ئەڤرۆ:
وەزیرێ پەروەردا حوکمەتا ھەرێما کوردستانێ د کڤانێ سەرەدانا خوە دا بۆ دھۆکێ بۆ رۆژناما ئەڤرۆ گۆت “ھەر بریارەکا ھەبیت ئەم د بەرژەوەندیا قوتابیان دا دەردکەین و ھەر بریارا ببینین نەدبەرژەوەند دا بیت دێ پێداچوونێ تێدا کەین”.
پشتیوان سادق وەزیرێ پەروەردا حوکمەتا ھەرێما کوردستانێ دەربارەی شێوازێ ئەزموونان کو ھەمی بووینە ھەلبژارتن، گۆت “ھەر بریارەکا وەزارەت بدەت ئارمانج بەرژەوەندیا قوتابیانە و د کۆنفرانسێ پەروەردێ ژی دا تەوەرەک گرێدایی شێوازێ ئەزموونان بوو و ھەرتشتێ ئەم بزانین نەدبەرژەوەندا زانستی و قوتابیان دایە، بەرھەڤین پێداچوونێ بۆ بکەین و ئەگەر کێماسی ھەبن دێ بزاڤێ کەین چارە کەین”.
وەزیرێ پەروەردا حوکمەتا ھەرێما کوردستانێ دەربارەی دامەزراندنا شەش ھزار مامۆستایان ژی گۆت “بریار بوو شەش ھزار ماموستا بھێنە دامەزراندن، لێ وەکو دیار رەوشا ئابووریا ھەرێمێ یا لاواز بوو، لەورا حوکمەتێ بریار دا چار ھزار بھێنە دامەزراندن کو ب ئاوایەکێ شەفاف ل سەر ھەمی پارێزگەھێن ھەرمێ ھاتینە پارڤەکرن و نھا ٨٥% ژ وان دەست بکار بووینە و ١٥% مابوون کو خەلک رازی نەبوو بچیتە جھێن دوور، ئەڤجا دووبارە ھاتینە راگەھاندن و ئومێدەوارین ھەتا دو حەفتیێن دی ئەو ژی دەست بکار ببن”.
د بەرسڤا پرسیارەکێ دا کو باژارێ دھۆکێ ژ ڤان پلێن دامەزراندنێ زەرەرمەند بوویە وەزیرێ پەروەردێ گۆت “مە ل سەر ئاستێ پارێزگەھان پلە داناینە، بۆ نموونە بەھرا دھۆکێ نێزیکی ٨٥٠ پلە بوون و پاشی مە ٣٠ پلێن دی ژی بۆ زێدە کرن”.
ل دۆر پرسیارەکێ کو گۆتنەک ھەبوو نێزیکی سێ ھزار فەرمانبەران دێ ھێنە دامەزراندن، چ راستی بۆ ڤێ ئێکێ ھەیە؟ وەزیری گۆت “من ئەڤ گۆتنە گولێ نەبوویە و مە فەرمانبەر ژ ئاستێ خوە زێدەتر ھەنە لێ مە ئاریشا ماموستایان ھەیە”.
ھەروەسا وەزیرێ پەروەردا حوکمەتا ھەرێمێ بەحسێ خواندنا ئەھلی کر و گۆت “مە گەلەک گازندە ل سەر خواندنا ئەھلی ھەنە و مە دڤێت سیستەمەکێ رێکوپێک بۆ دارێژین”.

ئه‌ڤرۆ نيوز، نيوار محه‌مه‌د سه‌ليم:

به‌رپرسێ لقێ 12 يێ پارتى ديموكراتى كوردستان ل هه‌له‌بچه‌ دياركر كو خه‌لكێ هه‌له‌بچه‌ دخوازيت پارتى خزمه‌تا وان بكه‌ت، به‌لێ هه‌كه‌ پۆستێن وه‌سان ب پارتى نه‌هێنه‌ دان بشێت خزمه‌تێ بكه‌ت، ئاسايى يه‌ ببيته‌ ئۆپۆزسيۆن.

به‌رپرسێ لقێ 12 يێ پارتى ديموكراتى كوردستان ل هه‌له‌بچه‌، فازل به‌شاره‌تى، بۆ ئه‌ڤرۆ نيوز گۆت: “دانوستاندن د ناڤبه‌را پارتى ديموكراتى كوردستان و هه‌ردو لايه‌نێن زۆرينه‌ ل ده‌ڤه‌رێ بزاڤا گۆڕان و ئێكه‌تى نشتيمانى كوردستان د به‌رده‌وامن و هێشتا نه‌گه‌هشتينه‌ چو رێكه‌فتنان”.

زێده‌تر گۆت: “ئێكه‌تى و گۆڕان دڤێت پارێزگه‌ها هه‌له‌بچه‌ و سلێمانيێ بكه‌نه‌ ئێك پاكێچ و مه‌ وه‌كو پارتى وه‌سان پێ باش نينه‌، دخوازين هه‌ر ئێك پاكێچه‌كا جودا بيت و هه‌ر ئێك پارێزگه‌هه‌كا جودايه‌”.

ئاماژه‌ ب وێ چه‌ندێ ژى كر كو ب گۆره‌يى رێكه‌فتنێ پێدڤيه‌ قايمقامێ سه‌نته‌رێ هه‌له‌بچه‌ يێ پارتى بيت و هه‌كه‌ ئه‌و وى پۆستى ب وان نه‌ده‌ن دوور نينه‌ خوه‌ ڤه‌كێشن و گۆت: “گه‌له‌ك يا سرۆشتى يه‌ پشكدار حوكمه‌تا خوجهى يا هه‌له‌بچه‌ و سلێمانيێ دا نه‌كه‌ين و ببينه‌ ئۆپۆزسيۆن، ب ره‌نگه‌كى هه‌كه‌ ئه‌و پۆستێن ب مه‌ دهێنه‌ دان، ئه‌و نه‌بن يێن بشێين پێ خزمه‌تا ده‌ڤه‌رێ بكه‌ين”.

نه‌ڤه‌شارت ژى كو ئه‌و گرنگيه‌كا مه‌زن دده‌نه‌ هه‌له‌بچه‌ و خه‌لك ب خوه‌ ژى وێ چه‌ندێ دخوازن و ئه‌و خزمه‌تێن بۆ هه‌له‌بچه‌ ژى هاتينه‌ كرن ئه‌ون يێن پارتى كرين و گۆت: “نوكه‌ ژى خه‌لك دخوازيت پارتى زێده‌تر خزمه‌تا ده‌ڤه‌رێ بكه‌ت”.