ئه‌ڤرۆ:

سكرتێرا په‌رله‌مانێ كوردستانێ، راگه‌هاند، هه‌موو فراكسیۆنێن دناڤا په‌رله‌مانێ كوردستانێ دا بۆچوونێن خوه‌ ل سه‌ر نڤیسینا دستوورێ هه‌رێما كوردستانێ یێن گه‌هاندینه‌ ده‌سته‌یا سه‌رۆكایه‌تیا په‌رله‌مانی و بۆچوونێن هه‌ڤپشك ژی د زۆرن.

مونا قه‌هوه‌چی، سكرتێرا په‌رله‌مانێ كوردستانێ  گۆت” هه‌موو فراكسیۆنێن په‌رله‌مانێ كوردستانێ بۆچوونێن خوه‌ ل سه‌ر نڤیسینا دستوورێ هه‌رێما كوردستانێ یێن گه‌هاندینه‌ سه‌رۆكایه‌تیا په‌رله‌مانی”.

گۆت ژی” سه‌رجه‌م لایه‌نێن سیاسی بۆچوونێن جودا و هه‌ڤپشك یێن هه‌ین و هه‌مووژی ل گه‌ل وێ چه‌ندێ دانه‌ كو ل ڤێ خۆلا په‌رله‌مانی دستوورێ هه‌رێما كوردستانێ بهێته‌ نڤیسین”.

دیاركر” بریار ئه‌وه‌ ل ڤێ هه‌فتیێ ده‌سته‌یا سه‌رۆكایه‌تیا په‌رله‌مانێ كوردستانێ بۆ دانوستاندنێ ل سه‌ر گاڤێن نڤیسینا دستووری دێ كۆمبیت” .

ناڤبریێ ئاماژه‌ كر” ب پێدڤی دزانین د ڤێ خۆلا په‌رله‌مانێ كوردستانێ دا بشێین ببینه‌ خودانێن دستوورێ خوه‌، كو گرنگیه‌كا مه‌زن یا هه‌ی بۆ هه‌رێما كوردستانێ و هه‌موو پێكهات و ئایین و مه‌زهه‌بان و دێ بیته‌ پارێزه‌رێ قه‌وارێ هه‌رێما كوردستانێ و ئه‌و ده‌ستكه‌فتێن بده‌ستڤه‌ هاتین”.

ل 24/6/2009، په‌رله‌مانێ كوردستانێ پرۆژێ دستوورێ هه‌رێمێ په‌سه‌ند كربوو، به‌لێ ژ ئه‌گه‌رێ نه‌بوونا كۆده‌نگیێ، بۆ ده‌نگدانا وه‌لاتیان ل سه‌ر پرۆژه‌ی هێلابوو و پاشی بێده‌نگی لێ هاته‌ كرن، هه‌روه‌سا ل خۆلا چارێ یا په‌رله‌مانێ كوردستانێ، كۆده‌نگی ل سه‌ر 51 مادێن ره‌شنڤیسا دستووری هاتبوو كرن و ل خۆلا پێنجێ ژی دا گه‌هشتنه‌ 72 مادا، به‌لێ لایه‌نێن سیاسی ل سه‌ر هژماره‌كا ماده‌یان د ناكۆك بوون كو په‌یوه‌ندی ب ئایین و سیسته‌مێ سیاسی و ب رێڤه‌برنێ و به‌لاڤكرنا ده‌ستهه‌لاتان ڤه‌ هه‌بوو، ئه‌ڤێ چه‌ندێ ژی وه‌كر مادێن دی نه‌هێنه‌ تمامكرن و دستوور ژی بكه‌ڤیته‌ د ڤیچ خۆلا په‌رله‌مانی دا

ئه‌ڤرۆ:

دو سال ل سه‌ر ژیێ كابینا نه‌هێ یا حوكمه‌تا هه‌رێمێ ده‌ربازبوون، كو ل ده‌ستپێكێ خزمه‌تگوزاریێن زێده‌تر و ئه‌نجامدانا چاكسازیێ كربوو كارناما خوه‌.

مه‌سرور بارزانی، ل 10 ته‌مووزا 2019 وه‌كو سه‌رۆكێ حوكمه‌تا هه‌رێما كوردستانێ، سویندا قانوونی خواند، سه‌ره‌رای چه‌ندین ئاسته‌نگ و قه‌یرانێن دارایی، به‌لێ نه‌بوونه‌ گرفت ل به‌رده‌م ئه‌نجامدانا چاكسازیێ و رێكخستنا ژێده‌رێن داهاتی، به‌ری هه‌موویان ژی رێكخستنا باج و ده‌رامه‌تێن گشتی و ده‌روازێن سنووری.

سه‌رۆكێ حوكمه‌تا هه‌رێمێ، ل چه‌ندین هه‌لكه‌فتێن جودا دا، د گۆتارێن خوه‌ دا ئاماژه‌ ب وێ چه‌ندێ كر، ئه‌وا وان كری پێگیریێن كۆمپانیانه‌، كو چه‌ندین ساله‌ خوه‌ ژ دانا باجێ ڤه‌دزی، نوكه‌ یێن هاتینه‌ نه‌چاركرن باجێ بده‌ن.

مه‌سرور بارزانی دووپاتكر، ژ نوكه‌ و وێڤه‌ ژێده‌رێن داهاتی ل هه‌رێما كوردستانێ دێ هێنه‌ هه‌مه‌جۆركرن و ئێدی تنێ پشت به‌ستن ب داهاتێ په‌ترۆلێ ناهێته‌ كرن، ب هه‌مان شێوه‌ گرنكی ب كه‌رتێن دی ژی دێ هێته‌ دان، وه‌كو چاندن و به‌رئێنان ودامه‌زراندنا كارگه‌هێن جودا.

هه‌ر د وی چارچۆڤه‌ی دا، د ده‌مێ دو سالێن بۆری یێن ژیێ كابینا نه‌هێ دا، چه‌ندین كارگه‌هێن مه‌زن بۆ ب بازاركرنا گه‌نمێ جوتیارا و ده‌ڤه‌را پیشه‌سازیا خۆراكی و كارگه‌ها تایبه‌ت ب ساخكرنا به‌روبۆمێ پتاتان یێن هاتینه‌ دامه‌زراندن، ئه‌و كارگه‌هێن پێشتر ژی هاتینه‌ دامه‌زراندن و ژ كاری راوه‌ستاین، جاره‌كا دی كه‌فتنه‌ كاری، وه‌كو كارگه‌ها دوشاڤا باجانان ل هه‌ریر و شاره‌زوور. ب كارخستنا وان كارگه‌هان د چارچۆڤێ ستراتیژیه‌تا كابینا نه‌هێ یا حوكمه‌تا هه‌رێمێ یه‌، كو ئاسانكاری بۆ وه‌به‌رئێنه‌ران و خودان كارگه‌هان دكه‌ت، ب تایبه‌تی ژی ئه‌و كارگه‌هێن كاری ل سه‌ر ساخكرنا به‌رهه‌مێ جوتیاران دكه‌ن.

ئێك ژ وان كه‌رتێن دی یێن سه‌رۆكێ حوكمه‌تا هه‌رێما كوردستانێ، به‌رده‌وام دووپاتیێ ل سه‌ر دكه‌ت، كه‌رتێ رێ و پرا و ڤه‌گوهاستنێ یه‌، وه‌كو وی ب خوه‌ ئاماژه‌ پێكری، بربرا پشتا لڤێنێن بازرگانیه‌، بۆ وێ چه‌ندێ ژی هه‌تا نوكه‌ چه‌ندین پرۆژێن ستراتیژی و مه‌زن ل هه‌رێما كوردستانێ د ڤی بیاڤی دای ێن هاتینه‌ بجهئینان.

كه‌رتێ ساخله‌میێ ئێك بوو ژ وان كه‌رتێن جهێ گرنگیا سه‌رۆكێ حوكمه‌تا هه‌رێما كوردستانێ و كابینا نه‌هێ بوو، ل ده‌ستپێكا به‌لاڤبوونا په‌تایا كورۆنایێ ل هه‌رێما كوردستانێ، د گۆتاره‌كێ دا، مه‌سرور بارزانی، سه‌رۆكێ حوكمه‌تا هه‌رێما كوردستانێ راگه‌هاند” سه‌لامه‌تیا گیانێ وه‌لاتیان و ساخله‌میا وان ل سه‌ر هه‌می تشته‌كی یه‌ و پێدڤیه‌ وه‌لاتیێن خوه‌ ژ وێ په‌تایێ بپارێزین”، ل گه‌ل به‌رهنگاریا په‌تایا كورۆنایێ ژی، چه‌ندین نه‌خوه‌شخانێن نوو ل هه‌رێما كوردستانێ هاتنه‌ ڤه‌كرن.

كاره‌كێ دی یێ گرن گیێ كابینا نه‌هێ یا حوكمه‌تا هه‌رێما كوردستانێ، ئه‌وه‌ كو سه‌رۆكێ حوكمه‌تێ شیایه‌ تیمه‌كا حكومی یا ب هێز پێك بینیت، كو سه‌ره‌رای حوكمه‌ت ب هه‌ڤپه‌یمانیا سێ لایه‌نێن سه‌ره‌كی یا هاتیه‌ پێكئینان، به‌لێ ب هه‌ماهه‌نگیه‌كا ب هێز كاركریه‌ و چارچۆڤێ حزبی ده‌ربازكریه‌، ئه‌ڤه‌ ژی ئاماژه‌كا رۆهنه‌ بۆ گونجاندنا تیما حوكمه‌تێ ل گه‌ل خواست و داخوازیێن وه‌لاتیان و پێشكێشكرنا خزمه‌تگوزاریێن پێدڤی.

ئێك ژ خالێن دی كو سه‌رۆكێ حوكمه‌تا هه‌رێمێ دووپاتی ل سه‌ر كری، گه‌هاندنا خزمه‌تگوزاریێن گشتی یه‌ بۆ ده‌رڤه‌ی سه‌نته‌رێ پارێزگه‌هان، د چارچۆڤه‌ی دا، خزمه‌تگوزاریێن ده‌رئینانا پاسپۆرتێ گه‌هشتنه‌ قه‌زایێن كۆیه‌، چه‌مچه‌مال، سۆران و بریاره‌ بهێنه‌ گه‌هاندن بۆ چه‌ند قه‌زایێن دی ژی، هه‌ڤده‌م ده‌رئینان و نووكرنا سالنامێن ترۆمبێلان و ده‌رئینانا مۆله‌تا شۆفێریێ د چارچۆڤێ وان ستراتیژیه‌تا دانه‌، ژبۆ وێ چه‌ندێ وه‌لاتی نه‌هێنه‌ نه‌چاركرن رێیه‌كا دوور ببرن تاكو بگه‌هنه‌ سه‌نته‌رێن پارێزگه‌هان.

ژ رویێ ب هێزكرنا په‌یوه‌ندیان ژی ل سه‌ر ئاستێ ناڤخوه‌یی و ئیراقێ و هه‌رێمی و نێڤده‌وله‌تی دا، سه‌رۆكێ حوكمه‌تێ به‌رده‌وام دووپات كریه‌، كوردستانه‌كا ب هێز پێدڤی ب په‌یوه‌ندیه‌كا ب هێز یا هه‌ی ل گه‌ل وه‌لاتێن جیران و جڤاكێ نێڤده‌وله‌تی، د ڤی چارچۆڤه‌ی دا چه‌ندین دیداریچن گرنگ یێن هاتینه‌ ئه‌نجامدان.

هه‌ولێر، قائید میرۆ

كۆمسیۆنا بلند یا هه‌لبژارتنان ل ئیراقێ بڕیاردا ده‌ست ب هه‌وا هه‌لبژارتنان بهێته‌كرن و بۆ ده‌مێ سێ هه‌یڤان هه‌موو قه‌واره‌ و به‌ربژار و لیستێن هاتینه‌ په‌سه‌ندكرن دشێن ب گۆره‌ی قانوون و رێنمایان هه‌وا خوه‌ یا هه‌لبژارتنان ده‌ست پێ بكه‌ن، به‌رپرسه‌كێ ده‌زگه‌هێ هه‌لبژارتنێن پارتی ژی ئاشكراكر، ل دووڤ قانوون و بڕیارێن كۆمسیۆنێ، پارتی دێ هه‌وا خوه‌ یا هه‌لبژارتنێن جڤاتا نوونه‌رێن ئیراقێ ئه‌نجام ده‌ت.

هاوار محه‌مه‌د، به‌رپرسێ قانوونی ل ده‌زگه‌هێ هه‌لبژارتنێن پارتی بۆ رۆژناما ئه‌ڤرۆ دیاركر” ب گۆره‌ی مادێ ٢٢ ژ قانوونا هه‌لبژارتنێن جڤاتا نوونه‌رێن ئیراقێ و بڕیارا هژماره‌ پێنج یا جڤاتا كۆمسیاران ل كۆمسیۆنا بلند یا سه‌ربخوه‌ یا  هه‌لبژارتنان ل ئیراقێ بڕیار هاتیه‌دان ده‌لیڤه‌ بۆ هه‌موو وان به‌ربژارێن ناڤێن وان ژلایێ كۆمسیۆنا هه‌لبژارتنان هاتینه‌ په‌سه‌ندكرن ل رۆژا ٨/٧/ ٢٠٢١ێ ده‌ست ب پرۆسا هه‌وا هه‌لبژارتنان بكه‌ن هه‌تا ده‌مژمێر شه‌شی سپێده‌یا رۆژا پێنج شه‌مبی ٧/١٠، پێدڤیه‌ هه‌موو به‌ربژار پێگیریێ ب هه‌وا هه‌لبژارتنان بكه‌ن، هنده‌ك بڕیار و رێنمایی ل دۆر ب رێڤه‌چوونا پرۆسا هه‌وا هه‌لبژارتنان هاتینه‌ ده‌ركرن، ژوان نابیت راسته‌وخوه‌ ل سه‌ر دیواران بهێته‌ نڤیسین و به‌لاڤكرن و لێدانا ناڤێن به‌ربژاران نێزیكی بنگه‌هێن ده‌نگدانێ قه‌ده‌غه‌یه‌”.

گۆت ژی” چه‌ندین رێنمایێن دی بۆ هه‌وا هه‌لبژارتنان یێن هه‌ین وه‌كو قه‌ده‌غه‌كرنا ئامرازێن تایبه‌ت ب راگه‌هاندنا كۆمسیۆنا بلند یا هه‌لبژارتنان و نابیت ب چ شێوه‌یه‌كی ئاڤاهیێن گشتی و ده‌زگه‌هێن حوكمه‌تێ بۆ مه‌ره‌مێن هه‌وا هه‌لبژارتنان بهێنه‌ بكارئینان، هه‌روه‌سا كۆمبوون و چالاكیێن تایبه‌ت ب هه‌وا هه‌لبژارتنان ل جهێن ئاینی قه‌ده‌غه‌یه‌ و نابیت ب چو شێوه‌یه‌كی گڤاشتن ل سه‌ر ده‌نگده‌ری هه‌بن ورێ ناهێته‌دان ده‌نگده‌ر بهێته‌ نه‌چاركرن، ژلایه‌كێ دیڤه‌ به‌خشینا پاره‌ و پێدانا سۆزێ به‌رامبه‌ر ده‌نگدانێ قه‌ده‌غه‌نه‌، ئانكو نابیت چو به‌ربژار و لایه‌ن پاره‌ی بده‌نه‌ ده‌نگده‌ری بۆ رۆژا ده‌نگدانێ وبانگه‌شه‌كرن ل ڕۆژا رێڤه‌چوونا ده‌نگدانێ ب هه‌موو شێوه‌یه‌كی هاتیه‌ قه‌ده‌غه‌كرن”.

ئاماژه‌كر” ده‌ستدرێژی بۆ سه‌ر هه‌وا هه‌لبژارتنان هاتیه‌ قه‌ده‌غه‌كرن و رێ ناهێته‌دان ب به‌لاڤكرنا وێنه‌ و ناڤێن كه‌سه‌كی هه‌گه‌ به‌ربژار نه‌بیت و ناڤێ وی نه‌هاتبیته‌ په‌سه‌ندكرن ژلایێ كۆمسیۆنا بلند هه‌لبژارتنان ڤه‌، هه‌روه‌سا نابیت وێنه‌یێن چو سه‌ركرده‌یان بهێنه‌ بكارئینان و به‌لاڤكرن دده‌مێ ب رێڤه‌چوونا هه‌وا هه‌لبژارتنان، ئه‌ڤه‌ هه‌موو رێكارێن كۆمسیۆنا بلند یا سه‌ربخوه‌ یا هه‌لبژارتنێن ئیراقێ نه‌ و ئه‌م وه‌كی ده‌زگه‌هێ هه‌لبژارتنێن پارتی د چارچۆڤێ قانوون و بڕیارێن كۆمسیۆنێ دێ ده‌ست ب هه‌وا هه‌لبژارتنان كه‌ین و هه‌ركه‌س و لایه‌كێ بناڤێ پارتی ژی زێده‌گاڤیان بكه‌ت ئه‌و به‌رپرسیاره‌ هه‌مبه‌ر رێوجهێن قانوونی، ژ به‌ر كو پارتی حزبه‌كه‌ پێگه‌هێ خوه‌ یێ هه‌ی دناڤا خه‌لكی دا و به‌رده‌وام پێگیری ب قانوونێ كریه‌”.

ئه‌ڤرۆ، ره‌مه‌زان هه‌رنی:

سه‌ركرده‌یه‌كێ ئه‌نه‌كه‌سێ ل رۆژئاڤایێ كوردستانێ دیاركر په‌كه‌كه‌ هه‌ر ل سالا دامه‌زراندنا خوه‌ هه‌تا نوكه‌ پلانه‌ك دانایه‌ بۆ ڤه‌كرنا بازاره‌كێ نشتیمانی و نه‌ته‌وه‌یی بۆ فرۆتنێ هه‌تا شیان كۆمه‌كا جه‌ماوه‌ری رازیكر هه‌كه‌ ئه‌و جه‌ماوه‌ر دگه‌ل بوچوونێن وان نه‌بیت خاین و خۆفرۆشن ئه‌وان دژی جه‌ماوه‌ری بانگه‌شه‌یا ئازادیێ و دیموكراسیێ كر، په‌كه‌كێ بۆ لڤاندنا هه‌ستێ خه‌لكی ئێك چالاكی بۆ كوردستانێ نه‌بوو ب تنێ بۆ به‌رژه‌وه‌ندیا خوه‌ كار كریه‌ و دژی دۆزا ره‌وا یا گه‌لێ كورده‌.

مه‌حمود برۆ به‌رپرسێ جڤاتا نشتیمانیا كوردی ل سووریێ ل نه‌رویچ بۆ رۆژناما ئه‌ڤرۆ راگه‌هاند هه‌رێما كوردستانێ كیانه‌كێ فه‌رمی و سیاسی و یاسایی یه‌، باوه‌ریا جیهانێ ب ده‌ستڤه‌ ئینایه‌، به‌لێ په‌كه‌كێ‌ دڤێت وێ ئارامی و جوانیا كوردستانێ تێك بده‌ت كو حوكمه‌تا هه‌رێما كوردستانێ پتر كار دكه‌ت بۆ ئاڤه‌دانكرنا وه‌لاتی ل به‌رامبه‌ر دا په‌كه‌كێ دڤێت خراب بكه‌ت، په‌كه‌كه‌ گه‌هشتیه‌ باوه‌ریێ وێ كو دزانیت هه‌رێما كوردستانێ ل گوپیتكا سه‌ركه‌فتنێ یه‌ و ژ به‌ر هندێ دڤێت ژناڤ ببه‌ت .

خویاكر پیلانا په‌كه‌كێ رۆژانه‌ زێده‌تر ئاشكرا دبیت كو دژی میلله‌تێ كورده‌، دژی ده‌ستكه‌فتێن هه‌رێما كوردستانێ یه‌، ل هه‌ر جهێ چالاكڤانه‌كێ كورد ببینیت ده‌سته‌سه‌ر دكه‌ت نه‌ڤێت كه‌س كار بكه‌ت كو ژ ده‌رڤه‌ی سیاسه‌تا وان بیت.

ناڤهاتی ئاشكرا ژی كر په‌كه‌كێ زیانێن مه‌زن گه‌هاندینه‌ رۆژئاڤایێ كوردستانێ، ژیانا سیاسی ل رۆژئاڤا نه‌مایه‌ چو تشته‌ك نه‌مایه‌ بۆ ژیانكرنێ، ده‌مێ خوه‌ رۆژئاڤا ل ژێر ده‌ستهه‌لاتا رژێما سوریا بوو نوكه‌ ل ژێر ده‌سهه‌لاتا دو ده‌وله‌تا دایه‌ توركیا و سووریێ، هه‌موو كوردێن رۆژئاڤا ئاواره‌ و په‌نابه‌ر بووینه‌، عه‌ره‌ب ل سه‌ر مالێن وان ئاكنجی بووینه‌ و وان دڤێت رۆژئاڤا ل كوردان بێ به‌هر بكه‌ن.

ئه‌ڤرۆ:

وه‌زیرێ ده‌رڤه‌ یێ روسیا راگه‌هاند ده‌م یێ هاتی كو ئه‌مریكا هه‌موو هێزێن خوه‌ ژ سووریێ ڤه‌كێشیت، چونكو هه‌كه‌ ئه‌مریكا هێزێن خوه‌ ژ باكورێ سووریێ ڤه‌كێشیت وی ده‌می دێ ده‌لیڤه‌كا دی هێته‌ پێش دا كورد و شام ب رێیا دانوستاندنان پرسێن د ناڤبه‌را خوه‌ دا چاره‌سه‌ر بكه‌ن.

ل هه‌مبه‌ر هه‌لویستێ وه‌زیرێ ده‌رڤه‌ یێ روسیا ژی جۆی هود جێگرێ وه‌زیرێ ده‌رڤه‌ یێ ئه‌مریكا راگه‌هاند كو هێزێن وان دێ ل سووریێ مینن و جارێ چو به‌رنامێ ئه‌مریكا بۆ هندێ نینن كو هێزێن خوه‌ ژ باكورێ سووریێ ڤه‌كێشیت، چونكو مه‌ترسیا داعشێ و رژێما به‌شاری ل سه‌ر خه‌لكێ كورد و نه‌ته‌وێن دی ل باكورێ سووریێ به‌رده‌وام دكه‌ت و هێزێن سووریا دیموكرات ژی د شه‌رێ ل دژی داعشێ دا گه‌له‌ك قوربانی داینه‌ و هه‌ڤپه‌یمانێ سه‌ره‌كی یێ ئه‌مریكا نه‌ ل سووریێ، ژ به‌ر هندێ ژی ئه‌مریكا هه‌ڤپه‌یمانێن خوه‌ ل سووریێ ب تنێ ناهێلیت و گۆت: (هاریكاریا مه‌ بۆ هێزێن سووریا دیموكرات دێ به‌رده‌وام بیت، چونكو داعش و گرۆپێن دی یێن تیرۆرستی ل باكورێ سووریێ خوه‌ ب رێكخستن دكه‌ن و دشێن جاره‌كا دی ده‌ست ب كریارێن تیرۆرستی ل دژی خه‌لكێ سڤیل بكه‌ن، ژ به‌ر هندێ ژی ئه‌مریكا جارێ هێزێن خوه‌ ژ سووریێ ڤه‌ناكێشیت).

ل دۆر هه‌لویستێ وه‌زیرێ ده‌رڤه‌ یێ روسیا ژی ناڤهاتی راگه‌هاند كو روسیا دڤێت مفای ژ ئالۆزیێن نها ژ سووریێ وه‌ربگریت، به‌ری نها گه‌له‌ك وه‌لاتێن رۆژئاڤایی بزاڤا هندێ كرن كو قه‌یرانا سووریێ ب رێیا دانوستاندنان بهێته‌ چاره‌سه‌ر كرن، لێ روسیا دڤێت ب ریێا هاریكاریێن نێڤده‌وله‌تی كو بگه‌هنه‌ سووریێ پێگه‌هێ خوه‌ ب هێز بكه‌ت و قه‌رێن كو به‌ری نها داینه‌ سووریێ ژێ وه‌ربگریت، ئانكۆ روسیا پتر بۆ به‌رژه‌وه‌ندیێن خوه‌ كار دكه‌ت و خه‌لكێ سووریێ دكه‌ته‌ قوربانی، روسیا كار بۆ ئاشتی و ئارامیێ ل سووریێ ناكه‌ت و روسیا ب پشته‌ڤانیا به‌شاری بوویه‌ ئه‌گه‌رێ هندێ كو ب هزاران وه‌لاتیێن سڤیل ببنه‌ قوربانی.

جێگرێ وه‌زیرێ ده‌رڤه‌ یێ ئه‌مریكا ئه‌و یه‌ك ژی نه‌ ڤه‌شارت كو ئه‌مریكا هه‌تا نها گه‌له‌ك كارێن گرنگ ل باكورێ سووریێ ئه‌نجام داینه‌ و ستراتیژیا ئه‌مریكا ل هه‌مبه‌ر كوردان ل سووریێ نه‌هاتیه‌ گوهۆرین و هاریكاریا ئه‌مریكا بۆ كوردان و هێزێن سووریا دیموكرات دێ به‌رده‌وام بیت.

ئه‌ڤرۆ:

پشكا رۆژنامه‌ڤانی یا سه‌ر ب ده‌زگه‌هێ ره‌وشه‌نبیری و راگه‌هاندنا پارتی دیموكراتی كوردستان به‌رسڤا داخۆیانیێن دۆران كالكان ئه‌ندامێ كۆمیتا ب رێڤه‌برنا pkk دده‌ت كو ل رۆژا 21 ڤێ مه‌هێ پێگه‌هێ (ANFNEWS) یێ سه‌ر ب pkk به‌لاڤكربوون.

د به‌رسڤا ده‌زگه‌هێ ره‌وشه‌نبیری و راگه‌هاندنا پارتی دا هاتیه‌” هه‌موو ئه‌و پێزانینێن كالكانی به‌حسكرین د شاشن و زێده‌تر وه‌كو راپۆرته‌كێ بۆ رازیكرنا ده‌ره‌كی بوون، كو ئه‌و پێزانینه‌ د نهێنی نه‌ و هیچ كه‌س و لایه‌نه‌ك د ئاگه‌هدار نینن ل سه‌ر و ئاشكراكرنا وان پارتی ئیحراج دكه‌ت! به‌لێ كالكان و pkk شاش ده‌رچوون، چونكه‌ ئه‌و ب خوه‌ ژ هه‌موویان باشتر دزانن، پارتی ب ئاشكرایی هه‌لویستی وه‌ردگریت و ب رۆهنی ئاخڤتنێن خوه‌ دكه‌ت.

هه‌روه‌سا تێدا هاتیه‌ ژی” جهێ سه‌رنجێ یه‌، كالكان، به‌رۆڤاژی هه‌ر داخۆیانیه‌كا 20 سالێن بۆری یێن سه‌رانێن pkk، ناڤێ كورد و كوردستان چه‌ند جاران دوباره‌كر، ئه‌ڤه‌ ژی بزاڤه‌كا دی یا چه‌واشه‌كرنا خه‌لكێ كوردستانێ یه‌، چونكه‌ ئه‌م هه‌موو دزانین چه‌ندین ساله‌ ناڤێ كورد و كوردستان د فه‌رهه‌نگ و ئه‌ده‌بیاتێن سه‌رانێن pkk دا نه‌مایه‌ و په‌یوه‌ندیا سه‌رانێن pkk ب كورد و كوردستانێ تنێ خوه‌سه‌پاندنا وانه‌ ب سه‌ر ئاخه‌كێ دا كو كوردستانه‌ و ئیستیغلالكرنا وان گه‌نجێن كورد یێن سه‌رانێن pkk كرینه‌ قوربانیێن شه‌رێن خوه‌”.

د به‌رسڤێ دا هاتیه‌ ژی” دیاره‌ كالكان وهه‌اڤلێن خوه‌ یێن گه‌هشتینه‌ وێ راستیێ ئێدی درووشم ب سه‌ر خه‌لكی دا ده‌رباز نابن، ئه‌و رۆژه‌ ژی هند نه‌مایه‌ كو پێدڤیه‌ سه‌رانێن pkk به‌رسڤا پرسیارێن دایك و بابێن هزاران قوربانیێن ده‌ستێ خوه‌  بده‌ن: رۆلێن مه‌ ل پیناڤی چ دا كرنه‌ قوربانی؟ كور و كچێن مه‌ چ دكه‌ن ل گاره‌ و مه‌تین و باتیفا و شنگالێ و ماوه‌ت و شارباژێر و پنجوین؟”.

د پشكه‌كا دی یا به‌رسڤێ دا هاتیه‌” كالكان چه‌ندین جاران به‌حسێ هاریكاریێ بۆ هه‌رێما كوردستانێ دكه‌ت، جارێ خه‌لكێ كوردستانێ باش دزانن pkk ژ جوگرافیا راسته‌قینه‌ یا چالاكیێن خوه‌ یا ره‌ڤی، نه‌ ئه‌م و نه‌ چ لایه‌نه‌ك، نه‌ نوكه‌ و نه‌ ل ده‌مێن بۆری، داخوازا هاریكاریێ ژ pkk نه‌كریه‌، ئه‌و ژ رۆژا ئێكێ و هه‌تا نوكه‌ تنێ بارگرانی و جهێ سه‌رئێشێ و شه‌ر و شوریێ بوون بۆ خه‌لكێ كوردستانێ، ب سه‌دان جاران هاتینه‌ ئاگه‌هداركرن كو نه‌بنه‌ بیانوو ب ده‌ستێ ڤی و یێ دی تاكو ئاخا كوردستانێ توپباران و داگیر بكه‌ن، به‌لێ ژ به‌ركو ئه‌و رێكخراوه‌كا ئایدیۆلۆژی یا داخستی یه‌، به‌رده‌وام ب دفن بلندی به‌رسڤ ددان”.

ئاماژه‌كر” كالكان به‌حسێ هاریكاریا pkk دكه‌ت د شه‌رێ حه‌فته‌نینێ دا، لێ دیاره‌ یێ بێ ئاگه‌هه‌ ژ وێ چه‌ندێ كو چ جاران هێزێن حوكمه‌تا ئیراقێ ل وێ ده‌ڤه‌رێ نه‌بوون، تاكو شه‌ره‌ك دروست ببیت و pkk هاریكاریا پێشمه‌رگه‌ی كربیت و پارتی چ جاران كارێن هه‌ڤپشك ل گه‌ل pkk نه‌كرینه‌ و ئه‌و شه‌رێن كالكان د ده‌مێ 40 سالان دا به‌حس وان دكه‌ت، هه‌ر هه‌موو دژی بزاڤا رزگاریخوازا كوردستانێ و پاشی دژی به‌رژه‌وه‌ندیێن خه‌لكێ هه‌رێما كوردستانێ و ده‌زگه‌هێن وێ یێن شه‌رعی و كێمترین شه‌رێن وان ل مه‌یدانا راسته‌قینه‌یا یا وان بوو”.

هه‌روه‌سا دیاركریه‌” ئه‌م نزانین ب چ مه‌نتقه‌كی كالكان چه‌ندین جاران دوباره‌ دكه‌ت كو ئه‌و بۆ ئازادیا كوردستانێ یێن هاتینه‌ ڤێرێ؟ به‌لكو گه‌له‌ك جاران و هه‌تا ئه‌ڤرۆ هاریكاریا حوكمه‌تا ئیراقێ دكه‌ن، سه‌رانێن pkk ل دووماهیا سالێن هه‌شتیان شه‌ش كادرێن لقێ ئێكێ پارتی راده‌ستی حوكمه‌تا به‌عس كرن ، نوكه‌ ژی سه‌رانێن pkk هه‌ڤپه‌یمانێن هێزێن نه‌یارێن كوردستانێ نه‌ ل شنگالێ و جهێن دی”.

د ئالیه‌كێ دی یێ به‌رسڤێ دا هاتیه‌” كالكان به‌حسێ وێ چه‌ندێ كریه‌ كو سه‌رانێن pkk دخواست سه‌رۆك بارزانی بكه‌نه‌ سه‌رۆكێ نه‌ته‌وی!! ئه‌م هه‌موو دزانین pkk د وی ئاستی دا نینه‌ و مافێ وێ چه‌ندێ ژی نینه‌ كه‌سه‌كی بكه‌ته‌ سه‌رۆكێ نه‌ته‌وی، به‌لكو خه‌لكێ كوردستانێ بریارێ ل سه‌ر وێ چه‌ندێ دده‌ت”.

دلایه‌كێ دی دا ئاماژێ ب داخۆیانیێن وی ئه‌ندامێ كۆمیتا ب رێڤه‌برنا pkk دكه‌ت كو تێدا به‌حسێ رێككه‌فتنه‌كێ دكه‌ت ل هه‌یڤا كانوونا ئێكێ 1996، ئه‌ڤ به‌حسه‌ وێ هێرشا به‌ربه‌لاڤ یا pkk دئینیته‌ بیر كا چاوا د ئێك شه‌ڤ دا هێرشی 25 بنكه‌ و باره‌گایێن پێشمه‌رگه‌ی كر و چه‌ندین پێشمه‌رگه‌ شه‌هید و برینداركرن و ئاگرێ شه‌ری هه‌لكر و ب رێیا هاتنا دناڤ شه‌ری دا، درێژی ب شه‌رێ ناڤخوه‌یی دا”.

هه‌روه‌سا تێدا هاتیه‌ كو سه‌ره‌رای وێ چه‌ندێ هه‌موو پێزانینێن كالكانی د راست نینن، ته‌رحێن وی ژی د لۆژیكی نینن، ده‌مێ دپرسیت: هێزێن پێشمه‌رگه‌ی چ دكه‌ن ل چیایێ مه‌تین و بۆچی هاتینه‌، د ده‌مه‌كی دا چیایێ مه‌تینی دناڤ جه‌رگێ هه‌رێما كوردستانێ دایه‌، پێشمه‌رگه‌ ژی هێزا قانوونی و فه‌رمی یا ڤێ هه‌رێمێ یه‌ و پرسیار دكه‌ین كێ ئه‌و ماف دایه‌ كالكانی پێشمه‌رگه‌ی ل ئاخا خوه‌ یا ره‌سه‌ن قه‌ده‌غه‌ بكه‌ت؟. Pkk ژ وان جهێن ژێ دره‌ڤیت شه‌ری ناكه‌ت، به‌لێ ل وان جهێن بۆ دره‌ڤیت، نه‌كو هه‌ر شه‌ری دفرۆشیت و پێشمه‌رگه‌ی شه‌هید دكه‌ت، بگره‌ وه‌كو حاكم خوه‌ د سه‌پینیت”.

ل دووماهیا به‌رسڤا خوه‌ دا، ده‌زگه‌هێ ره‌وشه‌بنیری و راگه‌هاندنا پارتی دبێژیت” سه‌ره‌رای كو ئاخڤتنێن دۆران كالكان هه‌موو جه‌واشه‌كاری نه‌، دووپاتكه‌رێن واقعه‌كێ ته‌حلن كو سه‌رانێن Pkk د رژدن ل سه‌ر دژایه‌تیا هه‌رێما كوردستانێ و حوكمه‌ت و ده‌زگه‌هێن وی یێن شه‌رعی و به‌رژه‌وه‌ندیێن خه‌لكێ هه‌رێما كوردستانێ، د وی پیناڤی ژی دا د به‌رهه‌ڤن هه‌موو ره‌فتار و جه‌واشه‌كاری و رێككه‌فتنێن ژێر ب ژێر بكه‌ن، به‌لێ پێدڤیه‌ دو راستیان ل به‌رچاڤ وه‌ربگرن، خه‌لكێ هه‌رێما كوردستانێ ب گشتی، ب درووشمێن ئایدیۆلۆژی یێن ده‌م ب سه‌ر ڤه‌چووی یێن Pkk ناهێته‌ سه‌ردابرن و ب قه‌ناعه‌ت داكۆكیێ ل قه‌وار و ده‌ستكه‌فت و ئاخا خوه‌ دكه‌ت، یا دوویێ ژی، روو ب رووبوونا سه‌رانێن Pkk ل گه‌ل وان گه‌نجێن دناڤ Pkk دا كو ب ناڤێ كورد و كوردستانێ ب دووڤ وان كه‌فتین، لێ ئه‌و شه‌رێ كورد و كوردستانێ ب وان گه‌نجان دكه‌ن، گه‌له‌ك یا نێزیكه‌”.

هه‌ولێر، قائید میرۆ

ره‌وشا كه‌ركووكێ پشتی روودانێن ١٦ی ئۆكتۆبه‌رێ ئالۆز بوویه‌ و كورد دبێژن، ئیداره‌كا سه‌پاندی هه‌موو بزاڤه‌كێ دكه‌ت بۆ لاوازكرنا كوردان ل كه‌ركووكێ و عه‌ره‌بكرنا ده‌ڤه‌رێن كوردی ژی زێده‌كریه‌، به‌رپرسه‌كێ پارتی ل كه‌ركووكێ ئاشكراكر، پارتی مه‌رجێن پێشوه‌خت یێن هه‌ین بۆ وێ چه‌ندێ ڤه‌گه‌ڕیت كه‌ركووكێ و دبێژیت، ئه‌و لایه‌نێن كوردی یێن نوكه‌ ل كه‌ركووكێ و پشته‌ڤانیا ئیدارا كه‌ركووكێ دكر نوكه‌ ئه‌وژی په‌شێمانن.

دیاری حوسێن، جێگری سه‌رۆكێ جڤاتا سه‌ركردایه‌تیا پارتی ل كه‌ركووكێ بۆ رۆژناما ئه‌ڤرۆ گۆت” پارێزگارێ سه‌پاندیێ كه‌ركووكێ به‌رده‌وامه‌ لسه‌ر ب عه‌ره‌بكرنا كه‌ركووكێ و رۆژانه‌ ئینانا وه‌لاتیێن عه‌ره‌ب ل پارێزگه‌هێن ناڤین و باشوورێ دهێته‌ زێده‌كرن بۆ كه‌ركووكێ، هه‌موو ژی ئه‌و عه‌ره‌بن یێن سه‌رده‌مێ رژێما به‌عسا ژناڤچوویی هاتینه‌ ڤه‌گوهاستن بۆ كه‌ركووكێ و پشتی پڕۆسا ئازادیا ئیراقێ لهه‌مبه‌ر وه‌رگرتنا گوژمه‌كێ پاره‌ی ڤه‌گه‌ڕیاینه‌ جهێن خوه‌، به‌لێ نوكه‌ دیسان ئه‌و عه‌ره‌بێن داگیركه‌ر ڤه‌دگه‌ڕن بۆ كه‌ركووكێ و ئه‌ردێ جوتیارێن كورد داگیر دكه‌ن، بێگومان ئیدارا نوكه‌ یا كه‌ركووكێ تۆمه‌تباره‌ ب ڤێ چه‌ندێ، چونكه‌ ئه‌و عه‌ره‌بێن شۆڤێنی هاتینه‌ قه‌ره‌بووكرن و ئه‌رد یێ كوردانه‌، به‌لێ حوكمه‌تا خوه‌جهیا كه‌ركووكێ یا به‌رهه‌ڤ نینه‌ رێگریێ ل ڤه‌گه‌ڕیانا وه‌لاتیێن عه‌ره‌ب بكه‌ت ، له‌وڕا ده‌ستهه‌لاتدارێن نوكه‌ یێن كه‌ركووكێ دخوازن ره‌وشا كه‌ركووكێ هه‌ر یا ئالۆز بیت، هه‌تا ئه‌و بشێن پیلانێن خوه‌ تێدا بجهبینن، به‌رۆڤاژی هه‌كه‌ ره‌وشا كه‌ركووكێ ئاسایی ببیت، دێ ئاسته‌نگ بۆ كارێن وانا په‌یدا بن”.

ل دۆر ڤه‌گه‌ڕیانا پارتی بۆ كه‌ركووكێ، دیاری حوسێن گوت” پارتی ب چو شێوه‌یه‌كی ناڤه‌گه‌ڕیت كه‌ركووكێ هه‌كه‌ ره‌وش نه‌هێته‌ ته‌ناكرن و ئاسایی كرن، چونكه‌ نوكه‌ كه‌ركووك هاتیه‌ داگیركرن و هه‌تا ئه‌و لایه‌نێن به‌ری نوكه‌ ل كه‌ركووكێ ژی بووینه‌ و پشته‌ڤانیا ئیدارا كه‌ركووكێ دكرن، نوكه‌ په‌شێمانن و دبێزارن ژی ژ ره‌وشا كه‌ركووكێ،  پارتی مه‌رجێن خوه‌ یێن هه‌ین بۆ ڤه‌گه‌ڕیانێ، هه‌تا ئه‌و مه‌رجێن پارتی نه‌هێنه‌ بجه‌ ئینان پارتی یا به‌رهه‌ڤ نینه‌ ڤه‌گه‌ڕیت بۆ كه‌ركووكێ، راسته‌ نوكه‌ دانوستاندن د ناڤبه‌را پارتی و به‌غدا بۆ ته‌ناكرنا ره‌وشا كه‌ركووكێ دهێنه‌كرن، به‌لێ هه‌تا مه‌رجێن پارتی نه‌هێنه‌ بجهئینان ڤه‌ناگه‌ڕیت بۆ كه‌ركووكێ، ب تایبه‌تی ئه‌م به‌ر ب هه‌لبژارتنان دچین و دڤێت ره‌وش بهێته‌ ئاسایی كرن، چونكه‌ ره‌وشا نوكه‌ یا كه‌ركووكێ یا گونجای نینه‌ بۆ رێڤه‌چوونا هه‌لبژارتنان، چه‌ندین هێزێن میلیشیا ل كه‌ركووكێ یێن هه‌ین و دڤێت بهێنه‌ ڤه‌كێشان و باده‌كا ئه‌منی راده‌ستی پۆلیسێن فیدڕالی بهێته‌كرن، هه‌روه‌سا ئیدارا سه‌پاندی نه‌مینیت و كورد وه‌كی پێكهاته‌یا سه‌ره‌كی د ئیدارا كه‌ركووكێ دا پشكدار ببیت”.

ئه‌ڤرۆ:

جوی هود جێگرێ وه‌زیرێ ده‌رڤه‌ یێ ئه‌مریكا بۆ كاروبارێن رۆژهه‌لاتا ناڤین راگه‌هاند كو هێزێن ئه‌مریكا یێن ل سووریێ و رۆژئاڤایێ كوردستانێ ژ به‌ر شه‌رێ ل دژی تیرۆرێ چووینه‌ وێرێ و بێگومان هه‌تا نها ژی شه‌رێ ل دژی داعشێ و رێكخراوێن دی یێن تیرۆرستی ب دژواری به‌رده‌وام دكه‌ت و ژ به‌ر هندێ ژی هێزێن ئه‌مریكا دێ ل سووریێ و رۆژئاڤایێ كوردستانێ مینن و ئه‌مریكا هێزێن خوه‌ ل وان ده‌ڤه‌ران ڤه‌ناكێشیت.

جێگرێ وه‌زیرێ ده‌رڤه‌ یێ ئه‌مریكا ئه‌و یه‌ك ژی دیار كر كو ره‌وشا ژیانا وه‌لاتیان ژی ل سووریێ و رۆژئاڤایێ كوردستانێ گه‌له‌ك خرابه‌ و پێدڤیا وان ب هاریكاریێن مرۆڤی هه‌نه‌، ژ به‌ر هندێ ژی پێدڤیه‌ هێزێن مه‌ ل وان ده‌ڤه‌ران بمینن دا بشێن هاریكاریا خه‌لكێ سڤیل بكه‌ن و گۆت: (ره‌وشا سووریێ گه‌له‌ك خرابه‌، مه‌ترسیا كریارێن تیرۆرستی ل هه‌موو ده‌ڤه‌رێن سووریێ هه‌یه‌، ب تایبه‌تی ژی رێكخراوا تیرۆرستی یا داعشێ د ڤان چه‌ند مه‌هێن دووماهیێ دا جاره‌كا دی خوه‌ ب رێكخستن كریه‌ و دشێت ده‌ست ب كریارێن تیرۆرستی بكه‌ت، وی ده‌می دێ مه‌ترسی ل سه‌ر ژیانا هه‌موو وه‌لاتیان ل باكورێ سووریێ هه‌بیت، ژ به‌ر هندێ ژی بۆ پاراستنا وان وه‌لاتیان دێ هێزێن ئه‌مریكا جارێ ل باكورێ سووریێ مینن و د به‌رنامێ مه‌ دا نینه‌ هێزێن خوه‌ ڤه‌كێشین).

ل دۆر ئه‌گه‌رێ ئۆپه‌راسیۆنه‌كا دی یا توركیا ل باكورێ سووریێ ژی ناڤهاتی راگه‌هاند كو وان به‌ری نها هۆشداری داینه‌ توركیا كو ب چو ره‌نگه‌كێ رێ ناده‌ن توركیا ده‌ست ب ئۆپه‌راسیۆنه‌كا دی ل باكورێ سووریێ بكه‌ت، هه‌روه‌سا ئه‌مریكا نه‌رازیبوونا خوه‌ ل هه‌مبه‌ر كریارێن گرۆپێن سه‌ر ب توركیا ل عه‌فرینێ و ده‌ڤه‌رێن دی یێن باكورێ سووریێ دیار كریه‌ و بۆ به‌رپرسێن توركیا دیار كریه‌ كو ئه‌و ب چو ره‌نگه‌كێ رێ ناده‌ن ئێدی توركیا ل ژێر ناڤێ شه‌رێ ل دژی تیرۆرێ ده‌ست ب ئۆپه‌راسیۆنه‌كا دی ل باكورێ سووریێ بكه‌ت.

قائید میرۆ

بڕیاره‌ دو لیوایێن هه‌ڤپشك  بۆ پێشمه‌رگه‌ و له‌شكرێ ئیراقی بهێنه‌ پێكئینان و سه‌رۆكێ لیژنا پێشمه‌رگه‌ ژی ل په‌رله‌مانێ كوردستانێ دبێژیت، هه‌ردو لیوا دێ بۆ پاراستنا ده‌ڤه‌رێن كوردستانی بن و ئه‌گه‌ر پێدڤی كر دێ هێزێن دی ژی هێنه‌ دامه‌زراندن

رێڤینگ هروری، سه‌رۆكێ لژنا پێشمه‌رگه‌ ل په‌رله‌مانێ كوردستانێ بۆ رۆژناما (ئه‌ڤرۆ) گۆت” بڕیاره‌ دو لیوایێن هه‌ڤپشك  یێن پێشمه‌رگه‌ی د ناڤبه‌را وه‌زاره‌تا پێشمه‌رگه‌ و به‌رگریا ئیراقی بهێنه‌ دامه‌زراندن و كارێ وان ژی دێ ل ده‌ڤه‌رێن كوردستانی بیت بۆ پاراستنا ره‌وشا ئه‌منی ل وان ده‌ڤه‌ران، گاڤا ئێكێ پێكئینانا چار ژۆرێن ئۆپه‌ڕاسیۆنێن هه‌ڤپشكه‌ و كه‌فتیه‌ د بیاڤێ بجهئینانێ دا، قۆناغا دویێ دێ دامه‌زراندنا دو لیوایێن هه‌ڤپشك بیت ژلایێ هه‌رێمێ و به‌غدا ڤه‌، هه‌ردو لیوا دێ  ژ پێشمه‌رگه‌ و سه‌ربازێن ئیراقی پێك هێت و گاڤه‌كا باشه‌ پێكڤه‌ به‌رهنگاری تیرۆرستان ببن.

رێڤینگ هروری ئاماژه‌كر” ره‌وشا ئه‌منی یا ده‌ڤه‌رێن كوردستانێ دێ راده‌ستی وان لیوایێن هه‌ڤپشك  هێته‌كرن و هه‌كه‌ بهێت و ره‌وش زێده‌تر ژی ئالۆز ببیت، وی ده‌می بێگومان دێ هێزێن هه‌ڤپشك یێن زێده‌تر هێنه‌ هنارتن بۆ هاریكاریا وان، ئه‌م باوه‌رین بڕیارا پێكئینانا لیوایێن هه‌ڤپشك  دێ باوه‌ریێ د ناڤبه‌را هه‌رێما كوردستانێ و به‌غدا ڤه‌گه‌رینیت ژلایێ له‌شكری ڤه‌، چونكه‌ ئه‌م ناڤه‌شێرین پێشمه‌رگه‌ و له‌شكرێ ئیراقی هه‌تا نوكه‌ وه‌ك نه‌یار ره‌فتارێ دگه‌ل هه‌ڤدو دكه‌ن”.

ژلایێ خۆڤه‌، د. محه‌مه‌د خورشید، به‌رپرسێ لقێ پارتی ل كه‌ركووكێ بۆ رۆژناما ئه‌ڤرۆ دیاركر” پێكئینانا ژۆرێن هه‌ڤپشك  یێن ئۆپه‌ڕاسیۆنان چ كاریگه‌ری ل سه‌ر ته‌ناكرنا ره‌وشا ده‌ڤه‌رێن كوردستانی یێن ل ده‌رڤه‌ی ئیدارا هه‌رێما كوردستانێ نابیت، ب تایبه‌تی ژی ل كه‌ركووكێ، چونكه‌ هێزێن حه‌شدا شه‌عبی ب چ شێوه‌یه‌كی پێگیریێ ب فه‌رمانێن سه‌ربازی ناكه‌ن و هه‌كه‌ هێزه‌ك پێگیریێ ب فه‌رمانێن فه‌رماندێ گشتیێ هێزێن چه‌كدارێن ئیراقی نه‌كه‌ت كو (مسته‌فا كازمی) یه‌، دێ چاوا پێگیریێ ب فه‌رمان و بڕیارێن چه‌ند ئه‌فسه‌رێن ژۆرا هه‌ماهه‌نگیێ كه‌ت، ئه‌م باوه‌رین چاره‌سه‌را ئێكانه‌ و دوماهیێ تنێ ڤه‌گه‌ڕیانا هێزێن پێشمه‌رگه‌ یه‌ بۆ ده‌ڤه‌رێن كوردستانێ، چونكه‌ هه‌كه‌ پێشمه‌رگه‌ ڤه‌گه‌ڕیت ره‌وش ب خوه‌ دێ به‌ره‌ ب چاره‌سه‌ركرنێ و ته‌ناهیێ چیت، به‌رۆڤاژی هه‌ر گاڤه‌كا دی بهێته‌ هاڤێتن وه‌كه‌ پێدڤی جهێ خوه‌ ناگریت، داعش لڤینێن خوه‌ یێن زێده‌كری و هه‌كه‌ سنوره‌ك بۆ لڤینێن داعشێ نه‌هێته‌ دانان، دێ ره‌وشا وان ده‌ڤه‌ران به‌ر ب ئالۆزیێن زێده‌تر چیت، چونكه‌ ره‌وشا ئیراقێ ژلایێ سیاسی ڤه‌ چه‌ند نه‌ سه‌قامگیر ببیت دێ كاریگه‌ریێ كه‌ته‌ سه‌ر ره‌وشا ئه‌منی و داعش دێ بهێز كه‌ڤیت”.

به‌رپرسێ لقێ پارتی ل كه‌ركووكێ پتر رۆهنكر” ل ده‌ڤه‌رێن ده‌وروبه‌رێ كه‌ركووكێ ره‌وش زێده‌ یا ئالۆزه‌ و هه‌ر پشتی روودانێن ١٦ی ئۆكتۆبه‌رێ ره‌وش ب ئێكجاری ل ڤان ده‌ڤه‌ران تێكچوویه‌ و رۆژ بۆ رۆژێ ب پیلان هێزێن ئه‌منی و له‌شكری بۆ كه‌ركووكێ دهێنه‌ هنارتن، ئه‌ڤه‌ ژی پیلانه‌كا دا هژمارا هێزێن خوه‌ ل كه‌ركووكێ زێده‌ بكه‌ن، به‌لێ یا خویایه‌ داعش زێده‌تر ل ده‌وروبه‌رێ كه‌ركووكێ لڤینان دكه‌ت و كریارێن تیرۆرستی ئه‌نجام دده‌ت، باشه‌ بۆچی هێزێن ئیراقی ل ده‌وروبه‌رێن كه‌ركووكێ به‌رهنگاری چه‌كدارێن داعشێ نابن ، هه‌كه‌ نیه‌ته‌كا دروست نه‌بیت بۆ ته‌ناكرنا ره‌وشێ چه‌ند بڕیار بهێنه‌دان چ چاره‌سه‌ری نابن”.