ئه‌ڤرۆ نیوز، ئه‌كره‌م ئیبراهیم:

ئه‌ڤرو پشتى نیڤرو 16-4-2015 فه‌رهاد ئه‌مین ئه‌تروشى پارێزگه‌رێ دهوكێ سه‌را ده‌ڤه‌رداریا سێمێلێ دا و ژلایێ مازن محمد سعید ده‌ڤه‌ردارێ سێمێلێ پێشوازى لێ هاته‌ كرن، درونشتنه‌كێدا به‌حسێ ره‌وشا ده‌ڤه‌رێ وقه‌ره‌بوكرنا جوتیار وخودان ملكێن وان كه‌تیه‌ به‌ر جهێ فروكخانا دهوكێ هاته‌ كرن.
پاش ل هولا ناڤه‌ندا لاوان ل سێمێلێ رێ ورسمێن قه‌ره‌بووكرنا جوتیار و خودان ملكا یێن ئه‌ردێ وان كه‌تیه‌ به‌ر فروكخانێ هاتنه‌ گێران .
پاش پارێزگه‌رێ دهوكێ په‌یڤه‌ك پێشكێشى ئاماده‌بویان كر وگوت: ئه‌ڤرو خوشحالین دگه‌ل جوتیار وخودان ملكا روونین وخوشحالین ئه‌ڤرو ئه‌وژى دێ گه‌هنه‌ مافێ خوه‌ و دێ هێنه‌ قه‌ره‌بوكرن و ته‌كه‌زكر كو ئه‌ركێ هه‌ر حكومه‌ته‌كێ یه‌ ل دوڤ یاسایان و راسپاردا خزمه‌تا پێشكێشى وه‌لاتیێن خو بكه‌ت.
پارێزگه‌رێ دهوكێ دیاركر كو فروكخانه‌ بو هه‌موو خه‌لكێ پارێزگه‌هێ زور زور یا گرنگه‌ ومفاى دێ گه‌هینیته‌ هه‌موو وه‌لاتییان وخواست هه‌موو خه‌لك ژى دهاریكاربن دا پروژه‌ بهێته‌ ئه‌نجامدان و ده‌ست خوشى ل لیژنێن كارى كر بو ئاماده‌كرنا پارچێن ئه‌ردى بو قه‌ره‌بوكرنێ.

ئه‌ڤرۆ نیوز، ناجی به‌ده‌ل:
فه‌رحان جه‌وهه‌ر قادر ئه‌ندامێ په‌رله‌مانێ كوردستانێ بو ئه‌ڤرۆ نیوز دیاركر ل ده‌مێ رۆنشتنا په‌رله‌مانی پێنگاڤه‌كا گرنگ هاته‌ هاڤێتن ل سه‌ر پرۆژێ یاسایا لیژنه‌یا ئاماده‌كرنا دستوری ب ته‌ڤایا ده‌نگان و ب رازیبونا هه‌مولایان په‌یڤا هه‌رێم كو پێشگرا كوردستان – عیراق هاته‌لادان داكو ل دمێ راپرسیێ رێگری و ئالوزی درۆست نه‌بن .
ناڤبری ئه‌و چه‌نده‌ ژی دیاركر كو ل دستوری عیراقێ یێ هه‌رتمی هاتیه‌ دیاركرن هه‌رێما كوردستانێ پشتی 19/3/2005 كو هه‌رسێ پارێزگه‌هێن دهۆك و هه‌ولێر و سلیمانی و ده‌ڤه‌رێن دی ب كێشه‌دار هاتینه‌ دانان و نه‌هاتینه‌ ئێكلایكرن، به‌لێ كوردستان بتنێ بێ هه‌رێم هه‌مو ئه‌وان ده‌ڤه‌ران بخوڤه‌دگریت ژ ده‌رڤه‌ی ئیدارا هه‌رێمێ ژی و دبیته‌ ئه‌گه‌ر بو به‌شداربونا وان ل سه‌ر راپرسیا دستورێ بهێت كو مافه‌كێ ره‌وایێ هه‌ر كورده‌كی یه‌ .
په‌رله‌مانتارێ ناڤبری ئه‌و چه‌نده‌ ژی دیاركر ئارمانج ژ لادانا په‌یڤا هه‌رێم د وێ پرۆژه‌ یاسایا لیژنه‌یا دستوری ژبوی ده‌ڤه‌رێن ده‌رڤه‌ی ئیدارا هه‌رێمێ ل ده‌مێ راپرسیێ بو ئه‌وی دستورێ به‌رهه‌ڤی بو دهێته‌ كرن به‌شداربن و رایا خو بده‌ن و هه‌مو سنورێ كوردستانێ بخوڤه‌ بگریت.
فه‌رحانی ئه‌و چه‌نده‌ ژی گوت: چ رێگری نامینن كو خه‌لكێ ده‌ڤه‌رێن كێشه‌دار مینا كه‌ركوك و شنگال و خانه‌قین و هه‌تا دوماهیكێ پشكداریێ د راپرسیا دستورێ بهێت دا بكه‌ن كو دێ بیته‌ دستورێ كوردستانێ.

ئه‌ڤرۆ نيوز:

سه‌رۆكێ هه‌رێما كوردستانێ نامه‌ك بۆ لايه‌نێن سياسى يێن هه‌رێما كوردستانێ ره‌وانه‌كرن كو ئه‌ڤێ ل خوارێ ژى ده‌قێ وێ نامێ يه‌:

رێزدار سەرۆکایەتیا په‌رلەمانێ کوردستانێ

سەرۆکایەتیا جڤاتا وەزیرێن حوکمەتا ھەرێما کوردستانێ

پارتی و ئالیێن سیاسیێن کوردستانێ

ده‌قێ ناما سه‌رۆك بارزانى بۆ لايه‌نێن سياسى

دوژمن و نەیارێن گەلێ کوردستانێ ھەموو رێ جەرباندن بۆ کو خەباتا گەلێ کوردستانێ ژ ناڤ ببه‌ن. ھەر ژ تۆقاندن و ئەنفال و جينوسایدێ بگرە ھەتا کیمیاباران و ئابلوقەدان و زیندان و ئينانا فتنە و دووبەرەکی و برینا دەرامەتێ خەلکى و هێرشێن تيرۆرستان، لێ بەلێ پشت ب خودایێ مەزن و ھیمەت و خوەراگریا گەلێ مە، کوردستان شيا ل سەر ھەموو پلان و دوژمنکاریان دا سەربکەڤيت و شکەستن و شەرمەزاری ژی ژ بۆ دژمنان مایە.

نھا گەلێ مە ژ ھەموو دەمەکی زێدەتر ل سەرکەفتن و دەستکەفتا مەزن و شکۆمەندی و حوورمەتیێ يێ نێزیکە. لێ بەلێ جھێ داخێ یە کو ژ بۆ دژایەتیکرنا گەلێ کوردستانێ ئاوایەکە نوو یا نە پاکیێ دەرکەفتیە کو ل رێیێن جوور ب جوور و ب داخویانی و نڤیسان پرۆپاگاندا و بانگەشە ژ بۆ شەرێ ناڤخوەیی و دووبەرەکی و ھەروه‌ھا زیندیکرنا ڤەقەتاندن و دوو ئیدارەیی یێ دکه‌ن. ئەڤە نە ئازاديا رادەربرینێ يە بەلکو ئەڤ جورە ھەولدان و خیانەتە ل گەل و نیشتمان و پیادەکرنا ئه‌جندا و سیاسەتا نەیارێن کوردستانێ. نابيت ب تو ئاوایەکی رێ بهێته‌ دان ئەڤ نێرینا نە نیشتیمانی ل کوردستانێ دا ھەبيت. ئەڤ بابەته‌ مەترسیە ل سەر ئاساییشا نەتەوەیی و نیشتیمانیا کوردستانێ و ھەموو ئەو دەستکەفتێن ب خوین و رۆندکان پێکھاتنە د بن ھەرەشە و تەھدیدان دا.

داخواز ژ په‌رلەمەنێ کوردستانێ و حوکمەتا ھەرێما کوردستانێ و داواکاریا گشتی دکه‌م ئەرکێ خوە راپەرێنن و رێوشووێنێن گونجاو ل دژی ڤان تەڤگەرێن نە نیشتیمانی و مەترسیدار ل بەر بگرن و چارەسەریەکا قانوونى و فەرمی ژ بۆ رێ گرتنا ل بەلاڤکرنا ڤان نێرینان پەیدا بکه‌ن کو ژیانا خەلکێ و ئێك پارچه‌يا نیشتیمان و بەختەوەریا وەلاتى دکە ته‌ ئارمانج و بانگەشەیا شەرێ ناڤخوەیی و دووئیدارەیێ دکه‌ن.

داخواز ژ ھەموو ئالیێن سیاسیێن کوردستانێ دکه‌م ب ھەموو شیانان ڤە رێگریێ ل دەرکەفتنا ڤان دەنگان و نێرینێن نە نیشتیمانی بگرن. داخواز ژی ژ جەماوەرێ سەربلندێ کوردستانێ دکه‌م کو ئێدی دەرفەتێ نەدن ئەڤ جورە خەلک و ئەڤ تەڤگەرێن دژی نیشتیمانی ل بەلاڤکرنا ھزرێن شەرێ ناڤخوەیی و دووبەرەکی بەردەوام ببن و ئەم ھەموو شیانێن خوە ژ بۆ پاراستنا کوردستانێ و یەکرێزیا گەلێ خوە ئێكبێخین.

مەسعود بارزانی
سەرۆکێ ھەرێما کوردستانێ
١٦-٠٤-٢٠١٥

ئەڤرۆ نیۆز، قائید میرۆ:

پشتی ل پەرلەمانێ کوردستانێ شەڕ کەفتیە ناڤبەرا دو پەرلەمانتارێن پارتی و پەرلەمانتارەکێ بزاڤا گۆڕان دا، پەرلەمانتارەکێ پارتی دبێژیت، وان حەسانە ھەیە و ھەتا نەھێتە راکرن ناچینە بەرامبەر دادگەھێ.
مەردان خدر، پەرلەمانتارێ پارتی دیموکراتی کوردستان بۆ ئەڤرۆ نیۆز دیارکر، وان ژی ل دادگەھێ سکالایەک ل سەر عەلی حەمە سالح پەرلەمانتارێ گۆڕان تۆمارکریە و ھەتا حەسانە ل سەر وان نەھێتە ھەلگرتن ناچنە ھەمبەر دادگەھێ.
مەردان گۆتژی: “بۆ ھەلگرتنا حەسانێ ل سەر پەرلەمانتاران، پێدڤیە دادگەهـ نڤیسارەکێ بدەتە سەرۆکایەتیا پەرلەمانی و پشتی ھنگی د کۆمبوونا پەرلەمانی دا پێخنه‌ به‌ر دەنگدانێ، کو ئایا پەرلەمان یێ رازی حەسانە ل سەر مە بھێتە وەرگرتن یانژی نە”.
پەرلەمانتارێ پارتی دیارکر ژى كو ئه‌و باوەر ناکەت کار بگەھتە وێ چەندێ حەسانە ل سەر ھەردو پەرلەمانتارێن پارتی نازم کەبیر و مەردان خدر بھێتە راكرن، چونکو دڤێت حەسانە ل سەر پەرلەمانتارێ گۆڕان ژی بھێتە راكرن.