ئەڤرۆ:
ئۆجەلان ل گەل شاندنا نامەیان بۆ سەرۆکێ ھەرێما کوردستانێ، سکرتێرێ ئێکەتیی نیشتمانی کوردستان و سەرۆکێ حوکمەتا ھەرێما کوردستانێ نامەیەک ژی بۆ قەندیلێ شاندیە و ھەروەسا ژ ئالیێ حوکمەتا تورکیا ڤە ژی نامەیەک تایبەت بۆ دەستەیا سەرۆکاتیا KCK ھاتیە شاندن و لەیلا زانا و سڕی سورەیا ئۆندەر ناما حوکمەتێ گەھاندینە قەندیلێ و دھێتە چاڤەرێکرن قەندیل ژی ب رێیا نامەکی بەرسڤا حوکمەتێ بدەت.
شاندێ پارتا دیمۆکراسیا گەلان HDP نە ب تنێ بۆ سەرۆک و سەرکردەیێن ھەرێما کوردستانێ ناما عەبدوللا ئۆجەلان سەرۆکێ PKK ئیناینە بەلکو دو نامێن تایبەت ژی بۆ قەندیلێ ئیناینە و یەک ژ وان ژ ئالیێ ئۆجەلان و یا دی ژی ژ ئالیێ حوکمەتا تورکیا ڤە ھاتیە نڤیساندن.
ل دووڤ زانیاریێن کو کەڤتنە دەستێ رۆژناما ئەڤرۆ د ناما ئۆجەلانی دا ژ سەرکردەیێن KCK ھاتیە خواستن کو ھەتا ھەفتێ حزیرانێ واتە ھەتا دەمێ ئەنجامدانا ھەلبژارتنێن پەرلەمانێ تورکیا ل دژی حوکمەتێ داخۆیانیێن توند نەدەنە رایا گشتی و د ناڤا خوە دا قۆناغا ھەلبژارتنان و ھەردو ئەگەرێن ئەنجامێن ھەلبژارتنان ژی ژ نھا ڤە گەنگەشە بکەن و سیاسەتا خوە بۆ ھەردو ئەنجامان ژی ئامادە بکەن.
ئۆجەلان د پشکەکا دی یا ناما خوە دا ژی داخواز ژ سەرکردەیێن KCK دکەت کو بەرھەڤیێن مەزن بۆ شەرێ ل دژی داعشێ بکەن و ھەکە پێدڤی کر ل گەل ھێزێن نێڤدەولەتی و یێن کوردستانی ھەڤپەیمانیان دروست بکەن و ھێزا ل رۆژئاڤا بگەھیننە ئاستا ھەری بلند، دیسان ل دووڤ زانیاریان حوکمەتا تورکیا ژی د ناما خوە دا داخواز ژ قەندیلێ دکەت کو رۆژا سازکرنا کۆنگرێ و دەست بەردانا ژ چەکی ئاشکرا بکەت و بۆ سەرکەڤتنا قۆناغا ئاشتیێ دژاتیا حوکمەتێ نەکەن و داخۆیانیێن ل دژی سیستەمێ سەرۆکاتیێ نەدەن، د پشکەکا دی یا نامێ دا ژی قەندیلێ دلنیا دکەن کو ئەو دێ پێنگاڤێن پێدڤی بۆ سەرخستنا قۆناغا ئاشتیێ ب ھاڤێژن لێ دڤێت ھندەک سەبرێ بکەن و چاڤەرێی ئەنجامدانا ھەلبژارتنان بمینن و دیار ژی کرینە ئەو د بجھکرنا ١٠ خالێن کو ئۆجەلان داخواز کرینە رژدن.
ل ئالیێ دی دوران کالکان ئەندامێ کۆنسەیا سەرۆکاتیا KCK ژی راگەھاند کو ئالیێ کوردی ژ ئیمرالی ھەتا HDP بۆ سەرخستنا قۆناغا ئاشتیێ گەلەک فیداکاری کرینە و ئەو وەک KCK ژی ئامادەنە داخوازێن سەرۆکێ خوە بجە بکەن و گۆت: (سۆزێن کو حوکمەتا تورکیا ب رێیا نوونەرێن خوە داینە ئوجەلانی ھەتا نھا بجە نەکرینە و سەرۆک کۆمار و جێگرێ سەرۆکێ حوکمەتا تورکیا ب داخۆیانیێن خوە یێن توند ئالۆزی د قۆناغا ئاشتیێ دا دروست دکەن و ھەر ئاخڤتن و بزاڤێن وان ل دژی قۆناغا ئاشتیێ نە و ئەو پتر ژ ھەیڤەکێ یە سۆزا دەستپێکرنا دانوستاندنان داینە لێ ئەو ژی ھەتا نھا بێی ئنجام مایە و دڤێت حوکمەتا تورکیا خوە زەلال بکەت و د دەستپێکێ دا سۆزێ کو دایە بجە بکەت و پاشی ژ مە داخوازا چەک دانینێ بکەت).
جەنگیز چاندار رۆژنامەڤان و زانایێ سیاسەتا تورکیا و رۆژھەلاتا ناڤین ژی د دەربارێ قۆناغا ئاشتیێ دا راگەھاند کو حوکمەتا تورکیا قۆناغا ئاشتیێ بۆ سەرکەڤتنا د ھەلبژارتنێن پەرلەمانێ دا بکار دھینیت و گۆت: (دلسۆزیا حوکمەتێ دێ پشتی ھەلبژارتنان دەرکەڤیتە ھۆلێ و ل دووڤ رەوشا نھا و داخۆیانیێن سەرۆک کۆمار و بەرپرسێن حوکمەتێ ھەتا ئەنجامدانا ھەلبژارتنان ئەز چاڤەرێی چو پێنگاڤەکی ژ ئالیێ حوکمەتێ ناکەم و ئالیێ کوردی ژی د رەوشا نھا یا رۆژھەلاتا ناڤین نە بەرھەڤە دەستان ژ چەکی بەردەت).