ئەڤرۆ:

ھەفتیا بۆری سەرۆک کۆمارێ تورکیا رەجەب تەیب ئەردۆگان د گۆتارەکێ دا ل باژارێ ئەنقەرە دیار کربوو کو تورکیا ب مافێ خوە دزانیت دەستێوەردانێ د کاروبارێ سووریە، لیبیا و مسرێ بکەت، چونکو ل وان وەلاتان زۆرداریەکا مەزن ل موسولمانان دھێتە کرن و تورکیا نەشێت ل ھەمبەر کریارێن دەستھەلاتێن وان وەلاتان بێدەنگ بیت.
پشتی داخۆیانیێن ئەردۆگانی پرانیا وەلاتێن عەرەبی دژبەریا خوە ل ھەمبەر وێ یەکێ دیار کربوون و دوھی شاھێ ئوردنێ شاە عەبدوللایێ دویێ سەرەدانا سعوودیێ کر و ل گەل شاھێ وی وەلاتی کۆمبوونەک دروست کر، پشتی کۆمبوونێ ھەر دو ئالیان دیار کرن کو ھەلویستێ ئەردۆگانی نیشا ددەت تورکیا رۆلەک مەزن بۆ ئالۆزکرنا رەوشا ناڤخوەیی ل وەلاتێن عەرەبی دگێریت و ئەم ب توندی ھەلویستێ ئەردۆگانی رەت دکەین و دڤێت سەرۆک کۆمارێ تورکیا داخوازا لێبۆرینێ ژ وەلاتێن عەرەبی بکەت.
شاھێ ئوردنێ دیار کر کو وەلاتێن عەرەبی پەیوەندیێن باش ل گەل تورکیا ھەنە، لێ نابیت تورکیا ڤێ یەکێ ب مافێ خوە بزانیت کو دەستێوەردانێ د کاروبارێ ناڤخوە یێ وان وەلاتان بکەت، چونکو ئەو یەک خزمەتا ئاشتی و ئارامیا دەڤەرێ ناکەت و دێ رەوشا دەڤەرا مە پتر ئالۆز کەت و دڤێت تورکیا رێزێ بۆ سەروەریا ھەموو وەلاتێن عەرەبی بگریت و نەبیتە پشکەک ژ ئالۆزیێن ناڤخوەیی و مسر و سووریێ و ھەکە تورکیا دخوازیت خزمەتا دۆستاتی و براتیێ بکەت بلا بھێلیت دا خەلکێ وان وەلاتان بخوە پرسێن خوە یێن ناڤخوەیی چارە بکەن، چونکو ھەلویستێ تورکیا رەوشا وان وەلاتان ئالۆزتر دکەت.

ئەڤرۆ:

دوھی ل باژارێ سیدی ل وەلاتێ ئۆسترالیا گرۆپەکێ چەکدار ھێرشی کافەکێ کرن و ب دەھان کەس دەستەسەر کرن، ھێزێن ئێمناھیێ ب ھەموو رەنگەکێ دەست ب پێرابوونێن ئێمناھیێ کرن و ٥ کەسان شیان خوە ژ دەستێ وێ گرۆپا توندرەو قورتال بکەن.
کۆچکا سپی یا ئەمریکا و پەرلەمانێ ئورۆپا د داخۆیانیێن جودا جودا دا دیار کرن کو ھێرشا ل ئوسترالیا مەترسیا تیرۆرێ ل وی وەلاتی و ئورۆپا نیشا ددەت و رەنگە ھێرشێن ب ڤی رەنگی زێدەتر بن و ژ بەر ڤێ یەکێ ژی دڤێت دەست ب پێرابوونێن پێدڤی ل ھەمبەر وان گرۆپان بھێتە کرن، چونکو گرۆپێن وەک داعش و قاعیدە دخوازن ل ھەموو جیھانێ شەرێ ئایینی و مەزھەبی د ناڤبەرا پێکھاتێن جڤاکێ دروست بکەن و دڤێت ھەموو وەلاتێن جیھانێ بۆ ژناڤبرنا داعش و قاعیدە ھەڤکاریا ھەڤدو بکەن.
ل ئالیێ دی جڤاتا ئیسلامی یا ئوسترالیا د داخۆیانیەکا فەرمی دا راگەھاند کو ئەو کەسێن دەست ب کارەکێ وەسا کرینە، مرۆڤێن تیرۆرستن و ئەم ب توندی کارێن وان رەدت دکەین و د ئایینێ ئیسلامی دا جھێ کریارێن وەسا نینە و کریارێن وەسا نەشێن براتی و پێکڤەژیانا د ناڤبەرا ئایینێن جودا خراب بکەت و ژ بەر ڤێ یەکێ ژی داخواز ژ ھەموو خەلکێ موسولمان ل ئوسترالیا دکەین کو دژبەریا خوە ل ھەمبەر کریارێن گرۆپێن وەسا دیار بکەن. چونکو کارێن ئەو دکەن تنێ زیانێ دگەھیننە ناڤێ ئیسلامێ و خزمەتا ئایینی پیرۆز یێ ئیسلامێ ناکەت و ئەم ب توندی وێ کریارێ شەرمزار دکەین.
ل ئالیێ دی ئاژانسا رویترز یا نووچەیان د راپۆرتەکێ دا دیار کر کو رەنگە ل وەلاتێن ئورۆپا ژی کریارێن وەسا روو بدەن و بەری نھا ژی ل سوید ھندەک کەسێن کو خوە وەک ئالیگرێ داعشێ دابوونە نیاسین بزاڤ کربوون کو ھێرشی ناڤەندەکا بازرگانی بکەن لێ ھێزێن ئێمناھیێ شیان د زووترین دەم وێ گرۆپێ دەستەسەر بکەن و د ئەنجاما ڤەکۆلینێ دا دیار بوویە کو گرۆپێن توندرەو بزاڤێ دکەن ل ئورۆپا چالاکیێن تیرۆرستی بکەن.
ل ئالیێ دی ل بەلجیکا ژی گرۆپەکێ توندرەو چەند کەسێن مەدەنی دەستەسەر کرن و نھا وەلاتێن ئێکەتیا ئورۆپا سەبارەت ب مەترسیا تیرۆرێ دێ کۆمبوونەکا نەئاسایی گێرن.