ب سه‌رپه‌رشتيا سه‌رۆكێ په‌رله‌مانى كۆمبوونا لژنا قانوونى ده‌سپێكر
ئه‌ڤرۆ نيوز، نيوار محه‌مه‌د سه‌ليم:
كۆمبوونا لژنا قانوونى يا په‌رله‌مانێ كوردستانێ ده‌سپێكر و ئه‌ندامێن پارتى و مه‌سيحى و توركمانان ژى پشكدارى د كۆمبوونێ دا نه‌كر و كۆمبوونه‌كا نه‌يا قانوونى وه‌سف دكه‌ن.
ب مه‌ره‌ما ئاماده‌كرنا راپۆرتێ ل سه‌ر پرۆژێ راستڤه‌كرنا قانوونا سه‌رۆكاتيا هه‌رێمێ كۆمبوونا لژنا قانوونى يا په‌رله‌مانێ كوردستانێ ئه‌ڤرۆ رۆژا چارشه‌مبى رێكه‌فتى 29ى تيرمه‌ها 2015ێ ب سه‌رۆكاتيا سه‌رۆكێ په‌رله‌مانێ كوردستانێ ده‌سپێكر.
ڤه‌مان فه‌يسه‌ل، ئه‌ندامێ لژنا قانوونى يا په‌رله‌مانێ كوردستانێ ل سه‌ر فراكسيۆنا پارتى ديموكراتى كوردستان بۆ ئه‌ڤرۆ نيوز گۆت: “مه وه‌كو پارتى ل گه‌ل مه‌سيحى و توركمانان بايكوتا ڤێ روونشتنا په‌رله‌مانى يا كرى و ب روونشتنه‌كا نه‌يا قانوونى دزانين و هه‌ر بڕياره‌كا بهێته ده‌ركرن ژى نه‌يا قانوونى يه و نابيت كار پێ بهێته كرن”.
ب گۆره‌يى ماددێ 17ێ په‌يروێ ناڤخۆ يێ په‌رله‌مانى برگا 11 مافێ سه‌رۆكێ په‌رله‌مانى يه چاڤدێريا كارێن لژنان بكه‌ت و كارئاسانيا بۆ بكه‌ت ژ لايێ ئيدارى ڤه و ب گۆره‌يى مادێ 18 برگا 4 مافێ جێگرێ سه‌رۆكێ په‌رله‌مانى يه چاڤدێريا كارێن په‌رله‌مانى بكه‌ت، ب گۆه‌رى مادێ 39 برگا 5 هه‌ر لژنه‌كا په‌رله‌مانى وه‌كو په‌رله‌مانه‌كێ بچووكه و نابيت كه‌س ده‌ستێوه‌ردانێ د كاروبارێن وێ دا بكه‌ت.
ڤه‌مان فه‌يسه‌ل دبێژيت: “سه‌رۆكێ په‌رله‌مانى ماف نينه سه‌رپه‌رشتى و مايتێكرنێ د كاروبارێن لژنان دا بكه‌ت، چو ژ ئه‌ندام په‌رله‌مانان نه فه‌رمانبه‌رێن سه‌رۆكێ په‌رله‌مانى نه دا كو ل دووڤ حه‌زا خوه سه‌ره‌ده‌ريێ ل گه‌ل بكه‌ت”.
ئه‌ڤى ئه‌ندامێ په‌رله‌مانێ كوردستانێ دا زانين ژى كو هه‌ر تشتێ ژ ئه‌نجامێ ڤێ كۆمبوونێ ده‌ربچيت نه‌يێ قانوونى يه و كار پێ ناهێته كرن.
ل 23ى خزيرانا 2015ێ ب سه‌رپه‌رشتيا قونسلێ ئيرانێ، سه‌رۆكێ په‌رله‌مانێ و كوردستانێ و فراكسيۆنێن ناڤا په‌رله‌مانێ كوردستانێ بێى پارتى و فراكسيۆنێن مه‌سيحى و توركمان كۆم بوو و خواندنا ئێكێ بۆ قانوونا راستڤه‌كرنا قانوونا سه‌رۆكاتيا هه‌رێما كوردستانێ كر و نوكه دڤێت ژ لايێ لژنا قانوونى ژى ڤه كارێن وێ رێكبێخن و جاره‌كا دى بۆ په‌رله‌مانى ره‌وانه بكه‌ن دا كو دانوستاندن ل سه‌ر بهێته كرن.
ده‌رباره‌يى وێ چه‌ندێ كا ئه‌و كه‌سێن ئاماده د لژنێ دا دشێن وه‌كو قانوون بێى پێنج ئه‌ندامان كارێن خوه ب رێڤه ببه‌ن، ڤه‌مان گۆت: “لژنا قانوونى ژ 11 كه‌سان پێك دهێت سێ پارتى و سێ ئێكه‌تى و دو گۆڕان و ئێك يه‌كگرتوو و ئێك مه‌سيحى و ئێك توركمان، ژ وان ژى شه‌ش د ئاماده‌نه و دبنه زۆرينه”.
دا زانين ژى كو هه‌ر چه‌نده سه‌ركرداتيا يه‌كگرتوو پێ باش نينه كو ئه‌و پشكدارى ڤێ روونشتنێ ببن، به‌لێ ئه‌ندامێ وان ژ به‌ر كو ئێكه‌تيه‌كێ كه‌ڤنه و دژى پارتى يه پشكدارى د ڤێ كۆمبوونێ دا كريه.
