دوهی ئێكشەمبی 4/5/2025، ل سەلاحەدین سەرۆك مەسعود بارزانی پێشوازی ل شاندەكێ عەشیرەتا ئەلبغزات یا سەر ب هۆزا ئەلجبور ڤە ب سەرۆكایەتییا شێخ عیسا موحسن ئەلسەبیل كر.
بارەگەهێ بارزانی د بەیاننامەیەكێدا ئاماژەكر» د دیدارەكێدا شاندێ مێهڤان رێز بۆ رۆلێ سەرۆك بارزانی د هێزكرنا گیانێ لێبۆرینێ و برایەتیێ د ناڤبەرا پێكهاتەیێن ئیراقێدا هەبوو و هەروەسا سوپاسییا گەلێ كوردستانێ كر كو ل رۆژێن تەنگاڤییان هزاران ئاوارەیێن پارێزگەهێن ناڤەڕاست و باشوورێ ئیراقێ حەواندین».
هەروەسا د بەیاننامەیێدا هاتیە» هەر د وێ دیدارێدا دوپاتی ل هەماهەنگیێ و پەیوەندیێ د ناڤبەرا پێكهاتەیاندا و ب هێزكرنا بهایێن پێكڤەژیانێ و خوەشتڤیێ د ناڤبەرا پێكهاتەیێن ئایینی و نەتەوەییدا ل ئیراقێ و نەهێلانا توندڕەویێ و كەلتوورێ كەربێ و تۆلڤەكرنێ».
د وێ دیدارێدا مونا ئەلسەبیل، ئەنداما جڤاتا نوونەرێن ئیراقێ و هەژمارەكا كەسایەتیێن عەشیرەتا ئەلبغزات بەرهەڤ بوون.

سەرۆكێ هەرێما كوردستانێ و سەرۆكێ حوكمەتا هەرێما كوردستانێ دو پەیامێن جودا ب هەلكەفتا مالئاڤاهیكرنا سری سورەییا ئۆندەر بەلاڤكرن.
نێچیرڤان بارزانی، سەرۆكێ هەرێما كوردستانێ د پەیاما خوە دا سەرەخوەشی ل خێزان و كەسوكار و هەڤالێن سری سورەییا ئۆندەر و دەم پارتی كر و گۆت» هەڤسۆز و هەڤخەمێن وانم».
سەرۆكێ هەرێمێ گۆت ژی» رەحمەتی ئۆندەر چ وەكو هاریكارێ سەرۆكێ پەرلەمانێ توركیا و چ وەك ئەندامێ شاندێ ئیمرالی، ب رۆل و بزاڤ و خەباتا وی ژ پێخەمەت سەرئێخستنا پرۆسەیا ئاشتیێ ل توركیا، ب هزر و كریار و كاركرنا دلسۆزانە ژ پێخەمەت ئاشتیێ و برایەتیێ و پێكڤەژیانا ئاشتییانە، نموونەیەكێ بلند یێ ئاشتیخوازیێ و مرۆڤپەروەریێ نیشاندا كو جهێ رێز و پێزانینا هەموویان بوو. لەوما بیرئینانا وی هەردەم دێ د ویژدانا هەموو وان كەسێن باوەری ب ئاشتیێ هەی، دێ زیندی مینیت».
ژ ئالیێ خوەڤە مەسرور بارزانی، سەرۆكێ حوكمەتا هەرێما كوردستانێ د پەیامەكێدا راگەهاند» بۆ مالئاڤاهیكرنا سیاسەتمەدارێ ناڤدار و پەرلەمانتارێ دیار یێ دەم پارتی و بریكارێ سەرۆكێ پەرلەمانێ توركیا (سری سورەییا ئۆندەر)، سەرەخوەشیێ ل مالبات و دۆست و هەڤالێن وی دكەم و هەڤخەمێ وانم».
سەرۆكێ حوكمەتا هەرێما كوردستانێ گۆت ژی» سری سورەییا ئۆندەر، دۆستەكێ دێرینێ گەلێ كورد بوو و خەباتكەرەكێ ناڤدار یێ پرۆسەیا ئاشتیێ بوو ل توركیا و رۆلەكێ كارا و یێ نەژبیركری د هێزكرنا برایەتیێ د ناڤبەرا هەردو گەلێن كورد و تورك دا گێرا. خودایێ مەزن گیانێ وی ب بەهەشتێ شاد بكەت و ئارامیێ و هەدارێ ب هەموو ئالییەكی ببەخشیت».

ئەیاد حاجی نامق، ئەمیندارێ پێشتر یێ جڤاتا نوونەرێن ئیراقێ راگەهاند» هەرێما كوردستانێ ل سەر زارێ وەزیرێ سامانێن سروشتی بەرهەڤییا خوە بۆ هەموو پێگیریێن كوردستانێ ب پرسا پەترۆلێ و غازێڤە دیاركریە، ب تایبەت ل مادەیا 112 ژ قانوونا بودجەیا ئیراقێ، كو پێشتر ل جڤاتا نوونەرێن ئیراقێ دەنگ ل سەر هاتیە دان و تایبەتە ب پرسا هنارتنا پەترۆلا كوردستانێ ب رێكا بۆرییا بەندەرێ جەیهان یێ توركی، سەبارەت ڤێ چەندێ سەرۆكێ حوكمەتا هەرێمێ ب ئاراستەیا بەرژەوەندییا گشتییا كوردستانێ و ئیراقێ پێنگاڤ یێن هاڤێتین، چونكە ژ ئەگەری راگرتنا هنارتنا پەترۆلا هەرێمێ، زێدەتر ژ 20 ملیار دۆلاران زیان ب گەنجینەیا گشتییا ئیراقێ كەفتینە، ژ بلی وێ چەندێ ژی، ئەڤە بابەتەكێ ئابوورییە، ژ ئەگەرێ زێدر فرۆتنا پەترۆلا ئیراقێ، پشكەكا وەلاتێن كەنداڤی زیاندار بوون، چونكە نوكە ئیراق رۆژانە چار ملیۆن و 500 هزار بەرمیلان د رۆژەكێدا دهنێریت، ئانكو پشكا ئیراقێ گەلەك زێدەترە ژ وێ چەندێ بۆ هاتیە دیاركرن بۆ فرۆتنێ، ئەڤە ژی زیانێ دگەهینیتە وەلاتێن ئەندام د رێكخراوا (ئۆپێك) دا».
گۆت ژی» نیازا ئیراقێ ئەوە بەری سالا 2030 هنارتنا پەترۆلا خوە بگەهینیتە شەش ملیۆن و 500 هزار بەرمیلان د رۆژەكێدا، كو ئەڤ چەندە ژی زیانێ دگەهینیتە ئابوورێ هندەك وەلاتان، زیاندارێ ئێكێ ژی ژ راگرتنا هنارتنا پەترۆلا كوردستانێ كۆمپانیێن ئەمریكی نە، چونكە پترییا كۆمپانیێن پەترۆلێ ئەوێن ل هەرێما كوردستانێ كاردكەن ئەمریكی نە ئەڤە ژی لێدانە ل ئابوورێ ئەمریكا، ئەڤە ژی حیسابەكا سیاسییە، كو كۆمەكا وەلاتان ل سەر حیسابا ئابووریێ ئیراقێ دكەن، نوكە ژی ململانیێەكا هەرێمایەتی و نێڤدەولەتی ل دەڤەرێ یا هەی و قەیرانەكا ئابوورییا مەزن ل جیهانێ یا هەی، شەڕێ ئۆكراینا و دانوستاندنێن دۆسێیا چەكێ ئەتۆمیێ ئیرانێ، گەفێن ئەمریكا و ئیسرائیلێ بەرامبەر ئیرانێ و بابەتێ هنارتنا پەترۆلا وەلاتێن پەترۆلی و پێشهاتێن د ناڤبەرا پاكستانێ و هندستانێدا، كو ئەڤان بەرهەڤی بۆ دڤێت و جیهانێ بەر ب قەیرانێن مەزنتر دبەت».
ئەمیندارێ پێشتر یێ جڤاتا نوونەرێن ئیراقێ رۆهنكر ژی» مادەیا 12 ژ قانوونا بودجەیا فیدرالییا ئیراقێ، هووردەكاریێن بابەتێ هنارتنا پەترۆلا كوردستانێ تێدا هەیە كو بهایێ بەرمیلا پەترۆلێ ب چەندێ دیاركرییە و دەستحەقێ كۆمپانییان و هەر جۆرە گیرۆكرن و نە هنارتن و راگرتنەكا پەترۆلێ دێ كاریگەری ل سەر پێگەهێ ئابووریێ ئیراقێ هەبیت و ئیراق ژی دێ زێدەتر ژ هەرێما كوردستانێ زیاندار بیت، ل دووماهیێ وێنەیێ ئەزن ئەوە كو ئێكەم و دووماهی زیاندار ژ راگرتنا پەترۆلا هەرێما كوردستانێ، ئیراقە، بۆ كوردستانێ ژی هەكە زیان بهێنە رێزبەندكرن، ئەڤە لێدانە ل ژێرخانەیا ئابوورییا كوردستانێ و كاریگەرییا خراب یا هەی ل سەر ڤەژاندنا ئابوورێ كوردستانێ».
ل بەرامبەر وێ چەندێ هەرێما كوردستانێ ل دۆر وێ چەندێ دێ چ كەت و ئایا پلان هەنە بۆ وێ چەندێ ڤێ پرسێ چارەسەربكەت؟ ئەیاد حاجی نامق گۆت» هەرێما كوردستانێ هەردەم پەنا بۆ دانوستاندنێ تێكگەهشتنێ یا بری، هەتاكو ل دووماهی بەیاننامەیا حوكمەتا هەرێما كوردستانێ دوپاتی ل دانوستاندنێن بەردەوام ل گەل حوكمەتا ئیراقێ و كۆمپانییا (سۆمۆ) یا هاتیە كرن».

هەولێر، قائید میرۆ

جێگرێ بەرێ یێ سەرۆكێ جڤاتا نوونەرێن ئیراقێ ئاشكراكر، مەترسی ل سەر ئیراقێ یا هەی و بزاڤ دهێنەكرن ئەو ئالۆزیێن نوكە دەڤەر تێدا دەرباز دبیت بهێنە ڤەگوهاستن بۆ ئیراقێ و ئاگرێ روودانان ل ئیراقێ ژی هەلكەن هەروەسا دبێژیت، هەلبژارتنێن ڤێجارێ یێن جڤاتا نوونەرێن ئیراقێ دێ گوهۆڕینان پەیداكەن و هێزێن نوو دێ هێنە د ناڤا پرۆسەیا سیاسیدا.
د. بەشیر حەداد، جێگرێ بەرێ یێ سەرۆكێ جڤاتا نوونەرێن ئیراقێ بۆ رۆژنامەیا (ئەڤرۆ) گۆت « ئەم یێ بەر ب هەلبژارتنێن جڤاتا نوونەرێن ئیراقێ دچین و هەموو ئاماژە بۆ ێ چەندێ نە، ل هەلبژارتنێن ئەڤسالە یێن جڤاتا نوونەرێن ئیراقێ هەڤسەنگی و هەڤكێشەیا سیاسی وەك نوكە نامینیت، هێزێن دی دێ پەیدابن خەلكەكێ نوو دێ هێتە د ناڤا پرۆسەیا سیاسیدا، هەروەسا پێكهاتەیێن نوكە ل بەغدا دەستهەلاتدار و دەستێ وان دچیت، وێ راستیێ باش دزانن پشتی كو هەلبژارتنێن پاییزا ئەڤسالە پرۆسەیا سیاسی ل ئیراقێ دێ گوهۆڕین ب سەردا هێن، لەوڕا ژی یێ بزاڤان دكەن ب كێمترین زیان دەركەڤن ژ وان گوهۆڕینێن دهێنە پێشبینی كرن پەیداببن».
د. بەشیری گۆت ژی»ڤەگەڕیانا مستەفا كازمی سەرۆك وەزیرێن بەرێ یێ ئیراقێ بۆ ناڤا پرۆسەیا سیاسی و پێكئینانا لیستەكا هەلبژارتنان ئاماژەیە بۆ وێ چەندێ، هەتا نوكە بێدەنگییا سەدریان ژی ئاماژەیەكا دی یە و یا مەترسیدارە، بەلێ پێدڤییە كورد خوە ژبۆ هەموو ئەگەران بەرهەڤ بكەن، چونكە ئیراق یا بەر ب گوهۆڕینانڤە دچیت، ب دیتنا من هەكە كورد ڤێجارێ هەڤپەیمانیێ دگەل هێزەكێ دكەت بلا گەرەنتیەكا زێدەتر وەربگرن، تاكو كورد تووشی هەمان ئاریشەیێن بەرێ نەبن ل بەغدا».
د. بەشیر حەداد ئاماژەكر» رەوشەكا نەگونجای ل ئیراقێ پەیدابوویە و هەكە كوردان بڤێت دەلیڤەیێ ژدەست نەدەن، بێگومان پێدڤییە كوردان ل هەمبەری بەغدا ئێك گۆتار هەبیت، ب تایبەتی ژی پارتی و ئێكەتی خوە بكەنە ئێك و ناڤمالا كوردی رێكبێخن و هەردوئالی ئێك بۆچوون و ئێكهەلویست هەبیت، ب ئێك پاكێج و ب ئێكگۆتار پارتی و ئێكەتی بچنە بەغدا باشترە، بەرۆڤاژی هەكە هەر ئالییەك بتنێ رەفتارێ ل گەل بەغدا بكەت، دێ وەك بەرێ لاوازبین هەمبەر بەغدایێ».
جێگرێ بەرێ یێ سەرۆكێ جڤاتا نوونەرێن ئیراقێ گۆت ژی» دەڤەر یا ئالۆزە و ئاگر ب دەڤەرێ ڤەیە، مەترسی یا هەی ئاگرێ ل هندەك وەلاتێن دەوروبەر هەی بهێتە ڤەگوهاستن بۆ ئیراقێ ژی، ب تایبەتی پشتی روودانێن سووریێ و لوبنانێ مەترسی ل سەر ئیراقێ ژی پەیدابوویە، هاتنوچوونا شاندێن بەغدا و سەركردەیێن ئیراقێ بۆ هەرێما كوردستانێ گرێدای ئەڤان گوهۆڕینێن دەڤەرێیە، چونكە سەركردەیێن ئیراقی باش دزانن ئەگەر هەنە ئالۆزیێن ل دەڤەرێ ل ئیراقێ دوبارە ببن، لەوڕا سەرەدانێن خوە بۆ هەرێما كوردستانێ دەستپێكرینە، سەرەدانا چەند رۆژێن بۆری یا محەمەد شیاع سۆدانی سەرۆك وەزیرێن ئیراقێ پشكەك ژێ پەیوەندی ب هەلبژارتنانڤە هەبوو پشكەكادی ژی ژبەر مەترسییان بوویە تاكو هەرێما كوردستانێ و سەرۆك بارزانی هاریكاربن بۆ دەربازكرنا ئیراقێ ژ ئەڤێ مەترسیێ».

چاڤدێرەكێ سیاسی، ل دۆر رەوشا نوكە یا رۆژهەلاتا ناڤین و ئەگەرێ هێرشكرنا ئیسرائیلێ ل سەر ئیراقێ وهاتنا بەغدا بۆ ناڤ شەڕێ دەڤەرێ، دوپاتكر كو دۆنالد ترەمپ، سەرۆكێ ئەمریكا یێ بەرهەڤ نینە گەرەنتییەكێ بدەتە بەغدایێ بۆ رێكگرتنێ ل هێرشا ئیسرائیلێ. هەڤدەم دوپات دكەت كو ئەستەمە ئیراق ب ڤان سنۆرێن نوكە بمینیت و ب ڤێ فۆرما حوكمڕانیێ ژی، نەشێت وەلاتی ژ هەلوەشاندنێ بپارێزیت.
د. عادل باخەوان، چاڤدێرێ سیاسی و سەرۆكێ ناڤەندا فرەنسی بۆ ڤەكۆلینێ ل سەر ئیراقێ گۆت» سەرۆك وەزیرێن ئیراقێ دبێژیت: ب رەفتارا ژێرانە مە ئیراق ژ چوونا د ناڤ شەڕیدا دوورئێخست، بەلێ ئایا ب راستی ئیراق ب تمامی ژ شەڕێ مەزن هاتییە دوورئێخستن؟».
د. عادل باخەوانی باس ل وێ چەندێ ژی كر هەكە هەتا نوكە محەمەد شیاع سۆدانی، سەرۆك وەزیرێن ئیراقێ یێ سەركەفتی بیت د وێ چەندێدا ئیراق تێكهەلی شەڕێ دەڤەرێ نەبیت، ئێك ژ هۆكاران ئەوبوو كو ئیدارەیا جۆ بایدن، سەرۆكێ بەرێ یێ ئەمریكا و هەڤالێن وی نەدخواست ئیراق تێكهەلی ڤی شەڕی ببیت و هاریكارێن سۆدانی بوون».
ئەوژی بەرچاڤكر كو محەمەد شیاع سۆدانی ب خوە باش دزانیت، ئیدارەیا ترەمپی یا بەرهەڤ نینە هیچ گەرەنتییەكێ بدەتە بەغدایێ بۆ رێكگرتنێ ل هێرشا ئیسرائیلی.
دیاركر ژی كو بەغدا باش دزانیت، ئەو هێرشە یێن هاتینە پاشئێخستن هەتا پشتی دەرئەنجامێن وان دانوستاندنێن د ناڤبەرا ئەمریكا و ئیرانێدا ل وەلاتێ عومان هاتینە كرن و گۆت» ئانكو هەتا نوكە ژی بڕیار تنێ یێن د ناڤ دو كڤاناندا و د چاڤەڕێكرینە و نەهاتینە هەلوەشاندن».
باخەوانی باس ل وێ چەندێ ژی كركو ئیراق ل دەف ئەمریكا و ئیسرائیلێ دۆسێیەكا سەربخوە نینە، وەلاتەكێ خودان سەروەری نینە تاكو ب جودا رەفتارێ د گەلدا بكەن، بەلكو هەردەم وەكو پشكەك ژ دۆسێیا ئیرانێ و سەروەرییا ئیرانێ و پرسا ئیرانێ، رەفتارێ د گەلدا دكەن.
هەروەسا دبێژیت» ئیراق خودانا هیچ سیستەمەكێ بەرگرییا ئەسمانی و ئەردی نینە كو بشێت ل دەمێ هێرشان خوە بپارێزیت و بەرگریێ ژ خوە بكەت».
دیاركر ژی» ئەستەمە ئیراق وەكو نوكە بمینیت، گەلەك یا ئەستەمە ب ڤان سنۆران بمینیت هەروەسا ب ڤێ فۆرمێ د حوكمڕانیێدا، بمینیت».
ل دووماهیێ گۆت» نوكە هەر ئێك ژ ئیراق، لوبنان، سووریێ، یەمەن و سودان ل بەر هەلوەشاندنێ نە و ئەڤ هەلوەشاندنە پرۆسێسە و تنێ پێدڤی ب دەمی یا هەی».

سەرۆك بارزانی ل سەلاحەدین پێشوازی ل هەژمارەكا ئەندامێن جڤاتا نوونەرێن ئیراقێ ژ پارێزگەها نەینەوا كر.
د دیدارەكێدا دانوستاندن ل دۆر بارودۆخێ پارێزگەها نەینەوا و رەوشا هەڤوەلاتییان و پرۆسەیا ئاڤەدانكرنێ ل نەینەوا هاتە كرن و دوپاتی ل هەماهەنگیێ د ناڤبەرا ئالیێن سیاسیدا بۆ دەربازكرنا كێشە و ئاستەنگێن وێ پارێزگەهێ، هاتە كرن.

نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ ب هەلكەفتا جەژنا جیهانییا پالەیان دو پەیام جودا بەلاڤزكرن.
سەرۆكێ هەرێما كوردستانێ د پەیاما خوە دا، گۆت» رەنج و وەستییانا وان د ئاڤەدانكرن و پشكدارییا كارا و بنەڕەتی د پێشئێخستن و گەشەكرنا وەلاتیدا، بلند د هەلسەنگینم».
گۆت ژی» دوپاتیێ ل پشتەڤانییا هەموو مافێن پالەیان و داخوازیێن وان یێن رەوا ل هەرێما كوردستانێ دكەین، هەروەسا پێداگیریێ ل سەر پێدڤییا دابینكرنا ژینگەهەكا ئارام یا كاری و ب دەستڤەئینانا دادپەروەریێ د دەلیڤەیێن كاری و رێكخستنا پەیوەندیێ د ناڤبەرا پالەیان و خودانكاران دكەین ل سەر بنەمایەكی كو مافێ پالەیان بهێتە پاراستن وژیار و ژیانا وان مسۆگەر بكەت».
ئاماژەكر ژی» هەموو وان پالەیان دئینینە بیرا خوە كو ل دەمێ كاری گیانێ خوە ژ دەستدای و دوپات دكەین كو دڤێت ئالیێن پەیوەندیدار چاڤدێرییا خێزانێن وان بكەن و پشتەڤانی و هاریكاری بۆ بهێتە دابینكرن».
سەرۆكێ حوكمەتا هەرێما كوردستانێ د پەیاما خوەدا گۆت» من رێزەكا مەزن بۆ وەستییان و ئەرك و پشكدارییا كارا یا پالەیێن كوردستانێ د پرۆسەیا ئاڤەدانكرن و گەشەپێدان و دانانا ژێرخانەیا ئابوورییا هەرێما كوردستانێدا یا هەی».
مەسرور بارزانی دیاركر ژی» حوكمەتا هەرێما كوردستانێ، ل سالێن بۆری، بزاڤێن مەزن كرینە و كاركریە ژ پێخەمەت باشتركرنا رەوشا ژیارا پالەیان و پاراستنا مافێن وان و پێگیرییا خوە ب داكۆكیكرن و دابینكرنا مافێن پالەیان ژ روویێ ساخلەمی و سەلامەتییا پیشەیی و مافێن قانوونی و باشتركرنا رەوشا كاركرنا وان دوپات دكەین».

جڤاتا وەزیران ل هەرێما كوردستانێ راكەهاند: حوكمەتا هەرێما كوردستانێ پێگیریێن خوە بۆ هەر چ زوو دەستپێكرنا هنارتنا پەترۆلا هەرێمێ ب تمامی بجهئینایە.
جڤاتا وەزیرێن هەرێما كوردستانێ ل دووماهی كۆمبوونا خوە ب سەرپەرشتییا مەسرور بارزانی، سەرۆكێ حوكمەتا هەرێما كوردستانێ ب بەرهەڤبوونا قوباد تالەبانی، جێگرێ سەرۆكێ حوكمەتا هەرێمێ، كەمال محەمەد سالح، وەزیرێ سامانێن سروشتی ب وەكالەت، دووماهی پێشهاتێن پەیوەندیدار ب دانوستاندنێن تایبەت ب دەستپێكرنا هنارتنا پەترۆلا هەرێما كوردستانێ ل سەر بنەمایێ قانوونا راستڤەكرنا ئێكێ یا قانوونا بودجەیا كشتییا ئیراقا فیدرال و ئەنجامێ كۆمبوونا هەردو حوكمەتێن هەرێمێ وفیدرال و كۆمبوونا هەڤپشك یا حوكمەتا هەرێمێ و كۆمپانیێن پەترۆلی بەرچاڤكر.
وەزیرێ سامانێن سروشتی ب وەكالەت د راپۆرتەكێدا رۆهنكر كو وەزارەتێ ئەو چەندا پەیوەندی ب حوكمەتا هەرێمێ ڤە هەبیت، پێگیریێن خوە ب تمامی یێن بجهئیناین ب ئاراستەیا هەر چ زوو دەستپێكرنا هنارتنا پەترۆلا هەرێمێ و دانانا داهاتێ وێ د گەنجینەیا گشتییا فیدرالیدا، ژ ڤی رووی ژی ڤە هیچ ئاستەنگەك ژئالیێ هەرێما كوردستانێڤە نینە بۆ دەستپێكرنا هنارتنا پەترۆلا هەرێمێ.
پاشی هەر ئێك ژ ئومێد سەباح، سەرۆكێ دیوانا جڤاتا وەزیرێن هەرێما كوردستانێ و ئامانج رەحیم، سكرتێرێ جڤاتا وەزیران، هووردەكاریێن تەوەرێن دانوستاندنێن د ناڤبەرا پەیوەندیدار ل سەر ئاستێ حوكمەتا فیدرال و حوكمەتا هەرێما كوردستانێ و كۆمپانیێن پەترۆلی بەرچاڤكرن و ئاماژە ب وان بڕگەیێن دانوستاندنان هاتە كرن كو پێشڤەچوونەكا باش ب خوەڤە دیتییە و بزاڤ د بەردەوامن بۆ ئێكلاكرنا ئەو تەوەرێن ماین و پەیوەندیدارن ب كۆمپانیێن پەترۆلێ ڤە.
جڤاتا وەزیرێن هەرێمێ هەلوەستێ نەگهۆڕ یێ خوە بۆ پشتەڤانییا دانوستاندنان د ناڤبەرا هەردو وەزارەتێن پەترۆلا ئیراقی و سامانێن سروشتی یا هەرێمێ دوپاتكر بۆ هەر چ زوو دەستپێكرنا هنارتنا پەترۆلێ.
هەڤدەم جڤاتا وەزیران داخواز ژ وەزارەتا سامانێن سروشتی و وەزارەتا پەترۆلا فیدرال و كۆمپانیێن پەترۆلێ و كۆمپانییا (سۆمۆ) كر، د هەماهەنگیێ و دانوستاندناندا د بەردەوامن بن بۆ وێ چەندێ د زووترین دەمدا، بابەت بهێنە ئێكلاكرن و بگەهنە رێككەفتنێ و دەست ب هنارتنا پەترۆلا هەرێما كوردستانێ بكەن بۆ وێ چەندێ ئێدی زیانێن دارایی نەگەهنە گەنجینەیا گشتی كو دەهان ملیار دۆلار دەرباز كرینە.

دیدار/ دلۆڤان ئاكرەیی

ئەندامێ مەكتەبا سیاسی و بەرپرسێ مەكتەبا رێكخستنا پارێزگەها كەركووك- گەرمیان یا پارتی دیموكراتی كوردستان، هیوا ئەحمەد ل دۆر دووماهی ئەنجامێن دانوستاندنێن پارتی ل گەل ئالیێن سیاسی بۆ پێكئینانا كابینەیا دەهێ یا حوكمەتا هەرێما كوردستانێ بۆ رۆژنامەیا (ئەڤرۆ) گۆت»دانوستاندن د ناڤبەرا شاندێن سیاسی و تەكنیكی یێن پارتی و ئێكەتیێ د بەردەوامن و پێنگاڤێن باش یێن هاتینە هاڤێتن و بەرنامەیەكێ باش بۆ پێكئینان و رێڤەبرنا كابینەیا نوو یا حوكمەتێ هاتییە بەرهەڤكرن و ستراتیژییەكا هەڤپشك بۆ حوكمەتێ هاتییە دارێشتن وەكو چەوانییا رێڤەبرنا حوكمەتەكا سەرانسەری و ئایدۆلۆژییا وێ و پاشەرۆژا وێ كو هەتا نوكە زێدەتری90% كارێن وێ ب رێڤەچووینە و بتنێ كار ل سەر بەلاڤكرنا پۆستان دهێتە كرن و د هندەك خالێن وێدا گەهشتینە رێككەڤتنێ بتنێ كار ل سەر هووردەكارییێن وێ مایە و ل دەمەكێ نێزیك دێ رێككەڤتنا دووماهییێ هێتە كرن».
سەبارت داخوازی و مەرجێن ئالیان بۆ پشكداریكرنێ د كابینەیا نوودا، هیوا ئەحمەد گۆت»د هەموو دانوستاندناندا هەر دو ئالیێن دانوستاندنكار نەك ب تنێ پارتی و ئێكەتی بەلكو د دانوستاندنێن د ناڤبەرا دو وەلاتاندا ژی دەستپێكێ پۆست و داخوازییێن مەزن دهێنە كرن و پاشی داخوازی كێمتر دبن و بۆ پێكئینانا حوكمەتا نوو یا هەرێمێ ژی ئەنجامێن هەلبژارتنان بوویە پیڤەر كو ل دووڤ وان ئەنجامان رەفتار بهێتە كرن و ب گۆڕەی وان ئەنجامان پارتی هێزا ئێكێیە كو پترییا دەنگان ب دەستخستینە لەوما پارتی داخوازا هەر دو پۆستێن سەرۆكێ هەرێمێ و سەرۆكێ حوكمەتێ دكەت و ڤان هەر دو پۆستان ب مافێ خوە یێ رەوا و خەلكێ كوردستانێ دزانیت، ئێكەتی نیشتیمانی كوردستانێ ژی گەهشتییە وێ باوەریێ كو پۆستێن ئاست بلند دێ بۆ سەركەفتییێ ئێكێ بن ئەوژی پارتی دیموكراتی كوردستانە».
ل دۆر داخوازییا پارتی بۆ وەرگرتنا پۆستان دیاركر» د راستیدا هەموو پارت و ئالیێن سیاسی ل هەرێمێ خودان پێگەه ودەنگ و قەبارەیێ خوە نە و پارتی دیموكراتی كوردستان ب رێزڤە دنێریتە قەبارە و رێكخستنا هەموویان بەلێ خەلكێ كوردستانێ ب رێكا دەنگێن خوە و هەلبژارتنا پارتی بەرپرسیارەتییا دئێخیتە سەر ملێ وێ و پارتی ژی نەچارە زوورترین پۆستان بۆ زێدەتر خزمەتكرنا وەلاتییان، داخواز بكەت و وەربگریت».
سەبارەت بەربژارێن پارتی بۆ هەردو پۆستێن سەرۆكێ هەرێمێ و سەرۆكێ حوكمەتا هەرێمێ، وی ئەندامێ مەكتەبا سیاسییا پارتی رۆهنكر» نێچیرڤان بارزانی كو خودان ئەزموونەكا باش یا حوكمرانیێیە وچەندیێن سالان سەرۆك حوكمەتا هەرێمێ بوویە و پاشی پوستێ سەرۆكێ هەرێمێ وەرگرتییە و پترییا پارت و ئالیێن سیاسی ژ كارێ وی رازیبووینە، هەروەسا مەسرور بارزانی كو كەسەكێ دەولەتمەدار و خودان ئیرادە و سیستەمێ خوە یێ تایبەتە و دقۆناغا بۆریدا سەرۆكێ حوكمەتا هەرێمێ بوویە، كەسەكێ سەركەفتی بوویە د پۆستێ خوەدا لەوما هەر دو بەربژارێن پارتی دێ نێچیرڤان بارزانی و مەسرور بارزانی بن بۆ پوستێن سەرۆكێ هەرێمێ و سەرۆكێ حوكمەتا نوو یا هەرێمێ».
سەبارەت ژڤانێ پێكئینانا كابینەیا نوو یا حوكمەتا هەرێما كوردستانێ ئاشكرا كر» كار و بزاف دهێنە كرن ل دەمەكێ نێزیك كابینەیا نوو یا حوكمەتا هەرێمێ بهێتە پێكئینان و ئەو سۆزێن مە داینە خەلكی بهێنە بجهئینان و خەلك بێ هیڤی نەبیت و داخوازێ ژ ئێكەتی نیشتیمانی كوردستان دكەم د هەمان ئاستێ بەرپرسیارەتییێدا بیت دا زێدەتر خەلك چاڤەرێ نەبیت».
دیاكر ژی» وەك پارتی مە پێخوەشە هەموو ئالیێن دی ژی پشكدارییێ د كابینەیا نوو یا حوكمەتێدا بكەن بەلێ هندەك ژوان پشكدار نابن و یێن دی ژی مەرجێن مەزن یێن هەین و هەتا نوكە پارتی و ئێكەتی و هندەك ئالیێن دی د دێ پشكداریێ د پێكئینانا حوكمەتا نوو دا كەن و دبیت پارتی ژ پشكا خوە هندەك پۆستان بدەتە هندەك ئالیێن دی كو پارتی بەری نوكە ژی ئەڤ چەندە كرییە و پارتی حزبەكا ڤەكری و بەرفرەهەیە و دخوازیت هەموو ئالی د حوكمەتێدا پشكداربن چونكە كوردستان وەلاتێ مە هەموویانە و ب مە هەموویانڤە یا جوانە و ئارمانجا پارتی پێكئینانا حوكمەتەكا بنكە فراوانە لەوما شاندێ دانوستاندنكارێ پارتی سەرەدانا هەموو ئالیێن سیاسی كریە یێن كورسی هەی و یێن چو كورسی ژی نەبن بۆ وێ چەندێ هەڤسەنگی بهێتە راگرتن بۆ بڕێڤەبرنا كوردستانێ».

سلێمانیێ، عەزیز هەورامی

د چارچۆڤەیێ دەستپێشخەریێن سەرۆك بارزانی، ل دووماهییا مەها بۆری ل قامیشلۆ بۆ جارا ئێكێ هەموو هێز و ئالیێن سیاسی یێن رۆژئاڤا كۆنفرانسەكێ نیشتیمانی گرێدا ب ئارمانجا ئێكگرتنا كوردێن رۆژئاڤا، سیاستەمدارەك ژی دبێژیت: كوردێن رۆژئاڤا پشتەڤانییا سەرۆك بارزانی ژبیر ناكەن.
كاوە عەزیز، سیاسەتمەدار ژ رۆژئاڤایێ كوردستانێ و مامۆستایێ زانكۆیێ، بۆ رۆژنامەیا (ئەڤرۆ) گۆت» ب بەرهەڤبوونا هەموو هێزان پشتی ژناڤچوونا رژێما بەشار ئەلئەسەد، ئەنەكەسێ و پەیەدێ، داخواز ژ سەرۆك بارزانی كر، هاریكارییا رۆژئاڤایێ كوردستانێ بكەت تاكو كورد ل سووریێ د ئێكگرتی بن، ئەوبوو سەرۆك بارزانی نوونەرێ خوە هنارتە رۆژئاڤا و ل گەل مەزلوم عەبدی كۆمبوو و پاشی سەرۆك بارزانی ل هەولێرێ پێشوازی ل عەبدی كر و پاشی ل گەل سەركردەیێن ئەنەكەسێ كۆمبوو و بەرهەمێ وان كۆمبوونان وەكو مە دیتی ئێكگرتنا كوردان ل رۆژئاڤای ژێ پەیدابوو».
كاوە عەزیز گۆت ژی» ل دەستپێكا ڤەكرنا كۆنفرانسێ ئێكگرتنا كوردان ل رۆژئاڤا، سوپاسییا سەرۆك بارزانی هاتە كرن ژبەر بزاڤێن وی بۆ ئێكگرتن و ئێكگۆتارییا كوردان، لەوما كوردێن رۆژئاڤا رۆلێ برایەتیێ سەرۆك مەسعود بارزانی چو جاران ژبیر ناكەن، ب راستی سەرۆك بارزانی فاكتەرێ سەرەكیێ وێ رێكەفتنێ بوو كو دلێ هەموو كوردان ل هەر چار پارچەیێن كوردستانێ خوەشكر».
ئاماژە ب وێ چەندێ ژی كر» ئێدی پەیدە و ئەنەكەسە و كورد ب گشتی ل رۆژئاڤایێ كوردستانێ بوونە ئێك».
ل دووماهیێ گۆت» سەرۆك بارزانی كەسایەتییەكێ نیشتیمانیێ گەلێ كوردە، وەك لێڤەگەرەكێ بلند یێ گەلێ مە ل هەر چار پارچەیێن كوردستانێ چاڤێن وان ل دەستپێشخەری و بزاڤێن وی نە».