ئه‌ڤرۆ نيوز:
ژێده‌ره‌كێ ژ وه‌زاره‌تا دارايى و ئابوورى يا حوكمه‌تا هه‌رێما كوردستانێ بۆ باسنيوز دياركريه كو سبه رۆژا چوار شه‌مبى، دێ مووچێ هه‌يڤا 12 يێ سالا بوورى ب سه‌ر خانه‌نشينێن پێشمه‌رگه‌ى و خانه‌نشينێن شوره‌شا ئيلونێ هێنه به‌لاڤكرن.
ژێده‌رى ئاماژه ب وێ چه‌ندێ كريه كو به‌لاڤكرنا مووچێ ڤان دو توێژان دێ دو رۆژان ڤه‌كێشيت و هه‌تا هه‌فتيا بهێت، مووچێ چ وه‌زاره‌ته‌كێ ناهێته به‌لاڤكرن.
ئه‌ڤرۆ نيوز:
پێشمه‌رگىێن كوردستانێ ئه‌ڤ شه‌ڤه ل ميحوه‌رێ مه‌خموور هێرشه‌كا داعش تێكشكاند و نێزيكى 10 ته‌رمێن چه‌كدارێن وان بجه ماينه.
ژێده‌ره‌كىێ ژ هێزێن پێشمه‌رگه‌ى ل ميحوه‌رێ مه‌خموور دياركريه كو چه‌كدارێن داعش ب په‌ياده هێرش كرينه سه‌ر سه‌نگه‌رێن پێشمه‌رگه‌ى ل ده‌ڤه‌رێن جارولا و ته‌لريم ل ميحوه‌رێ مه‌خموور، به‌لێ ژ ئه‌گه‌رێ به‌رهه‌ڤيا پێشمه‌رگه‌ى، به‌رسڤا داعش هاتيه دان و هێرشا وان هاتيه شكاندن.
ئه‌ڤرۆ نیوز:
سامى ئه‌رگووشى سكرتێرێ رۆژنامه‌ڤانى یێ سه‌رۆكێ حوكمه‌تا هه‌رێما كوردستانێ دیاركر بریاره سوبه نێچیرڤان بارزانى ب سه‌ره‌دانه‌كێ بگه‌هته توركیا و ل گه‌ل ره‌جه‌ب ته‌یب ئه‌ردوگان و ئه‌حمه‌د داود ئوغلو كومببیت.
مه‌ره‌م ژ ڤێ سه‌ره‌دانێ ل دووڤ گوتنێن ئه‌رگووشى بهێزكرنا په‌یوه‌ندیانه و به‌حسكرنا بیاڤێ وزێ یه كو بریاره ئاشتى هه‌ورامى ل گه‌ل نێچیرڤان بارزانى بچیته توركیا.
ئه‌ڤرۆ نیوز:
به‌رپرسه‌كێ حوكمه‌تا توركیا ئاشكرا دكه‌ت كو ئه‌مریكا و توركیا دێ مه‌شق و راهێنانێ ب ئوپوزسیونا سووریا كه‌ن.
ئاژانیا رویته‌رز به‌لاڤكریه كو به‌رپرسه‌كێ حكومه‌تا توركیا ئه‌ڤرۆ 2/17 راگه‌هاندنه كو د ماوێ چه‌ند رۆژێن بهێت دا، رێككه‌فتنا د ناڤبه‌را ئه‌مریكا و توركیا بۆ مه‌شقپێكرن و پرچه‌ككرنا ئوپوزسیونا سورى هێته ئیمزاكرن.
به‌رى نوكه ژى ئه‌مریكا بڕیار دابوو 400 سه‌ربازێن هێزێن تایبه‌تێن ئه‌مریكا بۆ رۆژهه‌لاتا ناڤه‌راست بهنێریت ب مه‌ره‌ما مه‌شقپێكرنا ئوپوزسیونا سووریا.
ئه‌ڤرۆ نیوز:
ئێڤاریا ئه‌ڤرۆ و هه‌تا نوكه شه‌ر د ناڤبه‌را پێشمه‌رگێن كوردستانێ و داعش دا یا به‌رده‌وامه و ل دووڤ پێزانینێن فه‌رمانده‌كێ پێشمه‌رگه‌ى، داعشێ زیانێن مه‌زن به‌ركه‌تینه.
عه‌مید هاشم سیته‌ى فه‌رماندێ لیوا پێشمه‌رگه‌ى ل میحوه‌رێ شنگال دیاركر كو پێشمه‌رگه د ڤى شه‌رى دا ب چه‌كى گران به‌رسینگا هێرشا داعش گرتیه و هه‌تا نوكه شه‌ر یێ به‌رده‌وامه و فرۆكێن هه‌ڤپه‌یمانان ژى هه‌ڤكاریا پێشمه‌رگه‌ى دكه‌ن د توپبارانكرنێ دا و دهێته چاڤه‌رێكرن، داعش زیانه‌كا زور گه‌هشتبیتێ.
ئه‌ڤرۆ نیوز:
حوكمه‌تا هه‌رێما كوردستانێ كوشتنا 21 وه‌لاتیێن مه‌سیحیێن مسرى یێن قیبتى ل لیبیا ل سه‌ر ده‌ستێ داعش شه‌رمزار دكه‌ت و د راگه‌هاندنه‌كێ دا دیاركریه: ئه‌ڤ تیرورسته، دوژمنێن مروڤایه‌تیێ نه، له‌وما ئه‌ڤرۆ هه‌موو جیهان به‌رامبه‌ر دیرۆكێ به‌رپرسیارن كو ب ئه‌ركێ خوه رابن و هه‌بوونا ڤان تیرورستان و هه‌ڤشێوێن وان ژناڤ ببه‌ن.
حوكمه‌تا هه‌رێمێ سه‌ره‌خوشى ئاراسته‌ى خێزانێن ڤان 21 وه‌لاتیێن مسرى كرینه و رژدى ل سه‌ر وێ یه‌كێ كریه كو تیرورست دێ باجا ڤان تاوانان ده‌ن.
ئه‌ڤرۆ نیوز:
سه‌رۆكێ هه‌رێما كوردستانێ ئه‌ڤرۆ گه‌هشته باژێرێ كه‌ركووكێ و د كومبوونه‌كێ ل گه‌ل فه‌رماندێن گشتى ئاماژه ب ره‌وشا كه‌ركووكێ و ده‌ڤه‌رێ دا و راگه‌هاند ” بێى رازیبوونا مه ناهێلێن چ هێزه‌ك بهێنه ناڤ كه‌ركووكێ”.
جه‌بار یاوه‌ر كو پشكدارى كومبوونێ بوو، بۆ باسنیوز دیاركریه: سه‌رۆك بارزانى د كومبوونێ دا دیاركر كو هه‌ر كه‌سێ بخوازیت شه‌رى داعش بكه‌ت، ئه‌م هه‌ڤپه‌یمانیێ ل گه‌ل ئه‌نجام دده‌ین، به‌لێ پێدڤى ب چ هێزان ناكه‌ت بهێنه ناڤ كه‌ركووكێ، هاتنا هه‌ر هێزه‌كا دى بۆ كه‌ركووكێ پێدڤیه ب داخوازى و فه‌رمى بیت و پێدڤیه ئه‌م رازى بین و دیسا جڤاتا پارێزگه‌ها كه‌ركووكێ داخواز بكه‌ت، ل ده‌رڤه‌ى ڤێ رێكارێ چ هێزه‌كا دى قه‌بوول ناكه‌ین.
ئه‌ڤرۆ نيوز:
سه‌رۆك عه‌شيره‌ته‌كێ عه‌ره‌ب كو ناڤگريێ د ناڤبه‌را چه‌كدارێن داعش و پێشمه‌رگه‌يى دا بۆ ئازادكرنا ئێخسيرێن پێشمه‌رگه‌يى دكه‌ت، ئاماژه ب وێ چه‌ندێ كريه كو داعش رازيبوويه ئێخسيرێن پێشمه‌رگه‌يى ئازاد بكه‌ت به‌رامبه‌ر ئازادكرنا ئێخسيرێن خوه يێ دده‌ستێ پێشمه‌رگه‌يى دا.
شێخ يه‌عقوب لهێبى، سه‌رۆك عه‌شيره‌تێ لهێب كو پێشنيازا داعش گه‌هانديه هێزێن پێشمه‌رگه‌يى بۆ هاولاتى گۆت: “داعش گۆتيه من 18 پێشمه‌رگه ل لايێ مه‌نه، هه‌كه پێشمه‌رگه‌يى ژى 18 ئێخسيرێن مه ل ده‌ف هه‌بن، ئازاد بكه‌ن، ل وى ده‌مى ئه‌م ژى دێ ئێخسيرێن پێشمه‌رگه‌يى ئازاد كه‌ين”.
گۆتژى: “داعش داخوازا وان چه‌كداران كريه يێن ل بيستانێ خه‌بازه يێ په‌ترۆلێ و گۆندێ ئيسحاق كريه كو پێشمه‌رگه ئازاد بكه‌ت”.
سه‌رۆك عه‌شيره‌تێ لهێب ئاماژه ب وێ چه‌ندێ ژى كر كو داعش رازيبوويه ته‌رمێن پێشمه‌رگه‌يى ژى ب ده‌ته ده‌ست ب مه‌رجه‌كى پێشمه‌رگه ژى ته‌رمێن وان ب ده‌ته ده‌ستێ وان.
ده‌رباره‌يى مه‌رجێن دژى وه‌كو پێدانا كاره‌بێ ب مووسل و حه‌وێجه و ڤه‌كرنا رێيا كه‌ركووك حه‌وێجه، شێخ يه‌عقوب لهێبى گۆت: “هه‌تا نوكه داعش چو تشتێن وه‌سا نه‌گۆتينه”.
ل شه‌رێ 2015.1.30 هژماره‌كا پێشمه‌رگه‌يى ب ئێخسيرى كه‌فتنه ده‌ستێ چه‌كدارێن داعش، پاشان ژى گرته‌كا ڤيديۆيى به‌لاڤكر كو پێشمه‌رگه ب ئێخسيرى د ناڤ قه‌فه‌سان دانه و د ناڤ بازارێن حه‌وێجه دا دگێرينن.
دوهى رۆژا دوشه‌مبى نێچيرڤان بارزانى سه‌رۆكێ حوكمه‌تا هه‌رێما كوردستانێ راگه‌هاند كو ئه‌و يێ بزاڤێن رژد دكه‌ن بۆ ئازادكرنا پێشمه‌رگه‌يێن ئێخسير د ده‌ستێ داعش دا.
ئه‌ڤرۆ نيوز، ڤه‌ده‌ر سوبحى:
ده‌ستهه‌لاتا ئه‌زهه‌ر كو مه‌زنترین ده‌ستهه‌لاتا ئیسلامییه ل وه‌لاتێ مسرێ ته‌ماشه‌كرنا ڤیدیویێن سێداره‌دانێ و كوشتنێ یا تیرۆرستین داعش ب تشته‌كێ حه‌رام ل قه‌له‌م دده‌ت.
د به‌یاننامه‌كێ دا ئه‌زهه‌ر داخاز ژ هه‌می موسلمانان دكه‌ت ته‌ماشای ڤان جوره ڤیدیویان نه‌كه‌ن، ته‌ماشه‌كرنا و به‌لاڤكلانا وێنه و ڤیدیویێن تاوانێن داعش ل سه‌ر هه‌می موسلمانان قه‌ده‌غه‌دكه‌ت.
ژ بوو وێ یه‌كێ ئارمانجێن خراب یێن رێكخستیا تیرۆریا داعش بجهـ نه‌هێن كو ل دووڤ گوتنا ئه‌زهه‌ر ئارمانجا وان یا سه‌ره‌كی كرێتكرنا وینێ ئیسلامێ یه.
ئه‌ڤ بریارا ئه‌زهه‌ر پشتی ڤیدیویا سه‌ربرینا 21 كه‌سێن كریستیانێن مسرێ دهێت ژ ئالیێ داعش ڤه ل وه‌لاتی لیبیا.
ئه‌ڤرۆ نيوز:
كۆمبوونا د ناڤبه‌را سه‌رۆكێ هه‌رێما كوردستانێ و شاندێ دانوستاندكارێ هه‌رێمێ يێ چوويه به‌غدا ب سه‌رۆكاتيا نێچيرڤان بارزانى ل پيرمام ده‌سپێكر.
ئه‌ڤرۆ رۆژا سێشه‌مبى 2015.2.17، مه‌سعود بارزانى سه‌رۆكێ هه‌رێما كوردستانێ پێشوازى ل شاندێ دانوستاندكارێ هه‌رێمێ يێ چوويه به‌غدا ب سه‌رۆكاتيا نێچيرڤان بارزانى ل پيرمام ده‌سپێكر.
شاندێ هه‌رێما كوردستانێ كو بۆ مه‌ره‌ما كێشا د ناڤبه‌را هه‌رێما كوردستانێ و به‌غدا دا و ب تايبه‌ت ژى بۆ وێ رێكه‌فتنا د ناڤبه‌را هه‌ردو لايان دا يا گرێدايى په‌ترۆلێ و بودجا هه‌رێما كوردستانێ سه‌ره‌دانا به‌غدا كربوو، به‌لێ يێ بێ مفا بوو ب گۆره‌يى داخۆيانيا سه‌رۆكێ حوكمه‌تا هه‌رێما كوردستانێ نێچيرڤان بارزانى ده‌ما بۆ ده‌زگه‌هێن راگه‌هاندنێ گۆتى: “عيراق يا پابه‌نده ب رێكه‌فتنێ، به‌لێ پاره نينن ب هنێريت”.
ئه‌ڤه ژ ده‌مژمێر 11:00 وه‌ره كۆمبوون يا به‌رده‌وامه و بڕياره شاندێ دانوستاندكار بۆچوونا سه‌رۆكێ هه‌رێمێ د ڤى وارى دا وه‌رگرن و سوبه‌هى ژى كۆمبوونا جڤاتا وه‌زيران بۆ ڤێ مه‌ره‌مێ بهێته گێران كا چ باشه بهێته كرن.
كۆمبوون هێشتا يا به‌رده‌وامه و بڕياره سه‌رۆكێ هه‌رێما كوردستانێ ژى هه‌لويستێ خوه بۆ شاندنێ هه‌رێما كوردستانێ يێ پێكهاتى ژ نێچيرڤان بارزانى، سه‌رۆكێ حوكمه‌تا هه‌رێما كوردستانێ و قوباد ته‌له‌بانى جێگرێ سه‌رۆكێ وه‌زيران و ئاشتى هه‌ورامى وه‌زيرێ سامانێن سرۆشتى و رێباز محه‌مه‌د حه‌ملان وه‌زيرێ دارايى و عه‌لى سندى وه‌زيرێ پلاندانانێ بده‌ته دياركرن.
نيشاندان