ئەڤرۆ:
پەرلەمانێ کوردستانێ سوبەھی ٢٨/١٠/٢٠١٤ دێ دانوستاندنێ ل سەر پرۆژە قانوونا زمانێن فەرمی ل ھەرێما کوردستانێ کەت، ھەروەسا دێ پرۆژە بریارا راستڤەکرنا پەیرەوێ ناڤخوە ژی ھێتە گەنگەشە کرن، بۆ ڤێ مەرەمێ ژی سەرۆکاتیا پەرلەمانی داخوازێ ژ ئەندامان دکەت سوبەھی رۆژا سێشەمبی ل دەمژمێر ١١ ی بەری نیڤرۆ ئامادەی ڤێ روونشتنێ ببن.
ل دووڤ وێ پرۆژە قانوونێ کو ل مالپەرێ فەرمی یێ پەرلەمانێ کوردستانێ ل ژێر ناڤێ (پرۆژە قانوونا زمانێن فەمی ل ھەرێما کوردستانێ) ھاتیە بەلاڤ کرن زمانێن کوردی و عەرەبی دو زمانێن فەرمی نە ل سەنسەری عیراقێ ب ھەرێما کوردستانێ ڤە، ھەروەسا ل ھەرێما کوردستانێ زمانێن پێکھاتێن دی یێن عیراقێ وەکو تورکومان و سریانی و ئەرمەنان ل یەکەیێن خوە یێن کارگێری ل وان حالەتێن پێدڤی بیت ل پال زامنێ کوردی دێ زمانێن فەرمی بن.
د وێ پرۆژە قانوونێ دا کو دێ سوبەھی گەنگەشە ل سەر ھێتە کرن تێدا ھاتیە کو زمانێ کوردی زمانێ ئاخافتن و نڤیسینا فەرمی یا سەرجەم فەرمانگەە و دەزگەھێن سەرۆکاتیا ھەرێمێ و حوکمەتا ھەرێمێ و پەرلەمانێ کوردستانێ و دەستھەلاتا دادوەریە، ھەروەسا ل پرۆسا پەروەردە و فێرکرنێ ژی زمانێ کوردی زمانێ فەرمیە ل ھەرێما کوردستانێ، بەلێ ل قوتابخانێن ئەھلی زمانێ خواندنێ دێ یێ بیانی بیت ل ژێر چاڤدێریا وەزارەتا پەروەردێ.
ل دۆر بکارئینانا زمانێ پێکھاتێن دی د پرۆژە قانوونێ دا ھاتیە کو ل ھەر یەکەیەکا ئیداری کو پتریا ئاکنجیێن وێ سەر ب پێکھاتەکا نەتەوەی یا جیاواز بن ژ کوردان ئەو دشێن ب راپرسیەکا خوە جھی زمانێ خوە ل پال زمانێ کوردی بکەنە زمانێ فەرمی یێ کاروبارێن خوە یێن ناڤخوەی.
سزا ژی د وێ پرۆژە قانوونێ دا ھاتینە دیارکرن یێ سەرپێچیا بەندێن وێ دکەت و ل ھندەک حالەتان سزا دکەھیتە زیندان کرن ھەتا سێ ھەیڤان ژ بلی سزایێن غەرامە کرنێ بۆ سەرپێچکاران.
نيشاندان
