ئه‌ڤرۆ نيوز:
سه‌ره‌رايى بهێنڤه‌دانا فه‌رمى، ئه‌ڤرۆ گه‌نجينێن هه‌رێما كوردستانێ ده‌وام كر و ده‌ست ب به‌لاڤكرنا مووچێن مايين يێن هه‌يڤا 10 هاته كرن كو بڕياره هه‌ردو وه‌زاره‌تێن په‌روه‌رده و كاره‌با مووچه‌يى وه‌ربگرن.
پشتى رێباز محه‌مه‌د وه‌زيرێ دارايى و ئابوورى ل حوكمه‌تا هه‌رێما كوردستانێ ل دووماهيا حه‌فتيا بۆرى راگه‌هاندى كو حوكمه‌تا به‌غدا 583 مليار دينارێن هه‌رێما كوردستانێ هنارتن، ئه‌ڤرۆ رۆژا شه‌مبى ده‌ست ب مووچێ هه‌ردو وه‌زاره‌تێن په‌روه‌رده و كاره‌بێ هاته كرن و بڕياره هه‌تا رۆژا چارشه‌مبى هه‌موو ئه‌و وه‌زاره‌تێن مووچێن هه‌يڤا 10 وه‌رنه‌گرتين، وه‌ربگرن.
ب گۆره‌يى ئه‌و پێزانينێن ل به‌ر ده‌ست ئه‌ڤرۆ نيوز، دهێته چاڤه‌رێ كرن وه‌زاره‌تا ناڤخۆ ژ به‌ر زێده‌هيا ميلاكێ وێ دووماهى وه‌زاره‌ت بيت مووچێ هه‌يڤا 10 وه‌ربگريت، هه‌ر وه‌كو ل هه‌يڤا بۆرى و يا به‌رى وێ ژى ل دووماهيێ مووچێ خوه وه‌رگرتين.
ئه‌ڤرۆ نيوز، ناجی به‌ده‌ل:
ئه‌ندامێ جڤاتا نیشتمانی یا بزاڤا گۆڕان ل پارێزگه‌ها دهۆكێ بۆ ئه‌ڤرۆ نیوز گۆت: “ل پارێزگه‌ها دهۆكێ هه‌لبژارتن نه‌هاتنه نه‌كرن، لێ مه پرۆگرامه‌كێ خوه به‌رهه‌ڤكرنێ هه‌یه و مه ده‌ستپیكریه ژ بنگه‌هـ و رایه‌لا و بازنا و تۆمارێن ده‌نگدانێ ژی سه‌ر ژ نوو دێ هێنه نووكرن”.
حه‌جی رێكانی ئه‌و چه‌نده ژی دیاركر كو ئه‌و پرۆگرامێ وان هه‌يی ژ چار قووناغان پێك دهێت یا ئێكێ نڤیسنا هه‌ڤالێن بنگه‌هـ و بازنه و رایه‌لانه و قووناغا دويێ ده‌ست نیشانكرنا ده‌سته‌یه‌كا رێڤه‌به‌ره بۆ هه‌ر ئێك ژ وان و قووناغا سیێ نووكرنا تۆمارا ده‌نگده‌رانێ يه كا كێ مافێ ده‌نگدانێ هه‌یه”.
هه‌روه‌سا ئه‌ندامێ جڤاتا نیشتمانی دیاركر ئه‌و كه‌سێ ناڤێ خوه نڤيسايى مافێ ده‌نگدانێ و خوه به‌ربژاركرنێ ژی هه‌یه بۆ بنگه‌هـ و بازنه و رایه‌لان و گۆت: “هه‌تا ئه‌ڤی ده‌مى، مه دو قووناغ برینه و هێشتا قووناغا سیێ مایه”.
ناڤبری ئه‌و چه‌نده ژی دیاركر كو ئه‌ڤه رامانا وێ نینه هه‌لبژارتن ناهێنه كرن، به‌لكو پشتی خوه به‌رهه‌ڤكرنێ دێ هێنه‌كرن ب ئه‌وێ تایبه‌تمه‌ندیا ل ده‌ڤه‌رێ هه‌يی”.
ئه‌ندامێ جڤاتا نیشتمانی یا بزاڤا گۆڕان ل پارێزگه‌ها دهۆكێ گۆتژى: “ب گوره‌يی په‌یره‌وێ ناڤخویێ گۆڕان مه كار كریه و مه تایبه‌تمه‌ندیا خوه هه‌یه، رێخوشكه‌ره بۆ ئه‌نجامدانا هه‌لبژارتنان ب گوره‌يی رێژه و چاوانیا هه‌لبژارتنێن مه، نوونه‌رێن مه‌كویا بادینان ل جڤاتا نیشتمانی ژی دێ هێنه دیاركرن و به‌هرا هه‌يی د وێ جڤاتێ دا و د خانه‌یا راپه‌راندنێ دا كو دێ سه‌رپه‌رشتیا بزاڤێ كه‌ت به‌هدینان دێ جهێ خوه هه‌بیت به‌س هه‌تا نها دێ چه‌ند بیت دیار نینه”.
جڤاتا نیشتمانیا بزاڤا گۆڕان ژ باژێرڤان و رێكخه‌رێن ژووران و سه‌رۆكێ فراكسیۆنان پێك دهێت كو 60 كه‌سن و ل گوره‌يی دستوورێ بزاڤا گۆڕان خانه‌یا راپه‌راندن ژ حه‌فت كه‌سان پێكدهێت نمونه‌یا مه‌كته‌ب سیاسی یێن حزبێن دی یه.
ئه‌ڤرۆ نيوز:
ياريێن حه‌فتيا هه‌شتێ ژ خولا نايابا كوردستانێ برێڤه‌چوون و پتريا ياريان ب وه‌كهه‌ڤى ب دووماهى هاتن. مفادارا ئێكانه يا ڤێ حه‌فتيێ تيما هه‌ولێر بوو پشتى ژ ده‌ڤه‌ريى ياريگه‌ها خوه سه‌ركه‌فتن ل سه‌ر شێروانه تۆماركرى، پێشمه‌رگا سلێمانيێ ژى گۆلا خوه يا ئێكانه ل ڤى وه‌رزى تۆمار كر.
ئه‌نجامێن ياريێن ڤێ حه‌فتيێ:
نه‌ورۆز 0-0 زاخۆ
پ. هه‌ولێر 1-1 هندرين
زێره‌ڤانى 1-1 كه‌ركووك
پ. سلێمانى 1-1 سلێمانى
دهۆك 0-0 ئارارات
شێروانه 1-2 هه‌ولێر
رێزبه‌نديا خولێ:
زێره‌ڤانى 16 خال
دهۆك 15 خال
زاخۆ 15 خال
نه‌ورۆز 14 خال
سلێمانى 11 خال
پ. هه‌ولێر 9 خال
برايه‌تى 9 خال
ئارارات 8 خال
هه‌ولێر 7 خال
شێروانه 7 خال
كه‌ركووك 6 خال
پ. سلێمانى 4 خال
هندرين 4 خال
ئه‌ڤرۆ نيوز:
بڕياره د چه‌ند رۆژێن داهاتى دا سه‌رۆك وه‌زيرێن عيراقێ سه‌ره‌دانا توركيا بكه‌ت و ل گه‌ل به‌رپرسێن ئه‌وى وه‌لاتى دانوستاندنێ ل سه‌ر چه‌ند پرسێن گرنگ بكه‌ت.
بالوێزخانا توركيا ل به‌غدا د به‌ياننامه‌كێ دا كو وێنه‌ك ب ده‌ست ئه‌ڤرۆ نيوز كه‌فتيه راگه‌هاند كو بڕياره 25ى ڤێ هه‌يڤێ حه‌يده‌ر عه‌بادى سه‌رۆك وه‌زيرێن عيراقێ سه‌ره‌دانه‌كا دو رۆژى ببه‌ته ئه‌نقه‌ره‌يا پايته‌ختێ توركيا و تێدا چه‌ندين كۆمبوونێن ستراتيژى ب سه‌رۆكاتيا هه‌ردو سه‌رۆك وه‌زيران ئه‌نجام بده‌ت.
ئاماژه ب وێ چه‌ندێ ژى كريه كو عه‌بادى دێ د ڤێ سه‌ره‌دانا خوه دا ل گه‌ل ئه‌حمه‌د داود ئوغلۆ سه‌رۆك وه‌زيرێن توركيا به‌حس ل بهێزكرن و ئاسايكرنا په‌يوه‌نديێن ناڤبه‌را هه‌دو وه‌لاتان كه‌ت و بزاڤێ كه‌ت د هه‌موو روويان دا ب گشتى و د روويێ ئابوورى و بازرگانى ڤه هه‌ڤكاريا هه‌ڤدو بكه‌ن.
ئه‌ڤ سه‌ره‌دانا عه‌بادى دێ هێت پشتى رۆژا پێنجشه‌مبى سه‌رۆكێ حوكمه‌تا هه‌رێما كوردستانێ، نێچيرڤان بارزانى، ب سه‌ره‌دانه‌كێ گه‌هشتبوو توركيا و دوهى رۆژا ئه‌ينى ژى ل گه‌ل هه‌ر ئێك ژ سه‌رۆك وه‌زيرێن توركيا و سه‌رۆك كۆمارێ توركيا كۆمبوو.
سه‌باح عه‌لی شه‌ریف ئه‌ندامێ جڤاتا پارێزگه‌ها دهۆكێ و سه‌رۆكێ لیستا ئێكگرتوو بۆ ئه‌ڤرۆ نیوز گۆت: “بڕیاره ل حه‌فتیا بهێت دلشاد شه‌هاب به‌رپرسێ فايلا دانوستاندنی یێ پارتی ديموكراتى كوردستان ل گه‌ل لیستێن دی یێن جڤاتا پارێزگه‌هێ و ب تایبه‌تی ل گه‌ل ئێكگرتوو ل سه‌ر پرسا به‌لاڤكرنا پۆستێن پارێزگه‌هێ كۆم بن”.
سه‌رۆكێ ليستا ئێكگرتوو ل جڤاتا پارێزگه‌ها دهۆكێ ئاشكه‌را كر كو ئه‌وان وه‌كو ئێكگرتوو خوه به‌رهه‌ڤكریه ژ بوو ئه‌وێ كۆمبوونێ دخوازيێن خوه ژی دیار كرینه ئه‌و ژی جێگره‌كێ پارێزگارى ل گه‌ل چه‌ند پۆستێن ئيدارى و رێڤه‌به‌رێن ناحيا و قايمقامانن.
سه‌باح عه‌لی دازانین ژى كو ئه‌وا داخواز دكه‌ن ب گوره‌يی پیڤه‌رێ ده‌نگ ب ده‌ست ڤه ئینانا كورسیێن جڤاتێ یه كو ئێكگرتوو لیستا دويێ یه.
هه‌روه‌سا ناڤبری گۆتژى: “مه‌رج نينه ئه‌و هه‌موو تشتێن ئه‌م داخواز دكه‌ین ب ده‌ستڤه بينين، به‌لكو ئه‌ڤه دێ بنه بابه‌تێ دانوستاندنێ د ناڤبه‌را مه دا”.
دلڤین محه‌مه‌د سه‌لیم ئه‌نداما جڤاتا پارێزگه‌ها دهۆكێ ژ لیستا ئیكه‌تیێ بۆ ئه‌ڤرۆ نیوز راگه‌هاند: “ئه‌م ژی چاڤه‌رێينه بۆ دانوستاندنان و دخوازين جێگرێ پاریزگاری ب مه بهێته دان و هه‌كه نه هێته دان، دڤێت قایمقامێ ناڤه‌ندا دهۆكێ ب ئێكه‌تى بهێته دان”.
دلڤینێ ئه‌و چه‌نده ژی دیاركر كو هه‌تا نها ئه‌و نه‌هاتينه ئاگه‌هدار كرن كو دانوستاندن دێ كه‌نگی هێنه كرن.
نازك محه‌مه‌د عه‌لی ئه‌نداما جڤاتا پارێزگه‌هێ ژ لیستا گۆڕان بو ئه‌ڤرۆ نیوز گۆت: “هه‌تا نها چ روونشتن نه‌هاتینه كرن بۆ پارێزگه‌ها دهۆكی ل سه‌ر ئاستێ لیستان و ب نێرینا من بابه‌تێ دهۆكێ ل سه‌ر ئاستێ بلندێن پارته‌یایه‌تیێ دهێته به‌حسكرن و هاتیه گرێدان ب پاریزگه‌ها سلیمانیێ و هه‌له‌بچه و هه‌ولێرێ ڤه”.
نازك محه‌مه‌د ئه‌و چه‌نده ژی دیاركر كو ل دهۆكێ چ روونشتن نه‌هاتینه كرن، به‌لێ پشتی چاره‌كرنا پرسا پاریزگه‌هێن سلێمانیی و هه‌له‌بچه و هه‌ولێر دڤێت دهۆك ژی بهێته‌كرن چونكو نابیت ل پارێزگه‌هه‌كێ پارته‌كێ به‌هر هه‌بیت و ل پاریزگه‌هه‌كا دی پارتێن دی بێ بار بكه‌ت.
دا زانين ژى كو هێشتا ژ بوو ئاماده‌كرنا داخوازيێن خوه وه‌كو ليستا گۆڕان ل پارێزگه‌ها دهۆكێ ئه‌وان چو كۆمبوون نه‌كرينه.
ئه‌ڤرۆ نيوز، نەوزاد زادە ھلوری:
کۆمەلگەھا وەلات ژێری ل دەڤەرا بارزان دھێتە نیاسین مەزنترین کۆمەلگەهـ ل قەزا مێرگەسوور (دەڤەرا بارزان) و ھەیا نھا چو باژێرڤانی نینن.
نادر بازی سەرۆکێ باژێرڤانیا بازێ یا سەر ب دەڤەرا بارزان دیارکر کو کۆمەلگەھا وەلات ژێری نھا سەر ب وان ڤەیە و بۆ ئەڤرۆ نیوز گۆت: “نھا ل کۆمەلگەھا وەلات ژێری پتری 700 سەرۆک خێزانان تێدا ئاکنجی نە و رێژەکا زۆرا گلێشی لێ ھێتە کۆمکرن و بارگرانیەکا مەزن ل سەر باژێرڤانیا بازێ و کۆمپانیەکا گلێشی ل دەڤەرا بارزان درۆست دکەت و ئەڤ ئێكه ژی دبیتە سەدەما گازندا مە و کۆمپانیێ و وەلاتیان، ژ بەرڤێ نھا نەخشەیێ باژێرڤانیێ ل بەرەستێ مەیە و ئەم یێ کار ل سەر باژێرڤانیەکا تایبەت ژ بۆ وان دکەین و ھەردەما بارێ سیاسی و ئابووریێ کوردستانێ جێگیر بیت ب ئانەھیا خودێ ئەڤ بڕیار ژی دێ ھێتە بجھکرن”.
نادر بازی سەرۆکێ باژێرڤانیا بازێ زێدەتر گۆت: “ھەردو گوندێن سەڤرە و بالندا دێ کەڤنە سەر ب باژێرڤانیا کۆمەلگەھا وەلات ژێری کو ھەموو پێکڤە نێزیکێ 1200 خێزانان ب خوه ڤە دگریت و سنورەکێ کارگێری و جوگرافیێ مەزنە و ئەڤ ئێكه ژی دێ بیتە سەدەم کو کارێن وەلاتیان باشتر برێڤە بچن”.
ئەڤرۆ نیوز، ھەیفا دۆسکی:
عەبدولا ماسیکی رێڤەبەرێ گشتیێ چاڤدێریا بازرگانی ل دھۆکێ بۆ ئەڤرۆ نیوز گۆت: “ژ بەر خەلک گەلەک گازندا ژ گرانیا جوانکاریان دکەن ب تایبەت بھایێ چێکرنا بووکان بۆ دەمەکێ کێم ھژمارەکا مەزن ژ پارەیی وەردگرن”.
زێدەتر گۆت: ” مە تیم ژی درۆست کرینە و ل سەر وان دگەرن ژ بوو پتر ئەو جوانکاریە بزانن کا حوکمەتێ چاڤێ خوە لێ نەگرتیە و ئاگەە ژ وان ھەیە بۆ ھەر رەفتارەکا ئەو دکەن”.
سالح کەمەکی بەرپرسێ ھۆبا ئابووری ل ئاسایشا گشتی یا پارێزگەھا دھۆکێ گۆت: “ژ بەر بھایێ جوانکاریان گەلەک گازندە ل سەر دھێنە کرن، لەورا ژی مە د بەرنامەی دا ھەیە کو ئەم د گەل جھێن پەیوەندیدار ب روونین و رێژەیەکا دەست نیشانکری بدانین کو نابیت پتر لێ بکەن، ژ بەر ئەگەر بازارێ ئازاد ژی بیت وەسا دێ کاریگەری کەڤیتە سەر ھەموویان”.
زێدەتر گۆت: “یێ بووکا و ئافرەتا بۆ خوە ب دەرفەت دبینن، ژ بەر ھندێ ژی ل ڤان نێزیکان ئەم دێ مایێ خوە د کارێ وان کەین ژ بەر بەرژەوەندا گشتی”.
ئه‌ڤرۆ نيوز:
رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى ئه‌سمانێ دهۆكێ ژ ساهياتيێ دێ به‌ر ب ئه‌ورى چيت.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجامێ كارتێكرنا فشارێن بلند يێن ده‌ريا ناڤه‌راست ل توركيا بۆ سه‌ر هه‌رێما كوردستانێ ئه‌و پێشبينى دكه‌ن كو سوبه‌هى رۆژا شه‌مبى رێكه‌فتى 20\12\2014 ئه‌سمانێ دهۆكێ ژ ساهياتيێ دێ به‌ر ب ئه‌ورى چيت.
رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه كو پلا گه‌رماتيێ دێ بلندتر بيت هه‌ڤبه‌ركى ل گه‌ل رۆژێن بۆرى ب ره‌نگه‌كى د ناڤبه‌را 11 هه‌تا 19 پلان دا.
ل دۆر پێشبينيا رێژا هه‌وايى و مه‌ودايێ ديتنێ ژى دايه زانين كو دێ ئاراسته‌يێ وى باشوورێ رۆژهه‌لات بيت ب ره‌نگه‌كى دێ يێ ناڤه‌ندى بيت د ناڤبه‌را پێنج بۆ 20 كليۆمه‌تر د ده‌مژمێره‌كێ و ماوێ ديتنێ ژى دێ 10 كيلۆمه‌تر بيت.
ئه‌ڤرۆ نيوز:
ئه‌ڤرۆ مه‌سعود بارزانى، سه‌رۆكێ هه‌رێما كوردستانێ، ب هه‌لكه‌فتا هاتنا جه‌ژنا رۆژوويێن ئێزدى په‌يامه‌ك به‌لاڤكر و تێدا سه‌ركه‌فتنا شه‌رێ ده‌ڤه‌را شنگال و ب ئێكگه‌هشتنا هێزێن پێشمه‌رگه‌يى وه‌كو جه‌ژنانه ديارى گه‌لێ ئێزدى كر.
ئاماژه ب وێ چه‌ندێ ژى كر كو هه‌ر ده‌ما جاره‌كێ بۆ وان ده‌رفه‌ت دروست بيت و كينا خوه به‌رامبه‌ر كورد و كوردستانێ ده‌ربكه‌ن، ل دووماهيێ دێ باجا تاوانێن خوه ده‌ن و دڤێت تيرۆرستێن داعش ببنه سه‌ربۆر بۆ هه‌موو دوژمنان.
ئه‌ڤه ژى ده‌قێ په‌ياما سه‌رۆكێ هه‌رێما كوردستانێ يه:
ب ناڤێ خودێ مه‌زن و دلۆڤان
خۆشحالم كو د هه‌لكه‌فتا جه‌ژنا رۆژيێن ئێزدى دا سه‌ركه‌فتنه‌كا مه‌زن يا پێشمه‌رگه‌يێ كوردستانێ ب ديارى پێشكێشى خووشك و برايێن ئێزدى جكه‌ين و ئه‌ڤه ژى باشترين پيرۆزباهى يه لێ دكه‌ين.
ده‌سپێكرنا ئۆپه‌رسيۆنا رزگاركرنا ده‌ڤه‌را شنگال ل رۆژا ئالايێ كوردستانێ و گه‌هشتنا پێشمه‌رگه‌يى بۆ چيايێ شنگال ل 18\12\2014 رامانا خوه هه‌يه. بلا هه‌موو دوژمن و نه‌حه‌ز بزانن هه‌كه جاره‌كێ بۆ وان ده‌رفه‌ت دروست بيت و كينا خوه به‌رامبه‌ر كورد و كوردستانێ ده‌ربكه‌ن، ل دووماهيێ دێ باجا تاوانێن خوه ده‌ن و دڤێت تيرۆرستێن داعش ببنه سه‌ربۆر بۆ هه‌موو دوژمنان.
هيڤيدارم ب ئێكگه‌هشتنا ڤێ سه‌ركه‌فتنا مه‌زن و جه‌ژنا رۆژيێن خووشك و برايێن ئێدزى ببيته ئه‌گه‌رێ ساربوونا برينێن مه و ئه‌و عه‌زيزێن گه‌لێ كوردستانێ ژى ژ وێ چه‌ندێ پشت راست بن كو سه‌رێ دوژمان دێ كه‌ڤيته ژێر پێيان.
هزار سلاڤ ل گيانێ پاكێ شه‌هيدێن هه‌رده‌م ساخ. دوعايێن ساخبوونا ب له‌ز بۆ برينداران دكه‌م و ده‌ستوچاڤێن هه‌موو پێشمه‌رگێن قاره‌مان ماچ دكه‌م كو ئه‌ز دزانم چو قاره‌مانيه‌كا مه‌زن تۆماركريه.
مسعود بارزانی
سەرۆكێ هەرێما كوردستانێ
19ـی 12ـی 2014
نيشاندان