بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان راگەهاند: پەیاما مە بۆ هەرێما كوردستانێ و ئیراقێ ئەوە كو ئەم ل گەل زڤراندنا هەڤپشكیێ، هەڤسەنگیێ و لهەڤكرنێ نە، هەروەسا پشتڕاستی ژی دا كو پارتی دیموكراتی كوردستان د ڤان هەلبژارتنێن جڤاتا نوونەرێن ئیراقێدا دشێت دشێت ئێك ملیۆن دەنگان ب دەستڤە بینیت.
فازل میرانی، بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان، د چاڤپێكەفتنەكێدا ل گەل كەنالێ ( الحدث)گوت» پێدڤییە هەموو ئالیێن ئیراقی پێكڤە كاربكەن بۆ چارەسەركرنا كێشەیان».
بەرپرسێ دەستەیا كارگێرییا مەكتەبا سیاسی یا پارتی گوت ژی» نە رەوشا سوننەیان ل ئیراقێ ژ رەوشا كوردان باشترە، نە رەوشا شیعەیان ژی ژ یا كوردان باشترە، لەوما دڤێت ئەم هەموو پێكڤە كاربكەین بۆ باشتركرنا رەوشێ».
سەبارەت بانگەشەیا هەلبژارتنێن جڤاتا نوونەرێن ئیراقێ، فازل میرانی دبێژیت» رەوشا هەرێما كوردستانێ یا ئارامە و بانگەشەیێن هەلبژارتنان ب ئارامێ بڕێڤە دچن».
دیاركر ژی» رەوشا تەناهییا هەرێما كوردستانێ یا ئارامە و سوپاس بۆ خودای هەتا نوكە هیچ كریارەكا تیرۆرستی تێدا روو نەدایە».
بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان د درێژییا ئاخڤتنێن خوە دا ئەوژی بەرچاڤكر» نەك تنێ گرنگیێ ب ئارامییا هەرێما كوردستانێ د دەین، بەلكو گرنگیێ ب ئارامییا هەموو ئیراقێ ژی ددەین».
ل دۆر شێوەیێ كاركرنا كۆمسیۆنا بلند یا سەربخوە یا هەلبژارتنان ل ئیراقێ، فازل میرانی گوت» وەك پارتی دیموكراتی كوردستان مە كۆمەكا تێبینی و سەرنجێن قانوونی ل سەر كاركرنا كۆمسیۆنێ هەنە».
بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان باس ل سیستەمێ هەلبژارتنێن جڤاتا نوونەرێن ئیراقێ كر و گوت» سیستەمێ هەلبژارتنێن ئێك بازنەیی مە پێ باشتر بوو نەك فرەبازنەیی، چونكە نوكە بەربژارەكێ كورد بۆ چوونا جڤاتا نوونەرێن ئیراقێ پێدڤی ب زێدوتر ژ 20 هزار دەنگایە».
هەڤدەم دوپاتی ل وێ چەندێ كر» راستە پرۆسەیا هەلبژارتنان ل ئیراقێ یا گرنگە، بەلێ یا ئێكلاكەر نینە».
فازل میرانی رۆهنكر ژی» پشتڕاستین پارتی دیموكراتی كوردستان د ڤان هەلبژارتناندا دێ شێت ئێك ملیۆن دەنگان ب دەستڤەئینیت» هەروەسا دیاركر ژی» پێنگاڤێن گرنگ ژی پشتی پرۆسەیا هەلبژارتنان دێ دەستپێكەن».
بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان پەیامەك ئاراستەی خەلكێ هەرێما كوردستانێ و ئیراقێ كر و ئاماژە ب وێ چەندێ كر» پەیاما مە بۆ هەرێما كوردستانێ وئیراقێ ئەوە كو ئەم ل گەل زڤراندنا هەڤپشكیێ، هەڤسەنگیێ و لهەڤكرنێ نە. ئەم كار دكەین بۆ بەرقەراركرنا ئارامییا وەلاتی و دخوازین ئیراق ببیتە وەلاتەكێ خودان سەروەری».

نێچیرڤان بارزانی، جێگرێ سەرۆكێ پارتی دیموكراتی كوردستان، ل دهۆكێ، د چارچۆڤەیێ بانگەشەیا پارتی بۆ هەلبژارتنێن جڤاتا نوونەرێن ئیراقێ ، ل گەل هەژمارەكا مەزن یا مامۆستا و سەرپەرشتێن پەروەردەیی، رێكخراوێن قوتابییان و لاوان و ئافرەتان و كۆمەلە و سەندیكایێن پیشەیی و كادرێن پارتی ل سنوورێ پارێزگەها دهۆكێ كۆمبوو.
نێچیرڤان بارزانی د پەیڤەكێدا باس ل گرنگییا هەلبژارتنان و رۆلێ رێكخستنێن پارتی ل سەر ئێخستنا لیستا هەژمار 275 یا پارتی دیموكراتی كوردستان كر و دوپاتی ل وێ چەندێ كر كو پارتی كار دكەت بۆ وێ چەندێ قووناغا داهاتی ل ئیراقێ، قووناغا بجهئینانا دەستووری بیت.
دەقێ پەیڤا نێچیرڤان بارزانی، جێگرێ سەرۆكێ پارتی دیموكراتی كوردستان :
هەڤالێن هێژا:
مامۆستا و سەرپەرشتیارێن پەروەردەیی
مامۆستایێن زانكویێ
سەندیكا و كۆمەلە و ریكخراوێن پیشەیی
كادرێن ماندینەناس و خەباتكەرێن پارتی دیموكراتی كوردستانێ
سەرپەرشت و بریكارێن پارتی كو بێگومان ئەڤە گەلەك گەلەك د گرنگن ل بنگەهێن دەنگدانێ
قوتابی و لاوان و ئافرەتان
وەرزشڤانان، بێگومان وەرزش من ژی ڤەدگریت و یانەیێن وەرزشی
هوون هەموو بخێرهاتن سەرچاڤان
هوون هەموو لایەك گەلەك بخێر بهێن، ب راستی گەلەك یێ خوەشحالم كو ئەڤرۆ ل دهۆكا رەنگین‌، ل بەهدینان ئەم جارەكا دی دگەهینە ئێك دگەل جەماوەرێ خوەشتڤیێ دهۆكێ و سێمێلا عەزیز، هوون هەموو لایەك بخێر هاتن سەر چاڤان.
بەهدینان ب رەنگەكێ گشتی، بەهدینان ئەو چیایێ بلند، یێ هەرگاڤ ل هەموو نەخوەشییان و ل زەحمەتییان، هەرگاڤ ل پشت پارتی راوەستایە و بەردەوام بێئومێدی دایە نەیارێن پارتی و بەهدینانن یا دگەل پارتی مایەڤە و دێ مینیت.
دهۆكا رەنگینە و هێزا پارتییە، خوەشتڤییا مە هەموویایە، بەهدینانن و دهۆك و خوەشتڤییا سەرۆك بارزانییە ژی. ب راستی ب ڤێ سەرەدانا مە بۆ دهۆكێ خوەشییا مە یا زێدەتر بووی، ئەم گەلەك د خوەشحالین ب وان پێنگاڤێن كو نوكە ل گوندێن ڤێ دەڤەرێ هەین، ب رەنگەكێ گشتی ئاڤەدانیێ جارەكا دی دەستپێكریەڤە و دەنگێ تەقێ نەمایە و نەخوەشی نەمایە. هیڤیدارین ئەڤە یا بەردوام بیت و گوندێن مە ئاڤەدان ببن و خوەشی هەر هەبێت بۆ ڤێ دەڤەرێ و بۆ ڤی وەلاتی.
هەڤالینە، جارەكا دی ئەم لڤێرێ یێن كۆم بووین، دا باسێ بابەتەكێ گرنگ بكەین ئەو ژی بابەتێ هەڵبژارتنێن جڤاتا نوونەرێن ئیراقێیە كو ب راستی ئەڤ هەلبژارتنە، هەلبژارتنێن گرنگن بۆ پارتی، بۆ كوردستانێ، بۆ پاشەڕۆژا مللەتێ مە.
بەری كو وە ببینم من گوت ئەز دێ داخوازییەكی ژ هەوە كەم، بەلێ بەری ئەز داخوازییا خوە بكەم، هەوە ب خوە یا بلند كری، من گوت دا ئەز بێژمە هەوە: پارتی بەر ب ئێەك ملیۆن دەنگان، ئەرێ ئێك ملیۆن، بەلێ، بەلێ، درستە.
هەڤاڵینە.
هوون نوێنەرێن هەموو جڤاكێنە، ژبەر وێ چەندێ ژی هوون راستییا جڤاكێ دزانن كا چەوانە، پێدڤیێن جڤاكێ هوون دزانن، خەون و ئومێدێن جڤاكێ ژی هوون دزانن، چونكی رۆژانە كارێ هەوە ل گەل جڤاكێیە، ژبەر وێ چەندێ هەڤالێن هێژا كاریگەرییا هەوە ب تایبەتی یا هەوە ل سەر جڤاكێ، كارگەرییەكا گەلەك گرنگە. هوون داینەمۆیا جڤاكا كوردستانێنە و وەك هەموو جاران بەری نها ژی هوون كلیلا سەركەفتنا پارتینە ل بەهدینانن.
وەختێ ئەم باسێ سەركەفتنێ دكەین ل بەهدینانن، وەختێ ئەم باسێ سەركەفتنا پارتی دكەین، ئەم باسێ سەركەفتنا كوردستانێ دكەین، هەكە پارتی یا ب هێز بێت، كوردستان یا ب هێزە، دڤێت ئەڤە بمینیت.
هەڤالینە، براینە، عەزیزینە.
پارتی ب هەبوونا هەوە، ب دلسۆزییا هەوە و ب وەستیانا هەوە، كاروانەكێ خەباتێ یێ دەستپێكری و یا پشتڕاستە كو ئەڤ كاروانێ خەباتێ ب هیممەتا خودێ و ب حەول و قوەتێن خودێ و ب پشتەڤانییا هەوە دێ یا بەردەوام بیت. هەوە ئێك تشت سەلماند هەڤالینە، ئێك خال گەلەك یا گرنگە كو هەوە سەلماند و بەری نها ژی هەوە یا سەلماندی و نها و بۆ پاشەڕۆژێ ژی مادەم هوون خودانێن پارتینە، باوەرییا هەوە هەبیت پارتی دێ یا سەركەفتی بیت، چونكی هوون خودانێن ڤێ حزبێنە.
ژ بەر هندێ هەڤالینە سۆزا مە چییە؟ سۆزا مە ئێك تشتە، سۆزا مە ئەوە ڕۆژا 11 ێ مەها داهاتی پێكڤە ئەم هەموو بچینە سەر سندۆقێن دەنگدانێ و دەنگێ بدەینە لیستا 275 یا پارتی دیموكراتی كوردستانێ یا كو دێ خزمەتا هەوە كەت.
هەڤالینە.
دا ئەز باسێ خالەكێ بكەم، ئەڤ هەلبژارتنە بۆچی د گرنگن؟ مە گەلەك هەلبژارتن یێن كرین، بەلێ گرنگییا ڤان هەلبژارتنان چییە؟
هەڤالینە، دا ئەز تشتەكێ بۆ هەوە بێژم، هوون هند د گەرمن پێدڤی ناكەت، ئەز بێژم ئەز بچم باشترە. هەوە هند ئەز پشتڕاست كرم، ئەز یێ د ئاخڤم، ئێك ملیۆن دەنگ یێن بلند دبن د دەستێن هەوەدا.
دەرفەت هەیە باسێ گرنگییا هەلبژارتنان بكەم؟ هەڤالینە دا باس بكەین و دەرفەتێ بدەن، بۆچی پێدڤییە پارتی ل بەغدا یا بهێز بیت؟ ئەگەر چنە؟
ل سالا 2003 وەختێ رژێما ئیراقێ رووخیای، پارتی رۆلەكێ بنگەهین هەبوو د ڤێ پرسێدا، ل سالا 2005 دەستوورێ هەردەمێ ئیراقێ هاتە نڤیسین، هندەك مافێن مە یێن پێدڤی د دەستوورێ ئیراقێدا هاتن جهگیركرن. دەستكەفتەكا مەزن بوو و جهێ سەربلندییەكا مەزن بوو. پارتی و ب تایبەتی ئەز بێژم پێداگرییا سەرۆكێ پارتی، بوو ئەگەرێ وێ چەندێ پشكەكا مەزن یا مافێن كوردستانییان، ئەڤ خەلكێ ل كوردستانێ دژیت، ب هەموو پێكهاتان ڤە، هاتە جهگیركرن د دەستوورێ ئیراقێدا. ئەڤە پێنگاڤەكا گەلەك گرنگ بوو. پشتی هنگی ئیراق كەفتە قووناغا شەڕێ ناڤخوە و ئاریشێن ناڤخوە و شەڕێ داعشێ. شەڕێ داعشێ ل بیرا وەیە، ئەو قووناغ و تا نها و پشتی شەڕێ داعشێ، نۆكە ب ڕاستی قووناغەكا نوو یا ل ئیراقێ دەستپێكریە.
هەڤالینە، ئەڤ قووناغە بۆ هەرێما كوردستانێ قووناغەكا گەلەك گرنگە؟ بۆچی یا گرنگە؟ ئەم ناڤێ وێ دێ دانین قووناغا بحهئینانا دەستوورێ هەردەمێ ئیراقێ. دەستوورێ هەردەمێ ئیراقێ، بۆ مە ل هەرێما كوردستانێ گەلەك یێ گرنگە بهێتە بجهئینان. ئەڤ ئاریشێن د ناڤبەرا هەرێما كوردستانێ و ئیراقێدا هەین، ئەنجامێ هندێیە كو دەستوور یێ هاتیە پشتگوه هاڤێتن. جارێ ل سەر مووچەی، مە ئاریشە یێن هەین، ل سەر ماددەیا 140 مە ئاریشە یێن هەین. ئەڤە هەموو ئەنجامێ هندێیە چونكی دەستوور وەك خوە ناهێتە بجهئینان، ئەڤ قووناغا پشتی ڤان هەلبژارتنان، دێ ناڤێ وێ دانین قووناغا بجهئینانا دەستوورێ ئیراقێ.
ژ بەر ڤێ چەندێ هەڤالینە من دڤێت ئەز لڤێرە ب زەلالی باخڤم. ئەڤ قووناغا دەستپێكرنا بجهئینانا دەستوورێ ئیراقێ، گەلەك و گەلەك ژ وێ قووناغێ گرنگترە ئەوا كو دەستوور تێدا هاتییە نڤیسین. باشە كی دێ بەڕەڤانیێ ل ڤان تشتان كەت؟ ئەو هێزا كو دێ بەڕەڤانیێ ل ڤان دەستكەفتان كەت پارتییە. كا دێ بەرسڤا ڤێ پرسیارا من بدەن. پارتی دێ چەوا یا ب هێز بیت ل بەغدا؟
هەڤالینە، ئەڤ قووناغا بجهئینانا دەستووری یا گرنگە، بۆ كوردستانێ یا گرنگە. ئەگەر مە بڤێت كوردستانەكا ب هێز مە هەبیت. سۆزا مە و سۆزا هەوە رۆژا 11 مەها 11، پێدڤییە ئەم سۆزا خوە بۆ خوونا شەهیدێن خوە و خەباتا پێشمەرگێن خوە كو ئەڤرۆ ئەو تشتێ مە هەی لڤێرە ئەم هۆسا ب سەربلندی ئێكدو دبینین، ب راستی وەستیانا پێشمەرگێن مە یێن قەهرەمان و خوونا وان شەهیدایە یێن سەرێ خوە دانای. پێدڤییە ئەم ل رۆژا دەنگدانێ گەلەك ب هێزڤە بەرە ب سندۆقێن دەنگدانێ بچین، مە ئەڤ داخوازییە یا ژ خەلكێ خوەهەی ل دهۆكێ.
ئەگەر ئەم بەرێ خوە بدەینە پارتی. پارتی ناسنامەیا دۆزا كوردا و گەلی كوردستانێیە ب هەموو پێكهاتەیێن خوەڤە. پارتی ل سالا 1946 هاتە دامەزراندن وەكی هیڤییەكێ بۆ كوردستانێ و بۆ كوردایەتییێ هاتە دامەزراندن. د سەردەمەكێدا هاتە دامەزراندن كو كورد و كوردستان د ڕەوشەكا گەلەك خرابدا بوون. وێ رۆژی پارتی هاتە دامەزراندن، كورد و گەلی كوردستانێ د وی وەختیدا بێ چارە و بێ هیڤی و ئومێد مابوون.
پارتی هاتە دامەزراندن و هیڤی و ئومێد جارەكا دی بۆ كوردستانێ ڤەگەڕاندن. ئەنجامێ خەباتا پارتی ل سالا 1958 و ل 1961، ناڤێ كوردا كەفتە د دەستوور و قانوونێن ئیراقێدا. پارتی ل سالا 1961ێ رێبەراتییا مەزنترین شۆڕشا كوردایەتیێ كر. ل سالا 1970ئەو دەسكەفتێ كو پارتی ب بەڵگەیێ فەرمی و دانپێدانێ ب مافێن گەلێ كورد و كوردستانێدا دكەت ب دەستڤەئینای، ل سەر دەستێ پارتی هاتە ئەنجامدان. پارتی ئەڤ تشتە وەكی شانازییا خوە یا دیرۆكی دهێلیتەڤە. ئەو پارتی بوو ئەو دەستكەفت چێكری.
ل سالا 1991ێ دیسان پارتی رۆلەكێ سەرەكی هەبوو د رێكخستن و سەرئێخستنا سەرهەڵدانیدا. پارتی هێزا سەرەكی یا دانانا سیستەمێ دیموكراسی بوو ل ئیراقێ و ژبیر نەكەن ل سالا 1991ێ سەرۆكێ پارتی دیموكراتی كوردستان ئێكەم كەس بوو داخواز كری پرسێن مە یێن ناڤخوە ل كوردستانێ، ب رێكا سندۆقێن هەلبژارتنان، بهێنە ئێكلاییكرن. ئانكو داهێنەر و بەرێ بناغەیێ دیموكراسییەتێ ل كوردستانێ، پارتی دیموكراتی كوردستان بوویە. بلا ئەڤە ل بیرا مە بیت. ئەڤە دەستكەفتەكێ مەزن بوو بۆ مە.
ئەركێ پارتی خزمەتا كوردستانێیە ب هەموو پێكهاتەیان ڤە. ئەڤە ئەركەكە مە ب خوە دانای و ئەم سەربلندین ب ڤێ چەندێ. بیرا هەوە دهێت شەڕێ داعشێ ل سالا 2014ێ، خەلكێ هەوە ل دەڤەرا بەهدینان چ كر بۆ وی خەلكێ پێدڤی ب هەوە بووی؟ هەوە دەرگەهێن خوە بۆ ڤەكرن، هەوە مزگەفتێن خوە بۆ ڤەكرن، هەوە مالێن خوە بۆ ڤەكرن و هەوە قوتابخانەیێن خوە بۆ ڤەكرن. ئەڤ تابلۆیێ پێكڤەژیانا هەموو گەلان ل كوردستانێ، جهێ سەربلندی و شانازییا مللەتێ مەیە بۆ هەتا هەتایێ و جهێ شانازییا پارتییە هەتا بمینیت.
پارتی ئاسایش و ئارامی ل كوردستانێ جهگیر كر. پارتی خزمەت و ئاڤەدانی ئینایە كوردستانێ. ئەم نابێژین كێموكاسی نینن، ئەم نابێژین ئاریشە نینن، ئەم دبێژین هەنە، بەس بەرێ خوە بدەنە دەستكەفتێن پارتی. ئەگەر هەوە بڤێت ببینن پارتی چییە؟ پارتی ئانكو ئاڤەدانی، پارتی واتە ئاسایش، پارتی ئانكو ئارامی، پارتی ئانكو خزمەتگوزاری.
ئەڤرۆ ژی ئەگەر سەحكەینە دەستكەفتێن پارتی. خەرمانەكا مەزن ژ ئاڤەدانیێ ورێیان و ئاڤاكرنا نەخوەشخانەیان هاتینە كرن. هەروەسا دووپات دكەم ئایا كێماسی نەمانە؟ بەلێ كێماسی ماینە! هەر تشتەك یێ دروستە؟ نەخێر هەر تشتەك یێ دروست نییە. بەلێ ئەم د پشتڕاستین كاروانێ ڤێ ئاڤەدانیێ بەری نۆكە یێ دەستپێكری و نوكە و د پاشەڕۆژێ ژی ب هیممەت و پشتەڤانییا هەوە دێ بەردەوام بیت و دێ كوردستانێ ژ ڤێ قووناغێ گەهینیتە قووناغەكا گەلەك باشتر ب هیڤییا هەوە هەموویان.
هەڤالێن هێژا،
رێنماییا جەنابێ سەرۆك بارزانی بۆ مە، بەردەوام دوو تشتن، «بەرگری ژ ولاتی خوە و ئاڤەدانی. لایەكێ ئەم بەرگریێ دكەین و لایەكێ ژی ئاڤەدانیێ».
دا ئەم وەك كورد و خەلكێ ڤێ دەڤەرێ پرسیارەكێ بكەین؟ ئایا مەرج و پیڤەر چنە كو مرۆڤ دەنگێ خوە بدەتە حزبەكێ؟ مرۆڤ كو هزرا خوە بكەت و ل خوە بپرسیت: ئەز بۆچی دەنگێ خوە بدەمە ڤێ حزبێ؟ ب باوەرییا من دێ هزرا گەلەك تشتا كەت. دێ هزرێ كەت كا ئەڤ حزڤە چییە و دیرۆكا وێ چییە؟ ڤێ حزبێ بۆ كوردستانێ و مللەتێ كورد و بۆ كوردستانییان چ كرییە؟ دەستكەفتێن وێ چ بووینە؟ ئیدارەیا وێ یا چاوایە؟ ئەرێ بەرسڤا ڤان هەموو پرسیاران چ حزبەكە؟
بێگومان پارتییە. هەر پارتییە دشێت بەرسڤا خەلكی بدەتەڤە و بێژیت «ئەزم پارتیمە، ئەم هەموونە».
ئەڤ ئەنجامێن مە بدەستڤە ژی ئیناین، ژ ئەنجامێ بەردەوامییا پشتەڤانییا هەوە هەموویانە. بەلێ بۆ بەرسڤا ڤان پرسیاران، كا كێ ئاڤەدانی كر؟ كێ ئارامی دروست كر؟ كێ كوردستان ژ قووناغەكێ برە قووناغەكا دی؟ بەرسڤ «پارتی» یا ئێك ملیون دەنگ.
د ڕۆژێن بەرتەنگ و تاریدا، كێ هیڤی دا خەلكی؟ كی دێ شێت سوبەهییەكا باشتر دەتە ڤی مللەتی؟ كی دێ شێت پاشەڕۆژەكا باشتر دەتە ڤی میللەتی؟ هەڤالێن هێژا، هەر كەسەك و هەر دەنگدەرەك داخوازا بەرسڤا ڤان پرسیاران بكەت، پێدڤییە هوون بێژنێ كەرەمكەن، ئەڤە دیرۆكا مە. كەرەمكەن ئەڤە بەڵگەنامەیا مەیە بۆ ئاڤەدانییا كوردستانێ.
هەڤالان، بێگومان دەمێ كار بهێتە كرن، دێ كێموكاسی ژی هەبن. بەلێ وەك هەموو جاران، ب هەڤڕا دێ وان كێماسییان ژی چارەسەر كەین. ئەڤ ئاریشەیێن مە ل گەل بەغدا ژی هەین، دێ چارەسەر بن. من بەری نها ژی گوت: پرسا مووچەی، نابیت ببیتە منەتەك ل سەر سەرێ مە، یان ل سەر سەرێ هەوە. دڤێت مووچەخۆرێن هەرێما كوردستانێ وەكی مووچەخۆرێن ئیراقێ، پێدڤییە مووچەیێ وان بهێتە دان. نها ئەزێ كەیفخوەشم كو دبینم پێنگاڤێن باش بەر ب چارەسەركرنا ڤێ ئاریشەیێ هاتینە هاڤێتن و ئەڤە ژی كارەكێ گەلەك باشە.
هەڤالان، هوون نوێنەرێن راستەقینە یێن جڤاكێنە و داخوازا من ئەڤرۆ ژ هەوە، ئەم هەموو ب هەڤڕا ژ دل و ب گەرمی ل رۆژا 11/11/2025 بچینە سەر سندۆقێن دەنگدانێ و دەنگێ خوە بدەینە لیستا 275 یا پارتی دیموكراتی كوردستان.
پارتی ب هەوە یا پشتڕاست و پشتگەرمە و ژ بیر نەكەن كو پارتی حزبا خەون و هیڤییێن كوردستانێیە. بانگەشەیەكا ئارام و تەنا ل دووف ئاست و ناڤ و پێگەهێ پارتی بكەن. خوە نەئیننە ئاستەكێ نزم. بەرسڤا ئاخڤتنێن كەسێ ژی نەدەن، چونكی ژبەر ئێك ئەگەر، ئەو ژی «پارتی نە حزبا حساباتێن بچووكە ، پارتی حزبا ئارمانجێن مەزنێن گەلێ كوردستانێیە».
پارتی یا مەزنە وەكك دیرۆكا خوە، وەكی دەستكەفتێن خوە. پارتی یا مەزنە وەكی هیڤی و ئومێدێن كورد و كوردستانێ. پارتی یا مەزنە وەكی سەرۆكێ خوە. پارتی و گەلێ كوردستانی ب ڕێبەرییا سەرۆك بارزانی، هەر دێ بەردەوام بن د كاروانێ خەباتێدا و هیچ دەمەكێ ئەوا د شیاندا بیت، خەمساریێ نەكەت ژ خزمەتكرنا ڤی مللەتی.
وەكی هەر جار، ب راستی دڤێت بێژم كو من پەیڤەك نینە سوپاسییا هەموو مللەتێ كورد بكەم، ئەوێن كو ل پشت پارتی ڕاوەستاین و ب تایبەتی د هەلبژارتنێن بەری نوكەدا، هەوە سەرێ مە یێ بلند كری و هەوە سەرێ پارتی یێ بلند كری. ئەز باوەرم ڤێ جارێ ژی وەكو هەموو جاران هوون ناهێلن حزبا وە بشكێت.
دێ حزبا خۆ سەرئێخن؟ دێ كەینە چەند دەنگ؟ ئەم دێ دەنگێن خوە بۆچی دەینە پارتی؟ بۆ هندێیە داكو پارتی ل بەغدا یا ب هێز بیت دا كوردستانەكا بهێز مە هەبیت.
هەڤالان سویندا مە ب خودایێ مەزنە، پشتەڤانییا مە ژی ب خودایێ مەزنە. چونكی مە گوتییە و دێ بێژین: كوردستان پێدڤییە بمینیت، قەوارە و دەسهەلاتا هەرێما كوردستانێ پێدڤییە بمینیت. داكو بمینیت پێدڤییە پارتی یا بهێز بیت دا ئەڤ دەستكەفتە بەر ب پیشڤە بچن.

ب بەرهەڤبوونا نێچیرڤان بارزانی، جێگرێ سەرۆكێ پارتی دیموكراتی كوردستان، كەرنەڤالا بانگەشەیا هەلبژارتنان یا پارتی بۆ جڤاتا نوونەرێن ئیراقێ بۆ بەربژارێن پارێزگەها نەینەوا یێن پارتی ل پارێزگەها دهۆكێ بڕێڤەچوو.
نێچیرڤان بارزانی، جێگرێ سەرۆكێ پارتی دیموكراتی كوردستان بۆ بەرهەڤبوویێن كەنەڤالێ د پەیڤەكێدا گوت» هوون نوونەرێن سنوورەكێ گەلەك بەرفرهەنە و گرنگن بۆ هەرێما كوردستانێ و هەموو ئیراقێ كو سنوورەكێ گەلەك بەرفرهەیە، ب هەموو نەتەوە و ئایینان، سنوورێ هەوە ئیراقەكا بچووكە».
نێچیرڤان بارزانی گوت ژی» ب هێزبوونا پارتی ل بەغدا بۆ هەڤسەنگیێ و پێكڤەكاركرنێ و بەرژەوەندییا سنوورێ نەینەوا و بەرژەوەندییا هەرێما كوردستانێ و هەموو ئیراقێ، بۆ پاشەڕۆژا كوردستانێ و ئیراقێ پێدڤییە پارتی یا ئێكێ بیت ل نەینەوا، ئەڤە سۆزا مەیە بۆ ڤان هەلبژارتنان».
جێگرێ سەرۆكێ پارتی دیاركر» ل هەر جهەكێ پارتی یا ب هێز بیت، ئارامی و ئاڤەدانی لێ هەیە، مەدەنییەت و پێشكەفتن هەیە، ژ بەر وێ چەندێ بەری كو بەرژەوەندییا پارتی بیت، د بەرژەوەندییا پارێزگەها نەینەوا دایە پارتی یا ب هێز بیت، د بەرژەوەندییا پێكهاتەیێن ئایینی و پێكهاتەیێن نەتەوەیی ژی دا، لەوما پێدڤییە پارتی یا ب هێز بیت».
نێچیرڤان بارزانی خویاكر» پێدڤییە ل رۆژا 11/11/2025 بچینە سەر سندۆقێن دەنگدانێ و دەنگ ب لیستا 275 یا پارتی دیموكراتی كوردستان بدەین».
ئاماژە ب وێ چەندێ ژی كر» هیچ كەس و ئالییەك نەشێت و بۆ وی نینە پێكڤەژیانا نەینەوا تێكبدەت، ب هەبوونا پێكهاتەیێن نەتەوەیی و ئایینی یێن جودا، ئەركێ پارتی ل نەینەوا زەحمەتترە، لەوما پێدڤییە وەكو هەموو جارەكێ شیان و هێزا خوە ب سەلمینن و لیستا 275 یا پارتی دیموكراتی كوردستان بەر ب سەركەفتنەكا مەزن ببەن».
جێگرێ سەرۆكێ پارتی دیموكراتی كوردستان رۆهنكر ژی» پارتی رۆلەكێ سەرەكی د ئازادكرنا ئیراقێدا ل سالا 2003 دیتبوو، سەركردایەتییا پارتی رۆلێ سەرەكی هەبوو د نڤیسینا دەستوورێ ئیراقێدا، پشتی وێ چەندێ ئیراق كەفتە د رەوشەكا ئێمناهیێ یا نەئارامدا، پاشی شەڕێ داعشێ بەر ب ئیراقێ هات و ئیراق كەفتە د ناڤ ئالۆزیێدا، لەوما نوكە قووناغەكا كەلەك هەستیار و گرنگە كو قووناغا بجهئینانا دەستوورێ ئیراقێیە، بۆ پاشەڕۆژا هەرێما كوردستانێ، پێدییە پارتی یا ب هێز بیت، لەوما پێدڤییە ب گەرم و گۆری بچینە سەر سندۆقێن دەنگدانێ».
ل دۆر دروستبوونا داعشێ ژی، نێچیرڤان بارزانی راگەهاند» داعش ژ ئەنجامێ سیاسەتەكا شاش، خەمسارییا خەلكەكی ل ئیراقێ و ژ ئەنجامێ پشتگوه هاڤێتنا خەلكەكێ رەسەن بوو، دروستبوو، لەوما دڤێت مەژییێ پشتگوهـ هاڤێتنێ ب دووماهی بهێت».
سەبارەت سیستەمێ حوكمڕانییا ئیراقێ ژی، جێگرێ سەرۆكێ پارتی دیموكراتی كوردستان دیاركر» ئیراق سیستەمەكێ فیدرالییە، بەلێ ئەو فیدرالییەتە ل ئیراقێ ناهێتە پەیڕەوكرن، بەلكو ئیراق ب ناڤەندیبوونەكا گەلەك ب هێز بڕێڤەدچیت، لەوما ئەم هەموو دبینین هەردەم ئیراقێ كێشە هەنە ل سەر مادەیا 140 یا دەستووری و پێشمەرگەی و مووچەی و بابەتێن دی كو ئەنجامێن بجهنەئینانا دەستووری نە، بەلێ هەكە ڤێجارێ ب هێزڤە بزڤرینە بەغدا و بەرگریێ ژ دەستكەفتێن هەرێما كوردستانێ و ئیراقێ ژی بكەین، نوونەرێن كوردستانێ ب تنێ نوونەرێن كوردستانێ نینن، ئەركێ ڤان نوونەران بەرگریكرنە ژ هەر پێكهاتەیەكی كو غەدر لێ دهێتە كرن، لەوما پێدڤییە نوونەرایەتییا هەموو ئیراقێ بكەن».
نێچیرڤان بارزانی پتر گوت» پارتی یا خوە بەرهەڤكری بۆ چەسپاندن و بجهئینانا دەستووری، چونكە كارەسات وی دەمی دروستبوو كو دەستوور نەهاتییە بجهئینان».
ل دۆر رەوشا شنگالێ، جێگرێ سەرۆكێ پارتی دیموكراتی كوردستان راگەهاند» پیلانەك هەیە بۆ دوورئێخستنا پارتی ژ شنگالێ، بەلێ كەس نەشێت پارتی و شنگالێ ژ هەڤدوو جوداكەت، ئەوێ دخوازیت دوبەرەكیێ د ناڤبەرا كورد و پێكهاتەیان دروست بكەت، دڤێت خەونێن خوە ببەتە دناڤ گۆڕیدا».

سەرۆكێ حوكمەتا هەرێما كوردستانێ پڕۆژەیێ ئاڤا قوشتەپە و دەوروبەرێن وێ ڤەكر و راگەهاند: مە سۆزەكا دی ژی بجهئینا.
مەسرور بارزانی، سەرۆكێ حوكمەتا هەرێما كوردستانێ، پرۆژەیێ ستراتیژیێ ئاڤا قوشتەپە و بێستانە و 80 گوندێن دەوروبەر ڤەكر و د پەیڤەكێدا گوت» خودایێ مەزن دبێژیت» بِسْمِ اللَّـهِ الرَّحْمَـٰنِ الرَّحِیمِ ۆجَعَلْنَا مِنَ الْمَا‌ءِ كُڵّ شَیْ‌ءٍ حَیٍّ» ئانكو هەموو تشتەكێ زیندی مە ژ ئاڤێ دروستكریە، د كوردەوارییا مەدا ژی دبێژن ئاڤەدانی، ئانكو هەر چ ژیانە گرێدایە ب ئاڤێ، بێی ئاڤ ژیان نابیت، گەلەك گرنگە ئەم وێ ئاڤێ و وێ نیعمەتا كو خودای دایە مە ب باشترین شێوە مفای ژێ وەربگرین و ب هەدەر نەدەین».
سەرۆكێ حوكمەتا هەرێمێ ئەوژی بەرچاڤكر» دەمەكێ درێژە مە هەست ب وێ چەندێ كریە كو ب بەرفەرهبوونا باژێران و زێدەبوونا داخوازییا خەلكی بۆ ئاڤێ، مە پێدڤی ب وێ چەندێ هەیە كو پڕۆژەیێن ئاڤێ بگەهنە هەموو باژیر و باژێرك و گوندێن مە، هەم بۆ وێ چەندێ خەلكێ مە ئاسوودە بن، هەم بۆ وێ چەندێ ئەم بشێین ب باشترین شێوە مفای ژ ئاڤا سەرئەرد وەربگرین و نەهێلین ئاڤا بنئەرد یا بیران ب ڤی شێوەی مخابن بەلێ چەند ئاڤا بنئەرد بچیتە خوارێ، ئانكو گەلەك گرنگە ئەم بشێین ب وان پڕۆژەیان زێدەتر ئاڤا سەرئەرد بكاربینین. ئەڤ ئاڤە هەم بۆ ڤەخوارنێ، هەم بۆ چاندنێ، هەم بۆ باشتركرنا ژیانا وەلاتییان دێ گەلەك گەلەك گرنگ بیت».
مەسرور بارزانی هەروەسا ئاماژە ب وێ چەندێ دا» بەری دەمەكی پڕۆژەیەكێ دی یێ مەزن یێ ڤێراگەهشتنا ب لەز یا گەهاندنا ئاڤێ بۆ ناڤ باژێرێ هەولێرێ هاتە ئەنجامدان و ب دووماهیئینان، ئەوژی هەردیسان پشكەك بوو ژ وان پڕۆژە و بەرنامەیێن كو مە ل حوكمەتا هەرێما كوردستانێ هەبوون بۆ وێ چەندێ ئەم بشێین زێدەتر خزمەتا وەلاتییان بكەین. ئەڤرۆ ژی ل ڤێرێ نە بۆ وێ چەندێ بێژینە هەوە مە سۆزەكا دی ژی بجهئینا و مە ئەڤ پڕۆژە گەهاندە ئەنجام، پیرۆزە ل هەوە هەموویان».
سەرۆكێ حوكمەتا هەرێما كوردستانێ دەستخوەشی ل كۆمپانییا (ئاوزان) كر و گوت» ب راستی د دەمەكێ پیڤانەییدا و ب دلسۆزی و وەستیانەكا مەزن ڤە شیان كێمتر ژ سالەكێ ڤی پڕۆژەی ئەنجام بدەن، سوپاسی و دەستخوەشیێ ل وەزارەتا باژێرڤانییان ژی دكەم كو ب هەمان شێوە پشتەڤان و هاریكار بوون بۆ ئەنجامدانا ڤی پڕۆژەی و سوپاسییا پارێزگەر و قایممقام و هەموو فەرمانبەرێن حوكمەتێ ژی دكەم كو هەموو د هەڤپشك بوون د سەرئێخستنا ڤان پڕۆژەیان، دەستخوەشیێ ل هەموو ئالییەكی دكەم».
هەر د پەیڤا خوە دا، مەسرور بارزانی باس ل وێ چەندێ ژی كر» پاراستنا ئاڤێ ئەركێ مە هەموویانە، پێدڤییە ئەم هەموو گەلەك ب هشیاری ئاڤا خوە و ژینگەها خوە بپارێزین. ل سالێن بۆری باران كێم بارییە و رووبار ل گەلەك جهان هشك بوون، كاریگەرییا كێمییا بارانێ ل ئیراقێ گەلەك یا دیارە، ئەم ژی ژ وێ چەندێ بێبەهر نابین، مخابن ئەم تنێ دشێین زیانا كێمئاڤیێ ل سەر خوە و ژینگەها خوە كێم بكەین، هیڤیدارم ئەڤسالە وەكو سالێن بۆری ژی نەبیت و خودایێ مەزن بارانا رەحمەتێ ب سەر مە دا ببارینیتو تووشی زێدەتر كێمئاڤیێ نەبین، بەلێ ئەو پێشبینییا كو مە كرین و ب ڤان پڕۆژەیان، پشتڕاستم كو ئەم ناگەهینە قووناغەكێ كو نەچار مشەختكرنێ بین، چونكە بێگومان كاریگەرییا كێمئاڤیێ ل سەر خەلكی گەلەك گەلەكە و ئیراق ئێك ژ وان جهایە كو ب شێوەیەكێ دژوار تووشی ڤێ گرفتێ بوویە».
سەرۆكێ حوكمەتا هەرێمێ راگەهاند ژی» مەترسییا كێمئاڤیێ، دێ مەترسیێن دی ژی ل گەل هێن، پرسا مشەختبوونا وەلاتییان ژ جهەكی بۆ جهەكێ دی، چونكە ئەڤە ژیانا مرۆڤی یا وەسایە ب دووڤ ئاڤێ د گەریێت، ب دووڤ ژیانێ د گەریێت، ل جهەكی ئاڤ نەبیت، ب بیابانبوون دروست دبیت، خەلك قەستا جهەكێ دی دكەت كو ژیان تێدایە. مە بزاڤەكا جدی ل گەل دۆستێن خوە ل دەرڤە ژی كریە كو هاریكارییا مە بكەن بۆ وێ چەندێ ئەڤ كێشەیە، كێشەیا گوهۆڕینا سەقای ل سەر ئاستێ جیهانێ نوكە بوویە كێشەیەكا جدی كو بزاڤێ بكەن چارەسەر بكەین و ئەم ژی پشكەك بین ژ وێ چارەسەریێ و ئەو بۆچوونا مە ل كوردستانێ هەبوو، مە بەرنامەیێن خوە یێن بجهئیناین و دبینین كو كاریگەری ژی هەبوویە و خەلكێ مە ژی هەتا رادەیەكێ مەزن شیاینە ئاسوودە بن».
سەرۆكێ حوكمەتا هەرێمێ گوت ژی» ژ بلی ڤی پڕۆژەی چەندین پڕۆژەیێن دی ژی ل بەردەستێ مەنە، هندەك ژ وان هاتینە بجهئینان، هندەك ژی د قووناغا بجهئینانێ دانە و هندەكان ژی پلان بۆ هاتیە داڕێشتن و ل نێزیك دێ هێنە بجهئینان، تنێ ل چەند رۆژێن بۆریدا مە بڕیار ل سەر دروستكرنا پڕۆژەیەكێ مەزن یێ ئاڤا دوكان – سلێمانیێ دا كو ئەوژی بێگومان دێ بابەتێ قەیرانا ئاڤێ ل سلێمانیێ ب دووماهی ئینیت، پڕۆژەیێن دی ژی هیڤیدارم د دەمەكێ زوودا بگەهنە ئەنجام بۆ وێ چەندێ هیچ جهەك ل كوردستانێ نەمینیت كو تووشی گرفت و قەیرانا كێمئاڤیێ ببیت».
سەرۆكێ حوكمەتا هەرێما كوردستانێ داخوازییەك ژ هەموویان كر و راگەهاند» من داخوازییەك ژ هەموو خوشك و برایێن خوەشتڤی هەیە، ل قوتابخانەیان، ب تایبەتی ژ مامۆستایێن ئایینی، ژ رەوشەنبیران كو شیرەتا ل مە بكەن، بۆ وێ چەندێ ئاڤ ب هەروە نەچیت، ئابۆریێ د ئاڤێ دا بكەین، نیعمەتەكا مەزنە بەلێ ب باشترین شێوەی مفای ژێ وەربگرین، بێگومان ئەم دشێین گەلەك وەلاتێ خوە خوەشتر بكەین، هەكە بزانین چاوان مفای ژ وێ نیعمەتێ وەربگرین كو خودای ب مە بەخشییە. بابەتێ هشیاركرنێ بابەتەكێ گرنگە، داخواز دكەم نەك تنێ بابەتێ ئاڤێ، بەلكو ژینگەهپارێزی ب شێوەیەكێ گشتی بلا ببیتە كەلتوورەك ئەم هەموو د پێگیر بین پێ».
مەسرور بارزانی رۆناهی ئێخستەر سەر وێ چەندێ ژی كو كارەكێ مەزن كریە بۆ وێ چەندێ د ئاستێ وێ باوەریێدا بن كو خەلكی دایە وان و خزمەتگوزارییان بۆ خەلكی دابین بكەن و گوت» نەك تنێ ئاڤ، بەلكو رۆژیەیێ رۆناهی، رێ و پر، ب دیجیتالكرنا خزمەتگوزارییان، كەرتێ ساخلەمی، كەرتێ پەروەدەیی، ئەڤە هەموو ژی ئەركێ مە بوویە و هیچ منەتەك تێدا نینە و هەردم ژی مە خواستییە ب باشترین شێوە خزمەتا خەلكێ خوە بكەین، خزمەتكرن ژی ب راستی تنێ دلسۆزی دڤێت، ئەوێ بخوازیت خزمەتێ بكەت، ئەو چەندە بەسە یێ دلسۆز بیت و دێ شێت خزمەتێ كەت».
سەرۆكێ حوكمەتا هەرێمێ دوپاتی ل وێ چەندێ ژی كر» سامانێ نیشتمانی سامانێ هەموو خەلكێ كوردستانێیە، مولكێ شەخسی یێ هیچ كەسەكی نینە و پێدڤییە ئەڤ سامانە بۆ خەلكی ب باشترین شێوە مفا ژێ بهێتە وەرگرتن، ئەم دێ د بەردەوام بیت د خزمەتكرنا هەوە دا، هەتا هەوە باوەری ب مە هەیە، ب سەربلندی ڤە، ب شانازی ڤە، ئەم خوە ب خزمەتكارێن هەوە دزانین، هیڤیدارین بەردەوام بین د ئاڤاكرنا كوردستانێدا.

مەسرور بارزانی، سەرۆكێ حوكمەتا هەرێما كوردستانێ، سەرەدانا پڕۆژەیێ جادەیا دوسایدیێ (كەسنەزان – گۆمەسپان) كر كو پڕۆژەیەكێ گرنگ یێ سنوورێ هەولێرێیە و ژ ئالیێ كۆمپانییا هێمن گرۆپ ڤە دهێتە بجهئینان.
سەرۆكێ حوكمەتا هەرێمێ سەرەرای دەستخوەشی ل سەرپەرشتیار و ئەندازیار و كاركەرێن پڕۆەژی، دوپاتی ژی ل گرنگییا تمامبوونا پڕۆژەی د دەمێ خوە یێ دیاركریدا و ب گۆڕەی رێنما و پیڤەران كر.
درێژییا جادەیێ 15 كیلۆمەترن و فرەهییا هەر سایدەكی زێدەتر ژ 10 مەترانە و دو رێرەوێن سەرەكی و رێڕەوەكێ فریاگوزاری ب خوەڤە دگریت، كو ل دووماهییا جادەیا كەسنەزانێ دەست پێ دكەت و ل دەربەندێ گۆمەسپان ب دووماهی دهێت و ئەو پرۆژە ژ چار پران و ئەندەرپاسەكێ و 40 ئاڤدێرێن سندۆقی یێن قەبارە درێژ یێن جۆرا وجۆر و پەرژانێن خوەپاراستنێ و سیستەمێ ئاڤرۆیی پێك دهێت.
پاشی مەسرور بارزانی ،سەرۆكێ حوكمەتا هەرێما كوردستانێ سەرەدانا پڕۆژەیێ جادەیا دوسایدییا (هەولێر – كۆیە) كر.
پڕۆژەیێ ستراتیژی و گرنگ یێ دوسایدیێ (هەولێر – كۆیە) كو ب ئێك ژ شادەمارێن رێ و پرێن كوردستانێ دهێتە نیاسین، ل سنوورێ پارێزگەها هەولێرێ دهێتە بجهئینان.
ئەڤ پڕۆژەیێ مەزن ب گۆژمەیێ 560 ملیار و 443 ملیۆن دیناران دهێتە ئەنجامدان و كۆمپانییا (ئوزان) كاری تێدا دكەت. درێژییا وی رێ 37 كیلۆمەترن و ب شێوەیێ شێ ئالی بۆ چوونێ و سێ ئالی بۆ هاتنێ هاتیە دیزاینكرن، كو فرەهییا هەر ئالییەكی 12 مەترن. هەروەسا ئەو رێیە ب سێ چینێ قیرێ 22 سەنتیمەتری دێ هێتە قیركرن بۆ پشتڕاستبوون ژ كوالێتی و خۆڕاگرییا وی.
د دروستكرنا ڤی پڕۆژەیدا، شەش ئۆڤەرپاس و پێنج ئەندرپاس و پرەكا مەزن ب درێژییا 250 مەتران دێ هیچنە دانان، سەرەرای ڤێ چەندێ ژی، 160 ئاڤبڕێن كۆنكریتی ژی دێ هێنە دروستكرن بۆ باشتركرنا سیستەمێ ئاڤبڕیێ و پاراستنا وێ رێ ژ لەهییان».
چاڤەڕێ دهێتە كرن ڤی پڕۆژەی كاریگەرییەكا مەزن هەبیت ل سەر كێمكرنا قەرەبالغێ، ب لەزكرنا هاتنوچوونێ و باشتركرنا سەلامەتییا رێ وپ ران د ناڤبەرا هەردو باژێراندا.

دوهی شەمبیێ 25/10/2025، ب بەرهەڤبوونا نێچیرڤان بارزانی، جێگرێ سەرۆكێ پارتی دیموكراتی كوردستان و میر حازم بەگ، میرێ ئێزدییان، كەرنەڤالێ بانگەشەیا لیستا 275 یا پارتی دیموكراتی كوردستان ل شێخان ب بەرهەڤبوونا هزاران ئەندام و لایەنگرێن پارتی ل وێ دەڤەرێ بڕێڤەچوو.
نێچیرڤان بارزانی، جێگرێ سەرۆكێ پارتی د وێ كەرنەڤالێدا پەیڤەك پێشكێشكر و ئەڤە دەقێ وێ یە:
خوەشحالم ئەڤرۆ ئەم پێكڤە یێن كۆمبووین، گەلەك سوپاسییا دلسۆزی و وەستیانا هەوە هەموویان دكەم، تشتێ ئەڤرۆ زێدەتر من خوەشحال دكەت و كەیفخوەش دبم ئەڤ دیمەنێ جوانە كو ئەم دبینین مامۆستایێن ئایینی یێن موسلمان و مەسیحی و ئێزدی پێكڤە ل ڤێرێ د روونشتینە ئەڤە دیمەنەكێ گەلەك یێ جوان یێ كوردستانێیە كو پێدڤییە رەنگڤەدانێ وێ هەتا هەتایێ د ڤی وەلاتیدا بمینیت ئەڤە ئەو دیمەنە كو كەیفا دۆستێن مە دئینیت و نەحەزێن مە د نەرەحتن ژێ.
هەڤالینە ..
هوون خەلكێ دەڤەرەكێ نە گەلەك تایبەتی و گرنگییا خوە یا هەی بۆ كوردستانێ، د شۆڕشێدا گەلەك دیدەڤانن ژی كو ب سەدان داستان و قەهرەمانیێن پێشمەرگەیان ل ڤێ دەڤەرێ یێن هاتینە تۆماركرن ل شێخان، باعەدرێ، زیلكان، قەسرۆك و كەلەكچی ئەڤ سنوورە هەموو وارێ پارتی یە و وارگەهێ گەلەك قەهرەمان و شەهیدانە یێن كو دەولەت سەرێ وان ئەڤرۆ ئەم ل ڤێرێ كۆمڤەبووین.
هەڤالینە..
ل بیرا مە هەموویانە لژنەیا ناوچا شێخان د دەمێ خوە دا ل شۆڕشێ ئێك ژ چالاكترین ناوچێن پارتی بوو ل بیرا مەیە چالاكیێن پێشمەرگەیێن لژنەیا ناوچا شێخان گەلەك بوون و قەهرەمانییا پیشمەرگەیێن دەڤەرا شێخان چو جاران ژ هزر و بیرێن مە ناچیتە دەر، پێشمەرگەیێن دەڤەرا شێخان ب ئێزدی، موسلمان، ب مەسیحی ڤە هەموویان خەبات دكر بۆ دۆزا مللەتێ خوە. پێكڤە ڤان هەموویان هندەك ژ مەنترین داستانێن شۆڕشێ تۆماركرن، خەلكێ قەهرەمانێ ڤێ دەڤەرێ چ ئێزدی، چ موسلمان، چ مەسیحی ئەنفال و وێرانكرنا گوندان یێن دیتین بەری چەند سالان ژی پارتی ب خەباتكەرێن خوە یێن كوردستانێ و یێن ڤێ دەڤەرێ ب تایبەتی رێ ل داعشێ گرت و نەهێلا بهێتە پێش و ئەفسانەیا داعشێ قەهرەمانێن مە ل كوردستانێ و ب تایبەتی ژی چونكە ژ هەوە نێزیك بوون ل ڤێ دەڤەرێ هەوە شكاندن.
هەڤالینە..
خەلكێ ڤێ دەڤەرێ گەلەك باش دزانیت كا پارتی و قەهرەمانێن پارتی چاوا بەرگری ژ ڤێ دەڤەرێ و ژ كوردستانێ كر ئەڤرۆ ژی ئەم د روونشتینە ل ڤێرێ ئەم هندەك ژ وان قەهرەمانان ل پێش چاڤێن خوە دبینین كو هەردەم بۆمە جهێ شانازیێ نە و ئەڤرۆ بەرامبەری هەوە ئەم بەژنا خوە بۆ خوونا شەهیدێن خوە و قەهرەمانییا پێشمەرگەیێن مە ل ڤێ دەڤەرێ د چەمینین.
هەڤالینە..
هەوە ب خوونا خوە و ب قەهەمانییا خوە داستانێن مەزن ل ڤێ دەڤەرێ تۆماركرن، سوبەهی ژی جارەكادی دا پارتی بچیت و باشتر و ب هێزتر بەرگریێ ژ مافێن كوردستانێ بكەت، سۆزا مە هەموویان ئەوە ل رۆژا 11/11/2025 ئەم هەموو پێكڤە بچینە سەر سندووقێن دەنگدانێ و دەنگێ خوە بدەینە لیستا 275 یا پارتی دیموكراتی كوردستان لیستا كوردستانەكا ب هێز و پێشكەفتی.
بۆچی پێدڤییە پارتی ب هێز ل بەغدا بیت؟ ئەڤە ب پرسیارەكە ب راستی پێدڤییە مە بەرسڤا وێ هەبیت ئەوژی چونكە ب هێزبوونا پارتی ل بەغدا ب هێزبوونا كوردستانێیە، گەرەنتییا پاراستنا كوردستانێ پارتییە لەوما پێدڤی ب هێز بچینە دەنگدانێ، پارتی گەرەنتییا پێكڤەژیانێیە و گەرەنتییا ئاڤەدانكرنا كوردستانێیە، پارتی گەرەنتییا وێ وەستیانێیە ئەوا كو پێشمەرگە و خەباتكەرێن مە كار ل سەر كری و سەرێ خوە ل سەر دانی، پێدڤییە پارتی بۆ ڤێ پێكڤەژیانێ ب هێز ل بەغدا بیت.
ئارمانجا مە ل بەغدا چییە؟ بۆچی ئەم بچینە بەغدا بۆچی خزمەتكارێن وان پێدڤییە بچنە بەغدا، مە ئێك ئارمانج هەیە بۆ چوونا بەغدا ئەوژی بجهئینانا فیدرالییەتێ و دەستوورێ ئیراقێیە، بۆچی گرنگە دەستوور بهێتە بجهئینان؟ چونكە 20 سالە خوەڤەدزین و بجهنەئینانا دەستووری ل ڤی وەلاتی كارەساتێن مەزن بۆ ئیراقێ یێن دروستكرین، ئیراقێ د 20 سالێن بۆریدا قووناغێن نەخوەش یێن دیتین ئەڤرۆ ئەڤ هەلبژارتنە ب باوەرییا من ئێك ژ گرنگترین هەلبژارتنایە كو ل ئیراقێ هاتینە كرن و ناڤێ ئەم ددانین قووناغا بجهئینانا دەستوورێ ئیراقێ ئەو دەستوورێ كو پێدڤییە وەك خوە بهیچتە بجهئینان، ئەو سیستەمێ ئەڤرۆ ئیراق ل گەل هەرێما كوردستانێ بكاردئینیت سیستەمەكێ تمام ناڤەندییە. بۆچی مە ئاریشەیێن مووچەی و پێشمەرگەی و پڕچەككرنا وی و شایستەیێن دارایی و مادەیا 140 ل گەل بەغدا مە هەنە؟ ئەگەرەك یێ هەی ئەوژی ئەوە دەستوور ناهێتە بجهئینان، پرسا مووچەی مافەكێ هەوە هەموویایە وەك مووچەخۆرێن ئیراقێ هەموویێ پێدڤییە بهێتە دابینكرن، هوون د ئاگەهدارن ژی كو كارێ بەراهیێ یێ حوكمەتا هەرێما كوردستانێ چارەسەركرنا ئاریشەیا مووچەیە و ئەز حەزدكەم بێژمە هەوە ئەڤە كارێ بەراهیێیە و ئەم د وێ باوەریێدانە كو دێ هیچتە چارەسەركرن و د جهێ خوەدایە جارەكادی ژدل سوپاسییا هەموو مللەتێ كورد بكەم سەرەرای وان فشاران و سەرەرای وان ئاستەنگ و نەخوەشییان جارەكادی ڤی مللەتی بۆ دۆست و دوژمنان سەلماند كو دێ ل گەل كوردستانێ مینن و دل ل گەل پارتی مینن و حزبا خوە دێ سەرفەراز كەن، دوبارە دبێژم كارێ بەراهیێ و ئەولەویەتا حوكمەتا هەرێما كوردستانێ پرسا ژیار و ژیانا رۆژانەیا هەوەیە و ئینشائەللا ئەڤ ئاریشەیە ژی دێ چارەسەر بیت و ئەم پێكڤە جارەكادی دێ كوردستانێ ژ ڤێ قووناغێ بەینە قووناغەكا دی یا گەشتر و ئاڤەدانتر.
هەڤالینە..
كێ ئەو ئیرادە هەیە كو ب هێز بەرگریێ ژ هەرێما كوردستانێ بكەت؟ خزمەتكارا هەوە پارتی دیموكراتی كوردستانێ دشێت وێ چەندێ بكەت و ئەز بباوەرم ئەركێ پەرلەمانتارێن مە یێن ڤێجارێ ئەركەكێ پیرۆز و گرانە ئەوژی وەرگێرانا دەستوورییە بۆ كریارێ ب رێیا گوهۆڕینا قانوونێن ئیراقی ژ ناڤەندیبوونێ بۆ فیدرالیێ و گوهۆڕینا قانوونێن سەردەمێ ( مجلس قیادە الپورە) ئەوێن كو ب راستی ئاستەنگن د پێشڤەچوونا ئیراقێدا، پرسا فیدرالییەتێ نە تنێ بۆ هەرێما كوردستانێ، بجهنەئینانا دەستووری نە تنێ زیان بۆ هەرێما كوردستانێیە، بەلكو ئەو دەردەسەریێن نەینەوا و بەسرا و پارێزگەهێن دی یێن ئیراقێ هەین كێمتر نینن ژ وان دەردەسەریێن مە هەین ژ بەر وێ چەندێ دەمێ ئەم باسێ بجهئینانا دەستووری دكەین مە تنێ بۆ هەرێما كوردستانێ نینە، مە بجهئینانا دەستووری دڤێت بۆ هەموو ئیراقێ و پێكهاتەیێن ئیراقێ، هەكە پارتییا هەوە یا خزمەتكار یا ب هێز بیت ل بەغدا بێگومان دێ دەستوور ژی هێتە بجهئینان، ئەڤرۆ چ پێدڤییە ئەم ڤی كاری بكەین ئەز دخوازم بێژمە هەوە ئەو بەرخودانا هەوە دروستكری ل رۆژا كو داعش هاتی پێشمەرگە ب تنێ نەبوو و ئەز ب خوە دزانم كا خوەبەخشێن ڤێ دەڤەرێ چ رۆلەكێ مەزن دیت و چوونە سەنگەرێ ئێكێ بۆ پشتەڤانییا هەرێما كوردستانێ، خوەبەخش نە پێشمەرگە بوون و نە پێدڤی بوو بچن، بەلكو خوەبەخش بۆ كوردستانێ چوون، ئەركێ وان هەڤالێن ئەم ئەڤرۆ دهنێرینە بەغدا گەلەك ب زەحمەتترە ژ وان خوەبەخشان چونكە دێ بەرگریێ ژ دەستكەفتێن هەرێما كوردستانێ كەن و دێ پێكڤەژیان و برایەتییا د ناڤبەرا پێكهاتەیێن ئیراقی ب ئەرەب و كورد و مەسیحی وئێزدی هەموویێن دی، ب چوونا خوە بۆ بەغدا دێ ب هێزتر كەن.
ئەو گەرماتییا من د هەوە دا دیتی هوون دێ شێن ب وێ بدەستڤەئینن ل رۆژا هەلبژارتنان ل 11/11/2025 سۆز و پەیمانا مە بۆ پشتەڤانییا هەرێما كوردستانێ و پێكڤەژیانێ ل ڤی سنووری پێكڤە ئەم هەموو بچنە سەر سندووقێن دەنگدانێ و دەنگی بدەینە پارتی دیموكراتی كوردستان.
هەڤالینە..
هوون خەلكێ دەڤەرەكێنە كو نموونەیا پێكڤەژیانا كەلتووری و ئاشتییانە بەرجەستە دكەن، شێخان دەڤەرەكا پێكڤەژیانێیە، ل ڤێ دەڤەرێ خەلكێ ئێزدی ئەردێ خوە دایە بۆ چێكرنا مزگەفتان، لالشا نۆرانی پیرۆزترین پەرستگەها ئێزدییان یا ل ڤێ دەڤەرێ، هەروەسا ل ڤێ دەڤەرێ جەژن و شاهی و تازیێن ئێزدییان و موسلمانان و مەسیحییان پێكڤە دهێنە كرن ئەڤ نموونەیێ مەزن یێ پێكڤەژیانێ تابلۆیەكێ نەخشاندییە د دیرۆكا مللەتێ مەدا چو جاران ناهێتە ژبیركرن، رژێما ژ ناڤچوویا ئیراقێ گەلەك بزاڤكرن ڤێ پێكڤەژیانێ تێكبدەت بەلێ نەشیا، پێكڤەژیانا برایەتی بنگەهێ هزر و رێبازا شێخێن بارزان بوویە، ئەساسێ هزرا شێخێن بارزان پرسا پێكڤەژیانێ بوو، پێكڤەژیانا هەموو نەتەوەیان و ئایینێن جودا د ئێك وەلاتدا و ئەڤە ئەو رێبازە ئەوا ئەم ل سەر دچین، پێكڤەژیانا ئاشتیانە یا هەموو مللەتان پێكڤە د وەلاتەكیدا، ئەڤە بنەمایەكێ سەرەكییە د هزرا پارتیدا، پارتی وەك حزب ل سەر ڤێ رێ دچیت لەوما ژبەر پێكڤەژیانا هەوە یا ب هێز یا خەلكێ دەڤەرا شێخان ئەز دێ بێژم هوون ژبەر ڤێ پێكڤەژیانێ پارتیێن پلە ئێكن، ئەڤ كەلتوورێ هەوە یێ پێكڤە ژیانێ جهێ شانازییا پارتییە ، هەبوونا پێكڤەژیانا ئاشتییانەیا موسلمان و ئێزدییان و مەسیحییان ل هەر جهەكی وێنەكێ جوان یێ كوردستانێ و جڤاكێ مەیە، چەند جوانە ل جهەكێ وەك ڤێ دەڤەرێ مزگەفت و دێر و لالش و جهێن پیرۆز یێن ئێزدییان هەموویان پێكڤە دبینین. ئەڤە كەلتوورەكە كو جیهانا دەرڤە رێزەكا تایبەت هەیە بۆ كوردستانێ و بۆ ڤی كەلتووری كو ل ڤێ دەڤەرێ هەی. ئەڤە دەولەمەندییەكا مەزنە و هێزە بۆ كوردستانێ و هێزە بۆ پارتی و ب هەموو هێزا خوە ڤێ پێكڤەژیانێ ل ڤێرێ بپارێزن.
پارتی بەردەوام بزاڤكریە و كاركریە بۆ وێ چەندێ كو نوونەرایەتییا راستەقینەیا هەموو پێكهاتەیێن كوردستانێ بكەت و نوونەرێن هەموو پێكهاتەیان ل دامودەزگەهێن پارتی و كوردستانێ وئیراقێ هەبن، دیرۆكا پارتی ژی یا دیارە كو بەردەوام بێی جوداهی حزبا هەموو ئایین و نەتەوەیێن كوردستانێ بوویە هەر ژ رۆژا دامەزراندنێ هەتا ئەڤرۆ، هەروەسا ژ ئایین و نەتەوەیێن كوردستانێ قەهرەمان وسەركردە یێن د ناڤ پارتیدا هەین و هەبوونە، قەهرەمانێ ڤێ دەڤەرێ مەحموود ئێزدی ناڤەكێ دیار و نموونەیێ ڤێ چەندێیە، تاكو ئەڤ پێكڤەژیانە ژی یا مسۆگەر بیت و مافێن هەموویان بهێنە پاراستن و جوداهی دروست نەبیت و ڤی كەلتووری ل هەموو دەڤەرێن دی ژی جهگیر بكەین دڤێت ئەم پێكڤە كاربكەین و بزاڤێ بكەین و ب وەستین دا لیستا 275 یا پارتی ب سەركەڤیت.
گەلەك زێدەتر یا مای بۆ ئاڤەدانكرنا شێخان، چاڤەڕێنە ئێزدی كاروان كاروان ژ ئۆرۆپا و وەلاتێن دی، ئێزدی بهێن سەرەدانا لالشێ و شێخان، ببیتە وارگەهەكێ گرنگ یێ گەشتیارییا ئایینی، ئەو دەڤەرە ببیتە دەڤەرەكا بازرگانی و كەرتێ تایبەت تێدا چالاك بیت، ئەڤە بەرنامەیێ حوكمەتا هەرێما كوردستانێیە و ئینشائەللا دێ هێتە بجهئینان.
ئێكدەنگ ژی بۆمە گەلەكە، رۆژا دەنگدانێ دڤێت پێكڤە بچینە سەر سندووقیچن دەنگدانێ، پارتی هند یا پشتڕاستە ژ جەماوەرێ خوە، پشتڕاستە دێ ب سەركەڤیت، هندەك جاران سستی دروست دبیت، هیڤیدارم د ڤان هەلبژارتناندا ئەڤ سستییە نەبیت، پێدڤییە دەرفەتێ نەدەین ئێك دەنگ ژی ب هەدەر بچیت و كێم ببیت.
هەموو بزاڤان دكەین مەسیحی مشەخت نەبن و ل سەر ئاخا كوردستانێ بمینن و بەر ب دەرڤە نەچن، پارتی مەزنترین پشتەڤانا مەسیحییایە و دێ پشتەڤانەكا مەزن یا مەسیحییان ژی مینیت، هەر چ بۆ مەسیحییان بهێتە كرن وەك پێكهاتەیەكێ رەسەنێ ڤی وەلاتی كێمە.