ئەڤرۆ:
رێڤەبەرێ گشتی یێ باژێرڤانیان ل پارێزگەھا دھۆکێ دیار کر کو ل دووڤ بڕیارەکا وەزارەتێ سەرۆکێ باژێرڤانیا زاخۆ ھاتیە گوھۆڕین.
ئەندازیار ھەڤال ئەحمەد خویا کر کو بریارە ئەندازیار بژار زاخۆیی وەکو سەرۆکێ نوو یێ باژێرڤانیا زاخۆ ل شوونا ئەندازیار نادر قادر بھێتە دانان و بۆ رۆژناما ئەڤرۆ گۆت:(دھێتە چاڤەرێکرن رێورەسمێن گوھۆڕینێ ل حەفتیا بھێت بھێنە ئەنجامدان).
ئەڤرۆ:
ھێرشا ل سەر پارێزگەھا ئەنباری دەست پێکریە و فەرماندێ (فرقا) زێرین یا لەشکرێ عیراقێ دیار دکەت کو ئەڤە بۆ دەمێ چار رۆژانە ئاگر ل سەر سەرێ داعشێ دباریت،دیاکر ژی کو رۆلێ فرۆکێن ھەڤپەیمانان یێ بەرچاڤ و جھێ سوپاسیێ یە.
لیوا فازل بەرواری فەرماندێ فرقا زێرین یا لەشکرێ عیراقێ ئەوێ چەندێ دیار دکەت کو پتریا خەلکێ ئەنبار دەست یێ ل گەل تیرۆرێ ھەی و کونترۆلکرنا وێ یا ب ساناھێ نابیت و بۆ ئەڤرۆ گوت” ئەنبار دھێتە ھژمارتن چارێکا رووبەرێ عیراقێ و کونترۆلکرنا وێ نە یا ب ساناھیی یە کو ئەم بشێن بێژین دێ ل دەمەکێ کێم پاقژبیت”.
فەرماندێ فرقا زێرین ئەو چەندە دیارکر 90% ژ خەلکێ ئەنبار ل گەل تیرۆرێ نە و گوت” ژ کەڤن دا خەلکێ ئەنبارێ ل گەل قاعیدێ بوویە و نوکە ژی پتریا وان دەست یێ ل گەل رەوتێن توندرەو ھەی، بەلێ سەرەرایی وێ چەندێ ئەم چ ھزرەکێ بۆ ناکەین و دێ د بەردەوام بین ھەتا بگەھینە ئارمانجا خوە”.
فازل بەرواری ئاماژە ب وێ ئێکێ کر کو ئەنبار خێزان تێدانە ئەوژی رێگریەکە درێیا مەدا و گوت” ئەو خێزانێن دناڤا ئەنبارێ دا رێگرن د رێیا مەدا کو بشێن ب ھێزتر ئەرکێ خوە جێبەجێ بکەین و نە وەکو تکریتە، ئەڤ چەندە ژی دێ بیتە ئەگەر کو ل دەمەکێ نێزیک بھێـتە کونترۆلکرن”.
ناڤبری بەحس ل دەوروبەرێن ئەنبارێ کر کو پتر ژ ھزار خوەکوژان ھەنە و گوت” دەم پێ دڤێت ھەتا دەوروبەرێن ئەنبارێ بھێتە پاقژکرن، چونکی پتر ژ ھزار خوەکوژێن عەرەب یێن تێدا، ئانکو نە عیراقی ژبەر وێ چەندێ دێ یا ب زەحمەت بیت”.
بەرواری دیار دکەت کو جەزیرا ئەنبارێ ل بەر داعشێ یا ڤەکریە و گوت” داعش ھێزێن پشتەڤانیێ د رێیا جەزیرێ ڕا دگەھنێ، چونکی جەزیرا ئەنبارێ ل بەر وان یا ڤەکریە، لێ رۆلێ فرۆکێن ھەڤپەیمانان ناھێتە ژبیرکرن کو گولەک ب دژواری توپبارانا وان دکەن”.
فەرماندێ فرقا زێرین ئەو چەندە دیارکر کو ھەڤکاریەکا باش دناڤبەرا وان و پێشمەرگەیی دا یا ھەی و گوت” ھێزێن عیراقی و پێشمەرگێ کوردستانێ ھەڤکاریەکا باش ل گەل ئێک یا ھەی ل سەر ئاستێ ھەردو وزارەتان و ئەڤ چەندە ژی دبیتە رێخوەشکەر بۆ ئەرکێ مە”.
ئەو چەندە راگەھاند کو ھەر بریارەکا سەرۆکێ ھەرێما کوردستانێ بدەت ئەو یێ بەرھەڤە جێبەجێ بکەت و گوت” مزگینیێ ددەم پشتی رومادی پاقژ دبیت دێ بەرێ چەکێن خوە دەینە مووسلێ و گوتنا سەرۆکی بجە ئینم ل دەمێ گوتیە ئاوارێن مووسلێ (دێ ھەوە زڤرینینە ل سەر مال و مولکێن ھەوە.
ئه‌ڤرۆ نیوز:
ئه‌حمه‌د زاویتى به‌رپرسێ نڤیسینگه‌ها كه‌نالێ ئه‌لجه‌زیره ل هه‌ولێرێ د په‌یجێ خوه یێ فێسبوكێ ئاماژه ب وێ یه‌كێ كریه كو ئه‌ڤرۆ رۆژا سێشه‌مبى 14-4-2015 ل ده‌مژمێر 6 و 5 ده‌قیقه یێ ئێڤارێ دێ دیدارا ل گه‌ل سه‌رۆك بارزانى ئه‌نجامداى هێته به‌لاڤكرن، كو سه‌رۆك بارزانى روناهى به‌ردایه سه‌ر دووماهى پێشهاتێن ده‌ڤه‌رێ و پاشه‌رۆژا گه‌لێ كوردستانێ و ئاریشێن كوردان ل گه‌ل به‌غدا و شه‌رێ مووسل و گه‌له‌ك پرسێن دن یێن گرنگ.
ئه‌ڤرۆ نیوز:
د.شرین كوچه‌ر بریارده‌را لژنا ساخله‌میێ ل په‌رله‌مانێ كوردستانێ بۆ ئه‌ڤرۆ نیوز دیاركر پشتى ئه‌و ل دوشه‌مبیا بورى ل گه‌ل سه‌ندیكایێن ( نوشدار، نوشداریا ددان، ده‌رمان، بایولوجى، كیمیا، ساخله‌مبى) كومبووین، ئه‌ڤرۆ ئه‌و گه‌هشتنه ڤان ئه‌نجامان ل دۆر ئه‌رزانكرنا پلێتێن نوشدارا، نشه‌رگه‌رى، پشكنین، كارمه‌ندێن ساخله‌میێ.
نوشدار: کێمکرن ب رێژا (٢٠-٤٠)% ژ نرخێ نوکە
پزیشکا ددان، پشکنین، کارمەندێن تەندۆرستی : كێمكرن ب رێژا ٢٠% ژ نرخێ نوکە و دەرمان ل دەسپێکا مەھا ٦ دێ ئێنە رێکخستن و نرخێ وان دێ ئێته کێمکرن.
ئه‌ڤرۆ نیوز:
د سالڤه‌گه‌را هه‌وا ئه‌نفالان دا كو به‌رى 27 سالان حوكمه‌تا وى سه‌رده‌مى یا عیراقێ ده‌ست ب هه‌وا ئه‌نفالكرنا كوردان كربوو، حوكمه‌تا هه‌رێما كوردستانێ په‌یامه‌ك به‌لاڤكریه و تێدا هاتیه: ئارمانج ژ ڤێ هه‌وێ ژناڤبرنا ناسناما نه‌ته‌وه‌یى یا ملله‌تێ مه بوویه كو ب هزاران گوند وێرانكرن و زێده‌تر ژ 182000 وه‌لاتیێن بێ گونه‌هـ ، بووینه قوربانى و شه‌هید بوون.
د په‌یامێ دا هاتیه: ئه‌ركێ نیشتیمانى و قانوونى و ئه‌خلاقى یێ حوكمه‌تا عیراقێ یه كو قه‌ره‌بوونا مادى و مه‌عنه‌وى یا رزگاربوویان و كه‌س و كارێن قوربانیێن ئه‌نفالان بكه‌ت.
ئه‌ڤرۆ نیوز:
ب ده‌نگێن 77 په‌رله‌مانتاران، پرۆژه قانوونا به‌رهه‌ڤكرنا دستوورێ هه‌رێما كوردستان – عیراق بۆ راپرسیێ ل په‌رله‌مانێ كوردستانێ هاته په‌سه‌ندكرن، هه‌روه‌سا په‌رله‌مانى بریارا دروستكرنا لژنه‌یه‌كێ بۆ به‌رهه‌ڤكرنا دستوورى ده‌رخست.
پرۆژه قانوونا به‌رهه‌ڤكرنا دستوورێ هه‌رێما كوردستانێ بۆ راپرسیێ يا كو ل په‌رله‌مانى هاتيه په‌سه‌ندكرن پێدڤیه د 90 رۆژان دا، بهێته به‌رهه‌ڤكرن.و بزڤریته په‌رله‌مانى بۆ دووباره ده‌نگدانێ و پێدڤى دو ل سه‌ر سێ یا ده‌نگێن ئه‌ندامێن په‌رله‌مانى هه‌یه بۆ ده‌ربازكرنێ، هه‌ڤده‌م لژنه‌كا 21 كه‌سێ دێ هێته پێكئینان ژ ئه‌ندامێن په‌رله‌مانى و كه‌سێن شاره‌زا و قانوونى.
ئه‌ڤرۆ نیوز:
سەروکاتیا باژێرڤانیا دهوکێ، د په‌یجێ خوه یێ فێسبوكێ دا، چه‌ند وێنێن كاركرنێ د پرۆژێ ئه‌نده‌رپاسا كوردستان ( یا به‌رنیاس ب ده‌ورا هه‌سپا) به‌لاڤكرینه.
سه‌رپه‌رشتیارێ پروژه‌ی ئه‌ندازیار (نه‌مر حسامه‌دین) دیاركریه كو كارێ پروژێ ئه‌نده‌رپاسا كوردستان یا به‌رده‌وامه داكو ل ده‌مێ دیاركری دا ئه‌ڤ پروژێ ستراتیژی بهێته ئه‌نجامدان و بكه‌ڤته دخزمه‌تا باژێری دا و گۆت: ئه‌ڤرو ٢٠١٥/٤/١٣ به‌رده‌وام كار د چێكرنا برگێن پروژێ ئه‌نده‌رپاسا كوردستان دهاته كرن، پشتی به‌لێنده‌رێ نوی ده‌ستبكار بۆی و ماوه‌یه‌كێ دی ئه‌وژی (٧٥) رۆژێن كاری پێ هاتینه دان ژبۆ پروژه‌ی كو ب دووماهى بهێت و كوژمێ پروژه‌ی ١٠ ملیار و٣٠٠ ملیون دینارن و رێژا كاری نوكه ٧٥% ژێ هاتیه ئه‌نجامدان و نوكه گه‌هشتیه قوناغا دانانا گێرده‌را و ب ئه‌نجامدانا ڤی برگێ ژی دێ پروژه قوناغه‌كا باش بریت.
ئه‌ڤرۆ نیوز، ناجی به‌ده‌ل:
ئازاد عادل ماموستایێ زانكویا نه‌ورۆز و بسپور د بیاڤێ ئه‌مریكا دا بو ئه‌ڤرۆ نیوز دیاركر به‌ریا سه‌رۆك وه‌زیرێ عیراقێ سه‌ره‌دانا ئه‌مریكا بكه‌ت سه‌ره‌دانا هه‌مو لایه‌نین سیاسی یێن عیراقی ب تایبه‌تی هه‌رێما كوردستانێ كر كو گرانی و كاریگه‌ریا خو ل سه‌ر هه‌ڤسه‌نگیا شه‌ری ل دژی داعشێ و سیاسه‌تا نێڤ ده‌وله‌تی هه‌یه، ژبوی هه‌رێم قایل بیت ل گه‌ل وان به‌شداریا شه‌رێ موسلێ بكه‌ت داكو بكه‌ته سه‌ركه‌فتنه‌ك بو خوه ده‌ما سه‌ره‌دانا ئه‌مریكا بكه‌ت.
ماموستا یێ ناڤبری ئه‌و چه‌نده ژی دیاركر ئه‌مریكا گه‌هشتیه ئه‌وێ باوه‌ریێ كو هێزا سه‌ره‌كی و راسته‌قینه ل دژی داعشێ و ل عیراقێ كوردن و كاریگه‌ریا هه‌رێما كوردستانێ و هێزا پێشمه‌رگه‌ی ل سه‌ر ئاستێ نێڤ ده‌وله‌تی له‌ورا ئه‌مریكا هه‌رده‌م ل گه‌ل حكومه‌تا عیراقێ ته‌ئكیدی ل سه‌ر پشته‌ڤانیكرن و هاریكاریكرنا هێزا پێشمه‌رگه‌ی دكه‌ت.
ئازاد عادل ئه‌و چه‌نده ژی گوت: حكومه‌تا عیراقێ داخازا به‌شداریبونا هه‌رێمێ ل شه‌رێ رزگاركرنا موسلی دكر به‌س هه‌رێم نه یا به‌رهه‌ڤ بو به‌لێ پشتی سه‌ره‌دانا حه‌یده‌ر عه‌بادی كو ب سه‌ره‌دانه‌كا سیاسی و سه‌ربازی و خوشكرنا په‌یوه‌ندیێن به‌غدا و هه‌رێمێ دهێته هژمارتن، .
ماموستایی ناڤبری ئه‌و چه‌نده ژی دیاركر كو چونا حه‌یده‌ر عه‌بادی و داخوازكرنا وی بو ئه‌مریكا ژبوی دانوستاندنێ یه ل سه‌ر ره‌وشا ناڤخویا عیراقێ و پرسا به‌رهنگاربونا داعشێ و چه‌وانیا په‌یوه‌ندیێن ناڤه‌ندی ل گه‌ل هه‌رێمێ و هه‌مو ته‌خ و چینێن دی یێن عیراقێ ل چ ئاستدایه و چه‌وا باشتر لێ بكه‌ن و ئارامی بو عیراقێ ڤه‌گه‌ریت .
ئه‌ڤرۆ نیوز:
ب فه‌رمانا سه‌رۆك وه‌زیرێن عیراقێ حه‌یده‌ر عه‌بادى، لیوا نه‌جم جبوورى وه‌ك فه‌رماندێ ئوپه‌راسیونێن نه‌ینه‌وا هاته دامه‌زراندن.
نه‌جم جبوورى فه‌رماندێ نوو یێ ئوپه‌راسیونێن نه‌ینه‌وا ب ئاژانسا ئه‌نادول یا توركى راگه‌هاندیه: شڤێدى دره‌نگ پشتى من دیداره‌ك ل گه‌ل سه‌رۆك وه‌زیرێن عیراقێ ئه‌نجامداى، پاشى ئه‌ز هاتمه ئاگه‌هداركرن كو وه‌ك فه‌رماندێ فه‌رمانده‌یا ئوپه‌راسیونێن نه‌ینه‌وا دێ ده‌ست ب كاربم.
ئه‌ڤرۆ نیوز:
عه‌بدولوه‌هاب ساعدى فه‌رماندێ ئوپه‌راسیونێن پارێزگه‌ها سه‌لاحه‌دین ئه‌ڤرۆ راگه‌هاند كو هێزێن ئێمناهیێ یێن عیراقى شیان پارزینگه‌ها بێجى كونترول بكه‌نه‌ڤه.
عه‌بدولوه‌هاب ساعدى ئاماژه ب وێ یه‌كێ كر كو د روى ب روى بوونا ل گه‌ل چه‌كدارێن داعش، چه‌ندین چه‌كدارێن وان هاتینه كوشتن و ل پارزینگه‌هێ هاتنه دوورخستن.
دوهى چه‌كدارێن داعش ژ سێ ئالیان ڤه هێرش كربوونه سه‌ر پارزینگه‌ها بێجى و شیابوون پشكه‌كا وێ پارزینگه‌هێ كونترول بكه‌ن.
پارزینگه‌ها بێجى مه‌زنترین پارزینگه‌هه ل عیراقێ و دكه‌ڤیته پارێزگه‌ها سه‌لاحه‌دین.
نيشاندان