ئەڤرۆ نیوز:
پشتی ھەلبژارتنێن ٧ حزیرانێ کو چار پارتێن سیاسی ل تورکیا شیان بچنە پەرلەمانی و ئێک ژ وان ژی پارتیا دیموکراسیا گەلان HDP بوو کو شیا ١٣% دەنگان بدەستڤە بینیت، پشتی ئەنجامێ ھەلبژارتنان ھەڤسەرۆکێ وی پارتیێ سەلاحەدین دەمیرتاش راگەھاندبوو کو ئەو د ناڤ حوکمەتێ دا جە ناگرن و پشتی دەمیرتاشی گەلەک سەرکردێن وێ پارتیێ دیار کرن ئەو پشتەڤانیێ ل حوکمەتەکێ دا دکەن کو ئاکپارتی تێدا نەبیت.
ل ھەمبەر وێ یەکێ دوھی سەرۆکێ گشتیێ پارتیا بزاڤا نەتەوەپەرست ل تورکیا دەولەت باخچەلی راگەھاند کو مە چو دەمەکێ دانپێدان ب ھەبوونا پارتیەکێ ب ناڤێ HDP نەکریە و رەنگە نھا ئەو ھاتینە پەرلەمانی ژی، بەس ئەم دیسان چو حسابەکێ بۆ وان ناکەین و ھەر کابینەک کو بھێتە ئاڤاکرن ژی دڤێت HDP تێدا نەبیت، چونکو ئەو لقێ رێکخراوەکا تیرۆرستی نە کو ب سالان شەرێ تورکیا کرینە و ئەڤرۆکە ئەم چو دانوستاندنەکێ ژی ل گەل وان ناکەین و گۆت: (ئاکپارتی ھەکە بڤێت ھەڤپەیمانیێ ل گەل مە دروست بکەت دڤێت داخوازیێن مە بدەتە بەرچاڤ و بەری ھەر تشتەکێ ژی دڤێت قۆناغا ئاشتیێ کو ئەم وەک قۆناغا خیانەتێ ل قەلەم ددەین بدەتە راگرتن و رێزێ ل ئیرادا خەلکێ تورکیا بگریت، چونکو پرسا کوردی ل تورکیا نینە و پرسا تیرۆرێ ھەیە و پرسا تیرۆرێ ژی دێ ب رێیێن سەربازی ھێتە چارەکرن).
ل ئالیێ دی نومان کورتولموش جێگرێ سەرۆک وەزیرێن تورکیا یێ سەر ب ئاکپارتی ژی راگەھاند کو ئەنجامێ ھەلبژارتنان نیشا ددەت کو چو چارە نینن و دڤێت حوکمەتەکا ھەڤپەیمانی بھێتە ئاڤاکرن، لێ HDP ھێشتا چو نەبوویی ھەموو دەرگەە گرتن و ئەو یەک ژی نیشا ددەت کو وان نەڤێت خزمەتا تورکیا بکەن، یان ژی ئەو دترسن کو دەستورێن ژ قەندیلێ بۆ وان دھێن نەشێن بجە بکەن و ژ بەر ھندێ ژی ھەلویستەک وەسا زوو نیشا دان و گۆت: (مە ژی نەڤێت ل گەل وێ پارتیێ چو ھەڤپەیمانیەکێ بکەین، چونکو ھەرچەندە ئەو خوە ب پارتیەکا تورکیا دزانن لێ بۆ ھەموو خەلکێ تورکیا ئاشکرایە کا HDP چاوا و ب دەستوریا کێ و بۆچی ھاتیە ئاڤاکرن و ھەتا نھا ژی ژ بلی دروست کرنا ئالۆزیان وێ پارتیێ چو تشتەکا باش بۆ تورکیا نەکریە و HDP ھەکە بڤێت د ناڤ ھەڤپەیمانیەکێ دا جە بگریت دڤێت بەری ھەر تشتەکێ دەستان ژ گۆتارا خوە یا دژوار بەردەت و خزمەتا تورکیا بکەت، لێ د بەرنامێ وێ پارتیێ دا ئەو یەک نینە و ژ بەر ھندێ ژی ئەم دێ ل گەل دو پارتێن دی بزاڤێ کەین کو ھەڤپەیمانەکێ بکەین و د بەرنامێ مە دا چو دانوستاندنەک بۆ ھەڤپەیمانیێ ل گەل HDP نینە).
ل ئالیێ دی بەری نھا جێگرێ سەرۆکێ پارتیا کۆماری دیار کربوو کو ئەو بەرھەڤن ل گەل پارتیا بزاڤا نەتەوەپەرست و HDP ھەڤپەیمانیێ بکەن، لێ پاشی پرانیا سەرکردە و رێڤەبەرێن وێ پارتیی دژبەریا خوە ل ھەمبەر وێ یەکێ دیار کرن و راگەھاندن کو نابیت چو ھەڤپەیمانیەک ل گەل HDP بھێتە کرن، دوھی ژی سەرۆکێ وێ پارتیێ کەمال کلچدار ئوگلۆ خوە ب ئەسلێ خوە کوردە د داخۆیانیەکێ دا راگەھاند کو بەرنامێ مە و HDP گەلەک ژ ھەڤدو د دوورن و ژ بەر ھندێ زەحمەتە ئەم بشێین ھەڤپەیمانیێ ل گەل وێ پارتیێ بکەین و گۆت: (بەس مە دەریێ خوە بۆ چو پارتیەکێ دانەخستیە و مەرەما مە ئەوە ئەم بشێین خزمەتا تورکیا بکەین و دڤێت د دەمەکێ نێزیک دا ژی حوکمەتەکا ھەڤپەیمانی بھێتە ئاڤاکرن).
چاڤدێرێن سیاسی دیار دکەن کو داخۆیانیێن بەرپرسێن HDP پشتی ھەلبژارتنان شاش بوون و پێدڤی بوو وان گۆتارا خوە دابا گوھۆرین، چونکو ھەکە HDP د ناڤ حوکمەتا نوو دا جھێ خوە بگریت ئەو یەک دێ بۆ چارەکرنا پرسا کوردی پێنگاڤەکا مەزن بیت و ھەکە HDP ل سەر سیاسەتا خوە یا نھا بەردەوام بیت رەنگە رێژا دەنگێن وێ د ھەلبژارتنێن داھاتی دا کێم ببیت.
نيشاندان