بەرپرسەكێ نڤیسینگەها رزگاركرنا رەڤاندیێن كوردێن ئێزدی راگەهاند: زێدەتر ژ دو هزار و 500 ئێزدی د بێ سەر و شوونن، هەروەسا دبێژیت: رەوشا ژیانا وان هەمبەركرن ب سالا 2014 كو داعشێ هێرش كریە سەر، گوهۆڕینەكا بەرچاڤ ب سەردا نەهاتیە.
خەیری بۆزانی، سەرپەرشتێ دۆسێیا رزگاركرنا رەڤاندییان ل نڤیسنگەها رزگاركرنا رەڤاندیێن كوردێن ئێزدی گوت» هەموو سالان هەلكەفتا جینۆسایدا كوردێن ئێزدی دكەین و هەموو دەمان ژی دبێژین دوماهی ب جینۆسایدێ نەهاتیە و یا بەردەوامە، چونكە هەتا نوكە زێدەتر ژ دو هزار و 500 كوردێن ئێزدی د بێ سەر و شوونن».
خەیری بۆزانی گوت ژی» هێشتا پترییا ئاوارەیێن ئێزدی ل كەمپاندا دژین، شنگال نەهاتیە ئاڤەدانكرن و هیچ خزمەتگوزارییەك پێشكێشی قەزا شنگالێ نەهاتیە كرن، لەما جینۆسایدێ ب بەردەوام دزانین و دبێژین، رەوشا ئێزدییان جوداهییەكا مەزن ل گەل سالا 2014 نینە كو داعشێ هێرش كریە سەر».
نێزیكی 11 سالان ب سەر جینۆسایدا كوردێن ئێزدی دەرباز دبن. ل دووڤ گۆتنا سەرپەرشتێ دۆسێیا رزگاركرنا رەڤاندییان ل نڤیسینگەها رزگاركرنا رەڤاندیێن كوردێن ئێزدی» پترییا ئەوێن كەفتینە دەستێ داعشێ، ژن و زارۆك بوون».
نڤیسینگەها رزگاركرنا رەڤاندیێن كوردێن ئێزدی سەر ب نڤیسینگەها نێچیرڤان بارزانی، سەرۆكێ هەرێما كوردستانێیە و هەر ژ سالا 2014 كار دكەت بۆ رزگاركرنا ئێزدیێن كەفتینە دەستێ داعشێ.
خەیری بۆزانی باس ل وێ چەندێ كر» ل سالا 2014 هەتا 2018 پڕۆسەیا رزگاركرنا رەڤاندییێن كوردێن ئێزدی ب لەز بڕێڤەدچوو، بەلێ پشتی وێ چەندێ ژن و زارۆكێن چەكدارێن بەرێ یێن داعشێ ل كۆمپا (هۆل) ل حەسەكە ل سووریێ هاتینە كۆمڤەكرن، مخابن هێزێن سووریا دیموكرات (هەسەدە) هاریكار نەبوون بۆ وێ چەندێ ئێزدیێن د ناڤ ژن و زارۆكێن چەكدارێن بەرێ یێن داعشێ رزگار بكەن».
وەزارەتا كۆچ و كۆچبەرێن ئیراقێ هەتا نوكە هەژمارەكا مەزن ژ هەڤوەلاتیێن ئیراقی ژ كۆمپا هۆلێ زڤراندینە. خەیری بۆزانی داخواز ژ حوكمەتا ئیراقێ دكەت خوە ب بەرپرسیار بزانیت و بزاڤێ بۆ رزگاركرنا وان بدەت یێن كەفتینە دەستێ داعشێ.
قەزا شنگالێ ژ روویێ كارگێریڤە سەر ب پارێزگەها نەینەوا ڤەیە. ل دووڤ گۆتنا سەرپەرشتێ دۆسێیا رزگاركرنا رەڤاندییان ل نڤیسینگەها رزگاركرنا رەڤاندیێن كوردێن ئێزدی» هەتا نوكە ئیراق و حوكمەتا خوەجهییا نەینەوا وەكو پێدڤی بزاڤا لێگەریانێ و رزگاركرنا رەڤاندیێن ئێزدیین نەكریە».
خویاكر ژی» حوكمەتا ئیراقێ بۆ كاروبارێن رەڤاندیێن ئێزدی دو لژنەیێن پێكئیناین، بەلێ تنێ وەك لژنە ماینە و هەتا نوكە هیچ پێنگاڤەك نەهاڤیتییە، لەوما دوبارە داخوازێ ژێ دكەین هاریكارییا وی خەلكی بكەن كو بزڤرنە جهێن خوە».
حوكمەتا هەرێما كوردستانێ و حوكمەتا ئیراقێ ل مەها 10 سالا 2020 رێككەفتنەك بۆ ئاساییكرنا رەوسا شنگالێ ئیمزا كربوو. سەرپەرشتێ دۆسێیا رزگاركرنا رەڤاندیێن ئێزدی دبێژیت» هەكە ئەو رێككەفتنە هاتبا بجهئینان دا 50% ژ كێشەیێن شنگالێ چارەسەر بن و رەوشا ژیانا ئێزدییان دا هێتە گوهۆڕین، بەلێ مخابن بەغدا د پرسا بجهئینانا خالێن رێككەفتنێ گەلەك خەمساریێ دكەت».
ل 3/8/2014، رێكخراوا تیرۆرستییا داعشێ هێرشەكا بەرفرهە ل سەر شنگالێ و دەوروبەرێن وێ ئەنجامدا. د هێرشێدا 11 هزار و 417 كوردێن ئێزدی هاتنە رەڤاندن، هاتنە كۆمكۆژكرن و بێسەروشوونكرن و پشتی هێرشێ ژی هەژمارەكا مەزن ئاوارەی هەرێما كوردستانێ بوون.

دوهی چارشەمبی 30/7/2025، ل سەلاحەدین سەرۆك مەسعود بارزانی پێشوازی ل د. محەمەد ئەلحەسان، هنارتیێ تایبەت یێ سكرتێرێ گشتیێ نەتەوەیێن ئێكگرتی ل ئیراقێ كر.
بارەگەهێ بارزانی بەلاڤكر» د دیدارەكێدا باس ل هەڤبەندیێن د ناڤبەرا حوكمەتا هەرێما كوردستانێ و حوكمەتا ئیراقا فیدرالدا و هەروەسا چارەسەركرنا كێشەیێن د ناڤبەرا واندا و دوپاتی ل هەماهەنگیێ و كارێ هەڤپشك یێ ئالییان بۆ دەربازكرنا گرفت و ئاستەنگان، هاتە كرن».
رەوشا سیاسی و دووماهی گوهۆڕینێن دەڤەرێ تەوەرێ دی یێ وێ دیدارێ بوو.

سەرۆك بارزانی و قونسلێ گشتیێ قەتەر رەوشا سیاسی و دووماهی گوهۆرینێن دەڤەرێ و ئیراقێ، گەنگەشەكر.
بارەگەهێ بارزانی بەلاڤكر، ل چارشەمبی 30/7/2025، سەرۆك مەسعود بارزانی ل سەلاحەدین پێشوازی ل حسێن عەلی ئەلفەزالە، قونسلێ گشتیێ قەتەر كر.
د دیدارەكێدا كو قونسلێ گشتیێ قەتەر ب مەبەستا مالئاڤاهیێ و ب هەلكەفتا ب دووماهی هاتنا ئەركێن خوە سەرەدانا سەرۆك بارزانی كربوو، بیر و بۆچوون ل دۆر رەوشا سیاسی و دووماهی گوهۆڕینێن ل سەر ئاستێ دەڤەرێ و ئیراقێ هاتنە لێكگۆهارتن و هەروەسا دوپاتی ل پێشڤەبرنا هەڤبەندیێن د ناڤبەرا هەردو ئالییاندا هاتە كرن.

سەرۆكێ هەرێما كوردستانێ راگەهاند: هێرشێن درۆنی ل سەر ژێرخانەیا وزەیا هەرێما كوردستانێ، زیانێ دگەهیننە ئابۆرێ ئیراقێ، هەروەسا شیرەتكارێ بلند یێ بریتانیا ژی دبێژیت: وەلاتێ وی یێ بەرهەڤە هاریكاریێ و پشتەڤانیێ بۆ پاراستنا ئاسایش و ئارامییا ئیراقێ و هەرێما كوردستانێ بكەت.
سەرۆكایەتییا هەرێما كوردستانێ د بەیاننامەیەكێدا بەلاڤكر» ل رۆژا چارشەمبی 30/7/2025، نێچیرڤان بارزانی، سەرۆكێ هەرێما كوردستانێ، پێشوازی ل جێگرێ ئەدمیرال ئێدوارد ئالگرین، شیرەتكارێ بلند یێ بریتانیا بۆ رۆژهەلاتا ناڤین و باكوورێ ئەفریقیا و شاندەكێ د گەلدا كر كو ژ هەژمارەكا شیرەتكار و قونسلێ گشتیێ بریتانیا ل هەرێما كوردستانێ پێكهاتبوو».
د بەیاننامەیێدا هاتیە ژی» رەوشا ئەمنی یا ئیراقێ و هەرێما كوردستانێ و دەڤەرێ و هەڤبەندیێن هەولێر- بەغدا هاتنە گەنگەشەكرن، هەروەسا باس ل مەترسیێن ئەمنی و گەفێن داعشێ ل سەر ئارامییا دەڤەرێ».
نێچیرڤان بارزانی دوپاتكر كو داعش هێشتا مەترسییەكا راستەقینەیە و گەفە ل سەر ئارامییا ئیراقێ و سووریێ، دەربارەی هێرشێن درۆنی ژی ل سەر هەرێما كوردستانێ، هەروەسا ب ئارمانجگرتنا ژێرخانەیا وزەیێ ل هەرێما كوردستانێ ب گەف و زیان ل سەر هەموو ئابۆری ئیراقێ هەژمارت و داكۆكی ل وێ چەندێ كر كو پێدڤییە رێگری ل وان هێرشان بهێتە كرن.
ئالگرینی سەرەرای نیشاندانا پێگیرییا وەلاتێ خوە ب هەڤبەندییان و هاریكارییا هەڤپشك ل گەل ئیراقێ و هەرێما كوردستانێ، دوپاتكر كو وەلاتێ وێ ب گرنگییەكا مەزنڤە دنێریتە ئارامییا دەڤەرێ، هەروەسا هاریكاری و پشتەڤانییا بریتانیا بۆ پاراستنا ئاسایش و ئارامییا ئیراقێ و هەرێما كوردستانێ و دەڤەرێ نیشاندا.
د دیدارێدا، گەنگەشە ل دۆر سیستەمێ فیدرالی ل ئیراقێ، هەڤبەندیێن ئیراقێ و هەرێما كوردستانێ ل گەل وەلاتێن دەوروبەر، رەوشا سووریێ و مافێن كوردان و پێكهاتەیان ل وی وەلاتی، ل گەل دووماهی پێشهاتێن پرۆسەیا ئاشتیێ ل توركیا، هاتە كرن.

دوهی چارشەمبی 30/7/2025، نێچیرڤان بارزانی، سەرۆكێ هەرێما كوردستانێ، ب مەبەستا مالئاڤاهیێ بۆ ب دووماهی هاتنا ئەركێ وی، پێشوازی ل حسێن عەلی ئەلفەزالە، قونسلێ گشتیێ قەتەر ل هەرێما كوردستانێ كر.
د دیدارەكێدا سەرۆكێ هەرێمێ سوپاس و پێزانین بۆ بزاڤ و كارێن ئەلفەزالە بۆ پێشڤەبرنا هەڤبەندیێن وەلاتێ خوە ل گەل هەرێما كوردستانێ دەربڕی و هیڤییا سەركەفتنێ د ئەركێ وی یێ نوو دا بۆ خواست، هەروەسا رێز بۆ رۆل و بزاڤێن میرێ قەتەرێ و سەركردایەتییا وی وەلاتی ژ پێخەمەت ئارامییا دەڤەرێ و پاراستنا ئاشتیێدا، دوپاتكر.
ژ ئالیێ خوەڤە ئەلفەزالە، سەرەرای دەربڕینا رێز و سوپاسیێ بۆ ئالیێن پەیوەندیدارێن هەرێما كوردستانێ بۆ هاریكاری و پشتەڤانییا وان ل سەرئێخستنا ئەركێ وی، دوپاتكر كو وەلاتێ وی ب گرنگییەكا مەزنڤە دنێریتە هەڤبەندیێن خوە ل گەل ئیراقێ و هەرێما كوردستانێ و خوازیارە د وارێن جودا جودا دا، پێشڤەبرنا زێدەتر ب هاریكارییا هەڤپشك بدەت.

دوهی چارشەمبی 30/7/2025، ب سەرپەرشتییا مەسرور بارزانی، سەرۆكێ حوكمەتا هەرێما كوردستانێ و بەرهەڤبوونا قوباد تالەبانی، جێگرێ سەرۆكێ حوكمەتا هەرێمێ، جڤاتا وەزیرێن هەرێمێ كۆمبوو.
بڕگەیا ئێكێ یا كۆمبوونێ، گەنگەشەكرنا دووماهی پێنگاڤێن خەرجكرنا مووچەیێ مەها شەش و حەفت بوو ل بەر رۆناهییا بڕیارا هەڤپشك یا هەردو جڤاتێن وەزیرێن فیدرال و هەرێما كوردستانێ و دووڤچوونا كارێ لژنەیێن هەڤپشك یێن وەزارەتێن دارایی و دیوانا چاڤدێرییا داراییا فیدرال و هەرێما كوردستانێ ب گۆڕەی دووماهی بڕیارا هەردو جڤاتێن وەزیرێن فیدرال و هەرێمێ.
ئاوات شێخ جەناب، وەزیرێ دارایی و ئابۆری ل حوكمەتا هەرێمێ، راپۆرتەك ل سەر پۆلینكرنا داهاتێ گشتی ل هەرێما كوردستانێ و دەستنیشانكرنا جۆرێ داهاتی و ژێدەر و بنەمایێ قانوونیێ وەرگرتنێ بەرچاڤكر، كە مەهانە ب شێوازەكێ رۆهن و زەلال، د چارچۆڤەیێ تەرازییا پێداچوونێدا، پێشكێشی وەزارەتا داراییا فیدرال هاتیە كرن و ب بەردەوامی ژی ژ ئالیێ تیما هەڤپشك یا هەردو دیوانێن چاڤدێرییا دارایی ژی هووربینی بۆ هاتیە كرن.
وەزیرێ دارایی و ئابۆری ئاماژە كر كو نوونەرێن هەرێما كوردستانێ ل لژنەیێن هەڤپشك یێن هەردو ئالییان بۆ پۆلینكرنا داهاتێن نە پەترۆلی و دەستنیشانكرنا پشكا گەنجینەیا فیدرالی ژ ڤان داهاتان، هاریكار بوون ل سەرئێخستنا كارێ لژنەیێ و پشتبەستن ب دەستوور و قانوونا بڕیڤەبرنا داراییا فیدرالی و قانوونا بودجەیا سێ سالی، ب هووری پێشنیازا هەرێمێ سەبارەت ڤێ چەندێ بەرهەڤ كریە.
رۆهنكر ژی كو لیستا مووچەی و تەرازییا پێداچوونا مەها شەش هاتیە هنارتن بۆ وەزارەتا داراییا فیدرال و ئەركێ وەزارەتا داراییا فیدرالە كو ل بەرامبەر، مووچەیێ مەها شەش یا فەرمانبەرێن هەرێمێ خەرج بكەت.
جڤاتا وەزیرێن هەرێما كوردستانێ، دەستخوەشی ل وەزارەتا دارایی و ئابۆری و تیما دیوانا چاڤدێرییا دارایی و دانوستاندنان ل گەل بەغدایێ كر بۆ ڤێ راپۆرتێ سەبارەت داهاتێن نەپەترۆلی یێن هەرێمێ و بزاڤ و كاركرنا وان ل دۆر ڤێ چەندێ. هەروەسا جڤاتا وەزیران ئەو بۆچوونا وەزارەتا دارایی و ئابۆری پەسەندكر سەبارەت ب پۆلینكرنا داهاتان د چارچۆڤەیێ وان دەقێن دەستووری و قانوونی ئەوێن د كۆمبوونێدا هاتینە بەرچاڤكرن. نوونەرێن هەرێما كوردستانێ ژی ل لژنەیێن هەڤپشك ل گەل حوكمەتا فیدرال راسپاردن كو دانوستاندنا ڤێ بۆچوونێ ل گەل هەڤكیڤێن خوە ل لژنەیێ بكەن، تاكو ل نێزیكترین دەلیڤە، دۆسێیا داهاتێن نە پەترۆلی بهێتە ئێكلاكرن ب گۆڕەی وێ پێرابوونا هەڤپشك د بڕیارا هەردو جڤاتێن وەزیرێن هەرێمێ و فیدرالدا هاتی.
پاشی كەمال محەمەد سالح، وەزیرێ سامانێن سرۆشتی ب وەكالەت، بابەتێ دەستپێكرنا هنارتنا پەترۆلا هەرێمێ ل بەر رۆناهییا دووماهی بڕیارا هەڤپشك یا جڤاتێن وەزیرێن فیدرال و هەرێمێ بەرچاڤكر.
پشتی دانوستاندنێ، جڤاتا وەزیران بڕیار دا كو حوكمەتا هەرێما كوردستانێ بەرپرسیارەتییا قەرەبووكرنا كۆمپانیێن پەترۆلی یێن بەرهەمئێنەرێن وێ رێژەیا پەترۆلێ دێ ب ستوویێ خوەڤە گریت ب گۆڕەی بڕیارا هەڤپشك یا جڤاتێن وەزیرێن فیدرال و هەرێمێ بۆ مەبەستێن بكارئینانا ناڤخوە ل هەرێمێ، هاتیە تەرخانكرن. ئەو رێژەیا پەترۆلی نوكە یا بەرهەڤە بۆ هنارتنێ و ژ ئالیێ كۆمپانیێن بیانی ڤە دهێتە بەرهەمئینان، دێ رادەستی كۆمپانییا ب بازاركرنا پەترۆلێ (سۆمۆ) هێتە كرن ب مەبەستا هنارتنێ ب رێكا بەندەرێ جەیهان یێ توركی.
جڤاتا وەزیران دوپاتكر كو حوكمەتا هەرێما كوردستانێ یا بەردەوامە ل سەر پێگیریبوونێ ب تێكگەهشتنا هەڤپشك د ناڤبەرا هەردو ئالییاندا و هەم دڤی چارچۆڤەیدا ژی، دڤێت حوكمەتا فیدرال مووچەیێ مەها شەش و پاشی مووچەیێ مەها حەفت خەرج بكەت هەڤشێوەیێ فەرمانبەرێن دەڤەرێن دی یێن ئیراقێ، چونكە هەرێم یا پێگیرە بجهئینانا ئەو چەندا ل سەر ل دۆر دۆسێیا پەترۆلێ و داهاتێن نە پەترۆلی و حوكمەتا هەرێما كوردستانێ پشتەڤانییا سەرئێخستنا تێكگەهشتنا هەڤپشك د ناڤبەرا هەردو ئالییاندایە كو پێشتر ژ ئالیێ جڤاتێن وەزیرێن هەردو ئالییان هاتیە پەسەندكرن.

دوهی چارشەمبی 30/7/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ سەربازیێ بریتانی ب سەرۆكایەتییا ئیدوارد ئالگرین، شیرەتكارێ بلند یێ بەرگرییا بریتانی بۆ كاروبارێن رۆژهەلاتا ناڤین و باكوورێ ئەفریقیا كر.
د كۆمبوونەكێدا كو ئەندرو بیزلی، قونسلێ گشتیێ بریتانیا ل هەرێما كوردستانێ بەرهەڤبووی، دووماهی گوهۆڕین و پێشهاتێن رەوشا ئەمنییا ئیراقێ و دەڤەرێ و ب هێزكرنا هەماهەنگیێ و هاریكارییا ئەمنی و سەربازی د ناڤبەرا هەرێما كوردستانێ و بریتانیا دا و بەردەوامبوون و پشتەڤانیكرنا چاكسازیێن وەزارەتا كاروبارێن پێشمەرگەی، هاتە گەنگەشە كرن.
سەرۆكێ حوكمەتێ رێز و سوپاسییا هەرێما كوردستانێ بۆ پشتەڤانی و هاریكارییا بریتانیا دیاركر.
هەروەسا دوپاتی ل پێدڤییا رێزگرتنێ ل قەوارەیێ دەستورویێ هەرێما كوردستانێ و مسوگەركرنا شایستەیێن دارایی یێن خەلكێ كوردستانێ و رێگریكرن و ب دووماهی ئینان ب هێرشێن تیرۆرستی و تێكدەرانەیێن درۆنی ل سەر هەرێما كوردستانێ هاتە كرن.
دووماهی پێشهاتێن رەوشا سووریێ و رۆژهەلاتا ناڤین ب گشتی، پشكەكا دی یا دانوستاندنان بوو.

دوهی چارشەمبی 30/7/2025، مەسرور بارزانی، سەرۆكێ حوكمەتا هەرێما كوردسانێ، د پەیامەكێدا سەرخوەشی ل میر هەرمان میرزا بەگ، وەكیلی میرێ ئێزدییان كر ب هەلكەفتا وەغەركرنا برایێ وی.
سەرۆكێ حوكمەتا هەرێما كوردستانێ د پەیاما خوە دا بۆ هەرمان میرزا بەگ دبێژیت» ژبۆ وەغەرا دووماهیێ یا برایێ هەوە (كاوە میرزا بەگ)، بەهی و سەرەخوەشیێ ل مالباتا هەوە یا بەرێز دكەم و هەڤپشكێ خەما هەوەمە، خودایێ مەزن گیانێ وی ب بەهشتێ شاد بكەت و سەبر و هەدارێ ب هەوە ببەخشیت».

سەرۆك بارزانی ل گەل قونسلێ گشتیێ فرەنسا ل هەولێرێ، پێشهات و ئاستەنگێن دەڤەرێ گەنگەشەكرن و دوپاتی ل هەڤبەندیێن دۆستانەیێن د ناڤبەرا گەلێ كوردستانێ و گەلێ فرەنسا كر.
دوهی سێشەمبی 29/7/2025، ل سەلاحەدین سەرۆك مەسعود بارزانی پێشوازی ل یان برێیم، قونسلێ گشتیێ فرەنسا ل هەولێرێ كر.
بارەگەهێ بارزانی بەلاڤكر» د دیدارەكێدا باس ل پێشهات و ئاستەنگێن دەڤەرێ ب گشتی و هەروەسا بیر و بۆچوون ل دۆر رەوشا سیاسییا ئیراقێ و هەڤبەندیێن د ناڤبەرا حوكمەتا هەرێما كوردستانێ و حوكمتا فیدرالییا ئیراقێ هاتنە لێكگۆهارتن».
هەر د وێ دیدارێدا دوپاتی ل هەڤبەندیێن دۆستانەیێن د ناڤبەرا گەلێ كوردستانێ و گەلێ فرەنسا هاتە كرن.

سەرۆكێ هەرێما كوردستانێ ل هەولێرێ پێشوازی ل نوونەرێ تایبەت یێ سكرتێرێ گشتیێ نەتەوەیێن ئێكگرتی و سەرۆكێ تێما(یونامی) ل ئیراقێ كر و راگەهاند: گرنگە هنارتنا مووچە و شایستەیێن دارایی یێن هەرێما كوردستانێ بهێتە مسۆگەركرن.
دوهی سێشەمبی 29/7/2025، سەرۆكایەتییا هەرێما كوردستانێ بەلاڤكر» نێچیرڤان بارزانی، سەرۆكێ هەرێما كوردستانێ ل گەل محەمەد ئەلحەسان، نوونەرێ تایبەت یێ سكرتێرێ گشتیێ نەتەوەیێن ئێكگرتی و سەرۆكێ تیما (یونامی) ل ئیراقێ كر».
سەرۆكایەتییا هەرێما كوردستانێ دیاركر ژی» نێچیرڤان بارزانی، سەرەرای بلند هەلسەنگاندنا بەرهەڤی و رۆلێ نەتەوەیێن ئێكگرتی ل ئیراقی، دوپاتی ل پێدڤی و گرنگییا چارەسەركرنا كێشەیێن هەولێرێ – بەغدایێ ب دانوستاندنا و مسوگەركرنا هنارتنا مووچە و شایستەیێن دارایی یێن هەرێما كوردستانێ ب گۆڕەی رێككەفتنان كر».
د بەیاننامەیێدا هاتیە ژی» سەرۆكێ هەرێما كوردستانێ د كۆمبوونێدا رێگریكرن ل هێرشێن درۆنی ل سەر هەرێما كوردستانێ ب پێدڤییەك بۆ ئارامییا وەلاتی هەژمارت».
ژ ئالیێ خوەڤە محەمەد ئەلحەسان د كۆمبوونێدا دلتەنگییا خوە ژ هێرشێن درۆنی و پێدڤییا رێكگرنێ ل وان هێرشان دیاركر و پشتەڤانییا نەتەوەیێن ئێكگرتی بۆ چارەسەركرنا كێشەیێن هەولێر- بەغدا و هنارتنا شایستەیێن دارایی یێن هەرێما كوردستانێ و پاراستنا ئارامییا وەلاتی، دوپاتكر.
دووماهی پێشهاتێن رەوشا رۆژهەلاتا ناڤین، تەوەرەكێ دی یێ كۆمبوونێ بوو.