د كۆمبوونا جڤاتا وەزیرێن هەرێما كوردستانێ دا بڕیار ل سەر هنارتنا داهاتێ نە پەترۆلی یێ هەرێمێ بۆ بەغدا هاتە دان و داخواز ژی ژ حوكمەتا فیدرال دكەت مووچەیێ فەرمانبەرێن هەرێمێ خەرج بكەت، هەڤدەم جڤاتا وەزیران راگەهاند ژی سێ ملیۆن بەرمیلێن پەترۆلا هەرێما كوردستانێ ل بازارێن جیهانی ژ ئالیێ كۆمپانییا سۆمۆ ڤە هاتینە فرۆتن.
دوهی چارشەمبی 15/10/2025، جڤاتا وەزیرێن هەرێما كوردستانێ بەیاننامەیەك بەلاڤكر و تێدا ئاماژە كر» ئەڤرۆ ب سەرپەرشتییا مەسرور بارزانی، سەرۆكێ حوكمەتا هەرێما كوردستانێ و بەرهەڤبوونا قوباد تالەبانی، جێگرێ سەرۆكێ حوكمەتێ، جڤاتا وەزیرێن هەرێما كوردستانێ كۆمبوو».
باس ل وێ چەندێ ژی كر» ل دەستپێكا كۆمبوونێ و ب هەلكەفتا دەستپێكرنا هەوا بانگەشەیا هەلبژارتنێن جڤاتا نوونەرێن ئیراقێ، سەرۆكێ حوكمەتا هەرێمێ داخوازكر بانگەشەیەكا شارستانی و د چارچۆڤەیێ رێزگرتن ل قانوونێ و رێنمایان بڕێڤە بچیت و هیڤییا سەركەفتنێ بۆ هەموو وان كەس و ئالییان خواست كو دێ بنە نوونەرێن راستەقینەیێن خەلكێ كوردستانێ و داكۆكیێ ل مافێن دەستووری و قەوارەیێ هەرێما كوردستانێ كەن».
تێدا هاتیە ژی»تەوەرێ سەرەكیێ كۆمبوونێ، تایبەت بوو ب هەلسەنگاندنا رەوشا دارایییا هەرێمێ پشتی بجهئینانا رێككەفتنا سێ ئالییانەیا هنارتنا پەترۆلا هەرێمێ و هەروەسا دووڤچوونا جڤاتا وەزیران بۆ پێنگاڤێن خەرجكرنا مووچەیێ هەردو مەهێن 8 و 9 و مەهێن دی یێن سالا 2025 یێن فەرمانبەرێن هەرێمێ».
ب گۆڕەی بەیاننامەیێ» جڤاتا وەزیران پێخەمەت دابینكرنا مووچەی وەزارەتا دارایی راسپارد بۆ بجهئینانا پێگیریێن هەرێمێ بۆ هنارتنا پشكا گەنجینەیا فیدرالی ژ داهاتێن نە پەترۆلی تاكو وەزارەتا داراییا فیدرال هیچ تشتەكی نەكەتە بەهانە بۆ نە هنارتنا مووچەیێ هەردو مەهێن 8 و 9 و مەهێن د دووڤدا ژی» .
جڤاتا وەزیرێن هەرێمێ داخواز ژ حوكمەتا فیدرال كر، وەزارەتا دارییا فیدرال راسپێریت ب خەرجكرنا مووچەیێ هەرێمێ ب تایبەتی ژی وەك وەزیرێ سامانێن سروشتی ب وەكالەت بەرچاڤكری، رێككەفتنا سێ ئالییانەیا هنارتنا پەترۆلا هەرێما كوردستانێ گەلەك ب باشی و بێی كێماسی هاتیە بجهئینان و زێدەتر ژ سێ ملیۆن بەرمیلێن پەترۆلا هەرێما كوردستانێ ل بازارێن جیهانی ژ ئالیێ كۆمپانییا سۆمۆ هاتینە فرۆتن و داهاتێ وان ژی زڤریە بۆ وەزارەتا داراییا فیدرال.

هۆشەنگ تاجر:

هژمارەک ژ مامۆستایێن کورد داخواز ژ وەلاتیێن هەرێما کوردستانێ دکەن دەنگێ خوە بدەنە لیستا پارتی، چونکی دەمێ پارتی ل بەغدا بهێز بیت دێ ئەو یەک بیتە ئەگەرێ بهێزبوونا کوردان ل رۆژهەلاتا ناڤین و ژ بەر ڤێ یەکێ ژی سەرکەفتنا پارتی سەرکەفتنا هەموو کوردانە.

هژمارەک زێدە ژ مامۆستایێن زانکۆیێ ب رێیا تۆرێن جڤاکی پشتەڤانیا خوە بۆ لیستا ٢٧٥ یا پارتی دیموکراتی کوردستان دیار دکەن و داخواز ژ دەنگدەرێن هەرێما کوردستانێ دکەن د ڤان هەلبژارتنان دا دەنگێ خوە بدەنە لیستا پارتی دیموکراتی کوردستان، چونکی نها پتر ژ هەر دەمەکێ پێدڤیا کوردان ب هێزەکا مەزن و کاریگەر هەیە دا بشێت ل بەغدا و ل رۆژهەلاتا ناڤین ژی بەرگریێ ل مافێن گەلێ کورد بکەت، ئەو هێز ژی پارتی دیموکراتی کوردستانە، ژ بەر ڤێ یەکێ ژی سەرکەفتنا پارتی د ڤان هەلبژارتنان دا سەرکەفتنا ئیرادەیا گەلێ کوردستانێ یە.
مامۆستایێن زانکۆیێ یێن ژ هەر چار پارچەیێن کوردستانێ کو ل گەلەک وەلاتێن جیهانێ کار دکەن هەروەسا ئاماژە ب ڤێ یەکێ ژی دکەن، کو ب سەرپەرشتیا پارتی و سەرۆک بارزانی کوردان شیاینە گەلەک دەستکەفتێن مەزن بدەستڤە بینن، لێ د هەمان دەمی دا گەلەک پیلان ل دژی پارتی و هەرێما کوردستانێ ژی دهێنە گێران، ژ بەر ڤێ یەکێ ژی دڤێت کورد پشتەڤانیێ ل پارتی بکەن دا پارتی ژی بشێت هەم ل ئیراقێ و هەم ژی ل دەڤەرێن دی خزمەتا خەلکێ کوردستانێ بکەت، چونکی پارتی سەلماندیە خزمەتکارا گەلێ کوردستانێ یە ل هەر چار پارچەیان.
گەلەک ژ کەسێن رەوشەنبیر و ئەکادیمی ژی دیار دکەن، دڤێت پارتی ڤێجارێ گەلەک بهێزتر ژ جارێن بۆری بچیتە بەغدا، چونکی هندەک هێز ل هەرێما کوردستانێ بۆ خزمەتا نەیارێن کوردستانێ کار دکەن و دڤێت وەلاتیێن هەرێما کوردستانێ رێ نەدەن هێزێن وەسا بچنە پەرلەمانێ ئیراقێ، چونکی د دەمێن بۆری دا وان هێزان تنێ خزمەتا داگیرکەرێن کوردستانێ کرینە و تنێ پارتی بەرگریێ ل مافێن گەلێ کوردستانێ دکەت.
ئەو یەک د دەمەکێ دایە کو دوهی ژی هژمارەک زێدە ژ مامۆستا و چاڤدێرێن سیاسی یێن کورد ل ئۆرۆپا پشتەڤانیا خوە بۆ لیستا سەرۆک بارزانی دیار کرن و داخواز کرن وەلاتیێن هەرێما کوردستانێ دەنگێ خوە بدەنە پارتی دا کوردستان هەر یا ئاڤەندان بیت و مەترسی ژی ل سەر هەرێما کوردستانێ نەمینن.

دوهی سێشەمبی 14/10/2025، ب بەرهەڤبوونا نێچیرڤان بارزانی، جێگرێ سەرۆكی پارتی دیموكراتی كوردستان، كەرنەڤالەكێ جەماوەریێ پشتەڤانیێ ل لیستا 275 یا پارتی ل پارێزگەها هەولێرێ بڕێڤەچوو.
جێگرێ سەرۆكێ پارتی، د چارچۆڤەیێ پێشكێشكرنا پەیڤەكێدا باس ل دەستوورێ ئیراقێ كر و گوت» پترییا ئەو كێشە و گرفتێن د ناڤبەرا هەرێمێ و ئیراقێدا هەین، بجهنەئینانا دەستوورییە».
ل درێژییا ئاخڤتنێن خوە دا سەرنج بۆ وێ چەندێ راكێشا» گەلێ كوردستانێ باوەرنامەیا ئاڤەدانیێ دایە پارتی، هەروەسا خەمخۆرا كوردستانێ یا مەزن پارتییە».
جێگرێ سەرۆكێ پارتی گوت ژی» ئەوا پارتی ل هەولێرێ دكەت كێم نینە، جهێ شانازیێیە هەموو ئەندام و لایەنگرێن وێ خەلكێ هەرێما كوردستانێیە و مزگینیێ ددەینە خەلكێ ڤی باژێرێ و هەموو كوردستانێ، ئەو ئاڤەدانییا هاتیە كرن هیچ نینە ژ پێش وێ چەندا دێ حوكمەتا هەرێمێ ل پاشەڕۆژێ بۆ كوردستانێ كەت».
د پشكەكا دی یا پەیڤا خوە دا، جێگرێ سەرۆكێ پارتی دیموكراتی كوردستان دوپاتكر» ئەو ئارامی، ئاسایش و پێكڤەژیانا ل هەرێما كوردستانێ هەی، ژێدەرێ وێ هزر، و سەركردایەتییا پارتی دیموكراتی كوردستانە».
جێگرێ سەرۆكێ پارتی دیموكراتی كوردستان راگەهاند ژی: هەلبژارتنێن ڤێجارێ یێن ئیراقێ گەلەك د گرنگن و قووناغەكا گەلەك هەستیارە، لەوما داخواز ژ خەلكێ كوردستانێ و جەماوەرێ پارتی دیموكراتی كوردستان كر: دەنگ ب پارتی بدەن.
ل دۆر گرنگییا پرۆسەیا هەلبژارتنێن جڤاتا نوونەرێن ئیراقێ، جێگرێ سەرۆكێ پارتی ئاشكرا كر» ئێكلاكرنا كێشەیان و پرۆسەیا سیاسی ل ئیراقێ، ب رێیا سندووقێن دەنگدانێ دهێتە كرن، لەوما ل رۆژا دەنگدانێ دڤێت بەر ب سندووقێن دەنگدانێ بچین و لیستا 275 یا پارتی دیموكراتی كوردستان ب سەربێخین».
جێگرێ سەرۆكێ پارت، پەیامەك ئاراستەی دەنگدەرێن پارتی كر و گوت» دەمێ دچین دەنگێ بدەن ب هەموو كەسەكی بێژن، ناسنامەیا پارتی كوردستانییە و كارێن وێ ژی ئاڤەدانییە، رێبازا پارتی ژی ئاشتی پێكڤەژیانە».
نێچیرڤان بارزانی، جێگرێ سەرۆكێ پارتی دیموكراتی كوردستان دیاركر ژی» قووناغا داهاتی ل ئیراقێ قووناغا بجهئینانا دەستوورییە، لەوما ئەڤ هەلبژارتنە ب گەلەك گرنگ هەژمارتن و گوت» دڤێت پارتی ب هێز بنێریتە جڤاتا نوونەرێن ئیراقێ».
دوپاتی ل وێ چەندێ ژی كر « ل ڤێ قووناغا نوكە دڤێت دەستوور ل ئیراقێ بهێتە بجهئینان، هەروەسا بۆ بجهئینانا دەستووری و چەسپاندنا مافێن كوردان تێدا، دڤێت كورد ب هێز ل بەغدایێ بن».
نێچیرڤان بارزانی ب بەرهەڤبوویان راگەهاند» سوپاسییا هەوە هەموویان دكەم، هەوە پارتی گەهاندە 800 هزار دەنگان، بەلێ ڤێجارێ خواستا مە ئەوە پارتی ببیتە ئێك ملیۆن دەنگ».
هەڤدەم جێگرێ سەرۆكێ پارتی باس ل سەرۆك بارزانی كر و گوت» سەرۆك بارزانی ئەم فێركرینە كو پارتی ئامرازە و كوردستان ئارمانجا مە هەموویانە».
گوت ژی» پێخەمەت كوردستانەكا ب هێز و بجهئینانا داخوازیێن گەلێ كوردستانێ، دڤێت پارتی گەلەك ب هێز بنێرین بۆ جڤاتا نوونەرێن ئیراقێ».
نێچیرڤان بارزانی گوت ژی» دەمێ باسێ دۆزا كوردی و مافێن كوردان دهێتە كرن، پارتی ب خودان مال دزانن».
نێچیرڤان بارزانی د وەسفا پارتی دا، ئاماژە ب وێ چەندێ كر» پارتی خودانا مەزنترین شانازییا دیرۆكا هەڤچەرخا كوردستانێیە و دڤێت ب وی شێوەی ژی بمینیت، پارتی ل هەر جهەكێ بیت ئاڤەدانی ل وێرێ هەیە».
جێگرێ سەرۆكێ پارتی دیموكراتی كوردستان باس ل وێ چەندێ ژی كر» ئەڤ هەلبژارتنە، هەلبژارتنێن ئاسایی نینن، دخوازین بۆ هەوە بێژم ئەڤە قووناغەكا ئێكجار گرنگە ل ئیراقێ، بەری نوكە مە قووناغەك هەبوو كو حوكمەتا نوو یا ئیراقێ هاتە دامەزراندن و دەستوور هاتە نڤیسین و پێناسەیا ئیراقێ هاتە كرن، بەلێ پشتی وێ چەندێ ئیراقێ كەفتە د ناڤ گەلەك كێشەیاندا، ژ وان شەڕێ ناڤخوەیی، شەڕێ داعشێ».
لەوما نێچیرڤان بارزانی گوت» ئەڤ هەلبژارتنە بۆ هەرێما كوردستانێ د گرنگن، چونكە قووناغەك ل ئیراقێ دێ دەستپێكەت، كو بجهئینانا دەستوورییە، ئەڤ قووناغە ژی بۆ پارتی وخەلكێ كوردستانێ گەلەك گرنگە و دڤێت سۆزا خوە بۆ شەهید و پێشمەرگەیێن مە یێن قەهرەمان دووپات بكەین و ب گەرم و گۆڕی پشكداریێ د هەلبژارتناندا بكەین».
نێچیرڤان بارزانی سوپاسییا خۆڕاگرییا مووچەخۆران كر و گوت» نەحەزێن كوردستانێ وەسا هزركر ب نەدانا شایستەیێن دارایی، ئەو دێ رێیەكا دی بكارئینن، بەلێ مووچەخۆران سەلماند كو جارەكادی پارتی پێشڕەوە و خەمساریێ ناكەت و بەر ب سەركەفتنێ دچین».
جێگرێ سەرۆكێ پارتی رۆهنكر ژی» نابیت بهێتە ژبیركرن كو پارتی گرەنتییا دەستكەفتێن گەلێ كوردستانێیە ل بەغدا، هەكە پارتی ل بەغدا یا ب هێز بیت، كوردستان یا ب هێزە، بەلێ هەكە پارتی یا لاواز بیت، كوردستان دێ لاواز بیت».
ل كەرنەڤالا جەماوەرییا پارتی دا ل هەولێرێ، نێچیرڤان بارزانی پەیامەك بۆ ئالیێن كوردستانی هەبوو و گوت» داخوازا ئێكڕێزیێ ل بەغدا دكەین، ل هەرێما كوردستانێ ژی داخوازا پێڤە كاركرنێ دكەین. دڤێت ل بەغدا بۆ مافێن كوردستانێ هەموو حزب ئێكڕێز و ئێكدەنگ بن».
نێچیرڤان بارزانی ئاماژەكر كو كو ئەڤ قووناغا ل بەراهییا مە قووناغەكا گەلەك هەستیارە ئەوژی قووناغا بجهئینانا دەستوورێ ئیراقێیە كو مە بۆ وی دەستووری خەبات كریە و وەستیاینە، هەست ب وی ئەركێ خوە بكەن و بەرپرسیارەتییەكا مەزنە و قووناغا گەلەك گرنگە و ڤان هەلبژارتنان ب كێم نەزانن من گەلەك جاران یا گوتی ئێك دەنگ بۆمە پارتی گەلەكە و هەتا مە پێدڤی ب ئێك دەنگی هەیە ژبەر وێ چەندێ داخواز دكەم ل رۆژا دەنگدانێ هەموو خەلك بچن و مال ب مال ژی دەنگان بۆ پارتی كۆمڤەكەن و پارتی ل ڤێ قووناغێ ژی سەربێخن.

مەسرور بارزانی، سەرۆكێ حوكمەتا هەرێما كوردستانێ ل گەل پاتریك دۆرێل، بالیۆزێ فرەنسا ل ئیراقێ باس ل سەرەدانا چاڤەڕێكرییا ئیمانوێل ماكرۆن، سەرۆكێ فرەنسا بۆ ئیراقێ و هەرێما كوردستانێ كر، بالیۆزێ فرەنسا گرنگیدان و ئەنجامدانا پڕۆژەیێن تایبەت ب پاراستنا ژینگەهێ بلند هەلسەنگاند.
دوهی سێشەمبی 14/10/2025، د دیدارا د ناڤبەرا سەرۆكێ حوكمەتا هەرێما كوردستانێ و بالیۆزێ فرەنسا ل ئیراقێ كو تێدا یان برێم، قونسلێ گشتیێ فرەنسا ل هەرێما كوردستانێ بەرهەڤبووی، رەوشا گشتییا ئیراقێ و دەڤەرێ و چارەسەركرنا كێشەیێن د ناڤبەرا هەرێما كوردستانێ و حوكمەتا فیدرالی هاتنە گەنگەشەكرن.
مەسرور بارزانی دوپاتكر» ئەم دخوازین مە باشترین هەڤبەندی ل گەل حوكمەتا فیدرال هەبیت ل سەر بنەمایێ رێزگرتنێ ل مافێن دەستووری و قەوارەیێ فیدرالیێ هەرێما كوردستانێ و دابینكرنا پشكا بودجەیا تایبەت ب هەرێمێ ڤە ژ بودجەیا گشتییا ئیراقێ».
گوت ژی» هیڤیدارین رێككەفتنا ڤێ دوماهیێ یا هنارتنا پەترۆلا هەرێما كوردستانێ، ببیتە رێخوەشكەر بۆ چارەسەركرنا كێشەیێن د ناڤبەرا هەردو ئالییاندا».
بالیۆزێ فرەنسا دەستخوەشییا پڕۆژەیێن چاكسازیێن وی ل سەرۆكێ حوكمەتا هەرێمێ كر و گرنگیدانا حوكمەتا هەرێما كوردستانێ ب ئەنجامدانا پڕۆژەیێن تایبەت ب ژینگەهپارێزیێڤە بلند هەلسەنگاند.
هەروەسا باس ل سەرەدانا چاڤەڕێكرییا ئیمانوێل ماكرۆن، سەرۆككۆمارێ فرەنسا بۆ ئیراقێ و هەرێما كوردستانێ ل مەها 12 یا ئەڤسالە هاتە كرن.

دوهی سێشەمبی 14/10/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل عرفان سەدیق، بالیۆزێ بریتانیا ل ئیراقێ كر.
د كۆمبوونەكێدا كو ئەندرۆ بیزلی، قونسلێ گشتیێ بریتانیا ل هەرێما كوردستانێ برەهەڤبووی، دوپاتی ل پاراستن و رێزگرتنێ ل مافێن دەستووری و دابینكرنا شایسەتیێن دارایی یێن هەرێما كوردستانێ، د چارچۆڤەیێ پێگیریبوون ب دەستووری و رێككەفتنان هاتە كرن.
هەردو ئالی هەڤڕابوون ل سەر وێ چەندێ پێدڤییە كێشەیا مووچەی و شایستەیێن دارایی یێن خەلكێ كوردستانێ ب شێوەیەكێ بنەڕەتی بهێنە چارەسەركرن و نابیت ببیتە بابەتەكێ سیاسی.
هەروەسا ب گرنگی باس ل رێككەفتنا سێ ئالییانە یا تایبەت ب دەستپێكرنا هنارتنا پەترۆلا هەرێما كوردستانێ هاتە كرن كو پێدڤییە ببیتە دەستپێكەك بۆ دەركرنا قانوونا پەترۆل و غازێ ل خولا داهاتییا جڤاتا نوونەرێن ئیراقێ.
د پشكەكا دی یا كۆمبوونێدا، سەرۆكێ حوكمەتا هەرێمێ رۆناهی ئێخستە سەر چاكسازیێن حوكمەتا هەرێمێ د كەرتێن جۆراوجۆردا، ب تایبەتی ب ئەنجامگەهشتنا هەردو پڕۆژەیێن (هەژمارا من) و( رۆناهی). بالیۆزێ بریتانیا ل ئیراقێ پیرۆزباهی و دەستخوەشییا سەركەفتنا وان چاكسازییان ل سەرۆكێ حوكمەتا هەرێمێ كر.
هەلبژارتنێن داهاتی یێن جڤاتا نوونەرێن ئیراقێ و رەوشا گشتییا ئیراقێ و دەڤەرێ، تەوەرەكێ دی یێ دانوستاندنان بوو.

دهۆك ،لەزگین جوقی

بەرپرسێ لیژنەیا پارتی دیموكراتی كوردستان ل شنگالێ راگەهاند، پشتی 11سالان دناڤ چەرگێ شنگالێدا بۆ جارا ئێكێ بانگەشەیا هەلبژاتنان بۆ لیستا 275 پارتی دیموكراتی كوردستان و بەربژارێن پارتی ل گوندێ قابوسیل شنگالێ هاتە كرن.
سلێمان حەسەن، بەرپرسێ لیژنەیا پارتی دیموكراتی كوردستان ل شنگالێ راگەهاند»پشتی 11 سالان بۆ جارا ئێكێیە ل گوندێ قابوسی ل قەزا شنگالێ مە دەست بانگەشەیا هەلبژاتنان كر بۆ لیستا 275پارتی دیموكراتی كوردستان و بەربژارێن پارتی كو خەلكێ شنگالێ گەلەك ب گەرمێ پێشوازییا لیستا پارتی دیموكراتی كوردستان 275 وبەربژارێن پارتی دكەن و دێ دەنگ ب لیستا پارتی دەن بۆ ئاڤەدانی و تەناهیا شنگالێ».
تەكەز كر» هەر جهەكێ پارتی تێدا بیت ئاڤەدانی وئارامی هەیە و خەلكێ شنگالێ دێ دەنگێ خوە دەنە لیستا 275 وبەربژارێن پارتی دیموكراتی كوردستان ل سنوورێ لقا 17ێ یا پارتی ل شنگالێ داكو ئاڤەدانی وئارامی بۆ شنگالێ ڤەگەریت».
زێدەتر گوت» ئەڤە چەند سالن خەلكێ شنگالێ چاڤەرێی زڤرینا پارتی دیموكراتی كوردستان بۆ شنگالێ دكەن تاكو ئارامی وئاڤەدانی بۆ شنگالێ ڤەگەریت وهەتا پارتی نەچیتە شنگالێ رەوشا خەلكی د وارێ تەناهیێ دا خوەش نابیت وهەر دەڤەرەكا پارتی تێدا بیت تەناهی هەیە وخەلك ب سەرفرازی دژین بۆ شنگالێ ژێ خەلكێ دێ دەنگ ب لیستا پارتی دەن داكۆ ئارامیێ بۆ شنگالێ ڤەگەریت.

سەرۆكێ لیستا پارتی دیموكراتی كوردستان بۆ هەلبژارتنێن جڤاتا نوونەرێن ئیراقێ ل پارێزگەها كەركووكێ راگەهاند: هێشتا شەڕ ل بەغدایێ مایە، رەوش گەلەك ژ جاران دژوارترە، هندەك حزب دوهی د لیستا تیرۆرێ یا ئەمریكا دا بوون، بەلێ ئەڤرۆ بەربژار بۆ هەلبژارتنێن جڤاتا نوونەرێن ئیراقێ هەنە.
شاخەوان عەبدوللا، سەرۆكێ لیستا پارتی دیموكراتی كوردستان بۆ هەلبژارتنێن جڤاتا نوونەرێن ئیراقێ ل پارێزگەها كەركووكێ د كەرنەڤالێ بانگەشەیا پارتی ل كەركووكێ د چارچۆڤەیێ پێشكێشكرنا پەیڤەكێ سۆز دا كو قوتابیێ راستەقینەیێ رێبازا بارزانی بیت ل بەغدا.
هەڤدەم گون» هێشتا شەڕ ل بەغدایێ مایە، رەوش گەلەك ژ داران دژوارترە، هندەك حزب دوهی د لیستا تیرۆری یا ئەمریكا دا بوون، بەلێ ئەڤرۆ بەربژار بۆ هەلبژارتنێن جڤاتا نوونەرێن ئیراقێ هەنە، ئەو خەلكێ شۆڤینی كو درۆن بۆ هەرێما كوردستانێ د هنارتن، نوكە د خوازن بچنە جڤاتا نوونەران».
سەرۆكێ لیستا پارتی ل كەركووكێ دوپاتی ل وێ چەندێ كر» ئەو خەلكێ شۆڤینی دەمێ دچنە جڤاتا نوونەران، ل ناڤ جڤاتا نوونەران ژی رێ پێ نادەن ب ئارەزوویا خوە قانوونان دەرباز بكەن و هندی ئەم ل بەغدایێ بین كەس نەشێت ب كەیفا خوە مافێن هەرێما كوردستانێ بن پێ بكەت، بەلكو دێ پێرابوون و سزایێن قانوونی ل پێشبەری وان وەرگرین».
دوپاتكر ژی» ل جڤاتا نوونەرێن ئیراقێ دێ ب قانوونێ بەرگریێ ژ كوردستانیبوونا كەركووكێ كەین».
شاخەوان عەبدوللا، ئاماژە ب وێ چەندێ ژی كر» سەرەرای هەبوونا هندەك بنپێكرنان وەك دڕاندنا پۆستەرێن بەربژارێن مە، بانگەشە ب گشتی ب ئارامی بڕێڤەدچیت» هەروەسا دوپاتی ل سەر وان سۆزا ژی كر كو حزبێن كوردی داین بۆ ئەنجامدانا بانگەشەیەكا ئارام و دوور ژ توندوتیژیێ».
سەرۆكێ لیستا پارتی دیموكراتی كوردستان ل كەركووكێ باس ل وێ چەندێ ژی كر» خەلكێ كەركووكێ ب وەفانە و رێزێ ل دیرۆك و قوربانیدانا پارتی دیموكراتی كوردستان دگرن، د سێ سالێن بۆریدا مە بزاڤێن مەزن بۆ ئاساییكرنا رەوشا باژێرێ كەركووكێ و خزمەتكرنا وەلاتییان كرینە».
گوت ژی» مەسرور بارزانی، جێگرێ سەرۆكێ پارتی دوپاتی ل سەر ئاخڤتنێن سەرۆك بارزانی كریە، ئەم هەلگرێن پەیامەكێنە، نابیت بانگەشە ببیتە ئەگەرێ بێزاركرناخەلكی و دبێژیت ب شێوەیەكێ شارستانیانە برێڤەدچیت، چونكە خەلك هەیە یێ دخەوە، خەلك هەیە نەخوەشە، نابیت ئەڤ بانگەشەیا هەوە ببیتە ئەگەرێ ئازاردان و بێزاركرنا خەلكی».
رۆهنكر» ل سالا 2021 پۆستەرێن مە هەموو هاتنە دڕاندن، بەلێ مە دەنگێن ئێكێ یێن كەركووكێ ئینان، چونكە پشت گەرمین ب دۆزا گەلێ خوە»..
شاخەوان عەبدوللا داخواز ژ خەلكێ كەركووكێ كر پشكدارییا كارا د هەلبژارتناندا بكەن بۆ پاراستنا ماف و دەستكەفتێن كوردان ل وی باژێری».
دیاركر ژی» ئارمانجا مە هەژمارا كورسییان زێدە بكەین بۆ وێ چەندێ بشێین باشتر بەرگریێ ژ دۆزا كوردی ل بەغدایێ بكەین».
شاخەوان عەبدوللا ئاشكراكر ژی» بەری سێ سالان ل وی جهێ كو بانگەشەیا هەلبژارتنان تێدا ئەنجام ددەین، باجەر و زریپۆشێن لەشكرێ ئیراقێ لێ هەبوون، بەلێ وەك سۆز دای ئالایێ كوردستانێ ل ناڤ كەركووكێ بلندكر و لەشكرێ ئیراقێ نەچاری ڤەكێشانێ كر».
ئەوژی بەرچاڤكر» ئەم قوتابیێن رێبازا بارزانی نە و ژ هیچ هێزەكێ ناترسین، هەر سۆزەكا مە دابیت ژی ب كریار مە بجهئینایە».

ئەو كەرنەڤالا جەماوەرییا مەزن، وەك دەستپێكەكا ب هێز بۆ بانگەشەیا هەلبژارتنان یا پارتی دیموكراتی كوردستان ل كەركووكێ دهێتە هەژمارتن كو هەژمارەكا مەزن ژ لایەنگر و دەنگدەرێن پارتی تێدا پشكداربوون.

ب بەرهەڤبوونا مەسرور بارزانی، جێگرێ سەرۆكێ پارتی دیموكراتی كوردستان، هەوا بانگەشیا پارتی بۆ هەلبژارتنێن جڤاتا نوونەرێن ئیراقێ ب شێوەیەكێ فەرمی دەستپێكر و تێدا جێگرێ سەرۆكێ پارتی پەیڤەك پێشكێشكر ئەڤە دەقێ وێ یە:

گەلەك سوپاس بۆ بەرهەڤبوونا هەوە ئەڤرۆ بۆ دەستپێكرنا هەوا بانگەشەیا هەلبژارتنان ل پارێزگەها دهۆكێ، گەلەك خوەشحالم جارەكادی پشتی سالەكێ ژ هەبژارتنێن هەرێما كوردستانێ، ڤێجارێ ئەم یێن كۆمڤەبین بۆ هەلبژارتنێن جڤاتا نوونەرێن ئیراقا فیدرال هیڤیدارین وەك هەر جار لیستا پارتی دیموكراتی كوردستان لیستا 275 ڤێجارێ سەركەفتنەكا مەزن بدەستڤەبینیت.
ب هیڤییا خودای و دلسۆزییا زارۆیێن پێشمەرگەیێن قەهرەمان، كادرێن وەفاداران پارتی، جەماوەری خۆڕاگرێ رێبازا بارزانی ئەم پشتڕاستین كو ڤێجارێ دێ ب سەركەڤین بەلێ مە دڤێت مەزنترین سەركەفتن ل سەر ئاستێ ئیراقێ بدەستڤەبینین.
هەموو هەلبژارتن د گرنگن بەلێ ڤێجارێ د ڤان هەلبژارتناندا مە بۆ وێ چەندێیە ئەم نوونەرێن راستەقینەیێن خەلكێ كوردستانێ بهنێرینە بەغدا تاكو ل وێرێ داكۆكیێ ژمافێن دەستووری یێن خەلكێ كوردستانێ بكەن و ئەڤ خووشك و برایێن هاتینە بەربژاركرن كوڕ و كچێن هەوەنە و خووشك و برایێن هەوەنە و ئەز یێ د وێ باوەریێدا دێ باشترین شێوە پارێزگاریێ و بەرگریێ ژمافێن خەلكێ كوردستانێ كەن و هیڤیدارم د سەركەفتی بن.
د هەلبژارتناندا هەموو جاران ئەم هەوە د وەستینین بەلێ نەچارین چونكە خەلكەكێ دی ژی بزاڤێ دكەت ل شوونا پارتی دیموكراتی كوردستان ئەو بچن و ڤان پۆستێن گرنگ یێن حوكمەتێ یان جڤاتا نوونەرێن ئیراقێ وەك نوونەرێن خەلكی خوە بدەنە نیاسین و مە دیت چەندین جاران هەكە پارتی دیموكراتی كوردستان ل جهەكی پشكدارییەكا كارا و ب هێز نەبیت، خەلكەكێ دی نوونەراتییا خەلكێ كوردستانێ كربیت هەموو دەمان مافێن خەلكێ كوردستانێ یێن هاتینە بنپێكرن، ژ بەر وێ چەندێ گەلەك یا گرنگە نوونەرێن راستەقینەیێن خەلكێ كوردستانێ كو نوونەرێن پارتی دیموكراتی كوردستانن ئەو سەركەڤن و ئەو نوونەراتییا هەوە بكەن، لەوما گەلەك یا گرنگە هوون هەموو پشكدارییەكا كارا د ڤان هەلبژارتناندا بكەن.
ل رۆژا ئێكشەمبی دبیت هەوە دیتبیت سەرۆك بارزانی بانگەشەیا هەلبژارتنان بۆ پارتی دیموكراتی كوردستان دەستپێكر و فەرمانا سەرۆك بارزانی بۆمە هەموویان د دیار و رۆهنن جارێ ئەم هەموو ل سەر رێنمایی و شیرەتێن سەرۆك بارزانی د بەردەوام بین و ب ڤی رەنگی بانگەشیا هەلبژارتنان دەست پێ بكەین ل سەرخوە و ئاستەكێ بلند و رەوشتەكێ بلند یێ پارتایەتی یێ رێبازا بارزانی كو هەژی هەوەیە و ئەم ب ڤی رەنگی دێ چینە دناڤ ڤان هەلبژارتناندا
بەلێ د هەمان دەمدا سەرۆك بارزانی دو پەیامێن گرنگ هەبوون و ئەز حەز دكەم دوبارە بكەمەڤە. پەیاما ئێكێ ئەوە كو پێدڤییە هە پارتییەكێ دلسۆز یێ بەردەوام بیت د بەرگریێ ژ مافێن خەلكێ كوردستانێ ڤێجارێ ئەركێ ڤان خووشك و برایێن مە ئەوە پارێزگاریێ ژ مافێن دەستووری یێن هەرێما كوردستانێ ل بەغدا بكەن ئەڤە ئەركێ ئێكێیە و پەیاما ئێكێیە و پێدڤییە پارتی بەرگریكار و پارێزڤانا مافێن خەلكێ كوردستانێ بیت.
پەیاما دویێ بۆ نەحەزێن پارتی بوو دەمێ سەرۆك بارزانی گوتی بەس خوە ب وەستینن چونكە پارتی ب هەوە ناشكێت، ئەم ژی یێن د وێ باوەریێدا كو پارتی ناشكێت چونكە سەرۆك بارزانی سەرۆكێ مەیە، چونكە رێبازا مە یا پڕە ژ قوربانیدانێ و وەستیانا پێشمەرگەیێن قەهرەمان و خوونا شەهیدێن كوردستانێ د رێكا پارتی و بارزانی دا ئەڤ وەلاتە یێ گەهاندیە ڤێ قووناغێ ژ بەر وێ چەندێ هەتا گیانێ شەهیدێن مە دگەل مەدایە و لاڤایێن بنەمالێن شەهیدان و دایكێن شەهیدان د گەل مەدانە هندی ئەڤ جەماوەرێ خۆڕاگر دگەل مەدابیت پارتی چو جاران ناشكێت.
خووشك و برایێن هێژا..
بۆچی ئەڤ هەلبژارتنە بۆمە د گرنگن؟ ئەڤ هەلبژارتنە د گرنگن چونكە كاریگەرییەكا راستەوخوە ل سەر ژیانا مە ل هەرێما كوردستانێ هەی، مەدیت ئەڤ دەمێ بۆری چەند ئاستەنگ بۆمە هاتنە پێش و چەند پلان بەرامبەر هەرێما كوردستانێ گێران بۆ وێ چەندێ ئەم سەركەفتی نەبین سەرەرای ڤان هەموو پیلان و قەیرانان نەتنێ ئەم رانەوەستیان بەلكو ئەم بەر ب پێشڤە چووین، بەلێ گرنگە ئەو جهێن كو پیلان دژی خەلكێ كوردستانێ دهێنە گێران ئەو جهێ كو مافێ دەستووریێ خەلكێ كوردستانێ دهێتە بنپێكرن ئەم پشكەكێ شەڕێ خوە ڤەگوهێزینە وێ مەیدانێ و ئەو میدان ئەڤرۆ جڤاتا نوونەرێن ئیراقێیە ژ بەر ڤێ چەندێ پێدڤییە ئەڤ خووشك و برایێن پیشمەرگە ڤی شەڕی بۆمە ل جڤاتا نوونەرێن ئیراقێ بكەین، خەلكێ دی شانازیێ ب وێ چەندێ دكەت كو نەهێلایە بەرنامەیێ حوكمەتا هەرێما كوردستانێ بەر ب پێشڤە بچیت و شانازیێ ب وێ چەندێ دكەن كو ب هێزبووینە ل مەیدانێن دی، بەلێ ئەم شانازیێ ب وێ چەندێ دكەین كو د مەیدانا هەرێما كوردستانێدا ئەم هەموو دەمان د خزمەتا مللەتێ خوەدا بووین و چو جاران مە (موسامەوە) ل سەر مافێ مللەتێ خوە نەكریە و گەلەك یا گرنگە ئەو جهێ كو پێدڤییە بەرگری ژ مافێن دەستووری بهێتە كرن و هەموو خالێن دەستووری بهێنە بجهئینان هەبوونەكا ب هێز مە هەبیت و پشكدارییەكا ب هێز مە هەبیت بۆ وێ چەندێ نەهێلین هیچ كەسەك هەر بیر و باوەرەكا هەبیت بۆ دژایەتییا هەرێمێ پێچێنەبیت پلانێن خوە سەربێخیت، هەكە هزرا خوە تێدا بكەن گەلەك جاران بەرنامە و پلان هەبوون بۆ وێ چەندێ نەهێلن هەرێما كوردستانێ ب مافێن خوە یێن دەستووری شاد ببیت یان بەر ب پێشڤە بچیت، مە گەلەك بەرنامە هەبوون و گەلەك جاران ژی ئەم تێدا یێن سەركەفتین، بەلێ شیانێن مە و هەموو هێزا مە گەلەك جارا پشكەك بۆ وێ چەندێ بوو ئەم خزمەتا هەوە بكەین و پشكەك بۆ وێ چەندێ بوویە بەرامبەر ڤان پلان و ڤان بەرنامەیێن كو دژی هەوە هاتینە دانان راوەستین، هەكە ل وێرێ ئەڤ بیاڤە هەبا ئەم بشێین ل وێرێ د سەركەفتی بین و ب هێز بین بێگومان هەموو هێز و وەزیا مە دا بۆ خزمەتكرنا كوردستانێ بن و كوردستان چەند پێشكەفتییە دا دوجاركی پێشكەڤیت.
گەلەك خالێن دەستووری یێن هەین هێشتا نەهاتینە بجهئینان، كێشەیا مە كێشەیا مووچەی نینە، بەلكو كێشەیا مە كێشەیا ناسنامەیا نەتەوەیییە و یا ئاخێیە یا كیانێ كوردستانێیە، یا مافێ خەلكێ كوردستانێیە، یا پێكڤەژیانێیە، یا هەموو ئایین و نەتەوەیێن جودایە د ڤی وەلاتیدا كو ئەم ب شانازیڤە دشێین بێژین ئەڤرۆ كوردستان نموونەیا پێكڤەژیانا هەموو نەتەوە و ئایینایە.
هەكە پارتی دیموكراتی كوردستان ل جڤاتا نوونەرێن ئیراقێ یا ب هێز بیت بێگومان دێ پێچێبیت كاریگەرییەكا مەزن ل داڕێشتنا قانوونان هەبیت و رێگریێ بكەت ل پلانێن دژی هەرێمێ هەین هەرچەندە مە بەری نوكە ژی ئەم د وێ باوەریێ دابووین كو ئیراقەكا فیدرالی دێ زێدەتر خزمەتا هەرێما كوردستانێ كەت بەلێ ب مخابنیڤە گەلەك كەس یێن هەین باوەری ب فیدرالییەتێ نەبوویە و گەلەك بەندێن دەستووری ژی د دەستوورێ ئیراقێدا نەهاتنە بجهئینان د ڤێت ئەم ل سەر وان خالان راوەستین و بەری هەموو تشتەكی بزاڤەكا جدی بكەین بابەتێ كیانێ كوردستانێ مسۆگەر بكەین و رێ نەدەین كەسەك هزر بكەت بهۆستەك وەلاتێ مە ببەت، بابەتێ دی پرسا شایستە و بابەتێ داراییێ هەرێما كوردستانێیە كو ب مخابنیڤە مە دیت ئەڤ چەند سالە وەك كارتەك دژی هەرێما كوردستانێ دهێتە بكارئینان ئەوژی ژبەر وێ چەندێ چونكە هەبوونا مە ل بەغدا وەسا یا ب هێز نەبوویە، ئەم د وێ باوەریێدا بووین دەستوور دێ هێتە بجهئینان بەلێ ب مخابنیڤە نە دەستوور هاتە بجهئینان و نە كەسەك ژی ل وێرێ بوو بشێت ل شوونا مە پارێزگاریێ ل مافێن مە بكەت ژبەر ڤێ چەندێ دڤێت ئەم زەند و باسكا هەلدەین و بچین جارەكادی پارێزگاریێ ل مافێن خوە بكەین، هەكە بەغدا و حوكمەتا فیدرالی یا پشتەڤان بیت و هەموو پێگیریێن خوە یێن دەستووری بەرامبەر هەرێما كوردستانێ بجهبینیت باوەركەن كوردستانێ دێ گەلەك چیتە قووناغێن سەركەفتی، ل دەمێ بۆری گەلەك كەسان باوەر نەدكر مە ئەڤ دەستكەفتە ژی هەبن، گەلەك رێگری هاتنە كرن چ ل ناڤخوە و چ ل دەرڤە ، پلان هاتنە گێران، ئەو بەرنامەیێن مە هەبوون بۆ خزمەتكرنا خەلكێ كوردستانێ بهێنە راگرتن و نەهێلن ئەم سەركەڤین، كەسێ باوەر نەدكر ئەم بشێین ڤان ئاستەنگان دەرباز بكەین و ڤان خەونان بكەینە راستی، مادەم هەتا نوكە ئەم د سەركەفتی بووین ژ ڤێرێ و وێڤە هیڤییا من گەلەك زێدەترە كو دێ سەركەفتنێن زێدەتر و پێشكەفتنێن زێدەتر بدەستڤەینین، ل ڤێرێ مە گەلەك پرۆژە هەبوون دخوازم هندەكا بۆ هەوە باس بكەم چونكە گەلەك یا گرنگە دەمێ هوون دچن دگەل خەلكەكی د ئاخڤن و داخواز دكەن دەنگێ خوە بدەنە بەربژارێن پارتی دیموكراتی كوردستان بێگومان دێ پرسیاركەن بۆچی پارتی دیموكراتی كوردستان و چو ئالییەكێ دی نە؟ ئەڤ پرسیارە مە ژی ژ وەلاتییان یا هەی بۆچی پارتی و بۆچی چو ئالییەكێ دی نە؟ بنێرنێ كا پارتی بۆ هەوە چ كریە و بنێرن كا خەلكێ دی ژی بۆ هەوە چ كریە، ئەڤەیە بەرسڤا مە بۆ وی خەلكێ هێشتا گومان هەبن ل سەر وێ چەندێ كا دێ چاوان بەربژارێن خوە هەلبژێرن، بنێرنێ دەمێ رۆژێن تەنگاڤییاندا پارتی ل سەنگەرێن بەراهیێ یێن بەرگریێ بوو، سەنگەرێن پێشمەرگەی د پڕ بوون ژ ئەندام و سەركردەیێن پارتی و پێشمەرگەیێن پارتی بەرگری ژ ئاخا كوردستانێ دكر و ل كەرامەتا مللەتێ مە دكر، ئەڤرۆ ژی پارتی سەركێشا كاروانێ ئاڤەدانیێیە، ژبەر ڤێ چەندێ پێدڤییە پارتی بهێتە هەلبژارتن ژ ئالیێ خەلكێ كوردستانێڤە وباوەرییا خەلكێ كوردستانێ بۆ پارتی بیت چونكە د خوەشیێ و نەخوەشیێدا هەموو دەمان پارتی دگەل خەلكێ خوە دا بوو و چو جاران خەلكێ خوە بجه نەهێلایە.
بلا خەلكێ مە پرسیارا ئالیێن دی بكەت و هەر كەسەك یێ ئازادە بۆ خوە بانگەشەیا هەلبژارتنان بكەت و هەر كەسەكێ ئازادە باسێ بیر و بۆچوونێن خوە بكەت، باسێ بەرنامەیێ خوە یێ هەلبژارتنان بكەت، باسێ پاشەڕۆژا وەلاتێ خوە بكەت، بەلێ ئایا سۆزدان تنێ بەسە؟ یان پێدڤییە ئەم هەلسەنگاندنێ و بڕیارێ ل سەر كار و كریارێن ڤان ئالییان بدەین، پارتی ناهێت سۆزا بدەتە خەلكێ كوردستانێ و بێژیت دەنگێ بدەنە من چونكە فلان رۆژی دێ بۆ هەوە ڤی تشتی كەم یان دێ بۆ هەوە ڤی دەستكەفتی بدەستڤەئینم، پارتی هند دەستكەفت یێن هەین كو بچیت ب سەرباندی بێژیتە خەلكی من ئەڤ هەموو دەستكەفتە بۆ هەوە هەبوون و ئەز دخوازم ب پشتەڤانییا هەوە هەموویان دەستكەفتێن زێدەتر ژی بۆ وەلاتی بدەستڤەبینیت، ئەو دیرۆكا پارتی هەی و ئەو خزمەتا پارتی كری و ئەو شەهیدێن پارتی داین و ئەو زەحمەتا پارتی كێشای هیچ ئالییەكی دی ل كوردستانێ نینە بشێت ململانێیا پارتی بكەت، دبیت خەلكەكی پێشبینیێن دی هەبن، بەلێ باوەر بكەن پارتی ناهێتە قیاسكرن ب هیچ ئالییەكی، دەستكەفتێن پارتی ناهێنە قیاسكرن دگەل هیچ ئالییەكی، دلسۆزییا پارتی و وەفادارییا پارتی ژی بۆ ئاخ و خەلكێ كوردستانێ دگەل ئالییەكی ناهێتە قیاسكرن.
مە ل ڤێرێ بەرنامە د دانان چاوا خزمەتا خەلكێ كوردستانێ بكەین و ئالیێن دی بەرنامە د دانان چاوا نەهێلن ئەم خزمەتا خەلكێ كوردستانێ بكەین، جوداهییا مە و وان ئەڤەیە ئەم یێن د خزمەتا هەوە دا و ئەو رێگر بوون ئەم خزمەتا هەوە بكەین جوداهییا مە ئەڤەیە.
ب سەربلندیڤە دەمێ هوون دچن داخواز دەنگێن خەلكێ كوردستانێ دكەن بێژنێ دەنگی بدەنە مە چونكە مە سینگێ خوە كریە قەلغان بۆ هەوە ژبۆ وێ چەندێ شەرەف و كەرامەتا مللەتێ خوە بپارێزین، بێژنێ دەنگی بدەنە مە چونكی ئەم ئەو كەس بووینە یێن كو هەموو دەمام بەرامبەری دوژمنێن ڤی وەلاتی ئەم راوەستیاینە، دەنگی بدەنە مە چونكە مە باوەرییا ب پاشەڕۆژا ڤی مللەتی هەی و ئەو تشتی هەتا نوكە مە ئەنجامدای پێنگاڤێن دەستپێكینە بۆ دەستكەفتێن گەلەك زێدەتر.
راستە حوكمەتا هەرێما كوردستانێیە بەلێ سەركردایەتییا ڤێ حوكمەتێ ژ ئالیێ پارتی دیموكراتی كوردستان بوویە، شانازییا حوكمەتێ بۆ هەموو خەكێ كوردستانێیە، بەلێ شانازییا پارتی زێدەترە چونكە سەركێشییا ڤێ حوكمەتێ و ئەجیندایێن ڤێ حوكمەتێ ژ ئالیێ پارتیڤە هاتیە دانان و هاتییە بجهئینان، ژ بەرڤێ چەندێ مەزنترین دەستكەفتا ڤێ حوكمەتێ جارەكادی بۆ پارتی دزڤریت و دڤێت هوون هەموو د سەربلند بن و شانازیێ ب وێ چەندێ بكەن كو ئەڤ حوكمەتە حوكمەتا هەوە بوویە و ئەڤ دەستكەفتێن ڤێ حوكمەتێ بدەستڤەئیناین ئەنجامێ پشتەڤانی و دەنگێن هەوەبوویە.
ئەم وەك هەرێما كوردستانێ هەتا نوكە مە تنێ 5% ژ داهاتێ ئیراقێ د دەستدابوو، ئەو بودجەیا كو حوكمەتا ئیراقێ دانای و ئەو هووردەكاریێن چوویە دناڤدا ل ئەنجامێ دووماهیێ تنێ 5% ژ بودجەیا گشتییا ئیراقێ بۆ هەرێما كوردستانێ هاتیە و ئەو پێشكەفتنا نوكە د كوردستانێدا هەی هەرچەندە رێژەیا ئاكنجیێن هەرێما كوردستانێ نوكە ل دووڤ ئامارێن ل ڤێ جووماهیێ هاتینە كرن 14% یە، ئانكو 14% ئاكنجی و 5% داهات، ئەڤ دەستكەفتێن نوكە ل هەرێما كوردستانێ هەین 5% ژ داهاتێ ئیراقێ بۆ رێەیا 14% ژ ئاكنجیێن ئیراقێ هەبوویە، بەرامبەر وێ 86% ئاكنجیێن هەموو ئیراقێ 95% ژ داهاتێ ئیراقێ ل بەردەست بوو بلا بهێن بەراورد بكەن كا ئەو پێشكەفتنێن ل هەرێما كوردستانێ هەین یان هەر باژێرەكێ دی یێ ئیراقێ بلا بنێرنێ كا پێشكەفتنا هەرێما كوردستانێ ل چ ئاستە و پێشكەفتنا باژێرێن دی ل چ ئاستە.
مە گەلەك بزاڤ كرینە كو خەلكێ مە یێ ئاسوودە بیت هندەك ماف گەلەك د سەرەتایی نە بۆ خەلكێ هەرێما كوردستانێ ئێك ژوان كارەبایە، كێشەیا 30 سالان كو هەموو ئیراق تێدا دنالیت و نەهاتیە چارەسەركرن مە ل سالا 2023 بڕیاردا و ب دروستی ل سالا 2024 دەست هاڤێتە بەرنامەیێ (رۆناهی) بۆ وێ چەندێ كارەبایا هەرێما كوردستانێ بكەینە 24 ساتی، سوپاس بۆ خودای نوكە سەنتەرێن هەموو باژێرێن مە یێن مەزن ل هەر چار پارێزگەهێن دهۆكێ، هەولێرێ، سلێمانیێ و هەموو پارێزگەها هەلەبجە بوویە كارەبایا 24 ساتی و هەكە خودا حەز بكەت بۆ سالا داهاتی 2026 هەموو كوردستان دێ بیتە كارەبایا 24 ساتی، ئەڤە ئێك ژ وان خالان بوو یێن گەلەك كەسان گومان هەبوو كو ئەم بشێین تێدا ب سەركەڤین، بەلێ ئیرادەیەكا ب هێز یا خووشك و برایێن هەوە ئەم شیاین ڤی بەرنامەی بكەینە راستی و ئەم د بەرهەڤین ئەزموونا خوە بێخینە د خزمەتا هەموو ئیراقێدا و هەكە وان بڤێت ئەم د بەرهەڤین هاریكارییا هەموو ئیراقێ ژی بكەین.
خالەكا دی بابەتێ دروستكرنا بەنداڤانە بۆ وێ چەندێ ئاڤا بارانێ ب هەروە نەچیت و چەندین بەنداڤ ل سەرانسەری كوردستانێ مە یێن دروستكرین هیڤیدارم د بەردەوام بین دا بكەڤنە د خزمەتا جوتیار و خەلكێ كوردستانێدا، مفایێ ڤان بەنداڤان هەم بۆ هەوای و هەم بۆ خزمەتا چاندنێ و هەم بۆ رێكخستنا بیرێن ئاڤێ یێن بن ئەرد گەلەك یا گرنگ بوو.
ژ بلی ڤان تشتان پڕۆەیێن گەلەك مەزن یێن ئاڤێ بۆ گەهاندنا وێ بۆ باژێرا دیسان پشكەكا مەزن ژ وان پڕۆژیان یێن ب دووماهی هاتین و هندەكێن دی یێن د وارێ بجهئینانێدا.ئەڤ پرۆژەیێ مەزن یێ بۆ هەولێرێ هاتیە بجهئینان د دەمێ 12 مەهاندا كەسێ باوەر نەدكر ئەم دێ بجهئینین ئەوژی پرۆژەیێ ئاڤێ بۆ ئاكرێ و بەردەرەش و بۆ سلێمانیێ و چەمچەمال و بۆ هەر جهەكێ پێدڤی بیت ئەڤە ژی د بەرنامەیێ حوكمەتا هەرێما كوردستانێ دا كو پرسا ئاڤێ ل هیچ باژێرەكێ كوردستانێ نەمینیت و ئەڤە ژی دەستكەفتەكێ دی یە كو بەرنامەیێ ڤێ حوكمەتێ كو دیسان ژی دبێژم ژ ئالیێ پارتیڤە دهێتە بڕێڤەبرن ویێ هاتیە بجهئینان و كەفتییە د خزمەتا خەلكێ كوردستانێدا. بابەتێ دێ ئەوژی بابەتێ دروستكرنا رێ و پرانە ئەو رێ و پرێن نوكە ل هەرێما كوردستانێ هەین نابێژم هەموو یێن تمام بووین بەلێ رێژەیەكا مەزن رێیێن مە گەلەك یێن باشتر بووین و سەبارەت روودانێن ترۆمبێلان یێن كێمتر بووین ومرن و زەحمەت و ئازارا دگەهشتە خەلكێ كوردستانێ دیسا یا كێمبتر بووی و ئەڤە دیسا دەستكەفتە و دێت هوون ڤان تشتان بكاربینن د بانگەشەیا هەلبژارتناندا و بێژنێ ئەڤە ئەو تشتن یێن مە ئەنجامداین و هێشتا مە بەرنامە یێن هەین و دێ باشتر ژ ڤان ئەنجامدەین بێی جوداهی ل هەموو جهان ژی ئەڤ پرۆژە یێن هاتینە بجهئینان ب شەر ئاستێ هەموو كوردستانێ و ل سەر ئاستێ هەموو پارێزگەهان.
بابەتێ هەژمارا من یان چێكرنا سیستەمەكێ بانكی یان یێ دەزگەهێ دارایی ل سەر ستانداردەكا نێڤدەولەتی بۆ كوردستانێ ئەڤە ژی پشكەكا دی بوویە ژ دەرئەنجام و دەستكەفتێن ڤێ حوكمەتێ و پارتی. ئێك ژ تشتێن دبیت نەهێتە دیتن چێكرنا ژێرخانەیا ئابۆری بوویە و مە گەلەك ب رژدی كار ل سەر كریە و ئەڤە دێ بیتە وەرچەرخانەك بۆ پێشئێخستنا ژێرخانەیا ئابۆرییا هەرێما كوردستانێ ب شێوەیەكێ گشتی، هەروەسا دیجیتالكرنا بەرنامەیێن خزمەتگوزاریێن حوكمەتێ دا زێدەتر بشێین خزمەتا وەلاتییان بكەین و زەحمەتا وان كێمتر بكەین و دەمێ بڕێڤەبرنا كارێن وان كێمتر بكەین و رۆتینیاتان كێمتر بكەین و پێنگاڤێن گەلەك باش یێن هاتینە هاڤێتن، خزمەتێن دیجیتالێ یێن گەلەك باش هاتینە كرن ئێك ژوان بابەتێ پەروەردەیێیە و باشتركرنا ئاستێ كەرتێ ساخلەمیێ ل هەرێما كوردستانێ مە نوشدارێن گەلەك باش هەنە بەلێ مخابن شیانێن ل بەردەستێن وان یان جهێ كارێ وان دبیت د ئاستێ خواندنا وان یان شیانێن وان نەبیت، حوكمەتا هەرێمێ ب كێم شیانێن خوە گەلەك بزاڤكریە كەرتێ ساخلەمیێ ژی كارەكێ جدی تێدا بكەت.
ئەڤ هەموو دەستكەفتە هەر هوسا نەهاتینە بەلكو خەلكەكی خوە پێڤە وەستاندییە، ب شەڤ و رۆژ بەرنامە هەبوو ئەم نەگەهینە ڤێ قووناغی و بەرنامە هەبوو رێگری ل مە بهێتە كرن دا چ جاران بەراوردا هەرێمێ ل گەل چ جهێن دی نەهێتە كرن، بەلێ سەرەرای ڤێ چەندێ ئەم گەلەك د رژد بووین كو پێدڤییە ئەم بەر ب پێشڤە بچین.
ئەڤ تشتێ هاتیە كرن دەستكەفتە دەمێ هوون ل گەل خەلكی د ئاخڤن ڤان تشتان بێژنە خەلكی و بیژنێ رێگری ل مە هاتە كرن بەلێ ئەڤ تشتە هەموو مە ئەنجامدان و ئەوێن نوكە داخواز دەنگێن هەوە دكەن هەر ئەوبوون یێن نەدهێلا ئەم ڤان دەستكەفتان بجهبینین و هەڤپەیمانی دروستكرن و داخواز ژ حوكمەتا فیدرالی دكر رێ نەدەن هەرێما كوردستانێ بەر ب پێشڤە بچیت چونكە وان ژی ئەو قەناعەتا هەی كو پێشكەفتنا هەرێما كوردستانێ دزڤریت بۆ پارتی و هەتا ئالیێن كوردستانی دلێ وان ب سەركەفتن و پێشكەفتنا كوردستانێ یێ خوەش نینە چونكە ئەوژی دزانن كوردستانێ ئانكو پارتی و پارتی ئانكو كوردستان. مادەم ناڤێ پارتی و كوردستانێ ژ ئێك ناهێتە جوداكرن هوون بۆچی دەنگێن خوە د فەوتینن و ب هەروە دبەن هوون بۆچی ب دووڤ بیروباوەرەكێ یان مەنهەجەكی دكەڤن كو هوون ژی دزانن نە چو پاشەڕۆژ هەیە و نە مەبەستا وان خزمەتكرنا خەلكێ كوردستانێیە فەرموون ئەڤە حزب هەوە دەنگێن خوە بدەنێ دا ئەوژی زێدەتر خزمەتا هەوە بكەت.
دخوازم وێ هزری نەكەن كو ئەڤە هەلبژارتنێن بەغدانە و د گرنگ نینن بۆمە، بەلێ بۆمە د گرنگن چونكە ئەو ئاستنەگێن ل وێرێ بۆمە دهێنە چێكرن رێگریێ ل پێشكەفتنا كوردستانێ دكەن، نابیت بیاڤ هەبیت ل وێرێ رێگری بهێتە كرن، دڤیا خەلكەكێ بهێز نوكە ل جڤاتا نوونەرێن ئیراقێ بیت بۆ وێ چەندێ رێخوەش ببیت هەماهنگییەكا باشتر د ناڤبەرا بەغدا و هەولێرێ هەبیت و دەستوور وەك خوە بهێتە بجهئینان و هەموو مافێن خەلكێ كوردستانێ ژی بهێنە مسۆگەركرن وێ دەمی دێ بینن كا پێشكەفتنا كوردستانێ دێ چەند زێدەتر بیت. شەڕێ مە نە تنێ ل هەرێما كوردستانێیە بەلكو شەڕێ مە ل بەغدایێ ژییە و پێدڤییە ئەم وێ بكەین یا كو خێرا ڤی مللەتی تێدا.
هیڤییا من ئەوە سەرەدانا هەموو مالێن دهۆكێ و باژێرێن دی و گوندان بكەن و بێژنە خەلكێ ئەم حەز دكەین پشتەڤان بن و دەنگێن خوە بدەنە مە دا ئەم زێدەتر خزمەتا هەوە بكەین و یا ل سەر مە خزمەتكرنە و داخوازا مە ژ خەلكی دەنگێن وانە.

سەرۆک مەسعود بارزانی دوهى دوشەمبی 13ی چریا ئێكێ 2025ێ، پێشوازی ل جەنەرال دەیڤد پێتریۆس سەرۆکێ پێشتر یێ دەزگەهێ هەواڵگرییا ئەمریکا (سی ئای ئەی) کر.
جەنەراڵ دەیڤد پێتریۆس خۆشحاڵییا خۆ ب دوبارە دیتنا سەرۆک بارزانی نیشاندا و گۆت: دووماهی جار من سەرۆک بارزانی دیتی ل بەرەیێن شەری بوو ل سحێلا ل سالا 2016 ێ” هەروەسا ستایشا ڕۆلی بەرچاڤێ سەرۆک بارزانی و هەرێما کوردستانێ کر” ژ پێخەمەتی پاراستنا سەقامگیری و ئاسایشا هەرێما کوردستانێ و عێراقێ و دەڤەرێ و ژ پێخەمەتی ب دەستڤەئینانا ئارامی و دیموکراسی و پێکڤەژیانێ، ڕووبروو ئەوان گرۆپ و رێکخراوێن تیرۆرستی بوون” كو پشتی سالا 2003 ێ” ل عێراقێ سەرهلدا و بوونە گەفێن راستەقینە بۆ سەر هەموو دەڤەرێ و جیهانێ.
سەرۆک بارزانی بخێرهاتنا جەنەرال دەیڤد پێتریۆس کر و هەروەسا سوپاسییا هێزێن هەڤپەیمانان و ئەمریکا کر کو ڕۆلەكێ بەرچاڤ هەبوو د پڕۆسا ئازادکرنا عێراقێ دا ژ دیکتاتۆرییەتێ و لدووڤدا پشتەڤانیا وان بۆ هێزێن پێشمەرگەیی و هێزێن ئەمنیێن عێراقێ ژ پێخەمەت بەرهنگاربوونا تیرۆرێ و پاراستنا سەقامگیرییا عێراقێ و هەرێما کوردستانێ.
سەرۆک بارزانی تەكەزی ل سەر بجهئینانا بڕگێن دەستوورێ هەمیشەیێ عێراقێ کر كو رێیا چارەیا ئێکجارییە بۆ رزگاربوونا عێراقێ ژ وان تەنگەژەیێن سیاسی و هیڤی خواست هەموو لایەنێن سیاسی پێکڤە لدووڤ چارەسەرییا گرفتان رابن و دەستان ژ تۆلڤەكرنێ و ڕق و کینا بەرامبەر ئێك بەردەن” هەروەسا سەرۆک بارزانی رەشنڤیسێ یاسایێ نەفت و گازێ یێ سالا 2007 ێ” وەكو نموونە ئینا و” هەكە ل وی دەمی هاتبا پەسەندكرن و بجهئینان، نوكە چ گرفتێن یاسایی دەربارەیی نەفت و گازێ نەبوون” تەكەزی ل سەر داوی رێککەڤتنا دناڤبەرا حکومەتا هەرێما کوردستانێ و حکومەتا فیدڕالییا عێراقێ کر” دەربارەیی نەفت و گازێ و ب ئەرێنی وەسفکر و هیڤی خواست ئەڤ رێککەڤتنە ببیتە بناغەک بۆ چارەسەرییا هەموو کێشان.

مەسرور بارزانی، سەرۆکێ حوکمەتا هەرێما کوردستانێ، د ئاهەنگا خولا 30ێ یا دەرچوویێن زانکۆیا دهۆک ڕاگەهاند: «ئەز گەلەک دلخۆشم کو ئەز د گەل هەوە مە د ڤێ ڕۆژا خۆش دا. پیرۆزباهیێ ل هەموو قوتابیێن خۆشتڤی دکەم. سەرکەفتنا هەوە، بەرپرسیاریەکا مەزن دئێخیتە سەر ملێن هەوە پشتی هوون ڤەدگەڕنە ناڤ جڤاکى.»
ڕۆژا دوشەمبی 13-10-2025، مەسرور بارزانی، سەرۆکێ حوکمەتا هەرێما کوردستانێ د ئاهەنگا خولا 30ێ یا دەرچوویێن زانکۆیا دهۆک دا، وێڕای پیرۆزباهی کرنێ ل قوتابیێن دەرچوویێن خولێ، دووپات کر کو سەرکەفتنا قوتابیان، بەرپرسیاریەکا مەزن دئێخیتە سەر ملێن وان پشتی ڤەدگەڕنە ناڤ جڤاکى دا، و گۆت: «بەردەوام بن ل سەر خواندنا زێدەتر. هندەکێن دی ژ هەوە دێ هێنە ناڤ جڤاکێ و دێ بنە کەسێن کاریگەر د سیاسەتا وەلاتێ خۆ دا، د ئاڤاکرنا وەلاتێ خۆ دا.»
سەرۆکێ حوکمەتا هەرێما کوردستانێ گۆت: «ئەم شانازیێ ب هەوە دکەین. چاڤێن مە ل هەوە نە. هوون هیڤی و ئومێدا پاشەڕۆژێ نە. سوباهی دێ بنە ئەو سەرکردە کو ئەم هەموو چاڤەڕێی نە وەلات بکەڤیتە دەستێن هەوە و ڕۆژ ب ڕۆژ بەرەڤ پێشڤە ببەن.»
مەسرور بارزانی گۆت: «د جهێ خۆ دایە گەلەک سوپاسیا مامۆستایێن هێژا بکەم سەرەڕای زەحمەتییا ژیانێ و وان هەموو ئاستەنگ و کێشە و گرفت و بەربەستێن بۆ وان هاتینە دروست کرن ژ لایێ ژیانێ ڤە، دیسان بەردەوام بوون ل پرۆسەیا خواندنێ هەوە نەهێلا قوتابى بێ بەهر بن ژ خواندنا خۆ. هوون جهێ شانازییا مە نە، جهێ ڕێز و پێزانینا مە نە. بەردەوام بن ل خواندنا خۆ، ئەم ژی دێ بەردەوام بین ل خزمەتکرنا هەوە، هیڤیدارین ڕۆژەکێ قەرەبوویا زەحمەتییا هەوە بکەینەڤە.»
سەرۆکێ حوکمەتا هەرێما کوردستانێ سوپاسیا دایک و بابێن قوتابیێن دەرچوویی کر کو سەرەڕای زەحمەتییێن ژیانێ، وان نەهێلا ڕۆلێن وان بێ بەهرە بن ژ خواندنا خۆ و هەموو پشتەڤانییا خۆ بۆ مسۆگەرکرنا پاشەڕۆژا وان. ب دابینکرنا پاشەڕۆژا وان، پاشەڕۆژا کوردستانێ بجهـ دئێت.
مەسرور بارزانی سوپاسیا پێشمەرگەیى و هێزێن ئاسایشێ کر کو بەردەوامن ل پاراستنا هەرێما کوردستانێ بۆ هندێ کو ڤێ زانکۆیێ و زانکۆیێن دی ژی ل هەرێما کوردستانێ بەردەوام بن ل فێرکرنا قوتابیان و نەوەیەکا نوو. خەبات و ماندووبوونا پێشمەرگەیى و هێزێن ئاسایشێ جهێ ڕێز و پێزانینێ یە.