ئه‌ڤرۆ نيوز:

سپێده‌يا ئه‌ڤرۆ رۆژا پێنجشه‌مبى رێكه‌فتى 14ى گۆلانا 2015ێ شانده‌كێ حوكمه‌تا هه‌رێما كوردستانێ سه‌ره‌دانا په‌رله‌مانێ كوردستانێ كر و ل وێرێ ل گه‌ل سه‌رۆكاتيا په‌رله‌مانى و فراكسيۆن و لژنا قانوونى و ژێده‌رێن سرۆشتى و وزه‌ و په‌ترۆلێ كۆمبوون.

ب گۆره‌يى پرسا په‌ترۆل و بودجێ و ل سه‌ر كێشێن د ناڤبه‌را هه‌ولێر و به‌غدا و پابه‌ندنه‌بوونا به‌غدا ب رێكه‌فتنا د ناڤبه‌را هه‌رێما كوردستانێ و ناڤه‌ندى دا، ئه‌ڤرۆ وه‌ڤده‌كێ بلندێ حوكمه‌تا هه‌رێما كوردستانێ ب سه‌رۆكاتيا نێچيرڤان بارزانى سه‌رۆكێ حوكمه‌تا هه‌رێما كوردستانێ و قوباد ته‌له‌بانى جێگرێ سه‌رۆكێ حوكمه‌تێ و ب هه‌ڤالنيا هژماره‌كا وه‌زيرێن تايبه‌تمه‌ند د ڤى وارى دا، چوونه‌ په‌رله‌مانێ كوردستانێ.

شاندێ حوكمه‌تێ، ل گه‌ل ده‌سته‌يا سه‌رۆكاتيا په‌رله‌مانى و سه‌رۆكێن فراكسيۆنێن ناڤا په‌رله‌مانى كۆم بوو و ب ئاماده‌بوونا سه‌رۆكێ لژنێن كاروبارێن قانوونى و دارايى و كاروبارێن ئابوورى و وه‌به‌رهێنان و پێشه‌سازى و وزه‌ و ژێده‌رێن سرۆشتى ل په‌رله‌مانى.
ئامانجا كۆمبوونێ، وه‌رگرتنا بۆچوونا په‌رله‌مانێ كوردستانێ يه‌، ل سه‌ر رێكه‌فتنا د ناڤبه‌را هه‌ولێر و به‌غدا دا و ئێكبوونا هه‌لويستێ هه‌موو لايه‌نان دا كو هه‌ر بڕيار و پێنگاڤه‌كا داهاتى ب هه‌لويسته‌كێ نشتيمانى و ئێكده‌نگى بيت.

سه‌رۆكێ حوكمه‌تا هه‌رێما كوردستانێ د ناڤ هۆلا په‌رله‌مانى دا گۆت: “به‌غدا پابه‌ندى رێكه‌فتنا هه‌ولێر و به‌غدا نه‌بوويه‌”.

نێچيرڤان بارزانى، سه‌رۆكێ حوكمه‌تا هه‌رێما كوردستانێ زێده‌تر گۆت: “مه‌ ئه‌و په‌ترۆلا پێدڤى ب گۆره‌يى رێكه‌فتنێ ره‌وانه‌ كريه‌، به‌لێ به‌غدا پارێ ته‌مام نه‌هنارتيه‌”.

بارزانى دا زانين كو هێجه‌تا به‌غدا بۆ ئه‌وان ئه‌و بوويه‌ كو پارێ به‌نكا بازرگانى ب كارئينايه‌، له‌ورا پشكا بودجا هه‌رێما كوردستانێ كێم بوويه‌، ئه‌ڤه‌ دده‌مه‌كى دايه‌ ب گۆره‌يى قانوونێ ئه‌و كاره‌ هاتيه‌ كرن و دبێژيت: “ل ده‌سپێكێ ب هيڤى بوون 50% ژ پارێ په‌ترۆلێ بۆ مه‌ ب هنێرن، به‌لێ وه‌زيرێ په‌ترۆلا عيراقێ كێم كريه‌ و كريه‌ 10%ێ”.

ئه‌ڤرۆ نيوز:

وه‌زيرێ كار و كاروبارێن جڤاكى ل حوكمه‌تا هه‌رێما كوردستانێ دا زانين ژى كو پشتى دانوستاندن ل گه‌ل وه‌زيرێ دارايى هاتيه‌ كرن، مووچێ كێم ئه‌ندامان ژ دو هه‌يڤان بۆ هه‌يڤێ جاره‌كێ.

محه‌مه‌د هاوديانى، وه‌زيرێ كار و كاروبارێن جڤاكى ل حوكمه‌تا هه‌رێما كوردستانێ د راگه‌هاندنه‌كێ دا كو ئه‌ڤرۆ نيوز دانه‌ك ب ده‌ست خوه‌ خستيه‌ رادگه‌هينيت: “پشتى ل گه‌ل وه‌زيرێ دارايى دانوستاندن كرى، بڕيار هاته‌ دان ژ نوكه‌ و پێڤه‌ مووچێ هه‌يڤان يێ خودانپێدڤيێن تايبه‌ت ل شوونا دو هه‌يڤان جاره‌كێ بهێته‌ به‌لاڤكرن، هه‌يڤانه‌ بهێته‌ به‌لاڤكرن”.

هاتيه‌ ژى: “ئه‌ڤه‌ ژى د چارچۆڤێ وان بزاڤ و كاران دايه‌ يێن مه‌ بۆ خزمه‌تكرنا خودان پێدڤيێن تايبه‌ت ده‌سپێكرى و دێ ب رژدى ژى كار كه‌ين دا مووچێ وان زێده‌ كه‌ين”.
وه‌زيرێ كار د ڤێ راگه‌هاندنێ دا ئاماژێ ب وێ چه‌ندێ ژى دكه‌ت كو ژبلى بۆردێ قانوونى يێ وه‌زاره‌تا، نوكه‌ مژوولى راستڤه‌كرنا قانوونا خودانپێدڤيێن تايبه‌تن و دبێژيت: “ئه‌و كێم و كاسيێن د قانوونێ دا هه‌ين دێ هێنه‌ چاره‌ كرن”.

ئەڤرۆ:
پشتی ل حەفتیا بۆری کۆنگرێ پێنجێ یێ پەروەردێ ب چاڤدێری و ئامادەبوونا (نێچیرڤان بارزانی) سەۆرکێ حوکمەتا ھەرێما کوردستانێ ل ھەولێرا پایتەخت دەست ب کارێن خوە کری و دناڤا کۆنگرەیی دا چەندین لژنە ل سەر ئاستێ پەروەردێن گشتی ھاتینە پێکئینان و دیسان چەندین تەوەرێن گرنگ کو دبنە ستوونێن پەروەرێ ھاتنە گەنگەشەکرن و بەحسکرن، ئەندامێن کۆنگرێ ناڤبری کۆنگرەی ب سەرکەڤتی دبینن و ئاماژە دکەنە وێ چەندێ کو پشتی ڤی کۆنگرەی دێ گوھۆرینێن بەرچاڤ پەیدابن ل کەرتێ پەروەردێ.
سەرۆکا لژنا پەروەردێ ل جڤاتا پارێزگەھا دھۆکێ کو ئەندامەکا کۆنگرێ پەروەردێ بوو، ل ھەمبەر ئەنجامێن کۆنگرێ پێنجێ یێ پەروەردێ بۆ ئەڤرۆ گۆت: گەلەک گوھۆرین ھاتینەکرن و ئەڤە ھەموو پشتی کۆنگرەی دێ بنە بریار و لژنە بۆ ڤێ مەبەستێ ھاتینە پێکئینان.
جۆمبەد شوکری سەرۆکا لژنا پەروەردێ ل جڤاتا پارێزگەھا دھۆکێ، ئەوچەندە ژی گۆت: بەحسێ گەلەک قانوونان ھاتیەکرن چونکۆ کۆنگرێ ٢٠٠٧ گەلەک شاشی تێدا ھەبوون و گەلەک گرفت ما بوونە ھەلاویستی و چارەسەری بوو نەھاتبوو دیتن، ئەز ل سێ تەوەران پشکداری کۆنگرەی بووم، تەوەرێن سەرپەرشتیار و تەوەرێ خواندنێن ئەھلی و کارگێری ل سازیێن پەروەردێ، دناڤا ئەڤان ھەرسێ تەوەران دا گەلەک تشتێ باش ھاتەکرن و گەلەک پێنگاڤێن باش پشتی کۆنگرەی دێ ھێنە ھاڤێتن و دێ خزمەتا وەلاتیێن دەڤەرێ کەن و تایبەت ئەڤێن دناڤا کەرتێ پەروەردێ دا کار دکەن.
ناڤھاتیێ ئاشکرا کر کو قوتابخانێن ئەھلی ل ھەرێما کوردستانێ پێشتر چو قانوونێن ب وی رەنگی نەبووینە کو کار پێ بھێتەکرن و ڕەنگە دو قانوون ھەبووینە ل سالێن ٢٠٠٩ و ٢٠١٢ و کۆنگرە ل سەر گەلەک خالان راوەستیا، ژوانا ھەکە قوتابخانا بنەرەتی بیت پێدڤیە رۆبەرێ وێ ژ ٦٠٠ مەتران کێمتر نەبیت و ھەکە ئامادەیی بیت رۆبەرێ وێ ژ ١٠٠٠ مەتران کێمتر نەبیت و ئەگەر پەیمانگەە بیت ژ ١٥٠٠ مەتران کێمتر نەبیت، یان ژ ل دووڤ ستاندارێن رێکخراوێن یونسێف و یونسکۆ بیت، دیسان ھەر ل سەر قوتابخانێن ئەھلی کو مە سێ جور ھەنە، نێڤ دەولەتی و ناڤخوە یی و قوتابخانێن بیانی و ھاتنە دابەشکرن و ھەر ئێکێ رێنمایێن خوەیێن تایبەت ھەنە و نابیت جۆرە پرۆپاکندە بۆ ئەڤان قوتابخانان بھێنەکرن ھەتا دەستیردانێ ژ وەزارەتا پەروەردێ یا حوکمەتا ھەرێما کوردستانێ وەربگرن و دەستیردان بۆ دھێتە دان ل نیڤا ھەیڤا شەش ھەتا ھەیڤا حەفت، سەرۆکا لژنا پەروەردێ ل جڤاتا پارێزگەھا دھۆکێ ئاشکراکر کو ئارمانج ژ ھەبوونا قوتابخانێن ئەھلی ھاتە بەحسکرن، ئایا ب تنێ دێ وەرگرتنا پارەی بیت و دیسان سەرپەرشتیکرنا ئەڤان قوتابخانان ب چو ڕەنگ و شێوابیت.
جۆمبەدێ ئاشکراکر کو دناڤا کۆنگرەیی دا بریار ھاتەدان قوتابیێن قوتابخانَن ئەھلی ژی پشکداری ئەزموونێن نشتیمانی ببن، دیسان گەلەگ جاران سەرپەرشتێن بابەتان سەرەدانا ئەڤان قوتابخانا ناکەن و ھەلسنگاندنا بابەتان ناکەن، کۆنگرەی دا بریار ھاتە سەرپەرشتیار سەرەدانا ئەڤان قوتابخان بکەن.
دلایەکێ دا ئەنداما کۆنگرێ پێنجێ ئاشکراکر ژی کو ل دووڤ بریارێن کۆنگرەی ئێدی (عبۆر) دەرباز بوون ل پۆلێن ئامادەیی نەما و ھەکە نمرا قوتابی (٤٠) بیت ھەر ئێکسەر دێ بیتە پێنجی و دێ دەربازبیت.
سەرۆکا لژنا پەروەردێ گۆت: پشتی دەرخستنا چەندین بریار و راسپاردان ژ کۆنگرێ پێنجێ یێ پەروەردێ، چەندین لژنە ھاتنە پیکئینان بۆ دووڤچوون و دانانا رێنمایێن ھاتینەدەکرن و ب ھیڤی نە ئەڤان رۆژان ئەڤ بریارە دێ بنە پرۆژە قانوون و دێ بۆ پەرلەمانێ کوردستانێ ھێنە بلندکرن کو ببنە قانوون.
جۆمبەد شوکری دیارکر ژی کو دناڤا کۆنگرەی دا ئەوێ وەزیرێ پەروەردێ دیتی یە و ئەو کاودانێن پارێزگەھا دھۆکێ کەفتیێ و ھاتنا ئاواران بۆ قوتابخانان گەھاندینێ و ناڤبری رازی بوویە کو کۆمبۆنەکا بەرفرەە و گرێدایی بابەتی ل گەل لژنا پەروەردێ ل ئەنجوومەنێ پارێزگەھا دھۆکێ بھێتەکرن، ئاشکراکر ژی کو ھەر د تەوەرێ باسکرنێ دا ل گەل وەزیرێ پەروەردێ گۆتیێ بۆچی پرۆژێ ئاڤاکرنا یەکیێن ئاکنجیبوونێ بۆ مامۆستان ھاتیە راوستاندن و ھەر دو پارێزگەھێن دی ھەیە، بۆچی میلاکات ل پارێزگەھا دھۆکێ کێم بووینە بەراورد ل گەل سالێن بۆری، گۆت: ھەر دەمێ کومبوون ل گەل ھاتەکرن دێ ئەنجامان دیارکەین و راگەھینین، دیسان مە خواستیە سوپاسی بۆ مامۆستا و رێڤەبەر قوتابخان بھێنە دان ژبەر ماندیبوون و ھاریکاریا وان بۆ ئاواران و پێشمەرگێ کوردستانێ و رۆلێ وانێ نەتەوەیی و پەروەردەیی د ئەڤان کاودانان دا.