ئەڤرۆ:
پارێزگەرێ دھۆکێ فەرھاد ئەترووشی دوھی ٦ی نیسانا ٢٠١٥ێ سەرا مەلبەندێ چار یێ ئێکەتیا نیشتمانی کوردستان کر، ژ لایێ ھەرێم کمال ئاغا بەرپرسێ مەلبەندی و کارگێر و ئەندامێن مەلبەندی پێشوازی لێ ھاتە کرن.
د ھەڤدیتنەکێ دا بەحسێ پێکئینانا حوکمەتا خوە جھی و رەوشا دەڤەرێ و رەوشا ئاواران ل پارێزگەھێ و ئەو خزمەتا بۆ دھێتە پێشکێش کرن و رەوشا دەڤەرێن نوو ھاتینە رزگار کرن و ھەڤکاریا د ناڤبەرا سازیێن حوکمەتێ و حزبێن سیاسی ل دەڤەرێ ژ بۆ باشتر خزمەتکرنا وەلاتیان ھاتە کرن.
ل دۆر سەرەدانێ پارێزگەرێ دھۆکێ گۆت مە بەرنامە ھەیە سەرەدانا ھەموو لایەنێن سیاسی بکەین بەلێ ژ بەر ئەو قەیرانێن ھاتین ئەو دەلیڤە چێنەبوو، ئەڤرۆ ئەو دەلیڤە ھات، وەکو بریار و پرەنسیپ، بریار ھاتیە دان کو حوکمەتا ھەرێمێ حوکمەتەکا بنکە فراوان بیت ھەروەسا حوکمەتێن خوەجھی ژی بنکە فراوان بن و ھەموو لایەنێن سیاسی ل دووڤ ئستیحقاقێ ھەلبژارتنان و رێکەفتنێن سیاسی پشکداربن، ئەڤ بابەتە بھێتە ئێکلا کرن، پارتی دیموکراتی کوردستان و حوکمەتا ھەرێمێ بریار دایە بابەت بھێتە ئێکلا کرن و ئەڤە دێ مینیت کا لایەنێن سیاسی چەند دێ ھێنە پێش چ داخوازی و پێشنیاز ھەنە ب تایبەتی ئێکەتی نیشتمانی کوردستان و ئێکگرتو و گۆران کا چاوا دێ ھێنە پێش و ئەم ژی ل دوڤ ئستیحاقێ ھەلبژارتنان دێ سەرەدەریێ ل گەل کەین.
بەرپرسێ مەلبەندێ چار یێ ئێکەتی نشتیمانی گۆت مە وەکو ئێکەتی نشتیمانی کوردستان ب ئەرکێ خوە زانیە ھەماھەنگی و ھاریکاریێ دگەل پارێزگەھێ بکەین بۆ ھندێ کاک فەرھاد د کارێ خوە دا یێ سەرکەفتی بیت ھەروەسا ھەموو یەکەیێن دی یێن ئیداری، چونکو ئەڤە ئەرکێ مە ھەموویانە، ل دۆر حوکمەتا خوە جھی گۆت ئەڤە ڤەدگەریت بۆ لایەنێن سیاسی و ئەڤە کارەکێ باشە و دێ بیتە ھوکار و پشتەڤانیەکا باش و ب ھێز بۆ حوکمەتا بنکە فراوان و دێ بیتە دادپەروەریەکا جڤاکی و ئیداری یا سەقامگیر و ھەموو بشێین ل دووڤ ئیستحقاقا ھەلبژارتنان پشکداریێ د حوکمەتێن خوە جھی دا ل ھەموو پارێزگەھێن ھەرێمێ بکەین.

 ئه‌ڤرۆ نیۆز، قائید میرۆ

به‌رپرسه‌كێ پارتی دیموكراتی كوردستان ل میحوه‌رێ خازر رادگه‌هینیت، گروپا تیرۆرستیا داعش دخوازیت تولا خوه‌ ڤه‌كه‌ت. حه‌بیب كاكه‌یی، به‌رپرسێ لیژنا ناوچا خازر یا پارتی بۆ ئه‌ڤرۆ نیۆز دیاركر” ل هێرشا شه‌ڤا دى یا داعش، بۆ سه‌ر میحوه‌رێ خازر، پێشمه‌رگه‌ و كادرێن پارتی رۆله‌كێ سه‌ره‌كی هه‌بوو د هێرشێ دا و شیان ئه‌ڤێ هێرشا مه‌زن بشكێنیت و 28 تیرۆرستێن داعش بكوژن. كاكه‌یی گۆتژی” دڤێ هێرشێ دا 163 ێ چه‌كدارێن داعش پشكداریكربوو، نوكه‌ هنده‌ك چه‌كدارێن وان یێن ره‌ڤین ده‌سته‌سه‌ركرینه‌ و چه‌كدارێن خوه‌كوژ به‌رهه‌ڤكرینه‌ كو جاره‌كا دی تولا خوه‌ ڤه‌كه‌ن، به‌لێ ئه‌م به‌رهه‌ڤین بۆ به‌رسڤدانا هه‌ر هێرشه‌كێ”.

ئەڤرۆنیۆز، قائید میرۆ:
شەڤا بۆری ل کۆمەلگەھا خانکێ یا سەر ب پارێزگەھا دھۆکێ ڤه‌، ئەندامەکێ جڤاتا ناڤەندیا ئێکەتیێ و فەرماندێ ھێزا پاراستنا شنگالێ ھاتنە رەڤاندن و بەرپرسەکێ ئێکەتیێ ژی دبێژیت: “ئەم ل سەر خەتين د گەل ئاسایشا دھۆکێ”.

غەیاس سورچی، پەیڤدارێ مەلبەندێ ئێکەتی نیشتیمانی کوردستان ل نەینەوا بۆ ئەڤرۆ نیۆز گۆت: “دەمژمێر نەھی شەڤا بۆری ل کۆمەلگەھا خانکێ ژ لایێ ھێزەکا ئەمنی ڤە حەیدەر شەشۆ ئەندامێ جڤاتا ناڤەندیا ئێکەتیێ و فەرماندێ ھێزێن پاراستنا شنگالێ بريه‌ جھەکێ نەدیار، بەلێ ھێشتا ئەم پشتڕاست نینين ئەف ھێزە کی بوویە و بۆ کیرێ ھاتیە ره‌وانه‌كرن”.

غەیاس گۆتژی: “نوکە ئەم یێ ل سەر خەت د گەل دەزگەھێن ئەمنی و ئاسایشا پارێزگەھا دھۆکێ، چونکو هه‌كه‌ وان ئەف کارە کربیت، جھێ قەبوولکرنێ نینە و ھەڤال حەیدەر شەشۆ ئەندامێ جڤاتا ناوەندیا ئێکەتیێ یە و دڤێت ھەماھەنگی ھاتبا کرن بۆ ھەر روویدانەکا ب ڤی ره‌نگى”.

ئه‌ڤرۆ نيوز:

پشتى سه‌رۆكاتيا په‌رله‌مانێ كوردستانێ ل گه‌ل هه‌ر ئێك ژ سه‌رۆكێ هه‌رێما كوردستانێ و يه‌كگرتوو ئيسلامى كوردستان كۆمبووين، نوكه‌ سه‌رۆكاتيا په‌رله‌مانێ كوردستانێ ل گه‌ل ئه‌ميرێ كۆمه‌لا ئيسلامى و مه‌كته‌با وێ يا سياسى كۆمبوونه‌ك ئه‌نجام دا و پاشان ژى كۆنگره‌كێ رۆژنامه‌ڤانى ئه‌نجام دا.

شاندێ سه‌رۆكاتيا په‌رله‌مانى يێ پێكهاتى يه‌ ژ سه‌رۆكێ په‌رله‌مانێ كوردستانێ يوسف محه‌مه‌د و جێگرێ سه‌رۆكێ په‌رله‌مانى جه‌عفه‌ر ئيبراهيم و سكرتێرێ په‌رله‌مانى فه‌خره‌دين قادر، سه‌ره‌دانا باره‌گايێ يه‌كگرتوو ئيسلامى كوردستان كر.

مه‌ره‌م ژ سه‌ره‌دانا وان بۆ لايێ ئه‌ميرێ كۆمه‌لا ئيسلامى د چارچۆڤێ وان سه‌ره‌دانان دايه‌ يێن بۆ لايه‌نێن سياسى ل دۆر راستڤه‌كرنا دستوورى و درێژكرنا ماوێ ويلايه‌تا سه‌رۆكێ هه‌رێما كوردستانێ مه‌سعود بارزانى بوو هه‌ر وه‌كو سه‌رۆكێ په‌رله‌مانى ژى د كۆنگرێ رۆژنامه‌ڤانى دا به‌حس لێكرى.

عه‌لى باپير د كۆنگره‌كێ رۆژنامه‌ڤانى دا ل دۆر ڤێ پرسێ ئاماژه‌ دا وێ چه‌ندێ كو ئه‌وان بۆچوونا په‌رله‌مانى وه‌رگرت و دێ ل سه‌ر روونن و پاشان ژى به‌رسڤه‌كێ ده‌نه‌ سه‌رۆكاتيا په‌رله‌مانى.

سه‌رۆكێ په‌رله‌مانى ژى دا زانين كو بۆچوونا كۆمه‌لا ئيسلامى و يه‌كگرتوو ئيسلامى كوردستان يا نێزيك ئێك بوو.

ل دۆر پشكداريكرنا د شه‌رێ ئازادكرنا مووسل دا، ئه‌ميرێ كۆمه‌لا ئيسلامى دا زانين كو ئه‌و ل گه‌ل وێ چه‌ندێ نينه‌ كو كورد پشكدارى شه‌رێ ئازادكرنا مووس دا بكه‌ت، به‌لێ هه‌كه‌ هات و پشكدارى كر ژى دڤێت ل گۆر هنده‌ك داخوازى و هنده‌ك رێكه‌فتنێن گرنگ بيت.

ئەڤرۆ:
بریارە پەرلەمانێ کوردستانێ سوبەھی 7ى نيسانا 2015ێ د روونشتنەکێ دا ناسناڤێ پایتەختێ ئازادیێ بدەتە قەزایا رانیێ.
ل دووڤ بەرنامێ کاری یێ روونشتنا حەفتێ یا خولا چارێ یا ھەلبژارتنان، کو ل مالپەرێ فەرمیێ پەرلەمانی بەلاڤ بوویە، پەرلەمانێ کوردستانێ دێ خواندنا ئێکێ بۆ دو پرۆژە بریاران کەت، یێ ئێکێ پرۆژە بریارا ناسناڤێ باژێرێ رانیێ یە ب پایتەختێ ئازادیێ، پرۆژە بریارا دویێ ژی ل دۆر پارێزگەە کرنا ئیدارا گەرمیانە، ھەر د روونشتنا سوبەھی دا دێ پەرلەمان دانوستاندنان ل دۆر پرۆژە قانوونا رەستڤەکرنا قانوونا سزایا عیراقی یا ھژمار 111 یا سالا 1969 کەت.