ئەڤرۆ:

سەرکردەکێ کورد یێ رۆژئاڤایێ کوردستانێ راگەھاند کو ھەتا نھا دانوستاندنێن د ناڤبەرا ھەر دو جڤاتێن کوردی یێن رۆژئاڤایێ کوردستانێ دا ب رەنگەکێ باش برێڤە چووینە و پێدڤیە ھەر دو جڤاتێن کوردی د راگەھاندنێ دا دژبەیا ھەڤدو نەکەن و ئەمریکا ژی دڤێت ھەر دو جڤاتێن کوردی د زووترین دەم دا دەست ب گەرەکا دی یا دانوستاندنان بکەن.

سالح گەدۆ سکرتێرێ پارتا چەپ یا دیموکراتا کوردستانا سووریێ راگەھاند کو دانوستاندنێن د ناڤبەرا ھەر دو جڤاتێن کوردی یێن رۆژئاڤایێ کوردستانێ ھەتا نھا ب رەنگەکێ باش بەر ب پێشڤە چووینە و نھا دھێتە خواستن کو ھەر دو ئالی جارەکا دی دەست ب دانوستاندنان بکەن، چونکو رەوشەکا تایبەت ل سووریێ و رۆژئاڤایێ کوردستانێ ھاتیە پێش و دڤێت ھەر دو ئالی ھەست ب بەرپرسیاریا خوە یا دیرۆکی بکەن و گۆت: (ئێک ژ بابەتێن سەرەکی بابەتێ پێشمەرگێن رۆژە، بێگومان پێشمەرگێن رۆژ ھەموو زارۆیێن رۆژئاڤایێ کوردستانێ نە و دڤێت رێز ل پێشمەرگێن رۆژ و خەباتا وان بھێتە گرتن و نابیت د دەزگەھێن راگەھاندنێ دا بەرپرسێن ھەر دو جڤاتێن کوردی دژبەریا ھەڤدو بکەن، چونکو نھا پتر ژ ھەر دەمەکێ پێدڤیا کوردان ب ئێکەتیەکا ب ھێز ھەیە).

ناڤھاتی ل دۆر رۆلێ ئەمریکا ژی راگەھاند کو ئەمریکا ھەر ژ دەستپێکێ ھەتا نھا پشتەڤانیێ ل دانوستاندنێن د ناڤبەرا ھەر دو جڤاتێن کوردی یێن رۆژئاڤایێ کوردستانێ دا دکەت و نھا ژی ئەمریکا داخواز کریە کو ھەر دو جڤاتێن کوردی د زووترین دەم دا جارەکا دی دەست ب دانوستاندنان بکەن، چونکو دەمێ کورد د ناڤ خوە دا ئێکگرتی بن دێ شێن کارتێکرنێ ل سیاسەتا سووریێ بکەن و بێگومان د ئاستێ نێڤدەولەتی دا ژی دێ پتر گرنگی ب کوردێن سووریێ ھێتە دان، مخابن رەوشا نھا باش نینە و دڤێت ھەر دو ئالی ناکۆکیێن د ناڤبەرا خوە دا بدەنە رەخەکێ و ھەر زوو دەست ب دانوستاندنان بکەن و گۆت: (پێدڤیە ھەموو ئاریشێن ھەی دوور ژ ناکۆکیێن سیاسی و ب رێیا دانوستاندنان بھێنە چارەسەر کرن، ژ بەر ھندێ ژی بەرپرسیاریەکا دیرۆکی دکەڤیتە سەر ملێ ھەر دو جڤاتێن کوردی و دڤێت بەرپرسێن ھەر دو جڤاتێن کوردی یێن رۆژئاڤایێ کوردستانێ ژی ھەست ب ھندێ بکەن کو ژ بلی دانوستاندنان و چارەسەریێ چو رێیێن دی ل پێشبەری وان نینە).

ناڤھاتی د پشکەکا دی یا ئاخڤتنا خوە دا ئاماژە ب وان مەترسیان ژی کر کو ل سەر رۆژئاڤایێ کوردستانێ ھەنە و دیار کر کو تورکیا، رژێما سووریێ و دەولەتا ئیرانێ کار بۆ لاوازکرنا پێگەھێ کوردان ل سووریێ دکەن، ھەکە ھێزێن سیاسی یێن کوردی ئاریشێن د ناڤبەرا خوە دا چارەسەر نەکەن دێ رەوش گەلەک خرابتر لێ ھێت، ژ بەر ھندێ ژی گرنگە ھەر دو ئالی ھەر زوو دەست ب دانوستاندنان بکەن.

ئەو یەک د دەمەکێ دایە کو بەری نھا مستەفا جومعە ئەندامێ مەکتەبا سیاسی یا پارتی دیموکراتی کوردستان/ سووریێ ژی بۆ رۆژناما ئەڤرۆ دیار کربوو کو پشتی ئالۆزیێن ڤێ دووماھیێ ل رۆژئاڤایێ کوردستانێ زەحمەتە ھەر دو جڤاتێن کوردی وەسا زوو دەست ب گەرەکا دی یا دانوستاندنان بکەن و ژ بەر ھندێ ھەکە ئەمریکا فشارێن خوە ل سەر پەیەدێ و تەڤدەمێ زێدەتر لێ بکەت رەنگە ھندەک گوھۆرین دروست ببن، چونکو ژ بەر دەستێوەردانێن پەکەکێ دانوستاندن ھاتینە راگرتن و بەری نھا ژی پەکەکێ نەھێلا کو رێککەفتنێن ھەولێر و دھۆکێ یێن د ناڤبەرا ئەنجوومەنێ نشتیمانی یێ کوردی ل گەل تەڤدەمی دا بھێنە بجھکرن.

ل ئالیێ دی مەزلوم عەبدی فەرماندارێ گشتی یێ ھێزێن سووریا دیموکرات ژی راگەھاند کو ئاریشێن نھا د ناڤبەرا ھەر دو جڤاتێن کوردی یێن رۆژئاڤایێ کوردستانێ دا بەر ب چارەسەریێ ڤە دچن و رەوشەکا نوو ل رۆژئاڤایێ کوردستانێ ھاتیە پێش و د دەمەکێ نێزیک دا گەلەک گوھۆرینێن باش دێ ل رۆژئاڤایێ کوردستانێ دروست بن.

ئەڤرۆ:

رێورەسمێ (شەھیدێ نیشتمانی) ل ھەولێرێ ب ھەلکەفتا ١٨ سالیادا شەھیدکرنا (محەمەد باقر ئەلحەکیم) ب رێڤەچوو، کو عەمار ئەلحەکیم، سەرۆکێ رەوتێ حیکە یێ نیشتمانی و ھەڤپەیمانیا عیراقیون ئامادەبووی، نێچیرڤان بارزانی، سەرۆکێ ھەرێما کوردستانێ د گۆتارەکێ دا راگەھاند، کێشا سەرەکی یا عیراقێ ژ دەستپێکا دامەزراندنا وێ، نەبوونا ھەڤپشکیێ بوو د ناڤبەرا ھەموو پێکھاتێن عیراقێ دا د رێڤەبرنا عیراقێ دا، ژ بەر وێ چەندێ ژی عیراق ژ دەستپێکا دامەزراندنا خوە یا بێ کێشە نەبوو.

دەقێ گۆتارا سەرۆکێ ھەرێما کوردستانێ :

برایێ خوەشتڤی عەمار ئەلحەکیم

مێھڤانێن بەرێز..

ب خێر ھاتنا ھەوە دکەم بۆ ھەرێما کوردستانێ و باژێرێ ھەولێرێ. ب شانازی ڤە ئەڤرۆ ھەلکەفتا شەھیدێن عیراقێ و کوردستانێ ئەم ل ڤێرێ پێکڤە کۆمکرین، ل بەراھیا وان ھەموویان ١٨ سالیا شەھیدێ میحرابێ، محەمەد باقر ئەلحەکیم.

سەرێ رێزێ بۆ ھەموو شەھیدێن کوردستانێ و عیراقێ ددانین، سلاڤان دھنێرین بۆ بنەمالێن سەربلندێن شەھیدێن کوردستانێ و عیراقێ، شەھید و بنەمالێن وان بەردەوام جھێ رێزێ و پێزانینێ نە.

زۆر ئاسایی یە ئەڤرۆ ھەلکەفتەکا بنەمالا خەباتکەر و ئایینی (ئال حەکیم) ل ڤێرێ مە ھەموویان پێکڤە کۆم بکەت، چونکە مەزنێن وێ بنەمالێ بەردەوام بزاڤکرن ھەموو مەزھەبان لێک نێزیک بکەن و ھەڤپشکی و ھەڤ خەباتی د ناڤبەرا گەلێ عیراقێ و گەلێ کوردستانێ دا دروست بکەن. گەلەک یا گرنگە ژی د وێ رۆژێ دا دەست ب ھێزکرنا پەیوەندیێن خوە بکەین، چونکە بەردەوام ئەو حەز و کارێ شەھیدێ میحرابێ بوو.

ئەڤرۆ ژی عیراقی ب شیعە، کورد و سوننە و پێکھاتێن دی زێدەتر ژ ھەموو دەمەکی داخوازا ھەڤپشکیێ و پێکڤە کارکرنێ ژلایەنێن سیاسی دکەن ل پیناڤی دروستکرنا ئارامیێ و ئاڤەدانیێ ل عیراقێ، ھەر ئەوژی رێبازا شەھیدێ میحرابێ و سەرکردێن مە یێن دیرۆکی بوو.

شەھیدێ میحرابێ و موجاھدێ مەزن یێ عیراقێ (سەید محەمەد باقر ئەلحەکیم) ئێک بوو ژ دامەزرێنەرێن بزاڤا بەرگریا ئیسلامی ل عیراقێ دژی رژێمێن دکتاتۆری یێن عیراقێ، ئێک ژ زانایێن عیراقێ بوو دوارێن شەریعەت و فەلسەفە و سیاسەت و ئابوورێ دا، ژبەر وێ چەندێ ژی روانگەکێ زۆر رۆھن ھەبوو بۆ چارەسەریا کێشان و پاشەرۆژا عیراقێ، ھەر ژ بەر وێ چەندێ ژی باوەری ب لێک نێزیککرنا مەزھەبان ل عیراقێ ھەبوو و ب کریار کار بۆ وی ئارمانجێ دکر. ھەروەسا باوەری ب وێ چەندێ ھەبوو کو دڤێت رێبازا راستەقینا یا بابێ خوە بەرنەدەت ئەوژی پێکھاتی بوو ژ خەباتکرنێ بۆ نەھێلانا دکتاتۆریەتێ و ھەڤ خەباتێ ل گەل گەلێ کوردستانێ. رۆلێ شەھید محەمەد باقر ئەلحەکیم د کۆنگرێ پشتەڤانیکرنا گەلێ عیراقێ ل سالا ١٩٨٦ ل تەھرانێ. پێکھاتی بوو ژ پشتەڤانیکرنەکا راستەقینە بۆ مافێن گەلێ کوردستانێ و وی دەمێ لێکتێگەھشتن و ھەماھەنگیەکا مەزن د ناڤبەرا رەحمەتی (ئدریس بارزانی) و شەھیدێ میحرابێ دا ھەبوو سەبارەت بریارێن کۆنگرەی، ئەو ھەماھەنگی پاشی ژی ھەر بەردەوام بوو، راستگۆییا (محەمەد باقر ئەلحەکیم) د پشتەڤانیکرنا مافێن گەلێ کوردستانێ د ھەموو رەوشان دا ل دەف سەرکردایەتیا کوردی جھێ رێز و پێزانینێ بوو. ھەر ئەوژی زەمینەکا ب ھێز دروستکر کو سەرۆک (مەسعود بارزانی) و (محەمەد باقر ئەلحەکیم) کۆمبوونێن بەردەوام بکەن بۆ دانانا بنەمایێن سیستەمێ پاشەرۆژێ ل عیراقێ ل سەر بنەمایێ ھەڤپشکیێ و فیدرالیێ و ل کۆنگرێ لەندەن ل سالا ٢٠٠٢ بریار ل سەر سیستەمەکی ھاتە دان ل دووڤ وان بنەمایان بۆ پاشەرۆژا عیراقێ، کو پێکھاتیبوو ژ عیراقەکا دیموکراسی و فیدرالی کو ھەموو پێکھات ھەڤپشکن د رێڤەبرنێ دا، ھەر ل ڤێرێ پێدڤیە رۆلێ خەباتکەرێ مەزن یێ عیراقێ رەحمەتی (سەید عەبدولعەزیز ئەلحەکیم) بینینە ھزرا خوە، کو ل ھەموو کۆنگرێن ئۆپۆزسیۆنا عیراقی و ل سەردەمێ جڤاتا حوکمرانیێ و ب درێژیا ژیانا خوە پشتەڤانەکێ ب وەفا بوو بۆ مافێن گەلێ کوردستانێ.

بێگۆمان ئەڤرۆ ژی ھەر ئەو چەندە ژ برایێ من یێ خوەشتڤی (عەمار ئەلحەکیم) و ھەموو برایێن مە ژ بنەمالا (ئال حەکیم) و مالا شیعی دھێتە چاڤەرێکرن، چونکە ئەو ھەڤپشکی و ھەڤ خەباتە بنجینەیەکا دیرۆکی یا ب ھێز یا ھەی، پەیوەندی د ناڤبەرا بنەمالا بارزان و شۆرەشا کوردستانێ ل گەل بنەمالا (ئال حەکیم) و مالا شیعی و بزاڤا وێ یا سیاسی، پەیوەندیەکا دامەزراندی یە ل سەر باوەری ب رەوایەتیا داخوازیێن ھەردوو لایەنان بوو، ژ ئەنجامێ پەیوەندیا رەحمەتێ (مەلا مستەفا بارزانی) ل گەل (ئایەتوللا ئیمام سەید موحسن ئەلحەکیم)، خوەشتڤیەکا مەزن د ناڤبەرا گەلێ کوردستانێ و لایەنگر و شوینکەفتێن (ئەھل ئەلبەیت) دا دروست بوو، ئەوبوو ژ ئەنجامێ نامێن بەردەوام یێن (بارزانیێ نەمر) و رۆھنکرنا رەوشا گەلێ کوردستانێ و رەوایەتیا شۆرەشا کوردستانێ بۆ وی، ئیمام (سەید موحسن ئەلحەکیم) ل سالا ١٩٦٥ فەتوایەک دەرکر ب حەرامکرنا شەری دژی پێشمەرگەی و کوردان ل دەمێ شۆرەشا ئەیلوولێ، ھەروەسا شەھیدێ مەزن یێ عیراقێ (ئایوتووللا محەمەد باقر ئەلحەکیم) ل سالا ١٩٧٤ ھەمان فەتوایا حەرامکرنا شەرێ دژی کوردان دووبارەکر، ب ھەمان شێوە (ئایەتوللا سەید عەلی سیستانی) ل دەمێ نڤیسینا دستووری ب ھیچ شێوەکی دژی فیدرالیێ نەبوو، بەلکو پشتەڤانی ل وێ دارشتنێ کر کو ل دۆر مافێن گەلێ کوردستانێ د دستووری دا ھاتیە نڤیسین.

وان ھەلویستێن دیرۆکی، باوەری و خوەشتڤیەکا ئێکحار مەزن دناڤبەرا کورد و شیعان دا دروستکر د ھەموو بواراندا، ھەروەسا ھەڤ خەباتەکا راستەقینە دناڤبەرا ھەردو لایەنان دا دروستکر کو ئەنجامێ وێ ژناڤبرنا رژێما دکتاتۆری بوو ل عیراقێ، کو ئەو مەزنترین دەستکەفت بوو بۆ گەلێ عیراقێ و کوردستانێ، ئەو ھەڤ خەباتە جارەکادی د شەرێ دژێ داعشێ دا دووبارە بوو، ئەنجام ژی شکاندنا داعشێ بوو.

بەلێ پشتی شەرێ داعشێ رەوشەکا نەخوازراو دروستبوو، واقعێ پەیوەندیێن دناڤبەرا مە دا ب دلێ مە نینە، بێگومان ب دلێ گەلەک ژ برایێن مە یێن لایەنێن شیعی ژی نینە، ب تایبەتی ئەوێن ل رۆژێن دژوار یێن ھەڤ خەباتا دژی رژێما سەدامی ژیاین، یان ژی ئەوێن ئاگەھداری وان رۆژان بووین، خوینا مە ل شەرێ دژی دکتاتۆریەتێ و داعشێ تێکھەلی ھەڤدوو بوویە ل پیناڤی ئێک ئارمانج، ئەڤرۆ ژی ب ھەلکەفتا رێزگرتنێ ل شەھیدێن مە دڤێت ب ھێزکرنا لێکتێگەھشتنێ و پێکڤە کارکرنێ دناڤبەرا مە دا وەفاداریێ دیار بکەین بۆ دیرۆکا برایەتیێ و ھەڤ خەباتا د ناڤبەرا مە ھەردو لایەنان دا و ھەڤپشکیا خوە دروست بکەینکو ئەم بۆ د بەرھەڤین، ئەز د وێ باوەریێ دامە دلسۆزیا (سەید عەمار ئەلحەکیم) پەیوەندیا مە یا دیرۆکی و ھەڤ خەباتا مە، ھەروەسا دلسۆزیا سەرکردێن دی یێن شیعی بۆ وی رابردووی و موبارەکا بەردەوام یا مەرجەعیەتێ بۆ پێکڤە بوونێ و برایەتیێ دناڤبەرا شیعە و کوردان دا، زەمینەکا گەلەک باشە بۆ ب ھێزکرنا وێ پەیوەندیێ.

بێگومان دڤێت ئەو ھەڤپشکیە ب پشکداریا برایێن مە یێن سوننە بیت، چونکە ھەموو ھەڤپشکیەکا د ناڤبەرا مە دا بێ پشکداریا عەرەبێن سوننە یا تمام نابیت.

پێدڤیە ئەم جارەکادی ب راشکاوانە پێکڤە رونین و دانوستاندنێ بکەین، بنجینەیا دانوستاندنێن مە ژی دڤێت ئەوبیت کو کێشا ھیچ نەتەوە و پێکھاتەکێ عیراقی نابیتە جھێ سەرکەفتنێ بۆ پێکھاتەکێ دی یێ عیراقێ، بەلکو دێ ئەنجامێن خراب بۆ ھەموو پێکھاتێن عیراقێ دێ ھەبن، ب ھەمان شێوە پێشکەفتنا ھەر دەڤەر و پارێزگەھەکا عیراقی دێ بیتە ئەنجامێ خێرێ و پێِشکەفتنێ بۆ ھەموو عیراقیان.

کێشا سەرەکی یا عیراقێ ژ دەستپێکا دامەزراندنا وێ نەبوونا ھەڤپشکیێ بو دناڤبەرا ھەموو پێکھاتێن عیراقێ دا د رێڤەبرنا عیراقێ دا، ژبەر وێ چەندێ ژدەستپێکا دامەزراندنا خوە، عیراق یا بێ کێشە نەبوو، ھەردو پێکھاتێن عەرەبی ل عیراقێ ، شیعە و سوننە، دزانن کو چ ژوان ب تنێ و ھەردوو ژی بێ کوردان نەشێن ھەڤسەنگیێ دروست بکەن، ژبەر وێ چەندێ ژی ھەڤپشکیا ھەموو پێکھاتێن عیراقێ د رێڤەبرنا عیراقێ دا تاکە رێ یە بۆ ب رێڤەبرنا عیراقێ ب شێوەکێ سەرکەفتی، ھەر ئەوژی تاکە رێ یە بۆ حوکمەکێ مەدەنی یێ خزمەتگوزار کو وەلاتیێن عیراقێ دلخوەش بکەت.

نابیت ھیچ پێکھاتەکێ عیراقی چاڤەرێ ژناڤچوونا پێکھاتەکێ دی بکەت، چونکە ئەو چاڤەرێیەکا بێھودەیە، د قۆناغێن بۆری دا وێ چاڤەرێکرنێ چو ئەنجام بۆ نەبوون، د پاشەرۆژێ دا ژی چو ئەنجام بۆ نابن، ئەو ناکۆکیا نوکە دروست بووی، ب ھیچ شێوەکی د چاڤەرێکرنا دامەزرێنەرێن مەزن یێن بزاڤا ئازادی و سیاسی یا مە دا نەبوو، نوکە ژی ب ھیچ شێوەکی د بەرژەوەندیا گەلێ عیراقێ دا نینە.

سەقامگیری و پێشکەفتن و ئاڤەدانیا ھەرێما کوردستانێ دڤێت جھێ دلخوەشیا ھەموو لایەنێن سیاسی یێن عیراقی بیت، چونکە ئەم پشکەکین ژ عیراقێ، ئەو پێِشکەفتنا ھەرێما کوردستانێ پێشکەفتنا پشکەکا عیراقێ یە و بۆ ھەموو عیراقیانە ھەروەکو چاوان پێشکەفتن و ئاڤەدانکرنا نەجەف و کەربەلا و بەسرا و ئەنبار و تکریت پێشکەفتنە بۆ ھەرێما کوردستانێ، ئومێدا خەلکێ کوردستانێ ئەوە ھەموو عیراق یا سەقامگیر و پێشکەفتی بیت، چونکە ئەو دێ بیتە جھێ خوزەشگوزەرانیێ بۆ مە ھەموویان، دێ بیتە ئەگەرێ زۆربوونا دەلیڤێن کاری و پێشکەفتنا ئابووری وزانستی ل ھەموو عیراقێ.

خودایێ مەزن سامانەکێ مەزن یێ سەر ئەردی و بن ئەردی دایە عیراقێ، شیانێن خەلکێ عیراقێ ل ھەموو جیھانێ دیدەڤانی بۆ دھێتە دان، بەلێ مخابن بەردەوام ناکۆکیێن سیاسی و ل بەرچاڤ نەوەرگرتنا ھەڤپشکیەکا یەکسانا ھەموو پێکھاتێن عیراقێ د بریار و ب رێڤەبرنا دەولەتا عیراقێ دا وەکریە گەلێ عیراقێ د نەخوەشیا و کێم خزمەتگوزاریان دا بژیت.

دڤێت پشتی ھەموو ڤێ دیرۆکا درێژ ژ کێشێن عیراقێ، پشتی نەرازیبوونێن خەلکی، ئەڤرۆ بەری سوباھی دەست ب دانوستاندنەکا جدی بکەین، بۆ ب رێڤەبرنەکا ژیرانە یا عیراقێ ب پشکداریا ھەموو پێکھاتان، نابیت چاڤەرێ ململانێ و ھەوێن ھەلبژارتنان بکەین، چونکە گەلێ عیراقێ یێ ھشیارە و ھیچ یاری و ھەوەکا ھەلبژارتنان نەشێت وەلێ بکە تکو چاڤێ واقعێ عیراقێ نەبینیت، ئەوێ رۆژەکێ زووتر دەست ب چاککرنا رێرەوێ سیاسی یێ حوکمرانیێ و بریارا سیاسی و ئیدارا عیراقێ بکەت، گەلێ عیراقێ دێ پشتەڤانیێ لێ کەت، ئەوێ رۆژەکێ زووتر گاڤان ب ھاڤێژیت بۆر استکرنا پرۆسا سیاسی و ب رێڤەبرنا عیراقێ، دێ گەلێ عیراقێ زێدەتر پشتەڤانیێ لێ کەت.

ئەڤرۆ ئەم د بەرھەڤین دەست ب دانوستاندنەکا جدی و راشکاوانە بکەین بۆر استکرنا پرۆسا سیاسی و ب رێڤەبرنا عیراقێ و داخوازێ ژ ھەموو لایەنێن عیراقی دکەین کو دەست پێ بکەین، سەرکەفتنا مە دێ ب ھەڤپشکیێ و پێکڤەبوونێ بیت، پەراوێزخستنێ، عیراقێ ل قوناغێن بۆری وێرانکر، بێگومان ئەو رێبازە دێ پاشەرۆژا مە ژی وێران کەت، لەوما دڤێت ئەڤرۆ دەست پێ بکەین و چ دی چاڤەرێ نەکەین، چونکە نزانین ئەوێن چاڤەرێ دکەین، چاڤەرێیا چ دکەن.

ھێرشێن داعشێ و ب ھێزبوونا داعشێ و داگیرکرن ووێرانکرنا پشەکا مەزن ژ عیراقێ ژلایێ داعشێ ڤە ژ ئەگەرێ نەمانا ھەڤپشکیێ و تەوافوقێ بوو ل عیراقێ، سەرۆک (مەسعود بارزانی) چەندین جاران ھاوارکر و ھوشداری دا کو تاکرەوی و تێکدانا تەوافوقێ دێ عیراقێ بەر ب وێرانبوونێ بەت، بەلێ مخابن گوە ل ھوشداریا وی نەھاتە دان و پاشی کارەسات روودا، د ئەنجام دا نوکە دبینین پشکەکا مەزن یا عیراقێ ژ ئەگەرێ ھێرشێن داعشێ یا وێران بووی، لەشکرێ عیراقێ و حەشدا شەعبی ب ھزاران شەھید دان، ١٨١٠ پێشمەرگە بۆ راگرتن و شکاندنا داعشێ شەھید بوون، کۆمەلکوژی دژی خوشک و برایێن مە یێن ئێزدی ھاتە ئەنجامدان و ھەتا نوکە ژی ٢٧٦٨ ئێزدی د بێ سەر و شوینن.

نوکە ژی ژبۆ وێ چەندێ زەمینا توندوتیژیێ ل عیراقێ نەمینیت، بۆ وێ چەندێ عیراق تووشی داگیرکاریەکا وەکو داعشێ نەبیت، بۆ وێ چەندێ بشێین بەرسڤا داخوازیێن خەلکی بدەین، دڤێت بزڤرین بۆ دستوورێ عیراقێ و پێدڤیە ھەموو دەڤەران مافێ ب رێڤەبرنا خوە ھەبیت، پێدڤیە تەوافوقێ و ھەڤپشکیێ د رێڤەبرنا عیراقێ دا  دروست بکەین.

ئەڤرۆ، ھۆشەنگ تاجر:

چاڤدێرەکێ سیاسی یێ رۆژئاڤایێ کوردستانێ راگەھاند کو حەفتیا بۆری کاروانەکێ دی یێ ھاریکاریێن سەربازی یێن ئەمریکا گەھشتە باژێرێ قامشلۆ یێ رۆژئاڤایێ کوردستانێ و ئەمریکا دو بنگەھێن نوو یێن سەربازی ل حەسەکێ و قامشلۆ ئاڤا دکەت و ئەو یەک بوویە جھێ دلگرانیا تورکیا.

حەمید مەحمود چاڤدێرێ سیاسی یێ رۆژئاڤایێ کوردستانێ بۆ ئەڤرۆ دیار کر کو ژ دەستپێکا سالا ٢٠٢١ ھەتا نھا ١٢ کاروانێن ھاریکاریێن سەربازی یێن ئەمریکا گەھشتنە رۆژئاڤایێ کوردستانێ و حەفتیا بۆری ژی کاروانەکێ سەربازی یێ ئەمریکا گەھشتە باژێرێ قامشلۆ و بەرپرسەکێ ھێزێن سووریا دیموکرات ژی راگەھاند کو ئەمریکا بۆ وان دیار کریە ئەو دێ دو بنگەھێن نوو یێن سەربازی ل حەسەکێ و قامشلۆ ئاڤا کەن و دێ چەکێن گران ژی ل وان بنگەھان ھێنە بجھکرن.

چاڤدێرێ سیاسی دیار ژی کر کو ھەرچەندە د راگەھاندنێ دا دھێتە گۆتن کو ئارمانجا سەرەکی یا ئەمریکا ژ ھاریکاریێن بۆ ھێزێن سووریا دیموکرات شەرێ ل دژی رێکخراوا تیرۆرستی یا داعشێ یە، لێ ئەمریکا دڤێت رێگریێ ل ھێرشێن تورکیا بۆ سەر باکورێ سووریێ و رۆژئاڤایێ کوردستانێ ژی بکەت، چونکو تورکیا ل دەلیڤەکێ دگەریت دا جارەکا دی ھێرشی رۆژئاڤایێ کوردستانێ بکەت و ئەمریکا ژی دڤێت رێگریێ ل ھەر ئۆپەراسیۆنەکا نوو یا تورکیا بکەت، چونکو بەری نھا مەزلوم عەبدی فەرماندارێ گشتی یێ ھێزێن سووریا دیموکرات ژی دیار کربوو کو ئەو چو دەمەکێ نەبووینە مەترسی بۆ تورکیا و دڤێت ئەمریکا نەھێلیت کو تورکیا دەست ب ئۆپەراسیۆنەکا نوو بکەت و گۆت: (ب تایبەتی ژی ئیدارا نوو یا ئەمریکا ب سەرۆکاتیا جۆ بایدن ھەلویستێ وێ ل ھەمبەر تورکیا توندە و وەکو سەردەمێ ترامپی رێ ب تورکیا ناھێتە دان کو ھێرشی باکورێ سووریێ بکەت، ژ بەر ھندێ ژی تورکیا ژ ئاڤاکرنا دو بنگەھێن نوو یێن سەربازی ژ ئالیێ ئەمریکا ڤە دلگرانە).

ئەو یەک د دەمەکێ دایە کو حەفتیا بۆری بەرپرسەکێ سەربازی یێ ئەمریکا ژی دیار کربوو کو تورکیا داخواز ژ ئەمریکا کریە ھەکە پشتەڤانیا ھێزێن سووریا دیموکرات نەکەت و ھاریکاریێن سەربازی بۆ ھێزێن سووریا دیموکرات بدەتە راگرتن وی دەمی تورکیا بەرھەڤە دەستان ژ سیستەمێ موشەکی یێ روسیا بەردەت، لێ ھەتا نھا ئەمریکا ب رەنگەکێ ئەرێنی بەرسڤا تورکیا نەدایە و ھەتا نھا ژی جۆ بایدن بەرھەڤ نینە بەرسڤا تەلەفونێن ئەردۆگانی بدەت، ئەو یەک ژی نیشا ددەت کو ھەلویستێ ئیدارا نوو یا ئەمریکا ل ھەمبەر تورکیا گەلەک توندە.

چاڤدێرێن سیاسی ژی دیار دکەن کو ھەکە ئەمریکا ھەلویستێ وێ ل ھەمبەر تورکیا وەکو نھا توند بیت رەنگە ئەردۆگان پتر خوە نێزیکی روسیا بکەت، چونکو د بابەتێ سووریێ دا تورکیا پێدڤی ب پشتەڤانیا روسیا یە و بێی رازیبوونا روسیا ژی تورکیا نەشێت دەست ب چ لڤینێن نوو ل سووریێ بکەت، لێ ھەکە تورکیا پتر خوە نێزیکی روسیا بکەت رەنگە جۆ بایدن ب رێیا وەلاتێن دی یێن ئەندامێن ناتۆ دەست ب سزادانا تورکیا بکەن، چونکو بەری نھا جۆ بایدن ب رەنگەکێ ئاشکر دیار کربوو کو نابیت تورکیا وەکو ئەندامەکا ناتۆ چەکان ژ روسیا بکڕیت و ئەو یەک مەترسیا خوە بۆ ھەموو وەلاتێن ئەندامێن ناتۆ ھەیە و دڤێت تورکیا دەستان ژ کڕینا سیستەمێ موشەکی یێ روسیا بەردەت و وەکو وەلاتەکێ ئەندامێ ناتۆ بزاڤان بکەت.

ل ئالیێ دی ھەتا نھا چەندین جاران بەرپرسێن تورکیا دیار کرینە کو ئەو ب چو رەنگەکێ بەرھەڤ نینن دەستان ژ کڕینا سیستەمێ موشەکی یێ روسیا بەردەن و دڤێت ئەمریکا ھەلویستێ خوە ل ھەمبەر تورکیا ب گوھۆریت.

ئەڤرۆ:

ڤەکۆلەرەک و شرۆڤەکارەکێ سیاسی یێ عیراقی بابەتەک ل بن ناڤێ” دێ چ روودەت ئەگەر پرۆسا سیاسی ل عیراقێ ژناڤ بچیت”؟ بەلاڤکر و چەندین پێشبینی و بۆچوون ل دۆر وێ چەندێ بەرچاڤکرن، ژوان دوبارە ھاتنا داعشێ و داگیرکرنا چەندین پارێزگەھێن عیراقێ، ھەڤدەم کونترۆلکرنا کەرکووکێ و دەڤەرێن ناکۆکی ل سەر ژ لایێ ھەرێما کوردستانێ ڤە.

جاسم ئەلشمەری ڤەکۆلەر و شرۆڤەکارێ سیاسی یێ عیراقێ بەلاڤکر” جارەکادی ئاخڤتن و داخۆیانی ل دۆر ژناڤچوونا پرۆسا سیاسی ل عیراقێ دھێنە گۆتن، پێشتر ژی چەندین سیاسی و رێکخراو و دەستەیێن سیاسی ئەو ھوشداریە دایە کو پرۆسا سیاسی ل عیراقێ ب تمامی دێ ژناڤچیت”.

ئاماژە کر ژی”  د دەمێ بۆری دا، مەحموود عوسمان سیاسەتمەدارێ کورد ھوشداری دا کو پرۆسا سیاسی ژ ھەموو دەمەکێ دی یا نێزیککترە ژ شکەستنێ، ب وی شێوەی ژی دێ رەوشەکا نەخوازراو ل عیراقێ پەیدا بیت و ئێدێ عیراق وەکو دەولەت ھەبوون نامینیت، مەترسی ژی دێ ھەبیت کو ھێزێن ژ دەرڤەی قانوونێ دەست ب سەر عیراقێ دا بگرن”.

پێشتر ژی، شەریف کورێ حسێنی، سەرۆکێ بزاڤا دستووری ل عیراقێ راگەھاندبوو کو سیستەمێ سیاسی و پرۆسا سیاسی ل عیراقێ ھەتا ھاڤینا ٢٠٢١ خوە ناگریت و حوکمەت نەشێت مووچێن فەرمانبەران دابین بکەت و کێشا دارایی دێ مەزنتر بیت و دێ دووماھیا وەلاتێ عیراقێ ھێتە راگەھاندن”.

ئەو ڤەکۆلەرە بەرسڤا وێ پرسیارێ ددەت کو دەمێ پرۆسا سیاسی ژناڤ دچیت دێ چ روودەت؟ ودبێژیت” خەلک ل بەغدا و باژێرێن دی دێ سەرھلدەن و دێ ھەموو دەزگەھێن لەشکری و مەدەنی ل عیراقێ کونترۆلکەن، دبیت ئەگەرەکێ دی ژی روو بدەت ئەوژی کونترۆلکرنا عیراقێ ژلایێ ھێزا دژە تیرۆر یان ژی ھێز و گرۆپێن جودا جودا و راگەھاندنا بارێ نەئاسایی ل عیراقێ بۆ دەمێ شەش ھەیڤان یان زێدەتر، ھەروەسا ئەگەرێ پەیدابوونا ململانێیا لەشکری د ناڤبەرا شیعان دا یا ھەی و پشتی وێ چەندێ عامری و مالکی ب پشتەڤانیا میلیشیان و موقتەدا سەدر ب پشتەڤانیا (سەرایا ئەلسەلام) دێ بزاڤێن کونترۆلکرنا دەستھەلاتێ ل عیراقێ کەن، کو د ئەنجامدا دێ شەرەکێ خویناوی دروست بیت و دێ مەزنترین کارەسات ب سەرێ خەلکێ عیراقێ ھێت”.

ئەلشمەری دیارکر ژی کو سیناریۆیەکا دی ژی یا ھەی ئەوژی دیاربوونا داعشێ یە وکونترۆلکرنا ھندەک پارێزگەھان وەکو ئەنبار و نەینەوا و دیالا و سەلاحەدین ژ ئەگەرێ پەیدابوونا ڤالاھیا ئەمنی و مژوولبوونا ھێزێن عیراقی ب شەرێ ناڤخوەیی ڤە ل سەر کونترۆلکرنا دەستھەلاتێ، ب تایبەت کو نوکە ھژمارا چەکدارێن داعشێ ل عیراقێ و سووریێ ب زێدەتر ژ ١٠ ھزار چەکداران دھێتە خەملاندن”.

ئەو ڤەکۆلەرە پێشبینیێ دکەت کو شەرەک یێ ھەڤشێوێ شەرێ مەزھەبی ئەوێ پشتی ژناڤچوونا رژێما بەعس روودای پەیدا ببیت وپێلەکا مەزن یا گرتن و رەڤاندن و کوشتنێ دەست پێ بکەت و رۆژانە تەقین ل باژێران روو بدەن و نە قانوون و نە حوکمەت و نە چ دەستھەلاتەک نەشێت دووماھیێ ب وێ رەوشێ بینیت و ئالۆزی و شەرێ میلیشیان دژی میلیشیان و ھێزێن عەشائیری دژی میلیشیان و میلیشیا ل گەل لەشکری دێ دروست بیت و دحالەتێ ئاشتیێ دا ئەنبار و پارێزگەھێن دی یێن سوننی دێ ھەرێما سوننی راگەھینن و پارچەبوونا عیراقێ بۆ سێ ھەرێما دێ بیتە راستیەک و ژ بەر تێکچوونا رەوشا عیراقێ ئەگەرەکێ مەزن دێ ھەبیت کو جارەکا دی ھێزێن ئەمریکی ل ھەموو عیراقێ بھێنە بەلاڤەکرن بۆ کونترۆلا رەوشێ و ب دووماھیێ ئینانا خوین رێتنێ و توندوتیژیێ”.

سەبارەت ھەرێما کوردستانێ ژی ئەو ڤەکۆلەرە دووپات دکەت کو ھەرێم ب ئارامی و جێگیر دێ مینیت و رەوشا وێ یا سیاسی و ئەمنی دێ بێ کێشە بیت، چاڤەرێ ژی دھێتە کرن رەوشا ئالۆ یا عیراقێ و شەرێ ناڤخوە ببیتە ئەگەر کوب ۆ رێ گرتنێ ل کەفتنا کەرکووکێ و دەڤەرێن ناکۆکی ل سەر ب دەستێ پاشمایێن داعشێ، جارەکادی ھێزا پێشمەرگەی ھەموو وان دەڤەران کونترۆل بکەت”.

ئەڤرۆ:

شیرەتکارێ لەشکریێ سەرۆکێ ھەرێما کوردستانێ راگەھاند، رەوشا دەڤەرێن کوردستانی یێن دەرڤەی ئیدارا ھەرێما کوردستانێ، ژ ئەگەرێ زێدەبوونا لڤینێن داعشێ گەلەک یا خراب بووی و ئەگەر حوکمەتا عیراقێ ل گەل ھەرێما کوردستانێ نەگەھیتە رێککەفتنەکێ، دەڤەرێن دی یێن عیراقێ ژی دێ ڤەگریت. دیارکر ژی ژبلی رێککەفتنێ ل گەل ھەرێمێ، بەغدا ھیچ رێیەکا دی نینە.

بابەکر زێباری، شیرەتکارێ لەشکریێ سەرۆکێ ھەرێما کوردستانێ گۆت” ھندەک دەڤەرێن کوردستانی یێن دەرڤەی ئیدارا ھەرێمێ یێن بووینە مۆلگە بۆ داعشێ ژ ئەگەرێ وێ چەندێ ھیچ ھێزەکا کوردی و عیراقی لێ نینە، ئەو چەندە ژی مەترسیەکا مەزنە، چونکی داعش ل وان جھان خوە رێک دئێخیت و کریارێن تیرۆرستی ئەنجام ددەت، ژ بلی وێ چەندێ ئەو ھێزێن عیراقی یێن ھەبوون ل دەڤەرێن کوردستانی ھەی، چەندین جۆرێن ھێزانە و د بێ سەرکردایەتیێ نە و ھەر کەسەک ب حەزا خوە رەفتارێ دکەت، لەوما رەوشا دەڤەرێن کوردستانی گەلەک یا مەترسیدارە”.

زێباری گۆت ژی” رۆژانە داعش کریارێن تیرۆرستی ئەنجام ددەت و بەردەوام ھێرشان دکەتە سەر ھێزێن عیراقی و سەربازان د کۆژیت، بەردەوام گوند ژی ژبەر مەترسیا داعشێ دھێنە چۆلکرن، لەوما رۆژ ل دووڤ رۆژێ رەوش بەر ب خرابتر دچیت و ئەگەر چارەسەریا بنەرەتی نەھێتە کرن، دێ گەلەک خرابتر بیت”.

زێدەتر گۆت” داعش کریارێن پارتیزانی ئنجام ددەت، لەوما ئەگەر حوکمەتا عیراقێ ل گەل ھەرێمێ نەگەھیتە رێککەفتنێ، رەوش دێ خرابتر بیت و دەڤەرێن دی یێن عیراقێ ژی دێ ڤەگریت، چونکی داعش ژ ئەگەرێ لاوازیا ھێزێن عیراقی یا ب ھێز بووی”.

ئاشکارکر ژی” حوکمەتا عیراقی ھیچ رێیەکا دی نینە ژبلی وێ چەندێ ل گەل ھەرێمێ بگەھیتە رێککەفتنێ، بەغدا ژی ناخوازیت ڤێ چەندێ بکەت، چونکی دزانیت پتریا خەلکێ دەڤەرێن کوردستانێ یێن دەرڤەی ئیدارا ھەرێمێ، کوردن و دەڤەرێن کوردستانی نە، لەوما مادا ١٤٠ ژی بجە نائینن، چونکی ترس ل دەف یا ھەی ئەو دەڤەرانە بھێنە ب سەر ھەرێما کوردستانێ ڤە کو ل دووماھیێ ژی دێ ھەر وەسا بیت”.

ئەڤرۆ نیۆز:
رێوار محەمەد رەشید، پەیڤدارێ رێڤەبەریا گشتی یا گەشت و گۆزارێ ل پارێزگەها دهۆکێ بۆ ئەڤرۆ نیۆز دیار کر کو ب مەرەما ژ نێزیک ئاگەهداربوون ل سەر رەوشا کەرتێ گەشتوگۆزارێ ل پارێزگەها دهۆکێ ئەڤرۆ رۆژا 17/2/2021 (ئەمەل جەلال) سەرۆکا دەستەیا گشتی یا گەشتوگۆزارێ ل هەرێما کوردستانێ و رێڤەبەرێن گشتی یێن گەشتوگۆزارێ ل پارێزگەهێن (هەولێر و سلێمانیێ) و ئیدارا سەربەخۆیا گەرمیان سەرەدانا پارێزگەها دهۆکێ کر و ژ لایێ (پ.د.خەیری عەلی ئوسۆ) رێڤەبەرێ گشتی یێ گەشتوگۆزارێ ل پارێزگەها دهۆکێ ڤە هاتنە پێشوازیکرن.
ناڤهاتی ئاماژە دا وێ چەندێ کو ژڤانە سوبەهی رۆژا پێنجشەمبی 18/2/2021 ل دەمژمێر 2:00 نیڤرۆ سەرۆکا دەستەیا گشتی یا گەشتوگۆزارێ ل هەرێمێ دێ د پرێس کۆنفرانسەکی نووترین پێزانینان ل سەر رەوشا کەرتێ گەشتوگۆزارێ ل هەرێما کوردستانێ ب گشتی و پارێزگەها دهۆکێ ب تایبەتی بەلاڤ کەت.