ئەڤرۆ نیوز:
ئەندامەکا پەرلەمانێ عیراقێ ژ لیستا پارتی دیارکرکو عەبادێ چەندین جاران داکوکی ل سەر ھندێ کریە دەلیڤە بۆ بھێتە دان ژلایێ پەرلەمانی ڤە بۆ راستڤەکرنا دستورێ عیراقێ و ب راستی ژی راستڤەکرنا دستوری ب بەھانەیا چەکسازیێ، دێ زیانێن مەزن گەھینتە ھەرێما کوردستانێ و ئەم ب چو شیوەیەکێ رازی نابین دستور بھێتە راستڤەکرن.

ئەشواق جاف بۆ ئەڤرۆ گوت” عەبادێ د گەلەک ھەلکەفتان دا داخوازکریە پەرلەمانێ عیراقێ دەلیڤێ بدەتێ بۆ راستڤەکرنا دستوری و ھندەک جاران د خوەنیشادانێن مەیدانا تەحریرێ دا ل بەغدا داخواز دھاتە کرن دستوری عیراقێ بھێتە راستڤەکرن، لێ د بنیاتدا وان درۆشمێن سیاسی چو پەیوەندی ب چاکسازیێ ڤە نینە و راستڤەکرنا دستوری گەلەک یا دوورە ژ چاکسازیێ”.

ئەشواقێ گۆت ژی” چارەکرنا کێشا کارەبی ودابینکرنا خزمەتگوزاریان و نەھێلانا گەندەلیێ و رەوانەکرنا گەندەلگاران بۆ دادگەھێ چو پەیوەندی ب راستڤەکرنا دستوری ڤە نینە، چونکی چو مادێن دستوری نابنە رێگر بۆ دابینکرنا خزمەتگوزاریان و گەھاندنا کارەبێ وئاڤێ و سزادانا گەندەلان، لەوما چو رامان نینە بزاڤێن راستڤەکرنا دستوری بھێنە کرن و ھەکە مەرەمێن سیاسی ل پشت نەبن، پێدڤی ناکەت دستور بۆ چاکسازیێ بھێتە راستڤەکرن”.

خویاکر ژی” پێدڤیە عەبادی ئاشکرا بکەت چ مادەکا دەستۆری رێگریێ ل چاکسازیێ دکەت، ھەکە مەبەست ئەو مادێن دستوری بن یێن گرێدای ھەرێما کوردستانێ، ئەم وەک کورد ب چو شیوەیەکێ رازی نابین دستور بھێتە راستڤەکرن، ھەرچەندە حوکمەتا عیراقێ ئەو مادێن دستوری یێن گرێدای ھەرێما کوردستانێ ب جھنەئیناینە، لێ ئەم رازی نابین بھێنە راستڤەکرن، ژبەرکو گەلەک مادە و بەندێن دستوری مافێن ھەرێما کوردستانێ دپاریزیت، بۆ نموونە دستوری بەحسێ ھەرێما کوردستانێ یا کری، لێ حوکمەتا عیراقێ بزاڤێ دکەت پەیڤا ھەرێم د دستوری دا نەبیت و دیسا یا رحەت نینە ژ مادێن ١١٢ و ١٤٠ و چەندێن مادێن دی یێن دستوری یێن گرێدای ھەرێمێ و پاراستنا مافێن مللەتێ کورد د عیراقێ دا”.