شاندەکێ هەڤپەیمانیا نێڤدەولەتی یا شەڕێ ل دژی داعشێ ل گەل سەرۆک هۆزێن رەققە و دێرازۆرێ کۆمبوون و د کۆمبوونێ دا سەرۆک هۆزان دیار کرن هەسەدە هێزا سەربازی یا هەموو خەلکێ سووریێ یە و ئەو داخوازا سیستەمەک نە ناڤەندی ژ بۆ سووریێ دکەن.

شاندەکێ هەڤپەیمانیا نێڤدەولەتی یا شەڕێ ل دژی داعشێ بەری دو رۆژان ل رەققە و دێرازۆرێ ل گەل سەرۆک هۆزێن وان دەڤەران کۆمبوون و د کۆمبوونێ دا سەرۆک هۆزان دیار کرن، هەسەدە هێزەکا سەربازی یا دەڤەرێ یە، چونکی د ناڤ هەسەدێ دا گەلەک عەرەب ژی هەنە و ئەو هەسەدێ وەکو هێزەکا سەربازی یا کاریگەر ژ بۆ ئارامیا دەڤەرێن خوە دبینن و داخواز کرن کو سیستەمێ نوو یێ سووریێ ژی سیستەمەک نە ناڤەندی بیت دا وەسا هەموو پرسێن هەی بهێنە چارەسەرکرن.
هۆزێن ل رەققە و دێرازۆرێ ئەو یەک ژی دیار کرن نابیت دەڤەرێن وان رادەستی شامێ بهێنە کرن، چونکی نها رەوشا سووریێ گەلەک ئالۆزە و هەسەدە دەڤەرێن وان دپارێزیت و هەکە چەکدارێن سەر ب شامێ ڤەگەرنە ڤە دەڤەرێن وان دێ ئالۆزیێن نوو روو دەن و باشترە د چارچۆڤەیێ سیستەمەک نە ناڤەندی دا ژ بۆ سووریا نوو هەموو پرسێن هەی بهێنە چارەسەرکرن و نابیت بەرپرسێن شامێ وەسا هزر بکەن دێ شێن وەکو بەرێ حوکمێ ل هەموو سووریێ کەن، ئەو یەک ب چو رەنگەکێ ناهێتە قەبوول کرن و خەلکی دڤێت دەڤەرێن خوە برێڤە ببەن و باشترین چارەسەری ژی سیستەمەک نە ناڤەندی یە ژ بۆ سووریا نوو.
ل گۆر ژێدەرێن میدیایی یێن رێڤەبەریا خوەسەر شاندێ هەڤپەیمانیا نێڤدەولەتی ژی دیار کریە، ئەو پشتەڤانیێ ل داخوازیێن خەلکی ل باکورێ سووریێ دکەن و چو بریارەک بێی رازیبوونا خەلکێ وان دەڤەران ناهێتە دان و نها ئەمریکا و فرەنسا ل گەل شامێ دانوستاندنان دکەن و وان ژی دڤێت پرسێن هەی دوور ژ شەڕی و ب رێیا دانوستاندنان بهێنە چارەسەرکرن.
ئەو یەک د دەمەکێ دایە کو بەری دو رۆژان ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر ژی دیار کر، هەکە بەرپرسێن شامێ دخوازن پرسێن هەی بهێنە چارەسەرکرن وی دەمی دڤێت ئەو ژی رازی بن کو سیستەمێ نوو یێ سووریێ سیستەمەک نە ناڤەندی بیت، چونکی کورد و پێکهاتەیێن دی یێن ل سووریێ دخوازن بگەهنە هەموو مافێن خوە، ئێدی کەس نەشێت وەکو بەری نها سووریێ برێڤە ببەت و دڤێت رێز ل داخوازیێن کوردان و هەموو پێکهاتەیێن دی یێن ل سووریێ بهێتە گرتن و دڤێت هەموو مافێن کوردان و پێکهاتەیێن دی یێن ل سووریێ د دستووری دا بهێنە گەرەنتیکرن، هەکە ئەو یەک نەهێتە کرن دێ ئالۆزیێن هەی دژوارتر لێ هێن و ئەو یەک د بەرژەوەندیا چو ئالیەکێ دا نینە.

هشیار زێباری، ئەندامێ دەستەیا كارگێرییا مەكتەبا سیاسی یا پارتی دیموكراتی كوردستان ل پێگەهێ خوە ل تۆرا جڤاكییا (ئێكس) راگەهاند» پشتی حوكمەتا هەرێما كوردستانێ هەموو پێگیریێن خوە د رێككەفتنێن تەكنیكیدا بۆ دوبارە هنارتنا پەترۆلێ و تێكگەهشتنێن ل گەل كۆمپانیێن بیانی و رادەستكرتا پشكەكێ داهاتێن نەپەترۆلی بجهئیناین، نوكە تەپە یا د مەیدانا حوكمەتا فیدرالیدا، بۆ خەرجكرنا مووچەیێ مەها شەش یێ فەرمانبەرێن هەرێما كوردستانێ ب زووترین دەم».
ئەڤە د دەمەكیدایە حوكمەتا فیدرالییا ئیراقێ، مووچەیێ مەهێن شەش و حەفت یێن فەرمانبەرێن هەرێما كوردستانێ هەتا نوكە نە هنارتینە.

وەزارەتا پلاندانانا ئیراقێ راگەهاند: جێگرێ سەرۆكێ وەزیران ووەزیرێ پلاندانانێ سەرپەرشتییا كۆمبوونەكا هەڤپشك د ناڤبەرا حوكمەتا فیدرالی و حوكمەتا هەرێما كوردستانێ كر، تێدا گەنگەشە ل سەر بەرهەمئینان و هنارتنا پەترۆلا هەرێما كوردستانێ و داهاتێن نەپەترۆلی هاتە كرن.
وەزارەتا پلاندانانا ئیراقێ بەیاننامەیەك بەلاڤكر و تێدا هاتیە» د. محەمەد عەلی تەمیم، وەزیرێ پلاندانانێ ل رۆژا سێشەمبی 19/8/2025، سەرپەرشتییا كۆمبوونەكا هەڤپشك د ناڤبەرا شاندێ حوكمەتا فیدرالی و حوكمەتا هەرێما كوردستانێ كر، كو هەژمارەكا وەزیر و جێگر و رێڤەبەرێن گشتی یێن هەردو ئالییان تێدا بەرهەڤبوون».
بەیاننامەیا وەزارەتا پلاندانانا ئیراقێ ئاماژە ب وێ چەندێ كریە» د كۆمبوونێدا پێداچوون ب پێشكەفتنا دانوستاندنان ل سەر كێشەیێن هەلاویستی د ناڤبەرا هەردو ئالییاندا هاتە كرن، ژ وان بەرهەمئینان و هنارتنا پەترۆلا هەرێما كوردستانێ، داهاتێن نەپەترۆلی، هەروەسا تەوتینكرنا فەرمانبەرێن هەرێما كوردستانێ».
د بەیاننامەیێدا هاتیە ژی» پشكداربوویێن كۆمبوونێ دوپاتكر د دانوستاندناندا پێشكەفتنا بەرچاڤ ب دەستڤەهاتیە. ب تایبەتی بەرهەمئینان و هنارتنا پەترۆلا هەرێما كوردستانێ، چونكە هەموو مەرج و پێدڤی بۆ دەستپێكرنا بەرهەمئینان و هنارتنا پەترۆلێ ب رێكا كۆمپانییا ب بازاركرنا پەترۆلا ئیراقێ (سۆمۆ) هاتینە بجهئینان. هەروەسا بڕیار هاتە دان دانوستاندن بۆ
تمامكرنا وان مەرجێن ماین و پەیوەندیدار ب پرسێن دیڤە هەی، بەردەوام بن».
ژ ئالیێ حوكمەتا فیدرالیڤە، هەر ئێك ژ وەزیرێن پلاندانانێ، خواندنا بلند، ساخلەمیێ و داد، بەرهەڤبوون، ل گەل بریكارێ وەزارەتا پەترۆلێ بۆ كاروبارێن دەرئینانێ، و رێڤەبەرێن گشتی یێن فەرمانگەها قانوونی ل وەزارەتا دارایی و ئەمیندارییا گشتییا جڤاتا وەزیران، دیوانا چاڤدێرییا دارایی و هەژمارەكا رێڤەبەرێ گشتی ل وەزارەتێن پەترۆلێ و دارایی.
ژ ئالیێ حوكمەتا هەرێما كوردستانێ ژی ڤە، وەزیرێ سامانێن سروشتی، سەرۆكێ دیوانا جڤاتا وەزیران، سكرتێرێ جڤاتا وەزیران، سەرۆكێ نوونەرایەتییا حوكمەتا هەرێما كوردستانێ ل بەغدا، ل گەل هەژمارەكا رێڤەبەرێن گشتی، بەرهەڤبوون.

دیدار/ دلۆڤان ئاكرەیی

رێڤەبەرێ راگەهاندنا پەرلەمانێ كوردستانێ راگەهاند: هەكە رێككەڤتنێن سیاسی یێن د ناڤبەرا هێزێن سەركەفتی د هەلبژارتناندا ب سەركەفتییانە بهێنە ئەنجامدان، بەرهەڤی بۆ روونشتنا پەرلەمانێ كوردستانێ و هەلبژارتنا دەستەیا سەرۆكاتییا پەرلەمانی دێ هێتە كرن.
سامان ئەحمەد، رێڤەبەرێ راگەهاندنا پەرلەمانێ كوردستانێ بۆ رۆژنامەیا (ئەڤرۆ) گوت» دەستنیشانكرنا دەستەیا سەرۆكاتییا پەرلەمانی دێ ب هەلبژارتنەكا نهێنی و ڕاستەوخۆ بیت و ب دەنگێ پترییا ڕەهایا ئەندامێن پەرلەمانی دێ هێتە كرن و پشتی هەلبژارتنا دەستەیا سەرۆكاتیێ دێ پەرلەمانێ كوردستانێ دەست ب ئەنجامدانا ئەركێن خوە یێن گرنگ كەت، كو ئێك ژ وان ئەركان دێ پێكئینانا لژنەیێن هەردەمی یێن پەرلەمانێ كوردستانێ بیت كو هەژمارا وان دێ 19 لێژنە بن كو پێدڤییە هەر لێژنەیەك ژ پێنج ئەندامان كێمتر نەبیت و ژ 11 ئەندامان ژی زێدەتر نەبیت».
رێڤەبەرێ راگەهاندنا پەرلەمانێ كوردستانێ گوت ژی» ل دووڤ راگەهاندنا هەر دو شاندێن دانوستاندنكارێن پارتی و ئێكەتیێ، روونشتنا پەرلەمانێ كوردستانێ دێ ل نێزیكترین دەم دەستپێبكەت و پەرلەمانێ كوردستانێ هەموو بەرهەڤی كرینە بۆ ئەنجامدانا ڤێ روونشتنێ كو بەری نوكە ب رۆهنی باس ل وێ چەندێ هاتیە كرن بێی رێكەڤتنا سیاسی د ناڤبەرا هێزین سیاسی یێن سەركەفتی د هەلبژارتناندا چو روونشتنێن پەرلەمانی ناهێنە ئەنجامدان و هەكە رێكەفتنێن سیاسی بهێنە كرن دێ ژڤانەك بۆ روونشتنا پەرلەمانی هێتە دیار كرن و ئەو روونشتنە ژئالیێ ب تەمەنترین ئەندامێ پەرلەمانی ڤە هێتە سەرپەرشتیكرن».
سامان ئەحمەد ئاماژە كر ژی» ل 12 مەها شواتا ئەڤسالە روونشتنا ئێكێ ژئالیێ ب تەمەنترین ئەندامێ ڤێ خولا پەرلەمانی ڤە هاتە بڕێڤەبرن بەلێ پاشی وی ب داخوازا خوە دەست ژ وی ئەركی بەردا ، لەوما ل روونشتنا بهێت دێ دووەم ب تەمەنترین پەرلەمانتار بۆ ڤی ئەركی هێتە راسپاردن ژئالیێ سەرۆكێ دیوانا پەرلەمانی ڤە ب هەمان ئاوا كو بەری هینگی ب تەمەنترین پەرلەمانتار داخواز كربوو بۆ ڤی پۆستی».

سوپاسالارێ بەرێ یێ ئیراقێ هۆشداری ل دۆر دەربازكرنا پڕۆژە قانوونا حەشدا شەعبی ددەت و رادگەهینیت كو ل حالەتێ پەسەندكرنا وێ پڕۆژەقانوونێ، دێ ئیراق كەڤیتە قەیرانەكا مەزن، ژ بەر كو ب دیتنا ئەمریكا ب دەركرنا وێ قانوونێ تشتەك ب ناڤێ سەروەرییا ئیراقێ نامینیت.
بابەكر زێباری، سوپاسالارێ بەرێ یێ ئیراقێ گوت» وەسا دیارە ژ دەرڤەی ئیراقێ خواستەك هەیە بۆ دەربازكرنا پرۆژەقانوونا حەشدا شەعبی، عەلی لاریجانی ژی بۆ وێ پرسێ هاتیە ئیراقێ، چونكە ئیران پشتەڤانییا حەشدا شەعبی دكەت و دخوازیت ئەو پرشۆژە قانوونە بهێتە دەربازكرن و پەسەندكرن. نوكە دیارە بزاڤ یێن هاتینە چڕكرن بۆ دەربازكرن وێ پڕۆژە قانوونێ و بزاڤ دهێنە كرن ژی بۆ دەربازكرنا وێ، بەلێ هەكە ئەڤە بهێتە كرن دێ زیان بۆ هەبن، چونكە دووماهی هشداری ب ئیراقێ هاتیە دان، ب تایبەت ئەمریكا پێخوەش نینە و ل گەل پەسەندكرنا وێ پڕۆژەقانوونێ نینە و ب دەركرنا وێ قانوونێ دێ ئیراقێ ل بەرانبەر ئەمریكا راوەستیت».
زێباری دوپاتكر ژی» بۆ دەربازكرنا وێ پڕۆژە قانوونێ دڤێت پرس ب كورد و عەرەبێن سوننە ژی بهێتە كرن، چونكە نە كورد و نە عەرەبێن سوننە ل گەل پڕۆژە قانوونا حەشدا شەعبی دا نینن، عەرەبێن شیعە ژی د ناڤخوە دا ل سەر هەڤڕا نینن، هەر سەركەشییەك سەبارەت ڤێ چەندێ دێ زیانێ گەهینیتە ئیراقێ».
دیاركر ژی» ب دیتنا من د ڤان رۆژاندا دێ فشار بۆ دەربازكرنا پڕۆژە قانوونا حەشدا شەعبی زێدەتر بن، تێناگەهم ژی بۆچی پێداگری ل سەر دەركرنا وێ پڕۆژەقانوونێ دهێتە كرن؟ ژ بلی وێ چەندێ ژی، چەند گرۆپەكن ل دناڤ حەشدا شەبی ڤی كاری دكەن و نازڤرن بۆ بڕیارا دەولەتێ. بەلێ ل دووڤ دیتنا ئەمریكا هەمە پڕۆژە قانوونا حەشدا شەعبی بهێتە بهێتە دەربازكرن، تشتەك نامینیت ب ناڤێ سەروەرییا ئیراقێ و دەزگەهێن دەولەتی».
ب باوەرییا بابەكر زێباری، هەكە ئەو پڕۆژە قانوونە بهێتە دەربازكرن، دێ قەیرانەكا مەزن ل ئیراقێ دروست بیت.
ئەڤە د دەمەكیدایە كو ئەمریكا زێدەتر ژجارەكێ ب فەرمی دژایەتییا خوە بۆ دەربازكرنا پڕۆژە قانوونا حەشدا شەعبی دیاركریە و هندەك ژ ژێدەران ژی باس ل وێ چەندێ دەن كو ئەمریكا گەفە وێ ئێكێ كریە هەكە ئەو پڕۆژە قانوونە بهێتە دەربازكرن، دێ سزایان ل سەر ئیراقێ یان دەزگەه و كەسایەتیێن ئیراقی سەپینیت. بەلێ د بەرامبەر دا ل رۆژا ئێكشەمبی 17/8/2025، هادی عامری، فەرماندێ میلیشیا بەدر راگەهاند كو دێ ب جلكێن حەشدا شەعبیڤە چنە دناڤ جڤاتا نوونەرێن ئیراقێدا و پڕۆژە قانوونا حەشدا شەعبی دەرباز كەن.
پیشتر هاتبوو راگەهاند كو ئەگەرێ دلگرانییا ئەمریكا ژ پڕۆژە قانوونا حەشدا شەعبی بۆ وێ چەندێ دزڤریت كو ئەو پڕۆژە قانوونە دێ بیتە ئەگەرێ ب هێزبوونا هەژموونا ئیرانێ و میلیشیێن سەر ب ئیرانێڤە، ژ بلی وێ چەندێ دەستەیا حەشدا شەعبی ژی دكەت دەستەیەكا هەڤشێوەیێ وەزارەتا بەرگرییا ئیراقێ.

جێگرێ سەرۆكێ جڤاتا نوونەرێن ئیراقێ راگەهاند: ئومێد هەیە ل كۆمبوونا سێشەمبی 19/8/2025 جڤاتا وەزیرێن ئیراقێ بڕیارێ ل سەر هانرتنا مووچەیێ فەرمانبەرێن هەرێما كوردستانێ بدەت.
شاخەوان عەبدوللا، جێگرێ سەرۆكێ جڤاتا نوونەرێن ئیراقێ گوت» پەترۆل ئاستەنگ بوو ل پیشبەری كێشەیا مووچەی، بەلێ ئەو دۆسێیە هاتە چارەسەركرن و نوكە هاتە داخستن و ب هنارتنا پەترۆلی، راستەوخوە دێ مووچە هێتە خەرجكرن.
سەبارەت مووچەیێن فەرمانبەرێن هەرێما كوردستانێ یێن هەردو مەهێن شەش و حەفت یێن ئەڤسالە، شاخەوان عەبدوللای گوت» ئەو دو مووچە ژی دێ هێنە خەرجكرن».
جێگرێ سەرۆكێ جڤاتا نوونەرێن ئیراقێ باسێ كێشەیەكا دی یا مووچەی كر، ئەوژی داهاتێ ناڤخوەیە، سەبارەت وێ چەندێ گوت» ئەوژی هاتە چارەسەركرن».
شاخەوان عەبدوللای باسێ كۆمبوونەكا بەری چەند رۆژان ل گەل محەمەد شیاع سوودانی، سەرۆك وەزیرێن ئیراقێ كر و گوت» سەرۆك وەزیرێن ئیراقێ باس ل وێ چەندێ كر ئەو پێنگاڤێن ب لەز یێن هەرێما كوردستانێ و ئەو پێشڤەچوونێن هەین، ەكریە مە ئومێد هەبیت ل چەند رۆژێن داهاتی كێشەیا مووچەی چارەسەر ببیت».
ل رۆژا 13 ڤێ مەهێ، وەزارەتا سامانێن سروشتی ل هەرێما كوردستانێ راگەهاندبوو» ل گەل وەزارەتا پەترۆلا ئیراقێ ل سەر هنارتنا پەترۆلی رێككەفتین و 50 هزار بەرمیل دێ بۆ بكارئینانا ناڤخوەیی بیت. كۆنووسا رێككەفتنێ ژ ئالیێ 23 كەسایەتیێن شاندێن هەردو ئالییان هاتبوو ئیمزاكرن كو 17 ژ وان ئەندامێن شاندێ وەزارەتا پەترۆلا ئیراقێ بوون».

حوكمەتا ئیراقێ بزاڤێن خوە بۆ دیاركرنا دووماهی خالا رێكا گەشەپێدانێ چڕكریە. پەیڤدارێ حوكمەتا ئیراقێ ژی دبێژیت: لژنەیا دانوستاندكارا هەڤپشك ل گەل هەرێما كوردستانێ هەیە بۆ دیاركرنا وێ خالێ ل سنۆرێ توركیا.
باسم عەوادی، پەیڤدارێ حوكمەتا ئیراقێ د داخۆیانییەكا رۆژنامەڤانیدا راگەهاند» هەرێما كوردستانێ پشكەكا رەسەنە ژ ئیراقێ، لەوما لژنەیا دانوستاندكار د ناڤبەرا حوكمەتا فیدرالی و حوكمەتا هەرێما كوردستانێ هاتیە پێكئینان، بۆ رێككەفتنێ ل سەر دووماهی خالا پێكڤەگرێدانا رێكا گەشەپێدانێ ب توركیا».
پەیڤدارێ حوكمەتا ئیراقێ گوت ژی» گەشبینین بۆ گەهشت ب رێككەفتنێ ل دۆر دووماهی خالا پڕۆژەی، كو بابەتەكێ تەكنیكییە و گرێدایە ب رێڕەوی، تێچووی، دابینكرنا هێلێن شەمەندەفەرێ و پێدڤیێن تەكنیكی یێن دی».
بەری چەند رۆژان محەمەد شیاع سوودانی، سەرۆك وەزیرێن ئیراقێ سەرۆكایەتییا كۆمبوونەكێ ل گەل لژنەیا تایبەت یا پڕۆژەیێ رێكا گەشەپێدانێ كربوو.
ب گۆڕەی بەیاننامەیەكا نڤیسینگەها سەرۆك وەزیرێن ئیراقێ، ئێك ژ ئارمانجێن كۆمبوونێ، دەستپێكرنا پرۆسەیا نووژەنكرنا هێلا ئاسنی فاو بۆ پێشابیرێ بوو.
پەیڤدارێ حوكمەتا ئیراقێ رۆهنكر ژی» مەبەست ژ هێلا ئاسنی فاو – پێشابیر، هەموو هێلێن شەمەندەفەرێ ل ئیراقێ، بەلێ هندەك ژ هێلان دێ هێنە نووژەنكرن و هندەك هێل ژی بۆ دەرڤەی باژێران دێ هێنە ڤەگوهاستن».
دیاركر ژی» چەند پشكەكێن نوو ژ هێلا شەمەندەفەرێ ل بەندەریچ فاو تاكو دووماهی خالا هێلێ ل بەسرە دێ هێنە دروستكرن، هێلەكا نوو یا شەمەندەفەرێ ژی ل دووماهی خال ل رەبیعە بۆ خالا پێكڤە گرێدانێ ل سەر سنۆرێ ئیراقێ و توركیا دێ هێتە دروستكرن».
درێژییا رێكا گەشەپێدانێ هزار و 200 كیلۆمەترە پێكدهێت ژ هێلێن ڤەگوهاستنا كەلوپەلان، گەشتیاران و هێلا ئاسنی، ل بەندەرێ فاو ل پارێزگەها بەسرا ڤەدگریت هەتا ناڤ ئاخا توركیا. خەرجییا پڕۆژەی ب 17 ملیار دۆلاران هاتیە خەملاندن، شوان 10،5 بۆ كڕینا شەمەندەفەرێن كارەبایی یێن مۆدێرن و 6،5 ملیار دۆلار بۆ درێژكرنا هێلا ئاسنێ دێ هێتە تەرخانكرن، قۆناغا ئێكێ ژ پڕۆژەی ل سالا 2028 دێ تمام بیت، قۆناغا دووماهیێ ل سالا 2050 دێ تمام بیت.

دیدار/ دلۆڤان ئاكرەیی

بەرپرسێ پەیوەندیێن دەرڤە یێن پارتی دیموكراتی كوردستان راگەهاند: وەزارەتا كارەبا ئیراقێ د وارێ بەرهەمئینانا كارەبێدا ژئالیێ كەرتێ تایبەتڤە مفای ژ ئەزموونا وەزارەتا كارەبا هەرێما كوردستانێ وەردگریت و دشێت نوكە ژی د وارێ بەلاڤكرن و رێكخستنا بهایدا مفای ژ ئەزموونا هەرێما كوردستانێ و پڕۆژەیێ (روناهی) وەرگریت.
هوشیار سیوەیلی، بەرپرسێ پەیوەندیێن دەرڤە یێن پارتی دیموكراتی كوردستان بۆ رۆژنامەیا (ئەڤرو) گوت» ل سالا 2006 وەزیرێ وی دەمی یێ كارەبا ئیراقێ (ئەیهەم سامەڕائی) گرێبەستا وەستگەها بەرهەمئینانا كارەبا هەولێرێ دگەل كۆمپانییا (ماس گڵۆبال) كو وی دەمی (ماس جۆردەن) بوو ئیمزا كر، پشتی دەمەكێ كورت، كەریم وەحید بوو وەزیر و گرێبەست هەلوەشاندەڤە، بزاڤێن كۆمپانیێ و یێن مە ژی بۆ بەردەوامبوونا پڕۆژەی د بێ مفا بوون، وەزیرێ كارەبا وی دەمی یێ ئیراقێ د وێ باوەریێدا بوو كو كەرتێ تایبەت د وارێ بەرهەمئینانا كارەبێدا سەركەفتی نابیت، پشتی سەركەفتنا وێ ئەزموونێ و دانانا سێ وەستگەهێن هەولێرێ و سلێمانیێ و دهۆكێ، حوكمەتا ئیراقێ هانا خوە بۆ هەمان وەبەرهێنەر بر دا ئەزموونا هەرێما كوردستانێ ل دەڤەرێن دی یێن ئیراقێ دووبارە بكەتەڤە ، لەوما هەكە د وی واری دا مفای ژ ئەزموونا هەرێمێ وەرگرتبیت، دشێن مفای ژ پڕۆژەیێ (روناهی) ژی وەرگرن ب رێكا دانانا پێڤەرێن زیرەك و رێكخستنا بهای».
بەرپرسێ پەیوەندییێن دەرەڤە یێن پارتی ئاشكرا كر» وەزیرێ كارەبا ئیراقێ بەری نوكە راگەهاند بوو، ئاستێ بەرهەمئینانێ ل ئیراقێ گەهشتیە 28 هزار مێگاواتان، ل دووڤ ئامارێن بانكا نێڤدەولەتی، 59% ژ ڤێ رێژەیێ بلند دبیت یان ب هەروە دچیت، ئەڤە كێشەیەكا مەزنە و كێشەیەكا دی نزمییا بهایێ كارەبێیە، لەورا ب مفا وەرگرتن ژ شێوازێ بجهئینانا پڕۆژەیێ (روناهی) دشیاندایە هەتا ئاستەكێ باش ئەڤ هەردوو كێشە بهێنە چارەسەركرن، لێ زێدەكرنا بهای پێدڤی ب ئیرادەیەكا سیاسی هەیە، بەلێ ئەو ئیرادە ل دەڤ ئیراقێ نینە».