ئه‌ڤرۆ نیوز:
هێزێن ئه‌سمانى یێن ئوردن ئاشكراكرینه كو د ماوێ سێ رۆژێن بوورى دا، وان 56 هێرش بۆ سه‌ر جهێن داعش ئه‌نجامداینه و ژ ئه‌گه‌رێ وێ چه‌ندێ 20% شیانێن سه‌ربازى یێن داعش هاتیه خوار ، ژ ئالیه‌كێ دى ڤه فرۆكێن شه‌رى یێن هه‌ڤپه‌یمانان ئاگه‌هداریه‌ك ل سه‌ر خه‌لكى باژێرى ره‌قه یێ سوورى ب رێیا فرۆكان دابه‌شكرینه و داخواز ژێ كرینه وى باژێرى چول بكه‌ن، ژبه‌ر كو ئه‌و باژێر پایته‌ختێ داعشه و هه‌ڤپه‌یمان ب ژڤانن هێرشيَن خوه گه‌له‌ك زێده‌تر و دژوارتر لێ بكه‌ن بۆ سه‌ر وى باژێرى.
ئه‌ڤرۆ نیوز، ره‌وان نهێلى
عه‌ره‌فات كه‌ریم په‌رله‌مانتاره‌كێ كورد ل په‌رله‌مانێ عیراقێ رادگه‌هینیت كو نێچیرڤان بارزانى د سه‌ره‌دانا خوه یا چاڤه‌رێكرى دا بۆ به‌غدا دێ بێژته به‌رپرسێن حكومه‌تا عیراقێ كو هه‌رێم نه‌شێت رۆژانه 300 هزار به‌رمیلێن نه‌فتا كه‌ركوكێ بهنێریت.
هه‌ڤده‌م عاسم جیهاد په‌یڤدارێ وه‌زاره‌تا نه‌فتا عیراقێ راگه‌هاندیه كو ستافه‌كێ ئه‌ندازیارى به‌رده‌وام یێ وێ بزاڤێ دكه‌ت كو هنارتنا نه‌فتێ بگه‌هته وى ئاستێ یێ كو هه‌ولێر و به‌غدا ل سه‌ر رێككه‌فتین كو 550 هزار به‌رمیلێن رۆژانه‌نه.
هه‌روه‌سا زانا رۆستایى ئه‌ندامێ لژنا قانوونى ل په‌رله‌مانێ عیراقێ رادگه‌هینیت كو حوكمه‌تا عیراقێ ب مه‌رجێ پابه‌ندبوونا هه‌رێمێ ب رێككه‌فتنا د ناڤبه‌را هه‌ولێر و به‌غدا ل دۆر هنارتنا نه‌فتێ دكه‌ته مه‌رجێ هنارتنا بودجێ هه‌رێمێ.
رۆستایى دیاركر كو به‌غدا ب ئاشكرا گوتیه هه‌تا كو حكومه‌تا هه‌رێما كوردستانێ پابه‌ند نه‌بیت ب رێككه‌فتنێ و 550 هزار به‌رمیلێن نه‌فتێ راده‌ستى كۆمپانیا سومو نه‌كه‌ت، ئه‌و ژى پابه‌ند نابن ب رێككه‌فتنێ و پشكا هه‌رێمێ ژ بودجه‌ى ناهنێرن.
ئه‌ڤرۆ نیوز:
د.یوسف گۆران وه‌زیرێ خواندنا بلند و ڤه‌كولینێن زانستى یێ حكومه‌تا هه‌رێما كوردستانێ پرۆژێ ب نێڤده‌وله‌تیكرنا زانكۆیێن كوردستانێ راگه‌هاند و ئاماژه ب وێ یه‌كێ كر كو ده‌ستپێكرنا پرۆژێن ب نێڤده‌وله‌تیكرنا زانكۆیێن كوردستانێ پێنگاڤه‌كا گرنگه كو ئاستێ زانكۆیێن كوردستانێ ب رێژه‌كا به‌رچاڤ بلند ببیت، د هه‌مان ده‌م دا ژى هه‌ماهه‌نگیه‌كا بهێز د ناڤبه‌را زانكۆیێن كوردستانێ و وه‌لاتێن ده‌رڤه دێ دروست بیت.
د.یوسف گۆران دیسا گۆت : پێنگاڤا گرنگ یا پرۆژێ ب نێڤده‌وله‌تیكرنا زانكۆیێن كوردستانێ خالێن لێكتێگه‌هشتنێ یه ل گه‌ل زانكۆیێن ده‌رڤه و د ڤى بیاڤى دا دێ یاداشتێن لێكتێگه‌هشتنێ و هه‌ڤپشك هێنه ئه‌نجامدان بۆ چاوانیا ده‌ستكه‌فتنا ژێده‌رێن دارایى ل ده‌زگه‌ه و سازیێن به‌رنیاس یێن ده‌رڤه بۆ ئه‌نجامدانا پرۆژان د بیاڤێ خواندنا بلند دا و ده‌رئه‌نجام ئه‌و پرۆژه كارتێكرن و ئه‌نجامێن گرنگ هه‌بیت د بیاڤێ خواندنا بلند و پێشكه‌فتنا ئاستێ زانستى و ئه‌كادیمى یێ زانكۆیان.
ئه‌ڤرو، نیوز، هه‌یفا دوسكى:
هادى دوبانى رێڤه‌به‌رێ كاروبارێن ئێزدیان ل دهوكێ، ئه‌ڤرۆ د كونگره‌كێ رۆژنامه‌ڤانى دا دیاركر كو ژمارا ئێزدیان ب گشتى(550 )هزارن و هه‌تانوكه (400) هزار ئێزدى ئاواره‌نه.
دوبانى گۆت: هه‌تا نوكه 10 گۆڕێن ب كوم یێن ئێزدیان هاتینه دیتن و هه‌ر گۆڕه‌كێ ژ وان پترى بیست كه‌سان تێدا بووینه و ژ هه‌ردوو ره‌گه‌زان بووینه .
دوبانى دیاركر كو نێزیكى (3500) ژن و كچ و زه‌لام و زارویێن ئێزدیان یێن هاتینه ره‌ڤاندن و ژوان هه‌میان ب تنێ (700) هاتینه رزگاركرن.
ئه‌ڤرۆ نیوز:
پشتى ئه‌ڤرۆ لژنا پیشه‌سازى و وزێ و ژێده‌رێن سروشتى یا په‌رله‌مانێ كوردستانێ ل گه‌ل لژنا نه‌فت و وزا ئه‌نجومه‌نێ نوێنه‌رێن عیراقێ كومبوون، ل هه‌مبه‌ر ده‌زگه‌هێن راگه‌هاندنێ ئه‌نجامێن كومبوونێ راگه‌هاندن كو یاداشته‌كا لێكتێكه‌هشتنێ د ناڤبه‌را وان هاتیه ئیمزاكرن.
د.شێركو جه‌وده‌ت سه‌رۆكێ لژنا پیشه‌سازى و وزێ و ژێده‌رێن سروشتى ل په‌رله‌مانێ كوردستانێ ده‌قێ یاداشتێ خواند:
1- ب ئاگه‌هبوون و سه‌رپه‌رشتیكرن و دووڤچوونا وێ به‌ره‌ڤ پێشچوونێن د رێككه‌فتنا د ناڤبه‌را حكومه‌تا هه‌رێم و حكومه‌تا ئیتیحادى یا عیراقێ هاتیه كرن بۆ وێ یه‌كێ كار پێ بهێته كرن و ئالوزیێن هه‌مبه‌ر وێ بهێنه چاره‌كرن.
2- هه‌بوونا ئاماده‌كارى و هه‌ماهه‌نگیا هه‌ڤپشك ژ پێخه‌مه‌ت په‌یدابوونا قانوونا نه‌فت و گازێ ل عیراقێ و هه‌ر قانوونه‌كا دى دبیاڤێ وزێ دا.
3- پێكڤه كاركرن بۆ به‌رنامێن به‌ره‌ڤ پێشچوون و شیاندنێ بۆ هه‌ر دو لژنان ب رێیا وان لایه‌نێن په‌یوه‌ندیدارن ب سازكرنا پرۆژێن به‌ره‌ڤ پێشبرنێ.
4- سازكرنا كومبوونێن هه‌ڤپشك و لێكتێگه‌هشتنێ و پێكڤه كاركرن و مێهڤانیكرنا ئێكو دو ب تایبه‌ت ل دۆر ئه‌و قانووێن په‌یوه‌ندارین ب بوارێ نه‌فتێ ڤه.
ئه‌ڤرۆ نیوز:
كومبوونا شاندێ دانوستاندنێ یێ ئێكه‌تیێ و گۆران ل گه‌ل پارتى ل باره‌گایێ سه‌ره‌كى یێ بزاڤا گۆران ل سلێمانیێ ب دووماهى هات كو مه‌ره‌م ژ كومبوونێ پشكداریكرنا پارتى بوو د حكومه‌تا خوه‌جهى یا سلێمانیێ دا، لێ چ رێككه‌فتن نه‌هاتنه كرن و پشتى كومبوونێ شاندێ هه‌ر سێ لایه‌نان كۆنگره‌كێ رۆژنامه‌ڤانى سازكر.
ئاكو حه‌مه كه‌ریم ئه‌ندامێ شاندێ دانوستاندنێ یێ بزاڤا گۆران گۆت: مه ل گه شاندێ پارتى هنده‌ك خالێن ناكوك یێن هه‌ین، و ئه‌م نه‌گه‌هشتینه چ رێككه‌فتنه‌كێ و مه پێدڤى ب پتر ده‌مى هه‌یه هه‌تا كو بگه‌هینه رێككه‌فتنا ئێكجارى.
ئاكو حه‌مه كه‌ریم گۆت: بریاره ل چه‌ند رۆژێن بهێت، شاندى پارتى به‌رسڤا مه بده‌ت و پاشێ دێ مه‌ژى وه‌ك گۆران و ئێكه‌تیێ به‌رسڤا خوه هه‌بیت.
ئه‌ڤرۆ نیوز:
ئه‌ڤرۆ نێچیرڤان بارزانى سه‌رۆك وه‌زیرێن هه‌رێما كوردستانێ ل گه‌ل هه‌ر ئێك ژ بان كى مون سكرتێرى گشتى یێ نه‌ته‌وێن یه‌كگرتى و نوونه‌رێن 93 وه‌لاتان پشكدارى د رێوره‌سمێن ڤه‌كرنا كوپیتكا حكومى یا دوبه‌ى دا كر.
ئه‌ڤ كوپیتكه ژ چه‌ندین كۆڕ و سمينار و په‌نه‌لێن جودا پێكدهێت، به‌حسێ كاروانێ پێشكه‌فتى یێ حكومى بۆ به‌ره‌ڤ پاشه‌رۆژێ دكه‌ت و دیسا به‌حسێ پێشكه‌فتنا حكومه‌تێن زیره‌ك و نه‌ڤیێن داهاتى یێن حكومه‌تێن زیره‌ك و دیزاینكرنا پێشوه‌خته یا پاشه‌رۆژێ دكه‌ت.
ئه‌ڤرۆ نيوز:
به‌رى ده‌مه‌كێ كێم كۆمبوونا پارتى ديموكراتى كوردستان و بزاڤا گۆڕان و ئێكه‌تى نشتيمانى كوردستان ل باره‌گايێ سه‌ره‌كى يێ بزاڤا گۆڕان ل سلێمانيێ ده‌سپێكر و بڕياره تێدا پارتى به‌رسڤا ئێكه‌تى و گۆڕان ل سه‌ر حوكمه‌تا خۆجهيا سلێمانيێ بده‌ت.
پێشتر پارتى ديموكراتى كوردستان راگه‌هاند بوو كو بۆچوونێن وان و شاندێ گۆڕان و ئێكه‌تيێ ل هه‌ڤ د نێزيكن و ب تنێ چه‌ند گوهۆڕينێن ئيدارى يێن بچووك دخوازن بكه‌ن.
پارتى ل جڤاتا پارێزگه‌ها سلێمانيێ ل رێزا چارێ دهێت و خودانا سێ كورسيێن وێ جڤاتێ يه.
ئه‌ڤرۆ نيوز:
به‌رپرسێ مه‌كته‌با رێكخستنێ يا پارتى ديموكراتى كوردستان هژمارا ئه‌و كه‌سێن كورد يێن چووينه ناڤ رێزێن داعش به‌لاڤ دكه‌ت و ب هژماره‌كا ترسناك دده‌ته زانين و ئاماژێ ب وێ چه‌ندێ ژى دكه‌ت كو هنده‌ك ژ وان شانازيێ ب چوونا خوه بۆ ناڤ وێ رێكخستيێ دكه‌ن.
جه‌عفه‌ر ئيبراهيم، به‌رپرسێ مه‌كته‌با رێكخستنێ يا پارتى ديموكراتى كوردستان، د ديداره‌كێ دا بۆ رووداو ئاماژه ب وێ چه‌ندێ دكه‌ت كو ل ده‌سپێكا شه‌رێ ل دژى داعش هژمارا گه‌نجێن كورد د ناڤ رێزێن وان دا يا كێم بوو، به‌لێ نوكه يا زێده‌كرى.
جه‌عفه‌ر ئيبراهيم كو د هه‌مان ده‌م دا جێگرێ سه‌رۆكێ په‌رله‌مانێ كوردستانێ ژى يه دبێژيت: “ب گۆره‌يى نووترين دووڤچوونا مه كرى، هه‌تا نوكه نێزيكى 500 گه‌نجان چووينه ناڤ رێزێن وێ رێكخستيێ، كو هنده‌ك شانازيێ ب خوه د به‌ن د ناڤ وێ رێكخستيێ دا، ئه‌ڤه ژى تشته‌كێ ترسناكه”.
مخابنيا خوه ژى ده‌بڕى هه‌مبه‌ر وان گه‌نجان كو پتريا وان خه‌لكێ باژێرێ هه‌له‌بچه نه و گۆت: “هه‌له‌بچه باژێره‌كێ قوربانيده‌ره و هه‌موو كورد ل سه‌رانسه‌رى جيهانێ شانازيێ پێ دكه‌ن و ب وى باژێرى د سه‌ر بلندن”.
ئەڤرۆ:
بەرپرسێ لیژنا ناوچا دیجلە یا پارتی دیمۆکراتی کوردستان دیار کر ل دو تاخێن رۆژئاڤایێ رووبارێ دیجلەی ل ناڤ باژێرێ مووسل، ھندەک کەسان درووشمێ (بژی پێشمەرگە) ل سەر دیواران نڤیسیە و ب ڤێ تۆمەتێ ژی داعش چەند کەس دەستەسەرکرن.
حەسەن خەلۆ، بەرپرسێ لیژنا ناوچا دیجلە یا پارتی دیمۆکراتی کوردستان ل سنوورێ ناحیا زومار بۆ باسنیۆز راگەھاند، ل ناڤ باژێرێ مووسل وەلاتی ھەنە، پشتەڤانیا ھێزێن پێشمەرگەی دکەن، بەری دەمەکی ژی ئالایێ کوردستانێ د ناڤ باژێرێ مووسل دا بلند کربوو و گۆت “پێزانین گەھشتینە مە، کو دوھی ٨/٢/٢٠١٥، ل ھەردو تاخێن (سەورە و نەھرا) یێن رۆژئاڤایێ باژێرێ مووسلێ درووشمێ (بژیت پێشمەرگە) ل سەر دیواران ھاتیە نڤیسین”.
بەرپرسێ لیژنا ناوچا دیجلە یا پارتی دیمۆکراتی کوردستان خویا ژی کر، ل ھەمبەر ڤێ کریارا تیرۆرستێن داعش چەند کەسەک ل وان ھەردو تاخان ب تۆمەتا نڤیسینا درووشمان دەستەسەر کرینە و گۆت “ڤەکۆلینێن وان دگەل وان کەسان دبێ ئەنجام بوون و ب نەچاری ئازادکرن”.
بەرپرسێ لیژنا ناوچا دیجلە یا پارتی ئاشکرا ژی کر، نوکە داعش یا ب دووڤ وان کەسێن ئەو درووشمە نڤیسی دگەریێت، داعش ترسەکا زۆر ژی ل زێدەبوونا ھژمارا پشتەڤانێن ھێزێن پێشمەرگەی د ناڤ مووسل دا ھەیە.
نيشاندان