مەسرور بارزانی، سەرۆكێ حوكمەتا هەرێما كوردستانێ، پێشوازی ل خەمیس خەنجەر، سەرۆكێ هەڤپەیمانییا (سیادە) كر.
ب گۆڕەی بەیاننامەیەكا حوكمەتا هەرێما كوردستانێ» د كۆمبوونەكێدا گەنگەشە ل دۆر رەوشا گشتییا ئیراقێ و بەرهەڤیێن هەلبژارتنێن جڤاتا نوونەرێن ئیراقێ هاتە كرن كو بڕیارە ل مەها (11) د ئەڤسالەدا بهێنە ئەنجامدان».
دیاركر ژی» د پشكەكا دی یا دیدارێدا، دوپاتی ل گرنگییا رێزگرتنێ ل سیستەمێ فیدرالی و مافێن هەموو پێكهاتەیێن ئیراقێ و قەوارەیێ دستووریێ هەرێما كوردستانێ و هنارتنا شایستەیێن دارایی یێن خەلكێ كوردستانێ هاتە كرن».

مەكتەبا سیاسییا پارتی دیموكراتی كوردستان بەیاننامەیەك ل دۆر نڤیسارا وەزارەتا داراییا فیدرال سەبارەت نەهنارتنا مووچەیێن فەرمانبەرێن هەرێما كوردستانێ بەلاڤكر.
د بەیاننامەیا مەكتەبا سیاسییا پارتی دا هاتیە» رایا گشتییا ئیراقێ و هەرێما كوردستانێ ئاگەهدار دكەین كو حوكمەتا فیدرالی یا بەردەوامە ل سەر پنپێكرنا مافێن دستووری یێن هەرێما كوردستانێ، دوماهی پنپێكرنێ نڤیسارا وەزارەتا داراییە كو دژی دشتووری و بنەمایێن رێككەفتنا پێكئینانا حوكمەتێیە و سیاسیكرنا قووتێ خەلكییە».
مەكتەبا سیاسییا پارتی باس ل وێ چەندێ ژی كر» ئەڤ بابەتە ل كۆمبوونا داهاتی یا كۆمیتەیا ناڤەندییا پارتییا مە ل 2/6/2025 دێ ئێخینە بەر باس و بڕیار وەرگرتنێ و هەكە هەتا بەری جەژنا قۆربانی یا پیرۆز، ماف و شایستەیێن دارایی یێن خەلكێ هەرێما كوردستانێ نەهێنە هانرتن دێ مە هەلوەستێ جدی هەبیت و دێ راگەهینین».

دوهی شەمبیێ 31/5/2025، كۆمبوونا گرنگ وبەرفرەه یا حزب و ئالیێن سیاسی یێن هەرێما كوردستانێ ب سەرپەرشتییا دەستەیا كارگێرییا مەكتەبا سیاسییا پارتی دیموكراتی كوردستان ل پیرمام هاتە ئەنجامدان.
پشتی كۆمبوونێ، ئالیێن سیاسی یێن پشكدار بەیاننامەیەكا هەڤپشك بەلاڤكر و ئەڤە دەقێ وێ یە:
ل رێككەفتی 31/5/2025 ل مەكتەبا سیاسییا پارتی دیموكراتی كوردستان ل پیرمام، هێز و ئالیێن سیاسی یێن كوردستانی كۆمبوونەكا هەڤپشك ئەنجامدان ب مەبەستا گەنگەشەكرنا رەوشا سیاسییا كوردستانێ و ئیراقێ و كێشە و گرفتێن د ناڤبەرا هەرێمێ و حوكمەتا فیدرالدا، ب تایبەتی دووماهی بڕیارا نەدستووری و نەقانوونی یا وەزارەتا داراییا حوكمەتا فیدرال و راگرتن و نە هنارتنا مووچەیێن مووچەخۆرێن هەرێما كوردستانێ، پشتی دانوستاندنێ و لێكگۆهارتنا بیر و بۆچوونێن پێدڤی ل سەر ڤی بابەتی، هەموو ئالی د هەڤڕابوون ل سەر وێ چەندێ كو ئەڤ بڕیارا بڕیارەكا سیاسییە دژی ئیرادەیا گەلێ كوردستانێ و قەوارەیێ سیاسی و قانوونیێ هەرێما كوردستانێ.
ل دووڤ دستوورێ بەردەوامێ ئیراقێ و بڕیارا دادگەها فیدرالی و قانوونا فەرمانبەر و مووچەخۆرێن ئیراقێ و رێككەفتنێن د ناڤبەرا حوكمەتا هەرێمێ و حوكمەتا فیدرالدا، پێدڤییە حوكمەتا فیدرالی پێگیر بیت ب ئەرك و ئیلتیزاماتێن خوە بەرامبەر خەلكێ هەرێما كوردستانێ و مافێن مووچەخۆرێن هەرێمێ تێكهەلی ململانێیێن سیاسی نەهێنە كرن، هەروەسا حوكمەتا فیدرال دووركەڤیت ژ سیاسەتا برسیكرنێ و فشارئێخستنێ ل سەر هەرێما كوردستانێ، ژ بەر كو ئەڤ سیاسەتە ژ بلی زێدەكرنا گرفتان، د بەرژەوەندییا هیچ ئالییەكیدا نابیت.
ئەم وەكو هێز و ئالیێن سیاسی یێن هەموو پێكهاتەیێن كوردستانێ سەرەرای سوپاسی و رێزا مە بۆ خۆڕاگرییا مووچەخۆ و فەرمانبەر و پێشمەرگە و مامۆستایان و گەلێ سەربلندێ كوردستانێ ب گشتی، دوپات دكەین كو هەلوەست و بڕیار و پێنگاڤێن مە دێ ب ئاراستەیا بەرژەوەندییا هەڤوەلاتییان و هەرێما كوردستانێ بن و بژاردەیا دانوستاندنێ ب باشترین رێكەچارە دزانین بۆ ڤێ قۆناغێ، د هەمان دەمدا هەموو بژاردەیان ب ڤەكری دبینین ل پێشبەری خوە ژ پێخەمەت بەرژەوەندیێن بلند یێن هەرێما كوردستانێ.
حزب و ئالیێن كوردستانی: 1- ئێكەتی نیشتمانی كوردستان 2- بزاڤا گۆڕان 3- پارتا سۆسیالیستا دیموكراتا كوردستان 4- بزاڤا ئیسلامی ل كوردستانێ 5 – حزبا شیوعییا كوردستانی 6- بزاڤا پەیوەندییا ئیسلامی ل كوردستانێ 7- حزبا زەحمەتكێشێن كوردستانێ 8- پارتا پارێزگەرێن كوردستانێ 9- پارتا رەنجدەرێن كوردستانێ 10- ئێكەتییا نەتەوەییا دیموكراتی كوردستان 11- بزاڤا دیموكراتییا گەلێ كوردستانێ 12- پارتا نەتەوەییا كوردستانی 13- بزاڤا رزگارییا دیموكراتییا كوردستانی 14- حزبا پێشكەفتنخوازێن كوردستانێ 15- هەڤپەیمانییا نیشتمانی 16-حزبا رزگارییا كوردستانێ – دەستەیا سەرۆكایەتیێ 17- پارتییا دیموكراتییا توركمانی 18- پارتا نیشتمانییا توركمانی 19- پارتا ئاڤاكرنا دیموكراتییا كوردستانی 20- بزاڤا ئاشتیخوازێن كوردستانێ 21- پارتییا رزگارییا نەتەوەییا توركمانی 22- پارتا ئێكگرتنا توركمانی 23- بزاڤا توركمانییا بێلاین 24- پارتا گەشەپێدانا توركمانی 25- پارتا چاكسازییا توركمانی 26- پارتا گەلێ توركمانییا ئیراقی 27- بەرەیێ توركمانی 28- بزاڤا دیموكراتییا توركمانی 29- پارتا ئیرادەیا نیشمانییا توركمانی 30- پارتا گەزەنگا توركمانی 31- پارتا توركمان ئیللی 32- لیستا مللەت 33 – لیبرالییا توركمانی 34- پارتا ئێكەتییا دیموكراتییا كلدانی 35- پارتا جڤاتا نەتەوەییا كلدانی 36- حزبا دیموكراتی بێت نەهرێن 37- پارتا جڤاتا مللی كلدانی سریانی ئاشووری 38- رەوتا شلاما 39- پارتا بزاڤا گردبوونا سریانی 40- كۆمەلا رەوشەنبیرییا ئەرمەنی 41- دەستەیا كارگێرییا بڕێڤەبرنا تائیفا ئەرمەنی 42- رابیتەیا كلدانییا جیهانی 43- پارتی دیموكراتی كوردستان.

مەسرور بارزانی، سەرۆكێ حوكمەتا هەرێما كوردستانێ، پێشوازی ل بالیۆز ماهر ئەلكەركی، قۆنسلێ گشتیێ نوو یێ فلستینێ ل هەرێما كوردستانێ كر.
حوكمەتا هەرێما كوردستانێ د بەیاننامەیەكێدا بەرچاڤكر» سەرۆكێ حوكمەتا هەرێمێ سەرەرای پیرۆزباهییا دەستبكاربوونێ، پشتەڤانییا حوكمەتا هەرێما كوردستانێ بۆ سەرئێخستنا ئەركێ وی نیشادا».
ئاماژە ب وێ چەندێ ژی هاتە كرن» قۆنسلێ گشتیێ فلستینێ، سلاڤ و رێزێن مەحموود عەباس، سەرۆكێ فلستینێ گەهاندنە سەرۆكێ حوكمەتا هەرێمێ و ئاماژە ب پەیوەندیێن دیرۆكی د ناڤبەرا فلستینێ و كوردستانێدا كر و دوپاتی ل ب هێزكرنا پەیوەندیێن دو ئالییانە كر».
د پشكەكا دی یا دیدارێدا، وەك د بەیاننامەیا حوكمەتا هەرێمێدا هاتی» دووماهی پێشهاتێن رەوشا غەزە هاتە گەنگەشەكرن و هەردو ئالی د هەڤڕابوون ل سەر پێدڤییا ب دوماهئینانێ ب شەڕ و ئازارێن خەلكێ سڤیل یێ غەزە و پاراستنا مافێن رەوا یێن گەلێ فلستینێ و ئارامیێ و تەناهیێ ل رۆژهەلاتا ناڤین».

ئەندامەكێ لیژنەیا دارایی ل جڤاتا نوونەرێن ئیراقێ، راگەهاند: هەموو كێشەیێن ئیراقێ فاكتەرێن سیاسی یێن هەین، هەروەسا دیاركر كو بەنكا ناڤەندییا ئیراقێ رۆژانە 300 ملیۆن دۆلاران دئێخیتە د بازاریدا و كێشەیا نەختینەیێ (سیولێ) نینە.
د. خەلیل غازی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەندانێ لژنەیا دارایی ل جڤاتا نوونەران گۆت» ئیراق ب بەهانەیێن جودا كێشەیان بۆ مووچەیێن هەرێما كوردستانێ دروست دكەت، هەروەسا هەموو كێشەیێن وەلاتی فاكتەرەكێ سیاسی یێ هەی».
وی ئەندامێ لژنەیا دارایی ل جڤاتا نوونەرێن ئیراقێ باس ل وێ چەندێ ژی كر» بەنكا ناڤەندییا ئیراقی رۆژانە 300 ملیۆن دۆلاران دئێخیتە بازاری و كێشەیا نەختینەیێ (سیۆلێ) نینە».
هەڤدەم گۆت ژی» چار ترلیۆن دۆلارێن حوكمەتا ئیراقێ یێن ل دەف كۆمپانیێن پەترۆلێ، بەلێ ژ بەر هەژموونا وان وێ پارەی بۆ حوكمەتێ نازڤرینن و حوكمەت نەچاركریە دەست بۆ پارەیێ باجا ببەت».
د. خەلیل غازی راگەهاند ژی» ژ ئەگەرێ گەندەلیێ داهاتێ دەزگەهێن حوكمەتا ئیراقێ بۆ گەنجینەیا وەلاتی ناچن».

دوهی سێشەمبی 13/5/2025، ل سەلاحەدین سەرۆك مەسعود بارزانی، پێشوازی ل بالیۆز ماهر ئەلكەركی، قۆنسلێ گشتیێ نوو یێ فلستینێ ل هەولێرێ كر.
بارەگەهێ بارزانی د بەیاننامەیەكێدا بەلاڤكر» د دیدارەكێدا، قۆنسلێ گشتیێ فلستینێ سەرەرای ئاماژەدان ب پەیوەندیێن دیرۆكی د ناڤبەرا گەلێ كوردستانێ و گەلێ فلستینێ دا، سلاڤێن مەحموود عەباس، سەرۆكێ فلستێنی و سەركردایەتی و گەلێ فلستینێ گەهاندنە سەرۆك بارزانی و دوپات ژی ل گرنگییا بەردەوامییا پێشڤەبرنا پەیوەندی دۆستایەتییا د ناڤبەرا هەردو ئالییاندا كر» .
د بەیاننامەیا بارەگەهێ بارزانی دا هاتیە ژی» هەر د وێ دیدارێدا، سەرۆك بارزانی رۆناهی ئێخستە سەر پەیوەندیێن د ناڤبەرا گەلێ كوردستانێ و گەلێ فلستێنی دا ل قۆناغێن جودا یێن خەباتا رەوا یا گەلێ فلستینێ هەر ل سەردەمێ سەرۆك یاسر عەرەفاتی هەتا سەرۆك مەحموود عەباسی ودیاركر دۆزێن مللەتان هەكە ل هندەك ویستگەهاندا ژی تووشی راوەستییانێ ببن، بەلێ چو جاران ب دووماهی ناهێن، هیڤی ژی خواست كو دووماهی ب وان كارەساتێن ب سەر گەلێ فلستینێدا هاتین بهێت و دۆزا رەوایا گەلێ فلستینێ بگەهیتە ئاشتیێ و چارەسەرییەكا هەردەم».

سەرۆكێ حوكمەتا هەرێما كوردستانێ و پاتریارك مار ئاوایێ سێیێ، پاتریاركێ كەنیسەیا ئاشوورییا رۆژهەلاتی ل جیهانێ، دوپاتی ل زێدەتر پێشڤەبرنا كەلتوورێ پێكڤەژیانا ئاشتییانە د ناڤبەرا پێكهاتەیێن جودا یێن هەرێما كوردستانێ كر.
دوهی سێشەمبی 13/5/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل پاتریارك مار ئاوایێ سیێ، پاتریاركێ كەنیسەیا رۆژهەلاتی ل جیهانێ كر.
د دیدارەكێدا رەوشا گشتییا كریستییانان ل هەرێما كوردستانێ و ئیراقێ و دەڤەرێ هاتە گەنگەشەكرن و دوپاتی ل زێدەرت پێشڤەرنا كەلتوورێ پێكڤەژیانا ئاشتییانە د ناڤبەرا پێكهاتەیێن جودا یێن هەرێما كوردستانێ هاتە كرن.

دیدار/ دلۆڤان ئاكرەیی

ئەنداما كۆمیتەیا ناڤەندییا پارتی دیموكراتی كوردستان و هەڤدەم هاریكارا بەرپرسێ مەكتەبا رێكخستنا پارتی ل پارێزگەها سلێمانی و هەلەبجە و راپەرێن، د. ئەشواق جاف ل دۆر بەرهەڤییێن پارتی دیموكراتی كوردستان و دەستنیشانكرنا بەربژاران بۆ هەلبژارتنێن جڤاتا نوونەرێن ئیراقێ بۆ رۆژنامەیا (ئەڤرۆ) دیاركر» مە وەك پارتی دیموكراتی كوردستان دەست ب ئامادەكارییان بۆ هەلبژارتنێن جڤاتا نوونەرێن ئیراقێ كریە و گاڤ ژی هاڤێتینە بۆ ڤێ مەبەستێ و پشكا هەلبژارتنێن پارتی ل هەموو لقان دەست ب وەرگرتنا سیفییان كریە و د نوكەدا ناڤ و سیفییێن وان د قۆناغا خواندن و دیڤچونێدانە و جودا ژ ڤێ كار بۆ دەرئێخستنا كارتا دەنگدەران دهێتە كرن كو وەلاتی بچن بۆ وەرگرتن و نووكرنا كارتێن خوە یێن هەلبژارتنان».
سەبارەت بۆچوونا پارتی بۆ ئێك لیستییێ د هەلبژارتنێن جڤاتا نوونەرێن ئیراقێدا گۆت» بێگومان كۆمبوونەك بۆ ڤێ مەبەستێ هاتیە كرن و ئەنجامێ وێ بۆ لێژنەیا بلند هاتیە هنارتن و ئارمانجا پارتی یا زەلالە كو ل دەڤەرێن كوردستانی یێن دەرڤەی ئیدارەیا هەرێما كوردستانێ هەبوونا ئێك لیستیێ ل وان دەڤەران گەلەك گرنگییا خوە یا هەی چونكی ئێكدەنگ ژی ل وان دەڤەران یێ گرنگە ژ بەر كو هەڤڕكییا ئالیێن بیانی و یێن نە كوردی دهێتە كرن و ب پاراستنا دەنگێن كوردان د شێین كورسییان ل جڤاتا نوونەرێن ئیراقێ ب دەستبێخین كو هەم نوونەراتییا هەرێما كوردستانێ و هەم دەڤەرێن دەرڤەی ئیدارەیا هەرێما كوردستانێ بكەین و ڤی پێگەهی ب هێز بكەین».
خویاكر ژی» د ناڤا هەرێما كوردستانێدا كورسی هاتینە دیاركرن و هەر ئالییەكێ كوردی هەكە ب ئێك لیست ژی نەبیتن نابیتە كێشە چونكی كورسی هاتینە دیاركرن و هەموو ئالیێن كوردستانی د ناڤا خودا هەڤركییا هەڤدو دكەن و هەر ئالییەكێ كوردی ڤان كورسییان ببەت دێ بیتە نوونەرێ خەلكێ كوردستانێ ل جڤاتا نوونەرێن ئیراقێ و ئەم وەك پارتی ل گەل ئێك لیستییا ئالیێن سیاسینە ل دەڤەرێن دەرڤەی ئیدارەیا هەرێما كوردستانێ و ب ئێك لیستییا ئالیێن كوردی ل ڤان دەڤەران دێ شێین دلێ خەلكێ وان دەڤەران خوەش كەین».
سەبارەت ب جوداهی و گرنگییا ئێك لیستیێ و فرە لیستییا كوردان ل وان دەڤەران گۆت «د راستیدا ل دەڤەرێن كوردستانی یێن دەرڤەی ئیدارەیا هەرێما كوردستانێ ئێك لیستی ل فرەهییا لیستان گرنگترە چونكی ل دووڤ سیستەمێ هەلبژارتنان دبیت هندەك ژ دەنگێن كوردان بمینن و نەهێنە هەژمارتن و ئێك لیستی بۆ هەموو ئالیێن كوردستانی گرنگترە».
ل دۆر لیستێن جودا ژ بلی پارتی گوت» هەكە ئالیێن سیاسی یێن كوردی حەزا لیستەكا جودا هەبوو بێی پارتی ئەڤە پرۆسەیەكا دیموكراسی و ئازادییە و هەر ئالییەكێ سیاسی یێ ئازادە ل دانا بڕیارێ بۆ هەلبژارتنان بەلێ بەرژەوەندییا گەلێ كورد و كوردستانێ د ئێك لیستدایە ل دەڤەرێن دەرڤەی ئیدارەیا هەرێما كوردستانێ چونكی ئێك دەنگ بۆ گەلێ كورد گەلەكە «.

سەرۆك بارزانی، ل سالڤەگەرا (51) یا سێدارەدان و شەهیدكرنا لەیلا قاسم و هەڤالێن وێ، پەیامەك بەلاڤكر و راگەهاند: لەیلا قاسم نموونەیا قەهرەمانییا كچا كورد و سیمبولا ئازادیخوازییا مرۆڤێ كوردە.
دوهی دوشەمبی 12/5/2025، سەرۆك بارزانی ل سالڤەگەرا (51) یا سێدارەدان و شەهیدكرنا لەیلا قاسم و هەڤالێن وێ، پەیامەك ل پێگەهێ تایبەتێ خوە، ل تۆرا جڤاكییا (ئێكس) بەلاڤكر وگۆت» لەیلا قاسم نموونەیا قەهرەمانییا كچا كورد و سیمبولا ئازادیخوازییا مرۆڤێ كوردە، ئەو بەر ب روویێ ستەمكاراندا هات و پشتا خوە دا ژیانێ و شەهید بوو، بەلێ بندەستی قەبوول نەكر».
سەرۆك بارزانی د پەیاما خوە دا ئاماژە ب وێ چەندێ دا» ل سالڤەگەرا (51) یا سێدارەدان و شەهیدكرنا لەیلا قاسم و هەڤالێن وێ، هزاران سلاڤان بۆ گیانێ وان یێ پاقژ و بۆ گیانێ هەموو شەهیدێن رێكا ئازادیێ دهنێرین».