره‌وشا كوردستانێ جوداهیه‌كا مه‌زن ل گه‌ل هه‌موو جهێن دی یا هه‌ی، شوكر بۆ خودێ مه‌زن مه‌ پێشمه‌رگێ قه‌هره‌مان و ب هێز یێ هه‌ی و ژ هه‌موویێ گرنگتر ئه‌م ملله‌ته‌كین خودان ئیراده‌ و دۆزین، هه‌كه‌ دوژمن و نه‌حه‌زا ژی خه‌یالا وێ چه‌ندێ هه‌بیت ئازارا خه‌لكێ كوردستانێ بده‌ن، چو جاران ب ساناهی بۆ وان نه‌چوویه‌ سه‌ری و ب پشت راستی ڤه‌ د پاشه‌رۆژێ دا ژی ب ساناهی بۆ وان ناچیته‌ سه‌ری، هه‌ر كه‌سه‌كێ بخوازیت ژی نه‌ ئۆمێدیێ و خوه‌ ب كێم زانین و هه‌مبه‌ركرنا نه‌ دجهێ خوه‌دا دناڤ خه‌لكی دا به‌لاڤ بكه‌ت، دیاره‌ هێشتا نه‌شیایه‌ ل ئیراده‌ و خوراگریا ملله‌تێ خوه‌ بگه‌هیت”.

ئه‌ڤرۆ:

ل دری    َژیا ویبینارێن لقێ شه‌ش ئورۆپا یێ پارتی دیموكراتی كوردستان، ب هه‌لكه‌فتا 75 سالیا دامه‌زراندنا پارتی، قادر قه‌چاخ ئه‌ندامێ جڤاتا سه‌ركردایه‌تیا پارتی، بابه‌ته‌ك ل بن ناڤێ ( پارتی، قوتابخانا كوردایه‌تیێ و دیرۆكه‌ك ژ خوه‌نه‌چه‌ماندنێ). پێشكێشی هژماره‌كا به‌رچاڤ یا كادر و ئه‌ندامێن پارتی ل ده‌رڤه‌ و ناڤخوه‌یا كوردستانێ كر.

قادر قه‌چاخ ئاماژه‌كر كو بیره‌وه‌ریا دامه‌زراندنا پارتی و ژدایكبوونا سه‌رۆك مه‌سعود بارزانی هه‌ڤدو تمام دكه‌ن، چونكه‌ ئه‌و بیره‌وه‌ریا دۆزا نه‌ته‌وه‌كی و دۆزا ره‌وا یا گه‌لێ كورده‌ و چاره‌نڤیسێ پاشه‌رۆژا كوردانه‌، دیاكر ژی، هه‌رده‌مێ پارتی سه‌ركه‌فتبیت، ملله‌تێ كورد هه‌ست ب سه‌ركه‌فتنێ كریه‌ و هه‌ر ده‌مێ پارتی تووشی نسكۆیێ بووی، ملله‌تێ كورد تووشی كاره‌ساتێ بوویه‌ و ئاماژه‌ ب رێككه‌فتنا ئادارا 1970 و نسكۆیا شۆره‌شا كوردی ل سالا 1975، هه‌روه‌سا خویاكر كو دامه‌زراندنا پارتی پێدڤیه‌كا دیرۆكی بوو بۆ گه‌لێ كورد ب تایبه‌تی د وی ده‌می دا كو گوهۆرینێن مه‌زن پشتی شه‌رێ جیهانیێ دویێ د نه‌خشێ جیهانێ دا رووداین و پارتی وه‌كو پێدڤیه‌ك بۆ هه‌ر چار پارچێن كوردستانێ هاته‌ دامه‌زراندن بۆ وێ چه‌ندێ نوونه‌راتیا هه‌موو تاكه‌كێ كورد ل هه‌موو جهه‌كی د جیهانێ دا بكه‌ت و پارته‌كه‌ كو جهێ هه‌موو تاك و ته‌خه‌كێ تێدا دبیت.

قه‌چاخی گۆت ژی” پارتی چه‌ندین سه‌ركه‌فتن و ئه‌زموونێن گران دیتینه‌ و هیچ ده‌مه‌كی ده‌ستبه‌رداری مافێن گه‌لێ كورد نه‌بوویه‌ ل گه‌ل هه‌ر ره‌وشه‌كێ دا، بگره‌ گه‌له‌ك جاران قوربانی ژی ب به‌رژه‌وه‌ندیێن خوه‌ دایه‌ بۆ وێ چه‌ندێ ده‌ستكه‌فت ل ده‌ست نه‌چن و ماف و ده‌ستكه‌فتێن كوردان بهێنه‌ پاراستن. ئاماژه‌كر ژی كو رژێما به‌عس تنێ حیسابه‌كا جدی بۆ پارتی دكر و به‌لگه‌نامێن ده‌زگه‌هێن ئه‌منی یێن به‌عسی ئه‌وێن پشتی ژناڤچوونا وێ رژێمێ هاتینه‌ ئاشكراكرن ب راشكاوانه‌ وێ چه‌ندێ دیاردكه‌ن و رۆناهی خستیه‌  سه‌ر وێ ئێكێ كو هه‌كه‌ پارتی هه‌ر درووشمه‌كی راكه‌ت، لێ په‌شێمان نابیت و بده‌ستڤه‌ دئینیت.

قادر قه‌چاخ خویاكر” پارتی ته‌نها حزبا كوردی یه‌ كو شیای ده‌ستكه‌فتێن مه‌زن بۆ گه‌لێ كورد ب ده‌ستڤه‌ بینیت، ژوان ژی رێككه‌فتنا ئادارا 1970 كو بۆ جارا ئێكێ رژێما به‌عس ل ئیراقێ نه‌چاربوو دانپێدانێ ب مافێن ره‌وا یێن گه‌لێ كورد بكه‌ت، فیدرالی یا پێر و ریفراندۆما دوهی و ده‌وله‌تا كوردی یا سوباهی ژی ل سه‌ر هه‌مان بنه‌ما و ل سه‌ر ده‌ستێ پارتی دێ دروست بیت، مرۆڤێ مه‌زن بریارێن مه‌زن دده‌ت، له‌وما ژی سه‌رۆك مه‌سعود بارزانی بریارا ریفراندۆمێ ل ده‌مێ خوه‌ دا”.

گۆت ژی” پارتی و ئه‌ندازیارێ ئاشتیێ ئیدریس بارزانی بوون كو شیان ناكۆكیێن       دناڤبه‌را لایه‌نێن سیاسی یێن كوردی نه‌هێلن و ل سه‌ر ده‌ستێ وان ئاشتیا گشتی ل كوردستانێ هاته‌ ئه‌نجامدان، كو ئه‌وژی بوو هانده‌ره‌كێ مه‌زن بۆ سه‌ركه‌فتنا سه‌رهلدانا 1991ێ و پاشی دامه‌زراندنا په‌رله‌مان و حوكمه‌تا هه‌رێما كوردستانێ”.

ئاماژه‌كر” ئه‌و ئارامی و پێشكه‌فتنا ل كوردستانێ هه‌ی، هه‌روه‌سا پێگه‌هێ هه‌رێمێ ل ده‌ڤه‌رێ و هه‌ڤكێشان دا و هه‌بوونا وان هه‌موو كونسۆلخانه‌ وهنارتیێن دبلۆماسی و كۆمپانیێن زه‌به‌لاح یێن جیهانی ب حیكمه‌ت و حنكا سیاسی یا سه‌رۆك مه‌سعود بارزانی په‌یدا بوویه‌”.

پتر رۆهنكر” پێدڤیه‌ ئه‌م شانازیێ بكه‌ین كو ئه‌ندام و كادرێن وێ رێبازا پیرۆزین كو رێبه‌ر و مه‌رجه‌ع سه‌رۆك مه‌سعود بارزانی سه‌رۆكایه‌تیا وێ دكه‌ت و ل سه‌ر ده‌ستێ وی ده‌ستكه‌فتێن مه‌زن بۆ گه‌لێ كوردستانێ هاتینه‌ بده‌ستڤه‌ئینان”.

ئه‌ڤرۆ:

جێگرێ نوونه‌رێ تایبه‌ت یێ ئه‌مریكا بۆ كاروبارێن سووریێ ل گه‌ل به‌رپرسێن ئه‌نجوومه‌نێ نشتیمانی یێ كوردی ل سووریێ كۆمبوو و د كۆمبوونێ دا به‌حسێ ره‌وشا نها ل سووریێ و رۆژئاڤایێ كوردستانێ هاته‌ كرن و جێگرێ نوونه‌رێ تایبه‌ت یێ ئه‌مریكا داخواز ژ هه‌ر دو جڤاتێن كوردی كر كو ده‌ست ب دانوستاندنان بكه‌ن.

ئه‌نجوومه‌نێ نشتیمانی یێ كوردی ل سووریێ راگه‌هاند كو ل سه‌ر داخوازا ده‌یڤید براونشتین جێگرێ نوونه‌رێ تایبه‌ت یێ ئه‌مریكا بۆ كاروبارێن سووریێ ئه‌و ل گه‌ل وی كۆمبووینه‌ و د كۆمبوونێ دا ل سه‌ر ره‌وشا سووریێ و رۆژئاڤایێ كوردستانێ گه‌نگه‌شه‌ هاتینه‌ كرن، جێگرێ نوونه‌رێ تایبه‌ت یێ ئه‌مریكا بۆ كاروبارێن سووریێ د كۆمبوونێ دا دیار كریه‌ كو ئه‌و وه‌كو ئه‌مریكا پشته‌ڤانیێ ل ده‌ستپێكرنا دانوستاندنان دناڤبه‌را هه‌ر دو جڤاتێن كوردی یێن رۆژئاڤایێ كوردستانێ دا دكه‌ن.

ل گۆر داخۆیانیا ئه‌نجوومه‌نێ نشتیمانی یێ كوردی ل سووریێ د كۆمبوونێ دا به‌حسێ زۆرداریا په‌یه‌دێ و هێزێن وێ ل سه‌ر پارتێن كوردی و ئه‌ندامێن ئه‌نجوومه‌نێ نشتیمانی یێ كوردی هاتیه‌ كرن و داخواز هاتیه‌ كرن كو دڤێت په‌یه‌ده‌ ده‌ستان ژ ره‌فتارێن خوه‌ به‌رده‌ت، چونكو هه‌لوه‌ستێ په‌یه‌دێ ئاسته‌نگیێن مه‌زن ل هه‌مبه‌ر دانوستاندنان دروست دكه‌ت و هه‌تا په‌یه‌ده‌ ل سه‌ر هه‌لوه‌ستێ خوه‌ به‌رده‌وام بیت ئه‌و وه‌كو ئه‌نجوومه‌نێ نشتیمانی یێ كوردی ل سووریێ ب چو ره‌نگه‌كێ به‌رهه‌ڤ نینن ل گه‌ل په‌یه‌دێ ده‌ست ب دانوستاندنان بكه‌ن.

ل گۆر زانیاریێن ئه‌ڤرۆ د كۆمبوونێ دا به‌رپرسێن ئه‌نجوومه‌نێ نشتیمانی یێ كوردی ل سووریێ دیار كرینه‌ كو دڤێت ئه‌مریكا ب رۆلێ خوه‌ رابیت و رێگریێ ل ئێرشێن توركیا و گرۆپێن سه‌ر ب وێ ل سه‌ر رۆژئاڤایێ كوردستانێ بكه‌ت، چونكو د ماوه‌یێ چه‌ند رۆژێن بۆری دا ئێرشێن توركیا گه‌له‌ك زێده‌ بووینه‌ و ئاریشێن مه‌زن بۆ وه‌لاتیێن كورد ل رۆژئاڤایێ كوردستانێ دروست بووینه‌ و دڤێت ئه‌مریكا رێگریێ ل ئێرشێن توركیا بكه‌ت.

نوونه‌رێ جێگرێ ئه‌مریكا بۆ كاروبارێن سووریێ ژی دیار كریه‌ كو وان دڤێت هه‌ڤپه‌یمانێن خوه‌ و خه‌لكێ سڤیل ل سووریێ بپارێزن و وان به‌ری نها ژی گه‌له‌ك جاران دیار كرینه‌ كو ئێرشێن توركیا دێ بنه‌ ئه‌گه‌رێ ئالۆزبوونا ره‌وشا باكورێ سووریێ و دڤێت توركیا ئێرشێن خوه‌ بده‌ته‌ راگرتن.

هه‌ژی ئاماژه‌پێدانێ یه‌ كو ب سه‌رپه‌رشتیا ئه‌مریكا سالا بۆری هه‌ر دو جڤاتێن كوردی ده‌ست ب چه‌ندین گه‌رێن دانوستاندنان كرن و ل سه‌ر چه‌ندین خالان رێككه‌فتن هاتنه‌ كرن، لێ پاشی ئاسته‌نگی دروست بوون و به‌رپرسێن ئه‌نجوومه‌نێ نشتیمانی یێ كوردی ل سووریێ دیار كرن كو په‌كه‌كه‌ ده‌ستێوه‌ردانێ دكه‌ت و ئاسته‌نگیان ل هه‌مبه‌ر ئێكه‌تیا هه‌ر دو جڤاتێن كوردی ل رۆژئاڤایێ كوردستانێ دروست دكه‌ت، هه‌رچه‌نده‌ دهاته‌ چاڤه‌رێكرن كو پشتی نه‌ورۆزا ئه‌ڤساله‌ جاره‌كا دی هه‌ر دو جڤاتێن كوردی ده‌ست ب گه‌ره‌كا نوو یا دانوستاندنان بكه‌ن، لێ پشتی كو هنده‌ك ئه‌ندامێن ئه‌نجوومه‌نێ نشتیمانی یێ كوردی ژ ئالیێ هێزێن ئاسایشێ یێ سه‌ر ب په‌یه‌دێ ڤه‌ هاتنه‌ گرتن ئه‌نجوومه‌نێ نشتیمانی یێ كوردی ژی دیار كر كو وان دانوستاندنێن ل گه‌ل په‌یه‌دێ داینه‌ راگرتن و هه‌تا په‌یه‌ده‌ ده‌ستان ژ هه‌لوه‌ستێ خوه‌ به‌رنه‌ده‌ت ئه‌و ب چو ره‌نگه‌كێ ده‌ست ب دانوستاندنان ناكه‌ن.

چاڤدێرێن سیاسی یێن رۆژئاڤایێ كوردستانێ ژی دیار دكه‌ن رۆژهه‌لاتا ناڤین ب تایبه‌تی ژی سووریێ به‌ر ب گوهۆرینێن مه‌زن ڤه‌ دچیت و دڤێت كورد خوه‌ بۆ هه‌ر گوهۆرینه‌كێ به‌رهه‌ڤ بكه‌ن، ب تایبه‌تی ژی دڤێت هه‌ر دو جڤاتێن كوردی ب رێیا دانوستاندنان هه‌موو ئاریشێن د ناڤبه‌را خوه‌ دا چاره‌سه‌ر بكه‌ن، چونكو ئه‌مریكا، فره‌نسا و گه‌له‌ك وه‌لاتێن دی پشته‌ڤانیێ ل ئێكگرتنا هه‌ر دو جڤاتێن كوردی یێن رۆژئاڤایێ كوردستانێ دكه‌ن.

ئه‌ڤرۆ، قائید میرۆ

پارتی ل ده‌ڤه‌رێن كوردستانی یێن ده‌رڤه‌ی ئیدارا حوكمه‌تا هه‌رێما كوردستانێ ده‌ست ب هه‌وا هه‌لبژارتنان كریه‌ و به‌رپرسه‌كێ پارتی ژی ل مووسل راگه‌هاند، پێشبینی دهێته‌كرن د هه‌لبژارتنێن داهاتی دا پارتی كورسیێن زێده‌تر ل مووسل بده‌ستڤه‌ بینیت و دبێژیت، هه‌وا هه‌لبژارتنان ل ده‌ڤه‌رێن كوردستانی بێ ئاسته‌نگ ب ڕێڤه‌ناچیت”.

مه‌ناف حه‌سه‌ن، به‌رپرسێ نڤیسینگه‌ها هه‌لبژارتنێن  پارتی ل مووسل بۆ رۆژناما (ئه‌ڤرۆ) گۆت” چه‌ند رۆژه‌ پارتی ل مووسل هه‌وا هه‌لبژارتنان ده‌ستپێكریه‌ و به‌ربژارێن پارتی ل سنورێ پارێزگه‌ها نه‌ینه‌وا د ناڤا خه‌لكی دانه‌ بۆ كۆمكرنا ده‌نگان، پارتی به‌رهه‌ڤیێن باش كرینه‌ بۆ هه‌لبژارتنێن داهاتی و ب فه‌رمی ژی ل مووسل ده‌ست ب هه‌وا هه‌لبژارتنان كریه‌”.

مه‌نافی زێده‌تر گۆت” بۆ هه‌لبژارتنێن پێشوه‌خت یێن جڤاتا نوونه‌رێن ئیراقێ، پارتی ١٣ به‌ربژار ل سنورێ پارێزگه‌ها نه‌ینه‌وا یێن هه‌ین و بسه‌ر هه‌شت بازنێن هه‌لبژارتنان هاتینه‌ به‌لاڤكرن، هه‌رچه‌نده‌ پشكه‌كا مه‌زن یا سنورێ مووسل دبیته‌ ده‌ڤه‌رێن كوردستانی یێن ده‌رڤه‌ی ئیدارا حوكمه‌تا هه‌رێما كوردستانێ، ئه‌ڤه‌ ژی بۆ هه‌وا هه‌لبژارتنان بێ ئاسته‌نگ نابیت، چونكه‌ چه‌ندین هێزێن جودا ل وان ده‌ڤه‌ران یێن هه‌ین و به‌رده‌وام پێشێلكاری هاتینه‌كرن د هه‌لبژارتنێن بۆری دا”.

گۆت ژی” هه‌لبژارتنێن بۆری یێن جڤاتا نوونه‌رێن ئیراقێ، پارتی شیایه‌ شه‌ش كورسیان بده‌ستڤه‌ بینیت، به‌لێ هه‌كه‌ ئه‌م ڤێجارێ ب گۆره‌ی پلانا هاتیه‌ دانان كار بكه‌ین، پێشبینی دهێته‌كرن پارتی كورسیێن زێده‌تر ل مووسل بده‌ستڤه‌ بینیت، ئه‌ز باوه‌رم هه‌تا هه‌شت كورسیان ژی پارتی ل مووسل دێ د ڤان هه‌لبژارتنان دا بده‌ستڤه‌ئینیت ، چونكه‌ سیاسه‌تا پارتی یا په‌سه‌نده‌ ل ده‌ف خه‌لكێ مووسلێ و ده‌نگده‌رێ پارتی ژی هه‌رده‌م یێ به‌رهه‌ڤه‌ ب ده‌نگدانێ بۆ به‌ربژارێن پارتی، هه‌روه‌سا پارتی خزمه‌تێن زۆر پێشكێشی خه‌لكێ مووسلێ كرینه‌ و خه‌لكێ ده‌ڤه‌رێن مووسلێ خزمه‌تا پارتی لبه‌رچاڤه‌ ده‌مێ ره‌وشا بسه‌ردا وان دا هاتی پارتی خوه‌ ل خه‌لكی كریه‌ خودان، ب تایبه‌تی لسه‌رده‌مێ هێرشێن داعشێ بۆ سه‌ر مووسلێ، هه‌رێما كوردستانێ شیایه‌ بسه‌دان هزار ئاوارێن خه‌لكێ مووسلێ بحه‌وینیت و هه‌تا نوكه‌ ژی هژماره‌كا مه‌زن یا ئاوارێن مووسلێ ل پارێزگه‌هێن هه‌رێما كوردستانێ ماینه‌، هه‌كه‌ حوكمه‌تا هه‌رێما كوردستانێ ده‌رگه‌هێ خوه‌ ژبۆی ئاواره‌یان ڤه‌نه‌كربا، دا كاره‌ساتێن زۆر مه‌زنتر ب سه‌رێ وان هێن، له‌وڕا د هه‌موو ره‌وشان دا پارتی و حوكمه‌تا هه‌رێما كوردستانێ هاریكاربووینه‌ دگه‌ل خه‌لكێ مووسلێ ب هه‌موو پێكهاتێن وێ ڤه‌”.