ئه‌ڤرۆ نيوز:
دوشه‌مبيا داهاتى سه‌رۆكاتيا حوكمه‌تا هه‌رێما كوردستانێ و سه‌رۆكاتيا په‌رله‌مانێ كوردستانێ دێ كۆم بن و چه‌ند پرسێن گرنگ يێن ناڤخوه‌يا هه‌رێمێ گه‌نگه‌شه كه‌ن.
فه‌خره‌دين قادر، سكرتێرێ په‌رله‌مانێ كوردستانێ بۆ تۆرا ده‌نگوباسێن كوردستانێ راگه‌هاند: بڕياره رۆژا دوشه‌مبيا داهاتى، سه‌رۆكاتيا په‌رله‌مانێ كوردستانێ و سه‌رۆكاتيا حوكمه‌تا هه‌رێما كوردستانێ كۆم ببن و د كۆمبوونێ دا دێ چه‌ند پرسێن ناڤخوه‌يا هه‌رێمێ گه‌نگه‌شه كه‌ن.
سكرتێرێ په‌رله‌مانێ كوردستانێ ئاماژه ب وێ چه‌ندێ ژى كريه كو نوكه ل هه‌رێما كوردستانێ ئۆپۆزسيۆن نينه و پێدڤيه په‌رله‌مان وى رۆلى ببينيت و د كۆمبوونێ دا ل گه‌ل سه‌رۆكاتيا حوكمه‌تێ هه‌ماهه‌نگى د ناڤبه‌را رۆلێ چاڤدێريا په‌رله‌مانى و كاودانێن سياسى و پرسێن دستوورى و سيسته‌مێ حوكمرانيا هه‌رێمێ و چه‌ند پرسێن دى يێن ئه‌ڤرۆيا كوردستانێ گه‌نگه‌شه بكه‌ن.
ئه‌ڤرۆ نيوز:
وه‌زيرێ ژ ده‌رڤه يێ عيراقێ ل ئه‌مريكا راگه‌هاند كو هه‌بوونا ڤالاهيا سياسى ل عيراقێ بوويه ئه‌گه‌رێ وێ چه‌ندێ كو داعش مفايى ژ چه‌ند گه‌نجێن عيراقى وه‌ربگريت و ل عيراپێ بنگه‌هێ خوه ب هێز بێخيت.
ئاماژه ب وێ چه‌ندێ ژى كريه كو هێشتا هنده‌ك وه‌لات ب ره‌نگه‌كێ نهێنى پشته‌ڤانيا داعش دكه‌ن ژ لايێ دارايى ڤه و ب ڤێ چه‌ندێ د تۆمه‌تبارن.
ئيراهيم جه‌غفه‌رى ئاماژه ب وێ چه‌ندێ ژى كر كو ل ڤێ دووماهيێ چه‌كدارێن داعش رابووينه ب شكاندنا قاسا به‌نكه‌كێ و ده‌ست ب سه‌ر 440 مليۆن دۆلاران دا گرتيه.
ئه‌ڤرۆ نيوز، ناجى به‌ده‌ل:
ژێده‌ره‌كى ژ لقا ئێك يا پارتى ديموكراتى كوردستان راگه‌هاند كو ئه‌ڤرۆ پشتى ده‌مه‌كێ كێم مه‌سعود بارزانى سه‌رۆك هه‌رێما كوردستانێ دێ ل گه‌ل كه‌ساتى و ريهـ سپيێن پارێزگه‌ها دهۆكێ كۆم بيت.
خالد ئه‌حمه‌د دوسكى جێگرێ نڤيسينگه‌ها ره‌وشه‌نبيرى و راگه‌هاندنێ ل لقا ئێك يا پارتى ديموكراتى كوردستان بۆ ئه‌ڤرۆ نيوز گۆت: “بڕياره ئه‌ڤرۆ پشتى ده‌مه‌كێ كێم سه‌رۆكێ هه‌رێما كوردستانێ مه‌سعود بارزانى ل گه‌ل كه‌ساتيێن ناڤدارێن ده‌ڤه‌را بادينان كۆم ببيت”.
زێده‌تر گۆت: “د ڤێ كۆمبوونێ دا، دهێته پێشبينيكرن سۆپاسيا خه‌لكێ دهۆكێ بكه‌ت ژ به‌ر خوراگريا وان به‌رامبه‌ر ئه‌ڤ كێشێن ل پارێزگه‌ها دهۆكێ هه‌ين و حه‌واندنا ڤان هه‌موو ئاوارێن ل پارێزگه‌هێ هه‌ين و به‌رسينكگرتنا چه‌كدارێن داعش كو ڤێ ده‌ڤه‌رێ قوربانيه‌كا مه‌زن دايه”.
ئاماژه ب وێ چه‌ندێ ژى كر كو كاودانێن كوردستانێ و عيراقێ ب ره‌نگه‌كێ گشتى ژى دێ ته‌وه‌ره‌كێ دى يێ كۆمبوونا سه‌رۆكێ هه‌رێما كوردستانێ بن ئه‌وا بڕياره پشتى ده‌مه‌كێ كێم ل هۆلا كۆنفرانسان ل دهۆكێ بهێته ئه‌نجام دان.
ئه‌ڤرۆ نيوز، نيوار محه‌مه‌د سه‌ليم:
فه‌رماندێ ليوا چار يا پێشمه‌رگێ كوردستانێ راگه‌هاند كو ئه‌وان ب چه‌كه‌كێ نوو ئێك ژ دوشكێن وان يێن هه‌ره كاريگه‌ر ژ ناڤبريه و ئه‌و ژى يێ بزاڤا تۆلڤه‌كرنێ دكه‌ن.
عيسا زێوه‌ى، فه‌رماندێ ليوا چار يا پێشمه‌رگێ كوردستانێ بۆ ئه‌ڤرۆ نيوز گۆت: “چه‌كدارێن داعش ب رێيا دوشكه‌كێ ده‌ڤه‌رێن بن كونترۆلا هێزا پێشمه‌رگه‌يى گوله‌باران دكرن، پێشمه‌رگه‌يى ژ ب چه‌كێ خوه يێ نوو كو صارۆخه‌كا “80 ملم” ل جهێ وێ دوشكێ دا و دياره ب ئارمانجا خوه گه‌هشتيه”.
فه‌رماندێ ليوا چار يا پێشمه‌رگێ كوردستانێ زێده‌تر گۆت: “ئه‌ڤێ چه‌ندێ ئه‌و گه‌له‌ك تۆڕه كرينه و شڤێدى ده‌مژمێر 11:00 ئه‌وان بزاڤ كرن گرێ ل تاخێ “حى النصر” ل ناڤا شنگال بگرن، پشتى بۆ ماوێ ده‌مژمێره‌كێ شه‌ر هاتيه كرن، شكه‌ستن و زيانێن مه‌زن گه‌هشتنێ”.
عيسا زێوه‌ى دا زانين كو ئه‌ڤرۆ سپێدێ ژى ل لايێ قادسيه يێ كو دبێژنێ سه‌يده زه‌ينه‌ب، بزاڤ كرن هنده‌ك گوله هاڤێتن، به‌لێ د بێ مفا بن و پێشمه‌رگه‌يى ب دژوارى به‌رسڤا وان دا.
ئه‌ڤرۆ نيوز:
هێزێن ئاسايشێ يێن سه‌ر ب كانتۆنا عفرينێ ل رۆژئاڤا، رۆژا ئه‌ينى رێكه‌فتى 25ى نيسانا 2015ێ هێرش كره سه‌ر رێوره‌سمێن بيره‌وه‌ريا 117 ساليا رۆژنامه‌ڤانيا كوردى، كو ژ لايێ پارتى ديموكراتى كوردستان- سوريا هاتبوو رێكخستن.
رێوره‌سم ل ده‌ڤه‌را مه‌يدانكێ يا سه‌ر ب قه‌زا عه‌فرينێ يا رۆژئاڤايێ كوردستانێ هاتبوونه سازكرن و پشتى ده‌سپێكرنا رێوره‌سمان هێزێن سه‌ر ب ئاسايشا كانتۆنا عه‌فرينێ ژ لايێ پارتيا ئێكه‌تيا ديموكرات PYD و هه‌ڤپه‌يمانيێن وێ ڤه دهێته برێڤه‌برن، هێرش كره سه‌ر. چه‌كدارێن ئاسايشێ ده‌ست ب ته‌قه‌كرنێ ب سه‌ر ئاماده‌بوويان دا كر، به‌لێ رێوره‌سم به‌رده‌وام بوون و پاشان رابوون ب ده‌سته‌سه‌ركرنا چه‌ند كه‌سێن وێ بيره‌وه‌ريێ ب رێڤه دبه‌ن، به‌لێ پاشان ژ به‌ر گڤاشتنا ژ لايێ خه‌لكى ڤه هاتنه ئازادكرن.
ئاسايشا كانتۆنا عه‌فرينێ ب تۆمه‌تا وه‌نه‌گرتنا ده‌ستووريێ ژ وان ئه‌ڤ كاره ئه‌نجام دابوو، پارتى ديموكراتى كوردستان – سوريا و هه‌ڤپه‌يمانێن وێ يێن ENKS ژى ژ به‌ر دان پێ نه‌دانێ ب وان كانتۆن د هه‌ر هه‌لكه‌فت و بيره‌وه‌ريه‌كا هه‌بيت دا داخوازا وه‌رگرتنا ده‌ستووريێ ناكه‌ن.
ژێده‌ر: رووداو
ئه‌ڤرۆ نيوز:
بۆ چاره‌كرنا ئه‌وێ كێشێن د وى وه‌لاتى دا هه‌ين، جۆن كيرى وه‌زيرێ ده‌رڤه‌يێ ئه‌مريكا داخواز ژ حوسيێن يه‌مه‌ن كر ب ڤه‌گه‌رنه سه‌ر مێزێن دانوستاندنێ.
كيرى د چارچۆڤێ كۆمبوونا جڤاتا ده‌ڤه‌را جه‌مسه‌رێ باكوور گۆت: “ب پێدڤى دزانين حوسى و ئه‌وێن كارتێكرن ل سه‌ر هه‌ين، ئاماده‌يى ئه‌نجامدانا دانوستاندنان ببن”.
گۆتژى: “نه‌ته‌وێن ئێكگرتى نوونه‌رێ تايبه‌تێ خوه ل يه‌مه‌ن ده‌ستنيشان كريه و پێ دچيت لايه‌نێن ل هه‌ڤ نه‌كرى جاره‌كا دى ئاماده‌يى دانوستاندنان ببن”.
هيڤى ژى خواست كو ره‌وش د چه‌ند رۆژێن بهێت دا ئارام ببيت و هه‌موو لايه‌نێن وى وه‌لاتى ل سه‌ر مێزا دانوستاندنان ببينيت بۆ چاره‌كرنا ره‌وشێ ل وى وه‌لاتى.
ئەڤرۆ نیوز،زنار توڤی:
ئەڤرۆ روژا ئەینی رێكه‌فتى 24ى نيسانا 2015ێ ڤیان دەخیل ئەنداما جڤاتا نوونه‌رێن عێراقێ ل سەر لیستا پارتی ديموكراتى كوردستان د ماوێ سەرەدانا خوه دا بۆ وەلاتێ ئەمریکا چاڤ ب هیلاری کلينتون دکەڤیت و د کومبونەکێ دا هەردویان بەحسێ ژیانا ئاوارەیان و رەوشا ئێزدیان کر.
هەروەسا د وێ کومبونێ دا بەحسێ وان کەسێن ئێزدی هاتەکرن یێن کو ماینە د دەستێ رێکحراوا تیرورستیا داعش دا و دیارکریە ژی کو دوێ کۆمبوونێ دا هیلاری کلينتون تەکەز ل سەر وێ چەندێ کر کو ئەو دێ هەمی هەولێن خوه بکارئینن کو ئەو کەسێن ژ دەستێ داعش رزگار بووین هاریکاریا وان بکەن و زێدەباری ئەو دێ کارکەن کو هاریکاریێن زێدەتر بگەهنە ئاوارەیان ل کوردستانێ.
ئه‌ڤرۆ نيوز:
ب نوونه‌راتيا مه‌سعود بارزانى سه‌رۆكێ هه‌رێما كوردستانێ و ب داخوازه‌كا فه‌رمى يا وه‌لاتێ توركيا، ئه‌ڤرۆ رۆژا ئه‌ينى رێكه‌فتى 24ى نيسانا 2015ێ نێچيرڤان بارزانى سه‌رۆكێ حوكمه‌تا هه‌رێما كوردستانێ و شانده‌كێ ل گه‌ل دا، ل گه‌ل سه‌رۆك و شاندێن فه‌رمى يێن 60 وه‌لاتێن جيهانێ و ب ئاماده‌بوونا ره‌جه‌ب ته‌يب ئه‌ردوگان سه‌رۆك كۆمارێ توركيا و ئه‌حمه‌د داود ئوغلۆ سه‌رۆكێ حوكمه‌تا وى وه‌لاتى و چه‌ندين به‌رپرسێن بلندێن ده‌وله‌تا توركيا و چه‌ند كه‌ساتيێن ناڤدار، رێوره‌سمێن بيرهاتنا شه‌رێ چه‌نه‌قه‌لادا ل باژێرێ سته‌مبۆلێ دا كر.
ئه‌ڤرۆ نیوز:
ئه‌ڤرۆ 100 سال ب سه‌ر كومه‌لكوژیا ئه‌رمه‌نان دا ده‌رباز دبن، به‌لێ توركیا هێشتا یا به‌رهه‌ڤ نینه دانپێدانێ ب وێ كومه‌لكوژیێ بكه‌ت كو ئه‌رمه‌ن ب خوه دبێژن، د كومه‌لكوژیێ دا ملیونه‌ك و نیڤ ئه‌رمه‌نى ژ ئالیێ توركیا ڤه هاتینه كوشتن.
ئه‌ڤرۆ ل سه‌رانسه‌رى جیهانێ، چه‌ند چالاكیه‌ك بۆ شه‌رمزاركرنا ڤێ كوشتارێ هاتنه ئه‌نجامدان.
نيشاندان