ئەڤرۆ نیوز:
دەولەتا تورکیا یا رژدە بەرخوەدانا لاوێن کورد ل باژێرێن باکورێ کوردستانێ ژناڤ ببەت و گەل و لاوێن کورد ژی بریار داینە کو بەرخوەدانا خوە مەزن بکەن و ھەرێمەکا خوەسەر ل باکورێ کوردستانێ ئاڤا بکەن و ژ بەر رژدبوونا ھەردو ئالیان ل سەر رێیا خوە جودابوونەکا مەزن کەڤتیە د ناڤبەرا گەلێ کورد و دەولەتا تورکیا دا و نڤیسەرەکێ تورک ژی دیار دکەت کو ئێدی زەحمەتە بەحسێ پێکڤەژیانا کورد و تورکان بھێتە کرن.
ئەحمەد ئالتان نڤیسەر و رۆژنامەڤانێ ناڤدار یێ تورکیا د داخۆیانیەکی دا بۆ رۆژناما ئەڤرۆ راگەھاند کو دەمێ وی دیمەنێن تانک و تۆپان د ناڤ باژێرێن کوردان دا دیتی حێبەتی مایە و گۆت: (بەری نھا من دگۆت دڤێت ئالیێ کوردی ھندەک نەرم نێزیکی قۆناغێ ببیت و ب رێیێن ئاشتیانە داخوازیێن خوە بلند بکەت، لێ پشتی دیمەنێ تانک، تۆپ و ب ھزاران سەرباز و تیمێن تایبەت من ب چاڤێن خوە دیتن نھا ئەز ژی دبێژم کو دەولەتا تورکیا ئێدی ل باژێرێن کوردان کەڤتیە د رەوشا داگیرکەریێ دا و ژ بلی بەرخوەدانێ چ رێیەکا دی بۆ کوردان نەمایە، بۆ ڤێ چەندێ دڤێت دەولەت بەری بلندبوونا ئاگرێ شەرێ گەلان دەست ژ داگیرکرنێ بەردەت و کوردان بۆ دانوستاندنان ڤەخوینیت ھەکە نە ب ئاشکرا دبێژم کو ئێدی کورد و تورک نەشێن پێکڤە بژین).
ئالتانی ھەروەسا دیار ژی کر چو تشتەک وەک مافێ ژیانێ ب رومەت نینە و دڤێت ھەرکەس رێزێ ل مافێ ژیانا یێ بەرامبەری خوە بگریت، تشتێ ئەڤرۆ ل باژێرێن کوردان روو ددەت بێ رێزیا دەولەت و دەستھەلاتدارێن تورکیایە ل ھەمبەر مافێن سروشتی یێن ژیانا گەلێ کورد و گۆت: (ئەز بانگ ل دەستھەلاتدارێن تورکیا دکەم کو ھێرشێن ل سەر گەلێ کورد و باژێرێن وان راوەستینن و باش بزانن کو ب کوشتن و تانک و تۆپان ھوون نەشێن خوە بگەھیننە ئارمانجێن خوە، ژ بەر کو ل ھەمبەری وە ڤێجارێ ملەتەکی خوەدان بریار و ب ئیرادە ھەیە و ئەڤ ملەتە نە یێ دەمێن بۆریە، بۆ ڤێ چەندێ ژی ھەکە ب راستی ھوون خەمخۆرێن تورکیا نە ھێرشان راوەستینن و ل گەل نوونەرێن کوردان ب دانوستاندنان پرسگرێکا کوردی چارە بکەن).
ل ئالیێ دی ئەحمەد داوود ئوگلۆ سەرۆک وەزیرێن تورکیا د داخۆیانیەکی دا راگەھاند کو ھەکە پێدڤی بکەت ئەو دێ مال ب مال شەرێ تیرۆرێ کەن و باژێران پاقژ بکەن و گۆت: (تورکیا وەلاتەکی دیمۆکراتیکە و ل وەلاتێن دیمۆکراتیک ژی ب خەندەک و شەرێ کۆلانان کەس نەشێت چو داخوازیان ب دەولەتێ بدەتە قەبوولکرن و بلا باش بزانن کو ھەتا یەک کەس ژ وان بمینیت ئەم دێ ئۆپەراسیۆنێن د ناڤ باژێران و چیایان دا دژوارتر کەین).
داوود ئوگلۆ د پشکەکا دی یا ئاخڤتنا خوە دا ژی راگەھاند کو ئەڤە جارەکا دی دوبارە دکەن دڤێت ھەموو چەکدارێن PKKێ دەست ژ چەکێن خوە بەردەن و خوە رادەستێ دەولەتێ بکەن ھەکە نا ئەم دێ وان ژناڤ بەین و گۆت: (تورکیا دەولەتەکا مەزن و ب ھێزە و د دیرۆکا خوە دا چو دەمەکێ سەرێ خوە بۆ تیرۆرست و تێکدەران خوار نەکریە و ناکەت و دڤێت ھەموو وەلاتیێن مە یێن کورد ژی ل دژی تیرۆرستان دەرکەڤن و وان ژ باژێرێن خوە دەرخینن، ژ خوە ھەتا نھا مە یەک وەلاتیێ سڤیل ژی نەکوشتیە و ئەم گرنگیەکا مەزن ددەینە ژیانا وەلاتیان).
ھەر د ڤێ دەربارێ دا بۆ شەرمەزارکرنا ئۆپەراسیۆنێن تورکیا د ناڤ باژێرێن باکورێ کوردستانێ دا ل ئامەدێ خوەنیشادانێن مەزن ھاتنە سازکرن و ھێزێن دەولەتێ ھێرشەکا مەزن برنە سەر خوەنیشادەران و د ئەنجام دا ل ئامەدێ دو لاوێن کورد کوشتن و شەش کەس ژی بریندار کرن، ھەروەسا ل باژێرێ جزیرێ ژی پۆلیسێن تورکیا وەلاتیێن سڤیل د ناڤ تاخا جودی دا گوللەباران کرن و د ئەنجام دا لاوەکی کورد جانێ خوە ژ دەست دا و دو وەلاتیێ د ژی بریندار بوون و ل کەربۆرانێ ژی لاوەکی کورد ژ ئالیێ ھێزێن ئێمناھیێن تورک ڤە ھاتە کوشتن.
دیسا ل باژێرکێ بسمیل یێ سەر ب ئامەدێ لاوێن کورد ب چەکان ھێرش برنە سەر پۆلیسێن تورک و د ئەنجام دا چار پۆلیس کوشتن و ل نسێبینێ ژی د دەمێ دەربازبوونا کاروانێ ترومبێلێن سەربازی دا بۆمبەک پەقی و د ئەمجام دا شەش سەربازێن تورک ھاتنە کوشتن و ئۆپەراسیۆنێن دەولەتێ ل ناڤەندا باژێرێن نسێبینێ، جزیرا بۆتانێ، سلۆپی، سورێ، کەربۆرانێ و شەمزینانێ بەردەوام دکەن و لاوێن کورد ژی ب دژواری بەرسڤا ھێرشێن دەولەتێ ددەن.

ئەڤرۆ نیوز:
زێرەڤان بەرواری شارەزایێ سیاسی ددەت دیارکرن کۆ تورکیا دبوراێ سیاسەتا دەرەکی دقووناغەکا نوو دا دبوریت, و ئەڤ قوناغە فەڕێژا ئالۆزبوونا قەیرانا سوری و تێکچوونا بەڵانسا ھێزیە د ڕۆژھەڵاتا ناڤین دا و ئەنقەرە پێکۆلان دکەت بلۆکێن سیاسی و ئابووری و ئەمنی پەیرەو بکەت پێخەمەت بەرژەوەندیێن خوە و گۆت ژی : ھەرێما کوردستانێ ل ساڵا 2009 ب شێوەکێ راستەوخوە بوویە ھەڤپەیمانا تورکی دبوراێ سیاسی و ئابووری دا و ئەڤرۆ قوناغا جێبەجێ کرنا پڕوژەیێن ستراتیجی ل گەل ھەرێمێ دەست پێکریە بتایبەت پشتی بێ ھێڤی بوون ل گەل بەغدا
شارەزا دوارێ پەیوەندیێن تورکیا دا گۆت ژی : داخوازکرنا سەرۆکێ ھەرێما کوردستانێ بۆ تورکیا دو خواندن بۆ ھەنە ئێک یا سیاسیە ئەو ژی تورکیا بەرەف پرەنسیپێ ئەمنی دچیت دسیاسەتا دەرەکی دا بۆ لاوازکرنا ھەڕەشێن رووسیایێ و ئیرانێ ل سەر بەرژەوەندیێن ئەنقەرە و تورکیا بزاڤان دکەت ھەرێم ببیتە پشکک ژ ھەڤپەیمانیا سونی ئەوا پێکھاتی ژ (سعوودیێ,قەتەر,تورکیا) و ژبەر جوگرافیا ھەرێمێ و پەیوەندیێن ھەرێمێ ل گەل ئەمریکا و ئوڕوپا ھەروەسا ڕێگرتن ل رووسیا بۆ ب کارئینانا کارتا کوردی دژی تورکیا.
ماموستایێ زانکۆیا دھۆک گۆت : خواندنا دوێ ژی خواندنەک ئابووریانەیە ئەو ژی پشتی ئاڵوزبوونا پەیوەندیێن رووسیا و تورکیا پتر ژ 35% ژێدەرێ وزێ یێ تورکی تووشی مەترسیا برینێ بوویە , ئەنقەرە دو ئەلتیرناتیفێن دن ھەلبژارتن ئەو ژی قەتەر و ھەرێما کوردستانێ , و پێشبینی دھێتە کرن ل قۆناغا داھاتوو ھەرێم ببیتە ئێک ژ ژێدەرێن سەرەکی بۆ دابینکرنا وزێ بۆ تورکیا.
شارەزایێ سیاسی ل دۆر ھاتنا ھێزێن تورکی بۆ ھەرێمێ ددەت دیارکرن، لایەنێ باش و لایەنێ خراپ ژی ھەنە و باشیا وێ ژی ئەوە ھەرێما کوردستانێ ل ژێر مەترسیا میلیشیایێن شیعی و کارتێکرنا ئیرانێ و ئەڤ کارتێکرن و مەترسیە پشتی قووناغا داعشێ دێ مەزنترین ھەڕەشە بیت ل سەر ئەزموونا کوردی و کوردستانێ پێدڤی ب ھەبوونا ھێزەکا لەشکری یا ھەرێمی ھەیە ئەڤجا چو تورکی بیت یان ئەمریکی یا گرنگ د شێوازێ ڕێککەفتنا سیاسی دایە، ھەکە ئەڤ ھێزا تورکی ب ھەڤکاری ل گەل ناتوو بیت بۆ ڕێگرتن ل کارتێکرنا رووسی- ئیرانی دێ بیتە سەدەم بۆ بەردەوامیا پاراستنا دەولەتێ بۆ کوردستانێ.
دیارکر ژی لێ لایەنێ خراپ ژی ھەیە ئەو ژی ئەگەر ئەو ھێز ب ھەڤکاریا ئێکەتیا ئوروپی و ئەمریکا نەبیت دێ بیتە سەدەم کو گڤاشتنێن ھەرێمی و دەولەتی ل سەر ھەرێمێ زێدە ببن ژ دەستێوەردانا ئیرانێ و حوکمەتا ناڤەندی و زێدەکرنا کارتێن فشارێ یێن سیاسی و ئابووری و ژلایێ دەستووری ڤە دێ بیتە سەدەمێ بەرپرس بوونا ھەرێمێ ھەمبەری بەغدا.
ل دووماھیێ زێرەڤان بەرواری گۆت: ھەرێما کوردستانێ ل ژێر کارتێکرنا ڕولێ تورکی ڕەفتارێ دکەت ژبەر نێزیکبوونا ئایدولۆٍجی و ھەبوونا ئێک چارەنڤیساز ل دەڤەرێ و ھەرێم پێدڤی ب سیاسەتەکا ژیواری ھەیە بو پاراستنا ئایشا کوردستانێ ژ ناکوکیا دەولەتی.

ئەڤرۆ نیوز ، لەزگین جوقی:

د کونگرەکێ رۆژنامەڤانی دا ئه‌ڤرۆ 15/12 قائیمقامێ قەزا شنگال دا زانین کو  راستە شنگال یا ھاتیە رزگارکرن لێ ھیشتا ھندەک دەڤەرێن سەر ب شنگال ڤە ماینە، ھەر دەمێ مەترسی ل سەر شنگال ب تەمامی نەما و خزمەتگوزاری گەھشتنە شنگال ئێدی خەلکێ شنگال ژی بەر ب دەرڤەی وەلاتی ناچیت و حەز دکەت ل سەر ئاخا خوە بژیت.

مەحما خەلیل قائیمقامێ قەزا شنگال د کونگرەکێ رۆژنامەڤانی دا ئەڤرۆ 15/12/2015 راگەھاند: ھێزێن پێشمەرگەی پیشەڤانی و بەرەڤانی ژ شنگال کر و ئەڤرۆ شنگال پێدڤی چو ھێزین دی نینە بۆ پاراستنا شنگال.

گۆتژی: “خەلکێ شنگال ب پشتەڤانیا پێشمەرگەیێ قارەمان دێ شنگال پارێزن، شنگال ل سەر دەستێن پێشمەرگەیێ قارەمان ھاتە رزگارکرن”.

زێدەتر گۆت: “ئەم رێزێ ل ھەموو لایەنێن سیاسی دگرین لێ ئەو لایەنێن دبێژن مە شنگال رزگارکر چو راستی بۆ نینە، ھەموو خەلک و جھان دزانی کێ شنگال رزگارکر”.

قائیمقامێ قەزا شنگال ئاماژە ب وێ چەندێ ژی کر کو خەلکێ شنگال وەلات پارێزن و چو جاران دەست ژ ئاخا خوە بەرنادەن و ھەر رۆژا کارەساتا رزگار روودایی و ھەتا ھاتیە رزگارکرن گەنجێن شنگال ل سەرێ چیایی مان و بەرەڤانی ژێ دکر ب پشتەڤانیا سەرۆک بارزانی.

دا زانین ژی کو ئاریشا سەرەکی یا ڤەنەگەریانا وەلاتیان بۆ نەبوونا خزمەتکاریان ل شنگال د ڤەگەریت و ژ لایێ تی ئێن تیان ژی ڤە ب تەمامی نەھاتیە پاقژکرن.