ئه‌ڤرۆ نيوز:
دوهى رۆژا چارشه‌مبى رێكه‌فتى 23ى ئيلۆنا 2015ێ حاجى نه‌شئه‌ت غه‌فور ناسيار ب مامۆستا نه‌شئه‌ت غه‌فۆر كه‌ساتيێ ديارێ باژێرێ سلێمانيێ و خودان ئه‌زمون د وارێ پرۆژگرامێ په‌روه‌ردا ئيسلامى دا، ل رۆژا عه‌ره‌فێ و ل چيايێ عه‌ره‌فێ چو به‌ر دلۆڤانيا خودێ.
ب گيان ژ ده‌ست دانا ڤى حه‌جيێ هه‌رێما كوردستانێ، حاله‌تێ چارێ يێ گيان ژ ده‌ستدانا حاجيێن هه‌رێما كوردستانێ هاته تۆماركرن و هه‌تا نوكه ژنه‌كێ ژى ژ نوو زارۆ په‌يدا بوويه.
ئه‌ڤرۆ نیۆز، سالار دۆسكى:
نه‌جیبا نه‌جیب ئه‌نداما په‌رله‌مانێ عیراقێ ئاشكراكر كو ل دووڤ بریارا سه‌رۆكێ وه‌زیرێن عیراقێ بریار هاتیه‌دان مووچێن ئه‌ندامێن په‌رله‌مانى بهێنه كێمكرن و ئه‌ڤه پشتى داهاتێ عیراقێ كێمبووى.
نه‌جیبایێ گۆت: 12 ملیۆن و 900 هزار دینار بووینه، پێنچ ملیۆن بنه‌ره‌ته ئانكو ئیسمى، پێنچ ملیۆن پاداشتێن پلێ نه، دو ملیۆن و نیڤ پاداشتن، ژڤى مووچه 800 هزار دینار خویك دهاته وه‌رگرتن، 500 هزار دینار بۆ خانه‌نشینیێ دهاتنه برین، 500 هزار ژى پله تایبه‌ت دهاتنه وه‌رگرتن، ئانكو هه‌یڤانه پتر 11 ملیۆنان هه‌ر ئه‌ندام په‌رله‌مانه‌كى وه‌ردگریت.
هێشتا گۆت: پێنچ ملیۆنێن پلێ و 2 ملیۆنێن پاداشتێ نه‌مان، بتنێ مووچێ بنه‌ره‌ت ما، لێ دێ باوه‌رنامه هێته هه‌ژمارتن، دكتورایێ 100% دێ وه‌رگریت، ماسته‌ر 75% و به‌كالوریوس 50% ل گه‌ل زارۆك دێ هێنه هه‌ژمارتن.
نه‌جیبایێ نه‌ڤه‌شارت و گۆت: نوكه بنه‌ره‌ت بوویه چوار ملیۆن و هه‌ر كه‌سه‌كێ بهێته خانه‌نشینكرن ژى ل سه‌ر هه‌مان پاره دێ هێته خانه‌نشینكرن، گۆت ژى : ئه‌ندامێن په‌رله‌مانى بێ گیربوونا هه‌یڤه‌كێ هه‌یڤانه ل ده‌مێ خوه مووچێ خوه وه‌ردگرن.
هه‌ڤده‌م حاكم سه‌رحان سلێڤانه‌یى بۆ ئه‌ڤرۆ نیۆز ئاشكراكر كو مووچێ هه‌یڤانه یێ ئه‌ندامێن په‌رله‌مانێ عیراقێ ل گه‌ل چوون و هاتنێ حه‌فت ملیۆن و نیڤن.
ئه‌ڤرۆ نیوز: ڤه‌ده‌ر ره‌شاڤایی:
مه‌سعود بارزانی سه‌رۆكێ هه‌رێما كوردستانێ په‌یامه‌ك ب هه‌لكه‌فتا جه‌ژنا قۆربان به‌لاڤكر كو ئه‌ڤه ده‌قێ وێ یه:
ب ناڤێ خودێ مه‌زن و دلۆڤان
ب هه‌لكه‌فتا هاتنا جه‌ژنا قۆربانییا پیرۆز، پیرۆباهیێ ل خه‌لكێ كوردستانێ و سه‌رجه‌م موسلمانێن ئیراق و جیهانێ دكه‌م، پیرۆزباهیێ ل خێزانێن سه‌ربلندێن شه‌هیدان دكه‌م كو ب خوینا كورێن وان دارا ئازادیێ و نیشتمانی یا پاراستیه، پیرۆزباهییاا ئێك ب ئێك هه‌می پێشمه‌رگێن قاره‌مان و هێزێن ئاساییشێ دكه‌م كو ب قاره‌مانی به‌ره‌ڤانیێ ژ ئاخ و گه‌لێ كوردستانێ دكه‌ن و بوونه چه‌په‌ره‌كێ پیلایی بۆ به‌ره‌ڤانیكرن ل هه‌می مرۆڤایه‌تیێ، پیرۆزباهیێ ل رێڤینگێن رێیا خۆدێ هه‌می حاجییێن كوردستانێ دكه‌م خۆدێ مه‌زن عیباده‌تێ وان قه‌بۆل كه‌ت، هیڤیدارم ئه‌ڤ جه‌ژنه ببیته ئه‌گه‌رێ شكه‌ستنا بئێكجارییا تیرۆرستێن داعش و هه‌می ئاواره بڤه‌گه‌رنه باژێرو مالێن خوه .
جه‌ماوه‌رێ خۆشتڤیێ كوردستانێ
د ڤێ هه‌لكه‌فتا پیرۆز دا ب پێدڤی زانی جاره‌كا دی لدۆر وان قه‌یرانێن سیاسی باخڤم كو نها ل هه‌رێما كوردستانێ دا هه‌نه، دده‌مه‌كی دا گه‌لێ مه د قۆناغه‌كا هه‌ستیار دا ده‌رباز دبیتو به‌رامبه‌ری ده‌لیڤه و گه‌فان دایه، چ پێدڤی نه‌دكر بڤی ره‌نگی سه‌ره‌ده‌ری ل گه‌ل پرسا سه‌رۆكاتیێ بهێته كرن و كار بۆ كوور كرنا قه‌یرانێ و تێكدانا دلشادییا خه‌لكی بهێته‌كرن.
د ڤێ پرسێ دا یا لسه‌ر ملێن من من یا كری، به‌ری ده‌مێ یاسایێ سه‌رۆكێ هه‌رێمێ بداوی بهێت من داخازا هه‌لبژارتنان كر و ئه‌ركێ یاسایێ خوه بجهئینا لێ هه‌لبژارتن نه‌هاتنه كرن. پێشتر چه‌ندین جارا من داخاز ژ حزبان و په‌رله‌مانی كر كو ڤی بابه‌تی ئێكلا بكه‌ن لێ دیسان بێ ئه‌نجام بوو، ب چ شێوه‌كی من داخاز نه‌كریه د پۆستێ خوه دا بمینم، هه‌موو جۆره بۆچوونه‌كێ ژی ره‌ت دكه‌م كو دبێژن من به‌دیل نینه.
ژ درێژكێشانا ڤی بارۆدۆخی زۆر دلگرانم و خه‌لكێ كوردستانێ ژی یێ بێزاربووی و مافێ وانه گازندا بكه‌ن، ب تایبه‌ت كو قه‌یرانێن كوور به‌رۆكێن كوردستانێ گرتینه، ئاریشێن ل گه‌ل به‌غدا و قه‌یرانا ئابووری و داكه‌فتنا بهایێ نه‌فتێ و پێلا ئاواران و لسه‌ر هه‌میان را شه‌رێن تیرۆرستێن داعش، له‌ورا دڤیا با حزبان و په‌رله‌مانی ب به‌رچاڤ وه‌رگرتنا ڤی بابه‌تی ب شێوه‌كێ گونجاییتر لسه‌ر ڤێ مژارێ ئاخڤتبان، و به‌ری 23 ێ خزیرانا ئه‌ڤ ساله ده‌لیڤێن زۆر بۆ چاره‌سه‌ركرنا ئاریشان هه‌بوون.
سه‌باره‌ت ڤان قه‌یرانێن دوور ژ هه‌می جۆره دلینی و كارڤه‌دان داخازێ هه‌می حزبان دكه‌م ئه‌وێن پشكدار د په‌رله‌مانی دا و هه‌موو ئه‌و حزبێن ده‌ستووری هه‌ی، ئه‌گه‌ر كۆمبوونێن پێنجقۆلی دده‌مه‌كێ كورت دا نه‌گه‌هشتنه چ ئه‌نجامان، كۆمببن و ب باشی هزر د ڤه‌دیتنا چاره‌سه‌رییه‌كا واقعیانه بكه‌ن كو قه‌یران پێ كوورتر نه‌بن و ب تایبه‌ت ئاسته‌نگ د شه‌رێ دژی داعش دا دروست نه‌بن، ئه‌ز گه‌له‌ك ب باشی ژ سه‌وه‌رییا یاسایێ دگه‌هم و دڤێت ئه‌ز پتر هه‌ر كه‌سه‌كی رێزێ ل یاسایێ بگرم. هیڤی دارم ئێدی مان یان نه‌مانا من تێكه‌لی ئالیه‌تێ هه‌لبژارتنا سه‌رۆك و ده‌ستهه‌لاتێن وی نه‌هێته كرن، ژبه‌ركو دو بابه‌تێن حودا نه. پێشنیار دكه‌م هه‌می حزب بریارێ لسه‌ر وێ یه‌كێ بده‌ن كو به‌ری 2017 ێ ده‌ستهه‌لاتان و میكانزمێن هه‌لبژارتنا سه‌رۆكی د ده‌ستووری دا بهێنه ئێكلاكرن و بریارا داویێ بۆ گه‌لی بیت. بۆ ئه‌وی ماوه‌ی ژی و بۆ سه‌رۆكاتیێ چاوا ب باش دزانن بلا وه‌سا بریارێ لسه‌ر بده‌ن. بریار چ بیت، چ به‌رده‌وامیا من بیت لسه‌ر ئه‌ركێن من هه‌تا هه‌لبژارتنان یان لسه‌ر به‌رێزه‌كێ دی رێكبكه‌ڤن بۆ وێ یه‌كێ ئه‌مانه‌تیا سه‌رۆكاتیێ راده‌ست بكه‌م بمه‌ره‌ما وێ یه‌كێ ئێدی خه‌لكێ كوردستانێ ب ڤی بابه‌تی ڤه نه‌هێته مژوولكرن و وه‌ستاندن.
ئه‌ڤرۆ نیوز، بارزان مزوورى:
عصمت ره‌جه‌ب، به‌رپرسێ لقا 14 مووسل بو مالپه‌رێ ئه‌ڤرو نیوز دیار كر كو والیێ دیجله یێ چه‌كدارێن تیرورستێن داعش بناڤێ (سعود حه‌سه‌ن سه‌عید) یێ ناسیار دناڤ رێكخستیا داعش ب ئه‌بو تالوت لگه‌ل 22 چه‌كدارێن پله به‌رز دناڤ رێكخستیا تیرورستێن داعش دا د بوردومانێن فروكه‌یێن هه‌ڤپه‌یمان دا هاتن كوشتن ل گوندێ “ئه‌رفیله” سه‌ر ب ناحیا گه‌یاره ڤه.
ناڤبرى دیار كر كو ئه‌و والى دگه‌ل به‌رپرسێن چه‌كدارێن تیرورستێن داعش یێن پله بلند د كومبونێ دا بوون ژبۆ دارێشتنا جه‌ندین پلانا دژى هێزێن پێشمه‌رگه‌ى د روژێن جه‌ژنێ دا، لێ فروكه‌یا نه‌هێلا نه‌خشه‌یێ پلانا وان بهێته دانان .
ئەڤرۆ نیوز ،سالار دۆسکی:
ئەندامەکێ پەرلەمانێ کوردستانێ ژ لیستا بەرەیی تورکمانی ئاشکراکر کو پرسا سەرۆکاتیا ھەرێما کوردستانێ پرسەکا نشتیمانی یە و پێدڤی ب رازیبوونا ھەموو پێکھات و ئالیێن کوردستانێ یە.
ئایدن مەعرۆف، ئەندامێ پەرلەمانێ کوردستانێ ژ لیستا بەرەیی تورکمانی دپەیجێ خوەیێ تایبەتێ جڤاکیێ فەیسبووکی دا ئاشکراکریە، کو پرسا سەرۆکاتیا ھەرێماک وردستانێ پرسەکا نشتیمانی یە و راستەوخۆ پێدڤی ب ھەموو ئالیێن سیاسی ل کوردستانێ یە و ئەم ل گەل رێکەفتنا سیاسی نە، بتنێ ب رێکەفتنا سیاسی ئەڤ کێشە دێ ھێتە چارەسەرکرن.
ئایدنی ھێشتا ژی گۆت: نوکە ھێزێن سیاسی ھەر ئێک ب عەقل و ھزر و بەرژوەندیێن خوە بەحسێ ڤێ پرۆسێێ دکەت، ھەر ئێک ب ئالاڤەکی ڤێ رەوشێ ڤەدگەریت، دبینم دڤێت خوە دور بکەین ژ ھەڤرکیا سیاسی .
ئه‌ڤرۆ نيوز:
لايه‌نێن سياسى ل پارێزگه‌ها هه‌له‌بچه ل سه‌ر كورسيێن جڤاتا پارێزگه‌هێ رێكه‌فتن و ب گۆره‌يى رێكه‌فتنێ 10ى هه‌يڤا داهاتى ژڤانێ دووماهيێ يه بۆ پێشكێشكرنا ناڤێن كانديدێن لايه‌نان، به‌لاڤكرنا كورسيێن جڤاتا پارێزگه‌ها هه‌له‌بچه ل سه‌ر پيڤه‌رێ دووماهى ئه‌نجامێن هه‌لبژارتنان.
كورسى ب ڤى ره‌نگێ ل خوارێ نه:
ليستا خزمه‌ت (ئێكگرتوو و كۆمه‌ل) 7 كورسى.
ئێكه‌تى نشتيمانى كوردستان 6 كورسى.
بزاڤا گۆڕان 5 كورسى.
پارتى ديموكراتى كوردستان 3 كورسى.
بزاڤا ئيسلامى 2 كورسى.
هه‌ڤپه‌يمانيا نشتيمانى 1 كورسى.
كورسيا كوتا 1 كورسى.
ئەڤرۆنیۆز، سالار دۆسکی:
دەستەیا گەشت و گوزارێ حوکمەتا ھەرێما کوردستانێ ئاشکراکر کو بەرھەڤیێن تەمام کرینە بۆ پێشوازیکرنا گەشتیاران تایبەت ل ناڤەراست و باشورێ عیراقێ.
نادر ورستی پەیڤدارێ دەستەیا گەشت و گوزارێ ھەرێمێ بۆ ئەڤرۆنیۆز گۆت: سەرەرایی قەیرانێن دارایی و ئابووری ل کوردستانێ، رێڤەبەریێن گەشتیاری ھاتینە ئاگەھدارکرن کو وەک جەژنَن بوری کارێ خوە بکەن و لژنێن ھەفکاری و ھاریکاریا گەشتیاران بھێنە پێکئینان.
روستی ھێشتا ژی گۆت: ڤێ جەژنێ جوداھی ھەیە لگەل جەژنێن بوری چونکە کوردستانێ چەندین جھێن گەشتیاری ڤێ جەژنێ ھاتینە ڤەکرن و ئەڤە دبیتە دەرگەھەک بۆ راکێشانا گەشتیاران بۆ کوردستانێ.
ئەڤرۆ نیوز، سالار دۆسکی:
سەرۆکێ لژنا پیشەسازی و سوتەمەنیێ ل جڤاتا پارێزگەھا دھۆکێ ئاشکرا کر کو قەیرانا غازێ ل پارێزگەھێ نینە و ب تنێ ھەکە د رێکا ئاکرێ دا بۆ پارێزگەھێن دی وەک بازرگانی خەلک بفرۆشیت.
عەبدولسەمەد تێلی سەرۆکێ لژنا پیشەسازی و سوتەمەنیێ ل جڤاتا پارێزگەھا دھۆکێ بۆ ئەڤرۆ نیۆز گۆت: “قەیرانا غازێ یا نوکە ل پارێزگەھێ کارتێکرنا پارێزگەھێن ھەولێر و سلێمانیێ ل پارێزگەھا دھۆکێ بوویە، دوھی نەهـ ترۆمبێل گەھشتینە و ھەر رۆژ ھەشت دگەھشتن بەلکو دوھی ترۆمبێلەک زێدە ژی گەھشتیە”.
ناڤبری ئاشکرا کر کو قەیرانا غازێ ل کوردستانێ ژ بەر کارگەھا قادر کەرم بوویە کو نوکە کەفتیە بن نووژەنکرنێ، دیسان وەلاتی ژی بازرگانیێ ب غازا پارێزگەھێ دکەن و ب رێکا ئاکرێ بۆ ھەر دو پارێزگەھێن دی دھێتە رەوانەکرن.
تێلی نەڤەشارت كو راگەھاندنێ ژی کارتێکرن ل خەلکى کر و گۆت: “دەمێ کاودانێن خەلکێ ھەولێرێ ئاشکرا کرین خەلکێ مه یێ چاڤ ترسیایە و ئەگەر پێنچ بتلێن غازێ ھەبن کرنە شەش”.
ئەڤرۆ نیوز،زنار تۆڤی:
باراک ئۆباما سه‌رۆكێ ئەمریکا داخواز ژ وه‌لاتێن ئه‌ندام یێن ئێكه‌تییا ئورۆپا کر کو هه‌ر ئێك بارا خۆ یا كۆچبه‌ران وه‌ربگریت.
سه‌رۆكێ ئه‌مریكا باراك ئۆباما د په‌یوه‌ندییه‌كا تێله‌فونی دا دگه‌ل شیره‌تكارا ئه‌لمانی ئه‌نگێلا مێركل بەحسێ بارودۆخێ كۆچبه‌ران کر و دیارکر،پێدڤیە وەلاتێن ئوڕۆپی کۆچبەران وەربگرن و ل سەر خۆ دابش بکەن و هاریکاریا وان بکەن.
ئۆبامای ب رێیا ئه‌نگێلا مێركل شیرەتکارا ئەلمانیا داخواز ژ وه‌لاتێن ئه‌ندام كر،کو هه‌ر ئێك بارا خۆ ژ كۆچبه‌ران وه‌ربگریت و ل گۆری وێ پلانا دابه‌شكرنێ ئه‌وا ئێكه‌تییا ئۆرۆپا دانای ژبۆ حەواندنا وان.
نيشاندان