سەرۆكێ حوكمەتا هەرێما كوردستانێ راگەهاند: ئەم ل گەل بەغدا یێن گەهشتینە قۆناغا دووماهیێ ژ چارەسەركرنا كێشەیان مووچەیان، هەروەسا دیاركر: خۆڕاگرییا مووچەخۆران رێگر بوو ل پیلانا هندەك كەس و ئالییان كو بۆ مەرەمێن تایبەت یێن خوە، دخواست هەرێما كوردستانێ لاواز بكەن.
دوهی ئێكشەمبی 9/6/2024، مەسرور بارزانی، سەرۆكێ حوكمەتا هەرێما كوردستانێ د رێورەسمێ ڤەكرنا سەنتەرێ (ئیگل پۆست) یێ تایبەت ب ڤەگوهاستن و گەهاندنێ ل هەولێرێ پەیڤەك پێشكێشكر و راگەهاند» ئەڤ سەنتەرە دێ بیتە ئەگەرێ زێدەتر پێكڤە گرێدانا باژێر و دەڤەرێن هەرێما كوردستانێ، هەروەسا گرێدانا وان ب دەڤەرێن دی یێن ئیراقێ و جیهانی».
ئەو كۆمپانی و سەنتەرە دەزگەهەكێ هەڤپشك یێ كەرتێ تایبەت و وەزارەتا ڤەگوهاستن و گەهاندنێ یە ل حوكمەتا هەرێما كوردستانێ، ب مەبەستا پێشڤەبرنا خزمەتگوزاریێن پۆستەی هاتییە پێكئینان. مەسرور بارزانی گۆت» ئەڤە پشكەكە ژ پلان و بەرنامەیێن حوكمەتێ، بۆ ب سەردەمیكرنا خزمەتگوزاریێن گشتی و ب دیجیتالكرنا وان، هەروەسا كێمكرنا بیروكراسیێ».
سەرۆكێ حوكمەتا هەرێما كوردستانێ گۆت ژی» د ئەڤی سەردەمیدا پۆستە و گەهاندن دەزگەهەكێ گەلەك گرنگ و چالاكە و خزمەتەكا زۆر دگەهینیتە وەلاتییان و ئاسانكاریێن زۆر بۆ بڕێڤەبرنا ژیار و كاروبارێن رۆژانە یێن وەلاتییان دروست دكەت».
دیاركر ژی» دابینكرنا ئەڤێ خزمەتگوزاریێ ب شێوەیەكێ پێشكەفتی، دێ بیتە ئەگەرێ كێمكرنا قەرەبالغیێ و بارگرانیێ ل سەر دەزگەهێن حوكمەتا هەرێما كوردستانێ و كەرتێ تایبەت، هەروەسا دێ بیتە هۆكارەك بۆ بەر ب پێشڤەبرن و گەشەپێدانا لێكگوهارتنا بازرگانییا ئەلكترۆنی د ناڤبەرا هەرێما كوردستانێ و دەرڤەی وەلاتێدا».
مەسرور بارزانی د پەیڤا خوە دا باس ل سیستەمێ ناڤونیشان و ئەدرەسان ژی كر و گۆت» پێدڤییە هەرێما كوردستانێ ب شێوەیەكێ گونجای و سەردەمیانە بهێتە رێكخستن و دڤێت ئالیێن پەیوەندیدار د زووترین دەمدا ل سەر ئەڤی بابەتێ كاربكەن».
سەبارەت مووچەیێن فەرمانبەران ژی، مەسرور بارزانی گۆت» مووچەخۆر پالپشت، پشتەڤان، بێهنفرەه و د خۆڕاگر بوون، ئەو پیلانا كو هندەك كەس و ئالییان بۆ مەرەمێن تایبەت یێن خوە بكارئینای و دخواست قەوارەیێ هەرێما كوردستانێ ب بلەاڤكرنا مووچەی و بودجەی ل سەر پارێزگەهاندنا لاواز بكەن، خۆڕاگرییا ئەوان (مووچەخۆران) وەكر سەرنەگریت».
سەرۆكێ حوكمەتا هەرێما كوردستانێ دیاركر ژی» بەردەوام ل گەل سەرۆك وەزیرێن حوكمەتا فیدرالی د پەیوەندیێدا بووین و ئەم یێن گەهشتینە قۆناغا دووماهیێ، هیڤیدارم كو ئەم بشێین د خزمەتا هەوەیێن خوەشتڤیدا كارەكی بكەین كو بابەتێ بودجە و مووچەی ب شێوەیەكێ بنەڕەتی بهێتە چارەسەركرن».
هەروەسا ئاماژەكر» هیڤیدارین د دەمەكێ نێزیكدا بەری جەژنێ، هەموو مووچەیێن مەها چار یێن هێزێن ئەمنی و مەها پێنج ژی بۆ هەموو مووچەخۆران بهێنە دابینكرن».
رۆهنكر ژی» هیڤیدارم ئێدی بابەتێ مووچەی نەبیتە دەنگوباسێ دەزگەهێن راگەهاندنێ و ئەم بشێین پەیوەندیێن خوە ل گەل حوكمەتا فیدرالی بێخینە سەر ئاستەكێ دروست و بەر ب پەیوەندیێن باشتر ژی پێنگاڤان ب هاڤێژین».

دوهی ئێكشەمبی 9/6/2024، نێچیرڤان بارزانی، سەرۆكێ هەرێما كوردستانێ ل هەولێرێ ل گەل پاتریك دۆرێل، بالیۆزێ فرەنسا ل ئیراقێ كۆمبوو.
د كۆمبوونەكێدا هەردو ئالییان داكۆكی ل پێشڤەبرنا پەیوەندیێن فرەنسا ل گەل ئیراقێ و هەرێما كوردستانێ كر و رۆناهی ئێخستە سەر دەلیڤەیێن بەرفرەهكرنا هاریكارییا هەڤپشك د هەموو بواراندا.
سەرۆكایەتییا هەرێما كوردستانێ د بەیاننامەیەكێ بەلاڤكر» سەرۆكێ هەرێما كوردستانێ و بالیۆزێ فرەنسا ل ئیراقێ د كۆمبوونێدا بۆچوون ل دۆر رەوشا هەرێما كوردستانێ لیكگوهارتن و د هەڤڕابوون ل سەر ئەنجامدانا هەلبژارتنێن پەرلەمانێ كوردستانێ ل دەمەكێ گونجای د ئەڤسالەدا ب پشكدارییا هەموو ئالیێن سیاسی و پێكهاتەیێن هەرێما كوردستانێ».
د تەوەرەكێ دی یێ كۆمبوونێدا باس ل گرنگییا دانوستاندنێن چارەسەركرنا كێشەیێن هەولێر – بەغدا هاتە كرن و بەرە و پێشڤەچوونا پەیوەندیێن هەردو ئالییان ب ئەرێنی هاتنە هەلسەنگاندن. سەبارەت ئەڤێ چەندێ بالیۆزێ فرەنسا ل ئیراقێ بزاڤێن سەرۆكێ هەرێما كوردستانێ بلند هەلسەنگاندن و پشتەڤانییا وەلاتێ خوە بۆ چارەسەركرنا كێشەیان دیاركر.
پاراستنا سەقامگیرییا سیاسییا ئیراقێ، رەوشا دەڤەرێ و چەند پرسێن جهێ گرنگییا هەڤپشك، ئالییەكێ دی ئەوێ كۆمبوونێ بوو.

پەیڤدارا كۆمسیۆنا بلند یا سەربخوە یا هەلبژارتنان ل ئیراقێ راگەهاند: پارتی دیموكراتی كوردستان ب فەرمی ئەو ئاگەهدار كرینە كو دێ پشكداریێ د هەلبژارتنێن پەرلەمانێ كوردستانێدا كەت، هەروەسا دیاركر كو دەرگەهێ وەرگرتنا لیستا بەربژارێن هەلبژارتنێن پەرلەمانێ كوردستانێ پاشی دێ هێتە ڤەكرن.
جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ د داخۆیانییەكا رۆژنامەڤانیدا گۆت» پارتی دیموكراتی كوردستان كۆمسیۆنا هەلبژارتنان ل ئیراقێ ئاگەهداركرییە د پشكداریكرنا وێ د هەلبژارتنێن خولا شەشێ یا پەرلەمانێ كوردستانێدا».
پەیڤدارا كۆمسیۆنا بلند یا سەربخوە یا هەلبژارتنان ل ئیراقێ گۆت ژی» پارتی دیموكراتی كوردستان نڤیسارا پشكداریكرنێ د هەلبژارتنێن پەرلەمانێ كوردستانێدا بۆ فەرمانگەها كاروبارێن پارت و رێكخستنێن سیاسی ل كۆمسیۆنا بلند یا سەربخوە یا هەلبژارتنان ل ئیراقێ هنارتییە».

شرۆڤەكارەكێ سیاسی دبێژیت: ئێكهەلویستییا هێز و ئالیێن سیاسی یێن كوردستانێ نیشانا سەركەفتنێیە، هەروەسا گۆت ژی هەكە ل ئاستێ پرسێن سیاسی یێن ناڤخوەیی و دەركی ئێكدەنگی هەبیت، دێ گەلەك كێشە و پرس هێنە چارەسەركرن.
ئاسۆ فایق، شرۆڤەكارێ سیاسی بۆ رۆژنامەیا (ئەڤرۆ) گۆت» دەمێ سەرۆك بارزانی و رەحمەتی مام جەلال، ب ئێكهەلویست چووینە بەغدا و پشكداری د نڤیسینا دستوورێ ئیراقێدا كری، شیان مافێن كوردان تێدا بهێنە جهگیركرن، هەردەمێ د پێكڤە شیان دەستگەفتان بدەستڤە بینن. ئاسۆ فایق گۆت ژی» ئەو پەرت و بەلاڤبوونا هەی و هەموو تشتێ خوە رادەستی حوكمەت و دادگەها فیدرالی بكەین، پەرلەمانێ مە نەمینیت و حوكمەت ببیتە كاربڕێكەر هەموو دزڤریت بۆ نەبوونا ئێكگرتنێ. نوكە پێنكاڤ د باشن بۆ ئەوێ چەندێ ئێكگرتن بهێتە دروستكرن بۆ بەرژەوەندییا ئاخ و خەلكێ كوردستانێ».
وی شرۆڤەكارێ سیاسی دیاركر ژی» ب پشتڕاستی ڤە دبێژم، تنێ مە ئێك هەلویست هەبیت دێ ئەڤێ قۆناغا كەفتینە تێدا دەرباز كەین، هەكە ژ روویێ ئابۆری و سیاسی و ئەمنی ڤە ئێك هەلویست بین كێشە رووب روویێ مە نابن».
ئاماژەكر» پێدڤییە بگەهینە خالێن هەڤپشك بۆ بڕێڤەبرنا هەلبژارتنێن زەلال و ئارام و دیموكراسی، تاكو وەلاتی ب ئازادی بەر ب سندووقێن دەنگدانێ بچن و دەنگێن خوە بدەن بۆ دیاركرنا نوونەرێن خوە ل پەرلەمانێ كوردستانێ و پێكئینانا حوكمەتا هەرێما كوردستانێ».
پتر گۆت» سەرۆكایەتییا هەرێما كوردستانێ ل سەردەمێ سەرۆك مەسعود بارزانی و نوكە ژی ل سەردەمێ نێچیرڤان بارزانی، پرا كۆمكرنا ئالییان بوو، نێچیرڤان بارزانی، سەرۆكێ هەرێما كوردستانێ كەسایەتییەكێ دبلۆماسییە ل سەر ئاستێ نێڤدەولەتی، سەرۆكایەتییا هەرێما كوردستانێ ل دۆر گەلەك ناكۆكیێن د ناڤبەرا ئالیێن سیاسی شیایە ئەوان ئالییان كۆمبكەت و د گەلەك پرسێن هەڤپشكدا بگەهنە رێككەفتنێ».
هەروەسا خۆیاكر» دووماهی سەرەدانا سەرۆكێ هەرێما كوردستانێ و جێگرێن سەرۆكێ هەرێمێ بۆ ئیرانێ و كۆمبوون ل گەل مەزنە بەرپرسێن ئەوی وەلاتی ژ وان ژی رێبەرێ بلند یێ ئیرانێ، دەستكەفتەكێ گەلەك باشبوو ژ روویێ ئابۆری و ئاسایشێ ڤە، هەروەسا هەكە روودانا كەفتنا فرۆكەیا سەرۆك كۆمارا ئیسلامییا ئیرانێ و وەغەركرنا وی نەهاتبا روودان، دا سەرۆكێ كۆمارا ئیسلامییا ئیرانێ سەرەدانا هەولێرێ كەت، ئەڤە پێنگاڤێن مەزن بوون كو هاتینە هاڤێتن»

هەولێر، قائید میرۆ

سەرۆكێ دەستەیا دەڤەرێن كوردستانی ئاشكراكر، د دەمێ نوكەدا رەوشا دەڤەرێن كوردستانی یێن ژ دەرڤەی ئیدارەیا هەرێما كوردستانێ زێدەتر یێن ئالۆزبووین، بەلێ مە هندەك سۆز ژ بەغدا یێن وەرگرتێن بۆ چارەسەركرنا ئاریشەیان و دبێژیت، مخابن دیاردەیا ب شیعەكرنا دەڤەرێن كوردستانێ ژی هاتیە دەستپێكرن و هەكە ب مەرەم ئەو بابەتە بهێتەكرن دێ رەوشێ ئالۆزكەت.
فەهمی بورهان، سەرۆكێ دەستەیا دەڤەرێن كوردستانی بۆ رۆژنامەیا (ئەڤرۆ) گۆت» ئاریشەیێن دەڤەرێن كوردستانی یێن ژ دەرڤەی ئیدارەیا هەرێما كوردستانێ هەر د بەردەوامن ول هەموو دەڤەران ئاریشە یێن هەین، پترییا ئاریشەیێن هەین ژی یێن ئەردی و جوتیارانە، لادانا بەرپرسێن كورد ل ئیدارەیێن وان دەڤەرێن بن دەستهەلاتا حوكمەتا فیدڕال و چەندین ئاریشەیێن دی ژی یێن هەین، ئاریشەیەكا دی ل ڤێ دووماهیێ یا سەرهەلدای ئەوژی ئەم هەست دكەین بێهنا شیعەگەریێ ل دەڤەرێن كوردستانی دهێت، هیڤیدارین ئەو شیعەگەری ب پلان و مەرەم نەبیت هەكە دێ رەوشا ئەوان دەڤەران گەلەك ئالۆزبیت، چونكە ب شیعەكرنا ئەوان دەڤەران پێشهاتەكا مەترسیدارە و پێدڤییە بهێتە راگرتن، ب دیتنا پشتی هەلبژارتنێن جڤاتێن پارێزگەهان ب تایبەتی ل كەركووكێ و نەینەوا گوهۆڕین ل دەڤەرێن كوردستانی یێن ژ دەرڤەی ئیدارەیا هەرێما كوردستانێ یێن پەیدابووین، هەكە رێككەفتن هەبیت و پارێزگارەكێ كورد بۆ كەركووكێ بهێتە دیاركرن ئەم باوەرین دێ هێشتا كاریگەری هەبن ل سەر چارەسەركرنا ئاریشەیێن ل كەركووكێ نوكە هەین، چونكە مخابن گەلەك جاران لەشكرێ ئیراقێ و دەزگەهێن ئیداری دەستێوەردانێ د ئاریشەیان دا دكەن و كاری بۆ بەرژەوەندیێن ئەرەبێن دەڤەرێ دكەن دژی كوردان، بێگومان كوردان ژی نوكە چو دەستهەلات نینە ل دەڤەرێن كێشە ل سەر».
سەرۆكێ دەستەیا دەڤەرێن كوردستانی یێن ژ دەرڤەی ئیدارەیا هەرێما كوردستانێ گۆت ژی» ل چەند رۆژێن بۆری وەكو شاندێ هەرێما كوردستانێ مە سەرەدانا بەغدا كر و ل گەل ئالیێن پەیوەندیدار چەندین كۆمبوون هاتنە ئەنجامدان، د سەرەدانا ڤێجارێدا بۆمە ئەو راستییە دیاربوو نوكە دەستهەلاتدارێن بەغدا یێن گەهشتینە ئەوێ باوەریێ هەرێما كوردستانێ یا رژدە ل سەر بجهئینانا مادەیێ ١٤٠ و چارەسەركرنا ئاریشەیا ئەوان دەڤەران، هەروەسا هندەك سۆز مە وەرگرتن ب تایبەتی وەزیرێ چاندنێ سۆزدایە دێ گوژمەكێ پارەی بۆ ئەرەبێن هاوردە هێتە مەزاختن هەتا ئەردێ كوردان داگیر نەكەن و ڤەگەڕن بۆ دەڤەرێن خوە، وەزیرێ داد و شاخەوان عەبدوللا، جێگرێ سەرۆكێ جڤاتا نوونەرێن ئیراقێ و وەزیرێ داد ژی گەلەك هاریكارن بۆ ئارامكرنا رەوشا ئەوان دەڤەران، ئەم ژی رژدین ل سەر چارەسەركرنا ئاریشەیێن ئەوان دەڤەران، چونكە مە دو ئاریشە ل دەڤەرێن كوردستانی یێن ژ دەرڤەی ئیدارەیا هەرێما كوردستانێ زێدەتر یێن هەین ئەوژی ئاریشەیا ئەرد و زەڤیێن جوتیاران دگەل ئینانا ئەرەبێن هاوردە و پەیداكرنا ئاریشەیان بۆ كوردێن ئەوان دەڤەران».

مامۆستایەکێ زانکۆیێ ل وەلاتێ فرەنسا دیار دکەت دڤێت نها داخوازیا سەرەکی یا کوردان ل تورکیا بابەتێ پەروەردا ب زمانێ کوردی بیت، چونکی ل تورکیا مەترسی ل سەر زمانێ کوردی هەیە و رێژەیا ئاخڤتنا ب کوردی د ناڤ گەنجان دا کێم بوویە، ئەو یەک ژی مەترسیەکا گەلەک مەزنە.

پرۆفیسۆر مستەفا ئاکین مامۆستایێ زانکۆیێ ل وەلاتێ فرەنسا دیار کر، نها ل تورکیا و باکورێ کوردستانێ مەترسیێن گەلەک مەزن ل سەر زمانێ کوردی هەنە، ب تایبەتی ژی ل باژێرێن باکورێ کوردستانێ رێژەیا ئاخڤتنا ب زمانێ کوردی هەر یا کێم دبیت، ژ بەر ڤێ یەکێ ژی گەلەک گرنگە کو نها ئێک ژ داخوازیێن سەرەکی یێن کوردان ل تورکیا بابەتێ پەروەردا ب زمانێ کوردی بیت و گۆت: (دڤێت هەموو سازی و رێکخستنێن کوردی ل تورکیا و باکورێ کوردستانێ دەست ب کەمپینێن مەزن بۆ پەروەردا ب زمانێ کوردی بکەن، نها دەمەک گونجایە و دڤێت ژ بۆ ڤێ یەکێ ژی کار بهێتە کرن، دڤێت سیستەمێ نها یێ پەروەردێ ل تورکیا بهێتە گوهۆڕین و وەکو چارەسەری ژی دڤێت زمانێ کوردی ببیتە زمانێ فەرمی یێ پەروەردێ ل تورکیا، ئانکۆ ل گەل زمانێ تورکی دڤێت زمانێ کوردی ژی ببیتە زمانێ فەرمی یێ پەروەردێ).
مامۆستایێ زانکۆیێ ئەو یەک ژی دیار کر، هەردەم مەترسی ل سەر زمانێ کوردی هەبووینە، لێ نها ژ بەر پێشڤەچوونا میدیا جڤاکی رۆژانە خەلک زمانێ کوردی بکار دئینن، لێ ئەو یەک گەلەک کێمە و دڤێت زمانێ کوردی ببیتە زمانێ فەرمی یێ پەروەردێ و هەروەسا گەلەک گرنگە سازی و رێکخستنێن کوردی ل باکورێ کوردستانێ ب رێیا چالاکیێن جودا جودا داخواز ژ خەلکی بکەن، هەم ل میدیا جڤاکی و هەم ژی ل مالێ و جهێن کاری ب کوردی بئاخڤن، ل میدیا جڤاکی هەموو نێرینێن خوە ب کوردی بنڤیسن، ئەو یەک دێ بیتە ئەگەرێ پێشڤەچوونا زمانێ کوردی و گۆت: (نها ل هەرێما کوردستانێ چەندین زانکۆ هەنە، ب هزاران قۆتابخانە ب زمانێ کوردی هەنە و هەروەسا ب سەدان تی ڤی هەنە، ئەو یەک گەلەک گرنگە و دڤێت ل باکورێ کوردستانێ ژی کار بۆ پێشڤەبرنا زمانێ کوردی بهێتە کرن، پێشڤەچوونا زمانێ کوردی دێ بیتە ئەگەرێ پێشڤەچوونا گەلەک بیاڤێن دی بۆ گەلێ کورد، ڤێجا گرنگە پارتێن سیاسی، سازی و رێکخستنێن کوردی نها ب رەنگەکێ جدی کار بۆ ڤێ یەکێ بکەن دا کو زمانێ کوردی ل گەل زمانێ تورکی ل تورکیا ببیتە زمانێ فەرمی یێ پەروەردێ).
پرۆفیسۆر مستەفا ئاکین د دووماهیا ئاخڤتنا خوە دا ئەو یەک ژی دیار کر، زمانێ کوردی ئێکە ژ زمانێن هەری دەولەمەند ل جیهانێ، سەرەرای زۆرداریێ و قەدەغەکرنێ، لێ زمانێ کوردی ژناڤ نەچوویە و ئەڤرۆکە ژی دڤێت هەم ب هەموو شیانێن خوە کار بۆ پێشڤەبرنا زمانێ کوردی بکەین.

سەرۆك مەسعود بارزانی دوهی ل سەلاحەدین پێشوازی ل محەمەد جەمیل ئەلمیاحی پارێزگارێ‌ واست و شاندەكێ‌ هەڤپەیمانیا واست ئەجمەل كر.
د دیدارەكێ‌ دا، رەوشا سیاسی و ئاستەنگێن پێشبەری سەقامگیری و گەشەپێدانا پارێزگەهێن ئیراقێ‌ گەنگەشە كر.
هەر د ڤێ‌ دیدارێ‌ دا، دوپاتی ل هەماهەنگی و كارێ‌ هەڤپشك د ناڤبەرا هەرێما كوردستانێ‌ و پارێزگەها واست و پارێزگەهێن دی یێن ئیراقێ‌ دا كر، ئەو ژی ژ پێخەمەت خزمەتكرنا وەلاتیان و ئاڤەدانی و مسۆگەربوونا سەقامگیری و گەشەكرنێ‌ د وارێن جودا جودا دا.

سەرۆك وەزیرێن هندستانێ بەرسڤا پیرۆزباهییا سەرۆكێ هەرێما كوردستانێ ددەت كو ب هەلكەفتا سەركەفتنا وی د هەلبژارتنێن هندستانێدا ئاراسەی وی كربوو و دبێژیت: سوپاسییا سەرۆكێ هەرێما كوردستانێ دكەین، دۆستایەتییا مە بلند د هەلسەنگینین و چاڤێ مە ل زێدەتر ب هێزكرنا وێیە.
ل حەفتییا بۆری، نێچیرڤان بارزانی، سەرۆكێ هەرێما كوردستانێ پەیامەكا پیرۆزباهیێ ب رێكا تۆرا جڤاكییا ئێكس (تویتەرا بەرێ) ئاراستەی ناریندا مۆدی، سەرۆك وەزیرێن هندستانێ كربوو و تێدا گۆتبوو» ب ناڤێ هەرێما كوردستانێ پیرۆزباهیێ ل سەرۆك وەزیران ناریندا مۆدی دكەم ب هەلكەفتا دوبارە هەلبژارتنا وی وەكو سەرۆك وەزیرێن هندستانێ». هەروەسا راگەهاندبوو» چاڤەڕێی بەردەوامییا پێشكەفتنا پەیوەندیێن د ناڤبەرا هەرێما كوردستانێ و ئیراقێ و وەلاتێ هندستانێدا دكەین».

مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ كۆمارا ئیسلامییا ئیرانێ ب سەرۆكایەتییا محەمەد سادق موعتەمدیان، پارێزگارێ ئۆرمیێ كر.
ب گۆڕەی بەیاننامەیەكا حوكمەتا هەرێما كوردستانێ، د كۆمبوونەكێدا كو ئیسماعیل زارعی كوشا، پارێزگارێ كوردستانێ و محەمەد تەیب سەحرایی، پارێزگارێ كرماشان و هەژمارەكا دی ژ بەرپرسێن ئیرانی بەرهەڤبووین، گەنگەشە ل دۆر پێشڤەبرنا پەیوەندیێن دوقۆلی و هاریكاری و هەماهەنگی د بوارێن لێكگوهارتنا بازرگانی و ئاسانكاری بۆ هاتنوچوونێ و گەشتیاران د ناڤبەرا هەردو ئالییان هاتە كرن، ب تایبەتی بەرهەڤیێن پێشوازیێ ل زیارەتكارێن ئیرانی بۆ جهێن پیرۆز ل باشوورێ ئیراقێ.
د پشكەكا دی یا بەیاننامەیا حوكمەتا هەرێما كوردستانێدا هاتییە» هەردو ئالی د هەڤڕا بوون ل سەر پێدڤییا ب هێزكرن و پێشئێخستنا پەیوەندییان ل سەر بنەمایێ بەرژەوەندییا هەڤپشك».

نێچیرڤان بارزانی، سەرۆكێ هەرێما كوردستانێ پێشوازی ل شاندەكێ كۆمارا ئیسلامییا ئیرانێ كر كو پێكهاتبوو ژ پارێزگەرێن هەڤسنورێن هەرێما كوردستانێ و هەژمارەكا نوونەرێن دەڤەرێ ل پەرلەمانێ ئیرانی.
د كۆمبوونەكێدا هەردو ئالییان خوەشحالییا خوە ب ئاستێ پەیوەندیێن د ناڤبەرا هەرێما كوردستانێ و كۆمارا ئیسلامییا ئیرانێ دەربڕی و دوپاتی ل بەرفرەهكرنا لڤینا بازرگانی و هاتنوچوونێ و ڤەگوهاستنێ ل دەرگەهێن سنووری كر، هەروەسا چەند پێشنیازەك بۆ زێدەكرنا گەشتێن راستەوخوەیێن ئەسمانی و بەرفرەهكرنا زێدەتر یا هاریكاریێ د بوارێن نوژداری و گەشتیاریدا، ل گەل ڤەكرنا دەڤەرا بازرگانییا ئازاد د ناڤبەرا واندا، گەنگەشەكر.
هەردو ئالی د هەڤڕا بوون ل سەر ئەوێ چەندێ كو هەڤپشكیێن هەرێما كوردستانێ و كۆمارا ئیسلامییا ئیرانێ گەلەكن و خواستا هەردو ئالییان بۆ پێشڤەبرنا هەموو بوارێن پەیوەندی و هاریكارییا هەڤپشك دوپاتكر. شاندێ مێهڤان سوپاسی و پێزانین بۆ ئاسانكارییا دەربازبوونا زیارەتكارێن كۆمارا ئیسلامییا ئیرانێ بۆ مەزارێن ئایینی ل باشوورێ ئیراقێ، ب هەرێما كوردستانێدا نیشاندا.