ئەڤرۆ نیوز:
پشتی کو ھێزێن کوردی راگەھاندن ھێزێن دەولەتا تورکیا ئەڤ دو رۆژن ل بنگەھێن وان ددەن، پەیڤدارێ وەزیرێ پاراستنا فرەنسا، پەیڤدارێ حوکمەتا ئەلمانیا و پەیڤدارێ وەزارەتا دەرڤە یا ئەمریکا ب رەنگەکی جودا رەخنەیێن دژوار ل تورکیا گرتن و راگەھاندن کو نابیت ھێرش بۆ سەر شەرڤانێن کورد و کانتۆنێن رۆژئاڤایێ کوردستانێ بھێتە کرن.
ئەنوەر موسلم سەرۆک وەزیرێن کانتۆنا کۆبانێ د داخویانیەکی دا بۆ رۆژناما ئەڤرۆ راگەھاند کو تۆپخانە و تانکێن تورکیا شەش جاران بنگەھێن ھێزێن کوردی و بورکان فراتێ تۆپباران کرینە و گۆت: (ھێزێن مە ھەتا نھا بەرسڤا دەولەتا تورکیا نەداینە و ئەم دەولەت و حوکمەتا تورکیا ھشیار دکەین کو ل بنگەھێن ھێزێن کانتۆنێن رۆژئاڤایێ کوردستانێ نەدەن، ژ بەر کو ھەر چ روودانەکا نەخواستی روو بدەت تورکیا دێ ژێ بەرپرسیار بیت و مە ژ ھێزێن ھەڤپەیمانان ژی داخواز کر کو سنۆرەکی بۆ دەستێوەردانێن تورکیا دانێن، ژ بەر کو ھەر ھێرشەکا تورکیا خزمەتا داعشێ دکەت و رەوشا سووریێ و دەڤەرێ ب گشتی ئالۆزتر دکەت).
ئەنوەر موسلم ھەروەسا راگەھاند ژی کو ھێزن کوردی باژێرکێ سیرین یێ دکەڤیتە باشورێ کۆبانێ ئازاد کرینە و ھەتا ھەموو ئاخا رۆژئاڤا ئازاد ببیت دێ ئۆپەراسیۆنێن پاقژکرنێ ژی ل دژی تیرۆرستان بەردەوام بن و گۆت: (ئۆپەراسیۆنێن ھێزێن مە بێی ناڤبەر بەردەوام دکەن و مە ژ رۆژا یەکێ ڤە گۆتیە ئەم ناھێلین یەک تیرۆرست و دوژمنێن گەلێ کورد ل سەر ئاخا مە بمینن و د ڤێ چارچۆڤێ دا ھێزێن کوردی و بورکان فراتێ باژێرکێ سیرین کو دکەڤیتە باشورێ کۆبانێ ئازادکرن و نھا ١٥% ژ باژێرێ حەسەکێ و باژێرکێن جەرابلوس و عەزازێ ماینە).
ل ئالیێ دی پشتی ناڤەندا فەرمانداریا ھێزێن کوردی ب داخویانیەکا فەرمی راگەھاند کو ھێزێن تورکیا بنگەھێن وان یێن سەربازی تۆپباران کرینە و ٤ شەرڤانێن بورکان فراتێ و ھژمارەک وەلاتیێن سڤیل ژی بریندار کرینە و بەلگەیێن ھێرشا دەولەتا تورکیا دانە دەستێ ھێزێن ھەڤپەیمانا نێڤدەولەتی، ھەر یەک ژ پەیڤدارێ وەزارەتا دەرڤە یا ئەمریکا، پەیڤدارێ وەزیرێ پاراستنا فرەنسا و پەیڤدارێ حوکمەتا ئەلمانیا ب رەنگەکی جودا نەرازیبوونا خوە ل ھەمبەر ھێرشێن تورکیا ل دژی شەرڤان و کانتۆنێن رۆژئاڤا دیار کرن و راگەھاندن کو دڤێت بەرێ چەکێن تورکیا ل سەر داعشێ بن نە کو ل ھێزێن کوردی و داخواز کرن کو ئەو یەک بەردەوام نەکەت.
د ڤێ دەربارێ دا پەیڤدارێ وەزارەتا پاراستنا فرەنسا د کۆنگرەکی رۆژنامەڤانی دا راگەھاند کو ئەو قەبوول ناکەن ھێزێن تورکیا ھێرشی ھێزێن کوردی بکەن و ئەو یەک ناھێتە قەبوول کرن و دڤێت جارەکا دی ھێرشەکا وەسا بۆ سەر کوردان نەھێتە کرن و گۆت: (شەرێ مە ھەموویان ل دژی تیرۆرستێن داعش، قاعیدە و کۆمێن توندرەو یێن ئیسلامی نە و نە ل دژی ئالیەکی دی و دڤێت ھەموو ئالیەک ڤێ یەکێ بزانیت و نەبیتە سەدەمێ ئالۆزیێن مەزنتر ل سووریێ و رۆژھەلاتا ناڤین ب گشتی و ئەم ھەموو دزانین تاکە ھێزا کو ب سەرکەڤتیانە شەرێ تیرۆرستان دکەت ھێزێن کوردی نە و ئەم دێ بەردەوام پشتەڤانیێ ل پێشمەرگە و شەرڤانێن کورد کەین ).
ھەر د ڤێ دەربارێ دا حەسەن جەمال رۆژنامەڤانێ ناڤدار یێ تورکیا ژی راگەھاند کو مافێ حوکمەتەکا بەروەخت نینە بریارێ ل سەر ھێرشکرنا ئاخا وەلاتەکی دی بدەت و گۆت: (تشتێ ئەز دزانم پشتی کریارا تیرۆرستیا ل باژێرکێ پیرسووسێ پێدڤی بوو حوکمەت ل دژی داعش و ئالیگر و ئەندامێن وێ ئۆپەراسیۆنان ساز بکەت لێ حوکمەتێ بەرێ فرۆکێن شەری، تانک و تۆپان دایە سەر کوردان و ئەو یەک دێ تورکیا بەر ب کارەساتەکا مەزن ڤە بەت و ئەز داخوازێ ژ پەرلەمانی دکەم روونشتنەکا تایبەت ل سەر رەوشا تورکیا و دەڤەرێ ساز بکەت و نەھێلیت حوکمەتەکا بێی دەسھلات و نە رەوا وەلاتی بەر ب شەرەکی مەزن ڤە ببەت).

ئەڤرۆ نیوز، زنار تۆڤی:

ئاژانسا ئانادۆل یا تورکی دا دیارکرن پشتی ئەمریکا چەندین ھەولداین بۆ بکارئینانا بنگەھێ ئنجەرلیک یێ ئەسمانی ل دژی داعشێ،لێ تورکیا رێک پێ نەددا و رازی نەدبوو کو ئەمریکا وی بنگەھی بکاربینیت،لێ پشتی گفتۆکرنەکا درێژ دناڤبەرا ھەردو وەلاتان دا ئەڤرۆ رۆژا چارشەمبی حووکمەتا تورکیا ب فەرمی بنگەھێ ئنجەرلیک یێ تورکی رادەستی ھێزێن ئەمریکی کر،لەورا ژ ئەڤرۆ پێڤە ئەمریکا دێ شێت ب ساناھیتر جھێن داعشێ بۆردومان کەت،دھەمان دەمدا راگەھاندنا وەزارەتا دەرڤە یا تورکی ئاشکەراکر:ئەو رێکەفتنە دگەل واشنتن بۆ لێدانا داعشێ یە،نەکو بۆ پشتەڤانیا شەرڤانێن کوردە ل سۆریێ.

ئەڤرۆ نیوز:
تورکیا ژ بۆ پاراستنا دەڤەرێن تورکمانان و حەلەبێ و شەرێ ل دژی داعش و رژێما سووریێ لەشکرەکێ ٥ ھزار کەسی ژ تورکمانان ئاڤا دکەت و چاڤدێرەک سیاسی یێ کورد ژی دیار دکەت کو تورکیا دخوازیت ب رێیا تورکمانان نەھێلیت ھەرێمەکا کوردی ل رۆژئاڤایێ کوردستانێ دروست ببیت و تورکیا شەرێ داعشێ ناکەت بەلکو شەرێ کوردان دکەت.
ل گۆر راپۆرتەکا رۆژناما یێنی شەفەق یا سەر ب پارتیا ئەردۆگانی د ناڤ سێ رۆژێن بۆری دا چەندین بەرپرسێن سەربازی یێن تورکمان سەرەدانا تورکیا کرینە و ل گەل بەرپرسێن وی وەلاتی کۆمبوون دروست کرینە و ھەموو بەرھەڤی بۆ ئاڤاکرنا لەشکرەکێ ە ھزار کەسی ژ تورکمانان ل رۆژئاڤایێ کوردستانێ ب دووماھی ھاتینە و تورکیا دبێژیت دێ ب رێیا وێ لەشکری شەرێ داعش و رژێما سووریێ کەت و دێ دەڤەرێن تورکمانان و حەلەبێ ب پارێزیت.
نڤیسەر و رۆژنامەڤانێ تورکیا جەنگیز چاندار ژی دیار دکەت کو مەبەستا تورکیا پاراستنا تورکمانان نینە، چونکو ب سالانە تورکمان ل سووریێ دژین و ھەتا نھا ژی ھەردەم زۆرداری ل وان ھاتیە کرن و تورکیا بێدەنگ بوو، لێ نھا ھەرێمەکا کوردی ل سووریێ ئاڤا دبیت و کورد ل سووریێ بوونە ھێزەکا مەزن و کاریگەر و تورکیا ژی دخوازیت ل رەخەکێ شەرێ پەکەکێ بکەت و ل رەخێ دی ژی ب رێیا تورکمانان ئالۆزیان ل رۆژئاڤایێ کوردستانێ دروست بکەت دا کورد نەگەھنە مافێن خوە و گۆت: (تورکیا د راستی دا شەرێ داعشێ ناکەت، چونکو د چەند رۆژێن بۆری دا ئارمانجا سەرەکی یا تورکیا ئاشکرا بوو. ئەردۆگان و ھەڤالێن وی دخوازن ل ژێر ناڤێ شەرێ ل دژی داعشێ ھەم پەکەکێ لاواز بکەن و ھەم ژی نەھێلن کو ھەرێمەکا کوردی ل سووریێ ئاڤا ببیت، ئەمریکا و وەلاتێن ئوروپا ژی باش دزانن کا تورکیا دڤێت چ بکەت و ژ بەر ھندێ ژی وەک بەرێ ئەمریکا و ئوروپا پشتەڤانیێ ل سیاسەتا تورکیا ناکەن و شەرێ نھا تورکیا دکەت ژی د بەرژەوەندیا وی وەلاتی دا نینە و ئارمانجا سەرەکی یا ئەردۆگانی ئەوە دا کو ھەلبژارتنێن پێشوەخت ل تورکیا بھێنە کرن و جارەکا دی ئاکپارتی بشێت ب تنێ حوکمەتێ ئاڤا بکەت).
چاندار د بەردەوامیا ئاخڤتان خوە دا دیار دکەت کو نھا کورد ل سووریێ ھێزا ھەری کاریگەرن کو شەرێ تیرۆرێ دکەن و دونیا ھەموو ژی وێ راستیێ باش دبینیت. بەرخوەدانا کۆبانێ و نھا ژی شەرێ ل حەسەکێ و دەڤەرێن دی بۆ ھەموو جیھانێ سەلماند کو کورد ملەتەک ئاشتیخوازن و ھەموو جیھانێ ب چاڤێ خوە دیت دەمێ کوردان ل کۆبانێ شەرێ داعشێ دکر تورکیا تنێ تەماشە دکر و ژ بەر ھندێ ژی ئێدی تورکیا نەشێت وەک بەرێ کاریگەریێ ل رایا گشتی یا جیھانێ بکەت و ل ژێر ناڤێ تیرۆرێ بزاڤا لاوازکرنا کوردان بدەت و گۆت: (د کۆمبوونا دوھی دا ژی ئاشکرا بوو کو ناتۆ وەک جاران پشتەڤانیێ ل تورکیا ناکەت و د راستی دا شەرێ ڤێ دووماھیێ تورکیا دەستپێکری ژ نەچاریێ بوویە و دخوازیت رایا ناڤخوەیی ل دژی کوردان و پارتیا دیموکراتی یا گەلان بکار بینیت و ئەز باوەرم ناکەم بشێن د وی پیلانا خوە دا ژی سەربکەڤن، چونکو پرانیا خەلکێ تورکیا ل دژی شەری یە و دخوازن تورکیا پرسا کوردی و ھەموو پرسێن خوە ل سەر بنەمایێ ئاشتیانە چارە بکەت).
ل ئالیێ دی لوقمان مەجید چاڤدێرێ سیاسی یێ رۆژئاڤایێ کوردستانێ ژی دیار کر کو تورکیا ب رێیا ئاڤاکرنا لەشکرەکێ بۆ تورکمانان دخوازیت کو ئالۆزیێن ل رۆژئاڤایێ کوردستانێ دروست بکەت، یا کو تورکیا نەشیایی ب رێیا داعشێ بکەت دخوازیت ب رێیا تورکمانان بکەت، چونکو داعش رێکخراوەکا تیرۆرستی یە و جھێ وێ ل جیھانێ دا نینە، تورکیا ھەتا نھا ھاریکاریا وان دکر لێ دیتن کو ھەموو جیھان دژبەریا وان دکەت و ژ بەر ھندێ ژی نھا سیاسەتا خوە دانە گوھۆرین و ڤێجارێ ژی دخوازن تورکمانان ل دژی کوردان بکار بینن و گۆت: (ژ بۆ کو تورکیا نەگەھیتە ئارمانجا خوە و ئەو دەستکەڤتیێن کو ل رۆژئاڤایێ کوردستانێ بدەستڤە ھاتینە ژناڤ نەچن، ئەز داخواز ژ ھەموو ھێز و پارتێن سیاسی یێن رۆژئاڤایێ کوردستانێ دکەم کو د زووترین دەم ئێکەتیا خوە دروست بکەن و بلا پێشمەرگێن رۆژئاڤایێ ژی ڤەگەرنە رۆژئاڤایێ کوردستانێ و بەرگیریێ ژ ئاخا خوە بکەن، ژ بەر ڤێ یەکێ ژی دڤێت PYD سیاسەتا خوە یا شاش ل بەر چاڤان دەرباز بکەت و ل گەل برایێن خوە ل رۆژئاڤایێ کوردستانێ بەرەیەکێ ب ھێز دروست بکەن، سیاسەتا وان یا نھا شاشە و دێ مەترسیێن مەزن بۆ رۆژئاڤایێ کوردستانێ دروست کەت).
ناڤھاتی د دووماھیا ئاخڤتنا خوە دا ئەو یەک ژی نەڤەشارت کو ھەتا کورد نەبنە ئێک دێ پیلان ل دژی وان ھێنە گێران و ھەکە دو سال بەری نھا ھەر دو جڤاتێن کوردی ل رۆژئاڤایێ کوردستانێ ئێکەتیا خوە دروست کربا نھا رەوشا رۆژئاڤایێ کوردستانێ وەسا نەدبوو و گۆت: (لێ نھا ژی درەنگ نەبوویە و ھەر کەس باش دبینیت کو نھا چ پیلان ل دژی گەلێ مە دھێنە گێران و ژ بەر ھندێ بۆ رێگرتن ژ وان پیلانان باشترین چارەسەری ئەوە کو کورد پێکڤە کار بکەن).