ئەڤرۆ نيوز:
وەزارەتا بەڕەڤانیا رووسیا راگەھاند کو وان دوھی رێژەکا زۆر یا ھاریکاریێن سەربازی رەوانەی عیراقێ کرن.
ئاژانسا فارس یا ئیرانی ل سەر زارێ ژێدەرەکێ رووسی بەلاڤکریە کو ژمارەکا زۆر یا زریپۆشێن رووسی یێن گوللەنەبڕ گەھشتنە بەندەرێ بەسرە و گۆت:(ب گەھشتنا وان زریپۆشان شیانێن سەربازی یێن سوپایێ عیراقێ بۆ روو ب رووبوونا ھێرشێن داعش دێ بلند بن).
ئەڤرۆ نیۆز، قائید میرۆ
ل نێزیک قەزا تەلەعفەر بەرپرسێ ھەوالگەریا داعش ژلایێ چەکدارێن نەنیاسڤە ھاتە کوشتن و تەرمێ رادەستی کەس و کارێن وی کرن.
غەیاس سورچی، کارگێڕێ مەلبەندێ نەینەوا یێ ئێکەتیێ ب ئەڤرۆ نیۆز راگەھاند” ھژمارەک چەکدارێن نەنیاس د رێیا ناڤبەرا قەزا تەلەعفەر و باژێڕێ مووسل تەقە ل سەرکردەیەکێ گروپا داعش بناڤێ ئەبو ماریە کریە و د ئەنجامدا ھاتیە کوشتن، کو نافھاتی بەرپرسێ ھەوالگەریا داعش بوویە ل دەڤەرێ.
سورچی گۆتژی” ئەبو ماریە ئێکبوو ژ سەرکردەیێن ھەرە دڕندەیێن داعش ل دەڤەرێ و چەندین تاوان ل مووسل و دەوروبەرا ئەنجامداینە و تەرمێ بۆ کەس و کارێن ھاتیە ڤەگەڕاندن.
ئەڤرۆ نیوز:
وەکو پیرۆزی و بلند ھەلسەنگاندن بۆ ئالایێ کوردستانێ رێڤەبەریا گشتی یا رەوشەنبیری و ھونەری ل دھۆکێ دێ رۆژا ئالایێ کوردستانێ ل 17/12/2015 ل دەمژمێر 10 ی سپێدێ ب ئەنجامدانا چەندین چالاکییان جودا ژ سالێن بۆری ساخکەت.
ئەمیر عەلی، جێگرێ رێڤەبەرێ گشتی یێ رەوشەنبیری و ھونەری ل دھۆکێ بۆ رۆژناما ئەڤرۆ ئاشکرا کر کو رێڤەبەریا وان ئەڤ سالە دێ رۆژا ئالایێ کوردستانێ ب رەنگەکێ نوو و جودا ژ سالێن بۆری ساخکەت و گۆت: ” ل رۆژا 17/12/2015 کو دبیتە رۆژا ئالایێ کوردستانێ ل دەمژمێر 9 ی سپێدێ د رێورەسمەکی دا دێ رێپیڤانەک ب مەوکبەکێ ترۆمبێلێن خەملاندی ب ئالایێ کوردستانێ ژ رێڤەبەریا گشتی یا رەوشنبیری و ھونەری ل دھۆکێ بەرەب ئاڤاھیێ ئەمنا رژێما بەعسا روخای ل دھۆکێ ب رێ کەڤیت و چەندین ئالا و نامیلکە ل دۆر مێژوویا ئالایێ کوردستانێ ل سەر خەلکی دێ ھێنە بەلاڤکرن”.
ناڤھاتی ئاماژە دا وێ چەندێ ژی کو د ھەمان رێورەسم دا دێ دیوارێ ئاڤاھیێ ئەمنا کەڤن ب ئالایەکێ 20 مەتری ژ لایێ رێڤەبەریێن گشتی و پارێزگار و قائیمقامی ب شێوەیەکێ ھونەری ھێتە خەملاندن و گۆت: ” ل ھەمان جە دێ ئالایێن کوردستانێ ژ لایێ پارتێن سیاسی یێن ھەرێما کوردستانێ ڤە ھێنە بلندکرن و کەڤالەکێ ھونەرێ مللی یێ نەخشاندی ب ئالایێ کوردستانێ دێ ھێتە نیشادان و د ھەمان دەم دا دێ 80 بالون ژ رەنگێ ئالیێ کوردستانێ بۆ ئاسمانی ھێنە بلندکرن”.
ل دووماھیێ ئەمیری گۆت: “ل دووماھیا ڤی رێورەسمی دێ ھەموو ئامادەبوو بەرەب پارکا بارزانیێ نەمر ل دھۆکێ ب رێکەڤن بۆ بلندکرنا بلندترین ئالایێ کوردستانێ”.
ئەڤرۆ نیوز:
کۆمپانیەکا ئەمریکی داخواز ژ وەزارەتا کارەبێ یا حوکمەتا ھەرێما کوردستانێ کر، وێ ل بەرە وێستگەھەکا کارەبێ یا ھزار و 200 مێگاواتی بینیتە کوردستانێ.
ل دووڤ ڕاگەھاندنەکا وەزارەتا کارەبێ یا حوکمەتا ھەرێما کوردستانێ کو تێدا ھاتیە: “دوھی 14/12/2015 وەزیرێ کارەبێ یێ حوکمەتا ھەرێما کوردستانێ د گەل بەرپرسێ کۆمپانیا ئەندازە یا سیرا کو ژ گرۆپێ مەزنە کۆمپانیێن ژەنەرال ئەلکتریک یێن ئەمریکی یە کۆمبوو، تێدا بەرپرسێن کۆمپانیا ئەمریکی دیار کریە کو وان پرۆژەک بۆ ئینانا تۆربان و ئامیرێن ئامادە بۆ دانانا وێستگەھەکا کارەبێ یا ھزار و 200 مێگاواتی یێ ھەی”.
دەربارەی مەزاختیێن پرۆژەی بەرپرسێ کۆمپانیا ئەندازەیێن سیرا خویا کریە، کۆمپانیا وان یا بەرھەڤە مەزاختیێن وێ وێستگەھێ ب شێوێ قەر ژ حوکمەتا ھەرێما کوردستانێ وەربگریت”.
وەزیرێ کارەبێ یێ حوکمەتا ھەرێمێ ئاشکرا کر، زێدەکرنا بەرھەمئینانا کارەبێ د ڤی دەمی دا گەلەک یا پێدڤی یە و بکارئینانا کارەبێ ژی ل ھەرێمێ گەھشتیە ئاستەکێ پیڤانەیی و گۆت: “ئەڤ پرۆژە ب چارەکرنا دو ئاستەنگان دێ ھێتە ب جھئینان کو د دەستھەلاتا وەزارەتا کارەبێ دا نینن، ئەو ژی پارە و سۆتەمەنی نە”.
ئاماژە ب وێ چەندێ ژی کر، وەزارەتا کارەبێ دێ داخوازا وێ کۆمپانیێ بۆ جڤاتا وەزیران ھنێریت دا کو دانوستاندن ل سەر بھێتە کرن.
ئەڤرۆ نیوز:
زێرەڤان بەرواری شارەزایێ سیاسی ددەت دیارکرن کۆ تورکیا دبوراێ سیاسەتا دەرەکی دقووناغەکا نوو دا دبوریت, و ئەڤ قوناغە فەڕێژا ئالۆزبوونا قەیرانا سوری و تێکچوونا بەڵانسا ھێزیە د ڕۆژھەڵاتا ناڤین دا و ئەنقەرە پێکۆلان دکەت بلۆکێن سیاسی و ئابووری و ئەمنی پەیرەو بکەت پێخەمەت بەرژەوەندیێن خوە و گۆت ژی : ھەرێما کوردستانێ ل ساڵا 2009 ب شێوەکێ راستەوخوە بوویە ھەڤپەیمانا تورکی دبوراێ سیاسی و ئابووری دا و ئەڤرۆ قوناغا جێبەجێ کرنا پڕوژەیێن ستراتیجی ل گەل ھەرێمێ دەست پێکریە بتایبەت پشتی بێ ھێڤی بوون ل گەل بەغدا
شارەزا دوارێ پەیوەندیێن تورکیا دا گۆت ژی : داخوازکرنا سەرۆکێ ھەرێما کوردستانێ بۆ تورکیا دو خواندن بۆ ھەنە ئێک یا سیاسیە ئەو ژی تورکیا بەرەف پرەنسیپێ ئەمنی دچیت دسیاسەتا دەرەکی دا بۆ لاوازکرنا ھەڕەشێن رووسیایێ و ئیرانێ ل سەر بەرژەوەندیێن ئەنقەرە و تورکیا بزاڤان دکەت ھەرێم ببیتە پشکک ژ ھەڤپەیمانیا سونی ئەوا پێکھاتی ژ (سعوودیێ,قەتەر,تورکیا) و ژبەر جوگرافیا ھەرێمێ و پەیوەندیێن ھەرێمێ ل گەل ئەمریکا و ئوڕوپا ھەروەسا ڕێگرتن ل رووسیا بۆ ب کارئینانا کارتا کوردی دژی تورکیا.
ماموستایێ زانکۆیا دھۆک گۆت : خواندنا دوێ ژی خواندنەک ئابووریانەیە ئەو ژی پشتی ئاڵوزبوونا پەیوەندیێن رووسیا و تورکیا پتر ژ 35% ژێدەرێ وزێ یێ تورکی تووشی مەترسیا برینێ بوویە , ئەنقەرە دو ئەلتیرناتیفێن دن ھەلبژارتن ئەو ژی قەتەر و ھەرێما کوردستانێ , و پێشبینی دھێتە کرن ل قۆناغا داھاتوو ھەرێم ببیتە ئێک ژ ژێدەرێن سەرەکی بۆ دابینکرنا وزێ بۆ تورکیا.
شارەزایێ سیاسی ل دۆر ھاتنا ھێزێن تورکی بۆ ھەرێمێ ددەت دیارکرن، لایەنێ باش و لایەنێ خراپ ژی ھەنە و باشیا وێ ژی ئەوە ھەرێما کوردستانێ ل ژێر مەترسیا میلیشیایێن شیعی و کارتێکرنا ئیرانێ و ئەڤ کارتێکرن و مەترسیە پشتی قووناغا داعشێ دێ مەزنترین ھەڕەشە بیت ل سەر ئەزموونا کوردی و کوردستانێ پێدڤی ب ھەبوونا ھێزەکا لەشکری یا ھەرێمی ھەیە ئەڤجا چو تورکی بیت یان ئەمریکی یا گرنگ د شێوازێ ڕێککەفتنا سیاسی دایە، ھەکە ئەڤ ھێزا تورکی ب ھەڤکاری ل گەل ناتوو بیت بۆ ڕێگرتن ل کارتێکرنا رووسی- ئیرانی دێ بیتە سەدەم بۆ بەردەوامیا پاراستنا دەولەتێ بۆ کوردستانێ.
دیارکر ژی لێ لایەنێ خراپ ژی ھەیە ئەو ژی ئەگەر ئەو ھێز ب ھەڤکاریا ئێکەتیا ئوروپی و ئەمریکا نەبیت دێ بیتە سەدەم کو گڤاشتنێن ھەرێمی و دەولەتی ل سەر ھەرێمێ زێدە ببن ژ دەستێوەردانا ئیرانێ و حوکمەتا ناڤەندی و زێدەکرنا کارتێن فشارێ یێن سیاسی و ئابووری و ژلایێ دەستووری ڤە دێ بیتە سەدەمێ بەرپرس بوونا ھەرێمێ ھەمبەری بەغدا.
ل دووماھیێ زێرەڤان بەرواری گۆت: ھەرێما کوردستانێ ل ژێر کارتێکرنا ڕولێ تورکی ڕەفتارێ دکەت ژبەر نێزیکبوونا ئایدولۆٍجی و ھەبوونا ئێک چارەنڤیساز ل دەڤەرێ و ھەرێم پێدڤی ب سیاسەتەکا ژیواری ھەیە بو پاراستنا ئایشا کوردستانێ ژ ناکوکیا دەولەتی.
ئەڤرۆ نیوز ، لەزگین جوقی:
د کونگرەکێ رۆژنامەڤانی دا ئه‌ڤرۆ 15/12 قائیمقامێ قەزا شنگال دا زانین کو راستە شنگال یا ھاتیە رزگارکرن لێ ھیشتا ھندەک دەڤەرێن سەر ب شنگال ڤە ماینە، ھەر دەمێ مەترسی ل سەر شنگال ب تەمامی نەما و خزمەتگوزاری گەھشتنە شنگال ئێدی خەلکێ شنگال ژی بەر ب دەرڤەی وەلاتی ناچیت و حەز دکەت ل سەر ئاخا خوە بژیت.
مەحما خەلیل قائیمقامێ قەزا شنگال د کونگرەکێ رۆژنامەڤانی دا ئەڤرۆ 15/12/2015 راگەھاند: ھێزێن پێشمەرگەی پیشەڤانی و بەرەڤانی ژ شنگال کر و ئەڤرۆ شنگال پێدڤی چو ھێزین دی نینە بۆ پاراستنا شنگال.
گۆتژی: “خەلکێ شنگال ب پشتەڤانیا پێشمەرگەیێ قارەمان دێ شنگال پارێزن، شنگال ل سەر دەستێن پێشمەرگەیێ قارەمان ھاتە رزگارکرن”.
زێدەتر گۆت: “ئەم رێزێ ل ھەموو لایەنێن سیاسی دگرین لێ ئەو لایەنێن دبێژن مە شنگال رزگارکر چو راستی بۆ نینە، ھەموو خەلک و جھان دزانی کێ شنگال رزگارکر”.
قائیمقامێ قەزا شنگال ئاماژە ب وێ چەندێ ژی کر کو خەلکێ شنگال وەلات پارێزن و چو جاران دەست ژ ئاخا خوە بەرنادەن و ھەر رۆژا کارەساتا رزگار روودایی و ھەتا ھاتیە رزگارکرن گەنجێن شنگال ل سەرێ چیایی مان و بەرەڤانی ژێ دکر ب پشتەڤانیا سەرۆک بارزانی.
دا زانین ژی کو ئاریشا سەرەکی یا ڤەنەگەریانا وەلاتیان بۆ نەبوونا خزمەتکاریان ل شنگال د ڤەگەریت و ژ لایێ تی ئێن تیان ژی ڤە ب تەمامی نەھاتیە پاقژکرن.
ئەڤرۆ نیوز:
چاڤدێرێن سیاسی بۆچوونێن مەزن ل دۆر سەردانا سەرۆکێ ھەرێما کوردستانێ بۆ تورکیا ھەنە و دھێتە پێشبینی کرن کو پشتی شکەستنا داعش کوردان رۆلەکێ ھەرە کاریگەر ھەبیت.
سامی ئەرتووشی، دپەیچێ خوەیێ تایبەتێ فەیسبووکی دا ئاشکراکر کو چوونا سەرۆکێ ھەرێما کوردستانێ بۆ وەلاتێ تورکیا و سعودی گرێدایی گوھۆرینێن مەزنە ل دەڤەرێ و تایبەت ژناڤچوونا تیرۆرستێن داعش ل دەڤەرێ، دێ گوھۆرینێن مەزن ل ھەیڤێن داھاتی ل دەڤەرێ پەیدابن ، دبیت پلانا سەرۆکێ ئەمریکا ھێشتا مایە کو سێ سال بۆ نەمانا داعش دانابوون، لێ ھندەک کار ھاتنە روودان نەچارن پلان و نەخشان ب گوھۆرن.
سامی ئەرتووشی گۆتژی: نەجھێ باوەریێ یە ئەمریکا و ھێزێن ھەڤپەیمان ئەو شیان نەبن داعش ژ ناڤ ببەن و پێدڤی ب سالان بن، بەلکو شیان ھەنە ب رۆژان ژناڤ ببەن، ئەو ھاریکاریا دارایی ئابۆری ئەوا ژ چەندین وەلاتان بۆ داعشێ ب رێکا ھەوالگێریان دھێتەکرن، بێ ئاگەھداری یا ئەمریکا نینە، فرۆتنا ب ھزران بەرمیلێن پەترۆلێ و عومباران ژلایێ داعشێ ڤە بێی ئەمریکا نینە، دەمێ باژێرەک یان دەڤەرەک دھێتە دەستنیشانکرن کو ژ دەستێن داعشێ بھێتە وەرگرتن و ب تایبەتی دەمەکێ دەست نیشانکری دا، داعش دکەڤیتە بن بڕیارێن سەیر و ھەموو بڕیارێن خوە ژ دەست د دەت، نموونە شنگال بوو، بێ گۆمان رۆلێ پێشمەرگەی یێ ھەژی بوو د زڤرینا شنگال دا، سەربەرزین ب داستانێن پێشمەرگەی و شانازیێ پێ دبەین، ھەموو کەسان دزانی پێشمەرگەی دڤیا زووتر شنگالێ ئازاد بکەت، بەلێ رێک بۆ نەدھاتەدان، دبینم ئێک پەیڤ و رستە وێنن داعشێ ناھێنە بەلاڤەکرن بێ ھەوالگێریا ئەمریکی ویێن بکاردھینن دزانن یا چەوانە، چەوان ئەو نووچە ھەموو ل گەل دیمەنێن سەربرینێ دھێنە بەلاڤەکرن.
سامی ئەرتووشی دیارکر کو بریارھاتیەدان داعش ب دووماھی بھێت ژ بەر چەند ئەگەران، ھاتنا رووسی بۆ ناف مەیدانێ و ئەڤە نەیا چاڤەرێکری بوو بۆ ئەمریکا و ئەمریکا پێ نەخوەشە و ئەڤە دێ بیتە ئەگەرە روسیا بھێتە پێش و دێ مەرجان بۆ ئەمریکان دانیت، ھندەک ئارمانجێن ھاتنا داعش ھاتنە بجھئینان، کومکرنا ھێزێن توند رەو و چەکدار ل دەڤەرێ،لاوازکرنا پارتێن خودان ئایدۆلۆژی یا ئیسلامی، دیارکرنا روویەکێ نەجوان و شاش ل سەر ئاینێ ئیسلامێ، دیارکرنا مەترسیان ل سەر وەلاتێن عەرەبی و تایبەت کەنداڤی و دا پتر بھێنە گرێدان ب بەرنامێ ئەمریکی ڤە، بھێزکرنا بەرێ رۆژئاڤا ل دەڤەرێ و تایبەت دژی تیرۆرێ.
سامی ئەترووشی گۆت: ھیڤی خوازین چو رێککەفتن دناڤبەرا دەولەتان دا نەھێنەکرن وەک رێککەفتناما خیانەتی یا جەزائیر، لێ ب دیتنا شێوازێ پێشوازیکرنا سەرۆکێ ھەرێمێ وێ چەندێ دگەھینت کوردان ل نێزیک رۆلەکێ کاریگەر دێ ھەبیت و تایبەت پشتی شکەستنا داعشێ.
ئەڤرۆ نیوز:
بێریڤان ئاسلان ئەنداما پەرلەمانێ نەمسا یا سەر ب پارتیا کەسک ل وی وەلاتی بۆ دەزگەھێن راگەھاندنێ دیار کر کو وان بەری نھا پرۆژەک بەرھەڤ کربوون و د پرۆژێ خوە دا بەحسێ ھندێ کربوون کو دڤێت دەولەتا نەمسا رۆلەک سەرەکی بۆ ئاڤەدانکرنا کۆبانی و شەنگالێ ببینیت و گۆت: (پرۆژە ژ ئالیێ پارتیا مە ڤە ھاتبوو پێشکێش کرن و دوھی ل پەرلەمانی روونشتنەک ل دۆر پرۆژەی ھاتە کرن، ھەموو پارتێن سیاسی یێن ل پەرلەمانێ نەمسا پشتەڤانیا خوە بۆ پرۆژێ مە دیار کرن کو ئەڤە بێگومان سەرکەڤتنەکا گەلەک مەزن و دیرۆکی بوو و دێ وەک دەولەت نەما بزاڤێ کەت رۆلەک سەرەکی د ئاڤەدانکرنا کۆبانێ و شەنگالێ دا بگێریت).
ئەنداما پەرلەمانێ نەمسا ئەو یەک ژی دیار کر کو د پرۆژە دا بەحسێ ھاریکاریا چەکی بۆ ھێزێن کوردی نەھاتیە کرن، بەلکو پتر پرۆژە د چارچۆڤەکا ھاریکاریێن مرۆڤی و ب تایبەتی ژی ئاڤەدانکرنا ھەر دو باژێرێن کۆبانێ و شەنگالێ یە و گۆت: (کۆبان و شەنگال نھا ل دەڤ ئورۆپیان جھەکێ خوە یێ تایبەت ھەنە، چونکو ھەر دو باژێر ژی بوونە ئارمانجا ھێرشێن رێکخراوا تیرۆرستی یا داعشێ و بەرخوەدانەک گەلەک مەزن ل دژی داعشێ ھاتە کرن و نھا ھەر دو باژێر ژی وەک ھێمایا بەرخوەدانێ نە و ژ بەر ھندێ ژی یا ل پەرلەمانێ نەمسا سەبارەت ب وان ھەر دو باژێران ھاتیە کرن تشتەکێ گەلەک مەزن و دیرۆکی یە و دێ بیتە ئەگەر د ئاستێ نێڤدوەلەتی دا پتر ھاریکاری و پشتەڤانی بۆ مافێ کوردان دروست بیت).
د دووماھیا ئاخڤتنا خوە دا ئەنداما کورد ل پەرلەمانێ نەمسا ئەو یەک ژی نەڤەشارت کو مە دڤێت بریارا پەرلەمانێ نەمسا ببیتە نموونەک بۆ ھەموو وەلاتێن ئورۆپا و مە دڤێت ئەلمانیا، بریتانیا و گەلەک وەلاتێن دی یێن ئورۆپا ژی وەک نەمسا بریارەکا وەسا بدەن و ھاریکاریا کوردان بکەن، چونکو کوردان د شەرێ ل دژی داعشێ دا گەلەک قوربانی داینە و ئەڤرۆکە ئەرکێ ھەموو مرۆڤاتیێ یە کو ھاریکاریا کوردان بکەن. ب تایبەتی ژی دڤێت ھەموو وەلات د ئاڤەدانکرنا کۆبانێ و شەنگالێ دا خوەدان رۆلەکێ گرنگ بن.
ئەڤرۆ نیوز:
ئەندامەکێ لیژنا دارایی جڤاتا نوونەرێن عیراقی دیار کر کو ئەندامێن جڤاتا نوونەرێن عیراقی دوھی 14/12 کۆمبوونەک ئەنجام دا و تێدا بریار دا بریکارێن وەزارەتان ھەموو بھێنە کێمکرن ب تنی وەزارەتا بەرەڤانیێ 67 بریکار بمینن و مووچی ھەموو فەرمانبەران ژی ب رێژا 3% بھێتە کێمکرن و گۆت “دەولەتا قانوونێ یا بزاڤبَ دکەت بودجا ھەرێمێ 13% بیت”.
حاکم سەرحان سلێڤانەی ئەندامێ لیژنا دارایی جڤاتا نوونەرێن عیراقێ بۆ رۆژناما ئەڤرۆ دیار کر کو کێمکرنا مووچێ فەرمانبەران دێ ژ ھەموو فەرمانبەران گریت و ھەکە عیراق پشکا ھەرێمێ بدەت دێ ژ فەرمانبەرێن ھەرێمێ ژی گریت و ئەندامێن کورد ل جڤاتا نوونەران رژدن بۆ دانا پشکا ھەرێمێ ب رێژا 17% و گۆت “ھەکە بھێتە کێمکرن ل رۆژا چارشەمبیا بھێت ئەم دەنگی ل سەر بودجەی نادەین”.
سلێڤانەی ئەوژی دیار کر کو پێدڤیە ھەموو کۆتلین سیاسی ل پەرلەمانێ عیراقی رازی بن بۆ دانا مستەحاقتێن ھەرێما کوردستانێ ئەو غەدرا ل 2014 و2015 ل ھەرێمێ ھاتیە کرن نەھێتە قبوولکرن د ناڤ بودجا سالا 2016ێ دا و گەنگەشەکرن ل سەر پشکا ھەرێمێ ھاتە پاشڤەبرن بۆ رۆژا چارشەمبیا بھێت دێ ب درێژی دانوستاندن ل سەر پرۆژی دەولەتا قانوونێ ھێتە کرن و گۆت “ھەکە پشکا ھەرێمآ 13% بیت ھەرێم دێ گەلەک زەرەرمەند بیت، لەورا نابیت پشکا ھەرێمێ بھێتە کێمکرن”.
ئەڤرۆ نیوز:
ئاژانسا دویچە یا ئەلمانی د راپۆرتەکێ دا بەحسێ گرنگیا سەرەدان و بزاڤێن سەرۆکێ ھەرێما کوردستانێ دکەت و دیار دکەت کو نەخشێ نوو یێ رۆژھەلاتا ناڤین دھێتە دارێتن و نھا شەرەکێ مەزن بۆ نەخشێ نوو ھەیە و بارزانی ژی ئەو راستی باش دیتیە و بزاڤەکا مەزن دکەت دا کو کورد د نەخشێ نوو یێ رۆژھەلاتا ناڤین دا خوەدان پێگەھەک مەزن بیت.
ئاژانسا دویچە یا ئەلمانی د راپۆرتەکێ دا بەحسێ گرنگیا سەرەدانا سەرۆک بارزانی بۆ سعوودیێ و تورکیا دکەت و دیار دکەت کو بارزانی وەک فەرماندارێ سەرکەڤتی یێ شەرێ ل دژی تیرۆرێ شیایە کو ببیتە خوەدان پێگەھەکێ بھێز ل دەڤەرێ و ژ بەر ھندێ ژی ئەڤرۆکە ھەولێر پتر ژ بەغدایێ بوویە ناڤەندا دبلۆماسیێ و گەلەک شاندێن بیانی کو بچنە عیراقێ دھێنە ھەولێرێ ژی گەلەک سەرکردێن ئورۆپا بێی کو سەرەدانا بەغدا بکەن دھێنە ھەولێرێ و ئەو یەک ژی نیشا ددەت کو سەرکەڤتنا کوردان ل ھەمبەر داعشێ وەسا کریە رۆلێ وان ل دەڤەرێ بھێز بیت.
د پشکەکا دی یا راپۆرتێ دا ھاتیە دیار کرن کو شەرێ نھا ل رۆژھەلاتا ناڤین شەرێ گوھۆرینا نەخشێ سیاسی یە و بزاڤ بۆ دانانا نەخشەکێ نوو دھێتە کرن، دەولەتێن وەک عیراق، سووریا و تورکیا وەک بەرێ نامینن و ژ بەر ھندێ ژی بەرپرسێن عیراقێ ھەر رۆژ بەحسێ عیراقەکا ئێکگرتی دکەن و ناخوازن کو وەلات پارچە ببیت، لێ د راستی دا عیراق یا پارچە بوویی و ئەڤرۆکە ئەو یەک ب رەنگەکێ ئاشکرا ژی دیار دبیت، ژ بەر ھندێ ژی بارزانی وەک سەرۆکێ کوردان بزاڤێ دکەت کو د نەخشێ نوو یێ رۆژھەلاتا ناڤین دا کورد خوەدان پێگەھەک مەزن بن، ژ بەر ھندێ ژی سەرەدانا سعوودیێ و پاشی ژی یا تورکیا کر و ب تایبەتی ژی ل تورکیا وەک سەرۆکێ دەولەتەکێ پێشوازی لێ ھاتە کرن و رەنگە ژ بەر ھندێ بیت کو بەرپرسێن عیراقێ رۆژ ب رۆژێ زێدەتر نەرازیبوونا خوە ل دژی تورکیا دیار دکەن.
د بەردەوامیا راپۆرتا ئاژانسا ئەلمانی دا ئەو یەک ژی ھاتیە دیار کرن کو کوردان د شەرێ ل دژی تیرۆرێ دا گەلەک قوربانی داینە و ئەڤرۆکە ژی د بەرەیێ پێشیێ یێ شەرێ ل دژی تیرۆرێ دانە و ھەروەسا کورد شیان ھێزا شەری یا داعشێ ژناڤ ببەن و وێ لاواز کەن، ژ بەر ڤان خالان ژی بارزانی دخوازیت کو ئەو قوربانیدان و خوینا کوردان دای ببیتە دەستکەڤتەک مەزن و دیرۆکی بۆ کوردان و ب ھەموو رەنگەکێ بزاڤێ دکەت کو وەلاتێن زلھێز و وەلاتێن ھەرێمی پشتەڤانیێ ل ئاڤاکرنا دەولەتەکا کوردی ل عیراقێ بکەن.
د دووماھیا راپۆرتێ دا ئەو یەک ژی ھاتیە دیار کرن کو ئێدی نھا چو وەلاتەک عیراقێ و سووریایێ وەک وەلاتێن ئێکگری نابینن و ب رەنگەکێ جودا سەرەدەریێ ل گەل پاشەرۆژا وان ھەر دو وەلاتان دکەن و ھەر کەس ژی باش دبینیت کو عیراق و سووریا پارچە بووینە و کەس نەشێت رەوشا وان ھەر دو وەلاتان وەک بەرێ لێ بکەت، بارزانی ژی دخوازیت کو د رەوشا نھا دا کورد مفادار بن و خوەدان پێگەھەکێ خوە یێ بھێز بن و ئەو یەک ژی دێ ب رێیا دانپێدانەکا ھەرێمی و جیھانی ب کوردان و دەولەتا وان بیت و گوھۆرینا ھەلویستێ تورکیا ل ھەمبەر کوردان و پشتەڤانیا سعوودیێ ژی نیشا ددەت کو بارزانی شیایە د بزاڤێن خوە یێن دبلۆماسی بۆ پشتەڤانیا مافێ کوردان و پێگەھێ وان یێ د نەخشێ نوو یێ دەڤەرێ دا سەرکەڤتی بیت.
نيشاندان