ئەڤرۆ نیوز:
ل گۆر راپۆرتەکا مالپەرێ نێرینا ئازاد یا کوردی چەکدارێن رێکخراوا تیرۆرستی یا داعشێ بەرھەڤیێن ھندێ دکەن کو نەھێلن ھێزێن بەرھنگاریا سووریێ و ھێزێن کوردی ھێرشی رەقا و دەڤەرێن سەر ب وێ بکەن و ژ بەر ھندێ ژی دو رۆژن کو چەکدارێن داعشێ ب رەنگەکێ بەرفرەە ھێرشی یەکینەیێن پاراستنا گەل و ھێزێن سووریا یا دیموکراتیک دکەن و ل نێزیکی رەقا و حەسەکێ شەرەکی گەلەک دژوار ھەیە و ب دەھان تیرۆرستێن داعشێ ھاتینە کوشتن و ھەروەسا چەندین چەکدارێن سووریا یا دیموکراتیک د شەری دا جانێ خوە ژ دەست داینە و دو ئەندامێن یەکینەیێن پاراستنا گەل ژی ژ بەر ھێرشەکا خوەکوژی یا داعشێ جانێ خوە ژ دەست داینە و نھا شەرەکی گەلەک دژوار ل رەخ حەسەکێ ھەیە و داعشێ دڤێت ھندەک دەڤەران ژ دەستێ یەکینەیێن پاراستنا گەل و ھێزێن سووریا یا دیموکراتیک دەرخینیت.
د بەردەوامیا راپۆرتێ دا ھاتیە دیار کرن کو نھا شەرەکی مەزن ل چیایێ کزوان و دەڤەرێن دیتر ھەیە و چەکدارێن داعشێ ب چەکێن گران و ھێرشێن خوەکوژی دخوازن چەندین دەڤەرێن ستراتیژی ژ دەستێ ھێزێن کوردی و ھێزێن سووریا یا دیموکراتیک دەربخینن و ئەو ھەر دو ھێزە ژی نھا د سەنگەری دانە و ل ھەمبەر داعشێ شەری دکەن و ناخوازن داعش وان دەڤەران کۆنترۆل بکەت.
ل ئالیێ دی فەرماندارەکێ ھێزێن سووریا یا دیموکراتیک بۆ ئاژانسا دەنگێ فرەنسا دیار کریە کو پشتی ھێرشێن دژوار یێن روسیا ل رەقە و دەڤەرێن دیتر داعش شەرپرزە بووینە و دخوازن جھێ خوە ب گوھۆرین و ڤان دڤێت ھندەک دەڤەرێن نوو بکەنە دەستێ خوە و ھێرشێن چەند رۆژێن بۆری ژی بۆ ھندێ نە، لێ ژ بەر کو فرۆکێن روسیا و ھێزێن ھەڤپەیمانان بەردەوام ل داعشێ ددەن ئەو ئێدی نەشێن وەک بەرێ ھێرشی مە بکەن و ژ بەر ھندێ ژی نھا پتر ب رێیا خوەکوژان دخوازن زیانێ بگەھیننە مە و مە ژی پێرانێن باش ل ھەمبەر وان وەرگرتیە و گەلەک جاران خوەکوژێن وان نەشێن چ بکەن و ئەم د رژدین کو حەسەکە و دەڤەرێن سەر ب وێ ب تەمامی ژ دەستێ داعشێ رزگار بکەین و بەرێ خوە بدەینە رەققە، چونکو ل گۆر باوەریا مە ھەتا رەققە ژ دەستێ داعشێ نەھێتە رزگار کرن دێ مەترسیا وان ل سەر ئاخا سووریێ و رۆژئاڤایێ کوردستانێ بەردەوام بیت.
ل ئالیێ دی وەزارەتا دەرڤە یا روسیا ژی دوھی داخۆیانیەک بەلاڤ کر و راگەھاند کو وان پتر ژ ھزار تانکەرێن داعشێ ل سووریێ ژناڤ برینە و شیاینە ل رەققە و چەندین دەڤەرێن دیتر ب سەدان بنگەھێن داعشێ ژناڤ ببەن و دێ ھێرشێن وان ل دژی داعشێ ب رەنگەکێ مەزن د بەردەوام بن.

ئەڤرۆ نیوز:
پشتی ئەلمانیا، فرەنسا ژی دخوازیت راستەوخوە چەکان بدەتە ھەرێما کوردستانێ و وەزیرێ بەرگیریێ فرەنسا ژ بەر بەرخوەدان و شەرێ ب ھێز یێ کوردان ل دژی تیرۆرستان پەسنا پێشمەرگە و شەرڤانێن کورد دا و دیار کر ئەو چەند ھاریکاریا کوردان بکەن ھێشتا کێمە و دڤێت ھەموو جیھان بێی دو دلی راستەوخوە ھاریکاریێن سەربازی و کەلو پەلێن پێدڤی بدەنە ھێزێن کوردان.
ژان ئیوس وەزیرێ بەرگیریێ فرەنسا پشتی کۆمبوونا جڤاتا وەزیران ل پاریسێ راگەھاند کو نھا ل پێشیا جیھانێ شەرەکی دژوار ھەیە و ئەڤ شەر ب یەکگرتن و ھەماھەنگیێ دێ سەرکەڤیت و گۆت: (گەلەک ئاشکرایە کو رێکخستنێن تیرۆرست یێن وەک داعشێ، قاعیدە، ئەلنوسرا و کۆمێن گرێدایێ وان مەترسیەکا مەزن ل سەر ئێمناھی و ئارامیا جیھانێ دروست کرینە و مخابن رۆژ ب رۆژێ ل رۆژھەلاتا ناڤین بنگەھێن نوو بۆ خوە دروست دکەن و ھەکە ئەم ھەموو وەلاتێن دیمۆکراتیک و پێشکەڤتی ب ھەماھەنگیێ بەرسڤا تیرۆرێ نەدەین دێ مەترسیا وان ھێشتا زێدەتر بیت و ھێرشێن کو ل وەلاتێ مە و ئەمریکا پێک ئینان دێ ل گەلەک دەڤەرێن جیھانێ ژی پێک بینن، بۆ ڤێ چەندێ دڤێت ب رەنگەکی ھەڤگرتی و ب ھەماھەنگی و بێی کو ئەم درەنگ بمینین دەست ب تێکۆشینا ل دژی تیرۆرێ بکەین).
وەزیرێ بەرگیریێ فرەنسا ھەروەسا راگەھاند ژی نھا ل بەرەیێ ھەری پێش ھێزێن کوردان شەرێ تیرۆرێ دکەن و ھەڤپەیمانیا نێڤدەولەتی و روسیا ژی ب ھێزێن ئەسمانی پشتەڤانیا کوردان دکەن لێ وەسا خوەیایە ئەو یەک نە بەسە بۆ ژناڤبرنا تیرۆرێ و گۆت: (ب راستی ھێزێن کوردان ل عیراقێ و سووریێ ب قارەمانانە و ب زیرەکی ل ھەمبەر تیرۆرستان بەرخوەدانێ دکەن و ئاخا خوە د پارێزن و د ھەمان دەمی دا جیھانا مە د پارێزن و دەمێ وێ یەکێ ھاتیە ئەم راستەوخوە ھاریکاریێن سەربازی و کەلوپەلێن پێدڤی یێن شەری بگەھیننە دەستێ کوردان، ژ بەر کو ھێزێن پێشمەرگە و شەرڤانێن کورد سەلماندن کو ھەکە دەلیڤا وان ھەبیت و چەکێن پێدڤی د دەستێ وان دا ھەبیت ب ھاریکاریا جیھانێ دێ بشێن تیرۆرستان ب تەمامی ژناڤ ببەن ڤێجا دڤێت ئەم ژی راستەوخوە ھەڤکاریان بگەھیننە دەستێ کوردان).
ژان ئیوس د پشکەکا دی یا ئاخڤتنا خوە دا ژی ل سەر رەوشا فرەنسا و ئورۆپا ب گشتی پشتی ھێرشا تیرۆرستان ل پاریسێ راوەستیا و راگەھاند کو ھێرشا تیرۆرستان د ناڤ دلێ ئورۆپا دا وێ یەکێ نیشان ددەت کو تیرۆر ژ ئورۆپا دوور نینە و گەلەک نێزیکە و گۆت: (تێکۆشینا ل ھەمبەر تیرۆرێ نە ب تنێ ب رێیێن ئێمناھیێ بەلکو ب رێکێن سیاسی، سەربازی، ئابووری و ھەوالگیریێ دگەھیتە ئارمانجا خوە و بۆ ڤێ چەندێ پارڤەکرنا زانیاریێن ھەوالگیریێ گەلەک گرنگە و ھەکە ئەم د ڤی واری دا خوە بگەھیننە ھەماھەنگیەکا بلند ئەم دێ بشێن د شاندنا ھاریکاری، ب دەست خستنا ئابووریێ و ئالیگران دا رێگریێن مەزن ل ھەمبەر داعش، ئەلنوسرا و ھەڤکارێن وان دا دروست بکەین، ھەر دەمێ مە ئەو یەک کر وی دەمی ئەم دێ دشێین ب رێیا سەربازی ژی وان رێکخستنێن تیرۆرست ب تەمامی ژ ناڤ ببەین).
ل دۆر رەوشا سووریێ ژی وەزیرێ بەرگیریێ فرەنسا راگەھاند کو د قۆناغا نھا دا ئەم مانا ئەسەدی رەت ناکەین لێ دڤێت ب ژناڤبرنا تیرۆرێ قۆناغ ب قۆناغ سیستەمێ سووریێ بھێتە گوھۆرین و رژێما دیکتاتۆر جھێ خوە بۆ حوکمەتەکا پر ئالی و دیمۆکراتیک بھێلیت و گۆت: (دڤێت ئەم بەری ھەر تشتی باش بزانین کو د قۆناغا نھا دا ئەسەدی چو بەدیلێن خوە نینە، ب تنێ دەڤەرێن کوردان ھێڤیێن ددەن مە لێ ھێزێن کوردان ژی ب سەرێ خوە نەشێن ھەموو سووریێ کۆنترۆل بکەن و برێڤە ببەن و بۆ ڤێ چەندێ ژی د گوھۆرینا رژێما ئەسەدی دا دڤێت ئەم لەزێ نەکەین و د قۆناغا نھا دا بنگەھێ دانوستاندنان و ئاگربەستەکا دو ئالی د ناڤبەرا رژێما سووریێ و ئۆپۆزسیۆنا نەرم یا دیمۆکراتیک دا دروست بکەین و ل دووڤ نەخشەکێ دارێتی کو ھەمو ئالی ل سەر یەکگرتی بن قۆناغ ب قۆناغ سیستەمێ سووریێ ب گوھۆرینن و پاشی ژی دەست ب ئاڤەدانکرنا وی وەلاتی بکەین).