ئه‌ڤرۆ نيوز:
ئاشتن كارته‌ر، وه‌زيرێ به‌ره‌ڤانيا ئه‌مريكا و جه‌نرال جۆ دانفۆر سه‌رۆكێ ئه‌ركانێ هه‌ڤپشكێن سۆپايێ ئه‌مريكا د كۆنگره‌كێ رۆژنامه‌ڤانى دا راگه‌هاند كو وه‌زيرێ داراى يێ داعش هاته كوشتن.
هه‌ر ب گۆره‌ى نوچه‌كێ ئاژانسا هه‌والى يا NBC د هێرشێن ئه‌سمانى يێن 24 ده‌مژمێرێن بۆرى يێن فرۆكێن ئه‌مريكا دا بۆ سه‌ر بنگه‌هـ و باره‌گايێن داعش ل سوريا كه‌سێ دويێ يێ رێكخراوا داعش هاتيه كوشتن.
ئه‌ڤرۆ نيوز:
ب گۆره‌ى ژێده‌ره‌كى ژ هێزێن ئه‌منى يێن به‌لچيكا چه‌نده‌كێ به‌رى نوكه ده‌نگێ دو ته‌قينان هاته بيستن ل گه‌ره‌كا شارۆيكى يا برۆكسلا پايته‌ختێ وى وه‌لاتى.
ده‌نگێ ئه‌ڤ ته‌قينه لێ هاتيه بيست هه‌ر ئه‌و گه‌ره‌كن يێن ل حه‌فتيا بۆرى چه‌ندين روودانێن خوه‌كوژى لێ رووداين، به‌رپرسێن ئه‌منى يێن وى وه‌لاتى ژى وه‌لاتى ئاگه‌هداركرينه كو ژ مالێن خوه ده‌رنه‌كه‌ڤن.
هه‌ر ئه‌ڤرۆ نوونه‌رێ گشتيێ فيدرالى ل به‌لچيكا راگه‌هاند كو هێزێن ئه‌منى يێن وى وه‌لاتى شه‌ش كه‌س ده‌سته‌سه‌ركرينه و گۆمان دهێته كرن ده‌ست هه‌بيت د ته‌قينێن چه‌ند رۆژێن بۆرى يێن برۆكسلا پايته‌خت و ژ ئه‌گه‌رێ وێ چه‌ندێ ژى 31 كه‌س هاتينه كوشتن و نێزيكى 300 كه‌سان ژى بريندار بووين.
ئه‌ڤرۆ نيوز:
ب گۆره‌ى ژێده‌ره‌كى ژ گۆندێ كه‌مه‌كا يێ سه‌ر ب ده‌ڤه‌را دۆسكيان ڤه، ئه‌ڤرۆ ل دانێ شه‌ڤێ فرۆكێن توركيا پشتا گۆندێ وان تۆپبارانكريه و ژ ترسا دووباره روودانا ڤى كارى كه‌س نه‌وێريايه قه‌ستا وان ده‌ڤه‌ران بكه‌ت.
ئه‌ڤى ژێده‌رى بۆ ئه‌ڤرۆ نيوز گۆتژى: “هه‌ر چه‌نده خه‌لك زوو ب زوو قه‌ستا پشتا گۆندى ناكه‌ت، به‌لێ ترسه‌كا مه‌زن خستيه دلێ وه‌لاتيێن گۆندى و گه‌شتياران چونكو رۆژانه ژ ئه‌گه‌رێ ئاهه‌نگێن بهار و نه‌ورۆزێ خه‌له‌كێ زۆر قه‌ستا ده‌ڤه‌رێن دۆسكيا دكه‌ت و ب تايبه‌ت ژى ئاقارێ گۆندێ وان”.
دايه زانين ژى كو فرۆكان ل ده‌مژمێر 7:00ى شه‌ڤ هه‌تا 8:00 شه‌ڤ به‌رده‌وام ئه‌و ده‌ڤه‌ره بۆردۆمان كريه و نوكه ژى به‌رده‌وام فرۆكه يێ ل هنداڤ ئه‌سمانێ وان ده‌ڤه‌ران هاتنوچوونێ دكه‌ن.
ئه‌ڤرۆ نيوز:
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو ل رۆژا شه‌مبى رێكه‌فتى 26ى ئادارا 2016ێ هه‌رێما كوردستانێ دێ كه‌ڤيته بن كارتێكرنا هه‌ردو فشارێن نزمێن ده‌ريا سۆر و ده‌ريا ناڤه‌راست و ب شه‌ڤ دێ باران باريت.
دايه زانين ژى كو ژ ئه‌نجامێ دژواربوونا وان فشاران دێ باران گه‌له‌ك ب دژوارى باريت و ب تايبه‌ت ژى ل هه‌ردو پارێزگه‌هێن هه‌ولێر و سلێمانيێ كو دێ پترترين رێژا باران بارينێ لێ هێته تۆماركرن.
درباره‌ى ماوێ ڤانا ڤان فشاران ژى ل سه‌ر هه‌رێما كوردستانێ ئاشكه‌را كريه كو هه‌تا 30ى ڤێ هه‌يڤێ ئه‌ڤ باران بارينه دێ د به‌رده‌وام بن.
ئه‌ڤرۆ نيوز:
رێڤه‌به‌رێ گشتیێ گه‌شتوگوزارێ ل پارێزگه‌ها دهۆكێ دیاركر، د پێنج رۆژان دا هه‌ر ژ 19 هتا 23ێ ئادار، پترى 23 هزار و 57 گه‌شتیار سه‌ره‌دانا پارێزگه‌ها دهۆكێ كرین و دیار دبیت رێژه هه‌مبه‌ر سالا 2014 و 2015 باشتره.
عوبه‌یدوللا داوود، رێڤه‌به‌رێ گشتیێ گه‌شتوگوزارێ ل پارێزگه‌ها دهۆكێ بۆ دواڕۆژ ڕاگه‌هاند :” ژ ڤى رێژه‌ى 49% ژ پارێزگه‌هێن ناڤه‌راست و ژۆرییا ئیراقێ هاتبوون و 51% ژى ژ كۆمه‌لگه‌ها ده‌رگه‌هێ سنۆریێ ئیبراهیم خه‌لیل هاتبوون، لێ پترییا مفایێن دارایى ژ گه‌شتیارێن پارێزگه‌هێن دى یێن ئیراقێ ب ده‌ست وه‌لاتى و حوكمه‌تێ دكه‌ڤیت، چونكو گه‌شتیارێن ده‌رگه‌هێ ئیبراهیم خه‌لیل دوور نینه هنده‌ك ژ وان بۆ هه‌ولێر و سلیمانیێ چووبن یان مالێن وان هه‌ر ل دهۆكێ بن”.
لدۆر ئه‌گه‌رێن زێده‌بوونا رێژه‌یا گه‌شتیاران ژى رێڤه‌به‌رێ گشتیێ گه‌شتوگوزارێ گۆت:” به‌رى هاتنا نه‌ورۆزێ رێڤه‌به‌رییا مه كۆربه‌نده‌كێ گه‌شتیارى دگه‌ل چه‌ندین كۆمپانیێن گه‌شتیاریێن ئه‌ره‌بان كربوو، به‌رى چه‌ند رۆژان ژى كۆنفرانسێ نێڤده‌وله‌تیێ گه‌شتوگوزارێ ل هه‌ولێرێ هاتبوو به‌ستن و ب هه‌بوونا چه‌ندین ئاسانكارییان بۆ كۆمپانیێن بیانى بۆ ئینانا گه‌شتیاران، ئه‌ڤه هه‌موو ببوونه ئه‌گه‌ر كو رێژه‌یا هاتنا گه‌شتیاران زێده‌تر لێ بهێت”.
عوبه‌یدوللا خویاكر:” نێزیكى 12 هزار و 500 گه‌شتیارێن هه‌رێمێ و ئیراقێ د ڤان پێنج رۆژان دا ژ ده‌رگه‌هێ سنۆریێ ئیبراهیم خه‌لیل به‌ره‌ڤ وه‌لاتێ توركیا چۆینه”.
ئه‌و ئاسانكاریێن بۆ كۆمپانیێن گه‌شتیاریێن بیانى هاتینه كرن چ بوون؟ رێڤه‌به‌رێ گه‌شتوگوزارا دهۆكێ گۆت: “بۆ ب ئاسانى ده‌ربازبوون ژ خالێن سنۆریێن هه‌رێمێ بۆ گه‌شتیارێن ئه‌ره‌ب یێن ئیراقێ، ب تنێ پێدڤى بوو گرێبه‌سته‌كا كۆمپانییه‌كا فه‌رمى یا هه‌رێمێ هه‌بیت و لیستا ناڤێن گه‌شتیاران بگه‌هیننه لایه‌نێن ئێمناهیێ و ب ڤى ره‌نگى گه‌شتیار ده‌ربازى هه‌رێمێ دبوون و ل چو خالێن دى ناهێنه راوه‌ستاندن”.
ناڤبۆرى گۆت ژى:” بۆ وان كۆمپانیێن بشێن گه‌شتیاران ژ ده‌رڤه‌ى وه‌لاتى بیننه ناڤ هه‌رێمێ دێ ئاسانكارى ژ لایێ پێدانا ڤیزایێ و رسوماتان بۆ هێنه كرن و هه‌ر ئه‌ڤ ئاسانكارییه و هنده‌ك دى ژى دێ بۆ وان كۆمپانیێن بیانى هه‌بیت كو گه‌شتیاران ژ ده‌رڤه بیننه ناڤا هه‌رێمێ”.
رێڤه‌به‌رێ گشتیێ گه‌شتوگوزارا دهۆكێ زه‌لال كر:” كو ب وى پاره‌یێ كێم یێ كو ده‌سته‌یا گشتییا گه‌شتوگوزارێ بۆ مه ته‌رخان كربوو، چه‌ندین ده‌ستئاڤێن گه‌شتیارى و حاویێن گلێشى هاتینه نووژه‌ن و پاقژ كرن، دگه‌ل وان حاویێن گلێشى كو به‌رى ده‌مه‌كێ ژلایێ ده‌زگه‌هێ روانگه بۆ رێڤه‌به‌رییا گه‌شتوگوزارێ هاتبوونه پێشكێش كرن كو ل هه‌موو ده‌ڤه‌رێن گه‌شتیارى هاتینه دانان”.
عوبه‌یدوللا گۆت ژى: ” رێژه‌كا مه‌زنا كیسكێن گلێشى و رێبه‌رێن گه‌شتیاریێن پارێزگه‌ها دهۆكێ دگه‌ل ده‌فته‌ركێن تێبینییان و پێنۆسان و ئالایێ كوردستان یێ به‌رسینگان ل سه‌ر گه‌شتیاران هاتینه به‌لاڤ كرن.”
ئه‌ڤرۆ نيوز:
رۆژنامێن ئسپانى هه‌ر نوكه به‌لاڤ كرينه كو ل هاڤينا بهێت زێدان داخازا چه‌ندين ياريكه‌ران كريه.
ل دووڤ ده‌نگوباسێن ئسپانى زێدان راهێنه‌رێ ريال مه‌دريد داخازا لیڤاندۆڤیسكى و مۆراتاو پیر ئۆبامیانگ و ویندل و رۆدیگرێزى كريه بۆ هێلێن پێشى و ره‌خان و هه‌روه‌سا داخازا ماركۆ ڤیراتى و پۆڵ پۆگبا كريه كو گرێبه‌ست ل گه‌ل بهێنه گرێدان.
ئه‌ڤرۆ نيوز:
نياز مه‌عمار ئۆغلۆ، بڕيارده‌رێ جڤاتا نوونه‌رێن عيراقێ ئاشكه‌را كر كو جڤاتێ بڕيار دايه به‌رى ب دووماهى هاتنا ڤێ خولا نوكه، هه‌موو ئه‌وان بڕياران ژ ناڤ ببه‌ت يێن سه‌رده‌مێ رژێما به‌عس ب ناڤێ “جڤاتا سه‌ركرداتيا شوره‌شێ” ده‌رچووين.
ئاماژ ب وێ چه‌ندێ ژى كر كو چه‌ندين بڕيار ژ وان هه‌تا نوكه ژى كار پێ دهێته كرن و ب قانوون نه‌هاتينه ژناڤبرن و “ئه‌ڤه ژى ل گه‌ل كاودانێن نوكه ناگۆنجيت و جهێ تێبينيێ نه”، ژ به‌ر هندێ “سه‌رۆكاتيا په‌رله‌مانى ژى يا رژده وان بڕياران ژناڤ ببه‌ت”.
ئه‌ڤرۆ نيوز:
توركيا د رێيا فرۆكێن خوه يێن شه‌ركه‌ر و تۆپێن دوورهاڤێژ ڤه گۆندێن سنورێ ناحيا دێره‌لۆك يا سه‌ر ب قه‌زا ئامێديێ ڤه بۆردۆمان كرن.
ب گۆره‌ى گۆتنێن شاهدحالان، دوهى رۆژا چارشه‌مبى 23ى ئادارا 2016ێ سۆپايێ توركيا ب رێيا فرۆكێن خوه يێن شه‌رى و تۆپێن دوورهاڤێژ بۆردۆمانا هه‌ر ئێك ژ ده‌ڤه‌رێن رێكان و نهێلێ يێن سه‌ر ب ناحيا دێره‌لۆك ڤه كريه.
دا زانين كو ئه‌ڤ تۆپبارانه شڤێدى ب شه‌ڤ هاتيه كرن و بۆ ماوێ زێده‌تر ژ دو ده‌مژمێران يا به‌رده‌وام بوو، هه‌ر وكو دايه زانين ژى كو “زيانێن گيانى ب به‌ر وه‌لاتيێن سڤيل نه‌كه‌فتينه”.
ئه‌ڤرۆ نيوز:
سۆپايێ عيراقێ ئه‌ڤرۆ رۆژا پێنجشه‌مبى رێكه‌فتى 24ى ئادارا 2016ێ ل مه‌خمۆر هێرش كره سه‌ر چه‌كدارێن داعش و گۆنده‌ك كۆنترۆلكر.
نه‌جان عه‌لى، سه‌رپه‌رشتيارێ هێزێن پێشمه‌رگه‌ى ل مه‌خمۆر راگه‌هاند: سۆپايێ عيراقێ ل ده‌مژمێر 6:00ى سپێدێ هێرش بۆ سه‌ر داعش ده‌سپێكريه و به‌ر ب باشوورێ رۆژهه‌لاتێ مووسل د پێشره‌ويێ دانه و فرۆكێن هه‌ڤپه‌يمانان ژى ب دژوارى يێ بۆردۆمانا داعش دكه‌ن.
گۆتژى: “هه‌تا نوكه گۆندێ كه‌رمردێ كۆنترۆلكريه و پێشمه‌رگه ژى د ئاماده‌باشيێ دايه، به‌لێ پشكدارى هێرشێ نه‌بوويه”.
ئاماژه ب وێ چه‌ندێ ژى كر كو ئه‌ڤ هێرشه ده‌سپێكا قووناغا كۆنترۆلكرنا مووسله و “مه‌ره‌م بێ گه‌هشتنه ب گه‌ياره و شه‌ر ژى يێ به‌رده‌وامه”.
نيشاندان