ئەڤرۆ نیۆز، قائید میرۆ:
ئێڤاریا ئەڤرۆ ھێزێن پێشمەرگەی ھێرشەکا تیرۆرستێن داعش تێکشکاند و چوار تیرۆرست ھاتنە کوشتن.

ژێدەرەکێ ئاگەھدار ل ھێزا پێشمەرگەی ب ئەڤرۆ نیۆز راگەھاند” دەمەکی بەری نوکە تیرۆرستێن داعش ل کەلھا سمایل بەگ ھێرشکرنە سەر ھێزێن پێشمەرگەیێن کوردستانێ و پێشمەرگەی شیان ئەڤێ ھێرشا داعش بشکێنن و پاشڤە ببەن، ھەتا نوکە دیاربوویە چوار چەکدار داعش ب دەستێن پێشمەرگەی ھاتینە کوشتن.
ژێدەری گۆتژی” پشتی دەستپێکرنا ھێرشێ فڕۆکەیێن ھەڤپەیمانان گەھشتن مەیدانا شەڕی و دو جاران تیرۆرستێن داعش کرنە ئارمانج، بەلێ ژبەر کو ھێشتا تەقە مایە زیانێن دوژمنی بتەمامی ناھێنە زانین.

ئەڤرۆ نیوز، قائید میرۆ:
تورکومانێن ھەرێما کوردستانێ داخوازێ پۆستێ جێگرێ سەرۆک وەزیرێن ھەرێما کوردستانێ دکەن و بەرپرسەکێ تورکومانژی دبێژیت، ھێشتا مە بڕیار نەدایە دێ پشکداری حوکمەتێ ببین یانژی نە.
ئایدن مەعرۆف، سەرۆکێ بەرەیا تورکومانی لھەرێما کوردستانێ ب ئەڤرۆ نیۆز راگەھاند”دانوستان دناڤبەرا لایەنێن سیاسی دبەردەوامن بۆ چارەسەرکرنا ئاریشەیان و ئەگەر کابینا حوکمەتێ بھێتە راستڤەکرن یانژی کابینەکا نوو بھێتە پێک ئینان ئەم وەکی تورکومان پۆستێ جێگرێ حوکمەتێ ب مافێ خوە دزانین و داخوازا پۆستێ جێگرێ سەرۆکێ حوکمەتێ دکەین.
ئایدنی گۆتژی” بەری نوکەژی مە داخوازا ئەڤی پۆستی کربوون و نوکەژی ئەم رژدین لسەر داخوازا خوە، بەلێ ئەگەر کابینەکا نوو ھاتە پێک ئینان ھێشتا مە بڕیار نینە دێ پشکداربین یانژی نە.

ئەڤرۆ نیۆز، قائید میرۆ:
کادرەکێ پێشکەفتیێ پارتی دیموکراتی کوردستان ئیماژە بڤێ چەندێ دکەت ھەڤپەمان و خەلکێ بیانیژی دگەل مانا سەرۆک بارزانینە بۆڤێ قۆناغێ.

فەرھاد ئاکرەیی، کادرێ پێشکەفتیێ پارتی ب ئەڤرۆ نیۆز راگەھاند” بۆڤێ قۆناغێ پێدڤیە سەرۆک بارزانی د پۆستێ خوەدا بمینە و نەک تنێ پارتی بەلکۆ ئەمریکا و ھەڤپەیمانژی پێداگیرن کۆ سەرۆک د پۆستێ خوەدا بمینە.
ئاکرەیی گۆتژی” نوکە پارتی مژولی راستڤەکرنا کابینا حوکمەتێ یە و ڤێ جارێ پارتی دێ حوکمەتێ دگەل ئێکەتیێ و ئێکگرتوو پێک ئینیت، بەلێ مە چو ھێلێن سوور لسەر کۆمەلا ئیسلامی نینە و دێ دانوستانان دگەل کەین.