بارزان ، نەوزاد زادە ھلوری:
رێبوار رەمەزان رێڤەبەرێ شەھید و ئەنفالکریێن بارزان بو ئەڤرۆ نیوز گۆت : ( وەسا بریار بوو کو وەزارەتا شەھید و ئەنفالکریێن کوردستانێ ب ھەڤکاریا دام و دەزگەھـ و سازیێن دەڤەرا بارزان سالرۆژا جینوسایدا بارزانیان لرۆژا ٢-٨-٢٠١٥ ساخ بکەت ، و ئەڤرو ٣٠-٧-٢٠١٥ ئەم ژلایێ وەزارەتێ ڤە ھاتینە ئاگەھدارکرن کو و ژبەر بلندوبونا پلەیێن گەرماییێ سالرۆژا ساخکرنا جینوسایدا بارزان بو دەمەکێ دن ھاتە پاشئێخستن )
دەبارەی ژڤانێ ساخکرنێ رێڤەبەرێ شەھید و ئەنفالکریان گۆت : ( وەزارەتێ چوو ژڤانێن دن نەداینەمە ،بەلێ گوتیە کو دێ ھەر ھێتە ساخکرن )
دھێتە زانین کو ل رێکەفتی ٣١-٧-١٩٨٨ ھەشت ھەزار بارزانی ژ توخمێ نێرینە ژلایێ رژێما بەعس ب ساخی ھاتنە بن ئاخکرن و وەکو وەفا و رێزگرتنەک بو گیانێ وان قوربانیان سالانە لسەر گورستانا جینوسایدکریان ئەڤ رۆژ دھێتە ساخکرن

ئەڤرۆ نيوز:
مامۆستایەکێ زانستێن سیاسی ئاشکرا دکەت کو پارتی گەلەک ژ قەبارە و سەنگێ لایەنێن دی رۆل ل کابینا ھەشتێ یێ دایێ و دیسان گەلەک مافێن خوە ل بەغدا بۆ لایەنێن دی ھێلاینە، ب مەرەما خۆرتکرن و پاراستنا ئێکرێزیا گەلێ کوردستانێ.
د.سالح مەلا عومەر پرۆفیسورێ ھاریکار د زانستێن سیاسی دا ل زانکۆیا سەلاحەدین بۆ رۆژناما ئەڤرۆ گۆت” بریار بوو ل سالا ٢٠٠٩ راپرسین ل سەر دستوورێ ھەرێما کوردستانێ ھاتبا کرن، لێ نەچو راپرسینێ، ژ بەر کو لایەنێ ئۆپۆزسیۆنێ ناکۆکی ل سەر ھەبوو کو بزڤریتە پەرلەمانی و کودەنگی ل سەر بھێتەکرن و دیسان پارتی دیموکراتی کوردستان بەرھەڤیا خوە نیشادا کو ھەموو لایەن تێدا پشکداربن و لژنە ل سەر ڤێ چەندێ ھاتیە پێکئینان و ئەڤە دو ھەیڤە کارێ خوە دکەت کو دستوورەک بۆ کوردستانێ بھێتە پێکئینان و سیستەم بۆ ھەرێما کوردستانێ ب چ جۆرەکی بیتن، ھەموو لایەنێن سیاسی پابەندی دستووری بن”.
مامۆستایێ زانکۆیێ زێدەتر ژی گۆت” د ھەلبژارتنێن پەرلەمانێ کوردستانێ ل ٢٠١٣ ێ ، پارتی ٣٨ کورسییێن پەرلەمانی بدەستڤەئینان و ل گەل لایەنێن سیاسی گەنگەشەکرن و لایەنێ شەش کورسی ژی ھەین ئینا دناڤ حوکمەتێ دا، لایەن ھەبووینە پارتی زێدەتر ژ سەنگا وان وەزارەت دانێ، ئێکەتیێ ١٨ کورسی یێن ھەین، چار وەزارەت وەرگرتن، پارتی ٣٨ کورسی یێن ھەین و ھەمان رێژا وەزارەتان ھەنە، ھەکە سەحکەیێ پارتی دو جاران زێدەتر کورسیێن پەرلەمانی ھەبووینە، ئەڤە ب وێ چەندێ دا کو دناڤا پرۆسا سیاسی دا پشکداربیتن و بمینیت، پارتی گرنگی ب ٣٨ کورسیێن خوە نەدا کو دشێت حوکمەتا زورینە پێک بینیت و گرنگیێ ب خواستێن لایەنێن دی نەدەت، ئەڤە ھەموو ھاتەکرن دا کودەنگی و ئێکرێزیا گەلێ کوردستانێ بھێتە پاراستن”.
ناڤبری ھێشتا گۆت” ھەکە سەحکەینە لایەنێ دی، ئەڤ ئارمانجە نینە، ئێکەتیێ ١٨ کورسی یێن ھەین، لێ ھندی پارتی وەزیر د حوکمەتێ دا یێن ھەین، ل سەر ئاستێ بەغدا ئێکەتیێ ٢١ کورسی یێن ھەین و پارتی ٢٥ کورسی و مافێ کوردان بوویە و مافێ پارتی بوو سەرۆک کومارێ عیراقێ وەربگریت، لێ پارتی نە وەرگرت و دایە ئێکەتیێ و سەبارەت پۆستێ جێگرێ سەرۆکێ پەرلەمانێ عیراقێ ، گۆڕانێ ھەشت کورسی یێن ھەین و پارتی سێ جاران ھندی وێ کورسی یێن ھەین، لێ پارتی یا بەرھەڤ بوو وی پۆستی بدەتە گۆڕان دا پشکداربیت دحوکمەتا بەغدا دا، ب گشتی سیاسەتا پارتی نەرمیەکا مەزن تێدا ھەبوویە کو لایەنێ بەرامبەر وەربگریت ب مەرەما دروستکرنا کودەنگیەکا نشتیمانی، ھەکە سەحکەیە ھندەک لایەنێن سیاسی ئارمانجێن وان، نە کودەنگیا نشتیمانی و نە بەرژەوەندیێن وەلاتیانە”.
ڤی بسپۆرێ زانستێن سیاسی خویاکر ژی” دناڤ پرۆسێن دیموکراسی دا، چو کەس ناھێت دەنگێن خوە ب سەپینیت، ھەردەم سندوقێن ھەلبژارتنێ نە دەنگی د سەپینن و چەند دەستھەلاتێ وەربگرن، سەپاندنا نوخبەکێ ل سەر گەل و وەلاتی دچیتە دناڤا عەقلیەتێن دکتاتوری دا و گەلەک یا ب زحمەتە ئەڤ عەقلیەتە ل سەر جڤاکێ کوردی بھێتە سەپاندن”.
زێدەتر گۆت” ئەو دبێژن مە دڤێت بھێینە دناڤ پرۆسا سیاسی یا کوردستانێ دا و ئەوان دڤێت بکەنە زورینە و کەمینە، ھەکە ھندەک قانوونان ل سەر پارتی دەرباز بکەن ژی، دبینم دیتنا وان گەلەک یا شاشە، چونکی بکەنە زوورینە و پارتی رێزێ ل بۆچوونا وان دگریت کو زوورینە و کەمینە و ب ڤێ چەندێ دێ ھەموو پۆستێن حکومی ژ دەست دەن و وان بڤێت و نەڤێت، پارتی زوورینە یە و حزبا ئێکێ یە ل کوردستانێ و حوکمەتا بنگەە فراوان پێکئینایە و پارتی گەلەک ب ساناھی دێ شێت حوکمەتا زورینە پێک ئینیت، دبینم ب ڤی رەنگی لایەنێن بەرامبەر پارتی دێ زێدەتر زیاندار بن، چونکی وان قەبارێ پارتی نینە، وی دەمی لایەنێن بەرامبەر ب خوە دێ دانپیدانێ کەن”.
د. سالح مەلا عومەری ئاماژە دا وێ چەندێ کو دەمێ سەرۆکاتیا ھەرێما کوردستانێ دێ ل ٢٠ تەباخێ ب دووماھی ھێت و ل دووڤ قانوونا سەرۆکاتیا ھەرێما کوردستانێ کو دڤێت سەرۆکێ ھەرێمێ بەری دو ھەیڤان ژ ب \دووماھی ھاتنا دەمێ وی، داخواز ژ کۆمسیوونێ کربا کو ھەلبژاردن بھێنەکرن و سەرۆکی ل دووڤ قانوونێ ئەو داخوازە ژ کۆمسیونێ کربوو کو ھەلبژاردن بھێنەکرن و کۆمسیۆنێ بەرسڤ دا ژ بەر قەیرانا ئابووری و کاودانان نەشێن د ڤی دەمی دا ھەلبژارتنان بکەن”.

ئه‌ڤرۆ نيوز، نيوار محه‌مه‌د سه‌ليم:

وەزارەتا پەروەردێ بریار دا کو ھەموو باخچە و پولا ئێکێ بنەرەتی خواندن ب زمانێ ئێنگلیزی بیت و ل سالا خواندنێ 2015-2016 بریارە ھەموو باخچێن پارێزگەھا دھۆکێ و 42 قوتابخانێن بنەرەتی کو نێزیکی پێنج هزار قوتابی دێ مفاداربن ژڤێ چەندێ و خواندن ب زمانێ ئینگلیزی بیت بابەتێن (بیرکاری – زانستەکان) دێ ئەڤ سیستەمە لێ ھێتە بجهـ ئینان و ل سالا خواندنێ 2016-2017 بریارە ھەموو قوتابخانە ل ھەرێما کوردستانێ ڤی سیستەمی پەیره‌و کەن”.
عه‌بد یوسف ئه‌حمه‌د رێڤەبەرێ گشتی یێ پەروەردا پارێزگەھا دھوکێ بۆ ئه‌ڤرۆ نيوز دیار کر کو بریار ھاتیە دان ھەموو باخچە و قوتابخانێن ھەرێما کوردستانێ پوۆا ئێکێ بنەرەتی بابەتێن (بیرکاری – زانست) خواندن ب زمانێ ئێنگلیزی بیت”.
ھەروەسا رێڤەبەرێ گشتی گۆت : “پشتی وەزارەتا پەروەردێ ڤەکولین کرین کو سیستەمەکێ ب ڤی رەنگی ل ھەرێما کوردستانێ بھێتە بجهـ ئینان بریار ھاتە دان کو ئەڤ سیستەمە بھێتە بجھئینان و ھەموو پێدڤیێن بجهـ ئینانا ڤی سیستەمی ژ ھەموو لایەکی ڤە ژ ڤەکرنا خولا بۆ مەشق کرن و ئامادەکرنا ماموستایان و پەیرەوپروگرامێ خواندنێ ئامادەکرینە و بۆ ماوێ نێزیکی 60 رۆژان دێ ماموستا بۆ ڤێ مەرەمێ ھێنە مەشق کرن”.