ئه‌ڤرۆ نيوز، هه‌رهين محه‌مه‌د:
ئه‌ڤرۆ كرستيانێن جيهانێ و كوردستانێ جه‌ژنا ژ دايبكوونا حه‌زره‌تێ مه‌سيح سلاڤێن خودێ ل سه‌ر بن ساخكر، ل هه‌رێما كوردستانێ و پارێزگه‌ها دهۆكێ ژى د كه‌شوهه‌وايه‌كێ ئارام دا رێ و ره‌سمێن ڤێ جه‌ژنێ هاتيه گێران.
ئه‌ڤێن ل خوارێ چه‌ند ديمه‌نێن گێرانا وێ جه‌ژنێ نه ل دێرا به‌رانى ل دهۆكێ ئه‌وا دبێژنێ كه‌نيسا شه‌هيد “مارايث الاثا”.
ئەڤرۆنیۆز، سالار دۆسکی:
دچارچووڤێ دیدارەکا تایبەت دا ل بەرنامێ (پەروەردە و ژیان) کو راگەھاندنا رێڤەبەریا گشتی یا پەروەردا پارێزگەھا دھۆکێ بەرھەڤ دکەت، رادیۆیا دھۆک رۆژێن پێنج شەمبی دھێتە پێشکێشکرن کو ئەڤرۆ 24/12/2015 و خەلکا ئەڤرۆ یا تایبەت بوو ب کێشێن قوتابیێن پەیمانگەھا راھێنان و گەشەپێدانا مامۆستان ڤە، ب مێھڤانداریا د. ئیبراھیم ئەحمەد سمو سەرۆکێ لژنا پەروەردێ ل پەرلەمانێ کوردستانێ، دیسان حەکیم عەبدوللا رێڤەبەرێ پەیمانگەھا راھێنان و گەشەپێدانا مامۆستان ل دھۆکێ، حەسەن عەبدوغەفور نوونەرێ قوتابیان ل پەیمانگەھێ و پشتی گەنگەشەکا تێر و تەسەر، د. ئیبراھیم ئەحمەد سمو دیارکر کو بەری پەرۆگرامی ب چەند خولەکا پەیوەندی ب وەزیرێ پەروەردێ د.پشتیوان سادق کریە و گازندا قوتابیان گەھاندیێ، وەزیرێ پەروەردێ حوکمەتا ھەرێمێ ل سەر خواستێن قوتابیان رازیبوویە و بڤی رەنگی.
1- سێ کورس ببنە دو کورس
2- ماف و ئمتیازاتێن باوەرناما بەکالوریورسێ بھێنە ھەژمارتن
3- مامۆستایێن پەیمانگەھا ناڤبری ماف ھەیە بەردەوامیێ بدەنە خواندنا خوە یا ماستەر و دکتورایێ و ب مەرەجەکی پشتی وەرکرتنا باوەرنامێ ڤەگەریتە سەر کارێ خوە ل پەیمانگەھا ناڤبری.
د.ئیبرھیم ئەحمەد سمو دیارکر ژی کو دانا باوەرناما بەکالوریوس نە دەست ھەلاتێن وەزارەتا پەروەردێ نە، بەلکو دڤێت دچارچووڤێ قانوونەکا بچووک دا ل پەرلەمانی ئەڤە بھێتە راستڤەکرن و کار ل سەر بھێتەکرن و ھیڤی خواستن ل دەمەکێ نێزیک ئەڤە ژی بھێـتەکرن.
ھەڤدەم، پشتی ڤی نووچەی حکیم عەبدوللا رێڤەبەرێ پەیمانگەھا راھێنان و گەشەپێدانا مامۆستان ل دھۆکێ دەست خوەشی ل د.ئیبراھیم ئەحمەد سموکرن و دیارکر کو پشتی جەژنا سەرێ سالێ دێ دوڤچوونێ ل سەر بابەتی کەت و دێ ب نڤیسار ھەموو قوتابیان ھایدارکەت.
دووماھیێ ژی نوونەرێ قوتابیان سوپاسیا د.ئیبراھیم ئەحمەد سمو سەرۆکێ لژنا پەروەردێ، حکیم عەبدوللا رێڤەبەرێ پەیمانگەھێ کرن و سوز دا بچنە ھولێن خواندنێ و بەردەوامیێ بدەنە خواندنا خوە.
ئەڤرۆ نیوز ، نەوزاد زادە ھلۆری:
وەکو وەفداری و رێزگرتنە بو قارەمانیا شەھیدێ فەرماندە ” مەغدید ھەرکی ” مونیمێنتەک دێ ل ناحیا گردەسێن ھێتە درۆستکرن.
ڤی واریدا خانو ھەرکی سەرپەرشتێ دروستکرنا ئەوی مونیمێنتێ بو ئەڤرۆ نیوز گۆت : ( وەکو رێزگرتن و وەفاداریە بو قارەمانیا شەھیدێ فەرماندە مەغدید ھەرکی دێ مونیمێنتەکێ بو شەھید مەغدید ھەرکی ل دوریانا گردەسێن ھێتە چێکرن ، و مە دەست بکارێ خوە کریە و ل ئایندەیەکێ نێزیک دێ کارێ مە ب دوماھیی ھێت )
زێدەتر گۆت : ( قەبارێ ئەوێ مونیمێنتێ ب 5×4م و دێ چوار وێنەیێن ب قەبارێ 1:30×2م تێدا ھێنەدانان و ھەموو مەزاختنێن وێ ژی دێ ژلایێ من و رائید ھەرکی و چەند گەنجەکێن عەشیرەتا ھەرکیان ڤە ھێنە مەزاختن و مە دەستوری ژی ل رێڤەبەریا ناحیا گردەسێن و باژێرڤانیا گردەسێن وەرگرتیە ، و ھەردەما ب دوماھیی ھات دێ د رێورسمەکێ ژ ھەژی دا ب بەرھەڤبوونا دام و دەزگەھێن حکومی و حزبی و کەس و کارێن شەھیدی و جەماوەرێ دەڤەرێ ھێتە ڤەکرن )
بەری نھا ژی گەنجەکێ دن یێ باژێرێ دھوکێ بۆ روژناما ئەڤرو دیارکر بو کو ئەو ژی دێ لسەر کیسێ خوە پەیکەرەکێ ل سەنتەرێ باژێرێ دھوکێ درۆستکەت.
دھێتە زانین کو لرۆژا 16/12 ل چیایێ زەرتەک فەرماندە مەغدید ھەرکی ب دەستێن تیرورستێن داعشی شەھیدبوویە کو ئێک بوویە ژ فەرماندەیێن ھەری دیار و قارەمان دناڤا رێزێن پێشمەرگەی بەرامبەر تیرورستێن دان و پرانیا شەرێن مێحوەری َناوەران و چەند جھەکێن دن پشکداربویە.
ئەڤرۆ نیۆز، ھەرھین محەمەد:
ئاشتی ئنجلین قەشێ کەنیسا تەزبیح بۆ ئەڤرۆ نیوز دیارکرکو ئەڤ سالە جەژنا ژدایک بوونا حەزرەتا مەسیح وەکو ھەر سال ب ئاھەنگێن مەزن ناھێتە گێران چونکو ئەڤ سالە گەلەک شەھید ھاتینە دان و لەورا بتنێ ئەڤ رۆژە دێ ھێتە ساخکرن ب سرودێن ئاینی و گۆتنا چیروکا ژدایک بوونا حەزرەتا مەسیح ل ھەموو کەنیسەیان.
قەشێ کەنیسا تەزبیح ھیشتاژی گۆت: ئەڤ جەژنە دێ بۆ ماوێ سێ رۆژا دێ بەردەوام بین ل ھەمی کەنیسا ل دەمژمێر دەھی سپێدی ھەتا دمژمێر ئێکی نیڤرو.
ئه‌ڤرۆ نيوز:
ئێڤاريا ئه‌ڤرۆ رۆژا پێنجشه‌مبى، بهايێ په‌ترۆلێ نێزيكى نێزيكترين ئاست بوويه و ئێك به‌رميل ب 37$ ئه‌مريكى هاتيه فرۆتن، ئه‌ڤه ژى كێمترين بهايه د ماوێ 11 سالێن بۆرى دا كو ژ ئه‌گه‌رێ خستنا زێده يا ناڤ بازارى ل سه‌ر ئاستێ جيهانێ بوويه و ل گه‌ل ڤێ چه‌ندێ يا ئه‌مريكى ژى هێشتا هاته خوار و ئه‌و ژى ژ ئه‌گه‌رێ يه‌ده‌كێ په‌ترۆلا وى وه‌لاتى و كێمبوونا ئاستێ هه‌لكه‌ندنا بيرێن نوو يێن په‌ترۆلێ ل وى وه‌لاتى.
ئه‌ڤه د ده‌مه‌كى دايه كو رۆژا سێشه‌مبى بهايێ په‌ترۆلا خاڤا بڕێنت گه‌هشتيه 35.98$ و ئه‌ڤه ژى كێميرن بهايه د ماوێ 11 سالێن بۆرى دا.
ئه‌ڤرۆ نيوز:
سه‌رپه‌رشتيارێ به‌رێ يێ بزاڤا گۆڕان ل بادينان روونكرنه‌ك ده‌رباره‌ى ده‌ست ژ كاركێشانا خوه ل سه‌ر سه‌رپه‌رشتياريا وێ حزبێ ل بادينان و رادگه‌هينيت: هه‌كه هه‌ر به‌حس و خواسته‌كا هه‌بيت ژى ل دووڤ گۆتنا خوه دێ ل گه‌ل براده‌رێن خوه د بزاڤا گۆڕان دا به‌حس كه‌ت.
د روونكرنێ دا، كو ئه‌ڤرۆ نيوز وێنه‌ك ب ده‌ست خوه ئێخستيه هاتيه: “د چه‌ند رۆژێن بۆرى دا چه‌ند ده‌نگوباسه‌ك به‌لاڤ بووينه ده‌رباره‌ى په‌يوه‌نديا من و بزاڤا گۆڕان، ل ڤێره من دڤێت ئه‌وێ چه‌ندێ روون بكه‌م كو من چو ئاخفتنه‌كێ ب ئێكسه‌ر يان نه ئێكسه‌ر بۆ چو لايه‌نه‌كى يان ميديايه‌كێ نه‌كريه و من كه‌س ژى نه‌كريه وه‌كيل ل جهێ من باخڤيت”.
سه‌رپه‌رشتيارێ به‌رێ بزاڤا گۆڕان ل بادينان ئاماژێ ب وێ چه‌ندێ ژى دكه‌ت كو هه‌كه هه‌ر به‌حس و داخوازيه‌كا هه‌بيت ب گۆبتنا خوه دێ ل گه‌ل براده‌يێن خوه ل بزاڤا گۆڕان به‌حس كه‌ت.
هشيار عابد ماوێ دو سالا سه‌رپه‌رشتيا بزاڤان ل ده‌ڤه‌ران بادينان كريه، به‌لێ د چه‌ند رۆژێن بۆرى دا ده‌ست ژ كاركێشايه بێ كو چو ئه‌گه‌ران ل دۆر ده‌ست ژ كاركێشنا خوه ئاشكه‌را بكه‌ت.
ئەڤرۆ نیوز، نەوزاد زادە ھلۆری:
ئەڤرۆ رۆژا پێنجشەمبی چەکدارێن داعشێ ل مووسل چوار ماموستا سێدارەدان و بەرپرسێ لقێ 14ێ پارتی ددەتن دیارکرن کو لڤینێن وان د ناڤا مووسل زۆر بووینە.
عسمەت رەجەب بەرپرسێ لقێ 14 يێ پارتی دیموکراتی کوردستان ل مووسل بۆ ئەڤرۆ نیوز گۆت: (ئەڤرۆ پێنجشەمبی چەکدارێن داعشێ چار مامۆستا ب تومەتا وێ یەکێ کو خەمساری د گوتنا وانەیێن مەھجەجێ داعش دا کریە سێدارەدان).
زێدەتر گۆت: (ل ڤان رۆژان لڤلڤین و پشکنینێن چەکدارێن داعشێ ل مووسل و وان دەڤەرێن ل ژێر دەستێ وان بوو سەر جە و مال و وەلاتیێن دەڤەرێ زور بوینە و ب بھانەیێن جودا جودا وەلاتیان د کوژن و سێدارەددەن).
ئه‌ڤرۆ نيوز:
جڤاتا وه‌زيێن هه‌رێما كوردستانێ ب هه‌لكه‌فتا هاتنا جه‌ژنا ژدايكبوونا حه‌زره‌تێ مه‌سيح سلاڤێن خودێ ل سه‌ر بن په‌يامه‌ك به‌لاڤكر و ئه‌ڤه ژى ده‌قێ وێ يه:
جڤاتا وەزیرێن ھەرێما کوردستانێ جەژنا ژدایکبوونا حه‌زره‌تێ ئیسا مه‌سيح (سلاڤێن خوەدا لێ بن) و سەرسالا نوویا زایینی ب گەرمی ل تەڤ خووشک و برایێن مه‌سيحىیێن کوردستانێ و تەڤایا مه‌سيحىیێن ئیراق و جیھانێ پیرۆز دکە و ھێڤیدارە کو، ئەم ھەموو جەژنەکە ئارام و بەختەوەر دەرباس بکن.
ژ کەڤن دە مه‌سيحى پێکھاتەیەکە سەرەکییا کوردستانێ نە و ب ئازادی و ئارامی ئۆلا خوە پەیرەو کریە و بەشداریەکە گرنگ د دیرۆکا شارستانیا کوردستانێ و پێکانینا ئاشتیا جڤاکی، پێکڤەژیان و لێبھورینێ ل کوردستانێ ھەیە، د بزاڤا رزگاریخوازا کوردستانێ ژی دە خوەدیێن چەندین پێشمەرگە، شەھید و سەرکردەیێن مێرخاسن، ھەروەسا، ژ دەستپێکا دامەزراندنا ھکوومەت و پارلامنەتۆیا کوردستانێ و د ئاڤاکرن و بھێزکرنا سازیێن ھکوومی، مەدەنی و سیستەما دەمۆکراسیا کوردستانێ دە پێکھاتەیا مه‌سيحى رۆلەکە گرنگ لیستیە.
ژ بۆ ھەرێما کوردستانێ شانازیە کو، نھا ل جیھانێ ب ھەرێمەکە ئارام و ب ھشارا کۆچبەر و لێقەومیێن دەستێ تەرۆر و شدەتێ تێ ناسکرن، ب ھەزاران ھەڤوەلاتیێن مه‌سيحى ژ بەر گەفێن تەرۆریستان و شدەتا مەزھەبی ژ دەڤەرێن دنیێن ئیراقێ پەنا بۆ ھەرێما کوردستانێ ئانییە. ئەم ھێڤیدارن ب ھیمەتا پێشمەرگە و گەلێ خوەراگرێ کوردستانێ و ب پشتەڤانیا ھەڤپەیمانان و دۆستان داوی ب ڤێ مەترسیا کارەساتبار بێ و تەڤ کۆچبەر و پەنابەر بۆ سەر مال و ملکێن خوە ب دلەک خوەش ڤەگەرن.
جارەکە دن ئەڤ مناسبەتا شکۆمەند ل تەڤ خووشک و برایێن مه‌سيحى پیرۆز بە و ھیڤیدارین ئەڤ جەژن خوەشی، ئیستیقرار و ئاشتیێ بۆ تەڤ گەلێن جیھانێ بینە و خووشک و برایێن مه‌سيحى و تەڤایا کوردستانیان د جەژنێن بێن دە د بن سھا سەرکەفتنا یەکجاری، ئاڤادانی و شادیێ دە پیرۆز بکن
جڤاتا وەزیرێن ھەرێما کوردستانێ
24،12،2015
ھەولێر
ئه‌ڤرۆ نيوز:
ئه‌ڤرۆ رۆژا پێنجشه‌مبى ده‌زگه‌هێ نه‌زاهێ ل عيراقێ راگه‌هاند، فه‌رمانه‌كا نوو يا ده‌سته‌سه‌ركرنێ بۆ مه‌لاس محه‌مه‌د عه‌بدولكه‌ريم وه‌زيرێ بازرگانى يێ ژ كار لادايى و ئێك ژ رێڤه‌به‌رێن گشتى يێن وێ وه‌زاره‌تا ده‌رچوو.
ده‌زگه‌هێ نه‌زاهێ د به‌ياننامه‌كێ دا راگه‌هاند: “دادگه‌ها نه‌زاهێ فه‌رمانه‌كا نوو يا ده‌سته‌سه‌ركرنێ ل دژى مه‌لاس محه‌مه‌د عه‌بدولكه‌ريم وه‌زيرێ بازرگانيێ ژ سه‌ر كار لاداى و ئێك ژ رێڤه‌به‌رێن گشتى يێن وێ وه‌زاره‌تێ ده‌ركر”.
هه‌ر د به‌ياننامێ دا ئه‌وا ئه‌ڤرۆ نيوز خوه گه‌هانديه دانه‌كێ ژ وێ هاتيه: “ده‌ركرنا ئه‌وێ فه‌رمانێ ژ ئه‌گه‌رێ دوسيا برنجێ ئورگۆايى يه”.
مه‌لاس محه‌مه‌د عه‌بدولكه‌ريم كورده و ل سه‌ر ليستا وه‌ته‌نيه پۆستێ وه‌زيرێ بازرگانيا عيراقێ وه‌رگرتبوو، پێشتر ژ لايێ ده‌سته‌لاتا دادوه‌رى يا عيراقێ ياداشتنا ده‌سته‌سه‌ركرنا وى ده‌ركه‌فت بوو، پاداشت ژى ب گۆتنا عه‌بدولستار بريقدار ئاخفتنكه‌رێ ب ناڤێ ده‌سته‌لاتا دادوه‌ريێ ب گۆره‌ى هه‌ردو مادێن 310 و 319 ژ قانوونا سزايێن ژماره 111 يا سالا 1969ێ هاتيه دان.
ئه‌ڤرۆ نيوز:
بڕياره ئێكه‌تى نشتيمانى كوردستان و پارتى ديموكراتى كوردستان، كۆمبوونه‌كێ ئه‌نجام بده‌ن و ناڤ كۆمبوونێ دا ژى بڕيارا ميكانيزما چاوانيا پارڤه‌كرنا پۆستێن حوكمه‌تێ بده‌ن.
د حه‌فتيا داهاتى دا، پارتى ديموكراتى كوردستان و ئێكه‌تى نشتيمانى كوردستان، دێ كۆمبن و بڕياره ل سه‌ر چاوانيا چاكسازيێن حوكمه‌تێ و پرسا بزاڤا گۆڕان و پركرنا وه‌زاره‌تان ل حوكمه‌تێ گه‌نگه‌شه بكه‌ن.
د ڤێ ده‌ربارێ دا، عه‌لى عه‌ونى، ئه‌ندامێ سه‌ركرداتيا پارتى ديموكراتى كوردستان بۆ “باسنيوز” راگه‌هاند: كۆمبوونێن ئێكه‌تى و پارتى دێ به‌رده‌وام بن و دڤێت هه‌ردولا ل سه‌ر كۆمه‌كا پرسان دانوستاندنێ بكه‌ن ب تايبه‌ت ئه‌ڤا په‌يوه‌ندى ب حوكمه‌تێ هه‌ى”.
ته‌كست ل سه‌ر وێ چه‌ندێ ژى كر كو پشكه‌ك ژ ته‌وه‌رێ كۆمبوونا وان دێ پرسێن نوكه يێن هه‌رێمێ و كاودانێ، سياسى يێن كوردستانێ و گۆڕانكاريێن ده‌ڤه‌رێ بن.
ب گۆره‌يى پێزانينێن “باسنيوز” سه‌رۆكێ شاندێ پارتى ديموكراتى كوردستان د كومبوونێ دا دێ “فازل ميرانى” سكرتێرێ مه‌كته‌با سياسى يا پارتى ديموكراتى كوردستان بيت و شاندێ ئێكه‌تى ژى دێ ژ لايێ “كوسره‌ت ره‌سۆل عه‌لى جێگرێ ئێكێ يێ سكرتێرێ گشتيێ ئێكه‌تيێ هێته سه‌رپه‌رشتيكرن.
نيشاندان