ئه‌ڤرۆ نيوز:
شه‌ش بيڤه‌له‌رزان، باژێرێ پاوه يێ سه‌ر ب پارێزگه‌ها كۆمانشان ل رۆژهه‌لاتێ كوردستانێ هه‌ژاند و هه‌تا نوكه زيانێن بيڤه‌له‌رزێ نه‌هاتينه زانين.
ب گۆره‌ى ئه‌و پێزانينێن ميديا ئيرانى به‌لاڤكرين، ئه‌ڤرۆ ل ده‌مژمێر 5ى سپێدێ هه‌تا 12 نيڤرۆ شه‌ش جاران بيڤه‌له‌رزێ ل باژێرێ پاوه يێ سه‌ر ب كرمانشانێ دايه.
پله‌يا ڤان بيڤه‌له‌رزان د ناڤبه‌را 2.4 بۆ 4 پله دابوويه ل دووڤ پيڤه‌رێ ريخته‌ر، خه‌لكێ باژێرى ژى هه‌ست ب ڤان بيڤه‌له‌رزان كريه و ترس ژى كه‌فتيه دلێ وان.
ئەڤرۆ نیوز:
دەمێ شەش رۆژانە دەرگەھێ توخیبێ ئیبراھیم خەلیل دناڤبەرا ھەرێما کوردستانێ و تورکیا ب ئەگەرێ شەر و پەڤچونێن ناڤخویی ھاتیە گرتن، زیانەکا مەزن ب ئابوورێ ھەرێ و وەلاتێ تورکیا کەفتیە و ھاتنوچونا وەلاتیان ژی راوەستیایە .
چەندین وەلاتیێن تورک و کورد ل ھەرێمێ کار دکەن و ب ئەگەرێ گرتنا دەرگەھی نەشێت بچن مالێن خو و ھیڤی خازن ب زوترین دەم بھێتە ڤەکرن چونکو دبیتە ئارگرانی بو وەلاتیێن ل ھەرێمێ کار دکەن.
دەرگەھێ ئیبراھیم خەلیل دەرگەھێ بتنێ دناڤبەرا ھەرێما کوردستانێ و وەلاتێ تورکیایە و دکەڤیتە قەزا زاخو سەر پارێزگەھا دھۆکێ یە رۆژانە ب سەدان وەلاتی و بازرگان دڤی دەرگەھی را ھاتنوچون دکر.
ئەڤرۆ نیوز، ئەیاد بەرواری:
بەرپرسەکێ وەزارەتا پەروەردێ یا ئیرانی راگەھاند، ژبەر بلندبوونا مەزن د رێژەیا پیسبوونا ژینگەھێ دا ل ھەوای، ئەڤرۆ ئیکشەمبی دێ قوتابخانە ل تەھرانێ ھێنە داخستن و داخواز ژ وەلاتیان ھاتیە کرن ژ مالێن خوە دەرنەکەڤن.
(ئەسفەندیار شەھرباند) رێڤەبەرێ پەروەردا تەھرانێ بۆ ئاژانسا (مھر) یا ئیرانی گوت” ھەموو دەزگەھێن پەروەردێ ل تەھرانێ و ھندەک باژێرکێن ب سەرڤە دێ ھێنە داخستن ژبەر پیسبوونا ھەوای”.
ل دووڤ ھندەک ژێدەرێن ئیرانی، ترومبێلێن کەڤن و نەپێگیری کرن ب رێنمایێن تایبەت ب ژینگەھێ ڤە، ژ ئەگەرێن سەرەکی نە بۆ پیسبوونا ژینگەھێ ل باژێرێن ئیرانێ و ب ھزاران کەسان گیانێ خوە یێ ژ دەستدای ژ ئەگەرێ نەخوەشیێن گرێدای ب ھەناسێ ڤە.
ئاژانسا ئیرانی ژ زاردەڤێ (خسرۆ سادق) ئیک ژ بەرپرسێن وەزارەتا ساخلەمیێ ڤەگوھاست کو (ماتۆر سکل و ترومبێلێن کەڤن) ژێدەرێن سەرەکیێ پیسبوونا ھەوای ل تەھرانێ.
ل چینێ ژی، پایتەختا وێ پەکین تووشی پیسبوونا ھەوای و ژینگەھێ بوویە و بەرپرسێن وی وەلاتی (ھوشداریا سوور) یا راگەھاندی وەکو بەرھەڤکرنەک بۆ پێلەکا مژێ ژ دوکێلێ پشتی ھەفتیەکێ ژ رێککەفتنا 200 وەلاتان ل سەر بەرھنگاریا گوھۆرینێن سەقای.
ئەڤرۆ نیوز، بارزان مزووری:
ب گۆرەی ژێدەرێن ل بەر دەستێ ئەڤرۆ نیوز پشتی شکەستنێن بەردەوامێن چەکدارێن داعش و ب تایبەت یێن ڤێ دووماھیێ ل میحوەرێن ناوەران و خازر و مەخمۆر و باشیک و کوشتنا چەندین ئەمیر و شارەزایێن وان، چەکدارێن داعش کەفتینە د رەوشا گەلەک ئالۆز دا.
ھەر ب گۆرەی وان پێزانینان، نوکە والیێ مووسل بڕیارا ڤەکێشانا پاسپۆرتێن ھەموو چەکدارێن خوە یێن بیانی دایە دا کو بەر ب چو جھان نەرەڤن.
ژێدەرێ پێزانین ب ئەڤرۆ نیوز داین ئاماژە ب وێ چەندێ ژی کریە کو بەری ڤان شکەستنان ئەوان سۆز دابوو خەلکێ مووسل کو ل نێزیک چەندین سەرکەفتن و داستانێن مەزن تۆمار بکەن، وەکو رێیا مووسل بۆ رەقە و کۆنترۆلکرنا چیایێ باشیک و بۆرجێ ناوەران، بەلێ ھەموو ل سەر دەستێ پێشمەرگەی ب شکەستن ب دووماھی ھاتن.
د گۆتارێن خوە یێن رۆژا ئەینی ژی دا راگەھاندیە کو ھەر کەسێ ئامیرێ سەتەلایتی د مالا خوە دا ھەبیت و لێ بھێتە دیتن ل دەمێ پشکنینێن مالا دێ مالێن وان ب تی ئێن تیێ ھێنە خرابکرن.
ئه‌ڤرۆ نيوز:
وه‌زيره‌كێ حوكمه‌تا هه‌رێما كوردستانێ كارناما روونشتنا رۆژا دوشه‌مبى يا جڤاتا وه‌زيرێن هه‌رێما كوردستانێ ئاشكه‌را كر و گۆت: “دێ يا تايبه‌ت بيت ب قه‌يرانێن دارايى”.
عه‌بدولره‌حمان عه‌بدولره‌حيم، وه‌زيرێ هه‌رێمێ بۆ كاروبارێن ژينگه‌هێ د داخۆيانيه‌كێ دا بۆ رووداو راگه‌هاند: كۆمبوونا سوبه‌هى رۆژا دوشه‌مبى 21ى كانوونا ئێكێ يا 2015ێ يا جڤاتا وه‌زيرێن هه‌رێما كوردستانێ بۆ به‌حسكرنا قه‌يرانا دارايى يه ل هه‌رێما كوردستانێ و چاوانيا چاره‌سه‌ركرنێ.
گۆتژى: “سوبه‌هى دێ به‌حس ل قه‌يرانا دارايى و چاوانيا چاره‌كرنا وێ هێته كرن و جڤاتا وه‌زيرن لژنه‌ك ژى بۆ دووڤچوونا پرۆژێن چاكسازيێ پێك ئينايه، دێ به‌حس ل وان كێشان ژى هێته كرن يێن ژ ئه‌گه‌رێ قه‌يرانێن دارايى بۆ وه‌لاتيان دروست بووين”.
سێ پرۆژێن چاكسازيێ بۆ جڤاتا وه‌زيران هاتينه ئاماده‌كرن كو يێ ئێكێ يێ هه‌ردو په‌رله‌مانتاران د. فه‌رسه‌ت سۆفى و ئازاد گورانه و يێ دويێ ژى يێ لژنا دارايى يا په‌رله‌مانێ كوردستانێ و پرۆژێ دژى يێ وه‌زيرێ دارايى يێ ژ كار لادايێ حوكمه‌تا هه‌رێما كوردستانێ يه.
هه‌ر وه‌كو رووداو ئاماژه پێكرى هه‌تا نوكه ب تنێ پرۆژێ هه‌ردو په‌رله‌مانتاران راده‌ستى جڤاتا وه‌زيران كريه و پرۆژێن دى ژ به‌ر كاودانێن سياسى يێن هه‌رێما كوردستانێ هاتينه راگرتن.
ب هه‌لكه‌فتا رۆژا ژ دايكبوونا پێغه‌مبه‌رێ ئيسلامێ محه‌مه‌د “س” و رۆژا ژ دايكبوونا حه‌زره‌تێ مه‌سيح “س” حوكمه‌تا هه‌رێما كوردستانێ رۆژا چارشه‌مبى و پێنجشه‌مى ل هه‌موو داموده‌زگه‌هێن حوكمه‌تا هه‌رێمێ كره بهێنڤه‌دانا فه‌رمى.
سه‌فين دزه‌يى، ئاخفتنكه‌رێ ب ناڤێ حوكمه‌تا هه‌رێما كوردستانێ د راگه‌هاندنه‌كێ دا كو وێنه‌ك بۆ ئه‌ڤرۆ نيوز ره‌وانه كريه راگه‌هاند: ب هه‌لكه‌فتا رۆژا ژ دايكبوونا پێغه‌مبه‌ر ئيسلامێ محه‌مه‌د “س” و رۆژا ژ دايكبوونا حه‌زره‌تێ مه‌سيح “س” رۆژا چارشه‌مبى رێكه‌فتى 23ى كانوونا ئێكێ يا 2015ێ و رۆژا پێنجشه‌مبى 24ى كانوونا ئێكێ يا 2015ێ ل هه‌موو داموده‌زگه‌هێن فه‌رمى يێن حوكمه‌تا هه‌رێما كوردستانێ بهێنڤه‌دانا فه‌رمى يه.
ئەڤرۆ نیوز:
پەیڤدارێ کۆمسیۆنا بلندا ھەلبژارتن و ڕاپرسیان ل ھەرێما کوردستانێ ئاشکرا کر کو نوکە کار یێ ل سەر ھەلبژارتن و دەستنیشانکرنا 12 رێڤەبەرێن گشتی یێن کۆمسیۆنا بلندا ھەلبژارتن و راپڕسیان ل ھەرێما کوردستانێ دھێتە کرن و ھەر دەمێ گەھشتینە رێکەفتنەکێ ئەو کەس ھاتنە دەستنیشانکرن دێ دەست ب دامەزراندنا فەرمانبەران کەین.
شێروان زار، پەیڤدارێ کۆمسیۆنا سەربەخۆیا ھەلبژارتن و ڕاپرسیان ل ھەرێما کوردستانێ ئاشکرا کر کو ئەو CV یێن بۆ وان ھاتینە ھنارتن پشکەک ژ وان بۆ پلێن بلند بو ئەوێن دی ژی بۆ فەرمانبەرێن پەیڤدارێ کۆمسیۆنا بلندا ھەلبژارتن و ڕاپرسیان بۆ، بەلێ ھەتا نوکە کار یێ ل سەر ھەلبژارتن و دەستنیشانکرن و ھەلبژارتنا 12 رێڤەبەرێن گشتی دھێتەکرن و بۆ مالپەرێ فەرمی یێ پارتی دیمۆکراتی کوردستان گۆت: “ژ سەرجەمێ وان 12 کەسان ھەشت کەس دێ د جڤات و کارگێریێ دا بن و چار کەسێن دی ژی دێ ل پارێزگەھان بن، بەلێ ھەتا نوکە مە ل سەر پیڤەر و کەسان بڕیار نەدایە و ئەم نەگەھشتینە چو رێکەفتنان ل سەر دانانا وان 12 رێڤەبەرێن گشتی، چونکی بووچوونێن جودا یێن ل سەر ژی و خزمەتا کارکرنێ cv یێن وان یا ھەی”.
ل دووماھیێ ناڤبری گۆت: ” مە کار یێ ل سەر فۆرمێن بۆ مە ھاتینە پێشکێشکرن یێ کری و ئەو فۆرم و ناڤێن دووبارە بووین مە یێن دەستنیشانکرین و مە داتابیس ل سەر ھەر دو پشکێن پلێن بلند و فەرمانبەران یێ ئامادەکری”.
ئەڤرۆ نیوز:
ئەندامەکێ پەرلەمانێ کوردستانێ ئاشکرا کر کو حوکمەتا ھەرێما کوردستانێ بڕینا موچێ فەرمانبەران ئێخستە د قووناغا جێبەجێکرنێ دا و د ھەمان دەم دا پەرلەمانێ ھەرێما کوردستانێ ژی ژڤانێ بجھئینانێ دیار کر.
د. شوان قەلادزیی، ئەندامێ پەرلەمانێ کوردستانێ دیار کر کو ژبەر قەیرانا دارایی یا سەر ب ھەرێما کوردستانێ دا ھاتی، حوکمەتا ھەرێمێ دێ دەرمالێن چەندین فەرمانبەرێن پەرلەمانێ ھەرێما کوردستانێ ل ھەیڤا ئێکا سالا 2016 ل دووڤ پلا موچەیێ وان کێم کەت.
ناڤھاتی ل دۆر شێوەیێ بجھئینانا ڤێ بڕیارێ و بۆ snn گۆت: “دەرمالێن پشکەکا فەرمانبەرێن پەرلەمانێ کوردستانێ ھەکە ھەیڤانە 600 ھزار دیناربیت دێ 200 ھزار دینار ژێ ھێنە کێمکرن و ئەڤ کێمکرنە دێ ل دووڤ پلا فەرمانبەریێ و سالێن خزمەتێ بیت”.
ناڤھاتی ئاماژە دا وێ چەندێ ژی کو ئەڤ کێمکرنە دێ ھژمارەکا شیرەتکارێن پەرلەمانێ کوردستانێ ژی ب خوە ڤە گریت و گۆت: ” ھێجەتا حوکمەتێ بۆ کێمکرنا دەرمالێن فەرمانبەرێن پەرلەمانێ ئەوە کو دەرمالێن وان فەرمانبەرێن دێ ژێ ھێنە کێمکرن گەلەک ژ یێن ھندەک فەرمانبەرێن دی یێن پەرلەمانی پترن”.
ئەڤرۆ نیوز:
وەکو وەفاداریەک بۆ قارەمانیا وی، وەلاتیەکێ دھۆکێ ل سەر کیستێ خوە دێ پەیکەرەکی بۆ شەھیدێ فەرماندە مەغدید ھەرکی چێکەت.
جەلیل ھەرکی ئەو وەلاتیێ کو پەیکەری بۆ شەھیدێ فەرماندە دروستکەت بۆ ئەڤرۆ دیار کر کو شەھید مەغدید ھەرکی، پێشمەرگەکێ قارەمانبوو، ھەتا شەھید ژی بووی ب دلسۆزی بەرەڤانی ژ گەل و وەلاتێ خوە کریە دژی تیرۆرستان گۆت: “وەکو وەفاداری و رێزگرتنەک بۆ قارەمانیا شەھیدێ فەرماندە من ب فەردیت ل سەر کیستێ خوە پەیکەرەکی بۆ دروست بکەم”.
ئاشکرا ژی کر، بۆ ڤێ مەرەمێ ئەو د گەل ئەنجوومەنێ پارێزگەھا دھۆکێ و باژێرڤانیا دھۆکێ ئاخڤتییە و گۆت: “وان رازیبوونا خوە ل سەر ڤێ چەندێ دیارکریە و جە ژی بۆ چێکرنا پەیکەری ھاتیە دەستنیشانکرن”.
جەلیل ھەرکی گۆت: “مە دو جە بۆ دانانا پەیکەری دەستنیشانکرینە، جھێ ئێکێ: دۆریانا ئۆڤەرپاسا رۆژھەلاتا دھۆکێ، یێ دویێ ژی بەرامبەر دەرگەھێ فەرماندەیا دھوکێ یە، بەلێ رەنگە ل بەرامبەر دەرگەھێ فەرماندەیا دھۆکێ بھێتە دانان، ھەروەسا من سەرەدانا کۆلیژا ھۆنەرێن جوان کریە و ئەز د گەل وان ئاخڤتیمە و رەنگە ئەو ب ئەرکێ دروستکرنا پەیکەری راببن، ئەڤرۆ رۆژا ئێکشەمبی 20/12/2015 دێ دەست ب چێکرنا پەیکەری کەین و درێژاھیا وی دو میترن “.
فەرماندە مەغدید ھەرکی ئێک بوو ژ پێشمەرگێن قارەمان کو پشکداری د پرانیا شەرێن دژی تیرۆرستێن داعشێ دا کری و ل رۆژا 16/12/2015 ل چیایێ زەردک ھاتە شەھیدکرن.
ئەڤرۆ نيوز:
ئاژانسەکا دەنگوباسێن ئیرانی بەلاڤکریە کو ئەمریکا و تورکیا یێن بزاڤا دوورکرنا ھەردو پارێزگەھێن نەینەوا و ئەنبار ژ کونترۆلا حوکمەتا عیراقێ دکەن وەکو دەستپێکەک بۆ دروستکرنا دەولەتا سونی.
ئاژانسا (فارس) یا دەنگوباسان یا نێزیک ژ زێرەڤانێن شۆرەشا ئیرانی بەلاڤکر” وەکو دەستپێکەک بۆ دروستکرنا دەولەتەکا سونی، ئەمریکا و تورکیا یێن ڕێککەفتین کو ھەردو پارێزگەھێن نەینەوا و ئەنبار ژ نەخشێ عیراقێ دەربکەن، ب ڕێیا ھنارتنا ھێزێن لەشکری و کڕینا کەسایەتیێن سیاسی و عەشائیری ل وان ھەردو پارێزگەھان”.
ئاژانسا ناڤبری ژ زاردەڤێ شێخ (ئیبراھیم عیساوی) ئێک ژ سەرۆک عەشیرێن پارێزگەھا ئەنبارێ ڤەگوھاستیە کو” ئەمریکا یا کاردکەت بۆ کۆمکرنا پتریا سەرۆک عەشیرێن ئەنبارێ ژبۆ بەرھەڤکرنا وان بۆ پرۆژێ ھەرێما سونی کو ژ سنۆرێ سعودیێ ل باشوورێ و ھەتا تورکیا ل باکووری ب خوەڤە دگریت و بودجەکا ڤەکری ژی بۆ وی پرۆژەی یا ھاتیە دانان”.
گوت ژی” ھاتنا ھێزێن تورکی بۆ نەینەوا و دانانا ھندەک بنگەھێن ئەمنی یێن ئەمریکی ل نەینەوا و ئەنبارێ ل بن ناڤێ (شیرەتکارێن لەشکری) تنێ بەرھەڤکرنەکە بۆ بەرفرەھکرنا بنگەھێ ڤی پرۆژەی ب ڕێیا پشتەڤانیا لایەنگرێن خوە”.
راپۆرتا ئاژانسا (فارس) یا ئیرانی دیارکریە ژی کو”ھندەک گرۆپێن دناڤ حەشد شەعبی دا ل عیراقێ دوپات دکەن کو ئەو دێ دژی ھەر پرۆژەکێ ژ ڤی جۆری بن و ئەو دبێژن کو ھەبوونا ئەمریکی ھندەک ئارمانجێن دی یێن نە راگەھاندی یێن بۆ ھەین”.
نيشاندان