ئەڤرۆ نیوز، نەوزاد ھلوری:
دەمەکى بەریا نھا ل دەمژمێر ل ده‌مژمێر 8:00ى سپێدێ سندوقێن دەنگدانێ بەرامبەر دەنگدەرێن ھەرێما کوردستان و دەڤەرێن كوردستانى يێن ده‌رڤه‌ى ئيدارا ھەرێما کوردستانێ دەستپێکر و بڕیاره‌ ھەتا دەمژمێر ٦:٠٠ێ ئێڤاری یا بەردەوام بیت.
عه‌لى بەندی رێڤەربەرێ گستيێ کومسیوونا بلندا سەربخوەی یا کوردستانێ ل دھۆکێ بو ئەڤرۆ نیوز گۆت: (ھەموو بەرھەڤی ھاتینەکرن و ئەڤرۆ ھەموو بنگەهـ ھاتینە ڤەکرن و ل گورەی ئەو بەرنامەیێ َکو ھاتیە دانان پرۆسە دێ ھەتا دەمژمێر 6:00ێ ئێڤاری یا بەردەوام بیت).
زێدەتر گۆت: (ل ھەموو سنورێ پارێزگەھا دھۆک 744 ھزار و 736 دەنگدەرێن گشتى و چار ھزار و 497 دەنگدەرێن تايبه‌ت ھەنە، 256 بنگەھێن دەنگدانێ و ھزار و575 وێستگەھێن دەنگدانێ ھاتینە دانان.

دناڤا 15 کەمپان ژی دا ھەموو بەرھەڤیێن دەنگدانێ ھاتینەکرن و ل ھەر کەمپەکێ ژی بنگەھەک یان دو بنگەهـ بهێنه‌ دانان و 175 ھزار و 24 ئاوارەیان مافێ دەنگدانێ د ناڤ کەمپان دا ھەیە و 140 ھزار و 155 ئاوارەیان ژی ل دەرڤەى کەمپان مافێ دەنگدانێ ھەیە و 24 بنگەھێن دەنگدانێ بو ئاوارەیان ل دەرڤەیێ کەمپان ھاتینە دانان).

ئەڤرۆ نیوز ، ھلوری:
نێچیرڤان بارزانی سەرۆکێ حکومەتا ھەرێما کوردستانێ پەیامەک بەلاڤکر و تێدا دیارکر کو دەنگێ ھەوە دێ ھێزەکا زێدەتر ب کوردستانێ دەت و بو ئایندەیەکێ باشتر بو خوە و نەڤێن خوە بێژن بەلێ بو سەربخوەی یا کوردستانێ

ئەڤا ل خوارێ دەقا وێ یە

کوردستانیێن خوشتڤی
سوبەھی ٢٥ ئیلونێ رۆژا ریفراندۆم بو سەربخوەی یا کوردستانێ یە ، رۆژا دیارکرنا چارەنڤسی یە و رۆژا بریاردانێ یە ل ئایندەیەکێ باشتر بو ھەوە و نەڤیێن ھەوە ، رۆژا پێنگاڤ ھاڤێتنێ یە بەر ب دەستڤەئینانا خەونا ھزاران شەھید و ئەنفال و کێمیاباران و رەڤاندنیان ، روژا سەرئێخستنا کوردستان و گەلێ کوردستانێ یە ب ھەموو پێکھاتەیێن نەتەوەیی و ئاینی ڤە ، رۆژا بجھکرنا ئەرکێن نیشتمانی و نەتەوەیی یە ، روژەکە دڤێت تێدا ھەموو ناکوکیی و ململانێ و نیگەرانیێن خوە بدەینە لایەکێ و ب گەرما و گەرم بچنە سەر سندوقێن دەنگدانێ و بێژین بەلێ بو سەربخوەی یا کوردستانێ.

کوردستانیێن ھێژا
سوبەھی ھەتاکو پشکداری و دەنگێ بەلێ یا ھەوە ل ریفراندۆمێ بو سەربخوەیێ زێدەتر بیت ، دێ ھێزەکا زێدەتر ب کوردستانێ دەتن و گەرنتیەکا مەزنتر بو ب دەستڤەئینانا ماف و درۆستکرنا کوردستانەکا سەربخوەی ب ھێز دەست ڤە ئینیت ، ژ بەرڤێ بلا ئەم ھەموو سوبەھی پێکڤە ب بەرپرسیارانە ، و ب ئارامی و ل کەش و ھەوایەکێ شارستانی و ئازاد و دیموکراسی دا بێژین بەلێ بو سەربخوەی یا کوردستانێ و بەلێ بو ژیان و ئانیدەیەکێ نوو و بەلێ بو پەیوەندیەکا دوستانە لگەل ھەڤسویان و جیھانێ.

ئەڤرۆ نیوز ، نەوزاد ھلوری:
وەکو پشتەڤانی ژ بوو ھوشیارکرنا دەنگدەران و پالدانا وان ژ بو دەنگدان لسەر ریفراندۆم بو سەربخوەی یا کوردستانی ئەڤ شەڤە و سوبەھی سپێدێ دێ تەکبیرات ل ھەموو مزگەفتێن سنوورێ پارێزگەھا دھۆک ھێنە لێدان.
دڤی واریدا مەلا دلشاد بێسکفی بەرپرسێ لژنا دھۆک یا ئێکەتیا زانایێن ئاینێ ئیسلامێ بۆ ئەڤرۆ نیوز گۆت: ( ژلایێ ئێکەتیا زانایێن ئاینێ ئیسلامێ ل کوردستانێ فەتوایەک وەکو بریار ھاتیە دەرکرن بو لێدانا تەکبیراتان ل ھەموو مزگەفتێن کوردستانێ ، و مەژی ھەموو مزگەفتێن سنوورێ پارێزگەھا دھوکێ ئاگەھدارکرینە کو ب رێیا بلندگویان ئەڤ شەڤە و سوبەھی سپێدێ دەمژمێر ٨:٠٠ ل گەل ڤەکرنا دەرگەھێن سندوقێن دەنگدانێ تەکبیراتێن اللە اکبر ، اللە اکبر ، لا الە الا اللە ، اللە اکبر ، اللە اکبر ، واللە الحمد بھێنە بلندکرن )
زێدەتر گۆت : ( ل گورەی شەریعەتێ ئیسلامێ درۆستە کو ژ بوو خوشیان تەکبیران بھێنە بلندکرن ، بو مە وەکو گەلێ کوردستانێ خوشترین رۆژ سەربخوەی بوونە ، و مزگەفت ھەر ژ دەستپێکا ھەوبونا خوە ھەتا نھا روولەکێ بەرچاڤ ھەبوویە د ھوشیارکرنا خەلکی دا و ھەر ب مەرەما ھوشیارکرنا خەلکی و وەکو ئەرکەکێ نیشتمانی مزگەفتێن مە دێ ب ئەرکێ ھوشیارکرنا خەلکی رابرن)

ئەڤرۆ نیوز ، ھلوری:
ھەر ئێک ژ تەڤگەرا گۆڕان و کومەلا ئیسلامی یا کوردستانێ ب رێیا راگەھاندێن خوە جەماوەر و لایەنگیرێن خوە راسپاردن کو ب بەلێ دەنگی بو پروسەیا ریفراندۆما سەربخوەی یا کوردستانێ بدەن.

جڤاتا نیشتمانیا گۆڕان ل سلێمانیێ ئەڤرۆ ل سەر داوی ھەلویستێ خوە لسەر پرۆسەیا ریفراندۆما سەربخوەی یا کوردستانێ کومبوو و ل گورەی ئەوان زانیاریێن کو دەست ئەڤرۆ نیوز کەفتین گۆڕانێ جەماوەر و لایەنگیرێن خوە راسپاردینە کو ب بەلێ دەنگی بو پرۆسەیا ریفراندۆما سەربخوەی یا کوردستانێ بدەن.

ژلایەکێ دنڤە کومەلا ئیسلامی یا کوردستانێ د راگەھاندنەکێ دا کو ئاراستەیێ جەماوەر و لایەنگیرێن خوە کریە و دانەیەک دەست ئەڤرۆ نیوز کەفتیە دیارکر کو دەنگێ وان بو ریفراندۆما سەربخوەی یا کوردستانێ دێ ب بەلێ بێت ژبەرکو ئەگەر ژ ھەر کوردەکێ دلسووز پرسیار بکەی ئەرێ ھەوە دەولەتا سەربخوە دڤێت ، بێگومان دێ بێژیت بەلێ.

ئەڤرۆ نیوز ، نەوزاد ھلۆری:
سەرۆکێ ھەرێما کوردستانێ د پرێسکونفرانسەکێ دا ل ھەولێرێ د بەرسڤا پرسیارێن کەنالێن نافخوەی و بیانی دیارکر کو ھەرێما کوردستانێ ئەڤرۆ وێڤە جیرانێ عیراقێ یە و دەرگەھێ دانوستاندنان ل گەل عیراقێ ناھێنەگرتن و ئەگەر ئەو بەرھەڤ نەبن ل وی دەمی دێ مەژی بەرسڤا خوە ھەبیت.
مەسعود بارزانی سەرۆکێ ھەرێما کوردستانێ د بەرسڤا پرسیارێن چەند کەنالەکێن راگەھاندنێ یێن نافخو و بیانی دیارکر کو پشتی ٢٥ ئیلونێ دێ چاڤەرێ ھەلویستێن دەولەتێن جیھانی و ناوچەی بین و ل گەل عیراقێ ژی بەرھەڤین کو دانوستاندنان لسەر چەند پرسەکان بکەین و گۆت ژی: ( ئەگەر ل وی دەمی عیراق دانوستاندن قبول نەکرن ، پاشان دێ مە بەرسڤا خوە ھەبیت ، و ئێدی ئەڤرۆ وێڤە ئەم جیرانێن عیراقێ نە، و ئەگەر ئەڤرۆ ریفراندۆم نەھێتەکرن ئەو دێ ھەرمینن ب ھێز و ئەم ژی ھەر ب لاوازی ، و ئەگەر ئەم چاڤەرێ بین کو جڤاکێ نیڤدەوەلەتی بھێتە سەرخەت و سەربخوەیێ بومە بینیت ، ئەڤە محالە و ئەم ژ برسان دان امرین و ئەگەر بمرین ژی دێ بو سەربخوەیێ مرین)
بارزانی زێدەتر گۆت: ( گرتنا سنووران ژلایێ تورکیا و ئیرانێ د بەرژەوەندیا ھەمووان دا نینە و بەری کو زیان بومە ھەبیت ، زیان بو وان ژی ھەیە ، و ئێدی نابیت شەرێ ئیرادەیێ ل گەل مە بکەن ، ئومێدەوارین کوم ە پەیوەندیەکان باش ل گەل جیرانێن خوە ھەبیت)
ل بارا ھەلویستێن کەسایەتی و ھندەک حزبان ژ بو پاشئێخستنا ریفراندۆمێ بارزانی گۆت: ( بریارا پاشئێخستنا ریفراندۆمێ د دەستێ چوو کەس و لایەنان نینە و تنێ گەلێ کوردستانێ و ئەنجومەنا بلند یا ریفراندۆمێ ئەڤ مافە ھەیە)

ئەڤرۆ نیوز ، نەوزاد ھلۆری:
دەمەک بەریا نھا سەرۆکێ ھەرێما کوردستانێ د پرێسکونفرانسەکێ دا ل ھەولێرێ دیارکر کو ھەتا نھا گەلێ کوردستانێ د دوو قوناغێن دژوار دا ل گەل عیراقێ ژیایە و د ھەردوو قوناغان ژی دا ژبلی کوشتن و وێرانکاری و کێمیا باران و کومەلکوژیان گەلێ کوردستانێ چوو خوشیەک ل عیراقێ نەدتیە.
مەسعود بارزانی دیارکر کو ھەتا نھا گەلێ کوردستانێ ب دوو قوناغا ل گەل عیراقێ ژیایە بەلێ کورد وەکو ھەڤپشک نەھاتیە قبولکرن و گۆت: ( ل قوناغا بەرا ٢٠٠٣ کورد ژلایێ رژێما بەعس ب چەندین کریارێن کومەلکوژی و کێمیاباران و وێرانکاری بخوڤە گرتن و قوناغا پشتی ٢٠٠٣ ژی ، و پشتی کو دەستوور ھاتیە دارشتن و خەلکێ کوردستانێ دەنگ بو سەرئێخستنا وێ دا و سەرئێخستى و ئەگەر کورد تێدا پشکدار نەبایە دا شکەستنێ ئینیت کو ئەڤ یەک ژی تشتەک باش بوو ھاتیەکرن ، بەلێ ل گەل ڤێ یەکێ ژی چوو گورانکاری ل عیراقێ درۆست نەبوون و ھەمان ئەعقلیەت ل عیراقێ ھەیە ، و ژبلی کو سەر و چاڤ ھاتینە گوھرین چوو گورانکاریەک درۆست نەبوون و دەستوور ھاتە پێشیلکرن و تەوافق نەما و پێشمەرگە وەکو ھەڤپشکێ سوپایێ عیراقێ نەھاتە قبولکرن و ھەڤسەنگی نەما و دەولەتەکا مەزھەبی شوونا یا مەدەنی و فیدرالی ھاتە درۆستکرن ، و مە زور بزاڤکرن کو ل گەل عیراقێ بژین و ھەڤپشک بین ، بەلێ عیراقێ ئەڤ یەک قبول نەکر و سەرکرداتیا سیاسیا کوردستانێ زور ھزر دڤێ یەکێ دا کر ژبەرڤێ بریاردا کو چارەسەریەکا دن ببینن ، و دووبارە زڤرین بو ئەزموونەکا شکەستی عیراقێ نینە و پێدڤی یە ئەم ببینە دوو ھەڤسویێن باش ژبەرکو نەیا مەعقولە ئەم پێکڤە ب نەخوشیان بژین ، و پشتی کو سەرکرداتیا سیاسیا کوردستانێ بریاردای کو ریفراندۆمێ بکەت گەلەک ژ سەرکردێن عیراقێ ئەڤ یەک ب حێبەتیێ وەرگرت ، و ئێدی ئەم بێ ھیڤینە کو بکارین ل گەل عیراقێ بژین)
زێدەتر گۆت: ( ڤەگەریان بو بوچونا گەلی باشترین شێوازێ دیموکراسیێ یە ، نھا ھەرەشەیان دکەن و دخوازن کو ریفراندۆم نەھێتەکرن و دەمێ وێ گونجای نابینن ، ئەرێ بوچی ل وی دەما کو ئەنفال و کێمیا بارانکرن ب سەرێ گەلێ کوردستانێ ھاتی دەم یێ گونجای بوو ، ئەڤ یەک رامانە کو فەرھەنگا عیراقێ فەرھەنگەکا ئینکاری بوویە بەرامبەر گەلێ کوردستانێ، ژبەرڤێ ئەم گەھشتیە وێ باوەریێ کو تنێ ریفراندۆم دکاریت گەرنتیا دووبارە نەبوونا ئەڤان ھەموو ئەزموونان بو گەلێ کوردستانێ دابین بکەت)
بارزانی دیارکر ژی کو ریفراندۆم پێنگاڤا ئێکێ یە کو گەلێ کوردستانێ چەوا چارەنڤیسێ خوە دیار بکەت ، پاشان پروسەیەکا درێژ دێ دەستپێکەت و گۆت: ( ریفراندۆم بو دیارکرنا سنووران نینە ، بەلکو بو دووبارە نەبوونا ئەزموونەکا شکەستی یە ل عیراقێ ، و من دڤێت دوپات بکەم کو ئەم وەکو پێشمەرگە دێ ھەماھەنگیێ ل گەل سوپایێ عیراقێ و ھەڤپەیمانان بپارێزین بو ژناڤبرنا داعشێ ، و سەرکەفتنا موسل ژی بەرھەمێ ھەماھەنگی یا پێشمەرگە و ھێزێن عیراقی بوویە ، و ئەزموونا سەرکەفتنا تەلەعفەر ژی ھەمان بەرھەمبوویە ئەگەر دا ھژمارەکا زورا داعشان بو سوریا رەڤن و ژ دەستێن ھێزێن عیراقی دەرکەڤن ، ئەم وەکو گەلێ کوردستانێ دێ فەرھەنگا پێکڤە ژیانا ئاینی و نەتەوەیی پارێزین و کورد و عەرەب و نەتەوە و ئاینێن دن برانە و ناکوکیێن لایەنێن سیاسی نابنە ئەگەر کو مافێن پێکھاتەیان بھێنەخوار و فەرھنگا پێکڤە ژیانێ تێک بچیت )
سەرۆک بارزانی دیارکر ژی کو ئەو دخوازن پەیوەندیێن وان ل گەل ھەڤسویێن وان باشترین و فەرھەنگا ٢٥ سالێن بوریێن ھەرێمێ ھەردەم ئەگەرا سەقامگیریێ بووینە و گۆت ژی: (ئارمانجا مە ئەوە کو دەولەتەکا فیدرالی و مەدەنی بو پێکڤە ژیانا ئاینی و نەتەوەی ل کوردستانێ درۆست بکەین کو ئەڤ یەک ژی ژلایێ لژنەکا تایبەت ھاتیە دارشتن و گەلێ کوردستانێ دێ بریارێ لسەر وی دەستووری دەت ، داخوازێ ل خەلکێ کوردستانێ دکەم کو سوبەھی ب ئارامی بچنە سەر سندوقێن دەنگدانێ و ب ئاشتیانە و پاقژ پروسەیێ ب رێڤە ببەن ، سوپاسیا ھەموو لایەنێن سیاسی و پەرلەمانی و پێشمەرگەیان و دام و دەزگەھێن ئەمن و ئاسایش و کومسیوونێ دکەم بو خەمخوریا وان ھەتا نھا )
بارزانی د درێژاھیا پرێسکونفرانسا خوە دا گۆت: ( بتنێ سەربخوەی دکاریت بەرسڤا ھندەک ژ ئێش و ژانێن دایکێن شەھیدان بدەت و سلاڤ بو ھەموو شەھیدان و پێشمەرگێن قارەمان )

ئەڤرۆ نیوز ، نەوزاد ھلۆری:
ئەمنیدارێ گشتیێ ئێکگرتوویا ئیسلامی یا کوردستانێ دیارکر کو دەما ریفراندۆمێ زور گونجایە و گەلێ کوردستانێ ب کەرنەڤالێن خوە ئەڤ یەک سەلماند، و درۆستبوونا قەیران و گرتنا سنوران و شەر و ئالوزیان ب کرنا ریفراندۆمێ بتنێ چەند ئاخفتنەکێن سیاسیێن درۆستکرینە.
سەلاحەددین بھائەددین ئەمنیدارێ گشتیێ ئێکگرتوویا ئیسلامی یا کوردستانێ دەمەک بەریا نھا د پرێسکونفرانسەکێ دا ل ھەولێر دیارکر کو ئەو وەکو ئێکگرتوو ھەردەم د مەسەلێن دیموکراسی و مەدەنی دا دەستپێشخەربوینە و گۆت ژی: (ئەم وەکو ئێکگرتوو ب ھەموو قەناعەتا خوڤە پشکداریێ د سەرئێخستنا ریفراندۆمێ بوینە و مە سوپاسیێن کەسێ ژی نەڤێن و چوو مزایدان ژی ناکەین و سەربخوە بونا کوردستانێ و پشکداریکرنا سەرئێخستنا وێ شانازیەکا مەزنە بەری کو ئەرکێ مە بیت وەکو ئێکگرتوو ، و ئەم وەکو ئێکگرتوو دپرسێن نیشتمانی دا ھەردەم دەستپێشخەربوین )
زێدەتر گۆت: ( دوست و دوژمنێن مە چاڤەرێ نە کا قوناغا پشتی ریفراندۆمێ دێ چ روودەت و پێدڤی ناکەت دنھادا ئەم خەلکێ خوە ب ترسینین و و نابیت ئەم ریفراندۆمێ تێکەلی بابەتێن دن بکەین و تشتەک نورمالە کو رەخنە ل دەم و شێوازێ ریفراندۆمێ بھێتەگرتن بەلی َنابیت کو ھندەک کەس و لایەن بھانەیان بینن بو ئەنجامنەدانا ریفراندۆمێ و خەلکی ب بابەتێن مینا گرتنا سنوران و درۆستبوونا شەر و ئالوزیان و قەیرانان ڤە ب ترسینن و دنیا ھوسا بێ خودان نینە ھەرکەس و لایەنێ ڤیا ھێرشێ کوردستانێ بکەت و چوو تشتێن پلان بو دارشتی نینن)
ئەمنیدارێ گشتیێ ئێکگرتوویا ئیسلامی یا کوردستانێ د درێژاھیا پرێسکونفرانسا خوە دا دیارکر ژی کو ئەگەر ریفراندۆم نەھێتەکرن دێ بێئومێدیەکا دن بو گەلێ کوردستانێ ل گەل ھەموو ئەو بێئومێدیێن کو نھا ھەیی درۆست بیت و گۆت ژی: ( ھەر ھەلویست و تشتەکێ پشتی ریفراندۆمێ ھەبیت ژی مینا گرتنا سنوران دی یا دەمکی بیت و زیانا وێ بەری کو بومە بیت دێ بو وان بیت یێن ب گرتنا سنوران رادبن)