ئەڤڕۆ نیوز،زنار تۆڤی:
پشتی بۆ ماوەیەکێ ئەڤ دەڤەرە نەهاتیە بوردۆمانکرن جارەکادی شڤێدئ و لدەمژمێر 10 شەڤێ فرۆکێن سۆپایێ تورکی دەردورا گوندێ کێستە و ملا رەدێ و ئێکمالێ و هێسێ ل دەڤەرا بەرواری بالا و چەندین جهێن دیتر ل چیایێ مەتینا و رووبارێ زێی بوردۆمانکرن و جارەکادی ترس لدەف خەلکێ پەیداکر،لەورا بەری نوکە خەلکێ قەستا چیان دکر دچوونە شەڤیارێ،لێ ژ ئەڤ شەڤە پێدا ئێدی خەلک نەوێرن ل ڤێ دەڤەرێ بچنە شەڤیاران ژی.

ئەڤرۆ نیوز:
رێڤەبەرێ کاروبارێن ئێزدیان ل پارێزگەھا دھۆکێ بۆ ئەڤرۆ دیار کر کو پشتی شنگال ژ لایێ پێشمەرگەی ڤە ھاتیە رزگارکرن، ئاوارە حەز دکەن جارەکا دی ڤەگەرنەڤە سەر مال و مۆلکێن خوە، ل دووڤ ئامارێن رێڤەبەریا مە ھەتا نوکە دو ھزار و 600 خێزان ڤەگەریاینە شنگالێ و پتریا وان ژی ئاکنجیێن ناحیا سنوونێ و دەڤەرێن ب سەرڤەنە.
ھادی دوبانی، رێڤەبەرێ کاروبارێن ئێزدیان ل پارێزگەھا دھۆکێ ئاشکرا کر، ل دووڤ ئاماران بەری تیرۆرستێن داعش بھێن 600 ھەتا 700 ھزار کوردێن ئێزدی ل ھەرێما کوردستانێ ھەبوون و پتریا وان ل پارێزگەھا دھۆکێ و دەشتا نەینەوا دئاکنجی بوون، لێ پشتی تیرۆرستێن داعش ھاتین 420 ھزار کەس ژ وان ئاوارە بوون، ھزار و 280 کەس ژی ھاتینە شەھیدکرن و 840 کەس ژی ھەتا نوکە دبێ سەروشوونن، 240 کەس ژی ژ ئەگەرێ برسێ و تێھنێ گیانێ خوە ژ دەست داینە کو پتریا وان زارۆ و دانعەمر بوون، پێنچ ھزار و 838 کەس ژی ژ ئالیێ داعشێ ڤە یێن ھاتینە رەڤاندن و ھەتا نوکە ب تنێ ھزار و 307 کەس ژ دەستێن داعشێ ھاتینە رزگارکرن.
خویا ژی کر، پێشمەرگێ قارەمان رووبەرکێ مەزن ژ ئاخا شنگالێ رزگارکریە، لێ ھێشتا دەڤەرا گرعزیر و تلبەنات و تلقەسەب و سیبا شێخدرێ ماینە د دەستێن تیرۆرستان دا و گۆت: “ئەم پێشبینی دکەین پشتی ئەو دەڤەر ژی دھێنە رزگارکرن پتری 21 گورێن ب کۆم بھێنە دیتن”.
رێڤەبەرێ کاروبارێن ئێزدیان ل پارێزگەھا دھۆکێ ئاماژە ب وێ چەندێ ژی کر، ل دووڤ ئامارێن رێڤەبەریا وان ھەتا نوکە دو ھزار و 600 خێزان ڤەگەریاینە سەر مال و مۆلکێن خوە ل شنگالێ و پتریا وان ژی ئاکنجیێن ناحیا سنوونێ و دەڤەرێن ب سەرڤەنە و گۆت: “ئاوارێن شنگالێ دبن خیڤەتان ڤە دلتەنگ بووینە و ھەکە خانیێن وان بھێنە چێکرن ڤە و خزمەتگوزاری بگەھنە دەڤەرێن وان گەلەک حەز دکەن جارەکا دی ڤەگەرنە سەر مال و مۆلکێن خوە ل شنگالێ”.

ئه‌ڤرۆ نيوز:

دەزگەھێن راگەھاندنێن تورکیا گرنگیەکا مەزن ددەنە سەرەدانا سەرۆکێ ھەرێما کوردستانێ بۆ تورکیا و دیار دکەن کو د ناڤا وەلاتێن جیران دا ب تنێ ھەرێما کوردستانێ وەک دۆستێ تورکیا مایە و ئاشکرا ژی دکەن کو دێ سەرۆکێ ھەرێما کوردستانێ و سەرۆک کۆمار و سەرۆک وەزیرێن تورکیا پەیوەندیێن دو قۆلی، پەیمانا نوو یا گازێ و پەترۆلێ و رەوشا ئێمناھیێ گەنگەشە بکەن.
د دەمەکی دا کو پەیوەندیێن تورکیا، ل گەل عیراقێ، سووریێ، ئیرانێ و روسیایێ د ئاستەکی گەلەک خراب دانە و تورکیا سەرباز و تانکێن خوە ل نێزیکی مووسلێ بجە کریە، سەرەدانا مەسعود بارزانی سەرۆکێ ھەرێما کوردستانێ وەک سەرەدانەکا گەلەک گرنگ دھێتە قەبوولکرن و ل دووڤ دەزگەھێن راگەھاندنێن تورکیا ئەڤ سەرەدانا بارزانی دێ پەیوەندیێن ھەردو ئالیان دەربازێ قۆناغەکا ھەری بلند کەت و وەسا دبینن کو ھەرێما کوردستانا عیراقێ تاکە دۆستێ تورکیایە ل رۆژھەلاتا ناڤین دا.
د ڤێ دەربارێ دا موراد یێتکین رۆژنامەڤانێ تورک ل ئەنقەرە بۆ رۆژناما ئەڤرۆ راگەھاند کو ئەو وەسا دبینیت سەرەدانا سەرۆکێ ھەرێما کوردستانێ بەرێز بارزانی د چارچۆڤێ پێشخستنا پەیوەندیێن ئابووری، ئیمزاکرنا پەیمانەکا نوو یا د دەربارێ گازا سروشتی و پەترۆلێ و ھەروەسا گەنگەشەکرنا رەوشا ئێمناھیا سووریێ، عیراقێ و تایبەت ژی مووسلێیە و گۆت: (مخابن نھا ئەم بەرێ خوە ددەینە کیژ ئالیان ژ مە توورە نە و روسیا گەفا بەرسڤداینا کەڤتنا فرۆکا خوە دکەت. ل رەخێ دی سووریێ تورکیا وەک دوژمنەکی سەرەکی ب ناڤ دکەت، ئیران تورکیا ب تێکدانا رەوشا سووریێ و بنپێکرنا سەروەریا ئاخا عیراقێ تۆمەتبار دکەت و نھا ژی عیراق ل دژی تورکیا سکالەیەک ل نەتەوێن یەکگرتی و ئاسایشا نێڤدەولەتی تۆمار دکەت و خوە بەرھەڤ دکەت کەل و پەلێن تورکیا قەدەغە بکەت. ڤێجا دەمێ ل سنورێن خوە ئانکۆ جیرانێن خوە دنێربن ئەو مە وەک دوژمنێ خوە دبینن و ب تنێ ھەرێما کوردستانا عیراقێ وەک دۆستەکی دلسۆز نێزیکی مە دبیت و بۆ ڤێ چەندێ سەرەدانا بارزانی گەلەک گرنگە و د بەرژەوەندا ھەردو ئالیان دایە و بەلکو ئەڤ سەرەدانە ھندەک ئالۆزیێن ل ھەرێمێ ژی کێمتر کەت).
ھەروەسا رۆژناما سەباح یا تورکیا ژی د راپۆرتەکا خوە دا بەحسێ گرنگیا سەرەدانا مەسعود بارزانی سەرۆکێ ھەرێما کوردستانێ بۆ تورکیا دکەت و بۆ خوەندەڤانێن خوە رادگەھینیت کو بارزانی ل سەر ڤەخواندنا فەرمی یا حوکمەتا تورکیا سەرەدانا خوە دەستپێکریە و سەرەدانا بەرێز بارزانی دێ ھەناسەیەکێ بدەتە تورکیا و پەیوەندیێن ھەردو ئالیان دێ بکەڤنە قۆناغەکا نوو یا پێشکەڤتی.
ھەر د ڤێ دەربارێ دا رۆژناما ئاکیت ژی د راپۆرتا خوە یا تایبەت دا بەحسێ رۆلا سەرۆکێ ھەرێما کوردستانێ د عیراقێ و شکاندنا داعشێ دا دکەت و رادگەھینیت کو ھەرێما کوردستانێ و تورکیا خوەدانێ بەرژەوەندیێن ھەڤپشکن و ل رۆژھەلاتا ناڤین کاریگەریا وان ھەیە و ھەر دەمێ د وارێ سیاسی، سەربازی، ئابووری و ئێمناھیێ دا ھەماھەنگیەکا بلند د ناڤبەرا تورکیا و ھەرێما کوردستانێ دا ھەبیت ئەو یەک خزمەتا ئارامی و ئاشتیێ ل دەڤەرێ دکەت، بۆ ڤێ چەندێ ژی سەرەدانا بەرێز بارزانی د ڤێ دەمێ دا بۆ تورکیا گەلەک گرنگە.
نومان کورتولموش جێگرێ سەرۆک وەزیرێن تورکیا ژی د بەرناما تەلەفزیۆنا ATV دا راگەھاند کو ئەو گرنگیەکا مەزن ددەنە سەرەدانا بەرێز بارزانی سەرۆکێ ھەرێما کوردستانا عیراقێ و گۆت: (بەرێز بارزانی ھەم وەک سەرکردە و ھەم ژی وەک کەسایەتیەکی خوەدان کاریگەر جھێ رێزگرتنا مەیە و ئەم کوردێن عیراقێ و حوکمەتا ھەرێما کوردستانا عیراقێ وەک ھەڤالێ سەرەکی یێ خوە دبینین و د ڤێ سەرەدانا بەرێزی دا ئەم دێ پەیوەندیێن دو قۆلی، رەوشا ئێمناھیێ، پێشخستنا ئابووری و رەوشا سووریێ و مووسلێ گەنگەشە کەین و مە دڤێت ل گەل ھەموو وەلاتێن جیران پەیوەندیێن باش دروست بکەین).
ھەر چەندە ھندەک پەرلەمانتارێن پارتا بزاڤا نەتەوەپەرەست یا تورکیا (MHP) ل ھەمبەر سەرەدانا سەرۆکێ ھەرێما کوردستانێ نەرازیبوون نیشادان ژی لێ ئەڤ نەرازیبوونا وان ژ ئالیێ راگەھاندن و سیاسەتمەداران ڤە ب نەرازیبوونەکا نە گرنگ ب ناڤ کرن و راگەھاندن کو MHP ھێشتا ھەست ب گرنگیا ھەرێما کوردستانێ بۆ تورکیا نەکریە.