ئەڤرۆ:
گەنجەکێ کورد ژلایێ ئاسایشا دھۆکێ ڤە ھاتە دەستەسەرکرن ب تومەتا ھەڤکاریێ ل گەل رێکخراوا تیرورستی یا داعش کو چەند مامەلێن ڤەگوھاستنا ترومبێلا بۆ سەر ناڤێن تیرورستان ب رێڤەبرینە، پاشان ھندەک ھژمارێن ترومبێلان ل پێشانگەھەکا ترومبێلا رادەستی ھندەک کەسا کرینە کو ل دەڤەرا بارزانکا د بەرنیاسن کو تیرورستن، دادگەھێ ئەڤ کەسە ب سزایێ دو سالان ل سەر مادێ چار یێ تیرورێ حوکمکر.
پارێزەر شڤان فارس ژ دادگەھا دھۆکێ بۆ ئەڤرۆ دیارکر کو گەنجەکێ کورد کو خودان پلەکا نافخویی بوو بەری دو سالا ل رێڤەبەریا ھاتنو چوویا میسل کار دکر بەرپرسێ بەشێ تومارکرنا ترومبێلا بۆ، دەمێ ل سەر کارێ خوە یێ ئامادە پەیوەندیەک پێ دھێتەکرن و کەسەک دبێژیتێ ئەم گروپەکین سەر ب رێکخراوا قاعیدەینە کەسەک دێ ھێتە دەڤ چەند مامەلێن ڤەگوھاستنا ترومبێلانە دڤێت تو ب رێڤە بەی بێ کو خودانێن وان ترومبێلان ئامادە بن و داگێرانێ ژ ترومبێلێن خوە بکەن، گەفا لێ دکەن و دبێژنێ تو ب رێڤە دبەی باشە نە ب رێڤە بەی دێ چارەنڤیسێ تە وەکو وان سێ ئەفسەران بیت یێن بەری نوکە سەر جادێ ھاتینە کوشتن چونکو گوھداریا فەرمانێن مە نەدکر، گۆتژی وی ژی ترسەک بۆ چێ بو چونکو بەری چەند رۆژان ھەڤالەکێ وی یێ ئەفسەر ژی ھاتبوو کوشتن ئەو ژی نەچار بۆ ئەو مامەلە ب رێڤە برن، و گۆتە رێڤەبەرێ خوە من ڤەگوھێزە جھەکێ دیتر چونکو گەف لمن دھێنەکرن و نەشێم غەدرێ ل کەسێ بکەم وێ شەڤێ ژ ترسادا ل رێڤەبەریێ نڤست ھەتا بوویە سپێدە پاشی چوو مال، پاشان پشتی ٢٠ رۆژان رێڤەبەری فرێکرە رەخێ شەلالاتا دەوامێ بکەت، وی ژی بۆ خوە ب ھەر رەنگەکی ھەبیت برە سەری، پاشان روودانێن میسل دەسپێکرن و رەوشا میسل تێکچوو، ئەو ژی رابوو ئەو و خێزانا خوە دھێتە دھۆکێ بۆ شوقەکێ دگریت و دمینە ل دھۆکێ، پشتی چەند رۆژەکا ئاسایش دووڤچوونێ دکەن کو دبێژن ئەڤی وەلاتی د وەختی دا ھندەک مامەلێن تیرورستان یێن ب رێڤەبرین.
زێدەتر گۆت: ئاسایشێ دەستەسەر کر و دانپێدانکر کو گەفێن کوشتنێ لێ ھاتینەکرن لەوما ئەو مامەلە ب رێڤەبریە، دیسا دو دیدەڤانێن دیتر ژی ل سەر دەرکەتن کو ئەڤی مرۆڤی ھندەک ھژمارێن ترومبێلان ل پێشانگەھەکا ترومبێلا رادەستی ھندەک کەسا کرینە کو ل دەڤەرا بارزانکا د بەرنیاسن کو تیرورستن د ڤێ کەیسێ دا ژی دانبێدانکر کو راستە ئەو کارە ژی کرینە بەلێ دیسا چونکو دئێخستە بن گەفا کوشتنێ کو وی سەردەری ل گەل تیرورستان نەکریە کو ئەو ژی ئێک ش وانە، ل دەسپێکێ ل سەر مادێ دو یا گرێدای تیرورێ ھاتبوو دەستەسەرکرن ئەڤ مادە ژی دچیتە سێدارەدانێ ل سەر وی بنەمای کو ئەڤ مادە دبێژیت ھەر کەسەکێ ھزرێن کوفری لنک ھەبن کو ب کوشتنا وەلاتیان رابیت یان سەرپەرشتیا تیرورستان بکەت یان ئەڤ گروپە رابیت ب پەقاندنێ و سوتنێ ئانکو ب چ رەنگ خزمەتا تیرورستان بکەت دێ ھێتە سێدارەدان.
پارێزەرێ ناڤھاتی گۆتژی: د دادگەھێ دا مادە ھاتە گوھۆرین مادێ سێدارەدانێ ل سەر رابوو، ل سەر مادێ چار یێ تیرورێ ھاتە حوکمکرن ب سزایێ دو سالان ل سەر قانوونا بەرھنگاربوونا تیرورێ یا ژمارە سێ یا سالا ٢٠٠٦ ێ ئەڤا ل ھەرێما کوردستانێ دەرکەتی چونکو لاپەرێ وی یێ سپی بو و پلەکا ھاتنووچوونێ ھەبوو و خودان زارۆ بۆ ژبەر ھندێ دادگەھێ حوکمێ وی سڤک کر.

ئه‌ڤرۆ:

فەرمانبەرێن ئافرەت بگشتی و مامۆستا بتایبەت، گازندا ژڤێ چەندێ دکەن، کو ددەمێ وەرگرتنا مۆھلەتا دایکایەتیێ موچێ وان دھێتە بڕین و ھندەک جارا بۆ ڤەگەڕاندنا موچێ خوە یێ بڕی نەچارن زارۆیێن بێ بەھردکەن د خزمەتێ و ڤەدگەڕێن سەر دەواما خوە، ئەندامەکێ لیژنا پەروەردێ ژی راگەھاند: دگەل راستڤەکرنا قانوونا پەروەردێ دێ ئاریشە ھێتە چارەسەرکرن.

ھیڤی، ناڤێ ئێک ژ مامۆستایێن ئافرەتە و بۆ رۆژناما ئەڤرۆ گۆت” مە وەکی مامۆستا و فەرمانبەرێن ئافرەت ئاریشە لسەر وەرگرتنا مۆھلەتا دایکایەتیێ ھەیە، چونکو ددەمێ مۆھلەتێ وەر دگرین موچێ مە دھێتە بڕین، من بخوە دو جارا مۆھلەت وەرگرتیە و موچێ من ھندەک ھەیڤا نیڤی دھێتە بڕین، ئەڤەژی نەعەدالەتیە دھێتەکرن، ژبەرکو وەگرتنا مۆھلەتا دایکایەتیێ مافەکێ شەرعی و قانوونیێ یە ھەر ئافرەتەکێ یە، گورەی قانوونێ ژی دڤێت مە ئەف مافە ھەبیت، ژبەرکو مۆھلەتا دایکایەتیێ جۆدایە ژ مۆھلەتێن دی، بۆنموونە ئەگەر فەرمانبەر یان مامۆستایەک مۆھلەتێ بۆ گەشتکرنێ یان بۆ خواندنێ وەرگریت جۆدایە، لەوڕا داخوازێ ل حوکمەتێ و پەروەردێ دکەین، قانوون بھێتە راستڤەکرن و تێدا رەوشا مامۆستایێن ئافرەت بەرچاڤ بھێتە وەرگرتن و ددەمێ مۆھلەتا دایکایەتیێ بڤی شێوەی موچە نەھێتە بڕین”.
دکتۆر شوان قەلادزەیی، ئەندامێ لیژنا پەروەردێ یا پەرلەمانێ کوردستانێ بۆ رۆژناما ئەڤرۆ گۆت” ئەم وەکی پەرلەمانتار ئاگەھداری ڤێ چەندێ ینە و پێدڤیە موێ وان مامۆستایێن مۆھلەتا دایکایەتیێ وەر دگرن نەھێتە کێمکرن و کاریگەریێ بکەتە سەر ژیانا وان، تنێ بلا ئەو پارێ زێدە بھێتە بڕین یێ دەرمالێ جھێ جوگرافیا مامۆستای، ڤی شێوەی نەھێتەکێمکرن مامۆستا و فەرمانبەر ژ پێخەمەت موچێ خوە لەزێ بکەن بۆ دەستبکاربوونا خوە ل دەوامێ، ژبەرکو ئەڤی زارۆیی ژی ماف ھەیە و ئەرکە لسەر حوکمەتێ و وەزارەتا پەروەردێ، کو گرنگی ب نڤشێ نوو بھێتەدان، ھەتا ئەف وەلاتێن پشتی ئازادکرنا عێراقێ ھاتینە ھەرێما کوردستانێ داخوازکربوو، ئافرەت دوو سالان موھلەتا دایکایەتیێ وەربگریت و ھەموو موچە و دەرمالەژی بۆ بھێنە مەزاختن، ھەتا د ئاینێ ئیسلامێ دا ھاتیە پێدڤیە ئافرەت بۆ دوو سالان شیری بدەتە زارۆیێ خوە.
دکتۆر شوانی گۆتژی” قانوونا پەروەردێ دێ ھێتە راستڤەکرن و پڕۆژە قانوونەک بناڤێ پەروەردە و فێرکرن دێ ھێتە دەرکرن، بۆڤێ مەرەمێ دوھی مە وەکی لیژنا پەروەردێ کۆمبوونەک ئەنجامدایە و دێ بەردەوامبین ھەتا دھێتە پەسەندکرن، د پرۆژە قانوونێ دا ب ھویری بەحسێ پەروەردە و فێرکرنێ دھێتەکرن و ژیانا مامۆستا و ئەرک و مافێن وی بتەمامی دێ ھێنە دیارکرن، ئێک ژوانا بڕینا دەرمالە و موچەیێ مامۆستایێن ئافرەتە ددەمێ وەرگرتنا مۆھلەتا دایکایەتیێ و ئەف بابەت دێ ھێتە رێکخستن، چونکو نابیت وەکی نوکە ھەی موچە ب ئەگەرێ وەرگرتنا مۆھلەتا دایکایەتیێ بھێتە کێمکرن و بڕین، سۆزێ دەینە مامۆستا و فەرمانبەرا ئەف قانوون دێ ھێتە راستڤەکرن و مافێ وان ناھێتە خوارن”.